Kings 1 = (Ethiopic) Book of Kings 3

http://www.sacred-texts.com/bib/poly/kg1001.htm 1↗     ¹ ወዳዊትሰ ፡ ንጉሥ ፡ ልህቀ ፡ ወኀለፈ ፡ መዋዕሊሁ ፡ ወይከድንዎ ፡ አልባሰ ፡ ወኢያመውቆ ።
² ወይቤሉ ፡ ደቁ ፡ ለዳዊት ፡ ይኅሥሡ ፡ ለእግዚእነ ፡ ለንጉሥ ፡ ወለተ ፡ ድንግለ ፡ ወያምጽእዋ ፡ ኀበ ፡ ንጉሥ ፡ ወትሰክብ ፡ ምስሌሁ ፡ ወተሐቅፎ ፡ ወታስተማውቆ ፡ ወይመውቅ ፡ እግዚእነ ፡ ንጉሥ ።
³ ወኀሠሡ ፡ ወለተ ፡ ሠናይተ ፡ እምነ ፡ ኵሉ ፡ ደወለ ፡ እስራኤል ፡ ወረከቡ ፡ አቢሳሃ ፡ ሰሜናዊት ፡ ወወሰድዋ ፡ ኀበ ፡ ንጉሥ ።
⁴ ወነበረት ፡ ትትለአኮ ፡ ወንጉሥሰ ፡ ኢያእመራ ።
⁵ ወአዶንያስ ፡ ወልደ ፡ አጊት ፡ ተንሥአ ፡ ወይቤ ፡ አነ ፡ እነግሥ ፡ ወገብረ ፡ ሎቱ ፡ ሰረገላተ ፡ ወአፍራሰ ፡ ወ ፡ ፶ብእሴ ፡ እለ ፡ ይረውጹ ፡ ቅድሜሁ ።
⁶ ወግሙራ ፡ ኢከልኦ ፡ ኦቡሁ ፡ ወኢይቤሎ ፡ ለምንት ፡ ትገብር ፡ ከመዝ ፡ ወሠናይ ፡ ውእቱ ፡ ወላሕይ ፡ ንጹ ፡ ፈድፋደ ፡ ወኪያሁ ፡ ወለደ ፡ እምድኅረ ፡ አቤሴሎም ።
⁷ ወኵሉ ፡ ምክሩ ፡ ምስለ ፡ ኢዮአብ ፡ ወልደ ፡ ሶርህያ ፡ ወምስለ ፡ አብያታር ፡ ካህን ፡ ወተለውዎ ፡ ለአዶንያስ ፡ ወረድእዎ ።
⁸ ወሳዶቅ ፡ ካህን ፡ ወብንያስ ፡ ወልደ ፡ ዮዳሔ ፡ ወዮናታን ፡ ነቢይ ፡ ወሳሚ ፡ ወሬሲ ፡ ደቂቀ ፡ ኀይሉ ፡ ለዳዊት ፡ ኢተለውዎ ፡ ለኦዶንያስ ።
⁹ ወጠብሐ ፡ ኦዶንያስ ፡ አበግዐ ፡ ወአጣሌ ፡ ወአልህምተ ፡ በኀበ ፡ ኤቲ ፡ ዘዝኤልቲ ፡ ዘእምእኃዘ ፡ ምድረ ፡ ሮጌል ፡ ወጸውዐ ፡ ኵሎ ፡ አኀዊሁ ፡ ደቂቀ ፡ ንጉሥ ፡ ወኵሎ ፡ ጽኑዓነ ፡ ይሁዳ ፡ ደቂቀ ፡ ንጉሥ ፤
¹⁰ ወናታንሃ ፡ ነቢይ ፡ ወብንያስ ፡ ወጽኑዓኒሆሙ ፡ ወሰሎሞንሃ ፡ እኁሁ ፡ ኢጸውዖሙ ።
¹¹ ወይቤላ ፡ ናታን ፡ ለቤርሳቤሕ ፡ እሙ ፡ ለሰሎሞን ፡ እንዘ ፡ ይብል ፡ ኢሰማዕሊኑ ፡ ከመ ፡ ነግሠ ፡ አዶንያስ ፡ ወልደ ፡ አጊት ፡ ወእግዚእነሰ ፡ ዳዊት ፡ ኢያእመረ ።
¹² ወይእዜኒ ፡ ንዒ ፡ ኣምክርኪ ፡ ምክረ ፡ ወታድኅኒ ፡ ነፍሰሊ ፡ ወነፍሰ ፡ ሰሎሞን ፡ ወልድኪ ።
¹³ ንዒ ፡ ሖሪ ፡ ኀበ ፡ ዳዊት ፡ ንጉሥ ፡ ወትብልዮ ፡ አንተ ፡ እግዚእየ ፡ መሐልከ ፡ ለአመትከ ፡ እንዘ ፡ ትብል ፡ ወልድኪ ፡ ሰሎሞን ፡ ይነግሥ ፡ እምድኅሬየ ፡ ወውእቱ ፡ ይነብር ፡ ዲበ ፡ መንበርየ ፡ ወእፎ ፡ ከመ ፡ ነግሠ ፡ አዶንያስ ።
¹⁴ ወእንዘ ፡ አንቲ ፡ ትትናገሪ ፡ ምስለ ፡ ንጉሥ ፡ በህየ ፡ እበውእ ፡ አነሂ ፡ እተልወኪ ፡ ወእፌጽም ፡ ነገርኪ ።
¹⁵ ወቦአት ፡ ቤርሳቤሕ ፡ ኀበ ፡ ንጉሥ ፡ ውስተ ፡ ጽርሕ ፡ ወንጉሥሰ ፡ ልህቀ ፡ ጥቀ ፡ ወአቢሳ ፡ ሰሜናዊት ፡ ትትለአኮ ፡ ለንጉሥ ።
¹⁶ ወደነነት ፡ ቤርሳቤሕ ፡ ወሰገደት ፡ ለንጉሥ ፡ ወይቤላ ፡ ንጉሥ ፡ ምንተ ፡ ኮንኪ ።
¹⁷ ወትቤሎ ፡ እግዚእየ ፡ ንጉሥ ፡ አንተ ፡ መሐልከ ፡ በአምላክከ ፡ ለአመትከ ፡ እንዘ ፡ ትብል ፡ ከመ ፡ ወልድኪ ፡ ሰሎሞን ፡ ይነግሥ ፡ እምድኅሬየ ፡ ወውእቱ ፡ ይነብር ፡ ዲበ ፡ መንበርየ ።
¹⁸ ወናሁ ፡ ይእዜ ፡ ነግሠ ፡ አዶንያስ ፡ ወአንተ ፡ እግዚእየ ፡ ንጉሥ ፡ ኢያእመርከ ።
¹⁹ ወጠብሐ ፡ አልህምተ ፡ ወአባግዐ ፡ ወአጣሌ ፡ ብዙኀ ፡ ወጸውዐ ፡ ኵሎ ፡ ደቂቀ ፡ ንጉሥ ፡ ወአብያታር ፡ ካህን ፡ ወኢዮአብ ፡ መልአከ ፡ ኀይል ፤ ወሰሎሞንሂ ፡ ገብርከ ፡ ኢጸውዐ ።
²⁰ ወኪያከ ፡ እግዚእየ ፡ ንጉሥ ፡ አዕይንተ ፡ ኵሉ ፡ እስራኤል ፡ ይሴፈዋከ ፡ ታይድዖሙ ፡ መኑ ፡ ይነብር ፡ ውስተ ፡ መንበርከ ፡ እግዚእየ ፡ ንጉሥ ፡ እምድኅሬከ ።
²¹ ወእምከመ ፡ ሰከበ ፡ እግዚእየ ፡ ንጉሥ ፡ ምስለ ፡ አበዊሁ ፡ ወንከውን ፡ አነ ፡ ወወልድየ ፡ ሰሎሞን ፡ ኃጥኣነ ።
²² ወእንዘ ፡ ዓዲ ፡ ትትናገር ፡ ይእቲ ፡ ምስለ ፡ ንጉሥ ፡ ወቦአ ፡ ናታን ፡ ነቢይ ፡ ቅድመ ፡ ንጉሥ ፡
²³ ወሰገደ ፡ ለንጉሥ ፡ በገጹ ፡ ውስተ ፡ ምድር ።
²⁴ ወይቤሎ ፡ ናታን ፡ ነቢይ ፡ እግዚእየ ፡ ንጉሥ ፡ አንተኑ ፡ ትቤ ፡ አዶንያስ ፡ ይነግሥ ፡ እምድኅሬየ ፡ ወውእቱ ፡ ይነብር ፡ ውስተ ፡ መንበርየ ።
²⁵ እስመ ፡ ወረደ ፡ ዮም ፡ ወሦዐ ፡ አልህምተ ፡ ወአባግዐ ፡ ወአጣሌ ፡ ብዙኀ ፡ ወጸውዖሙ ፡ ለኵሎሙ ፡ ደቂቀ ፡ ንጉሥ ፡ ወመላእክተ ፡ ኀይል ፡ ወአብያታር ፡ ካህን ፡ ወሀለዉ ፡ ይበልዑ ፡ ወይሰትዩ ፡ በቅድሜሁ ፡ ወይቤልዎ ፡ ሕያው ፡ አበ ፡ ነጋሢ ፡ አዶንያስ ።
²⁶ ወኪያየሰ ፡ ገብርከ ፡ ወሳዶቅሃ ፡ ካህን ፡ ወብንያስሃ ፡ ወልደ ፡ ዮዳሔ ፡ ወሰሎሞንሃ ፡ ገብርከ ፡ ኢጸውዐ ።
²⁷ ለእመ ፡ እምኀበ ፡ እግዚእየ ፡ ንጉሥ ፡ ኮነ ፡ ዝንቱ ፡ ነገር ፡ ወኢነገርኮ ፡ ለገብርከ ፡ መኑ ፡ ይነብር ፡ ውስተ ፡ መንበርከ ፡ አግዚእየ ፡ ንጉሥ ፡ እምድኅሬሁ ።
²⁸ ወአውሥአ ፡ ዳዊት ፡ ወይቤ ፡ ንጉሥ ፡ ጸውዕዋ ፡ ለቤርሳቤሕ ፡ ወቦአት ፡ ቅድመ ፡ ንጉሥ ፡ ወቆመት ፡ ቅድሜሁ ።
²⁹ ወመሐለ ፡ ንጉሥ ፡ ወይቤ ፡ ሕያው ፡ እግዚአብሔር ፡ ዘቤዘዋ ፡ ለነፍስየ ፡ እምነ ፡ ኵሉ ፡ ምንዳቤ ፤
³⁰ ከመ ፡ በከመ ፡ መሐልኩ ፡ ለኪ ፡ በእግዚአብሔር ፡ አምላከ ፡ እስራኤል ፡ እንዘ ፡ እብል ፡ ከመ ፡ ሰሎሞን ፡ ወልድኪ ፡ ይነግሥ ፡ እምድኅሬየ ፡ ወውእቱ ፡ ይነብር ፡ ውስተ ፡ መንበርየ ፡ ህየንቴየ ፡ ከመ ፡ ከማሁ ፡ እገብር ፡ ዮም ፡ በዛቲ ፡ ዕለት ።
³¹ ወደነነት ፡ ቤርሳቤሕ ፡ በገጻ ፡ ውስተ ፡ ምድር ፡ ወሰገደት ፡ ለንጉሥ ፡ ወትቤ ፡ ሕያው ፡ እግዚእየ ፡ ንጉሥ ፡ ዳዊት ፡ ለዓለም ።
³² ወይቤ ፡ ዳዊት ፡ ንጉሥ ፡ ጸውዑ ፡ ሊተ ፡ ሳዶቅሃ ፡ ካህነ ፡ ወብንያስ ፡ ወልደ ፡ ዮዳሔ ፡ ወቦኡ ፡ ኀበ ፡ ንጉሥ ፡ ወናታን ፡ ነቢይ ።
³³ ወይቤሎሙ ፡ ንጉሥ ፡ ንሥኡ ፡ አግብርተ ፡ እግዚእክሙ ፡ ምስሌክሙ ፡ ወአጽዕንዎ ፡ ለወልድየ ፡ ሰሎሞን ፡ ዲበ ፡ በቅልየ ፡ ወአውርድዎ ፡ ውስተ ፡ ግዮን ።
³⁴ ወቅብእዎ ፡ በህየ ፡ ሳዶቅ ፡ ካህን ፡ ወናታን ፡ ነቢይ ፡ ወአንግሥዎ ፡ ላዕለ ፡ እስራኤል ፡ ወንፍሑ ፡ ቀርነ ፡ ወበሉ ፡ ሕያው ፡ አበ ፡ ነጋሢ ፡ ሰሎሞን ።
³⁵ ወዕርጉ ፡ ወትልውዎ ፡ ወይባእ ፡ ወይንበር ፡ ውስተ ፡ መንበርየ ፡ ወውእቱ ፡ ይነግሥ ፡ ህየንቴየ ፡ ወአነ ፡ አዘዝኩ ፡ ይንግሥ ፡ ላዕለ ፡ እስራኤል ፡ ወይሁዳ ።
³⁶ ወአውሥኦ ፡ ብንያስ ፡ ወልደ ፡ ዮዳሔ ፡ ለንጉሥ ፡ ወይቤሎ ፡ ወይኩን ፡ ከማሁ ፡ ምእመነ ፡ ወይረሲ ፡ እግዚአብሔር ፡ ለእግዚእየ ፡ ለንጉሥ ።
³⁷ በከመ ፡ ሀለወ ፡ እግዚአብሔር ፡ ምስለ ፡ እግዚእየ ፡ ንጉሥ ፡ ከማሁ ፡ ምስለ ፡ ሰሎሞንሂ ፡ የሀሉ ፡ ወይዕበይ ፡ መንበሩ ፡ እምነ ፡ መንበረ ፡ እግዚእየ ፡ ንጉሥ ፡ ዳዊት ።
³⁸ ወወረዱ ፡ ሳዶቅ ፡ ካህን ፡ ወናታን ፡ ነቢይ ፡ ወብንያስ ፡ ወልደ ፡ ዮዳሔ ፡ ወኬርቲ ፡ ወፌልቲ ፡ ወአጽዐንዎ ፡ ለሰሎሞን ፡ ላዕለ ፡ በቅለ ፡ ንጉሥ ፡ ዳዊት ፡ ወወሰድዎ ፡ ውስተ ፡ ግዮን ።
³⁹ ወነሥአ ፡ ሳዶቅ ፡ ካህን ፡ ወአምጽአ ፡ ቀርነ ፡ ቅብእ ፡ እምነ ፡ ደብተራ ፡ ወቀብኦ ፡ ለሰሎሞን ፡ ወነፍሐ ፡ ቀርነ ፡ ወይቤሉ ፡ ኵሉ ፡ ሕዝብ ፡ ሕያው ፡ አበ ፡ ነጋሢ ፡ ሰሎሞን ።
⁴⁰ ወዐርጉ ፡ ኵሉ ፡ ሕዝብ ፡ ወተለውዎ ፡ ወዘበጡ ፡ ከበሮ ፡ ወመሰንቆ ፡ ወተፈሥሑ ፡ ዐቢየ ፡ ትፍሥሕተ ፡ ወደንገፀት ፡ ምድር ፡ እምነ ፡ ቃሎሙ ።
⁴¹ ወሰምዐ ፡ አዶንያስ ፡ ወኵሎሙ ፡ ኅሩያኒ[ሁ] ፡ ወእሙንቱሰ ፡ አኅለቁ ፡ መሲሐ ፡ ወሰምዐ ፡ ኢዮአብ ፡ ቃለ ፡ ቀርን ፡ ወይቤ ፡ ምንት ፡ ውእቱ ፡ ዝንቱ ፡ ድምፀ ፡ ሀገር ።
⁴² ወእንዘ ፡ ዓዲ ፡ ይትናገር ፡ ወናሁ ፡ ዮናታን ፡ ወልደ ፡ አብያታር ፡ ካህን ፡ ቦአ ፡ ወይቤሎ ፡ አዶንያስ ፡ ባእ ፡ እስመ ፡ ብእሲ ፡ ኀይል ፡ አንተ ፡ ወሠናየ ፡ ትዜኑ ።
⁴³ ወአውሥአ ፡ ዮናታን ፡ ወይቤ ፡ አንግሦ ፡ እግዚእነ ፡ ንጉሥ ፡ ዳዊት ፡ ለሰሎሞን ።
⁴⁴ ወፈነወ ፡ ንጉሥ ፡ ምስሌሁ ፡ ሳዶቅሃ ፡ ካህን ፡ ወናታንሃ ፡ ነቢይ ፡ ወብንያስ ፡ ወልደ ፡ ዮዳሔ ፡ ወኬርቲ ፡ ወፌልቲ ፡ ወአጽዐንዎ ፡ ዲበ ፡ በቅለ ፡ ንጉሥ ።
⁴⁵ ወቀብእዎ ፡ ሳዶቅ ፡ ካህን ፡ ወናታን ፡ ነቢይ ፡ ወአንገሥዎ ፡ በግዮን ፡ ወዐርጉ ፡ እምህየ ፡ እንዘ ፡ ይትፌሥሑ ፡ ወደምፀት ፡ ሀገር ፡ ወዝንቱ ፡ ውእቱ ፡ ነገር ፡ ዘሰማዕክሙ ።
⁴⁶ ወነበረ ፡ ሰሎሞን ፡ ውሰተ ፡ መንበረ ፡ መንግሥት ።
⁴⁷ ወቦኡ ፡ አግብርተ ፡ ንጉሥ ፡ ያእኵትዎ ፡ ለንጉሥ ፡ ለእግዚእነ ፡ ዳዊት ፡ ወይቤልዎ ፡ ያሠኒ ፡ እግዚአብሔር ፡ ላዕለ ፡ ስሙ ፡ ለሰሎሞን ፡ ወልድከ ፡ ፈድፋደ ፡ እምነ ፡ ስምከ ፡ ወያዕብዮ ፡ እግዚአብሔር ፡ ለመንበሩ ፡ እምነ ፡ መንበርከ ፤ ወሰገደ ፡ ንጉሥ ፡ በውስተ ፡ ምስካቡ ።
⁴⁸ ወንጉሥኒ ፡ ከመዝ ፡ ይቤ ፡ ይትባረክ ፡ እግዚአብሔር ፡ አምላከ ፡ እስራኤል ፡ ዘወሀበ ፡ ዮም ፡ እምነ ፡ ዘርእየ ፡ ዘይነብር ፡ ዲበ ፡ መንበርየ ፡ እንዘ ፡ ይሬእያ ፡ አዕይንትየ ።
⁴⁹ ወተንሥኡ ፡ ኵሎሙ ፡ ኅሩያኒሁ ፡ ለአዶንያስ ፡ ወሖሩ ፡ ብእሲ ፡ ብእሲ ፡ ፍኖቶ ።
⁵⁰ ወአዶንያስ ፡ ፈርሀ ፡ እምነ ፡ ቅድመ ፡ ገጹ ፡ ለሰሎሞን ፡ ወተንሥአ ፡ ወሖረ ፡ ወአኀዘ ፡ አቅርንተ ፡ ምሥዋዕ ።
⁵¹ ወአይድዕዎ ፡ ለሰሎሞን ፡ ወይቤልዎ ፡ ናሁ ፡ አዶንያስ ፡ ፈርህ ፡ እምነ ፡ ገጸ ፡ ንጉሥ ፡ ሰሎሞን ፡ ወአኀዘ ፡ አቅርንተ ፡ ምሥዋዕ ፡ ወይቤ ፡ ይምሐል ፡ ሊተ ፡ ሰሎሞን ፡ ዮም ፡ ከመ ፡ ኢይቅትለኒ ፡ በኀፂን ።
⁵² ወይቤ ፡ ሰሎሞን ፡ እመ ፡ ኮነ ፡ ወልደ ፡ ኀይል ፡ ኢትወድቅ ፡ እምነ ፡ ሥዕርቱ ፡ ውስተ ፡ ምድር ፡ ወእመሰ ፡ ተረክበት ፡ እኪት ፡ በላዕሌሁ ፡ ይመውት ።
⁵³ ወለአከ ፡ ሰሎሞን ፡ ንጉሥ ፡ ወአውረድዎ ፡ እምነ ፡ መልዕልተ ፡ ምሥዋዕ ፡ ወቦአ ፡ ወሰገደ ፡ ለሰሎሞን ፡ ወይቤሎ ፡ ሰሎሞን ፡ እቱ ፡ ቤተከ ።

http://www.sacred-texts.com/bib/poly/kg1002.htm 2↗     ¹ ወበጽሐ ፡ መዋዕሊሁ ፡ ለዳዊት ፡ ለመዊት ፡ ወአዘዞ ፡ ለሰሎሞን ፡ ወልዱ ፡ ወይቤሎ ፤
² አንሰ ፡ ሖርኩ ፡ በኵሉ ፡ ፍኖተ ፡ ምድር ፡ ወአንተ ፡ ባሕቱ ፡ ጽናዕ ፡ ወትባዕ ፡ ወኩን ፡ ብእሴ ።
³ ወዕቀብ ፡ ትእዛዞ ፡ ለአምላክከ ፡ እግዚአብሔር ፡ ከመ ፡ ትሖር ፡ በፍኖቱ ፡ ወትዕቀብ ፡ ትእዛዞ ፡ ወኵነኔሁ ፡ ወፍትሖ ፡ ዘጽሑፍ ፡ ውስተ ፡ ሕገ ፡ ሙሴ ፡ ከመ ፡ ታእምር ፡ ዘከመ ፡ ትገብር ፡ ኵሎ ፡ ዘእኤዝዘከ ፤
⁴ ከመ ፡ ያቅም ፡ እግዚአብሔር ፡ ቃሎ ፡ ዘከመ ፡ ነበበ ፡ ወይቤ ፡ ለእመ ፡ ዐቀቡ ፡ ደቂቅከ ፡ ፍኖቶሙ ፡ ይሖሩ ፡ ቅድሤየ ፡ በጽድቅ ፡ ወበኵሉ ፡ ልቦሙ ፡ ይቤ ፡ ኢይሜረው ፡ ለከ ፡ ብእሲ ፡ እምነ ፡ መልዕልተ ፡ መንበረ ፡ እስራኤል ።
⁵ ወለሊከ ፡ ታአምር ፡ ኵሎ ፡ ዘከመ ፡ ረሰየኒ ፡ ኢዮአብ ፡ ወልደ ፡ ሶርህያ ፡ ወኵሎ ፡ ዘከመ ፡ ገብረ ፡ ላዕለ ፡ ፪መላእከተ ፡ ኀይሎሙ ፡ ለእስራኤል ፡ ላዕለ ፡ አቤኔር ፡ ወልደ ፡ ኔር ፡ ወላዕለ ፡ አሜሳይ ፡ ወልደ ፡ ኢያቴር ፡ ወቀተሎሙ ፡ ወአግብአ ፡ ደመ ፡ ፀሩ ፡ ላዕለ ፡ ሕይወቱ ፡ ውስተ ፡ ሐቌሁ ፡ ወበአሣእኑ ፡ ዘውስተ ፡ እግሩ ።
⁶ ወትገብር ፡ ዘከመ ፡ ጥበብከ ፡ ወአንተ ፡ ታወርድ ፡ ሢበቲሁ ፡ በደም ፡ ውስተ ፡ መቃብር ።
⁷ ወለደቂቀ ፡ ቤርዜሊ ፡ ገለዓዳዊ ፡ ግበር ፡ ምሕረተ ፡ ወይኩኑ ፡ ምስለ ፡ እለ ፡ ይበልዑ ፡ ውስተ ፡ ማእድከ ፡ እስመ ፡ ውእቱ ፡ ቀርበኒ ፡ አመ ፡ እትኀጣእ ፡ እምቅድመ ፡ ገጸ ፡ አቤሴሎም ፡ እኁከ ።
⁸ ወናሁ ፡ ኀቤከ ፡ ሳሚ ፡ ወልደ ፡ ጌራ ፡ ወልደ ፡ ኢያሚን ፡ ዘእምነ ፡ ባቱሪም ፡ ወውእቱ ፡ ረገመኒ ፡ መርገመ ፡ እኩየ ፡ አመ ፡ መዋዕለ ፡ አሐውር ፡ በትዕይንት ፡ ወእምዝ ፡ ወረደ ፡ ውስተ ፡ ዮርዳኖስ ፡ ወተቀበለኒ ፡ ወመሐልኩ ፡ ሎቱ ፡ በእግዚአብሔር ፡ እንዘ ፡ እብል ፡ ከመ ፡ ኢይቅትልከ ፡ በኀፂን ።
⁹ ወአንተ ፡ ኢታንጽሖ ፡ እስመ ፡ ብእሲ ፡ ጠቢብ ፡ አንተ ፡ ወአእምር ፡ ዘከመ ፡ ትሬስዮ ፡ ወታወርድ ፡ ሢበቲሁ ፡ በደም ፡ ውስተ ፡ መቃብር ።
¹⁰ ወስከበ ፡ ዳዊት ፡ ምስለ ፡ አበዊሁ ፡ ወተቀብረ ፡ ውስተ ፡ ሀገረ ፡ ዳዊት ።
¹¹ ወመዋዕሊሁ ፡ ዘነግሠ ፡ ዳዊት ፡ ላዕለ ፡ እስራኤል ፡ (በኢየሩሳሌም ፡) ፵ዓመተ ፤ በኬብሮን ፡ ነግሠ ፡ ፯ዓመተ ፡ ወበኢየሩላሌም ፡ ፴ወ፫ዓመተ ።
¹² ወሰሎሞን ፡ ነበረ ፡ ውስተ ፡ መንበረ ፡ ዳዊት ፡ አቡሁ ፡ ወጸንዐ ፡ መንግሥቱ ፡ ፈድፋደ ።
¹³ ወቦኦ ፡ አዶንያስ ፡ ኀበ ፡ ቤርሳቤሕ ፡ እሙ ፡ ለሰሎሞን ፡ ወሰገደ ፡ ላቲ ፡ ወትቤሎ ፡ ሰላም ፡ ለምጽአትከ ፡ ወይቤላ ፡ ሰላም ፡ ለኪ ።
¹⁴ ትካዘ ፡ ብየ ፡ ኀቤኪ ፡ ወትቤሎ ፡ ንግረኒ ።
¹⁵ ወይቤላ ፡ ለሊኪ ፡ ታአምሪ ፡ ከመ ፡ ሊተ ፡ ይእቲ ፡ መንግሥት ፡ ወኀቤየ ፡ ንብአ ፡ ገጾሙ ፡ ለኵሉ ፡ እስራኤል ፡ ከመ ፡ ያንግሡኒ ፡ ወተመይጠት ፡ መንግሥት ፡ ወኮነት ፡ ለእኁየ ፡ እስመ ፡ እምኀበ ፡ እግዚአብሔር ፡ ኮነት ፡ ሎቱ ።
¹⁶ ወይእዜኒ ፡ አሐተ ፡ ስእለተ ፡ እስእል ፡ አነ ፡ እምኀቤኪ ፡ ወኢትሚጢ ፡ ገጸኪ ፡ ወትቤሎ ፡ ቤርሳቤሕ ፡ በል ።
¹⁷ ወይቤላ ፡ በልዮ ፡ ለሰሎሞን ፡ ንጉሥ ፡ እስመ ፡ ኢይመይጥ ፡ ገጾ ፡ እምኔኪ ፡ ወየሀበኒ ፡ አቢሳሃ ፡ ሰሜናዊተ ፡ ትኩነኒ ፡ ብእሲተ ።
¹⁸ ወትቤሎ ፡ ቤርሳቤሕ ፡ ሠናይ ፤ አነ ፡ እነግሮ ፡ ለንጉሥ ፡ በእንቲአከ ።
¹⁹ ወቦአት ፡ ቤርሳቤሕ ፡ ኀበ ፡ ንጉሥ ፡ ሰሎሞን ፡ ከመ ፡ ትንግሮ ፡ በእንተ ፡ አዶንያስ ፡ ወተንሥአ ፡ ንጉሥ ፡ ቅድሜሃ ፡ ወተአምኃ ፡ ወነበረ ፡ ውስተ ፡ መንበሩ ፡ ወአንበሩ ፡ መንበረ ፡ ለእሙ ፡ ለንጉሥ ፡ ወነበረት ፡ በየማኑ ፡ ለንጉሥ ።
²⁰ ወትቤሎ ፡ አሐተ ፡ ስእለተ ፡ አነ ፡ እስእል ፡ እምኀቤከ ፡ ወኢትሚጥ ፡ ንጸከ ፡ እምኔየ ፡ ወይቤላ ፡ ንጉሥ ፡ ሰአሊ ፡ እም ፡ ዳእሙ ፡ ወኢይመይጥ ፡ ገጽየ ፡ እምኔኪ ።
²¹ ወትቤሎ ፡ የሀብዎ ፡ አቢሳሃ ፡ ሰሜናዊት ፡ ለአዶንያስ ፡ እኁከ ፡ ትኩኖ ፡ ብእሲቶ ።
²² ወተሰጥዋ ፡ ሰሎሞን ፡ ንጉሥ ፡ ወይቤላ ፡ ለእሙ ፡ ወለምንት ፡ ትስእሊ ፡ ሎቱ ፡ አቢሳሃ ፡ ሰሜናዊተ ፡ ለአዶንያስ ፡ ወሰአሊ ፡ ሎቱ ፡ መንግሥተ ፡ እስመ ፡ ውእቱ ፡ እኁየ ፡ ዘይልህቀኒ ፡ ወምስሌሁ ፡ አብያታር ፡ ካህን ፡ ወምስሌሁ ፡ ኢዮአብ ፡ ወልደ ፡ ሶርህያ ፡ ካልእ ፡ መልአከ ፡ ኀይል ።
²³ ወመሐለ ፡ ንጉሥ ፡ ሰሎሞን ፡ በእግዚአብሔር ፡ እንዘ ፡ ይብል ፡ ከመዝ ፡ ለይረስየኒ ፡ እግዚአብሔር ፡ ወከመዝ ፡ ለይቅትለኒ ፡ ከመ ፡ ላዕለ ፡ ነፍሱ ፡ ነበበ ፡ አዶንያስ ፡ ዘንተ ፡ ነገረ ።
²⁴ ወይእዜኒ ፡ ሕያው ፡ እግዚአብሔር ፡ ዘሤመኒ ፡ ወአንበረኒ ፡ ውስተ ፡ መንበረ ፡ ዳዊት ፡ አቡየ ፡ ወውእቱ ፡ ገብረ ፡ ሊተ ፡ ቤተ ፡ በከመ ፡ ይቤ ፡ እግዚአብሔር ፡ ከመ ፡ ዮም ፡ [ይመውት ፡] አዶንያስ ።
²⁵ ወለአከ ፡ ሰሎሞን ፡ ንጉሥ ፡ ምስለ ፡ ብንያስ ፡ ወልደ ፡ ዮዳሔ ፡ ወቀተሎ ፡ ወሞተ ፡ አዶንያስ ፡ ይእተ ፡ አሚረ ።
²⁶ ወለአብያታር ፡ ካህን ፡ ይቤሎ ፡ ሰሎሞን ፡ ንጉሥ ፡ እቱ ፡ አንተኒ ፡ ውስተ ፡ አናቶት ፡ ውስተ ፡ ሐቅልከ ፡ እስመ ፡ ብእሴ ፡ ደም ፡ አንተ ፡ ዮም ፡ ወኢይቀትለክ ፡ እስመ ፡ አንሣእከ ፡ ታቦተ ፡ ሕጉ ፡ ለእግዚአብሔር ፡ ቅድሜሁ ፡ ለአቡየ ፡ ወእስመ ፡ ሐመምከ ፡ በኵሉ ፡ ሕማሙ ፡ ለአቡየ ።
²⁷ ወሰዐሮ ፡ ሰሎሞን ፡ ለአብያታር ፡ ከመ ፡ ኢይኩን ፡ ካህኖ ፡ ለእግዚአብሔር ፡ ከመ ፡ ይብጻሕ ፡ ቃለ ፡ እግዚአብሔር ፡ ዘነበበ ፡ ላዕለ ፡ ቤተ ፡ ኤሊ ፡ በሴሎም ።
²⁸ ወሰምዐ ፡ ኢዮአብ ፡ ወልደ ፡ ሶርህያ ፡ እስመ ፡ ኢዮአብ ፡ ኀብረ ፡ ምስለ ፡ አዶንያስ ፡ ወተለዎ ፡ ወምስለ ፡ ሰሎሞን ፡ ኢኀብረ ፡ ወኢተለዎ ፡ ወጐየ ፡ ኢዮአብ ፡ ውስተ ፡ ቤተ ፡ እግዚአብሔር ፡ ወአኀዘ ፡ አቅርንተ ፡ ምሥዋዕ ።
²⁹ ወኦይድዕዎ ፡ ለሰሎሞን ፡ ወይቤልዎ ፡ ጐየ ፡ ኢዮአብ ፡ ወቦአ ፡ ቤተ ፡ እግዚአብሔር ፡ ወአኀዘ ፡ አቅርንተ ፡ ምሥዋዕ ፡ ወለአከ ፡ ሰሎሞን ፡ ኀበ ፡ ኢዮአብ ፡ እንዘ ፡ ይብል ፡ ምንተአ ፡ ኮንከአ ፡ ዘተማኅፀንከአ ፡ በምሥዋዕአ ፡ ወይቤ ፡ ኢዮአብ ፡ እስመ ፡ ፈራህኩአ ፡ ተማኅፀንኩአ ፡ በእግዚአብሔርአ ፡ ወለአኮ ፡ ሰሎሞን ፡ ለብንያስ ፡ ወልደ ፡ ዮዳሔ ፡ ኀበ ፡ ኢዮአብ ፡ ወይቤሎ ፡ ሖር ፡ ቅትሎ ፡ ወቅብሮ ።
³⁰ ወመጽአ ፡ ብንያስ ፡ ወልደ ፡ ዮዳሔ ፡ ኀበ ፡ ኢዮአብ ፡ ወይቤሎ ፡ ከመዝ ፡ ይቤ ፡ ንጉሥ ፡ ፃእ ፡ ወይቤ ፡ ኢዮአብ ፡ ኢይወፅእ ፡ አላ ፡ በዝየ ፡ እመውት ፡ ወገብአ ፡ ብንያስ ፡ ወልደ ፡ ዮዳሔ ፡ ወይቤሎ ፡ ለንጉሥ ፡ ከመዝ ፡ ይቤ ፡ ኢዮአብ ፡ ወከመዝ ፡ ይቤለኒ ።
³¹ ወይቤሎ ፡ ንጉሥ ፡ ሖር ፡ ወግበሮ ፡ በከመ ፡ ይቤ ፡ ወቅትሎ ፡ ወቅብሮ ፡ ወታሴስል ፡ እምኀቤየ ፡ ዮም ፡ ደመ ፡ ዘበከንቱ ፡ ከዐወ ፡ ኢዮአብ ፡ ወእምነ ፡ ቤተ ፡ አቡየ ።
³² ወአግብአ ፡ እግዚአብሔር ፡ ደመ ፡ ዐመፃሁ ፡ ላዕለ ፡ ርእሱ ፡ በከመ ፡ ገብረ ፡ ላዕለ ፡ ፪ዕደው ፡ ጻድቃን ፡ ወኄራን ፡ እለ ፡ ይኄይሱ ፡ እምኔሁ ፡ ወቀተሎሙ ፡ በኀፂን ፡ ወአቡየሰ ፡ ዳዊት ፡ ኢያእመረ ፡ በደሞሙ ፡ አቤኔርሃ ፡ ወልደ ፡ ኔር ፡ መልአከ ፡ ኀይሎሙ ፡ ለእስራኤል ፡ ወአሜሳይሃ ፡ ዘኢያቴር ፡ መልአከ ፡ ኀይሎሙ ፡ ለይሁዳ ።
³³ ወገብአ ፡ ደሞሙ ፡ ላዕለ ፡ ርእሱ ፡ ወላዕለ ፡ ርእስ ፡ ዘርኡ ፡ እስከ ፡ ለዓለም ፡ ወለዳዊትሰ ፡ ወለዘርኡ ፡ ወለቤቱ ፡ ወለመንበሩ ፡ ይኩን ፡ ሰላም ፡ እምኀበ ፡ እግዚአብሔር ፡ እስከ ፡ ለዓለም ።
³⁴ ወዐርገ ፡ ብንያስ ፡ ወልደ ፡ ዮዳሔ ፡ ወአኀዘ ፡ ወቀተሎ ፡ ወቀበሮ ፡ ውስተ ፡ ቤቱ ፡ ውስተ ፡ ሐቅል ።
³⁵ ወሤሞ ፡ ንጉሥ ፡ ለብንያስ ፡ ወልደ ፡ ዮዳሔ ፡ መልአከ ፡ ሰራዊቱ ፡ ወጸንዐት ፡ መንግሥቱ ፡ በኢየሩሳሌም ፤ ወለሳዶቅ ፡ ካህን ፡ ሤሞ ፡ ንጉሥ ፡ ሊቀ ፡ ከህናት ፡ ህየንተ ፡ አብያታር ፤ ወወህቦ ፡ እግዚአብሔር ፡ ለሰሎሞን ፡ ጥበበ ፡ ወአእምሮ ፡ ብዙኀ ፡ ፈድፋደ ፡ ወሰፍሐ ፡ ልሱ ፡ ከመ ፡ ኆፃ ፡ ሀኀበ ፡ ሐይቀ ፡ ባሕር ።

http://www.sacred-texts.com/bib/poly/kg1003.htm 3b↗     ¹ ወሰሎሞንሰ ፡ ወልደ ፡ ዳዊት ፡ ነግሠ ፡ ላዕላ ፡ እሰራኤል ፡ ወላዕለ ፡ ይሁዳ ፡ በኢየሩሳሌም ፤] 2 እንዘ ፡ የዐጥኑ ፡ ውስተ ፡ አድባር ፡ እስመ ፡ ኢተሐንጸ ፡ ቤተ ፡ እግዚአብሔር ፡ ይእተ ፡ አሚረ ።
³ ወአፍቀሮ ፡ ሰሎሞን ፡ ለእግዚአብሔር ፡ ከመ ፡ ይሖር ፡ በትእዛዘ ፡ ዳዊት ፡ አቡሁ ፡ ወባሕቱ ፡ ውስተ ፡ አውግር ፡ ይሠውዕ ፡ ወየዐጥን ።
⁴ ወተንሥአ ፡ ወሖረ ፡ ውስተ ፡ ገባኦን ፡ ከመ ፡ ይሡዕ ፡ በህየ ፡ እስመ ፡ ደእቲ ፡ ትነውኅ ፡ ወተዐቢ ፤ ፲፻መሥዋዕተ ፡ ገብረ ፡ ሰሎሞን ፡ በገባኦን ።
⁵ ወአስተርአዮ ፡ እግዚአብሔር ፡ ለሰሎሞን ፡ ሌሊተ ፡ በሕልም ፡ ወይቤሎ ፡ እግዚአብሔር ፡ ለሰሎሞን ፡ ሰአል ፡ ለከ ፡ ስእለተ ።
⁶ ወይቤ ፡ ሰሎሞን ፡ አንተ ፡ ገበርከ ፡ ለገብርከ ፡ ዳዊት ፡ አቡየ ፡ ምሕረተ ፡ ዐቢየ ፡ በከመ ፡ ሖረ ፡ ቅድሜከ ፡ በጽድቅ ፡ ወበርትዕ ፡ ወበንጽሐ ፡ ልብ ፡ ምሰሌከ ፡ ወዐቀብከ ፡ ሎቱ ፡ ዘንተ ፡ ምሕረተ ፡ ዐቢየ ፡ ከመ ፡ ታንብሮ ፡ ለወልዱ ፡ ላዕለ ፡ መንበሩ ፡ በዛቲ ፡ ዕለት ።
⁷ ወይእዜኒ ፡ እግዚኦ ፡ አምላኪየ ፡ አንተ ፡ ረሰይከ ፡ ለገብርከ ፡ ህየንተ ፡ ዳዊት ፡ አቡየ ፡ ወአንሰ ፡ ሕፃን ፡ ንስቲት ፡ ወኢያአምር ፡ ሙፃእየ ፡ ወሙባእየ ።
⁸ ወገብርከሰ ፡ ሀለወ ፡ ማእከለ ፡ ሕዝብከ ፡ ዘኀረይከ ፡ ሕዝበ ፡ ብዙኀ ፡ ዘኢይትኌለቍ ።
⁹ ወሀበ ፡ ለገብርከ ፡ ልበ ፡ በዘ ፡ ይሰምዕ ፡ ወያገብእ ፡ ፍትሐ ፡ በጽድቅ ፡ ለሕዝብከ ፡ ወከመ ፡ ያእምር ፡ ሠናየ ፡ እምነ ፡ እኩይ ፡ ወይፍልጥ ፡ እስመ ፡ አልቦ ፡ ዘይክል ፡ ኰንኖቶ ፡ ለዝንቱ ፡ ሕዝብከ ፡ ክቡድ ።
¹⁰ ወአደሞ ፡ ቅድሜሁ ፡ ለእግዚአብሔር ፡ እስመ ፡ ሰአሎ ፡ ሰሎሞን ፡ ዘንተ ፡ ነገረ ።
¹¹ ወይቤሎ ፡ እግዚአብሔር ፡ እስመ ፡ ሰአልከ ፡ እምኀቤየ ፡ ዘንተ ፡ ቃለ ፡ ወኢሰአልከ ፡ ለከ ፡ ብዙኀ ፡ መዋዕለ ፡ ወኢሰአልከ ፡ ለከ ፡ ነፍሰ ፡ ፀርከ ፡ አላ ፡ ሰአልከ ፡ ለከ ፡ ከመ ፡ ታእምር ፡ ሰሚዐ ፡ ፍትሕ ፤ ናሁ ፡ ገበርኩ ፡ ለከ ፡ በከመ ፡ ትቤ ፤
¹² ናሁ ፡ ወሀብኩከ ፡ ልበ ፡ ጠቢበ ፡ ወለባዌ ፡ ከመ ፡ አልቦ ፡ ዘኮነ ፡ ዘእምቅድሜከ ፡ ወእምድኅሬከኒ ፡ ኢደትነሣእ ፡ ዘከማከ ።
¹³ ወዘሂ ፡ ኢሰአልከኒ ፡ እሁበከ ፡ ብዕለ ፡ ወክብረ ፡ ከመ ፡ ኢኮነ ፡ ሰብእ ፡ ከማከ ፡ በመንግሥቱ ።
¹⁴ ወእመ ፡ ሖርከ ፡ በፍኖትየ ፡ ወዐቀብከ ፡ ትእዛዝየ ፡ ወሥርዐትየ ፡ በከመ ፡ ሖረ ፡ ዳዊት ፡ አቡከ ፡ ኣበዝኀ ፡ መዋዕሊከ ።
¹⁵ ወነቅሀ ፡ ሰሎሞን ፡ ወአእመረ ፡ ከመ ፡ ሕልም ፡ ውእቱ ፡ ወተንሥአ ፡ ወሖረ ፡ ኢየሩሳሌም ፡ ወቆመ ፡ ቅድመ ፡ ምሥዋዕ ፡ ዘቅድመ ፡ ታቦተ ፡ ሕጉ ፡ ለአግኪኡበሔር ፡ በጽዮን ፡ ወአብአ ፡ መሥዋዕተ ፡ ወገብረ ፡ በሰላም ፡ ወገብረ ፡ ምሳሐ ፡ ዐቢየ ፡ ሎቱ ፡ ወለሰብኡ ።
¹⁶ ወይእተ ፡ አሚረ ፡ መጽኣ ፡ ፪አንስት ፡ ዘማት ፡ ኀበ ፡ ንጉሥ ፡ ወቆማ ፡ ቅድሜሁ ።
¹⁷ ወትቤ ፡ አሐቲ ፡ ብእሲት ፡ ስምዐኒ ፡ እግዚእየ ፡ አነ ፡ ወዛቲ ፡ ብእሲት ፡ ነኀድር ፡ ውስተ ፡ ፩ቤት ፡ ወወለድነ ፡ በ ፩መካን ።
¹⁸ ወአመ ፡ ሣልስት ፡ ዕለት ፡ አምዘ ፡ ወለድኩ ፡ አነ ፡ ወለደት ፡ ዛቲኒ ፡ ብእሲት ፡ ወንነብር ፡ ኅቡረ ፡ ወአልቦ ፡ ምስሌነ ፡ ወኢመኑሂ ፡ እንበለ ፡ ክልኤነ ፡ ውስተ ፡ ውእቱ ፡ ቤት ።
¹⁹ ወሞተ ፡ ወልዳ ፡ ለይእቲ ፡ ብእሲት ፡ በሌሊት ፡ እስመ ፡ ሰከበት ፡ ላዕሌሁ ።
²⁰ ወተንሥአት ፡ መንፈቀ ፡ ሌሊት ፡ ወነሥአት ፡ ወልድየ ፡ እምነ ፡ ሕፅንየ ፡ ወአስከበቶ ፡ ውስተ ፡ ሕፅና ፡ ወወልደ ፡ ዚአሃ ፡ ዘሞተ ፡ አስከበቶ ፡ ውስተ ፡ ሕፅንየ ።
²¹ ወሶበ ፡ ነቃህኩ ፡ በጽባሕ ፡ ከመ ፡ ኣጥቡ ፡ ሕፃንየ ፡ ረከብኩ ፡ ዝክተ ፡ ምውተ ፡ ወሶበ ፡ ጸብሐ ፡ ርኢክዎ ፡ ወናሁ ፡ ኢኮነ ፡ ዚአየ ፡ ወልድየ ፡ ዘወለድኩ ።
²² ወትቤ ፡ እንታክቲ ፡ ብእሲት ፡ ካልእት ፡ አልቦ ፤ ወልድየ ፡ ዝንቱ ፡ ዘሕያው ፡ ወወልድኪ ፡ ዝከቱ ፡ ምውት ፡ ወተባሀላ ፡ በቅድመ ፡ ንጉሥ ።
²³ ወይቤሎን ፡ ንጉሥ ፡ አንቲኒ ፡ ትቤሊ ፡ ከመ ፡ ዝንቱ ፡ ሕያው ፡ ወልድየ ፡ ወወልደ ፡ ዚአሃ ፡ ዘሞተ ፡ ወአንቲኒ ፡ ትቤሊ ፡ አልቦ ፤ ወልደ ፡ ዚአየ ፡ ውእቱ ፡ ሕያው ፡ ወወልደ ፡ ዚአኪ ፡ በሞተ ።
²⁴ ወይቤ ፡ ንጉሥ ፡ አምጽኡ ፡ መጥባሕተ ፡ ወአምጽኡ ፡ መጥባሕተ ፡ ቅድመ ፡ ንጉሥ ።
²⁵ ወይቤ ፡ ንጉሥ ፡ ምትርዎ ፡ ለዝንቱ ፡ ሕፃን ፡ ዘሕያው ፡ ለክልኤ ፡ ወሀቡ ፡ መንፈቆ ፡ ለዛቲ ፡ ወመንፈቆ ፡ ለእንታክቲ ።
²⁶ ወአውሥአት ፡ እንታክቲ ፡ ብእሲት ፡ እንተ ፡ ሕያው ፡ ሕፃና ፡ ወትቤሎ ፡ ለንጉሥ ፡ እሰመ ፡ ተህውከ ፡ ማኅፀና ፡ በእንተ ፡ ወልዳ ፡ ወትቤ ፡ ሀባ ፡ እግዚኦ ፡ ሕፃነ ፡ ሕያዎ ፡ ወቀቲለሰ ፡ ኢትቅትልዎ ፤ ወትቤ ፡ እንታክቲ ፡ ኢሊተ ፡ ኢይኩን ፡ ወኢላቲ ፤ ከፍሉነ ።
²⁷ ወአውሥአ ፡ ንጉሥ ፡ ወይቤ ፡ ሀብዋ ፡ ሕፃና ፡ ለዛቲ ፡ ብእሲት ፡ እንተ ፡ ትቤ ፡ ሀብዋ ፡ ኪያሁ ፡ ወቀቲለሰ ፡ ኢትቅትልዎ ፤ ይእቲ ፡ እሙ ።
²⁸ ወሰምዑ ፡ ኵሎሙ ፡ እስራኤል ፡ ዘንተ ፡ ፍትሐ ፡ ዘፈትሐ ፡ ንጉሥ ፡ ወፈርሁ ፡ እምቅድመ ፡ ገጹ ፡ ለንጉሥ ፡ እስመ ፡ ርእዩ ፡ ከመ ፡ ጥበቡ ፡ ለእግዚአብሔር ፡ ሀሎ ፡ ላዕሌሁ ፡ ከመ ፡ ይግበር ፡ ኵነኔ ።

http://www.sacred-texts.com/bib/poly/kg1004.htm 4↗     ¹ ወሰሎሞን ፡ ንጉሥ ፡ ነግሠ ፡ ላዕለ ፡ እስራኤል ።
² ወእሉ ፡ እሙንቱ ፡ መላእክቲሁ ፡ አዛርያስ ፡ ወልደ ፡ ሳዶቅ ፤
³ ወኤልያብ ፡ ወአኪያ ፡ ወልደ ፡ ሱባ ፡ ጸሓፊ ፡ ወኢዮሳፍጥ ፡ ወልደ ፡ አኪያድ ፡ መዘክር ።
⁴ ወሰዶቅ ፡ ወአብያታር ፡ ካህናት ።
⁵ ወአርያ ፡ ወልደ ፡ ናታን ፡ ላዕለ ፡ ሥዩማን ፡ ወዘባት ፡ ወልደ ፡ ናታን ፡ ዘእምታሕተ ፡ ንጉሥ ።
⁶ ወአኪየል ፡ መጋቢ ፡ ወኤልያፍ ፡ ወልደ ፡ ሰፋን ፡ ላዕለ ፡ በሓውርት ፤ አዶኒረም ፡ ወልደ ፡ ኤድራ ፡ ላዕለ ፡ ጾር ።
⁷ ወሤመ ፡ ሰሎሞን ፡ ፲ወ፪ላዕለ ፡ እሰራኤል ፡ እለ ፡ ይትሜጠዉ ፡ ግብሮሙ ፡ ለንጉሥ ፡ ወለቤቱ ፤ ለለ፩ወርኅ ፡ ለለ ፡ ዓመት ፡ ያዌፍዩ ፡ ምዕረ ።
⁸ ወዝንቱ ፡ ውእቱ ፡ አስማቲሆሙ ፡ ቤዖር ፡ በደብረ ፡ ኤፍሬም ።
⁹ ወልደ ፡ ራኬብ ፡ ፩በማኪማስ ፡ ወቤተ ፡ ላሚ ፡ ወቤተ ፡ ሰሚስ ፡ ወኤሎም ፡ እስከ ፡ ቤተ ፡ ላማኒስ ።
¹⁰ ወልዶ ፡ ኤሳት ፡ በቤርኔማሉ ፡ ወሴሜንኮቄሬስ ፡ ወፈራኪሐናዳን ።
¹¹ ወሓናጡፊንጢ ፡ ብእሲ ፤ ጠብሌት ፡ ወለተ ፡ ሰሎሞን ፡ ብእሲቱ ።
¹² በቀክ ፡ ወልደ ፡ አኪማከ ፡ በጰላማሕ ፡ ወሜቄዶ ፡ ወኵሉ ፡ ቤተ ፡ ሳሐን ፡ ዘመንገለ ፡ ኤሳታን ፡ ዘመትሕተ ፡ ኤስድራኤ ፡ ወእምነ ፡ ቤሳፉዱ ፡ ወኤቤልሜሑላ ፡ እስከ ፡ ማእቤር ፡ ዘሉቃሜስ ።
¹³ ወልደ ፡ ጋቤሃ ፡ በሬማት ፡ ገለአድ ፡ ውእቱ ፡ ወሰኖሙ ፡ ኤሬጠቦሔ ፡ በበሳን ፡ ፷አህጉር ፡ ዐበይት ፡ እለ ፡ ቦን ፡ ቅጽረ ፡ ወመናስግቲሆን ፡ ዘብርት ።
¹⁴ ወኦኪናሖም ፡ ወልደ ፡ ኣኬልማሐን ፡ ዘኤኒ ፡ ኣኒስ ።
¹⁵ ወአኬልማሴን ፡ ዘንፍታሌም ፡ ወውእቱኒ ፡ አውሰባ ፡ ለማሤማት ፡ ወለተ ፡ ሰሎሞን ።
¹⁶ በሀማ ፡ ወልደ ፡ ኵሲ ፡ ዘእምነ ፡ ሬግቦሔል ፡ እስከ ፡ አሔል ፡ በምድረ ፡ መሐለይሶ ።
¹⁷ ወልደ ፡ ኤላ ፡ በብንያም ፡ ፩ ።
¹⁸ ወልደ ፡ ኣዴ ፡ በምድረ ፡ ጋድ ፡ ወበምድረ ፡ ሴዎን ፡ ንጉሠ ፡ ሐሴቦን ፡ ወአግ ፡ ንጉሠ ፡ ባሳን ፡ ወናሴፍ ፡ ፩በምድረ ፡ ይሁዳ ።
¹⁹ ወዮሳፍጥ ፡ ወልደ ፡ ፋሐሱድ ፡ በይሳኮር ።
²⁰ ወእሉ ፡ ያገብኡ ፡ ለንጉሥ ፡ ሰሎሞን ፡ ግብሮሙ ፡ በኣምጣነ ፡ ኵሉ ፡ ዘአዘዞሙ ፡ ዘይሠርዑ ፡ ውስተ ፡ ማእደ ፡ ንጉሥ ፡ ፩፩በበወርኁ ፡ ወአልቦ ፡ ዘያሐጽጹ ፡ ወኢበምንትኒ ።
²¹ ወሰገመኒ ፡ ወኀሠረ ፡ ለአፍራስ ፡ ወይጸውሩ ፡ ሰረገላቲሁ ፡ ለንጉሥ ፡ ኀበ ፡ ሀለወ ፡ ወኵሎሙ ፡ በበ ፡ ሥርዐቶሙ ።
²² ወዝንቱ ፡ ዘይትገበር ፡ ለሰሎሞን ፡ በበ ፡ ዕለቱ ፡ ፴በመስፈርተ ፡ ቆሮስ ፡ ስንዳሌ ፡ ወ ፡ ፰በመስፈርተ ፡ ቆሮስ ፡ ሐሪፅ ፡ ልቱም ።
²³ ወ ፲አልህምት ፡ መጋዝእ ፡ ወ ፳አልህምተ ፡ አስዋር ፡ ወ፻አባግዕ ፡ ዘእንበለ ፡ ሀየል ፡ ወወይጠል ፡ ወመጋዝአ ፡ ደዋርህ ።
²⁴ እስመ ፡ ውእቱ ፡ መኰንን ፡ ላዕለ ፡ መላእክት ፡ እለ ፡ ማዕዶት ፡ ፈለግ ፡ ወኵሎሙ ፡ እለ ፡ በውዱ ፡ ስንእ ፡ ምስሌሁ ።
²⁵ ወወህቦ ፡ እግዚአብሔር ፡ አእምሮ ፡ ለሰሎሞን ፡ ብዙኀ ፡ ፈድፋደ ፡ ወሰፍሐ ፡ ልቡ ፡ ከመ ፡ ኆፃ ፡ ኀበ ፡ ሐይቀ ፡ ባሕር ።
²⁶ በዝኀ ፡ ጥበቡ ፡ ለሰሎሞን ፡ ፈድፋደ ፡ እምነ ፡ ጥበቦሙ ፡ ለኵሉ ፡ ሰብእ ፡ ቀደምት ፡ ወአምኵሉ ፡ ጥበቦሙ ፡ ለግብጽ ።
²⁷ ወጠበ ፡ እምነ ፡ ኵሉ ፡ ሰብእ ፡ ወጠበ ፡ እምነ ፡ ቤታን ፡ ዘርያዊ ፡ ወእምነ ፡ ኤናን ፡ ወእምነ ፡ ኮልቀድ ፡ ወደራል ፡ ደቂቀ ፡ ሰማድ ።
²⁸ ወነበበ ፡ ሰሎሞን ፡ ፴፻አምሳለ ፡ ወ፭፻ማሕሌቱ ።
²⁹ ወነበበ ፡ በእንተ ፡ ዕፀው ፡ ወበእንተ ፡ ዕፀወ ፡ አርዝ ፡ ዘውስተ ፡ ሊባኖስ ፡ ወበእንተ ፡ ሐምለ ፡ ህስጱ ፡ ዘይወፅአ ፡ ውስተ ፡ አረፍት ፡ ወነበበ ፡ በእንተ ፡ አንስሳሂ ፡ ወበእንተ ፡ አዕዋፍሂ ፡ ወበእንተ ፡ ዘይትሐወስ ፡ ውስተ ፡ ምድር ፡ ወበእንተ ፡ ዓሣት ።
³⁰ ወይመጽአ ፡ ኵሉ ፡ ሕዝብ ፡ ይስምዑ ፡ ጥበቦ ፡ ለሰሎሞን ፡ ወይነሥእ ፡ አምኃ ፡ እምኀበ ፡ ነገሥተ ፡ ምድር ፡ እምነ ፡ ኵሎሙ ፡ እለ ፡ ሰምዑ ፡ ጥበቦ ። 31 ወነሥአ ፡ ሰሎሞን ፡ ወለተ ፡ ፈርዖን ፡ ሎቱ ፡ ትኩኖ ፡ ብእሲቶ ፡ ወአእተዋ ፡ ውስተ ፡ ሀገረ ፡ ዳዊት ፡ እስከ ፡ የኀልቅ ፡ ቤተ ፡ እግዚአብሔር ፡ ወቤተ ፡ ዚአሁ ፡ ወአረፍተ ፡ ኢየሩሳሌም ። 32 ወይእተ ፡ አሚረ ፡ ዐርገ ፡ ፈርዖን ፡ ወአስተጋብኣ ፡ ለጋዜር ፡ ወአውዐያ ፡ በእሳት ፡ ወከናአንሂ ፡ እለ ፡ ይነብሩ ፡ ውስተ ፡ ሜርገብ ፡ ተቀትሉ ። 33 ወወሀባ ፡ ፈርዖን ፡ ለወለቱ ፡ ለብእሲተ ፡ ሰሎሞን ፡ ኪያሆን ፡ አህጉረ ፡ ወነደቃ ፡ ሰሎሞን ፡ ለጋዜር ።

http://www.sacred-texts.com/bib/poly/kg1005.htm 5↗     ¹ ወፈነዎሙ ፡ ኪረም ፡ ለደቁ ፡ ንጉሠ ፡ ጢሮስ ፡ ኀበ ፡ ሰሎሞን ፡ ይቅብእዎ ፡ ህየንተ ፡ ዳዊት ፡ አቡሁ ፡ እስመ ፡ ያፈቅሮ ፡ ኪረም ፡ ለዳዊት ፡ በኵሉ ፡ መዋዕሊሁ ።
² ወለአከ ፡ ሰሎሞን ፡ ኀበ ፡ ኪረም ፡ እንዘ ፡ ይብል ፤
³ ታአምሮአ ፡ ለሊከአ ፡ ለዳዊትአ ፡ አቡየአ ፡ ከመ ፡ ተስእኖ ፡ ነዲቀ ፡ ቤተ ፡ ለስመ ፡ እግዚአብሔር ፡ አምላኪየ ፡ በእንተ ፡ አጽባእ ፡ ዘዐውዱ ፡ እስከ ፡ አመ ፡ አግብኦሙ ፡ እግዚአብሔር ፡ ታሕተ ፡ እገሪሁ ።
⁴ ወይእዜሰ ፡ አዕረፈኒ ፡ እግዚአብሔር ፡ ሊተ ፡ እምነ ፡ እለ ፡ ዐውድየ ፡ ወአልቦ ፡ ዘይስሕጥ ፡ ወአልቦ ፡ ዘይመጽእ ፡ ለእኪት ።
⁵ ወናሁ ፡ አነ ፡ እብል ፡ ከመ ፡ አሐንጽ ፡ ቤተ ፡ ለስመ ፡ እግዚአብሔር ፡ አምላኪየ ፡ በከመ ፡ ይቤሎ ፡ እግዚአብሔር ፡ ለዳዊት ፡ አቡየ ፡ ወልድከ ፡ ዘእሁበከ ፡ ላዕለ ፡ መንበርከ ፡ ህየንቴከ ፡ ውእቱኬ ፡ የሐንጽ ፡ ቤተ ፡ ለስምየ ።
⁶ ወይእዜኒ ፡ አዝዝ ፡ ወይግዝሙ ፡ ሊተ ፡ ዕፀወ ፡ እምነ ፡ ደብረ ፡ ሊባኖስ ፡ ወናሁ ፡ አግብርትየኒ ፡ ምስለ ፡ አግብርቲከ ፡ ወዐስበ ፡ ዘተቀነደከኒ ፡ እሁበከ ፡ ወኵሎ ፡ ዘትቤ ፡ እስመ ፡ ለሊከ ፡ ታአምር ፡ ከመ ፡ አልብነአ ፡ ዘያአምርአ ፡ ገዚመአ ፡ ዕፀውአ ፡ ከመ ፡ ሰብአ ፡ ሲዶናአ ።
⁷ ወእምዝ ፡ ሶበ ፡ ሰምዐ ፡ ኪራም ፡ ቃለ ፡ ሰሎሞን ፡ ተፈሥሐ ፡ ፈድፋደ ፡ ወደቤ ፡ ይተባረክ ፡ እግዚአብሔር ፡ ዮም ፡ ዘወሀበ ፡ ለዳዊት ፡ ወልደ ፡ ጠቢበ ፡ ላዕለ ፡ ዝንቱ ፡ ሕዝብ ፡ ብዙኅ ።
⁸ ወለአከ ፡ ኀበ ፡ ሰሎሞን ፡ እንዘ ፡ ይብል ፡ ሰማዕኩአ ፡ ኵሎአ ፡ ዘለአከአ ፡ ኀቤየ ፤ አነ ፡ አገብር ፡ ኵሎ ፡ መፍቅደከ ።
⁹ ዕፀውአ ፡ ዘቄድሮን ፡ ወዘጰውቂና ፡ ደቂቅየ ፡ ያወርዱ ፡ እምነ ፡ ደብረ ፡ ሊባኖስ ፡ ውስተ ፡ ባሕር ፡ ወአነ ፡ እንብር ፡ አርማሰ ፡ እስከ ፡ ፈለግ ፡ እምኀበ ፡ ትትሜጠወኒ ፡ ወኣነብሮ ፡ ለከ ፡ ህየ ፡ ወንሣእ ፡ አንተ ፡ ወግበር ፡ ፈቃደከ ፡ ወትሁብአ ፡ ሲሳየአ ፡ ለቤትየአ ።
¹⁰ ወወሀቦ ፡ ኪራም ፡ ለሰሎሞን ፡ ዕፀወ ፡ ቄድሮና ፡ ወኵሎ ፡ በፈቀደ ።
¹¹ ወሰሎሞን ፡ ወሀቦ ፡ ለኪረም ፡ ፪፼በመስፈርተ ፡ ቆሮስ ፡ ሥርናየ ፡ ወመዓክጦ ፡ ለቤቱ ፡ ፪፼ወ፪፼በመስፈርተ ፡ ቤት ፡ ቅብአ ፡ ቅድወ ፡ ወከመዝ ፡ ወሀቦ ፡ ሰሎሞን ፡ ለኪራም ፡ በበ ፡ ዓመት ።
¹² ወወሀቦ ፡ እግዚአብሔር ፡ ጥበበ ፡ ለሰሎሞን ፡ በከመ ፡ ይቤሎ ፡ ወሰላም ፡ ማእከለ ፡ ሰሎሞን ፡ ወማእከለ ፡ ኪረም ፡ ወተማሐሉ ፡ ወጉበሩ ፡ ኪዳነ ፡ ማእከሎሙ ።
¹³ ወፈነወ ፡ ንጉሥ ፡ ጸዋሬ ፡ እምነ ፡ ኵሉ ፡ እስራኤል ፡ ወኮኑ ፡ ጸዋርያን ፡ ፫፼ዕደው ።
¹⁴ ወይፌኑ ፡ እምኔሆሙ ፡ ፼ውሰተ ፡ ደብረ ፡ ሊባኖስ ፡ ፩ወርኀ ፡ ወያስተባርዮሙ ፡ ከመዝ ፤ ፩ወርኀ ፡ ይሄልዉ ፡ ውስተ ፡ ደብረ ፡ ሊባኖስ ፡ ወ፪ወርኀ ፡ ይሄልዉ ፡ ውስተ ፡ አብያቲሆሙ ፤ ወአዶኒረም ፡ መልአከ ፡ ጾር ።
¹⁵ ወቦ ፡ ሰሎሞን ፡ ፯፼ጸዋረ ፡ አርሶን ፡ ወ፰፼ወቀርተ ፡ እለ ፡ ውስተ ፡ ደብር ፤
¹⁶ ዘእንበለ ፡ ሥዩማን ፡ መላእክት ፡ ላዕለ ፡ ግብረ ፡ ሰሎሞን ፡ ፴፻ወ፮፻ ፡ ሊቃነ ፡ ገባር ።
¹⁷ ወአስተዳለዉ ፡ ዕፀወ ፡ ወእብነ ፡ ፫ዓመተ ።

http://www.sacred-texts.com/bib/poly/kg1006.htm 6↗     ¹ ወእምዝ ፡ አመ ፡ ኮነ ፡ ፬፻፹ወ፬ዓመት ፡ እምአመ ፡ ወፅኡ ፡ ደቂቀ ፡ እስራኤል ፡ እምግብጽ ፡ አመ ፡ ራብዕ ፡ ዓም ፡ እምዘ ፡ ነግሠ ፡ ሰሎሞን ፡ ንጉሥ ፡ ላዕለ ፡ እስራኤል ፡ በካልእ ፡ ወርኅ ፤
² አዘዘ ፡ ንጉሥ ፡ ያምጽኡ ፡ ዐበይተ ፡ እብነ ፡ ወሠናያተ ፡ ወወደዩ ፡ ውስተ ፡ ውእቱ ፡ ቤት ፡ ወእብነ ፡ ዘኢኮነ ፡ ውቁረ ።
³ ወወቀርዎን ፡ ደቀ ፡ ሰሎሞን ፡ ወደቀ ፡ ኪረም ፡ ወወደይዎን ።
⁴ ወበራብዕ ፡ ዓመት ፡ ሣረሮ ፡ ለቤተ ፡ እግዚአብሔር ፡ በወርኀ ፡ ኔሳን ፡ በካልእ ፡ ወርኅ ።
⁵ አመ ፡ ፲ወ፩ዓመት ፡ ወወርኁ ፡ በዓድ ፡ ወውስተ ፡ ወርኅ ፡ ሳምን ፡ ኀልቀ ፡ ኵሉ ፡ ሥርዐቱ ፡ ወኵሉ ፡ ግብረቱ ።
⁶ ወውእቱ ፡ ቤት ፡ ዘሐነጸ ፡ ሰሎሞን ፡ ንጉሥ ፡ ለእግዚአብሔር ፡ ፳በእመት ፡ ኑኁ ፡ ወ፳በእመት ፡ ርሕቡ ፡ ወ፳በእመት ፡ ላዕሉ ።
⁷ ወኤላም ፡ ቅድመ ፡ መቅደሱ ፡ ፳በእመት ፡ ኑኁ ፡ ውስተ ፡ ርኅበ ፡ ቤቱ ፡ ወ፳በእመት ፡ ርኅቡ ፡ ቅድመ ፡ ቤቱ ፡ ወሐነጸ ፡ ቤቶ ፡ ወፈጸመ ።
⁸ ወገብረ ፡ ለውእቱ ፡ ቤት ፡ መሳክወ ፡ ኅቡኣተ ፡ ወኅቡኣነ ።
⁹ ወአስተቀጸለ ፡ አረፍቶ ፡ ለቤተ ፡ መቅደስ ፡ በሜልንታራ ፡ ወለዳቤርሂ ፡ ወገብረ ፡ ገበዋቲሁ ፡ ዘዐውዱ ።
¹⁰ ወአረፍተ ፡ ገቦሁ ፡ እምታሕቴሁ ፡ ኀምስ ፡ በእመት ፡ ርኅቡ ፡ ወለማእከላዊ ፡ ስድስ ፡ በእመት ፡ ወለሣልስኒ ፡ ስብዕ ፡ በእመት ፡ ርኅቡ ፡ እስመ ፡ አስተራሐቆ ፡ ለመኣዝነ ፡ ቤቱ ፡ ዘዐውዱ ፡ ከመ ፡ ኢይትቃረብ ፡ አረፍተ ፡ ቤቱ ።
¹¹ ወተሐንጸ ፡ ቤቱ ፡ በእብን ፡ ዐበይት ፡ ዘኢተወቅረ ፡ ወመፍጽሐ ፡ ወድቍንድቈ ፡ ወኵሎ ፡ መብዕለ ፡ ኀፂን ፡ ኢተሰምዐ ፡ በህየ ፡ በውስተ ፡ ቤቱ ፡ እንዘ ፡ የሐንጽዎ ።
¹² ወዴዴ ፡ ዘመንገለ ፡ ገቦ ፡ ቤት ፡ ዘየማን ፡ ዘእምነ ፡ ታሕቱ ፡ ወቦ ፡ መዓርገ ፡ ማእከለ ፡ ወእምነ ፡ ውእቱ ፡ መዓርግ ፡ ውሰተ ፡ ተሥላስ ።
¹³ ወሐነጸ ፡ ቤቶ ፡ ወፈጸሞ ፡ ወጠፈሮ ፡ በዕፀወ ፡ ቄድሮስ ።
¹⁴ ወሐነጸ ፡ ኵሎ ፡ ቤቶ ፡ ወአሰሮ ፡ በወኣስርት ፡ ዘዘ ፡ ኀምስ ፡ በእመት ፡ ኑኁ ፡ ወአስተአሰሮ ፡ በመሠንይ ፡ ዘዕፀወ ፡ ቄድሮስ ።
¹⁵ ወሐነጸ ፡ አረፍተ ፡ ቤቱ ፡ በዕፀወ ፡ ቄድሮስ ፡ እምነ ፡ ምድረ ፡ አረፋቲሁ ፡ ለቤቱ ፡ እስከ ፡ ጠፈሩ ፡ ወእስከ ፡ ሠራዊቱ ፡ ወኵሎ ፡ አረፋቲሁ ፡ በዕፀው ፡ እንተ ፡ ውስጥ ፡ ገለዎ ፡ ወአስተአኀዞ ፡ እንተ ፡ ውስጥ ፡ ቤቶ ፡ በዕፀወ ፡ ጴውቂና ፡ በዘ ፡ ገበዋቲሁ ።
¹⁶ ወሐነጸ ፡ ፳በእመት ፡ እምነ ፡ ጽንፈ ፡ አረፍት ፡ ዘገቦሁ ፡ ዘ፩እምነ ፡ ምድሩ ፡ እስከ ፡ ሠራዊቱ ፡ ወገብረ ፡ እምነ ፡ ዳቤር ፡ ውስተ ፡ ቅድስተ ፡ ቅዱሳን ።
¹⁷ ወ፵በእመት ፡ ውእቱ ፡ ጽርሑ ፤
¹⁸ እምቅድመ ፡ ዳቢር ፡ ማእከለ ፡ ቤቱ ፡ እንተ ፡ ውስጥ ፡ ከመ ፡ ይንበር ፡ ህየ ፡ ታቦተ ፡ ሕጉ ፡ ለእግዚአብሔር ።
¹⁹ ወ፳በእመት ፡ ኑኁ ፡ ወ፳በእመት ፡ ርኅቡ ፡ ወ፳በእመት ፡ ላዕሉ ፡ ወቀፈሎ ፡ በወርቅ ፡ ወአሰርገዎ ፡ ወገብረ ፡ ምሥዋዕ ፡ ቅድመ ፡ ዳቤር ፡ ወቀፈሎ ፡ በወርቅ ።
²⁰ ወለኵሉ ፡ ቤቱ ፡ ቀፈሎ ፡ በወርቅ ፡ ንጹሕ ፡ ኵሎ ፡ ቤቶ ።
²¹ ወገብረ ፡ ውሰተ ፡ ዳቤር ፡ ፪ኪሩቤል ፡ ወ[ዕሥር ፡] በእመት ፡ ቆሙ ።
²² ወኀምስ ፡ በእመት ፡ ክንፉ ፡ ለ፩ኪሩብ ፡ ወኀምስ ፡ በእመት ፡ ለካልእ ፡ ወኮነ ፡ ዐሥር ፡ በእመት ፡ ማእከሎሙ ፡ ኀበ ፡ ያስተራክቡ ፡ ክነፊሆሙ ።
²³ ወከማሁ ፡ አምጣኒሆሙ ፡ ለክልኤሆሙ ፡ ዕሩይ ፡ ወ፩ግብረቶሙ ፡ ለክልኤሆሙ ።
²⁴ ለኪሩብ ፡ ዐሥር ፡ በእመት ፡ ወከማሁ ፡ ካልኡኒ ፡ ኪሩብ ።
²⁵ ወክልኤሆሙ ፡ ኪሩብ ፡ ማእከለ ፡ ቤት ፡ ውስጢ ፡ እሙንቱ ፡ ወስፋሕ ፡ ክነፊሆሙ ፡ ወ፩ክንፉ ፡ ይጐድእ ፡ እስከ ፡ አረፍተ ፡ ቤት ፡ ወዘካልኡኒ ፡ ኪሩብ ፡ ክንፉ ፡ ይጐድእ ፡ በካልእ ፡ አረፍት ፡ ወእልክቱ ፡ ካልኣን ፡ ክነፊሆሙ ፡ በማእከለ ፡ ቤት ፡ ደትኣኀዙ ፡ በበይናቲሆሙ ፡ ክንፋ ፡ ምስለ ፡ ክንፍ ።
²⁶ ወቀፈሎሙ ፡ ለኪሩብ ፡ በወርቅ ።
²⁷ ወለኵሉ ፡ አረፍተ ፡ ቤቱ ፡ ዘዐውዱ ፡ አግለፈ ፡ ወሠዐለ ፡ ሥዕለ ፡ ኪሩብ ፡ ወዘአፍአሰ ፡ ወዘውስጥኒ ፡ በቀልተ ፡ አሥዐለ ።
²⁸ ወምድረ ፡ ቤቱ ፡ አቅፈለ ፡ በወርቅ ፡ በውስጥኒ ፡ ወለጸናፈኒ ።
²⁹ ወለኆኅተ ፡ ዳቤር ፡ ገብረ ፡ መዓጹተ ፡ በዕፀ ፡ አርቄውቲኖን ፡ ወገብረ ፡ ሕዋራተ ፡ እንተ ፡ መርብዕት ፤
³⁰ ለክልኤሆን ፡ ኆኅት ፡ በዕፀ ፡ ጴውቄና ፡ ወ፪መዓጹቲሃ ፡ ለአሐቲ ፡ ኆኅት ፡ ወድርኵኵቶን ፡ ወለካልኡኒ ፡ ኆኅት ፡ ፪መዓጹቲሃ ፡ ወድርኵኵታቲሃ ።
³¹ ወግሉፍ ፡ ውስቴቶን ፡ ኪሩብ ፡ ወበቀልት ፡ ወመንጠዋልዒሆን ፡ ዘወርቅ ፡ ወቅፉላት ፡ በወርቅ ፡ ወውዱዳት ፡ እስከ ፡ መድረኮን ።
³² ወነደቀ ፡ ለዐጸድ ፡ ውሳጢ ፡ ሠላስ ፡ አረፍተ ፡ ዘኢኮነ ፡ በውቅሮ ፡ ወአሕቀፎን ፡ ኵሎ ፡ ዐውዶን ፡ በሰሊዳት ፡ ዘዕፀ ፡ ቂድሮኖን ።
³³ ወገብረ ፡ መንጦላዕተ ፡ ለዐጸደ ፡ ኤላም ፡ ዘውስተ ፡ ቤት ፡ ዘቅድመ ፡ መቅደስ ።

http://www.sacred-texts.com/bib/poly/kg1007.htm 7↗     ¹ ወለአከ ፡ ንጉሥ ፡ ሰሎሞን ፡ ወነሥኦ ፡ ለኪራም ፡ እምነ ፡ ጢሮስ ፡ ወልደ ፡ ብእሲት ፡ መበለት ፡ ወእምነ ፡ ነገደ ፡ ንፍታሌም ፡ ውእቱ ፡ ወአቡሁሰ ፡ ብእሲ ፡ ጢርያዊ ፡ ነሃቤ ፡ ብርት ፡ ወኬንያ ፡ ፍጹም ፡ ውእቱ ፡ ወጠቢብ ፡ ወማእምር ፡ ወያአምር ፡ ኵሎ ፡ ግብረ ፡ ብርት ፡ ወቦአ ፡ ኀበ ፡ ሰሎሞን ፡ ንጉሥ ፡ ወገብረ ፡ ኵሎ ፡ ግብረ ።
² ወሰበከ ፡ ፪አዕማደ ፡ ለኤላም ፡ ዘውስተ ፡ ቤት ፡ ወዐሥር ፡ ወሰምን ፡ በእመት ፡ ኑኁ ፡ ለዓምድ ፡ ወአምጣነ ፡ ዘየዐውዶ ፡ ዐሥር ፡ ወርብዕ ፡ በእመት ፡ ዘግዝፉ ፡ አርባዕ ፡ አጻብዕ ፡ ዘይትራከብ ፡ ላዕሌሁ ፡ ዐቀዱ ፡ ወከማሁ ፡ ካልእኒ ፡ ዐምዱ ።
³ ወገብረ ፡ ፪አርእስተ ፡ ሎቶን ፡ ዘያነብሩ ፡ መልዕልተ ፡ አዕማድ ፡ ዘብርት ፡ ስብኮ ፡ ኀምስ ፡ በእመት ፡ ቆሙ ፡ ለ፩ርእስ ።
⁴ ወገብረ ፡ ፪ሠቅሠቀ ፡ ዘያነብር ፡ ውስተ ፡ አርእስተ ፡ አዕማድ ፤ ፩ሠቅሠቅ ፡ ዲበ ፡ ፩ርእስ ፡ ወካልእ ፡ ሠቅሠቅ ፡ ዲበ ፡ ካልእ ፡ ርእስ ።
⁵ ወገብሮሙ ፡ ከመ ፡ እንተ ፡ ላዕሉ ፡ ይሰቀሉ ፡ በ፪ሰሌዳተ ፡ ብርት ፡ ሥቅሡቃን ፡ ገብረ ፡ ዘይሰቀል ፡ ሰሌዳ ፡ መልዕልተ ፡ ሰሌዳ ፡ ወከማሁ ፡ ገብረ ፡ ለካልእ ፡ ርእስ ።
⁶ ወአቀመ ፡ ፪አዕማደ ፡ ዘኤላም ፡ ዘውስተ ፡ መቅደስ ፡ ወሶበ ፡ አቀመ ፡ አሐተ ፡ ዐምደ ፡ ሰመያ ፡ ስማ ፡ ያቁም ፡ ወሶበ ፡ አቀመ ፡ ካልእተ ፡ ዐምደ ፡ ሰመያ ፡ ስማ ፡ በለዝ ።
⁷ ወውስተ ፡ አርእስተ ፡ አዕማድ ፡ ገብረ ፡ ጽጌያተ ፡ ወመንገለ ፡ ኤላም ፡ ዘዘ ፡ ርብዕ ፡ በእመት ።
⁸ ወሜላንትሮን ፡ ላዕለ ፡ ክልኤሆን ፡ አዕማድ ፡ ወመልዕልተ ፡ አርእስቲሆን ፡ በአምጣነ ፡ ግዘፈ ፡ ሜላንትሮን ፡ ዘመንገለ ፡ ገቦሆን ።
⁹ ወገብረ ፡ ባሕረ ፡ ዘዕሥር ፡ በእመት ፡ እምጽንፉ ፡ እስከ ፡ ጽንፉ ፡ ወከባብ ፡ ዐውዳ ፡ ወኀምስ ፡ በእመት ፡ ላዕላ ፡ ወኵሉ ፡ አምጣነ ፡ በውዳ ፡ ሠላሳ ፡ ወሥልስ ፡ በእመት ።
¹⁰ ወመታግርተ ፡ ገብረ ፡ ላቲ ፡ እምነ ፡ መንገለ ፡ መትሕተ ፡ ከናፍሪሃ ፡ እንተ ፡ ዐውዳ ፡ ዘየዐውዳ ፡ ዘዘ ፡ ዕሥር ፡ በእመት ፡ ዘይመጥቃ ፡ ለይእቲ ፡ ባሕር ፡ ወያላዕላ ፡ ወገብረ ፡ ከናፍሪሃ ፡ ከመ ፡ ከናፍረ ፡ ጽዋዕ ፡ ወበውስቴታበቈለ ፡ ጽጌያተ ፡ ወግዘፉ ፡ ስዝር ።
¹¹ ወ፲ወ፪አልህምት ፡ መትሕታ ፡ ለይእቲ ፡ ባሕር ፤ ፫ደኔጽሩ ፡ ለመንገለ ፡ መስዕ ፤ ወ፫ይኔጽሩ ፡ ለመንገለ ፡ ባሕር ፤ ወ፫ይኔጽሩ ፡ ለመንገለ ፡ አዜብ ፤ ወ፫ይኔጽሩ ፡ ለመንገለ ፡ ጽባሕ ፡ ወዘባናተ ፡ ኵሎሙ ፡ ለመንገለ ፡ አረፍት ፡ ወይእቲ ፡ ባሕር ፡ እምላዕሉ ፡ ዲቤሆሙ ።
¹² ወገብረ ፡ ፲ሜካኖተ ፡ ዘብርት ፡ ኀምስ ፡ በእመት ፡ ኑኃ ፡ ለአሐቲ ፡ ሜከኖት ፡ ወርሕባ ፡ ርብዕ ፡ በእመት ፡ ወስድስ ፡ በእመት ፡ ቆማ ።
¹³ ወከመዝ ፡ ገብሮን ፡ ለሜካኖት ፤ አስተዳረጎን ፡ ወአስተናበሮን ፡ ከመ ፡ ማዕገት ፡ ወአስተኣኀዞን ፡ ከመ ፡ ማዕገት ፡ በበይናቲሆን ።
¹⁴ ወማእከሎን ፡ በኀበ ፡ ይትኣኀዛ ፡ አናብስት ፡ ወአልህምት ፡ ወኪሩብ ፡ ወከመዝ ፡ ውስተ ፡ መአኀዛቲሆን ፡ እምታሕቱሂ ፡ ወእምላዕሉሂ ፡ አናብስት ፡ ወአልህምት ፡ ግብረ ፡ ኮሬ ፡ ሙራዱ ።
¹⁵ ወ፬መንኰራኵረ ፡ ብርት ፡ ለለ ፡ ፩ሜከኖት ፡ ወመአኀዛቲሁ ፡ ዘብርት ፡ ወ፬ገበዋቲሁ ፡ ከመ ፡ አምሳለ ፡ ዘመትሕተ ፡ ማዕከክ ።
¹⁶ ወእደው ፡ ውስተ ፡ ውእቱ ፡ መንኰራኵር ፡ እኁዝ ፡ ዘሜከኖት ።
¹⁷ ወቆሙ ፡ ለውእቱ ፡ መንኰራኵር ፡ ለለ ፡ አሐዱ ፡ እመት ፡ ወመንፈቀ ፡ እመት ።
¹⁸ ወግብረቱ ፡ ለውእቱ ፡ መንኰራኵር ፡ ከመ ፡ ግብረተ ፡ መንኰራኵረ ፡ ሰረገላት ፡ ወእደዊሆሙ ፡ ወዘባናቲሆሙ ፡ ወኵሉ ፡ ግብሮሙ ፡ ስብኮ ።
¹⁹ ወኵሉ ፡ ፬መታክፍቲሆሙ ፡ ውስተ ፡ ፬መኣዝኒሃ ፡ ለለ ፡ አሐቲ ፡ ሜኬኖት ፡ ወእኁዝ ፡ በሜክኖት ፡ ወመታክፊሃ ።
²⁰ ወውስተ ፡ ርእሰ ፡ ሜኮኖት ፡ መንፈቀ ፡ እመት ፡ ቀጸላ ፡ ክባብ ፡ ዐውዳ ፡ ውስተ ፡ ርእሳ ፡ ለሜኮኖት ፡ ወአርእስተ ፡ እዴዊሃ ፡ ይእኅዝ ፡ ኀበ ፡ ተራከባ ፡ ወአርእስተ ፡ እደዊሆን ፡ ክሡት ።
²¹ ወኀበ ፡ ተኣኀዛ ፡ ኪሩብ ፡ ወበቀልት ፡ ወኣናብስት ፡ ዘከመ ፡ ውስተ ፡ ገጾሙ ፡ ለኵሎሙ ፡ እለ ፡ ውስተ ፡ ዐውድ ።
²² ወከመዝ ፡ ገብረ ፡ ለዐሥሩ ፡ መካኖት ፡ ፩ግብረቶን ፡ ወ፩አምጣኖን ፡ ለኵሎን ።
²³ ወገብረ ፡ ፲መስፈርተ ፡ ብርት ፡ ዘስሙ ፡ ኪጥሮገውሎስ ፡ ወያገምር ፡ አሐዱ ፡ ኪጥሮገውሎስ ፡ ፵በመስፈርተ ፡ ኮኢሶ ፡ ወይመልእ ፡ ወለለ ፡ አሐቲ ፡ ሜከኖት ፡ ፩ኪጥሮጋውሎስ ፡ ወከማሁ ፡ ለ፲ሜከኖት ።
²⁴ ወአንበሮን ፡ ለ፲ሜከኖት ፡ እምገቦ ፡ ቤት ፡ ዘፀጋም ፡ ወባሕርሰ ፡ እምገቦ ፡ ቤት ፡ ዘየማን ፡ ጽባሓዊ ፡ ዘእምነ ፡ ገቦ ፡ አዜብ ።
²⁵ ወገብረ ፡ ኪረም ፡ ጸሃራተ ፡ ወክክማተ ፡ ፫ወፍየላተኒ ፡ ወፈጸመ ፡ ኪረም ፡ ገቢረ ፡ ኵሎ ፡ ግብረ ፡ ዘገብረ ፡ ለንጉሥ ፡ ሰሎሞን ፡ በውስተ ፡ ቤተ ፡ እግዚአብሔር ።
²⁶ አዕማደ ፡ ፪ወአርእስቲሆን ፡ ለአዕማድ ፡ መልዕልተ ፡ ክልኤሆን ፡ አዕማድ ፡ ወሠቃሥቀ ፡ ፪ዘያነብር ፡ ዲበ ፡ ክልኤሆን ፡ አርእስተ ፡ አዕማድ ፡ ዘግልፎ ፡ ዘዲበ ፡ አዕማድ ።
²⁷ ወጽጌያተ ፡ ሮማን ፡ ፬፻ውስተ ፡ ክልኤሆን ፡ ሠቅሠቅ ፡ በበ ፡ ፪ጾታ ፡ ለለ ፡ ፩ሠቅሠቅ ፡ ዘዲበ ፡ ክልኤሆሙ ፡ አርእስተ ፡ አዕማድ ፡ ዘመልዕልተ ፡ ክልኤሆን ፡ አዕማድ ።
²⁸ ወሜኬኖተ ፡ ፲ወ፲መሳፍርት ፡ ኪጥሮገውሎስ ፡ ለ፲ሜኮኖት ።
²⁹ ወባሕረ ፡ አሐተ ፡ ወ፲ወ፪አልህምተ ፡ መትሕተ ፡ ባሕር ።
³⁰ ወጸሃራተኒ ፡ ወከከማተኒ ፡ ፫ወፍየላተኒ ፡ ወኵሉ ፡ ንዋይ ፡ ዘገብረ ፡ ኪረም ፡ ለንጉሥ ፡ ሰሎሞን ፡ ለቤተ ፡ እግዚአብሔር ፤ ወ፵ወ፰አዕማድ ፡ ለቤተ ፡ ንጉሥ ፡ ወለቤተ ፡ እግዚአብሔርኒ ፡ ገብረ ፡ ንጉሥ ፡ ኵሎ ፡ ዘገብረ ፡ ኪራም ፡ ዘብርት ፡ ሰንጐጕ ።
³¹ ወአልቦ ፡ መድሎተ ፡ ዘተገብረ ፡ ዝንቱ ፡ ኵሉ ፡ ግብር ፡ እስመ ፡ ብዙኅ ፡ ወአልቦ ፡ ኍልቈ ፡ መድሎቱ ፡ ለውእቱ ፡ ብርት ።
³² ወበቤት ፡ ዘኀበ ፡ ዮርዳኖስ ፡ ሰበኮ ፡ በኀበ ፡ መግዘፉ ፡ ለምድር ፡ በማእከለ ፡ ሰኮት ፡ ወበማእከለ ፡ ሴይራ ።
³³ ወአብአ ፡ ሰሎሞን ፡ ንዋየ ፡ ዘአግበረ ፡ ለቤተ ፡ እግዚአብሔር ፡ ምሥዋዐ ፡ ዘወርቅ ፡ ወማእደ ፡ እንተ ፡ ወርቅ ፡ እንተ ፡ ዲቤሃ ፡ ይሠርዑ ፡ ኅብስተ ፡ ቍርባን ፤ ወመራናታተ ፡ ፭እምየማኑ ፡ ወ፭እምፀጋሙ ፡ [ቅድመ ፡] ዳቤር ፡ እለ ፡ ወርቅ ፡ እኁዛተ ፡ ወርኩባተ ፡ ተቅዋማቲሆን ፡ ወመኃትዊሆን ፡ ወበዘያሤንይዎን ፡ ዘወርቅ ።
³⁴ ወመዓጹትኒ ፡ ወተቅዋማቲሁኒ ፡ ወጽዋዓቲሁኒ ፡ ወመጣብሕቲሁኒ ፡ ወአጽሕልቲሁኒ ፡ ዘወርቅ ፡ ወኆኀተ ፡ ቤቱኒ ፡ ውሳጢ ፡ ዘቅዱሰ ፡ ቅዱሳን ፡ ወመዓጹተ ፡ ጽርሑኒ ፡ ዘወርቅ ።
³⁵ ወተፈጸመ ፡ ግብሩ ፡ ዘገብረ ፡ ሰሎሞን ፡ ለቤተ ፡ እግዚአብሔር ፡ ወአብአ ፡ ሰሎሞን ፡ ቅድሳተ ፡ ዳዊት ፡ አቡሁ ፡ ወኵሎ ፡ ቅድስተ ፡ ሰሎሞን ፡ ዘወርቅ ፡ ወዘብሩር ፡ አብአ ፡ ውስተ ፡ መዝገበ ፡ ቤተ ፡ እግዚአብሔር ።
³⁶ ወሐነጸ ፡ ሰሎሞን ፡ በ፲ወ፫ክረምት ፤
³⁷ ሐነጸ ፡ ቤተ ፡ በገዳም ፡ ውስተ ፡ ደብረ ፡ ሊባኖስ ፤ ፻በእመት ፡ ኑኁ ፡ ወ፶በእመት ፡ ግድሙ ፤ ወ፫ጾታ ፡ አዕማዲሁ ፡ ዘዕፀወ ፡ ቄድሪኖን ፡ ወአርእስተ ፡ አዕማዲሁኒ ፡ ዘዕፀ ፡ ቄድሪኖን ።
³⁸ ወአስተቀጸሎ ፡ እንተ ፡ ጠፈሩ ፡ ለቤት ፡ እንተ ፡ ዐውዱ ፡ አዕማዲሁ ፡ ፵ወ፭ለለ ፡ አሐዱ ፡ ጾታሁ ።
³⁹ ወሜለንትራ ፡ ፫ቅሙር ፡ ዐዘቅታተ ፡ ጠፈሩ ።
⁴⁰ መሥልስተ ።
⁴¹ ወኵሉ ፡ መሳክዊሁ ፡ ወዐዘቅታቲሁኒ ፡ ርቡዕ ፡ ወሥቅሡቅ ፡ ወመሥልስት ፡ መሳክዊሁ ፡ እስከ ፡ መልዕልት ፡ ኆኃቲሁ ።
⁴² ወኤላም ፡ ዘአዕማዲሁ ፡ ኀምሳ ፡ ኑኁ ፡ ወኀምሳ ፡ ርሕቡ ፡ ወዘውግ ፡ እሙንቱ ፡ ኤላም ፡ ዘቅድሜሆሙኒ ፡ አዕማድ ፡ ወግዙፍ ፡ ቅድሜሆሙ ፡ ለኤላም ።
⁴³ ወኤላምሂ ፡ ዘመናብርት ፡ በዘ ፡ ይኴንን ፡ ኤላም ፡ ዘምኵናን ።
⁴⁴ ወቤቶሙኒ ፤
⁴⁵ ቤተ ፡ ዘውስቴቱ ፡ ይነብር ፡ ህየ ፡ ዐጸድ ፡ ፩ፍሉጥ ፡ እምነ ፡ እሉ ፡ ወግብሩሰ ፡ ካማሁ ፡ ወቤታኒ ፡ ለወለተ ፡ ፈርዖን ፡ እንተ ፡ አውሰባ ፡ ሰሎሞን ፡ በከመ ፡ ዝንቱ ፡ ኤላም ።
⁴⁶ ወኵሉ ፡ ዝንቱ ፡ በዕንቍ ፡ ክቡር ፡ ወግሉፍ ፡ ወስርግው ፡ እንተ ፡ ውስጥ ፡ እምነ ፡ መሠረቱ ፡ እንተ ፡ ውስጥ ፡ እስከ ፡ ጠፈሩ ፡ ወአፍአኒ ፡ ውስተ ፡ ዐጸድ ፡ ዐቢይ ፤
⁴⁷ ተሣረረ ፡ በእብን ፡ ክቡር ፡ ወዐበይት ፡ እብን ፡ ዘዘ ፡ ዕሥር ፡ በእመት ፡ ወዘዘ ፡ ስምን ፡ በእመት ፤
⁴⁸ ወእምላዕሉሂ ፡ በክቡራት ፡ እለ ፡ ዕሩይ ፡ አምጣኒሆን ፡ እለ ፡ ኢኮና ፡ ውቁራተ ፡ ወዐጸዱሂ ፡ በዕፀ ፡ ቄድሪኖን ፤
⁴⁹ ወዐውዱ ፡ ፫ጾታ ፡ ዘኢኮነ ፡ ውቅሮ ፡ ወ፩ጾታ ፡ በውቅሮ ፡ ወበዕፀወ ፡ ቄድሪኖን ፡ ገለፎ ፡ ወፈጸመ ፡ ሰሎሞን ፡ ኵሎ ፡ በቤቱ ።

http://www.sacred-texts.com/bib/poly/kg1008.htm 8↗     ¹ ወከመዝ ፡ ሰባ ፡ ፈጸመ ፡ ሰሎሞን ፡ ሐኒጸ ፡ ቤተ ፡ እግዚአብሔር ፡ ወቤተ ፡ ርእሱ ፡ እምድኅረ ፡ ፳ዓም ፡ ይእተ ፡ አሚረ ፡ አስተጋብኦሙ ፡ ለኵሎሙ ፡ ሊቃናተ ፡ እስራኤል ፡ በጽዮን ፡ ከመ ፡ ያምጽኣ ፡ ለታቦተ ፡ ሕጉ ፡ ለእግዚአብሔር ፡ እምነ ፡ ህገረ ፡ ዳዊት ፡ ውስተ ፡ ጽዮን ፤
² በወርኀ ፡ አታሚን ፤
³ ወጾሩ ፡ ካህናት ፡ ታቦተ ፤
⁴ ወደብተራ ፡ መርጡል ፡ ወኵሎሙ ፡ ንዋየ ፡ ቅድሳት ፡ ዘውስተ ፡ ድብተራ ፡ መርጡል ።
⁵ ወንጉሥኒ ፡ ወኵሉ ፡ እስራኤል ፡ ቅድመ ፡ ታቦት ፡ ይጠብሑ ፡ አባግዐ ፡ ወአልህምተ ፡ ዘአልቦ ፡ ኊልቈ ፡ ።
⁶ ወአብእዋ ፡ ካህናት ፡ ለታቦት ፡ ውስተ ፡ መካና ፡ ውስተ ፡ ዳቤር ፡ ዘውስተ ፡ ቤት ፡ ውስተ ፡ ቅድሳተ ፡ ዘቅዱሳን ፡ መትሕተ ፡ ክነፊሆሙ ፡ ለኪሩብ ።
⁷ እስመ ፡ ኪሩብ ፡ ጸለሉ ፡ ክነፊሆሙ ፡ መልዕልተ ፡ መካና ፡ ለታቦት ፡ ወጸለልዋ ፡ ኪሩብ ፡ ለታቦት ፡ መልዕልተ ፡ ቅድሳቲሃ ፡ ዘእምላዕሉ ።
⁸ ወተኣኀዛ ፡ በቅድሳት ፡ ወይኔጽራ ፡ አርእስተ ፡ ቅዱሳን ፡ እምነ ፡ ቅዱሳን ፡ ላዕለ ፡ ገጸ ፡ ዳቤር ፡ ወበአፍአሰ ፡ ኢያስተርኢ ።
⁹ ወአልቦቱ ፡ ውስተ ፡ ታቦት ፡ ዘእንበለ ፡ ክልኤ ፡ ጽላት ፡ ዘእብን ፡ ጽላት ፡ ዘሕግ ፡ ዘሤመ ፡ ሙሴ ፡ ህየ ፡ በኮሬብ ፡ ዘተካየደ ፡ እግዚአብሔር ፡ ምስለ ፡ ደቂቀ ፡ እስራኤል ፡ አመ ፡ ወፅኡ ፡ እምነ ፡ ምድረ ፡ ግብጽ ።
¹⁰ ወእምዝ ፡ ሶበ ፡ ወፅኡ ፡ ካህናት ፡ እምነ ፡ ቤተ ፡ መቅደስ ፡ መልአ ፡ ኵሎ ፡ ቤቶ ፡ ደመና ።
¹¹ ወስእኑ ፡ ቀዊመ ፡ ካህናት ፡ ወገቢረ ፡ ግብሮሙ ፡ እምቅድመ ፡ ደመና ፡ እስመ ፡ መልአ ፡ ስብሐተ ፡ እግዚአብሔር ፡ ውስተ ፡ ቤቱ ።
¹² ወሜጠ ፡ ንጉሥ ፡ ገጾ ፡ ወባረኮሙ ፡ ለኵሉ ፡ እስራኤል ፡ ወይቀውሙ ፡ ኵሎ ፡ ማኅበሮሙ ፡ ለእስራኤል ።
¹³ ወይቤ ፡ ይትባረክ ፡ እግዚአብሔር ፡ አምላከ ፡ እስራኤል ፡ ዮም ፡ ዘነበበ ፡ በአፉሁ ፡ በእንተ ፡ ዳዊት ፡ አቡየ ፡ ወፈጸመ ፡ በእደዊሁ ፡ እንዘ ፡ ይብል ፤
¹⁴ እምአመ ፡ አውፃእክዎሙ ፡ ለሕዝብየ ፡ እስራኤል ፡ እምነ ፡ ግብጽ ፡ ኢኀረይኩ ፡ ዘውስተ ፡ ሀገር ፡ እምነ ፡ አሐቲ ፡ በትረ ፡ እስራኤል ፡ ከመ ፡ ይትሐነጽ ፡ ቤተ ፡ ሊተ ፡ ዘይከውን ፡ ለስምየ ፡ በህየ ፡ ወኀረይኩ ፡ በኢየሩሳሌም ፡ ከመ ፡ ይኩን ፡ ለስምየ ፡ በህየ ፡ ወኀረይክዎ ፡ ለዳዊት ፡ ከመ ፡ ይኩን ፡ መስፍነ ፡ ለሕዝብየ ፡ እስራኤል ።
¹⁵ ወፈቀደ ፡ ዳዊት ፡ አቡየ ፡ በልቡ ፡ ከመ ፡ ይሕንጽ ፡ ቤተ ፡ ለስመ ፡ እግዚአብሔር ፡ አምላከ ፡ እስራኤል ።
¹⁶ ወይቤሎ ፡ እግዚአብሔር ፡ ለዳዊት ፡ አቡየ ፡ እስመ ፡ ፈቀድከ ፡ በልብከ ፡ ትሕንጽ ፡ ቤተ ፡ ለስምየ ፡ ሠናየ ፡ ገበርከ ፡ እስመ ፡ ፈቀድከ ፡ በልብከ ።
¹⁷ ወአኮ ፡ አንተ ፡ ዘተሐንጽ ፡ ቤትየ ፡ አላ ፡ ወልድከ ፡ ዘወፅአ ፡ እምነ ፡ ገበዋቲከ ፡ ውእቱ ፡ የሐንጽ ፡ ቤተ ፡ ለስምየ ።
¹⁸ ወአቀመ ፡ እግዚአብሔር ፡ ቃሎ ፡ ዘነበበ ፡ ወቆምከ ።
¹⁹ ህየንተ ፡ ዳዊት ፡ አቡየ ፡ ወነበርኩ ፡ ላዕለ ፡ መንበረ ፡ እስራኤል ፡ በከመ ፡ ይቤ ፡ እግዚአብሔር ፡ ወሐነጽኩ ፡ ቤተ ፡ ለስመ ፡ እግዚአብሔር ፡ አምላከ ፡ እስራኤል ።
²⁰ ወገበርኩ ፡ በህየ ፡ መካነ ፡ ለታቦት ፡ እንተ ፡ ውስቴታ ፡ ሕገ ፡ እግዚአብሔር ፡ ዘተካየደ ፡ ምስለ ፡ አበዊነ ፡ አመ ፡ አውፅኦሙ ፡ እምነ ፡ ግብጽ ።
²¹ ወቆመ ፡ ሰሎሞን ፡ ቅድመ ፡ ምሥዋዕ ፡ ዘእግዚአብሔር ፡ በቅድመ ፡ ኵሉ ፡ መኅበሮሙ ፡ ለእስራኤል ፡ ወአልዐለ ፡ እዴሁ ፡ ውስተ ፡ ሰማይ ።
²² ወይቤ ፡ እግዚኦ ፡ አምላከ ፡ እስራኤል ፡ አልቦ ፡ ከማከ ፡ አምላክ ፡ በሰማይ ፡ በላዕሉ ፡ ወበምድር ፡ በታሕቱ ፡ ዘተዐቅብ ፡ ኪዳኖ ፡ ወምሕረቶ ፡ ለገብርከ ፡ ዘየሐውር ፡ በኵሉ ፡ ልቡ ፡ ቅድሜከ ።
²³ ዘዐቀብከ ፡ ለዳዊት ፡ ገብርከ ፡ አቡየ ፡ በከመ ፡ ነበብከ ፡ በአፉከ ፡ ወፈጸምከ ፡ በእደዊከ ፡ ዮም ፡ በዛቲ ፡ ዕለት ።
²⁴ ወይእዜኒ ፡ እግዚኦ ፡ አምላከ ፡ እስራኤል ፡ ዕቀብ ፡ ለገብርከ ፡ ዳዊት ፡ አቡየ ፡ ዘትቤሎ ፡ ኢይጠፍእ ፡ ብእሲ ፡ እምኔከ ፡ ዘይነብር ፡ ውስተ ፡ መንበረ ፡ እስራኤል ፡ እምቅድመ ፡ ገጽየ ፡ ወባሕቱ ፡ ለእመ ፡ ዐቀቡ ፡ ደቂቅከ ፡ ፍኖቶሙ ፡ ከመ ፡ ይሖሩ ፡ ቅድሜየ ፡ በከመ ፡ ሖርከ ፡ ቅድሜየ ።
²⁵ ወይእዜኒ ፡ እግዚኦ ፡ አምላከ ፡ እስራኤል ፡ እሙነ ፡ ይኩን ፡ ቃልከ ፡ ለዳዊት ፡ አቡየ ፡ ገብርከ ።
²⁶ ለእመ ፡ አማንኑ ፡ ይነብር ፡ እግዚአብሔር ፡ ምስለ ፡ እጓለ ፡ እመሕያው ፡ ውስተ ፡ ምድር ፡ ዘሰማይ ፡ ወሰማየ ፡ ሰማያት ፡ ኢየአክሎ ፡ ወባሕቱ ፡ ዝንቱኒ ፡ ቤት ፡ ዘሐነጽኩ ፡ ለስምከ ።
²⁷ ወርኢ ፡ ጸሎትየ ፡ እግዚኦ ፡ አምላከ ፡ እስራኤል ፡ ወስማዕ ፡ ጸሎትየ ፡ ለገብርከ ፡ ዘይስእለከ ፡ በቅድሜከ ፡ ዮም ፡ በኀቤከ ፤
²⁸ ከመ ፡ ይኩን ፡ ክሡተ ፡ አዕይንቲከ ፡ ውስተ ፡ ዝንቱ ፡ ቤት ፡ መዓልተ ፡ ወሌሊተ ፡ ውስተ ፡ መካን ፡ ዘትቤ ፡ ይሄሉ ፡ ስምየ ፡ ህየ ፡ ከመ ፡ ትስማዕ ፡ ጸሎተ ፡ እንተ ፡ ይጼሊ ፡ ገብርከ ፡ በዝንቱ ፡ መካን ፡ መዓልተ ፡ ወሌሊተ ።
²⁹ ወስማዕ ፡ ስአለቶ ፡ ለገብርከ ፡ ዘሕዝብከ ፡ እስራኤል ፡ ዘጸለዩ ፡ በዝንቱ ፡ መካን ፡ ወአንተ ፡ ስማዕ ፡ በውስተ ፡ መካነ ፡ መንበርከ ፡ በሰማይ ፡ ወግበር ፡ ወተሣሀሎሙ ፤
³⁰ ለኵሉ ፡ እለ ፡ ይኤብሱ ፡ ላዕለ ፡ ቢጾሙ ፡ ወለእመ ፡ ረገሙ ፡ መርገመ ፡ ወመጽኡ ፡ ወተጋነዩ ፡ በቅድመ ፡ ምሥዋዒከ ፡ በዝንቱ ፡ ቤት ።
³¹ ወስማዕ ፡ አንተ ፡ በሰማይ ፡ ወግበር ፡ ወኰን ፡ ሕዝበከ ፡ እስራኤል ፡ በጌጋዩ ፡ ለጊጉይ ፡ ከመ ፡ ትግባእ ፡ ላዕለ ፡ ርእሱ ፡ ምግባሩ ፡ ወታጽድቆ ፡ ለጻድቅ ፡ ወትፈድዮ ፡ በከመ ፡ ጽድቁ ።
³² ወእመኒ ፡ ወድቁ ፡ ሕዝብከ ፡ እስራኤል ፡ ቅድመ ፡ ፀሮሙ ፡ እስመ ፡ ይኤብሱ ።
³³ ለስምከ ፡ ወእምዝ ፡ ገብኡ ፡ ወተጋነዩ ፡ ለስምከ ፡ ወጸለዩ ፡ ወሰአሉ ፡ በዝንቱ ፡ በውስተ ፡ ዝንቱ ፡ ቤት ፤ ወስማዕ ፡ አንተ ፡ በሰማይ ፡ ወተሣሀል ፡ ኀጣውአ ፡ ሕዝብከ ፡ እስራኤል ፡ ወአግብኦሙ ፡ ውስተ ፡ ምድሮሙ ፡ እንተ ፡ ወሀብከ ፡ ለአበዊሆሙ ።
³⁴ ወእመኒ ፡ ተከልአ ፡ ዝናመ ፡ ሰማይ ፡ እስመ ፡ ይኤብሱ ፡ ለከ ፡ ወጸለዩ ፡ ውስተ ፡ ዝንቱ ፡ መካን ፡ ወገነዩ ፡ ለስምከ ፡ ወተመይጡ ፡ እምነ ፡ ኀጣውኢሆሙ ፡ ሶበ ፡ አሕመምኮሙ ፤
³⁵ ወስማዕ ፡ እምሰማይ ፡ ወተሣሀል ፡ ኀጣውኢሆሙ ፡ ለሕዝብከ ፡ እስራኤል ፡ እስመ ፡ [ታ]ርእዮሙ ፡ ፍኖተ ፡ ሠናይተ ፡ ከመ ፡ ይሖሩ ፡ ባቲ ፡ ወትሁብ ፡ ዝናመ ፡ ላዕለ ፡ ምድር ፡ እንተ ፡ ወሀብካሆሙ ፡ ለሕዝብከ ፡ ርስቶሙ ።
³⁶ ወረኃብኒ ፡ ለእመ ፡ ኮነ ፡ ወብድብድ ፡ ለእመ ፡ ኮነ ፡ እስመ ፡ ይክውን ፡ መንሱት ፡ ወአንበጣኒ ፡ ወአናኵዕኒ ፡ ለእመ ፡ መጽኡ ፡ ወእመኒ ፡ አመንደቦ ፡ ፀሩ ፡ በውስተ ፡ አሐቲ ፡ እምነ ፡ አህጉሪሃ ፡ ኵሎ ፡ መንሱተ ፡ ወኵሎ ፡ ሕማመ ፤
³⁷ ወበኵሉ ፡ ምሕልላ ፡ ወበኵሉ ፡ ጸሎት ፡ እመ ፡ ኮነ ፡ ለኵሉ ፡ ሰብእ ፡ ወእመኒ ፡ ዘአርሰሐስሖ ፡ ለለ ፡ ፩በልቡ ፡ ወአልዐለ ፡ እደዊሁ ፡ በውስተ ፡ ዝንቱ ፡ ቤት ፤
³⁸ ወስማዕ ፡ አንተ ፡ በሰማይ ፡ እምውስተ ፡ ድልው ፡ ማኅደሪከ ፡ ወተሣሀል ፡ ወግበር ፡ ወሀቦ ፡ ለሰብእ ፡ በከመ ፡ ፍኖቱ ፡ ወበከመ ፡ ታአምር ፡ ልቦ ፡ እስመ ፡ አንተ ፡ ባሕቲትከ ፡ ታአምር ፡ ልበ ፡ ኵሉ ፡ እጓለ ፡ እመሕያው ፤
³⁹ ከመ ፡ ይፍርሁ ፡ በኵሉ ፡ መዋዕል ፡ ዘቦቱ ፡ የሐይዉ ፡ እሙንቱ ፡ ላዕለ ፡ ምድር ፡ እንተ ፡ ወሀብከ ፡ ለአበዊነ ።
⁴⁰ ወከማሁ ፡ ለነኪርኒ ፡ ለዘ ፡ ኢኮነ ፡ እምውስተ ፡ ሕዝብከ ፤
⁴¹ እምከመ ፡ መጽኡ ፡ ወጸለዩ ፡ ውስተ ፡ ዝንቱ ፡ መካን ፤
⁴² ወስማዕ ፡ አንተ ፡ እምሰማይ ፡ እምነ ፡ ድልው ፡ ማኅደርከ ፡ ወግበር ፡ በእንተ ፡ ኵሉ ፡ ዘጸውዐከ ፡ ነኪርኒ ፡ ከመ ፡ ያእምሩ ፡ ኵሉ ፡ አሕዛበ ፡ ምድር ፡ ስመከ ፡ ወይፍርሁከ ፡ በከመ ፡ ሕዝብከ ፡ እስራኤል ፡ ወያእምሩ ፡ ከመ ፡ ተሰምየ ፡ ስምከ ፡ ውስተ ፡ ዝንቱ ፡ ቤት ፡ ዘሐነጽኩ ።
⁴³ ወእመሂ ፡ ወፅኡ ፡ ሕዝብከ ፡ ይፅብኡ ፡ ፀሮሙ ፡ በፍኖት ፡ እንተ ፡ ታገብኦሙ ፡ ወጸለዩ ፡ በስመ ፡ እግዚአብሔር ፡ (በ)እንተ ፡ ፍኖተ ፡ ሀገር ፡ እንተ ፡ ኀረይከ ፡ [ወ]እንተ ፡ ቤት ፡ ዘሐነጽኩ ፡ ለስምከ ፤
⁴⁴ ወስማዕ ፡ እምሰማይ ፡ ጸሎቶሙ ፡ ወስእለቶሙ ፡ ወግበር ፡ ሎሙ ፡ በከመ ፡ ጽድቆሙ ።
⁴⁵ እስመ ፡ ይኤብሱ ፡ ለከ ፡ እስመ ፡ አልቦ ፡ ሰብአ ፡ ዘኢይኤብስ ፡ ወታመጽእ ፡ ላዕሌሆሙ ፡ ወታገብኦሙ ፡ ቅድመ ፡ ፀሮሙ ፡ ወይፄውውዎሙ ፡ እለ ፡ ፄወውዎሙ ፡ ውስተ ፡ ምድር ፡ ርሕቅት ፡ ወእመኒ ፡ ውስተ ፡ ቅሩብ ፤
⁴⁶ ወሜጡ ፡ ልቦሙ ፡ በውእቱ ፡ ምድር ፡ ኀበ ፡ ወሰድዎሙ ፡ ህየ ፡ ወገብኡ ፡ ወተጋነዩ ፡ ለከ ፡ በውእቱ ፡ ብሔር ፡ ኀበ ፡ ፈለሱ ፡ ወይቤሉ ፡ አበስነ ፡ ወጌገይነ ፡ ወዐመፅነ ፤
⁴⁷ ወገብኡ ፡ ኀቤከ ፡ በኵሉ ፡ ልቦሙ ፡ ወበኵሉ ፡ ነፍሶሙ ፡ በምድረ ፡ ፀሮሙ ፡ ኀበ ፡ ወሰድኮሙ ፡ ወእመኒ ፡ ጸለዩ ፡ ኀቤከ ፡ [እንተ ፡] ምድሮሙ ፡ እንተ ፡ ወሀብከ ፡ ለአበዊሆሙ ፡ ወሀገር ፡ እንተ ፡ ኀረይከ ፡ ወቤት ፡ ዘሐነጽኩ ፡ ለስምከ ፤
⁴⁸ ወስማዕ ፡ እምነ ፡ ሰማይ ፡ እምድልው ፡ ማኀደርከ ፤
⁴⁹ ወተሣሀል ፡ ኀጢአቶሙ ፡ ዘአበሱ ፡ ለከ ፡ ወኵሎ ፡ ክሕደቶሙ ፡ ለእለ ፡ ክሕዱከ ፡ ወሀቦሙ ፡ ሣህለ ፡ በቅድመ ፡ እለ ፡ ፄወውዎሙ ፡ ወይሣሀልዎሙ ።
⁵⁰ እስመ ፡ ሕዝብከ ፡ ወርስትከ ፡ እሙንቱ ፡ እለ ፡ አውፃእከ ፡ እምነ ፡ ምድረ ፡ ግብጽ ፡ እምነ ፡ መሳብክተ ፡ ኀፂን ።
⁵¹ ወይኩና ፡ አዕይንቲከ ፡ ወእዘኒከ ፡ ክሡታተ ፡ ለጸሎተ ፡ ገብርከ ፡ ወለጸሎተ ፡ ሕዝብከ ፡ እስራኤል ፡ ከመ ፡ ትስምዖሙ ፡ በኵሉ ፡ ዘጸውዑከ ።
⁵² እስመ ፡ ለሊከ ፡ ፈጠርኮሙ ፡ ለርእስከ ፡ ርስተ ፡ እምነ ፡ ኵሉ ፡ አሕዛበ ፡ ምድር ፡ በከመ ፡ ነበብከ ፡ በእደ ፡ ገብርከ ፡ ሙሴ ፡ አመ ፡ አውፃእኮሙ ፡ ለአበዊነ ፡ እምነ ፡ ምድረ ፡ ግብጽ ፡ እግዚኦ ፡ እግዚኦ ።
⁵³ ወይእተ ፡ ጊዜ ፡ ነበበ ፡ ሰሎሞን ፡ በእንተ ፡ ውእቱ ፡ ቤት ፡ ሶበ ፡ ፈጸመ ፡ ሐኒጾቶ ፡ ፀሐየ ፡ አርአየ ፡ እግዚአብሔር ፡ በሰማይ ፡ ወይቤ ፡ ይኅድር ፡ እምአዜብ ፡ ወሐነጸ ፡ ቤትየ ፡ ቤት ፡ ዘድልው ፡ ለከ ፡ ለኀዲር ፡ በ[ሕዳሴ]ሁ ፡ ወአኮኑ ፡ ዛቲ ፡ እንተ ፡ ጽሕፍት ፡ ውስተ ፡ መጽሐፈ ፡ ማሕሌት ።
⁵⁴ ወእምዝ ፡ ሶበ ፡ ፈጸመ ፡ ሰሎሞን ፡ ጸልዮ ፡ ኀበ ፡ እግዚአብሔር ፡ ኵሎ ፡ ዛተ ፡ ጸሎተ ፡ ወዛተ ፡ ስእለተ ፡ ወተንሥአ ፡ እምቅድመ ፡ ምሥዋዑ ፡ ለእግዚአብሔር ፡ እምኀበ ፡ ሰገደ ፡ አስተብሪኮ ፡ በብረኪሁ ፡ ወእደዊሁሰ ፡ ያሌዕል ፡ ውስተ ፡ ሰማይ ።
⁵⁵ ወቆመ ፡ ወባረኮሙ ፡ ለኵሉ ፡ ማኅበረ ፡ እስራኤል ፡ በዐቢይ ፡ ቃል ፡ እንዘ ፡ ይብል ፤
⁵⁶ ይትባረከ ፡ እግዚአብሔር ፡ ዮም ፡ ዘወሀቦሙ ፡ ዕረፍተ ፡ ለሕዝቡ ፡ እስራኤል ፡ በከመ ፡ ኵሉ ፡ ዘነበበ ፡ ወአልቦ ፡ ዘአሕጸጸ ፡ ወኢአሐተኒ ፡ እምነ ፡ ኵሉ ፡ ቃሉ ፡ ሠናይ ፡ ዘነበበ ፡ በእደ ፡ ሙሴ ፡ ገብሩ ።
⁵⁷ ወይሄሉ ፡ እግዚአብሔር ፡ አምላክነ ፡ ምስሌነ ፡ በከመ ፡ ሀሎ ፡ ምስለ ፡ አበዊነ ፡ ወኢየኀድገነ ፡ ወኢይገድፈነ ፤
⁵⁸ ከመ ፡ ይሚጥ ፡ ልበነ ፡ ኀቤሁ ፡ ወንሖር ፡ በኵሉ ፡ ፍናዊሁ ፡ ወንዕቀብ ፡ ኵሎ ፡ ትእዛዞ ፡ ወሥርዐቶ ፡ ዘአዘዞሙ ፡ ለአበዊነ ።
⁵⁹ ወይኩን ፡ ዝንቱ ፡ ነገር ፡ ዘሰአልኩ ፡ ቅድመ ፡ እግዚአብሔር ፡ አምላክነ ፡ ዮም ፡ ከመ ፡ ይቅረብ ፡ ኀበ ፡ እግዚአብሔር ፡ አምላክነ ፡ መዓልተ ፡ ወሌሊተ ፡ ወትግበር ፡ ጽድቆ ፡ ለገብርከ ፡ ወጽድቆሙ ፡ ለሕዝብከ ፡ እስራኤል ፡ ለለ ፡ ቃሉ ፡ ወነገሩ ፡ ወበበ ፡ ዕለቱ ፤
⁶⁰ ከመ ፡ ያእምሩ ፡ ኵሎሙ ፡ አሕዛበ ፡ ምድር ፡ ከመ ፡ አንተ ፡ እግዚአብሔር ፡ አምላክነ ፡ ወአልቦ ፡ ባዕደ ፡ አምላከ ፡ ዘእንበቤከ ።
⁶¹ ወይኩን ፡ ልብነ ፡ ፍጹመ ፡ ኀበ ፡ እግዚአብሔር ፡ አምላክነ ፡ ወበጽድቅ ፡ ከመ ፡ ንሖር ፡ በሥርዐቱ ፡ ወንግበር ፡ ትእዛዞ ፡ በከመ ፡ ዮም ።
⁶² ወጠብሐ ፡ መሥዋዕተ ፡ ቅድመ ፡ እግዚአብሔር ፡ ንጉሥኒ ፡ ወኵሉ ፡ ደቂቀ ፡ እስራኤል ።
⁶³ ወጠብሐ ፡ ሰሎሞን ፡ ንጉሥ ፡ መሥዋዕተ ፡ ሰላም ፡ ወጠብሐ ፡ ለእግዚአብሔር ፡ አልህምተ ፡ ፪፼ወ፳፻ወአባግዐ ፡ [፲ወ፪፼] ወገብረ ፡ ንጉሥ ፡ መድቅሐ ፡ ለቤተ ፡ እግዚአብሔር ፡ ወኵሎሙ ፡ ደቂቀ ፡ እስራኤል ፡ ይእተ ፡ አሚረ ።
⁶⁴ ወቀደሰ ፡ ንጉሥ ፡ ማእከለ ፡ ዐጸድ ፡ ዘቅድመ ፡ ቤተ ፡ እግዚአብሔር ፡ እስመ ፡ ገብረ ፡ በህየ ፡ መሥዋዕተ ፡ ወቍርባነ ፡ ወሥብሐ ፡ መሥዋዕተ ፡ ሰላምኒ ፡ እስመ ፡ ምሥዋዕ ፡ ዘብርት ፡ ዘቅድመ ፡ እግዚአብሔር ፡ ንኡስ ፡ ውእቱ ፡ ወኢያገምር ፡ ቍርባነኒ ፡ ወመሥዋዕተ ፡ ሰላምኒ ።
⁶⁵ ወገብረ ፡ ሰሎሞን ፡ በዓለ ፡ ይእተ ፡ አሚረ ፡ ወኵሉ ፡ እስራኤል ፡ ምስሌሁ ፡ በዐቢይ ፡ ማኅበር ፡ ወለእለኒ ፡ እምፍኖተ ፡ ኤማት ፡ እስከ ፡ እለ ፡ ውስተ ፡ ፈለገ ፡ ግብጽ ፡ ቅድመ ፡ እግዚአብሔር ፡ አምላክነ ፡ በውስተ ፡ ቤት ፡ ዘሐነጸ ፡ ይበልዑ ፡ ወይሰትዩ ፡ (በውስተ ፡ ቤት ፡ ዘሐነጸ ፡) ቅድመ ፡ እግዚአብሔር ፡ አምላክነ ፡ ሰቡዐ ፡ መዋዕለ ፡ ወይትፌሥሑ ።
⁶⁶ ወበሳምንት ፡ ዕለት ፡ ፈነዎሙ ፡ ለሕዝብ ፡ ወባረኮሙ ፡ ወአተዉ ፡ ኵሎሙ ፡ ውስተ ፡ አብያቲሆሙ ፡ እንዘ ፡ ይትፌሥሑ ፡ በሠናይ ፡ ልብ ፡ በእንተ ፡ ሠናይት ፡ ዘገብረ ፡ እግዚአብሔር ፡ ላዕለ ፡ ዳዊት ፡ ገብሩ ፡ ወላዕለ ፡ እስራኤል ፡ ሕዝቡ ።

http://www.sacred-texts.com/bib/poly/kg1009.htm 9↗     ¹ ወእምዝ ፡ ሶበ ፡ ፈጸመ ፡ ሰሎሞን ፡ ሐኒጸ ፡ ቤተ ፡ እግዚአብሔር ፡ ወቤተ ፡ መንግሥቱ ፡ ወኵሉ ፡ ግብሩ ፡ ዘፈቀደ ፡ ሰሎሞን ፡ ይግበር ፤
² አስተርአዮ ፡ እግዚአብሔር ፡ ለሰሎሞን ፡ ዳግመ ፡ በከመ ፡ አስተርአዮ ፡ በገባኦን ።
³ ወይቤሎ ፡ እግዚአብሔር ፡ ሰማዕኩ ፡ ጸሎተከ ፡ ወስእለተከ ፡ ዘሰአልከ ፡ ቅድሜየ ፡ ወገበርኩ ፡ ለከ ፡ በከመ ፡ ኵሉ ፡ ጸሎትከ ፡ ወቀደስክዎ ፡ ለዝንቱ ፡ ቤት ፡ ዘሐነጽከ ፡ ከመ ፡ የሀሉ ፡ ስምየ ፡ ህየ ፡ ለዓለም ፡ ወይሄልዋ ፡ አዕይንትየ ፡ ወልብየ ፡ ህየ ፡ በኵሉ ፡ መዋዕል ።
⁴ ወአንተኒ ፡ ለእመ ፡ ሖርከ ፡ ቅድሜየ ፡ ከመ ፡ ሖረ ፡ ዳዊት ፡ በጽድቅ ፡ ወበንጽሓ ፡ ወበርትዕ ፡ በኵሉ ፡ መዋዕል ፡ ወከመ ፡ ትግበር ፡ ኵሎ ፡ ዘአዘዝኩከ ፡ ወትዕቀብ ፡ ሕግየ ፡ ወትእዛዝየ ፤
⁵ ወኣቀውም ፡ መንበረ ፡ መንግሥትከ ፡ ላዕለ ፡ እስራኤል ፡ ለዓለም ፡ በከመ ፡ እቤሎ ፡ ለዳዊት ፡ አቡከ ፡ ኢያጠፍእ ፡ ብእሴ ፡ እምኔከ ፡ ዘይሰፍን ፡ ለእስራኤል ።
⁶ ወእመሰ ፡ ተመየጥክሙ ፡ ወኀደግሙኒ ፡ ወገባእክሙ ፡ ድኅሬክሙ ፡ አንትሙሂ ፡ ወውሉድክሙሂ ፡ ወኀደግሙኒ ፡ ወኢዐቀብክሙ ፡ ትእዛዝየ ፡ ወሕግየ ፡ ዘወሀብክዎ ፡ ለሙሴ ፡ በቅድሜክሙ ፡ ወሖርክሙ ፡ ወተቀነይክሙ ፡ ለባዕድ ፡ አማልክት ፡ ወስገድክሙ ፡ ሎሙ ፤
⁷ ወእደመስሶሙ ፡ ለእስራኤል ፡ እምነ ፡ ምድር ፡ እንተ ፡ ወሀብክዎሙ ፡ ወዘንተኒ ፡ ቤተ ፡ ዘቀደስኩ ፡ ለስምየ ፡ እገድፎ ፡ እምቅድመ ፡ ገጽየ ፡ ወይከውን ፡ እስራኤል ፡ ለሙስና ፡ ወለነገር ፡ ውስተ ፡ ኵሉ ፡ አሕዛብ ።
⁸ ወዝንቱኒ ፡ ቤት ፡ ዘልዑል ፡ ኵሉ ፡ ዘየኀልፍ ፡ እንተ ፡ ኀቤሁ ፡ ይደነግፅ ፡ ወይትፋጸይ ፡ ወይብሉ ፡ በበይነ ፡ ምንት ፡ ገብራ ፡ እግዚአብሔር ፡ ለዛቲ ፡ ምድር ፡ ወለዛቲ ፡ ቤት ።
⁹ ወይብሉ ፡ እስመ ፡ ኀደግዎ ፡ ለእግዚአብሔር ፡ አምላኮሙ ፡ ዘአውፅኦሙ ፡ ለአበዊሆሙ ፡ እምነ ፡ ግብጽ ፡ እምነ ፡ ቤተ ፡ ቅንየት ፡ ወተለዉ ፡ አማልክተ ፡ ነኪር ፡ ወሰገዱ ፡ ወተቀንዩ ፡ ሎሙ ፡ ወበበይነ ፡ ዝንቱ ፡ አምጽኣ ፡ እግዚአብሔር ፡ ላዕሌሆሙ ፡ ለዛቲ ፡ እኪት ። ወይእተ ፡ አሚረ ፡ አእተዋ ፡ ሰሎሞን ፡ ለወለተ ፡ ፈርዖን ፡ ውስተ ፡ ቤት ፡ ዘሐነጸ ፡ ሎቱ ፡ በእማንቱ ፡ መዋዕል ፡ እምነ ፡ ሀገረ ፡ ዳዊት ።
¹⁰ በ፳ዓመት ፡ ሐነጸ ፡ ሰሎሞን ፡ ፪አብያተ ፡ ቤተ ፡ እግዚአብሔር ፡ ወቤተ ፡ መንግሥቱ ።
¹¹ ወኪራም ፡ ንጉሠ ፡ ጢሮስ ፡ አርድኦ ፡ ለሰሎሞን ፡ በዕፀወ ፡ ቄድሮን ፡ ወበዕፀወ ፡ ጴውቂኖስ ፡ ወበወርቅ ፡ ወበኵሉ ፡ ዘፈቀደ ፡ ወወሀቦ ፡ ሰሎሞን ፡ ንጉሥ ፡ ይአተ ፡ አሚረ ፡ ለኪራም ፡ ፳አህጉረ ፡ በውስተ ፡ ምድረ ፡ ገሊላ ።
¹² ወወፅአ ፡ ኪራም ፡ እምነ ፡ ጢሮስ ፡ ወሖረ ፡ ውስተ ፡ ገሊላ ፡ ይርአዮን ፡ ኪያሆን ፡ አህጉረ ፡ እለ ፡ ወሀቦ ፡ ሰሎሞን ፡ ወኢአደማሁ ።
¹³ ወይቤሎ ፡ ምንትኑ ፡ እላ ፡ አህጉር ፡ እለ ፡ ወሀብከኒ ፡ አንተ ፡ እኁየ ፡ ወሰመዮን ፡ ወሰነ ፡ እስከ ፡ ዮም ።
¹⁴ ወአምጽአ ፡ ኪራም ፡ ለሰሎሞን ፡ ፻ወ፳መካልየ ፡ ወርቅ ፤
²⁶ ወሐመረ ፡ በእንተ ፡ ዘገብረ ፡ ሰሎሞን ፡ ንጉሥ ፡ በጋሲዮን ፡ ዘጋቤር ፡ እንተ ፡ ምእኃዘ ፡ ኤላት ፡ እንተ ፡ ላዕለ ፡ ሐይቀ ፡ ባሕር ፡ ወምድረ ፡ ኤዶም ።
²⁷ ወፈነወ ፡ ኪራም ፡ በውስተ ፡ ሐመሩ ፡ አግብርተ ፡ ዚአሁ ፡ ዕደወ ፡ ኖትያተ ፡ እለ ፡ ይክሉ ፡ ኀዲፈ ፡ ባሕር ፡ ምስለ ፡ አግብርቲሁ ፡ ለሰሎሞን ።
²⁸ ወበጽሑ ፡ እስከ ፡ ሶፌራ ፡ ወነሥኡ ፡ እምህየ ፡ ፻ወ፳መክሊተ ፡ ወአምጽኡ ፡ ለሰሎሞን ።

http://www.sacred-texts.com/bib/poly/kg1010.htm 10↗     ¹ ወንግሥተ ፡ ሳባእ ፡ ሰምዐት ፡ ስሞ ፡ ለሰሎሞን ፡ ወስሞ ፡ ለእግዚአብሔር ፡ ወመጽአት ፡ ትፍትኖ ፡ ምስለ ፡ ጥበብ ።
² ወመጽአት ፡ ኢየሩሳሌም ፡ በኀይል ፡ ክቡድ ፡ ፈድፋደ ፡ ወአግማል ፡ ይጸውሩ ፡ አፈዋተ ፡ ወወርቀ ፡ ብዙኀ ፡ ፈድፋደ ፡ ወዕንቈ ፡ ክቡረ ፡ ወቦአት ፡ ኀበ ፡ ሰሎሞን ፡ ወተናገረቶ ፡ ኵሎ ፡ ዘሀሎ ፡ ውስተ ፡ ልባ ።
³ ወፈከረ ፡ ላቲ ፡ ሰሎሞን ፡ ኵሎ ፡ ቃላቲሃ ፡ ወአልቦ ፡ ቃለ ፡ ዘተሰወረ ፡ እምንጉሥ ፡ ዘኢፈከረ ፡ ላቲ ።
⁴ ወርእየት ፡ ንግሥተ ፡ ሳባእ ፡ ኵሎ ፡ ጥበቢሁ ፡ ለሰሎሞን ፡ ወቤተኒ ፡ ዘሐነጸ ፤
⁵ ወመባልዕቲሁኒ ፡ ለሰሎሞን ፡ ወትርሲተ ፡ አግብርቲሁ ፡ ወዕቃሜ ፡ እለ ፡ ይትለአክዎ ፡ ወአልባሲሁኒ ፡ ወቀዳሕቶኒ ፡ ወምሥዋዓቲሁኒ ፡ ዘይሠውዕ ፡ ቤተ ፡ እግዚአብሔር ፡ ወተደመት ።
⁶ ወትቤሎ ፡ ለንጉሥ ፡ ሰሎሞን ፡ አማን ፡ ውእቱ ፡ ነገር ፡ ዘሰማዕኩ ፡ በምድርየ ፡ በእንተ ፡ ቃለ ፡ ዚአከ ፡ ወበእንተ ፡ ጥበብከ ።
⁷ ወኢአመንክዎሙ ፡ ለእለ ፡ ዜነዉኒ ፡ እስከ ፡ ሶበ ፡ በጻሕኩ ፡ ወርኢኩ ፡ በአዕይንትየ ፡ ወናሁ ፡ ወኢመንፈቀ ፡ አልቦ ፡ ዘዜነዉኒ ፤ ፈድፋደ ፡ ርኢኩ ፡ ተወሰከ ፡ ሠናየ ፡ እምነ ፡ ዜና ፡ ዘዜነዉኒ ፡ በምድርየ ።
⁸ ብጹዓት ፡ አንስቲያከ ፡ ወብጹዓ[ን] ፡ አግብርቲከ ፡ እ[ሎ]ንቱ ፡ እለ ፡ ይቀውሙ ፡ ቅድሜከ ፡ ወትረ ፡ እለ ፡ ይሰምዑ ፡ ኵሎ ፡ ጥበቢከ ።
⁹ ለይኩን ፡ እግዚአብሔር ፡ አምላክከ ፡ ቡሩክ ፡ ዘሠምረ ፡ ያንብርከ ፡ ላዕለ ፡ አትሮንሰ ፡ እስራኤል ፡ እስመ ፡ አፍቀሮ ፡ እግዚአብሔር ፡ ለእስራኤል ፡ ያቅም ፡ እስከ ፡ ለዓለም ፡ ወአንገሠከ ፡ ላዕሌሆሙ ፡ ትግበር ፡ ፍትሐ ፡ ወጽድቀ ፡ በአፍታሔሆሙ ።
¹⁰ ወወሀበቶ ፡ ለሰሎሞን ፡ ፻ወ፳መክሊተ ፡ ዘወርቅ ፡ ወአፈዋተ ፡ ፈድፋደ ፡ ብዙኀ ፡ ወዕንቁ ፡ ክቡረ ፡ ወአልቦ ፡ አመ ፡ መጽአ ፡ ብዙኃ ፡ አፈዋተ ፡ ዘከመ ፡ አሜሃ ፡ ዘወሀበት ፡ ንግሥተ ፡ ሳባእ ፡ ለሰሎሞን ።
¹¹ ወሐመረ ፡ ኪራምኒ ፡ እንተ ፡ ታመጽእ ፡ ወርቀ ፡ ሶፌር ፡ አምጽአት ፡ ዕፀ ፡ ጽሩበ ፡ ፈድፋደ ፡ ብዙኀ ፡ ወዕንቈ ፡ ክቡረ ።
¹² ወገብረ ፡ ንጉሥ ፡ ኪያሁ ፡ ዕፀ ፡ ጽሩበ ፡ መሳውቃተ ፡ ለቤተ ፡ እግዚአብሔር ፡ ወለቤተ ፡ ንጉሥ ፡ ወለመዝሙር ፡ ወለመሰንቆ ፡ ዘማሕልይ ፡ ወአልቦ ፡ አመ ፡ መጽአ ፡ ዘከማሁ ፡ ዕፀ ፡ ጽሩበ ፡ በዲበ ፡ ምድር ፡ ወኢያስተርአየ ፡ ወኢበአይቴሂ ፡ በውስተ ፡ ምድር ፡ ዘከማሁ ፡ እስከ ፡ ይእቲ ፡ ዕለት ።
¹³ ወንጉሥ ፡ ሰሎሞንሂ ፡ ወሀባ ፡ ለንግሥተ ፡ ሳባእ ፡ ኵሎ ፡ ዘፈቀደት ፡ እምኵሉ ፡ ዘሰአለቶ ፡ ዘእንበለ ፡ ዘጸገዋ ፡ እምእዴሁ ፡ ንጉሥ ፡ ወተመይጠት ፡ ወአተወት ፡ ብሔራ ፡ ይእቲሂ ፡ ወአግብርቲሃ ።
¹⁴ ወኮነ ፡ መድሎቱ ፡ ለወርቅ ፡ ዘይመጽእ ፡ ለሰሎሞን ፡ በበ ፡ ዓመት ፡ ፮፻ወ፷ወ ፮መካልይ ፡ ዘወርቅ ፤
¹⁵ ዘእንበለ ፡ ዘይገብእ ፡ ጸባሕተ ፡ እምኀበ ፡ እለ ፡ ይነግዱ ፡ ወእምኵሎሙ ፡ ነገሥት ፡ እለ ፡ ፀውዱ ፡ ወእምኵሉ ፡ መኳንንተ ፡ ምድር ።
¹⁶ ወገብረ ፡ ሰሎሞን ፡ ኰያንወ ፡ ዘወርቅ ፡ ፫፻ዝብጦ ፡ [፫፻]ሰቅል ፡ ለለ፩ኵናት ፡ መድሎቱ ።
¹⁷ ወገብረ ፡ ፫፻ወላትወ ፡ ዘወርቅ ፡ ዝብጦ ፡ ወሠለስቱ ፡ ምናን ፡ ዘወርቅ ፡ ለለአሐዱ ፡ ወልታ ፡ መድሎቱ ፤ ወአንበሮን ፡ ውስተ ፡ ቤት ፡ ዘሐቅል ፡ ዘሊባኖስ ።
¹⁸ ወገብረ ፡ ንጉሥ ፡ እትሮንሰ ፡ ዘቀርነ ፡ ነጌ ፡ ዐቢየ ፡ ወቀብኦ ፡ ወርቀ ፡ ንጹሐ ።
¹⁹ ወ፮መዓርጉ ፡ ለአትሮንስ ፡ ወአግለፎ ፡ አልህምተ ፡ እንተ ፡ ድኅሬሁ ፡ እንተ ፡ ለፌሂ ፡ ወእንተ ፡ ለፌሂ ፡ ልጹቀ ፡ አትሮንስ ፡ ወ፪በናብስት ፡ በላዕለ ፡ እደዊሁ ፡ ለአትሮንስ ።
²⁰ ወ፲ወ፪ዐናብስት ፡ ይቀውሙ ፡ ላዕለ ፡ ፮መዓርጊሁ ፡ ለአትሮንስ ፡ እንተ ፡ ለፌሂ ፡ ወእንተ ፡ ለፌሂ ፡ ወኢተገብረ ፡ ዘከማሁ ፡ ወኢበአይ ፡ መንግሥት ።
²¹ ወኵሉ ፡ ንዋይ ፡ ዘአግበረ ፡ ሰሎሞን ፡ ዘወርቅ ፡ ወመቃልድኒ ፡ ዘወርቅ ፡ ወኵሉ ፡ ንዋየ ፡ ውእቱ ፡ ቤት ፡ ዘሐቅለ ፡ ሊባኖስ ፡ በወርቅ ፡ አቅፈሎ ፡ ወአልቦ ፡ ዘብሩር ፡ እስመ ፡ አልቦ ፡ ኍልቈ ፡ ብሩር ፡ በመዋዕለ ፡ ሰሎሞን ።
²² እስመ ፡ አሕማረ ፡ ተርሴስ ፡ በቱ ፡ ንጉሥ ፡ ውስተ ፡ ባሕር ፡ ምስለ ፡ አሕማረ ፡ ኪረም ፤ ምዕረ ፡ ለለ፫ዓመት ፡ ታአቱ ፡ ሐመር ፡ እምነ ፡ ተርሌስ ፡ ለንጉሥ ፡ ወርቀ ፡ ወብሩረ ፡ ወዕንቈ ፡ ግሉፈ ፡ ወስኩዐ ።
ወዝንቱ ፡ ተግባሩ ፡ ለሰሎሞን ፡ ንጉሥ ፡ ዘሠርዐ ፡ በዘየሐንጽ ፡ ቤተ ፡ እግዚአብሔር ፡ ወቤተ ፡ መንግሥቱ ፡ ወአረፍተ ፡ ኢየሩሳሌም ፡ ጸናፌ ፡ በዘ ፡ ይፌጽም ፡ ቅጽረ ፡ ሀገረ ፡ ዳዊት ፡ ወአሶር ፡ ወመጌዶን ፡ ወጋዜር ፤
ወቤቶሮም ፡ ላዕላይ ፤
ወኢያቴርምተ ፡
ወኵሎ ፡ አህጉረ ፡ ሰረገላቲሁ ፡ ወኵሎ ፡ አህጉረ ፡ አፍራሲሁ ፡ ወተግባሩ ፡ ለሰሎሞን ፡ ዘተገብረ ፡ በዘየሐንጽ ፡ በኢየሩሳሌም ፡
ወበኵሉ ፡ ምድር ፡ ከመ ፡ ኢይማእዎ ፡ ኵሉ ፡ አሕዛብ ፡ እለ ፡ ተረፉ ፡ እምነ ፡ ኬጤዎን ፡ ወአሞሬዎን ፡ ወፌርዜዎን ፡ ወከናኔዎን ፡ ወኤዌዎን ፡ ወኢያቡሴዎን ፡ ወጌርጌሴዎን ፡ ወእለ ፡ ኢኮኑ ፡
እምነ ፡ ደቂቀ ፡ እስራኤል ፡ እለ ፡ ተረፉ ፡ ምስሌሆሙ ፡ ውስተ ፡ ምድር ፡ እምነ ፡ ውሉዶሙ ፡ እለ ፡ ስእኑ ፡ ደቂቀ ፡ እስራኤል ፡ ሠርዎቶሙ ፡ ወረሰዮሙ ፡ ሰሎሞን ፡ መጸብሔ ፡ እስከ ፡ ዮም ፤
ወእምነ ፡ ደቂቀ ፡ እስራኤልሰ ፡ አልቦ ፡ ዘሤመ ፡ ሰሎሞን ፡ ውስተ ፡ ግብር ፡ እስመ ፡ ዕደው ፡ መስተቃትላን ፡ እሙንቱ ፡ ወደቂቁሂ ፡ ወመላእክተ ፡ ሰረገላቲሁኒ ፡ ወመስተጽዕናኒሁኒ ።
²³ ወዐብየ ፡ ሰሎሞን ፡ ፈድፋደ ፡ እምነ ፡ ኵሉ ፡ ነገሥተ ፡ ምድር ፡ በብዕል ፡ ወበጥበብ ።
²⁴ ወኵሉ ፡ ነገሥተ ፡ ምድር ፡ የኀሥሡ ፡ ይርአዩ ፡ ገጾ ፡ ለሰሎሞን ፡ ወይስምዑ ፡ ጥበቦ ፡ ዘወሀቦ ፡ እግዚአብሔር ፡ ልቦ ።
²⁵ ወእሙንቱኒ ፡ ኵሎሙ ፡ ያመጽኡ ፡ አምኃሁ ፡ ንዋየ ፡ ወርቅ ፡ ወአልባሰ ፡ ወማየ ፡ ልብን ፡ ወአፈዋተ ፡ ወአፍራሰ ፡ ወአብቅለ ፡ በበዓመት ።
²⁶ ወቦ ፡ ሰሎሞን ፡ አፍራስ ፡ አንስተ ፡ ፬፼ለሰረገላቲሁ ፡ ወ፼(ለሀገሩ ፡) ወ፳፻አፍራሰ ፡ ጸብእ ፡ ወአንበሮሙ ፡ ውስተ ፡ አህጉረ ፡ ሰረገላሁ ፡ ወቦ ፡ ዘኀበ ፡ ንጉሥ ፡ ውስተ ፡ ኢየሩሳሌም ፡ ወንጉሥ ፡ ሰሎሞን ፡ ውእቱ ፡ ላዕለ ፡ ኵሉ ፡ ነገሥት ፡ እምነ ፡ ፈለጎሙ ፡ እስከ ፡ ምድረ ፡ ኢሎፍሊ ፡ ወእስከ ፡ ደወለ ፡ ግብጽ ።
²⁷ ወረሰዮ ፡ ንጉሥ ፡ ለወርቅ ፡ ወለብሩር ፡ ከመ ፡ እብን ፡ ወከመ ፡ ዕፀወ ፡ ዘቄድሮስ ፡ ወዕፀወ ፡ ቄድሪኖንሰ ፡ በኀቤሁ ፡ ከመ ፡ ዕፀወ ፡ ሰግላ ፡ ዘውስተ ፡ ገዳም ፡ እምነ ፡ ብዝኁ ፡ ከማሁ ፡ ኮነ ።
²⁸ ወምእታወ ፡ አፍራሲሁ ፡ ለሰሎሞን ፡ እምነ ፡ ግብጽ ፡ ወእምነ ፡ ቱቃሄ ፡ ተገበሩ ፡ ለንጉሥ ፡ ወይነሥእ ፡ እምነ ፡ ቱቃሔ ፡ በተውላጥ ።
²⁹ ወያአቱ ፡ እምነ ፡ ግብጽ ፡ ሰረገላተ ፡ በ፻ብሩር ፡ ወፈረስ ፡ በ፶ብሩር ፡ ወከማሁ ፡ ለኵሉ ፡ ነገሥተ ፡ ኬጤኤም ፡ ወለነገሥተ ፡ ሶርያ ፡ እለ ፡ እመንገለ ፡ ባሕር ፡ ሙፃኦሙ ።

http://www.sacred-texts.com/bib/poly/kg1011.htm 11↗     ¹ ወሰሎሞንሰ ፡ ንጉሥ ፡ መፍቀሬ ፡ እንስት ፡ ውእቱ ፤ ወ፯፻አንስቲያሁ ፡ ወዕቁባቲሁ ፡ ፫፻ ፤ ወነሥአ ፡ አንስተያ ፡ እምነ ፡ ነኪር ፡ ሕዝብ ፡ ወለተ ፡ ፈርዖንሂ ፡ ወሞአባውያትሂ ፡ ወአሞናዊያትሂ ፡ ወእምነ ፡ ሶርያ ፡ ወእምነ ፡ ኤዶምያስ ፡ ወእምነ ፡ ኬጤዎን ፡ ወእምነ ፡ አሞሬዎን ፤
² ወእምውስተ ፡ አሕዛብ ፡ ዘይቤሎሙ ፡ እግዚአብሔር ፡ ለደቂቀ ፡ እስራኤል ፡ ኢትባኡ ፡ ኀቤሆሙ ፡ ከመ ፡ ኢይሚጡ ፡ ልበክሙ ፡ ወኢያትልዉክሙ ፡ ኀበ ፡ አማልክቲሆሙ ፡ ወኪያሆሙ ፡ ተለወ ፡ ሰሎሞን ፡ ወአፍቀሮሙ ።
³ ወእምዝ ፡ አመ ፡ መዋዕለ ፡ ልህቀ ፡ ሰሎሞን ፡ ኢኮነ ፡ ልቡ ፡ ምስለ ፡ እግዚአብሔር ፡ አምላኩ ፡ ከመ ፡ ልበ ፡ ዳዊት ፡ አቡሁ ።
⁴ ወሜጣሁ ፡ ልቦ ፡ አንስቲያሁ ፡ እለ ፡ አውሰበ ፡ እምነኪር ፡ ወአትለዋሁ ፡ ኀበ ፡ አማልክቲሆን ።
⁵ ወሐነጸ ፡ ሰሎሞን ፡ ቤተ ፡ ለኮሞሰ ፡ አምላከ ፡ ሞአብ ፡ ወለአምላከ ፡ ንጉሦሙ ፡ ለደቂቀ ፡ አሞን ፤
⁶ ወለአስጠራጤ ፡ ርኵሶሙ ፡ ለሲዶና ።
⁷ ወከመዝ ፡ ገብረ ፡ ለኵሉ ፡ አንስቲያሁ ፡ እለ ፡ እምነኪር ፡ ወሦዐ ፡ ወዐጠነ ፡ ለአማልክቲሆን ።
⁸ ወገብረ ፡ ሰሎሞን ፡ እኩየ ፡ ቅድመ ፡ እግዚአብሔር ፡ ወኢተለዎ ፡ ለእግዚአብሔር ፡ ከመ ፡ ዳዊት ፡ አቡሁ ።
⁹ ወተምዕዐ ፡ እግዚአብሔር ፡ መዐተ ፡ ላዕለ ፡ ሰሎሞን ፡ እስመ ፡ ሜጠ ፡ ልቦ ፡ እምነ ፡ እግዚአብሔር ፡ አምላከ ፡ እስራኤል ፡ ዘአስተርአዮ ፡ ካዕበ ።
¹⁰ ወአዘዞ ፡ በእንተዝ ፡ ነገር ፡ ከመ ፡ ለዝሉፉ ፡ ኢይሖር ፡ ኀበ ፡ አማልክተ ፡ ባዕድ ፡ ወከመ ፡ ይዕቀብ ፡ ወይግበር ፡ ኵሎ ፡ ዘአዘዞ ፡ እግዚእ ፡ እግዚአብሔር ፡ ወኢኮነ ፡ ልቡ ፡ ፍጹመ ፡ ምስለ ፡ እግዚአብሔር ፡ ከመ ፡ ልበ ፡ ዳዊት ፡ አቡሁ ።
¹¹ ወይቤሎ ፡ እግዚአብሔር ፡ ለሰሎሞን ፡ እስመ ፡ ዘንተ ፡ ገበርከ ፡ ወኢዐቀብከ ፡ ትእዛዝየ ፡ ወሕግየ ፡ ዘአዘዝኩከ ፡ ነፂረ ፡ እኔፅራ ፡ ለመንግሥትከ ፡ እምነ ፡ እዴከ ፡ ወእሁቦ ፡ ለገብርከ ።
¹² ወባሕቱ ፡ በመዋዕሊከሰ ፡ ኢይገብሮ ፡ ለዝንቱ ፡ በእንተ ፡ ዳዊት ፡ አቡከ ፤ እምነ ፡ እዴሁ ፡ ለወልድከ ፡ እነሥእ ።
¹³ ወባሕቱ ፡ አኮ ፡ ኵሎ ፡ መንግሥቶ ፡ ዘእነሥእ ፤ አሐተ ፡ በትረ ፡ እሁቦ ፡ ለወልድከ ፡ በእንተ ፡ ዳዊት ፡ ገብርየ ፡ ወበእንተ ፡ ኢየሩሳሌም ፡ ሀገርየ ፡ እንተ ፡ ኀረይኩ ።
¹⁴ ወአቀመ ፡ እግዚአብሔር ፡ ሰይጣነ ፡ ላዕለ ፡ ሰሎሞን ፡ አዴርሃ ፡ ኤዶማዊ ፡ ወኤሴሮም ፡ ወልደ ፡ ኤልያዳሔ ፡ ዘእምነ ፡ ረምማቴር ፡ ወአድረዓዘር ፡ ንጉሠ ፡ ሱባ ፡ እግዚኡ ወተጋብኡ ፡ ምስሌሁ ፡ ዕደው ፡ ወውእቱ ፡ መልአከ ፡ ማዕሌት ፡ ወአስተጋብኣ ፡ ለደማስቆ ፡ ወኮነ ፡ ሰይጣን ፡ ላዕለ ፡ እስራኤል ፡ በኵሉ ፡ መዋዕለ ፡ ሰሎሞን ፡ ወአዴር ፡ ኤዶማዊ ፡ እምነ ፡ ዘመደ ፡ መንግሥት ፡ ዘኤዶምያስ ፡ ውእቱ ።
¹⁵ ወአመ ፡ ሠረዎሙ ፡ ዳዊት ፡ ለኤዶም ፡ አመ ፡ ሖረ ፡ ኢዮአብ ፡ መልአከ ፡ ኅይሉ ፡ ለዳዊት ፡ ከመ ፡ ይቅብሮሙ ፡ ለቅቱላን ፡ ቀተለ ፡ ኵሎ ፡ ተባዕቶሙ ፡ ለኤዶምያስ ።
¹⁶ እስመ ፡ ፮አውራኀ ፡ ነበረ ፡ ህየ ፡ ኢዮአብ ፡ ወኵሉ ፡ እስራኤል ፡ ምስሌሁ ፡ ውስተ ፡ ኤዶምያስ ፡ እስከ ፡ ሠረወ ፡ ኵሎ ፡ ተባዕቶሙ ፡ ለኤዶምያስ ።
¹⁷ ወአምሠጠ ፡ ውእቱ ፡ አዴር ፡ ወኵሉ ፡ ደቀ ፡ አቡሁ ፡ ምስሌሁ ፡ ሰብአ ፡ ኤዶምያስ ፡ ወቦኡ ፡ ውስተ ፡ ግብጽ ፡ ወአዴርሰ ፡ ሕፃን ፡ ንኡስ ፡ ውእቱ ።
¹⁸ ወተንሥኡ ፡ ዕደው ፡ እምነ ፡ ኤዶምያስ ፡ ሀገር ፡ ወሖሩ ፡ ውስተ ፡ ፋራን ፡ ወነሥኡ ፡ ዕደወ ፡ ምስሌሆሙ ፡ ወሖሩ ፡ ኀበ ፡ ፈርዖን ፡ ንጉሠ ፡ ግብጽ ፡ ወቦአ ፡ አዴር ፡ ኀበ ፡ ፈርዖን ፡ ወወሀቦ ፡ ቤተ ፡ ወአዘዘ ፡ ሎቱ ፡ ሲሳዮ ።
¹⁹ ወረከበ ፡ አዴር ፡ ሞገሰ ፡ በቅድመ ፡ ፈርዖን ፡ ፈድፋደ ፡ ወወሀቦ ፡ ብእሲት ፡ እኅታ ፡ ለብእሲቱ ፡ እንተ ፡ ትልህቃ ፡ ለቴቄምናስ ።
²⁰ ጋንሌትሃ ፡ ወለደት ፡ ወሐጸነቶ ፡ ቴቄምናስ ፡ ምስለ ፡ ደቂቀ ፡ ፈርዖን ፡ ወነበረ ፡ ጋኔቤት ፡ ማእከሎሙ ፡ ለደቂቀ ፡ ፈርዖን ።
²¹ ወሰምዐ ፡ አዴር ፡ ከመ ፡ ሰከበ ፡ ዳዊት ፡ ምስለ ፡ አበዊሁ ፡ ወከመ ፡ ሞተ ፡ ኢዮአብኒ ፡ መልአከ ፡ ኀይሉ ፡ ወይቤሎ ፡ አዴር ፡ ለፈርዖን ፡ ፈንወኒ ፡ ወእእቱ ፡ ብሔርየ ።
²² ወይቤሎ ፡ ፈርዖን ፡ ምንተ ፡ አኀጣእኩከ ፡ እምአመ ፡ ምስሌየ ፡ ሀለውከ ፡ ከመ ፡ ተፍቅድ ፡ ትሖር ፡ እምነ ፡ ብሔርየ ፡ ተአቱ ፡ ብሔረከ ፡ ወይቤሎ ፡ አዴር ፡ አልቦ ፤ ዳእሙ ፡ ፈንዎ ፡ ፈንወኒ ፡ ወአተወ ፡ አዴር ፡ ብሔሮ ፡ ወዛቲ ፡ ይእቲ ፡ እኪት ፡ እንተ ፡ ገብረ ፡ አዴር ፡ ተዐገሎሙ ፡ ለእስራኤል ፡ ወነግሠ ፡ ላዕለ ፡ ምድረ ፡ ኤዶም ።
²⁶ ወኢዮርብዓም ፡ ወልደ ፡ ናባጥ ፡ ኤፍራታዊ ፡ ዘእምነ ፡ ሶርያ ፡ ወልደ ፡ ብእሲት ፡ መበለተ ፡ ገብረ ፡ ሰሎሞን ።
²⁷ ወዝንቱ ፡ ውእቱ ፡ ግብር ፡ ዘገብረ ፡ አንሥአ ፡ እዴሁ ፡ ላዕለ ፡ ሰሎሞን ፡ ወሰሎሞንሰ ፡ ንጉሥ ፡ ሐነጸ ፡ ጸናፌ ፡ ጥቅመ ፡ ወፈጸመ ፡ ቅጽረ ፡ ሀገረ ፡ ዳዊት ፡ አቡሁ ።
²⁸ ወኢዮርብዓም ፡ ብእሲ ፡ ጽኑዕ ፡ ውእቱ ፡ ወኀያል ፡ ወርእዮ ፡ ሰሎሞን ፡ ለውእቱ ፡ ወልድ ፡ ከመ ፡ ውእቱ ፡ ብእሲ ፡ ውስተ ፡ ግብር ፡ ወሤሞ ፡ ላዕለ ፡ አርሶስ ፡ በቤተ ፡ ዮሴፍ ።
²⁹ ወእምዝ ፡ ወፅአ ፡ ኢዮርብዓም ፡ እምኢየሩስሌም ፡ በእማንቱ ፡ መዋዕል ፡ ወረከቦ ፡ አኪያ ፡ ሴሎናዊ ፡ ነቢይ ፡ በውስተ ፡ ፍኖት ፡ ወአግኀሦ ፡ እምነ ፡ ፍኖት ፡ ወአኪያሰ ፡ ይለብስ ፡ ልብሰ ፡ ሐዲሰ ፡ ወክልኤሆሙ ፡ ውስተ ፡ ሐቅል ፡ ሀለዉ ።
³⁰ ወነሥአ ፡ አክያ ፡ ልብሰ ፡ ሐዲሰ ፡ በላዕሌሁ ፡ ወሠጠጦ ፡ ፲ወ፪ሥጠተ ።
³¹ ወይቤሎ ፡ ለኢዮርብዓም ፡ ንሣእ ፡ ለከ ፡ ፲ሥጠተ ፡ እስመ ፡ ከመዝ ፡ ይቤ ፡ እግዚአብሔር ፡ አምላከ ፡ እስራኤል ፡ ናሁአ ፡ አነአ ፡ እኔፅራ ፡ ለመንግሥት ፡ እምነ ፡ እደ ፡ ሰሎሞን ፡ ወእሁበከ ፡ ፲በትረ ።
³² ወሎቱሰ ፡ ፪በትር ፡ ይኩኖ ፡ በእንተ ፡ ዳዊት ፡ ገብርየ ፡ ወበእንተ ፡ ኢየሩሳሌም ፡ ሀገር ፡ እንተ ፡ ኀረይኩ ፡ ኪያሃ ፡ እምነ ፡ ኵሉ ፡ አህጉረ ፡ እስራኤል ።
³³ እስመ ፡ ኀደገኒ ፡ ወገብረ ፡ ለአስጠራጤ ፡ ርኵሶሙ ፡ ለሲዶና ፡ ወለከሞስ ፡ አማልክተ ፡ ሞአብ ፡ ወለንጉሦሙ ፡ ለደቂቀ ፡ አሞን ፡ ኀስረ ፡ ወኢሖረ ፡ በፍናዊየ ፡ ከመ ፡ ይግበር ፡ ጽድቀ ፡ በቅድሜየ ፡ ከመ ፡ ዳዊት ፡ አቡሁ ።
³⁴ ወኢይነሥእ ፡ ኵሎ ፡ መንግሥተ ፡ እምነ ፡ እዴሁ ፡ እስመ ፡ ግዘተ ፡ እትዋገዝ ፡ በኵሉ ፡ መዋዕለ ፡ ሕይወቱ ።
³⁵ ወእነሥእ ፡ መንግሥተ ፡ እምነ ፡ እደ ፡ ወልዱ ፡ ወእሁበከ ፡ ለከ ፡ ፲በትረ ።
³⁶ ወእሁብ ፡ ለወልዱ ፡ ፪በትረ ፡ ከመ ፡ ይኩን ፡ ንብረቱ ፡ ለዳዊት ፡ ገብርየ ፡ በቅድሜየ ፡ በኵሉ ፡ መዋዕል ፡ በኢየሩሳሌም ፡ ሀገር ፡ እንተ ፡ ኀረይኩ ፡ ከመ ፡ እሢም ፡ ስምየ ፡ ህየ ፡ ውስቴታ ።
³⁷ ወኪያከ ፡ ኣነሥእ ፡ ወኣነግሥ ፡ ላዕለ ፡ እለ ፡ ተርፋ ፡ በነፍስከ ፡ ወአንተ ፡ ትከውን ፡ ንጉሠ ፡ ላዕለ ፡ እስራኤል ።
³⁸ ወእመ ፡ ዐቀብከ ፡ ኵሎ ፡ ዘአዘዝኩከ ፡ ወሖርከ ፡ በፍኖትየ ፡ ወገበርከ ፡ ጽድቀ ፡ በቅድሜየ ፡ ከመ ፡ ትዕቀብ ፡ ሕግየ ፡ ወትእዛዝየ ፡ በከመ ፡ ገብረ ፡ ዳዊት ፡ ገብርየ ፡ ወእሄሉ ፡ ምስሌከ ፡ ወአሐንጽ ፡ ለከ ፡ ቤተ ፡ ምእመነ ፡ በከመ ፡ ሐነጽኩ ፡ ለዳዊት ።
⁴⁰ ወፈቀደ ፡ ሰሎሞን ፡ ይቅትሎ ፡ ለኢዮርብአም ፡ ወሖረ ፡ ወተኀጥአ ፡ ብሔረ ፡ ግብጽ ፡ ኀበ ፡ ሱስቀም ፡ ንጉሀሠ ፡ ግብጽ ፡ ወነበረ ፡ ውስተ ፡ ግብጽ ፡ እስከ ፡ ሞተ ፡ ሰሎሞን ።
⁴¹ ወኵሉ ፡ ነገሩ ፡ ለሰሎሞን ፡ ወኵሎ ፡ ዘገብረ ፡ ወኵሉ ፡ ጥበቡ ፡ ወዘሂ ፡ ተረፈ ፡ ናሁ ፡ ዝንቱ ፡ ውእቱ ፡ ዘጽሑፍ ፡ ውስተ ፡ መጽሐፈ ፡ ነገረ ፡ መዋዕሊሁ ።
⁴² ወመዋዕለ ፡ ነግሠ ፡ ሰሎሞን ፡ በኢየሩሳሌም ፡ ፵ዓመተ ።
⁴³ ወሰከበ ፡ ሰሎሞን ፡ ምስለ ፡ አበዊሁ ፡ ወቀበርዎ ፡ ውስተ ፡ ሀገረ ፡ ዳዊት ፡ አቡሁ ። ወኮነ ፡ ሶበ ፡ ሰምዐ ፡ ኢዮርብዓም ፡ ወልደ ፡ ናባጥ ፡ እንዘ ፡ ዓዲሁ ፡ ውስተ ፡ ግብጽ ፡ ሀለወ ፡ በከመ ፡ ጐየ ፡ እምገጹ ፡ ለሰሎሞን ፡ ወነበረ ፡ ውስተ ፡ ግብጽ ፡ ይትመሐፀን ፡ ወተንሥአ ፡ ወመጽአ ፡ ውስተ ፡ ሀገሩ ፡ ውስተ ፡ ምድረ ፡ ሳሪራ ፡ እንተ ፡ በደብረ ፡ ኤፍሬም ።
⁴⁴ ወንጉሥ ፡ ሰሎሞን ፡ ሰከበ ፡ ምስለ ፡ አበዊሁ ፡ ወነግሠ ፡ ሮብዓም ፡ ወልዱ ፡ ህየንቴሁ ።

http://www.sacred-texts.com/bib/poly/kg1012.htm 12↗     ¹ ወሖረ ፡ ንጉሥ ፡ ሮብዓም ፡ ውስተ ፡ ሰቂማ ፡ እስመ ፡ ውስተ ፡ ሰቂማ ፡ ይመጽእ ፡ ኵሉ ፡ እስራኤል ፡ ከመ ፡ ያንግሥዎ ።
³ ወተናገርዎ ፡ ሕዝብ ፡ ለሮብዓም ፡ እንዘ ፡ ይብሉ ፤
⁴ አቡከ ፡ አክበደ ፡ ላዕሌነ ፡ ጋጋ ፡ ወአንተ ፡ ይእዜ ፡ አቅልል ፡ ለነ ፡ እምነ ፡ ግብርናተ ፡ አቡከ ፡ ክቡድ ፡ ወእምጋግ ፡ ክቡድ ፡ ዘወደየ ፡ ላዕሌነ ፡ አቡከ ፡ ወንከውነከ ፡ አግብርተ ።
⁵ ወይቤሎሙ ፡ ሖሩ ፡ እስከ ፡ ሠሉስ ፡ መዋዕል ፡ ወግብኡ ፡ ኀቤየ ፡ ወኀለፉ ።
⁶ ወነገሮሙ ፡ ንጉሥ ፡ ለሊቃናት ፡ እለ ፡ ቆሙ ፡ ቅድመ ፡ ሰሎሞን ፡ አቡሁ ፡ አመ ፡ ሕያው ፡ ውእቱ ፡ ወይቤሎሙ ፡ ምንተ ፡ ታመክሩኒ ፡ አንትሙ ፡ ቃለ ፡ ዘአውሥኦሙ ፡ ለዝንቱ ፡ ሕዝብ ።
⁷ ወይቤልዎ ፡ ዮምሰ ፡ ገብሮሙ ፡ አንተ ፡ ለዝንቱ ፡ ሕዝብ ፡ ወተቀነይ ፡ ሎሙ ፡ ወአውሥኦሙ ፡ ሠናየ ፡ ቃለ ፡ ወይከውኑከ ፡ አግብርቲከ ፡ በኵሉ ፡ መዋዕል ።
⁸ ወኀደገ ፡ ምክሮሙ ፡ ለሊቃናት ፡ ዘአምከርዎ ፡ ወተማከረ ፡ ምስለ ፡ ደቂቅ ፡ እለ ፡ ተሐፅኑ ፡ ምስሌሁ ፡ እለ ፡ ይቀውሙ ፡ ቅድመ ፡ ገጹ ።
⁹ ወይቤሎሙ ፡ ምንተ ፡ ታመክሩኒ ፡ አንትሙ ፡ ወምንተ ፡ ኣወሥኦሙ ፡ ለእሉ ፡ ሕዝብ ፡ እለ ፡ ከመዝ ፡ ይብሉኒ ፡ አቅልል ፡ ለነ ፡ እምነ ፡ ጋግ ፡ ዘወደየ ፡ አቡከ ፡ ላዕሌነ ።
¹⁰ ወይቤልዎ ፡ እሙንቱ ፡ ደቂቅ ፡ እለ ፡ ተሐፅኑ ፡ ምስሌሁ ፡ እለ ፡ ይቀውሙ ፡ ቅድመ ፡ ገጹ ፡ እንዘ ፡ ይብሉ ፡ ከመዝ ፡ ተናገሮሙ ፡ ለዝ ፡ ሕዝብ ፡ ለእለ ፡ ሰአሉከ ፡ እንዘ ፡ ይብሉ ፡ አቡከ ፡ አክበደ ፡ ጋጋ ፡ ላዕሌነ ፡ ወአንተ ፡ ይእዜ ፡ አቅልል ፡ ለነ ፡ ከመዝ ፡ አጠይቆሙ ፡ ቅጠንየ ፡ ይገዝፍ ፡ እምነ ፡ ሐቌሁ ፡ ለአቡየ ።
¹¹ ወይእዜኒ ፡ አቡየሰ ፡ አዕነቀክሙ ፡ ጋጋ ፡ ክቡደ ፡ ወአነሂ ፡ እዌስክ ፡ ላዕለ ፡ ጋግክሙ ፤ አቡየ ፡ ቀሠፈክሙ ፡ በመቅሠፍት ፡ ወአነ ፡ እቀሥፈክሙ ፡ በዐቃርብት ።
¹² ወመጽኡ ፡ ኵሉ ፡ እስራኤል ፡ ኀበ ፡ ሮብዓም ፡ ንጉሥ ፡ አመ ፡ ሣልስት ፡ ዕለት ፡ በከመ ፡ ይቤሎሙ ፡ ንጉሥ ፡ ግብኡ ፡ ኀቤየ ፡ እስከ ፡ ሣልስት ፡ ዕለት ።
¹³ ወአውሥኦሙ ፡ ንጉሥ ፡ ለሕዝብ ፡ እኩየ ፡ ወኀዶገ ፡ ሮብዓም ፡ ምክሮሙ ፡ ለሊቃናት ፡ ዘአምከርዎ ።
¹⁴ ወይቤሎሙ ፡ በከመ ፡ አምከርዎ ፡ እልክቱ ፡ ደቅ ፡ አቡየ ፡ አክበደ ፡ ጋጋክሙ ፡ ወአነሂ ፡ እዌስከ ፡ ላዕለ ፡ ጋጋክሙ ፤ አቡየ ፡ ቀሠፈክሙ ፡ በመቅሠፍት ፡ ወአነ ፡ እቀሥፈክሙ ፡ በዐቃርብት ።
¹⁵ ወአበየ ፡ ሰሚዖቶሙ ፡ ንጉሥ ፡ ለሕዝብ ፡ እስመ ፡ እምኀበ ፡ እግዚአብሔር ፡ መጽአት ፡ ዕልወት ፡ ከመ ፡ ያቅም ፡ እግዚአብሔር ፡ ቃሎ ፡ ዘነበበ ፡ በአፈ ፡ አኪያ ፡ ሰሎናዊ ፡ በእንተ ፡ ኢዮርብዓም ፡ ወልደ ፡ ናባጥ ።
¹⁶ ወርእዩ ፡ ኵሉ ፡ እስራኤል ፡ ከመ ፡ አበየ ፡ ሰሚዖቶሙ ፡ ንጉሥ ፡ ወአውሥእዎ ፡ ሕዝብ ፡ ለንጉሥ ፡ ወይቤልዎ ፡ ምንተ ፡ ብነ ፡ ክፍለ ፡ ምስለ ፡ ዳዊት ፡ ወአልብነ ፡ ርስተ ፡ ምስለ ፡ ወልደ ፡ እሴይ ፤ እቱ ፡ እስራኤል ፡ ውስተ ፡ አብያቲከ ፡ ወእምይእዜ ፡ ረዐይ ፡ ዳዊት ፡ ቤተከ ፡ ወአተዉ ፡ እስራኤል ፡ ውስተ ፡ አብያቲሆሙ ።
¹⁸ ወለአከ ፡ ንጉሥ ፡ ኀቤሆሙ ፡ ለእስራኤል ፡ መልአከ ፡ ጸባሕት ፡ ወወገርዎ ፡ ኵሉ ፡ እስራኤል ፡ በእብን ፡ ወሞተ ፡ ወሮብዓምሰ ፡ ንጉሥ ፡ ተንሥአ ፡ ይጕየይ ፡ ውስተ ፡ ኢየሩሳሌም ።
¹⁹ ወዐለውዎ ፡ እስራኤል ፡ ለቤተ ፡ ዳዊት ፡ እስከ ፡ ዛቲ ፡ ዕለት ።
²⁰ ወእምዝ ፡ ሶበ ፡ ሰምዑ ፡ ኵሉ ፡ እስራኤል ፡ ከመ ፡ አተወ ፡ ኢዮርብዓም ፡ እምግብጽ ፡ ወለአኩ ፡ ወጸውዕዎ ፡ ውስተ ፡ ማኅበሮሙ ፡ ወአንገሥዎ ፡ ላዕለ ፡ እስራኤል ፡ ወአልቦ ፡ ዘተለዎ ፡ ለቤተ ፡ ዳዊት ፡ ዘእንበለ ፡ በትረ ፡ ይሁዳ ፡ ወብንያም ፡ ባሕቲቶሙ ።
²¹ ወሮብዓምሰ ፡ ቦአ ፡ ውስተ ፡ ኢየሩሳሌም ፡ ወአስተጋብኦሙ ፡ ለማኅበረ ፡ ይሁዳ ፡ ወለተረፈ ፡ ብንያም ፡ ፲፼ወ፳፻ወራዙተ ፡ መስተቃትላነ ፡ ከመ ፡ ይትቃተሎሙ ፡ ለቤተ ፡ እስራኤል ፡ ከመ ፡ ትግባእ ፡ መንግሥተ ፡ ሮብዓም ፡ ወልደ ፡ ሰሎሞን ።
²² ወኮነ ፡ ቃለ ፡ እግዚአብሔር ፡ ኀበ ፡ ሳምያ ፡ ብእሴ ፡ እግዚአብሔር ፡ እንዘ ፡ ይብል ፤
²³ በሎ ፡ ለሮብዓም ፡ ወልደ ፡ ሰሎሞን ፡ ንጉሠ ፡ ይሁዳ ፡ ወለኵሉ ፡ ቤተ ፡ ይሁዳ ፡ ወለብንያም ፡ ወለእለ ፡ ተርፉ ፡ እምሕዝብ ፡ እንዘ ፡ ትብል ፤
²⁴ ከመዝ ፡ ይቤ ፡ እግዚአብሔር ፡ ኢትዕርጉ ፡ ወኢትትቃተሉ ፡ ምስለ ፡ አኀዊክሙ ፡ ደቂቀ ፡ እስራኤል ፡ ተመየጡ ፡ ውስተ ፡ አብያቲክሙ ፡ እስመ ፡ እምኀቤየ ፡ ኮነ ፡ ዝንቱ ፡ ነገር ፡ ወሰምዑ ፡ ቃለ ፡ እግዚአብሔር ፡ ወኀደጉ ፡ ሐዊረ ፡ በእንተ ፡ ቃለ ፡ እግዚአብሔር ።

http://www.sacred-texts.com/bib/poly/kg1013.htm 13↗     ¹ ወናሁ ፡ ብእሴ ፡ እግዚአብሔር ፡ መጽአ ፡ እምነ ፡ ይሁዳ ፡ ውስተ ፡ ቤቴል ፡ በቃለ ፡ እግዚአብሔር ፡ ወኢዮርብዓምሰ ፡ ይቀውም ፡ ውስተ ፡ ምሥዋዕ ፡ ከመ ፡ ይሡዕ ።
² ወጸውዖ ፡ ለውእቱ ፡ ምሥዋዕ ፡ ብእሴ ፡ እግዚአብሔር ፡ በቃለ ፡ እግዚአብሔር ፡ ወይቤ ፡ ምሥዋዕ ፡ ምሥዋዕሰ ፡ ከመዝ ፡ ይቤ ፡ እግዚአብሔር ፡ ናሁ ፡ ወልድ ፡ ይትወለድ ፡ ለቤተ ፡ ዳዊት ፡ ኢዮስያስ ፡ ስሙ ፡ ወይሠውዕ ፡ ላዕሌከ ፡ ገነውተ ፡ አማልክት ፡ እለ ፡ ሦዑ ፡ በዲቤከ ፡ ወአዕጽምተ ፡ እጓለ ፡ እመሕያው ፡ ያውዒ ፡ ወያነድድ ፡ ላዕሌከ ።
³ ወይከውን ፡ ይእተ ፡ አሚረ ፡ ተኣምር ፤ ዝንቱ ፡ ቃል ፡ ዘይቤ ፡ እግዚአብሔር ፤ ዝንቱ ፡ ምሥዋዕ ፡ ለይንቃዕ ፡ ወይትከዐው ፡ ዘውስቴቱ ፡ ጽንሓሒሁ ።
⁴ ወእምዝ ፡ ሶበ ፡ ሰምዐ ፡ ኢዮርብዓም ፡ ቃሎ ፡ ለብእሴ ፡ እግዚአብሔር ፡ ዘነበበ ፡ በዲበ ፡ ምሥዋዕ ፡ ዘውስተ ፡ ቤቴል ፡ አንሥአ ፡ እዴሁ ፡ ንጉሥ ፡ በዲበ ፡ ምሥዋዕ ፡ ወይቤ ፡ አኀዝዎ ፡ ወእምዝ ፡ የብሰት ፡ እዴሁ ፡ እንተ ፡ አንሥአ ፡ ላዕሌሁ ፡ ወስእነ ፡ አግብኦታ ፡ ኀቤሁ ።
⁵ ወነቅዐ ፡ ውእቱ ፡ ምሥዋዕ ፡ ወተክዕወ ፡ ዘውስቴቱ ፡ ጽንሓሒሁ ፡ በከመ ፡ ተኣምር ፡ ዘገብረ ፡ ውእቱ ፡ ብእሴ ፡ እግዚአብሔር ፡ በቃለ ፡ እግዚአብሔር ።
⁶ ወይቤሎ ፡ ኢዮርብዓም ፡ ለብእሴ ፡ እግዚአብሔር ፡ ሰአል ፡ ሊተ ፡ ቅድመ ፡ ገጹ ፡ ለእግዚአብሔር ፡ አምላክከ ፡ ወትግባእ ፡ እዴየ ፡ ላዕሌየ ፡ ወሰአለ ፡ ሎቱ ፡ ብእሴ ፡ እግዚአብሔር ፡ ኀበ ፡ እግዚአብሔር ፡ ወገብአት ፡ እዴሁ ፡ ለንጉሥ ፡ ኀቤሁ ፡ ወኮነት ፡ ከመ ፡ ቀዳሚ ።
⁷ ወይቤሎ ፡ ንጉሥ ፡ ለብእሴ ፡ እግዚአብሔር ፡ ባእ ፡ ምስሌየ ፡ ውስተ ፡ ቤትየ ፡ ወምሳሕ ፡ ምስሌየ ፡ ውስተ ፡ ቤትየ ።
⁸ ወይቤሎ ፡ ብእሴ ፡ እግዚአብሔር ፡ ለንጉሥ ፡ እመ ፡ ሠሀብከኒ ፡ መንፈቀ ፡ ቤትከ ፡ ኢይበውእ ፡ ምስሌከ ፡ ወኢይበልዕ ፡ እክለ ፡ ወኢይሰቲ ፡ ማየ ፡ በዝንቱ ፡ መካን ።
⁹ እስመ ፡ ከመዝ ፡ አዘዘኒ ፡ እግዚአብሔር ፡ ወይቤለኒ ፡ ኢትብላዕ ፡ እክለ ፡ ወኢትስተይ ፡ ማየ ፡ ወኢትግባእ ፡ ፍኖተ ፡ እንተ ፡ ባቲ ፡ ሖርከ ።
¹⁰ ወአተወ ፡ እንተ ፡ ካልእ ፡ ፍኖት ፡ ወኢገብአ ፡ በፍኖተ ፡ እንተ ፡ መጽአ ፡ ውስተ ፡ ቤቴል ።
¹¹ ወሀሎ ፡ ብእሲ ፡ ነቢይ ፡ ልሂቅ ፡ ውስተ ፡ ቤቴል ፡ ዘይነብር ፡ ወመጽኡ ፡ ደቂቁ ፡ ወነገርዎ ፡ ኵሎ ፡ ግብረ ፡ ዘገብረ ፡ ብእሴ ፡ እግዚአብሔር ፡ ይእተ ፡ አሚረ ፡ በቤቴል ፡ ወቃሎ ፡ ዘከመ ፡ ይቤሎ ፡ ለንጉሥ ፡ ወተምዖሙ ፡ አቡሆሙ ።
¹² ወይቤሎሙ ፡ እንተ ፡ አይ ፡ ፍኖት ፡ ሖረ ፡ ወአርአይዎ ፡ ደቁ ፡ ፍኖተ ፡ እንተ ፡ ባቲ ፡ ሖረ ፡ ብእሴ ፡ እግዚአብሔር ፡ ዘመጽአ ፡ እምይሁዳ ።
¹³ ወይቤሎሙ ፡ ለደቁ ፡ ረሐሉ ፡ ሊተ ፡ አድግየ ፡ ወረሐሉ ፡ ሎቱ ፡ አድጎ ፡ ወተጽዕነ ።
¹⁴ ወሖረ ፡ ወዴገኖ ፡ ለብእሴ ፡ እግዚአብሔር ፡ ወረከቦ ፡ ይነብር ፡ ታሕተ ፡ ዕፅ ፡ ወይቤሎ ፡ አንተኑ ፡ ውእቱ ፡ ብእሴ ፡ እግዚአብሔር ፡ ዘመጻእከ ፡ እምይሁዳ ፡ ወይቤሎ ፡ አነ ፡ ውእቱ ።
¹⁵ ወይቤሎ ፡ ነዓ ፡ ምስሌየ ፡ ወብላዕ ፡ እክለ ።
¹⁶ ወይቤሎ ፡ ኢይክል ፡ ገቢአ ፡ ምስሌከ ፤ ኢይበልዕ ፡ እክለ ፡ ወኢይሰቲ ፡ ማየ ፡ በዝንቱ ፡ መካን ።
¹⁷ እስመ ፡ ከማሁ ፡ አዘዘኒ ፡ ቃለ ፡ እግዚአብሔር ፡ ወይቤለኒ ፡ ኢትብላዕ ፡ እክለ ፡ ወኢትስተይ ፡ ማየ ፡ በህየ ፡ ወኢትግባእ ፡ በፍኖት ፡ እንተ ፡ ባቲ ፡ ሖርከ ።
¹⁸ ወይቤሎ ፡ ዝክቱ ፡ አነኒ ፡ ነቢይ ፡ አነ ፡ ዘከማከ ፡ ወመልአክ ፡ ነበበኒነ ፡ በቃለ ፡ እግዚአብሔር ፡ ወይቤለኒ ፡ አግብኦ ፡ ኀቤከ ፡ ውስተ ፡ ቤትከ ፡ ወይብላዕ ፡ እክለ ፡ ወይስተይ ፡ ማየ ፡ ወሐሰዎ ።
¹⁹ ወአግብኦ ፡ ወበልዐ ፡ እክለ ፡ ወሰትየ ፡ ማየ ፡ በቤቱ ።
²⁰ ወእምዝ ፡ እንዘ ፡ ይነብር ፡ ውስተ ፡ ማእድ ፡ ወመጽአ ፡ ቃለ ፡ እግዚአብሔር ፡ ኀበ ፡ ዝክቱ ፡ ነቢይ ፡ ዘአግብኦ ።
²¹ ወይቤሎ ፡ ለብእቤ ፡ እግዚአብሔር ፡ ዘመጽአ ፡ እምይሠሁዳ ፡ ከመዝ ፡ ይቤ ፡ እግዚአብሔር ፡ እስመ ፡ አምረርካሁ ፡ ለቃለ ፡ እግዚአብሔር ፡ ወኢዐቀብከ ፡ ትእዛዞ ፡ ዘአዘዘከ ፡ እግዚአብሔር ፡ አምላክከ ፤
²³ ወገባእከ ፡ ወበላዕከ ፡ እክለ ፡ ወሰተይከ ፡ ማየ ፡ በዝንቱ ፡ መካን ፡ ዘይቤለከ ፡ ኢትብላዕ ፡ እክለ ፡ ወኢትስተይ ፡ ማየ ፡ ኢይባእ ፡ ሥጋከ ፡ ውስተ ፡ መቃብረ ፡ አቡከ ።
²³ ወእምዝ ፡ እምድኅረ ፡ በልዐ ፡ እክለ ፡ ወስትየ ፡ ማየ ፡ ወረሐሉ ፡ ሎቱ ፡ እድጎ ፡ ወተንሥአ ፡ ወሖረ ።
²⁴ ወረከቦ ፡ ዐንበሳ ፡ በፍኖት ፡ ወቀተሎ ፡ ወተገድፈ ፡ በድኑ ፡ ውስተ ፡ ፍኖት ፡ ወአድጉሂ ፡ ቆመ ፡ ኀቤሁ ፡ ወውእቱኒ ፡ ዐንበሳ ፡ ቆመ ፡ ኀቤሁ ።
²⁵ ወመጽኡ ፡ ዕደው ፡ እለ ፡ የኀልፉ ፡ ሠረከቡ ፡ በድኖ ፡ ግዱፈ ፡ ውስተ ፡ ፍኖት ፡ ወይቀውም ፡ ዐንበሳ ፡ ኀበ ፡ በድኑ ፡ ወቦኡ ፡ ወዜነዉ ፡ ኀበ ፡ ሀሎ ፡ ይነብር ፡ ዝክቱ ፡ ነቢይ ፡ ልሂቅ ።
²⁶ ወሰምዐ ፡ ውእቱ ፡ ዘአግብኦ ፡ ወይቤ ፡ ዝክቱ ፡ ብእሴ ፡ እግዚአብሔር ፡ ውእቱ ፡ ዘአምረረ ፡ ቃለ ፡ እግዚአብሔር ።
²⁸ ወሖረ ፡ ወረከቦ ፡ በድኖ ፡ ግዱፈ ፡ ውስተ ፡ ፍኖት ፡ ወአድጉ ፡ ወዐንበሳ ፡ ይቀውሙ ፡ ውስተ ፡ በድኑ ፡ ወኢበልዖ ፡ ውእቱ ፡ ዐንበሳ ፡ ሥጋሁ ፡ ለብእሴ ፡ እግዚአብሔር ፡ ወአድጎሂ ፡ ኢቀተለ ።
²⁹ ወነሥአ ፡ በድኖ ፡ ዝክቱ ፡ ነቢይ ፡ ለብእሴ ፡ እግዚአብሔር ፡ ወጸዐኖ ፡ ላዕለ ፡ አድጉ ፡ ወአእተዎ ፡ ሀገረ ፡ ውእቱ ፡ ነቢይ ፤
³⁰ ከመ ፡ ይቅብሮ ፡ ውስተ ፡ መቃብረ ፡ ዚአሁ ፡ ወበከይዎ ፡ ወላሐውዎ ።
³¹ ወእምድኅረ ፡ ላሐውዎ ፡ ይቤሎሙ ፡ ለደቁ ፡ አመ ፡ ሞትኩ ፡ ቅብሩኒ ፡ ውስተ ፡ ዝንቱ ፡ መቃብር ፡ ኀበ ፡ ተቀብረ ፡ ብእሴ ፡ እግዚአብሔር ፡ ኀበ ፡ ሀለዉ ፡ አዕፅምቲሁ ፡ ደዩኒ ፡ ኪያየ ፡ ከመ ፡ ይሕየዉ ፡ አዕፅምትየ ፡ ምስለ ፡ አዕፅምቲሁ ።
³² እስመ ፡ ኮነ ፡ ቃሉ ፡ ዘነበበ ፡ በቃለ ፡ እግዚአብሔር ፡ ላዕለ ፡ ምሥዋዕ ፡ ዘቤቴል ፡ ወላዕለ ፡ አብያተ ፡ አማልክቲሆሙ ፡ ዘውስተ ፡ ሰማርያ ።
³³ ወእምድኅረ ፡ ዝንቱ ፡ ነገር ፡ ኢተመይጠ ፡ ኢዮርብዓም ፡ እምነ ፡ እከዩ ፡ ወገብአ ፡ ወገብረ ፡ ገነውተ ፡ አማልክቲሆሙ ፡ እምውስተ ፡ ሕዝብ ፡ ወለዘፈቀደ ፡ ይኩን ፡ ገነውተ ፡ አማልክቲሆሙ ፡ ይፈቱ ፡ ወይከውን ።
³⁴ ወኮነ ፡ ዝንቱ ፡ ነገር ፡ ኀጢአተ ፡ ላዕለ ፡ ቤተ ፡ ኢዮርብዓም ፡ ለተሠርዎ ፡ ወለማስኖ ፡ እምገጸ ፡ ምድር ።

http://www.sacred-texts.com/bib/poly/kg1014.htm 14↗     ²¹ ወነግሠ ፡ ሮብዓም ፡ ወልደ ፡ ሰሎሞን ፡ ላዕለ ፡ ይሁዳ ፡ ወአመ ፡ ይነግሥ ፡ ወልደ ፡ ፵ዓም ፡ ወ፩ውእቱ ፡ ወ፲ወ፯ዓመተ ፡ ነግሠ ፡ በኢየሩሳሌም ፡ በሀገር ፡ እንተ ፡ ኀርየ ፡ እግዚአብሔር ፡ ያቅም ፡ ስሞ ፡ በህየ ፡ እምነ ፡ ኵሉ ፡ ሕዝበ ፡ እስራኤል ፡ ወስማ ፡ ለእሙ ፡ ናሐኖን ፡ ዐሞናዊት ።
²² ወገብረ ፡ ሮብዓም ፡ እኩየ ፡ ቅድመ ፡ እግዚአብሔር ፡ ወኣቅንአ ፡ በኵሉ ፡ ዘገብሩ ፡ አበዊሁ ፡ ወበአበሳሆሙ ፡ ዘአበሱ ።
²³ ወሐነጹ ፡ አብያተ ፡ አማልክት ፡ ወአቀመ ፡ ምስሌሆሙ ፡ ሐውልተ ፡ ምሕራማቲሆሙ ፡ በውስተ ፡ ኵሉ ፡ አውግር ፡ ልዑላት ፡ ወታሕተ ፡ ኵሉ ፡ ዖም ፡ ጽፉቅ ፡ ዘቦ ፡ ጽላሎተ ።
²⁴ ወአኅበረ ፡ በኵሉ ፡ ምድር ፡ ወገብሩ ፡ በኵሉ ፡ ርኵሶሙ ፡ ለአሕዛብ ፡ ዘአሰሰለ ፡ እግዚአብሔር ፡ እምቅድመ ፡ ገጾሙ ፡ ለደቂቀ ፡ እስራኤል ።
²⁵ ወእምዝ ፡ አመ ፡ ኃምስ ፡ ዓመት ፡ እምዘ ፡ ነግሠ ፡ ሮብዓም ፡ ዐርገ ፡ ሱስቀም ፡ ንጉሠ ፡ ግብጽ ፡ ላዕለ ፡ ኢየሩሳሌም ።
²⁶ ወነሥአ ፡ ኵሎ ፡ መዛግብተ ፡ ቤተ ፡ እግዚአብሔር ፡ ወመዛግብተ ፡ ቤተ ፡ ንጉሥ ፡ ወኲናታተ ፡ ዘወርቅ ፡ ዘሰለበ ፡ ዳዊት ፡ እምላዕለ ፡ ደቀ ፡ አድርዐዛር ፡ ንጉሠ ፡ ሱባ ፡ ወአእተወ ፡ ኢየሩሳሌም ፡ ኵሎ ፡ ዘሰለበ ፤ ወላትወኒ ፡ ዘወርቅ ፡ ወወሰደ ፡ ብሔረ ፡ ግብጽ ።
²⁷ ወገብረ ፡ ሮብዓም ፡ ንጉሥ ፡ ወላትወ ፡ ዘብርት ፡ ህየንቴሆሙ ፡ ወአወፈዮን ፡ ለመላእክቲሆሙ ፡ ለእለ ፡ ይረውጹ ፡ ቅድሜሁ ፡ ወእለ ፡ የዐቅቡ ፡ ዴዴ ፡ ቤተ ፡ ንጉሥ ።
²⁸ ወእምዝ ፡ ሶበ ፡ የሐውር ፡ ቤተ ፡ እግዚአብሔር ፡ ይጸውርዎን ፡ እለ ፡ የሐውሩ ፡ ቅድሜሁ ፡ ወይጸንሕዎ ፡ እስከ ፡ ይወፅእ ፡ በምቅዋሞሙ ።
²⁹ ወዝንቱ ፡ ውእቱ ፡ ኵሉ ፡ ነገሩ ፡ ለሮብዓም ፡ ወኵሉ ፡ ግብሩ ፡ ዘገብረ ፡ ዝንቱ ፡ ውእቱ ፡ ዘጽሑፍ ፡ ውስተ ፡ መጽሐፈ ፡ ነዚያት ፡ ወዓመተ ፡ መንግሥቱ ፡ በይሁዳ ።
³⁰ ወኵሉ ፡ ንብረቶሙ ፡ በቀትል ፡ በኵሉ ፡ መዋዕሊሆሙ ፡ ማእከለ ፡ ሮብዓም ፡ ወማእከለ ፡ ኢዮራብዓም ።
³¹ ወሰከበ ፡ ሮብዓም ፡ ምስለ ፡ አበዊሁ ፡ ወተቀብረ ፡ ውስተ ፡ ሀገረ ፡ ዳዊት ፡ ወነግሠ ፡ አብያ ፡ ወልዱ ፡ ህየንቴሁ ።

http://www.sacred-texts.com/bib/poly/kg1015.htm 15↗     ¹ አመ፲ወ፰ዓመት ፡ እምዘ ፡ ነግሠ ፡ ኢዮራብዓም ፡ ወልደ ፡ ናባጥ ፡ ወነግሠ ፡ አብያ ፡ ወልዱ ፡ ለሮብዓም ፡ ላዕለ ፡ ይሁዳ ።
² ፮ዓመተ ፡ ነግሠ ፡ ወስማ ፡ ለእሙ ፡ አውምሐክ ፡ ወለተ ፡ አበሴሎም ።
³ ወሖረ ፡ በኀጢአተ ፡ አቡሁ ፡ ዘገብረ ፡ እምቅድሜሁ ፡ ወኢኮነ ፡ ልቡ ፡ ፍጹመ ፡ በቅድመ ፡ እግዚአብሔር ፡ አምላኩ ፡ ከመ ፡ ልበ ፡ ዳዊት ፡ አቡሁ ።
⁴ እስሙ ፡ በእንተ ፡ ዳዊት ፡ አቡሁ ፡ ረሰየ ፡ ሎቱ ፡ እግዚአብሔር ፡ ተረፈ ፡ ከመ ፡ ይቁሙ ፡ ደቂቁ ፡ እምድኅሬሁ ፡ ወከመ ፡ ያቅማ ፡ ለኢየሩሳሌም ።
⁵ እስመ ፡ ገብረ ፡ ዳዊት ፡ ጽድቀ ፡ ቅድመ ፡ እግዚአብሔር ፡ ወኢተግሕሠ ፡ እምኵሉ ፡ ዘአዘዞ ፡ በኵሉ ፡ መዋዕለ ፡ ሕይወቱ ።
⁷ ወዝኒ ፡ ዘተረፈ ፡ ነገሩ ፡ ለአብዩ ፡ ወኵሉ ፡ ግብሩ ፡ ናሁ ፡ ውእቱ ፡ ዝንቱ ፡ ዘጽሑፍ ፡ ውስተ ፡ መጽሐፈ ፡ ነቢያት ፡ መዋዕሊሆሙ ፡ ለነገሥተ ፡ ይሁዳ ፤ ወቀትል ፡ ማእከሎሙ ፡ ለአብዩ ፡ ወማእከለ ፡ ኢዮራብዓም ።
⁸ ወሰከበ ፡ አብዩ ፡ ምስለ ፡ አበዊሁ ፡ አመ ፡ ፳ወ፬ዓመቲሁ ፡ ለኢዮርብዓም ፡ ወቀበርዎ ፡ ኀበ ፡ አበዊሁ ፡ ውስተ ፡ ሀገረ ፡ ዳዊት ፡ ወነግሠ ፡ አሳ ፡ ወልዱ ፡ ህየንቴሁ ።
⁹ አመ ፡ ፳ወ፬ዓመተ ፡ መንግሥቱ ፡ ለኢዮራብዓም ፡ ንጉሠ ፡ እስራኤል ፡ ነግሠ ፡ አሳ ፡ ለይሁዳ ።
¹⁰ ፵ወ፩ዓመተ ፡ ነግሠ ፡ በኢየሩሳሌም ፡ ወስማ ፡ ለእሙ ፡ ሐና ፡ ወለተ ፡ አበሴሎም ።
¹¹ ወገብረ ፡ አሳ ፡ ጽድቀ ፡ ቅድመ ፡ እግዚአብሔር ፡ ከመ ፡ ዳዊት ፡ አቡሁ ።
¹² ወአሰሰለ ፡ ኵሎ ፡ አምሳለ ፡ አማልክት ፡ እምነ ፡ ብሔር ፡ ወሰዐረ ፡ ኵሎ ፡ ኦማልክተ ፡ ዘገብሩ ፡ አበዊሁ ።
¹³ ወሰዐራ ፡ ለሐና ፡ እሙ ፡ እምውስተ ፡ ምኵናና ፡ እስመ ፡ አኅበረት ፡ በኵለሄ ፡ ከመ ፡ ያምልኩ ፡ ምሕራመ ፡ ዖም ፡ ወአግዘሞ ፡ አሳ ፡ ለዖማ ፡ ወአውዐዮ ፡ በእሳት ፡ በውስተ ፡ ፈለገ ፡ ቄድሮን ።
¹⁴ ወዘሰ ፡ ውስተ ፡ አድባር ፡ ኢያሰስለ ፡ ወባሕቱ ፡ ልቡ ፡ ለአሳ ፡ ፍጹም ፡ ምስለ ፡ እግዚአብሔር ፡ አምላኩ ፡ በኵሉ ፡ መዋዕሊሁ ።
¹⁵ ወአብአ ፡ አዕማደ ፡ አቡሁ ፡ ወአዕማደ ፡ ዚአሁኒ ፡ አብአ ፡ ለቤተ ፡ እግዚአብሔር ፡ ዘወርቅ ፡ ወዘብሩር ፡ ወንዋዮኒ ።
¹⁶ ወነበሩ ፡ እንዘ ፡ ይትቃተሉ ፡ አሳ ፡ ወበአስ ፡ ንጉሠ ፡ እስራኤል ፡ በኵሉ ፡ መዋዕሊሆሙ ።
¹⁷ ወዐርገ ፡ ባእስ ፡ ንጉሠ ፡ እስራኤል ፡ ውስተ ፡ ይሁዳ ፡ ወሐነጻ ፡ ለራማ ፡ ከመ ፡ ኢይርክብ ፡ ሙባአ ፡ ወሙፃአ ፡ አሳ ፡ ንጉሠ ፡ ይሁዳ ፡ እንተ ፡ ህየ ።
¹⁸ ወነሥአ ፡ አሳ ፡ ወርቀ ፡ ወብሩረ ፡ ዘተረክበ ፡ ውስተ ፡ መዛግብተ ፡ ቤተ ፡ ንጉሥ ፡ ወወሀቦሙ ፡ ለደቁ ፡ ወፈነዎሙ ፡ ለደቁ ፡ አሳ ፡ ንጉሥ ፡ ኀበ ፡ ወልደ ፡ አዴር ፡ ወልደ ፡ ጣዴርማን ፡ ወልደ ፡ አዚን ፡ ንጉሠ ፡ ሶርያ ፡ ዘይነብር ፡ ውስተ ፡ ደማስቆ ፡ እንዘ ፡ ይብል ፤ አቅምአ ።
¹⁹ ኪዳንአ ፡ ማእከሌየ ፡ [ወማእከሌከ ፡ ወማእከለ ፡ አቡከ ፡] ወማእከለ ፡ አቡየ ፡ ወናሁ ፡ ፈነውኩ ፡ ለከ ፡ አምኃከ ፡ ወርቀ ፡ ወብሩረ ፤ አኅድግ ፡ ኪዳነ ፡ ዘምስለ ፡ በአስ ፡ ንጉሠ ፡ እስራኤል ፡ ወይሖርአ ፡ እምላዕሌየአ ።
²⁰ ወሰምዖ ፡ ወልደ ፡ አዴር ፡ ንጉሥ ፡ ወኦሆአ ፡ ይቤሎ ፡ ወፈነወ ፡ መላእክተ ፡ ኀይሉ ፡ ላዕለ ፡ አህጉረ ፡ እስራኤል ፡ ወቀተለ ፡ ኤናን ፡ ወዳን ፡ ወአበሜላሕ ፡ ወኵሎ ፡ ኪሮተ ፡ እስከ ፡ ኵሉ ፡ ምድረ ፡ ንፍታሌም ።
²¹ ወሶበ ፡ ሰምዐ ፡ በአስ ፡ ኀደጋ ፡ ሐኒጾታ ፡ ለርኅማ ፡ ወአተወ ፡ ውስተ ፡ ተርሳ ።
²² ወአዘዘ ፡ አሳ ፡ ንጉሥ ፡ ለኵሉ ፡ ይሁዳ ፡ በኤናቃም ፡ ወነሥኡ ፡ ኵሎ ፡ እበኒሃ ፡ ለራማ ፡ ወዕፀዊሃ ፡ ዘሐነጸ ፡ በአስ ፡ [ወሐነጸ ፡ ቦሙ ፡ አሳ ፡] ንጉሥ ፡ ኵሎ ፡ ወግረ ፡ ብንያም ፡ ወሰቆጵያን ።
²³ ወኵሉ ፡ ኀይሉ ፡ ዘገብረ ፡ ናሁ ፡ ዝንቱ ፡ ውእቱ ፡ ዘጽሑፍ ፡ ውስተ ፡ መጽሐፈ ፡ ነዚያት ፡ መዋዕለ ፡ መንግሥተ ፡ ይሁዳ ፤ ወአመ ፡ መዋዕለ ፡ ልህቀ ፡ ደወየ ፡ እገሪሁ ።
²⁴ ወሰከበ ፡ አሳ ፡ ምስለ ፡ አበዊሁ ፡ ወቀበርዎ ፡ ምስለ ፡ አበዊሁ ፡ ውስተ ፡ ሀገረ ፡ ዳዊት ፡ አቡሁ ፡ ወነግሠ ፡ ዮሳፍጥ ፡ ወልዱ ፡ ህየንቴሁ ።
²⁵ ወለእስራኤል ፡ ነግሠ ፡ ናባጥ ፡ ወልደ ፡ ኢዮራብዓም ፡ አመ ፡ ፪ዓመተ ፡ መንግሥቱ ፡ ለአሳ ፡ ንጉሠ ፡ ይሁዳ ፡ ወነግሠ ፡ ለእስራኤል ፡ ፪ዓመተ ።
²⁶ ወገብረ ፡ እኩየ ፡ ቅድመ ፡ እግዚአብሔር ፡ ወሖረ ፡ በፍኖተ ፡ አቡሁ ፡ ወበጌጋዩ ፡ በዘአስሐቶሙ ፡ ለእስራኤል ።
²⁷ ወዐገቶ(ሙ) ፡ በአስ ፡ ወልደ ፡ አኪያ ፡ በቤተ ፡ በለዓን ፡ ወቀተሎ ፡ በገባቶን ፡ ዘኢሎፍሊ ፡ ወናበጥሰ ፡ ወኵሉ ፡ እስራኤል ፡ እንዘ ፡ ይነብሩ ፡ ውስተ ፡ ገባቶን ፤
²⁸ ቀተሎ ፡ በአስ ፡ አመ ፡ ሣልስት ፡ ዓመተ ፡ መንግሥቱ ፡ ለአሳ ፡ ወልደ ፡ አብዩ ፡ ንጉሠ ፡ ይሁዳ ፡ ወነግሠ ፡ ህየንቴሁ ።
²⁹ ወእምድኅረ ፡ ነግሠ ፡ ቀተለ ፡ ኵሎ ፡ ቤተ ፡ ኢዮራብዓም ፡ ወኢያትረፈ ፡ ኵሎ ፡ በነፍስ ፡ ለቤተ ፡ ኢዮራብዓም ፡ እስከ ፡ ሠረዎሙ ፡ በከመ ፡ ቃለ ፡ እግዚአብሔር ፡ ዘነበበ ፡ በእዴሁ ፡ ለገብረ ፡ እግዚአብሔር ፡ አኪያ ፡ ሰሎናዊ ፤
³⁰ በእንተ ፡ ጌጋዩ ፡ ለኢዮራብዓም ፡ ዘአስሐቶሙ ፡ ለእስራኤል ፡ ወበእንተ ፡ ወሕኮቱ ፡ ዘአምዕዖ ፡ ለእግዚአብሔር ፡ አምላከ ፡ እስራኤል ።
³¹ ወኵሉ ፡ ነገሩ ፡ ለናባጥ ፡ ወኵሉ ፡ ዘገብረ ፡ ናሁ ፡ ውእቱ ፡ ዝንቱ ፡ ዘጽሑፍ ፡ ውስተ ፡ መጽሐፈ ፡ ነቢያት ፡ መዋዕለ ፡ መንግሥተ ፡ እስራኤል ።
³³ ወአመ ፡ ሣልስ ፡ ዓመተ ፡ መንግሥቱ ፡ ለአሳ ፡ ንጉሠ ፡ ይሁዳ ፡ ነግሠ ፡ በአስ ፡ ወልደ ፡ አኪያ ፡ ለእስራኤል ፡ በተርሳ ፡ ፳ወ፬ዓመተ ።
³⁴ ወገብረ ፡ እኩየ ፡ ቅድመ ፡ እግዚአብሔር ፡ ወሖረ ፡ በፍኖተ ፡ ኢዮራብዓም ፡ ወበጌጋዩ ፡ ዘአስሐቶሙ ፡ ለእስራኤል ።

http://www.sacred-texts.com/bib/poly/kg1016.htm 16↗     ¹ ወኮነ ፡ ቃለ ፡ እግዚአብሔር ፡ ኀበ ፡ አዩ ፡ ወልደ ፡ አናኒ ፡ በእንተ ፡ በአስ ፡ ወይቤሎ ፤
² እስመአ ፡ አልዐልኩከአ ፡ እምነ ፡ ምድርአ ፡ ወረሰይኩከአ ፡ ንጉሥአ ፡ ለሕዝብየአ ፡ እስራኤልአ ፡ ወሖርከ ፡ በፍኖቱ ፡ ለኢዮርብዓም ፡ ዘአስሐቶሙ ፡ ለሕዝብየ ፡ እስራኤል ፡ ከመ ፡ ያምዕዑኒ ፡ ዘከንቶሙ ፤
³ ናሁ ፡ አነ ፡ ኣነሥእ ፡ ድኅሬሁ ፡ ለባአስ ፡ ወድኅረ ፡ ቤቱ ፡ ወእሬስዮ ፡ ከመ ፡ ቤተ ፡ ኢዮርብዓም ፡ ወልደ ፡ ናባጥአ ።
² አብድንቲሁ ፡ ለባአስ ፡ ዘውስተ ፡ ሀገር ፡ ከለባትአ ፡ ይበልዕዎሙአ ፡ ወአብድንቲሆሙአ ፡ ዘውስተ ፡ ገዳምአ ፡ አዕዋፈ ፡ ሰማይ ፡ ይበልዕዎሙአ ።
⁵ ወኵሉ ፡ ነገሩ ፡ ለባአስ ፡ ወኵሉ ፡ ዘገብረ ፡ ወኵሉ ፡ ኀይሉ ፡ ናሁ ፡ ዝንቱ ፡ ውእቱ ፡ ዘጽሑፍ ፡ ውስተ ፡ መጽሐፈ ፡ ነቢያቲሆሙ ፡ መዋዕለ ፡ መንግሥቶሙ ፡ ለእስራኤል ።
⁶ ወሰከበ ፡ በአስ ፡ ምስለ ፡ አበዊሁ ፡ ወተቀብረ ፡ ውስተ ፡ ተርሳ ፡ ወነግሠ ፡ ኤላ ፡ ወልዱ ፡ ህየንቴሁ ፡ አመ ፡ ፳ዓመተ ፡ መንግሥቱ ፡ ለአሳ ።
⁷ ወነበቦ ፡ እግዚአብሔር ፡ በእደ ፡ እዩ ፡ ወልደ ፡ አናኒ ፡ ላዕለ ፡ በአስ ፡ ወላዕለ ፡ ቤቱ ፡ በእንተ ፡ ኵሉ ፡ እኪት ፡ ዘኮነ ፡ እንተ ፡ ገብረ ፡ ቅድመ ፡ እግዚአብሔር ፡ ከመ ፡ ያምዕዖ ፡ በግብረ ፡ እደዊሁ ፡ ከመ ፡ ይኩን ፡ ከመ ፡ ቤተ ፡ ኢዮራብዓም ፡ ወከመ ፡ ይቅትልዎ ።
⁸ ወነግሠ ፡ ኤላ ፡ ወልደ ፡ በአስ ፡ ላዕለ ፡ እስራኤል ፡ ፪ዓመተ ፡ በተርሳ ።
⁹ ወአስተጋብአ ፡ ዘንበሪ ፡ ደቆ ፡ ላዕሌሁ ፡ መልአክ ፡ መንፈቀ ፡ ኀይለ ፡ አፍራስ ፡ ወኤላሰ ፡ ሀለወ ፡ ውስተ ፡ ቴርሳ ፡ ይሰቲ ፡ ወይሰክር ፡ በቤቱ ፡ ለዖሳ ፡ መጋቢሁ ፡ ዘቲርሳ ።
¹⁰ ወቦአ ፡ ዘንበሪ ፡ ወረገዞ ፡ ወቀተሎ ፡ ወነግሠ ፡ ህየንቴሁ ።
¹¹ ወኮነ ፡ እምድኅረ ፡ ነግሠ ፡ ወነበረ ፡ ላዕለ ፡ መንበረ ፡ መንግሥቱ ፡ ቀተለ ፡ ኵሎ ፡ ቤተ ፡ ባአስ ፤
¹² በከመ ፡ ነበበ ፡ እግዚአብሔር ፡ ላዕለ ፡ ቤተ ፡ ባአስ ፡ በከመ ፡ ተናገረ ፡ በአፉሁ ፡ ለኢዩ ፡ ነቢይ ፤
¹³ በእንተ ፡ ኵሉ ፡ ኀጢአቱ ፡ ለባአስ ፡ ወለኤላ ፡ ወልዱ ፡ ዘከመ ፡ አስሐቶሙ ፡ ለእስራኤል ፡ ከመ ፡ ያምዕዕዎ ፡ ለእግዚአብሔር ፡ አምላከ ፡ እስራኤል ፡ በርኵሰ ፡ ዚአሆሙ ።
¹⁴ ወዘተረፈ ፡ ነገሩ ፡ ለኤላ ፡ ዘገብረ ፡ ናሁ ፡ ውእቱ ፡ ዝንቱ ፡ ዘጽሑፍ ፡ ውስተ ፡ መጽሐፈ ፡ ነቢያቲሆሙ ፡ ለነገሥተ ፡ እስራኤል ።
¹⁵ ወዝንበሪ ፡ ነግሠ ፡ ፯ዓመተ ፡ በተርሳ ፡ ወተዓይኒሆሙሰ ፡ ለእስራኤል ፡ ውስተ ፡ ገባቶን ፡ ዘኢሎፍሊ ።
¹⁶ ወሰምዑ ፡ ሕዝብ ፡ ውስተ ፡ ተዓይን ፡ እንዘ ፡ ይብሉ ፡ ዐለወ ፡ ዝንበሪ ፡ ወቀተሎ ፡ ለንጉሥ ፡ ወነግሠ ፡ ለእስራኤል ፡ ህየንቴሁ ፡ ወከመዝ ፡ ሰምዑ ፡ ወአንገሥዎ ፡ ለዝንበሪ ፡ መልአከ ፡ ሰራዊት ፡ በይእቲ ፡ ዕለት ፡ በውስተ ፡ ትዕይንት ።
¹⁷ ወዐርገ ፡ ዝንበሪ ፡ ወኵሉ ፡ እስራኤል ፡ ምስሌሁ ፡ እምገባቶን ፡ ወዐገትዋ ፡ ለቴርሳ ፡ ወነበሩ ፡ ውስቴታ ።
¹⁸ ወእምዝ ፡ ሶበ ፡ ርእየ ፡ ዝንበሪ ፡ እስመ ፡ ተዐግተት ፡ ሀገር ፡ ወከመ ፡ አውዐዩ ፡ ቤተ ፡ ንጉሥ ፡ ወአውዐየ ፡ ውእቱሂ ፡ በቤተ ፡ ንጉሥ ፡ ወሞተ ፤
¹⁹ በእንተ ፡ ኀጣውኢሁ ፡ ዘገብረ ፡ እኩየ ፡ ቅድመ ፡ እግዚአብሔር ፡ ዘሖረ ፡ በፍኖተ ፡ ኢዮራብዓም ፡ ወልደ ፡ ናባጥ ፡ ወበኀጢአቱ ፡ ዘአስሐቶሙ ፡ ለእስራኤል ።
²⁰ ወተረፈ ፡ ነገሩ ፡ ለዝንበሪ ፡ ወኵሉ ፡ ዘገብረ ፡ ናሁ ፡ ውእቱ ፡ ዘጽሑፍ ፡ ውስተ ፡ መጽሐፈ ፡ ነቢያቲሆሙ ፡ ለነገሥተ ፡ እስራኤል ።
²¹ ወአሜሃ ፡ ተከፍለ ፡ ሕዝበ ፡ እስራኤል ፤ መንፈቀ ፡ ሕዝብ ፡ ተለውዎ ፡ ለተምኒ ፡ ወልደ ፡ ጎታን ፡ ከመ ፡ ያንግሥዎ ፤ ወመንፈቀ ፡ ሕዝብ ፡ ተለውዎ ፡ ለዝንበሪ ።
²² ወሕዝብ ፡ ዘተለውዎ ፡ ለዝንበሪ ፡ ጸንዕዎሙ ፡ ለሕዝብ ፡ እለ ፡ ተለውዎ ፡ ለተምኒ ፡ ወልደ ፡ ጎታን ፡ ወሞተ ፡ ተምኒ ፡ ወኢዮራም ፡ እኁሁ ፡ በውእቱ ፡ መዋዕል ፡ ወነግሠ ፡ ዝንበሪ ፡ እምድኅረ ፡ ተምኒ ።
²³ አመ ፡ ፴ወ፩ዓመተ ፡ መንግሥቱ ፡ ለአሳ ፡ ነግሠ ፡ ዝንበሪ ፡ ለእስራኤል ፡ ፲ወ፪ዓመተ ፡ ወ፮ዓመተ ፡ ነግሠ ፡ በቴርሳ ።
²⁴ ወተሣየጦ ፡ ዝንበሪ ፡ ለደብረ ፡ ሰምሮን ፡ በኀበ ፡ ሴምር ፡ እግዚኡ ፡ ለውእቱ ፡ ደብር ፡ በክልኤ ፡ መካልየ ፡ ብሩር ፡ ወሐነጾ ፡ ለውእቱ ፡ ደብር ፡ ወሰመዩ ፡ ስሞ ፡ ለውእቱ ፡ ደብር ፡ ዘሐነጸ ፡ በስመ ፡ ሴሜር ፡ እግዚኡ ፡ ለውእቱ ፡ ደብር ፡ ሴሜሮን ።
²⁵ ወገብረ ፡ ዝንበሪ ፡ እኩየ ፡ ቅድመ ፡ እግዚአብሔር ፡ ወአፈድፈደ ፡ ገቢረ ፡ እኪት ፡ ፈድፋደ ፡ እምነ ፡ ኵሎሙ ፡ እለ ፡ ኮኑ ፡ እምቅድሜሁ ።
²⁶ ወሖረ ፡ በፍኖተ ፡ ኢዮራብዓም ፡ ወልደ ፡ ናባጥ ፡ ወበኀጢአቱ ፡ ዘአስሐቶሙ ፡ ለእስራኤል ፡ ከመ ፡ ያምዕዕዎ(ሙ) ፡ በከንቶሙ ።
²⁷ ወኵሉ ፡ ነገሩ ፡ ለዝንበሪ ፡ ወኵሉ ፡ ዘገብረ ፡ ወኵሉ ፡ ኀይሉ ፡ ናሁ ፡ ውእቱ ፡ ዝንቱ ፡ ዘጽሑፍ ፡ ውስተ ፡ መጽሐፈ ፡ ነቢያቲሆሙ ፡ መዋዕሊሆሙ ፡ ለነገሥተ ፡ እስራኤል ።
²⁸ ወሰከበ ፡ ዝንበሪ ፡ ምስለ ፡ አበዊሁ ፡ ወቀበርዎ ፡ ውስተ ፡ ሰማርያ ፡ ወነግሠ ፡ አካአብ ፡ ወልዱ ፡ ህየንቴሁ ። 2 አመ ፡ ፲ዓመቱ ፡ ለዝንበሪ ፡ ነግሠ ፡ ዮሳፍጥ ፡ ወልደ ፡ አሳ ፤ 3 ፴ወ፭ዓመቱ ፡ ሎቱ ፡ አመ ፡ ይነግሥ ፡ ወ፳ወ፭ዓመተ ፡ ነግሠ ፡ በኢየሩሳሌም ፡ ወስማ ፡ ለእሙ ፡ ገቡዛ ፡ ወለተ ፡ ሴሌሕ ። 4 ወሖረ ፡ በፍኖተ ፡ አቡሁ ፡ አሳ ፡ ወኢተግሕሠ ፡ እምኔሃ ፡ ከመ ፡ ይግበር ፡ ጽድቀ ፡ ቅድመ ፡ እግዚአብሔር ፡ 5 ወባሕቱ ፡ ኢያሰሰለ ፡ አማልክቲሆሙ ፡ ዘውስተ ፡ አድባር ፡ ወይሠውዑ ፡ ወየዐጥኑ ፡ ሎሙ ፡ ሕዝብ ፡ በውስተ ፡ አድባር ። 6 ወዘከመ ፡ ረሰየ ፡ ዮሳፍጥ ፡ ምስለ ፡ ንጉሠ ፡ እስራኤል ፡ ወኵሉ ፡ ኀይሉ ፡ ዘገብረ ፡ ወዘጸብአ ፡ ናሁ ፡ ዝንቱ ፡ ውእቱ ፡ ዘጽሑፍ ፡ ውስተ ፡ መጽሐፈ ፡ ነቢያት ፡ መዋዕሊሆሙ ፡ ለነገሥተ ፡ ይሁዳ ። 7 ወኵሎ ፡ ዘአምለኩ ፡ በመዋዕለ ፡ አቡሁ ፡ አሰሰለ ፡ እምነ ፡ ምድር ። 8 ወአልቦ ፡ ንጉሠ ፡ በሶርያ ፡ ዘናሴብ ። 9 ወገብረ ፡ ኢዮሳፍጥ ፡ ንጉሥ ፡ ሐመረ ፡ በተርሴስ ፡ እንተ ፡ ተሐውር ፡ ውስተ ፡ ሳፍር ፡ ታእቱ ፡ ወርቀ ፡ ወ[ኢ]ሖረት ፡ እስመ ፡ ተ[ሰ]ብረት ፡ ሐመራ ፡ በጋስዮን ፡ ዘጋቢር ። 10 ወይቤሎ ፡ ንጉሠ ፡ እስራኤል ፡ ለኢዮሳፍጥ ፡ ንፈኑ ፡ ደቀከ ፡ ወደቅየ ፡ በሐመር ፡ ወአበየ ፡ ኢዮላፍጥ ። 11 ወሰከበ ፡ ኢዮሳፍጥ ፡ ምስለ ፡ አበዊሁ ፡ በሀገረ ፡ ዳዊት ፡ ወነግሠ ፡ ኢዮራም ፡ ወልዱ ፡ ህየንቴሁ ።
²⁹ ወአመ ፡ ካልእት ፡ ዓመተ ፡ መንግሥቱ ፡ ለኢዮሳፍጥ ፡ ንጉሠ ፡ ይሁዳ ፡ ነግሠ ፡ አካአብ ፡ ወልደ ፡ ዝንበሪ ፡ ለእስራኤል ፡ በሰማርያ ፡ ፳ወ፪ዓመተ ።
³⁰ ወገብረ ፡ አካአብ ፡ እኩየ ፡ ቅድመ ፡ እግዚአብሔር ፡ ወአፈድፈደ ፡ ገቢረ ፡ እኩይ ፡ እምኵሉ ፡ እለ ፡ እምቅድሜሁ ።
³¹ ወኢመጠኑ ፡ ይሖሩ ፡ በፍኖተ ፡ ኀጢአቱ ፡ ለኢዮራብዓም ፡ ወልደ ፡ ናባጥ ፡ ወአውሰበ ፡ ብእሲተ ፡ እንተ ፡ ስማ ፡ ኢያዜብል ፡ ወለተ ፡ ኢየተባሔል ፡ ንጉሠ ፡ ሲዶና ፡ ወሖረ ፡ ወተቀንየ ፡ ለበዓል ፡ ወሰገደ ፡ ሎቱ ።
³² ወገብረ ፡ ምሥዋዐ ፡ ለበዓል ፡ በውስተ ፡ [ቤተ ፡] አማልክቲሁ ፡ ዘሐነጸ ፡ በሰማርያ ።
³³ ወገብረ ፡ አካአብ ፡ ምሕራማተ ፡ ዖም ፡ ወወሰከ ፡ ገቢረ ፡ በዘያምዕዖ ፡ ወያመርር ፡ በዘ ፡ ትሤሮ ፡ ነፍሱ ፡ ወአፈድፈደ ፡ ገቢረ ፡ እኪት ፡ እምነ ፡ ኵሉ ፡ ነገሥተ ፡ እስራኤል ፡ እለ ፡ ነግሡ ፡ አምቅድሜሁ ።
³⁴ ወሐነጸ ፡ አኪያል ፡ ቤተሌዊ ፡ ወሣረራ ፡ [ለኢያሪኮ ፡] በአብሮን ፡ በኵሩ ፡ ወአቀመ፡ ኆኃቲሃ ፡ በዜጉብ ፡ ወሬዛሁ ፡ በከመ ፡ ቃለ ፡ እግዚአብሔር ፡ ዘነበበ ፡ በእደ ፡ ኢያሱ ፡ ወልደ ፡ ነዌ ።

http://www.sacred-texts.com/bib/poly/kg1017.htm 17↗     ¹ ወይቤሎ ፡ ኤልያስ ፡ ትስብያዊ ፡ ነቢይ ፡ ዘእምነ ፡ ቴሰበን ፡ ዘገለአድ ፡ ይቤሎ ፡ ለአካአብ ፡ ሕያው ፡ እግዚአብሔር ፡ አምላከ ፡ ኀይል ፡ አምላከ ፡ እስራኤል ፡ ዘቆምኩ ፡ ቅድሜሁ ፡ ከመ ፡ ኢይወርድ ፡ ዝናም ፡ በእሉ ፡ ዓመት ፡ ዘእንበለ ፡ በቃለ ፡ አፉየ ።
² ወኮነ ፡ ቃለ ፡ እግዚአብሔር ፡ ኀበ ፡ ኤልያስ ፡ ወይቤሎ ፤
³ ሖር ፡ መንገለ ፡ ጽባሕ ፡ ወተኀባእ ፡ ውስተ ፡ ፈለገ ፡ ከረት ፡ ዘመንገለ ፡ ገጸ ፡ ዮርዳኖስ ።
⁴ ወስተይ ፡ ማየ ፡ እምውእቱ ፡ ፈለግ ፡ ወእኤዝዝ ፡ ለቋዓት ፡ ይሴስዩከ ፡ በህየ ።
⁵ ወገብረ ፡ ኤልያስ ፡ በከመ ፡ ይቤሎ ፡ እግዚአብሔር ፡ ወነበረ ፡ ውስተ ፡ ፈለገ ፡ ከረት ፡ ዘቀድመ ፡ ዮርዳኖስ ።
⁶ ወቋዓት ፡ ያመጽኡ ፡ ሎቱ ፡ በአፈ ፡ ጽባሕ ፡ ኅብስተ ፡ ወፍና ፡ ሰርክ ፡ ሥጋ ፡ ወእምፈለግ ፡ ይሰቲ ፡ ማየ ።
⁷ ወእምድኅረ ፡ ብዙኅ ፡ መዋዕል ፡ የብሰ ፡ ውእቱ ፡ ፈለግ ፡ ወዝናምኒ ፡ ኢዘንመ ፡ ውስተ ፡ ምድር ።
⁸ ወኮነ ፡ ቃለ ፡ ኢግዚአብሔር ፡ ኀበ ፡ ኤልያስ ፡ ወይቤሎ ፤
⁹ ተንሥእ ፡ ወሖር ፡ ውስተ ፡ ሰሬጵጣ ፡ ዘሲዶና ፡ ወናሁ ፡ አዘዝኩ ፡ በህየ ፡ ትሴስይከ ፡ ብእሲት ፡ መበለት ።
¹⁰ ወተንሥአ ፡ ወሖረ ፡ ውስተ ፡ ሰርጵጣ ፡ ወበጽሐ ፡ ውስተ ፡ አንቀጸ ፡ ሀገር ፡ ወረከበ ፡ በህየ ፡ ብእሲተ ፡ መበለተ ፡ ተሐጥብ ፡ ዕፀወ ፡ ወጸውዐ ፡ እምድኅሬሃ ፡ ኤልያስ ፡ ወይቤላ ፡ አምጽኢ ፡ ሊተ ፡ ሕቀ ፡ ማየ ፡ በግምዔ ፡ ወእስተይ ።
¹¹ ወሖረት ፡ ታምጽእ ፡ ወጸውዐ ፡ እምድኅሬሃ ፡ ወይቤላ ፡ ተማልዒ ፡ ሊተ ፡ ምስሌኪ ፡ ፍታ ፡ ኅብስተ ።
¹² ወትቤሎ ፡ ይእቲ ፡ ብእሲት ፡ ሕያው ፡ እግዚአብሔር ፡ አምላክከ ፡ ከመ ፡ አልብየ ፡ እክለ ፡ እንበለ ፡ ምልአ ፡ እድ ፡ ሐሪጽ ፡ ውስተ ፡ ቀሡት ፡ ወሕዳጥ ፡ ቅብእ ፡ ውስተ ፡ ልኵንት ፡ ወናሁ ፡ አስተጋብእ ፡ ክልኤተ ፡ ዕፀወ ፡ ወአሐውር ፡ ወእገብር ፡ ለከ ፡ ወለደቂቅየ ፡ ወንበልዕ ፡ ወንመውት ።
¹³ ወይቤላ ፡ ኤልያስ ፡ ተአመኒ ፡ ወሖሪ ፡ ወግበሪ ፡ በከመ ፡ ትቤሊ ፡ ወባሕቱ ፡ ሊተ ፡ ቅድሚ ፡ ግበሪ ፡ እምውስቴቱ ፡ ንስቲተ ፡ ዳፍንተ ፡ ወአምጽኢ ፡ ሊተ ፡ ወለኪሰ ፡ ወለደቂቅኪ ፡ ድኅረ ፡ ትገብሪ ።
¹⁴ እስመ ፡ ከመዝ ፡ ይቤ ፡ እግዚአብሔር ፡ ቀሡትኪኒአ ፡ አንተ ፡ ሐሪጽአ ፡ ኢተኀልቅአ ፡ ወልኵንትኪኒአ ፡ እንተ ፡ ቅብእአ ፡ ኢተኀልቅአ ፡ እስከ ፡ ይሁብአ ፡ እግዚአብሔርአ ፡ ዝናመ ፡ ላዕለአ ፡ ምድርአ ።
¹⁵ ወሖረት ፡ ይእቲ ፡ ብእሲት ፡ ወገብረት ፡ ወበልዑ ፡ [ውእቱ ፡ ወ]ይእቲ ፡ ወደቂቃ ።
¹⁶ ወውእቱኒ ፡ ቀሱታ ፡ እንተ ፡ ሐሪጽ ፡ ኢኀልቀት ፡ ወልኵንትኒ ፡ እንተ ፡ ቅብእ ፡ ኢኀልቀ ፡ በከመ ፡ ይቤ ፡ እግዚአብሔር ፡ በእደ ፡ ኤልያስ ፡ ገብሩ ።
¹⁷ ወእምዝ ፡ ደወየ ፡ ወልዳ ፡ ለይእቲ ፡ ብእሲት ፡ በዐልተ ፡ ቤት ፡ ወከብደ ፡ ደዌሁ ፡ እስከ ፡ ወፅአት ፡ ነፍሱ ፡ በላዕሌሁ ።
¹⁸ ወትቤሎ ፡ ለኤልያስ ፡ ሚሊተ ፡ ወለከ ፡ ብእሴ ፡ እግዚአብሔር ፤ መጻእከ ፡ ኀቤየ ፡ ከመ ፡ ትዝክር ፡ ኀጢአትየ ፡ ወይሙት ፡ ወልድየ ።
¹⁹ ወይቤላ ፡ ኤልያስ ፡ ለይእቲ ፡ ብእሲት ፡ ሀብንዮ ፡ ለወልድኪ ፡ ወነሥኦ ፡ እምነ ፡ ሕፅና ፡ ወአዕረጎ ፡ ውስተ ፡ ጽርሔ ፡ ኀበ ፡ የኀድር ፡ ውእቱ ፡ ወአስከቦ ፡ ወሰከበ ።
²⁰ ወጸርኀ ፡ ኤልያስ ፡ ወይቤ ፡ እሌሊተ ፡ እግዚኦ ፡ ስምዓ ፡ ለዛቲ ፡ መበለት ፡ እስመሁ ፡ አነ ፡ ኀደርኩ ፡ ኀቤሃ ፡ ለዛቲ ፡ መበለት ፡ አሕሠምከ ፡ ላዕሌሃ ፡ ወቀተልከ ፡ ወልዳ ።
²¹ ወነፍሖ ፡ ለውእቱ ፡ ሕፃን ፡ ሥልሰ ፡ ወጸውዖ ፡ ለእግዚአብሔር ፡ ወይቤ ፡ እግዚአብሔር ፡ አምላኪየ ፡ ትግባእ ፡ ነፍሱ ፡ ለዝንቱ ፡ ሕፃን ፡ ላዕሌሁ ።
²² ወኮነ ፡ ከማሁ ፡ ወበከየ ፡ ውእቱ ፡ ሕፃን ።
²³ ወአውረዶ ፡ እምጽርሕ ፡ ውስተ ፡ ቤት ፡ ወመጠዋ ፡ ለእሙ ፡ ወይቤላ ፡ ኤልያስ ፡ ነዋ ፡ ርእዪ ፡ ከመ ፡ ሐይወ ፡ ወልድኪ ።
²⁴ ወትቤሎ ፡ ይእቲ ፡ ብእሲት ፡ ለኤልያስ ፡ ናሁ ፡ አእመርኩ ፡ ከመ ፡ ብአሴ ፡ እግዚአብሔር ፡ አንተ ፡ ወቃለ ፡ እግዚአብሔር ፡ ዘበጽድቅ ፡ ውስተ ፡ አፉከ ።

http://www.sacred-texts.com/bib/poly/kg1018.htm 18↗     ¹ ወእምድኅረ ፡ ብዙኅ ፡ መዋዕል ፡ ኮነ ፡ ቃለ ፡ እግዚአብሔር ፡ ኀበ ፡ ኤልያስ ፡ ወይቤሎ ፡ አስተርእዮ ፡ ላአካአብ ፡ ወእሁብ ፡ ዝናመ ፡ ላዕለ ፡ ምድር ።
² ወሖረ ፡ ኤልያስ ፡ ከመ ፡ ያስተርእዮ ፡ ለአካአብ ፡ ወ ፡ ጸንዐ ፡ ረኃብ ፡ በሰማርያ ።
³ ወጸውዖ ፡ አካአብ ፡ ለአብድዩ ፡ መጋቢሁ ፡ ወአብድዩሰ ፡ ፈራሂ ፡ እግዚአብሔር ፡ ውእቱ ፡ ፈድፋደ ።
⁴ ወአመ ፡ ቀተለቶሙ ፡ ኤልዛቤል ፡ ለነቢያተ ፡ እግዚአብሔር ፡ ነሥአ ፡ አብድዩ ፡ ፻ብእሴ ፡ እምውስተ ፡ ነቢያት ፡ ወኀብአሙ ፡ በበ ፡ ፶ውስተ ፡ በአት ፡ ወሴሰዮሙ ፡ እክለ ፡ ወማየ ።
⁵ ወይቤሎ ፡ አካአብ ፡ ለአብድዩ ፡ ነዓ ፡ ናንሶሱ ፡ ውስተ ፡ ገዳም ፡ ወኀበ ፡ አንቅዕተ ፡ ማይ ፡ ወውስተ ፡ አፍላግ ፡ እመቦ ፡ ከመ ፡ ንርከብ ፡ ሣዕረ ፡ ወናሐዩ ፡ አፍራሲነ ፡ ወአብቅሊነ ፡ ወኢይጥፋእ ፡ እንስሳነ ።
⁶ ወተፋለጡ ፡ እንዘ ፡ የሐውሩ ፡ ፍኖተ ፡ ወአካአብኒ ፡ ሖረ ፡ አሐተ ፡ ፍኖተ ፡ ወአብድዩኒ ፡ ሖረ ፡ ካልእተ ፡ ፍኖተ ፡ እንተ ፡ ባሕቲቱ ።
⁷ ወእንዘ ፡ ሀለወ ፡ አብድዩ ፡ ውስተ ፡ ፍኖት ፡ ባሕቲቱ ፡ መጽአ ፡ ኤልያስ ፡ ቅድሜሁ ፡ ባሕቲቱ ፡ ወሮጸ ፡ አብድዩ ፡ ወወድቀ ፡ በገጹ ፡ ወሰገደ ፡ ሎቱ ፡ ወይቤሎ ፡ አንተኑ ፡ ውእቱ ፡ እግዚእየ ፡ ኤልያስ ።
⁸ ወይቤሎ ፡ ኤልያስ ፡ አነ ፡ ውእቱ ፡ ወሖር ፡ በሎ ፡ ለእግዚእከ ፡ ናሁ ፡ ኀበ ፡ ሀለወ ፡ ኤልያስ ።
⁹ ወይቤሎ ፡ አብድዩ ፡ ምንተ ፡ አበስኩ ፡ ለከ ፡ ከመ ፡ ትመጥዎ ፡ ለገብርከ ፡ ውስተ ፡ እዴሁ ፡ ለአካአብ ፡ ከመ ፡ ይቅትለኒ ።
¹⁰ ሕያሡ ፡ እግዚአብሔር ፡ ከመ ፡ አልቦቱ ፡ ሕዝበ ፡ ወመንግሥተ ፡ ኀበ ፡ ኢለአከ ፡ እግዚእየ ፡ ይኅሥሡከ ፡ ወይቤልዎ ፡ ኢሀለወ ፡ ወአውዐየ ፡ መግሥተ ፡ ወበሓውርቲሃ ፡ እስመ ፡ ኢረከብከ ።
¹¹ ወይእዜኒ ፡ ትብለኒ ፡ አንተ ፡ ሖር ፡ በሎ ፡ ለእግዚእከ ፡ ናሁ ፡ ኀበ ፡ ሀለወ ፡ ኤልያስ ።
¹² ወለእመ ፡ ሖርኩ ፡ አነ ፡ እምኀቤከ ፡ ወመንፈሰ ፡ እግዚአብሔር ፡ ነሥአከ ፡ ወወሰይከ ፡ ባዕደ ፡ ብሔረ ፡ ኀበ ፡ ኢያአምር ፡ ወሖርኩ ፡ ወነገርክዎ ፡ ለአካአብ ፡ እምከመ ፡ ኢረከበከ ፡ ይቀትለኒ ፡ ወአነ ፡ ገብርከ ፡ ፈራሂ ፡ እግዚአብሔር ፡ እምንእስየ ።
¹³ ወእመ ፡ ሰማዕከ ፡ አንተ ፡ እግዚእየ ፡ ዘገበርኩ ፡ አመ ፡ ቀተለቶሙ ፡ ኤልዛቤል ፡ ለነቢያተ ፡ እግዚአብሔር ፡ ወኀባእኩ ፡ እምውስተ ፡ ነቢያተ ፡ እግዚአብሔር ፡ ፻ዕደወ ፡ በበ ፡ ፶ውስተ ፡ በአት ፡ ወሴሰይክዎሙ ፡ እክለ ፡ ወማየ ።
¹⁴ ወይእዜኒ ፡ አንተ ፡ ትብለኒ ፡ ሖር ፡ ወበሎ ፡ ለእግዚእከ ፡ ናሁ ፡ ኀበ ፡ ሀለወ ፡ ኤልያስ ፡ ወይቀትለኒ ፡ እንከ ።
¹⁵ ወይቤሎ ፡ ኤልያስ ፡ ሕያው ፡ እግዚአብሔር ፡ አምላከ ፡ ኀይል ፡ ዘቆምኩ ፡ ቅድሜሁ ፡ ከመ ፡ ዮም ፡ ኣስተርእዮ ።
¹⁶ ወሖረ ፡ አብድዩ ፡ ወተቀበሎ ፡ ለአካአብ ፡ ወአይድዖ ፡ ወሮጸ ፡ አካአብ ፡ ወሖረ ፡ ወተቀበሎ ፡ ለኤልያስ ።
¹⁷ ወይቤሎ ፡ አካአብ ፡ ለኤልያስ ፡ አንተኑ ፡ ውእቱ ፡ ዘትገፈትኦሙ ፡ ለእስራኤል ።
¹⁸ ወይቤሎ ፡ ኤልያስ ፡ አንሰ ፡ ኢይገፈትኦሙ ፡ ለእስራኤል ፡ አላ ፡ አንተ ፡ ወቤተ ፡ አቡከ ፡ እለ ፡ ኀደግምዎ ፡ ለእግዚአብሔር ፡ አምላክክሙ ፡ ወሖርክሙ ፡ ወተለውክሙ ፡ አማልክት ፡ በለአም ።
¹⁹ ወይእዜኒ ፡ ለአከ ፧ ሎሙ ፡ ለእስራኤል ፡ ወአስተጋብኦሙ ፡ ኀቤየ ፡ ውስተ ፡ ደብረ ፡ ቄርሜሎስ ፡ ወለነቢያተ ፡ ኀፍረት ፡ ፬፻ወ፶ወለነቢያተ ፡ ምሕራማተ ፡ አዕዋም ፡ ፬፻ ፡ እለ ፡ ይሴሰዩ ፡ ማእዳ ፡ ለኤልዛቤል ።
²⁰ ወለአከ ፡ አካአብ ፡ ኀበ ፡ ኵሉ ፡ እስራኤል ፡ ወአስተጋብኦሙ ፡ ለኵሉ ፡ ነቢያት ፡ ውስተ ፡ ደብረ ፡ ቀርሜሎስ ።
²¹ ወአቅረቦ ፡ ለኤልያስ ፡ ኀበ ፡ ኵሎሙ ፡ ወይቤሎሙ ፡ ኤልያስ ፡ እስከ ፡ ማእዜ ፡ ተሐነክሱ ፡ በክልኤሆን ፡ ጌጋይክሙ ፤ ለእመ ፡ እግዚአብሔር ፡ ውእቱ ፡ አምላክ ፡ ትልዉ ፡ ኪያሁ ፡ ወለእመ ፡ በዓል ፡ ውእቱ ፡ ትልዉ ፡ ኪያሁ ፡ ወአልቦ ፡ ቃለ ፡ ዘአውሥእዎ ፡ ሕዝብ ።
²² ወይቤሎሙ ፡ ኤልያስ ፡ ለሕዝብ ፡ አነ ፡ ባሕቲትየ ፡ ተረፍኩ ፡ ነቢየ ፡ እግዚአብሔር ፡ ወናሁ ፡ ነቢያተ ፡ በዓል ፡ ፬፻ወ፶ብእሲ ፡ ወነቢያተ ፡ ምሕራማተ ፡ ዖም ፡ ፬፻ ።
²³ የሀቡነ ፡ ፪አልህምተ ፡ ወይኅረዩ ፡ ሎሙ ፡ እሙንቱ ፡ አሐደ ፡ ወይጥብሕዎ ፡ በበመሌሊቱ ፡ ወይደይዎ ፡ መልዕልተ ፡ ዕፀው ፡ ወኢያንድዱ ፡ እሳተ ፡ ወአነኒ ፡ እገብር ፡ ካልአ ፡ ላህመ ፡ ወኢይወዲ ፡ እሳተ ።
²⁴ ወይጸውዑ ፡ እሙንቱኒ ፡ አማልክቲሆሙ ፡ በበአስማቲሆሙ ፡ ወአነኒ ፡ እጼውዕ ፡ ስመ ፡ እግዚአብሔር ፡ አምላኪየ ፡ ወዘውስቴቶሙ ፡ አምላክ ፡ ውእቱ ፡ ዘፈነወ ፡ እላተ ፡ አምላክ ፡ ውእቱ ፤ ወአውሥእዎ ፡ ኵሎሙ ፡ ሕዝብ ፡ ወይቤልዎ ፡ ሠናየ ፡ ነበብከ ፡ ቃለከ ።
²⁵ ወይቤሎሙ ፡ ኤልያስ ፡ ነቢያተ ፡ ኀፍረት ፡ ኅረዩ ፡ ለክሙ ፡ አሐደ ፡ ላህመ ፡ ወግበሩ ፡ ቅድሙ ፡ አንትሙ ፡ እስመ ፡ አንትሙ ፡ ትበዝኁ ፡ ወጸውዑ ፡ በስመ ፡ አምላክክሙ ፡ ወእሳተ ፡ ኢትደዩ ።
²⁶ ወነሥኡ ፡ ላህሞሙ ፡ ወገብሩ ፡ ወጸውዑ ፡ በስመ ፡ በዓል ፡ አምነግህ ፡ እስከ ፡ ቀትር ፡ ወይቤሉ ፡ ስምዐነ ፡ በዐል ፡ ስምዐነ ፡ ወአልቦ ፡ ቃለ ፡ ወአልቦ ፡ ድምፀ ፡ ወይረውጹ ፡ ኀበ ፡ ምሥዋዕ ፡ ዘገብሩ ።
²⁷ ወሶበ ፡ ቀትረ ፡ አኀዘ ፡ ይሳለቅ ፡ ላዕሌሆሙ ፡ ኤልያስ ፡ ትስብያዊ ፡ ወይቤሎሙ ፡ ጸውዑ ፡ በዐቢይ ፡ ቃል ፡ እስመ ፡ ዮጊ ፡ ይትላሀይ ፡ ወእመ ፡ አኮ ፡ ይቴክዝ ፡ ዮጊ ፡ ወእመኒ ፡ ይነውም ፡ ጽርኁ ፡ ሎቱ ፡ ወአንቅህዎ ።
²⁸ ወአኀዙ ፡ ይጽርኁ ፡ ወይጸውዑ ፡ በዐቢይ ፡ ቃል ፡ ወይጥብሑ ፡ ሥጋሆሙ ፡ በመጥባሕት ፡ ወበኰያንው ፡ እስከ ፡ ኀየሎሙ ፡ ደም ።
²⁹ ወይትኔበዩ ፡ እስከ ፡ ፍና ፡ ሰርክ ፡ ወእምዝ ፡ ሶበ ፡ ኮነ ፡ ጊዜ ፡ ዕርገተ ፡ መሥዋዕት ፡ ወይቤሎሙ ፡ ኤልያስ ፡ ለነቢያተ ፡ ኀፍረት ፡ ይከውነክሙ ፡ እምይእዜሰ ፡ እንከ ፡ እግበር ፡ አነኒ ፡ መሥዋዕትየ ፡ ወተግሕሡ ፡ ወሖሩ ።
³⁰ ወይቤሎሙ ፡ ኤልያስ ፡ ለሕዝብ ፡ ንዑ ፡ ኀቤየ ፡ ወሖሩ ፡ ኀቤሁ ።
³¹ ወነሥአ ፡ ኤልያስ ፡ ዐሥሩ ፡ ወክልኤ ፡ እብነ ፡ በከመ ፡ ኍልቆሙ ፡ ለሕዝበ ፡ እስራኤል ፡ በከመ ፡ ይቤሎ ፡ እግዚአብሔር ፡ እስራኤል ፡ ይኩን ፡ ስምከ ።
³² ወነደቆን ፡ ለእማንቱ ፡ አእባን ፡ በስመ ፡ እግዚአብሔር ፡ ወአሕየወ ፡ ምሥዋዐ ፡ ዘመዝበረ ፡ ወገብረ ፡ ባሕረ ፡ ዘያገምር ፡ ፪በመስፈርተ ፡ ዘርእ ፡ እንተ ፡ ዐውዱ ፡ ለምሥዋዕ ።
³³ [ወወጥሐ ፡ ዕፀወ ፡ መልዕልተ ፡ ምሥዋዕ ፡] ዘገብረ ፡ [ወ]መተሮ ፡ በበመለያልዪሁ ፡ ለውእቱ ፡ ጽንሓሐ ፡ መሥዋዕት ፡ ወአስተናበረ ፡ [ላዕለ ፡] ዕፀዊሁ ፡ ወወጥሐ ፡ ዲበ ፡ ምሥዋዕ ።
³⁴ ወይቤሎሙ ፡ አምጽኡ ፡ ሊተ ፡ ፬መሳብክተ ፡ ማይ ፡ ወሱጡ ፡ ዲበ ፡ ምሥዋዕ ፡ ወዲበ ፡ ዕፀዊሁኒ ፡ ወገብሩ ፡ ከማሁ ፡ ወይቤሎሙ ፡ ድግሙ ፡ ወደገሙ ፡ ወይቤሎሙ ፡ ሠልሱ ፡ ወሠለሱ ።
³⁵ ወውሕዘ ፡ ማይ ፡ ዐውደ ፡ ምሥዋዕ ፡ መሊኦ ፡ ውስተ ፡ ባሕር ፡ ማዩ ።
³⁶ ወጸርኀ ፡ ኤልያስ ፡ ውስተ ፡ ሰማይ ፡ ወይቤ ፡ እግዚኦ ፡ አምላከ ፡ አብርሃም ፡ ወአምላከ ፡ ይስሐቅ ፡ ወእስራኤል ፡ ስምዐኒ ፡ እግዚኦ ፡ ስምዐኒ ፡ ዮም ፡ በበይነ ፡ እሳት ፡ ወያእምሩ ፡ ኵሉ ፡ ሕዝብ ፡ ከመ ፡ አንተ ፡ ውእቱ ፡ እግዚአብሔር ፡ አምላከ ፡ እስራኤል ፡ ወአነ ፡ ገብርከ ፡ ወበእንቲአከ ፡ ገበርክዎ ፡ ለዝንቱ ፡ ግብር ።
³⁷ ስምዐኒ ፡ እግዚኦ ፡ ስምዐኒ ፡ ወያእምሩ ፡ ኵሉ ፡ ሕዝብ ፡ ከመ ፡ አንተ ፡ ውእቱ ፡ እግዚአብሔር ፡ አምላክ ፡ ወአንተ ፡ ገፍታእኮሙ ፡ ልቦሙ ፡ ለኵሎሙ ፡ አሕዛብ ፡ ለድኅሬሆሙ ።
³⁸ ወወረደ ፡ እሳት ፡ አምሰማይ ፡ እምኀበ ፡ እግዚአብሔር ፡ ወበልዐት ፡ መሥዋዕቶ ፡ ወዕፀዊሁኒ ፡ ወማዮኒ ፡ ዘውስተ ፡ ባሕሩ ፡ ወእበኒሁኒ ፡ ወለሐሰት ፡ መሬቶሂ ።
³⁹ ወወድቁ ፡ ኵሉ ፡ ሕዝብ ፡ በገጾሙ ፡ ወሰገዱ ፡ ሎቱ ፡ ወይቤልዎ ፡ አማን ፡ ውእቱ ፡ እግዚአብሔር ፡ አምላክ ።
⁴⁰ ወይቤሎሙ ፡ ኤልያስ ፡ ለሕዝብ ፡ አኀዝዎሙ ፡ ለነቢያተ ፡ በዓል ፡ ወአልቦ ፡ ዘያመስጠክሙ ፡ እምውስቴቶሙ ፡ ወአኀዝዎሙ ፡ ለነቢያተ ፡ ሐሰት ፡ ወአውረዶሙ ፡ ኤልያስ ፡ ውስተ ፡ ፈለገ ፡ ቂሶን ፡ ወረገዞሙ ፡ በህየ ።
⁴¹ ወይቤሎ ፡ ኤልያስ ፡ ለአካአብ ፡ ዕርግ ፡ ወብላዕ ፡ ወስተይ ፡ እስመ ፡ ድምፀ ፡ እገሪሁ ፡ ለዝናም ።
⁴² ወዐርገ ፡ አካአብ ፡ ይብላዕ ፡ ወይስተይ ፡ ወዐርገ ፡ ኤልያስ ፡ ውስተ ፡ ደብረ ፡ ቀርሜሎስ ፡ ወሰገደ ፡ ውስተ ፡ ምድር ፡ ወወደየ ፡ ርእሶ ፡ ውስተ ፡ ብረኪሁ ።
⁴³ ወይቤሎ ፡ ለቍልዔሁ ፡ ዕርግ ፡ ወርኢ ፡ መንገለ ፡ ፍኖተ ፡ ባሕር ፡ ወርእየ ፡ ውእቱ ፡ ወልድ ፡ ወይቤ ፡ አልቦ ፡ ወኢምንተኒ ፡ ወይቤሎ ፡ ኤልያስ ፡ ግባእ ፡ ስብዐ ።
⁴⁴ ወገብአ ፡ ውእቱ ፡ ወልድ ፡ ወበሳብዕት ፡ ርእየ ፡ ሕቀ ፡ ደመና ፡ መጠነ ፡ ሰኰና ፡ ብእሲ ፡ ወታዐርግ ፡ ማየ ፡ እምባሕር ፡ ወይቤሎ ፡ ዕርግ ፡ ወንግሮ ፡ ለአካአብ ፡ ከመ ፡ ይሖር ፡ ሰረንላቲሁ ፡ ወይረድ ፡ ኢይርከቦ ፡ ዝናም ።
⁴⁵ ወእምዝ ፡ እስከ ፡ ይትመየጡ ፡ ለፌ ፡ ወለፌ ፡ ጸልመ ፡ ሰማይ ፡ በደመና ፡ ወመጽአ ፡ ዐውሎ ፡ ወወረደ ፡ ዝናም ፡ ዐቢይ ፡ ወሖረ ፡ አካአብ ፡ ምስለ ፡ እስራኤል ፡ እንዘ ፡ ይበኪ ።
⁴⁶ ወመጽአ ፡ እደ ፡ እግዚአብሔር ፡ ላዕለ ፡ ኤልያስ ፡ ወአቅነቶ ፡ ሐቌሁ ፡ ወሮጸ ፡ ቅድሜሁ ፡ ለአካአብ ፡ ምስለ ፡ እስራኤል ።

http://www.sacred-texts.com/bib/poly/kg1019.htm 19↗     ¹ ወነገራ ፡ አካአብ ፡ ለኤልዛቤል ፡ ብአሲቱ ፡ ኵሎ ፡ ዘገብረ ፡ ኤልያስ ፡ ወዘከመ ፡ ቀተሎሙ ፡ ለነቢያተ ፡ ኀፍረት ።
² ወለአከት ፡ ኤልዛቤል ፡ ኀበ ፡ ኤልያስ ፡ ወትቤሎ ፡ እመ ፡ አኮአ ፡ አንተአ ፡ ኤልያስአ ፡ ወእመ ፡ አኮአ ፡ አነአ ፡ ኤልዝቤልአ ፡ ከመዝአ ፡ ለይረስየኒ ፡ እግዚአብሔር ፡ ወከመዝአ ፡ ለይቅትለኒአ ፡ ከመአ ፡ ጌስምኣ ፡ ዘጊዜአ ፡ እሬስያአ ፡ ለነፍስከአ ፡ ከመ ፡ ነፍሰአ ፡ አሐዱአ ፡ እምኔሆሙ ።
³ ወፈርሀ ፡ ኤልያስ ፡ ወተንሥአ ፡ ወአምሰጠ ፡ በነፍሱ ፡ ወበጽሑ ፡ ውስተ ፡ ቤርሳቤሕ ፡ ውስተ ፡ ምድረ ፡ ይሁዳ ፡ ወኀደጎ ፡ ለቍልዔሁ ፡ ህየ ።
⁴ ወሖረ ፡ ውእቱ ፡ ውስተ ፡ ፍኖተ ፡ በድው ፡ ዕለተ ፡ ወበጺሖ ፡ [ነበረ ፡] ታሕተ ፡ ዕፀ ፡ ተርሜን ፡ ወሰአለ ፡ ትሙት ፡ ነፍሱ ፡ ወይቤ ፡ ኮንየ ፡ እንከሰ ፡ እምይእዜሰ ፡ ነፍስየ ፡ እግዚኦ ፡ ንሣእ ፡ እስመ ፡ ኢይኄይስ ፡ አነ ፡ እምነ ፡ አበውየ ።
⁵ ወእምዝ ፡ ሰከበ ፡ ወኖመ ፡ ህየ ፡ ታሕተ ፡ ዕፅ ፡ ወቦ ፡ ዘመጽአ ፡ ወገሰሶ ፡ ወይቤሎ ፡ ተንሥእ ፡ ወብላዕ ።
⁶ ወእምዝ ፡ ተንሥአ ፡ ኤልያስ ፡ ወረከበ ፡ ትርኣሲሁ ፡ ኅብስተ ፡ ጻፍንታ ፡ ወጸራይቀ ፡ ወግምዔ ፡ ማይ ፡ ወተንሥአ ፡ ወበልዐ ፡ ወሰትየ ፡ ወገብአ ፡ ወሰከበ ።
⁷ ወመጽአ ፡ መልአከ ፡ እግዚአብሔር ፡ ዳግመ ፡ ወገሰሶ ፡ ወይቤሎ ፡ ተንሥአ ፡ ወብላዕ ፡ እስመ ፡ ርኁቅ ፡ ውእቱ ፡ ፍኖትከ ።
⁸ ወተንሥአ ፡ ወበልዐ ፡ ወሰትየ ፡ ወሖረ ፡ በኀይለ ፡ ውእቱ ፡ እክል ፡ ዘበልዐ ፡ ፵ዕለተ ፡ ወ፵ሌሊተ ፡ እስከ ፡ ደብረ ፡ ኮሬብ ።
⁹ ወቦአ ፡ ህየ ፡ ውስተ ፡ በአት ፡ ወኀደረ ፡ ህየ ፡ ወመጽአ ፡ ቃለ ፡ እግዚአብሔር ፡ ኀቤሁ ፡ ወይቤሎ ፡ ምንተ ፡ መጻእከ ፡ ዝየ ፡ ኤልያስ ።
¹⁰ ወይቤሎ ፡ ቀኒአ ፡ ቀናእኩ ፡ ለእግዚአብሔር ፡ ዘኵሎ ፡ ይመልክ ፡ እስመ ፡ ኀደጉከ ፡ ደቂቀ ፡ እስራኤል ፡ ምሥዋዒከኒ ፡ ነሠቱ ፡ ወቀተሉ ፡ ነቢያቲከኒ ፡ በኲናት ፡ ወተረፍኩ ፡ አነ ፡ ባሕቲትየ ፡ ወየሐሥሥዋ ፡ ለነፍስየ ።
¹¹ ወይቤሎ ፡ ፃእ ፡ ጌሰመ ፡ ወቁም ፡ ቅድመ ፡ እግዚአብሔር ፡ ውስተ ፡ ደብር ፡ ወየኀልፍ ፡ እግዚአብሔር ፤ ወይመጽእ ፡ ነፋስ ፡ ዐቢይ ፡ ወጽኑዕ ፡ ስ ፡ ዘይፈትሕ ፡ አድባረ ፡ ወይፌትቶ ፡ ለኰኵሕ ፡ ቅድመ ፡ እግዚአብሔር ፡ ወኢሀለወ ፡ እግዚአብሔር ፡ ውስተ ፡ ውእቱ ፡ ነፋስ ፡ ወእምድኅረ ፡ ውእቱ ፡ ነፋስ ፡ ይመጽእ ፡ ድልቅልቅ ፡ ወኢሀለወ ፡ እግዚአብሔር ፡ ውስተ ፡ ውእቱ ፡ ድልቅልቅ ።
¹² ወእምድኅረ ፡ ውእቱ ፡ ድልቅልቅ ፡ ይመጽእ ፡ እሳት ፡ ወኢሀለወ ፡ እግዚአብሔር ፡ ውስተ ፡ ውእቱ ፡ እሳት ፡ ወእምድኅረ ፡ እሳት ፡ ይመጽእ ፡ ቃለ ፡ ቀጢን ፡ ከመ ፡ ዘይትፋጸይ ፡ ወህየ ፡ ሀለወ ፡ እግዚአብሔር ።
¹³ ወሶበ ፡ ሰምዐ ፡ ኤልያስ ፡ ከደነ ፡ ገጾ ፡ በሐሜላቱ ፡ ወእምዝ ፡ ወፅአ ፡ ወቆመ ፡ ታሕተ ፡ በአት ፡ ወመጽአ ፡ ቃል ፡ ኀቤሁ ፡ ወይቤሎ ፡ ምንተ ፡ መጻእከ ፡ ዝየ ፡ ኤልያስ ።
¹⁴ ወይቤ ፡ ቀኒአ ፡ ቀናእኩ ፡ ለእግዚአብሔር ፡ ዘኵሎ ፡ ይመልክ ፡ እስመ ፡ ኀደጉ ፡ ሕገከ ፡ ደቂቀ ፡ እስራኤል ፡ ወነሠቱ ፡ ምሥዋዒከኒ ፡ ወቀተሉ ፡ ነቢያቲከኒ ፡ በኲናት ፡ ወተረፍኩ ፡ አነ ፡ ባሕቲትየ ፡ ወየኀሥሥዋ ፡ ለነፍስየ ፡ ይንሥእዋ ።
¹⁵ ወይቤሎ ፡ እግዚአብሔር ፡ ግባእ ፡ ውስተ ፡ ፍኖትከ ፡ ወተኀልፍ ፡ እንተ ፡ ፍኖተ ፡ በድው ፡ በደማስቆ ፡ ወበጺሐከ ፡ ቀብኦ ፡ ለአዛሔል ፡ ይንግሥ ፡ ለሶርያ ።
¹⁶ ወለወልደ ፡ ኢዩ ፡ ወልደ ፡ ናሜሶ ፡ ቅብኦ ፡ ይንግሥ ፡ ለእስራኤል ፡ ወለኤልሳዕ ፡ ወልደ ፡ ሳፍጥ ፡ ዘእምነ ፡ አቤሌሜሁላ ፡ ቅብኦ ፡ ይኩን ፡ ነቢየ ፡ ህየንቴከ ።
¹⁷ ወዘአምሰጠ ፡ እምነ ፡ ኲናተ ፡ አዛሔል ፡ ይቅትሎ ፡ ኢዩ ፡ ወዘአምሰጠ ፡ እምነ ፡ ኲናተ ፡ ኢዩ ፡ ይቅትሎ ፡ ኤልሳዕ ።
¹⁸ ወታተርፍ ፡ ፸፻ብእሴ ፡ ኵሎ ፡ እለ ፡ ኢሰገዲ ፡ ለበዐል ፡ ወኵሉ ፡ አፍ ፡ ዘኢያመልኮ ።
¹⁹ ወሖረ ፡ ህየ ፡ ወረከቦ ፡ ለኤልሳዕ ፡ ወልደ ፡ ሳፍጥ ፡ እንዘ ፡ የሐርሱ ፡ ቅድሜሁ ፡ ፲ወ፪አልህምት ፡ ወውእቱ ፡ ላዕለ ፡ ኵሎሙ ፡ ወሖረ ፡ ወገደፈ ፡ ላዕሌሁ ፡ ሐሜላቶ ።
²⁰ ወኀደገ ፡ ኤልሳዕ ፡ ጽምደ ፡ አልህምት ፡ ወሖረ ፡ ወተለዎ ፡ ለኤልያስ ፡ ወይቤሎ ፡ ኣፈቅረከ ፡ አቡየ ፡ ወእተሉ ፡ ድኅሬከ ፡ ወይቤሎ ፡ ኤልያስ ፡ ግባእ ፡ እስመ ፡ ወዓልየ ፡ ረሰይኩከ ።
²¹ ወገብአ ፡ እምኀበ ፡ ይተልዎ ፡ ወነሥአ ፡ ጽምደ ፡ አልህምቲሁ ፡ ወጠብሐ ፡ ወአብሰለ ፡ በጽህራት ፡ ዘአልህምተ ፡ ወአቅረበ ፡ ለሕዝብ ፡ ወበልዑ ፡ ወሖረ ፡ ወተለዎ ፡ ለኤልያስ ፡ ወኮኖ ፡ ወዓሌሁ ።

http://www.sacred-texts.com/bib/poly/kg1020.htm 20↗     ¹ ወአስተጋብአ ፡ ወልደ ፡ አዴር ፡ ኵሎ ፡ ኀይሎ ፡ ወዐርገ ፡ ወዐገታ ፡ ለሰማርያ ፡ ወነበረ ፡ ይሰቀቦሙ ፡ ወሀለዉ ፡ ምስሌሁ ፡ ፴ወ፪ነገሥት ፡ ወኵሉ ፡ አፍራሲሆሙ ፡ ወሰረገላቲሆሙ ፡ ወዐርጉ ፡ ወዐገትዋ ፡ ለሰማርያ ፡ ወቀተልዋ ።
² ወለአከ ፡ ሐዋርያተ ፡ ኀበ ፡ አካአብ ፡ ንጉሠ ፡ እስራኤል ፡ እንዘ ፡ ይብል ፡ ከመዝአ ፡ ይቤ ፡ ወልደ ፡ አዴርአ ፤
³ ወርቅከኒአ ፡ ወብሩርከኒአ ፡ ዚአየአ ፡ ውእቱአ ፡ ወአንስቲያከኒአ ፡ ወውሉድከኒ ፡ ዚአየአ ፡ ውእቱአ ።
⁴ ወአውሥአ ፡ አካአብ ፡ ንጉሥ ፡ ወይቤሎ ፡ በከመ ፡ ትቤአ ፡ እግዚኦ ፡ ንጉሥአ ፡ አነኒአ ፡ ዚአከአ ፡ ወኵሉአ ፡ ዘዚአየአ ፡ ዚአከአ ፡ ውእቱአ ።
⁵ ወደገመ ፡ ልኢከ ፡ ኀቤሁ ፡ ወመጽኡ ፡ ሐዋርያቲሁ ፡ ወይቤልዎ ፡ ለአካአብ ፡ ከመዝ ፡ ይቤ ፡ ወልደ ፡ አዴር ፡ ናሁአ ፡ ለአኩአ ፡ ኀቤከአ ፡ አነ ፡ ፈኑ ፡ ሊተ ፡ ወርቀከ ፡ ወብሩረከ ፡ ወአንስቲያከኒ ።
⁶ ወእመአኮ ፡ ጌሰም ፡ ዘጊዜ ፡ እፌኑ ፡ ደቅየ ፡ ወይፈትኑ ፡ ዜተከ ፡ ወቤተ ፡ ደቂቅከ ፡ ወኵሎ ፡ ዘአፍተዎሙ ፡ ወዘአደሞሙ ፡ ለዐይኖሙ ፡ ወኵሎ ፡ ዘገሰሱ ፡ በእደዊሆሙአ ፡ ይነሥኡአ ።
⁷ ወጸውዖሙ ፡ ንጉሠ ፡ እስራኤል ፡ ለኵሉ ፡ ረባናት ፡ ወይቤሎሙ ፡ ርእዩ ፡ ከመ ፡ እኪተ ፡ የኀሥሥ ፡ ዝንቱ ፡ ለአከ ፡ ኀቤየ ፡ በእንተ ፡ አንስቲያየ ፡ ወበእንተ ፡ ደቂቅየ ፡ ወበእንተ ፡ አዋልድየ ፤ ወወርቅየሰ ፡ ወብሩርየ ፡ ኢከላእክዎ ።
⁸ ወይቤልዎ ፡ ረባናት ፡ ወኵሉ ፡ ሕዝብ ፡ እንብከ ፡ ኢትበሎ ፡ አሆ ።
⁹ ወይቤሎሙ ፡ ለሐዋርያቲሁ ፡ ለወልደ ፡ አዴር ፡ በልዎ ፡ ለእግዚእክሙ ፡ ኵሎአ ፡ ዘለአከአ ፡ ኀበ ፡ ገብርከ ፡ ቀዲሙ ፡ እገብር፧ወዘንተሰ ፡ ነገርአ ፡ ኢይክልአ ፡ ገቢርአ ፡ ወሖሩ ፡ እሙንቱ ፡ ሐዋርያት ፡ ወነገርዎ ፡ ዘንተ ፡ ቃለ ።
¹⁰ ወለአኮሙ ፡ ካዕበ ፡ ወልደ ፡ አዴር ፡ ኀቤሁ ፡ እንዘ ፡ ይብል ፡ ከመዝአ ፡ ለይረስየኒአ ፡ እግዚአብሔር ፡ ወከመዝ ፡ ለይቅትለኒአ ፡ ለእመ ፡ ኢኬድዎ ፡ ለምድርክሙ ፡ ሶርያ ፡ ወኵሉ ፡ ሕዝብየ ፡ ወሠራዊትየ ፡ ወእመ ፡ ኢረሰይዎአ ፡ ማኅደረ ፡ ቈናጽልአ ።
¹¹ ወአውሥአ ፡ ንጉሠ ፡ እስራኤል ፡ ወይቤሎ ፡ ይኩንአ ፡ ወኢይትመካሕ ፡ ዘሰናምአ ፡ ከመአ ፡ ርቱዕአ ።
¹² ወእምዝ ፡ ሶበ ፡ ሰምዐ ፡ ዘንተ ፡ ቃለ ፡ ወሀለወ ፡ ውስተ ፡ ደብተራሁ ፡ ይሰቲ ፡ ምስለ ፡ ኵሎሙ ፡ ነገሥት ፡ እለ ፡ ምስሌሁ ፡ ወይቤሎሙ ፡ ለደቁ ፡ ሕጽሩ ፡ ሐጹረ ፡ ውስተ ፡ ሀገር ።
¹³ ወመጽአ ፡ ፩ነቢይ ፡ ኀበ ፡ ንጉሠ ፡ እስራኤል ፡ ወይቤሎ ፡ ከመዝ ፡ ይቤ ፡ እግዚአብሔር ፡ ርኢከኑአ ፡ ኵሎአ ፡ አሕዛብአ ፡ ዘንተ ፡ ብዙኀ ፤ ናሁ ፡ አነ ፡ ኣገብኦሙ ፡ ዮም ፡ ውስተ ፡ እዴከ ፡ ወታአምር ፡ እንከአ ፡ ከመአ ፡ አነአ ፡ ውእቱአ ፡ እግዚአብሔርአ ።
¹⁴ ወይቤ ፡ አካአብ ፡ በምንተ ፡ ኣአምር ፡ ወይቤሎ ፡ ከመዝ ፡ ይቤ ፡ እግዚአብሔር ፡ በደቆሙ ፡ ለመላእክቱ ፡ አድያም ፡ ወይቤሎ ፡ አካአብ ፡ መኑ ፡ ይቀድም ፡ ስሒጠ ፡ ወመኑ ፡ ያስተኣኅዝ ፡ ቀትለ ፡ ወይቤሎ ፡ ነቢይ ፡ አንተ ።
¹⁵ ወኍልቆሙ ፡ ፪፻ወ፴ወ፪ነገሥት ፡ እለ ፡ ይረድእዎ ።
¹⁷ ወወፅኡ ፡ ደቀ ፡ መላእክተ ፡ አድያም ፡ ቀደሙ ፤ ወለአኩ ፡ ወነገርዎ ፡ ለንጉሠ ፡ ሶርያ ፡ ወይቤልዎ ፡ ናሁአ ፡ መጽኡአ ፡ ዕደውአ ፡ እምነ ፡ ሰማርያ ።
¹⁸ ወዳኅና ፡ ቀናገሮሙአ ፡ በሰላምአ ፡ እንከሰአ ፡ ከመአ ፡ ሕያዋኒሆሙ ፡ የአኀዝዎሙ ፤ ዘይወጽእአ ፡ ወኢይትዐወቅአ ፡ እምነአ ፡ ሀገርአ ።
¹⁹ ወእሙንቱሰ ፡ ኀለፉ ፡ ወድኡ ፡ እምነ ፡ ሀገር ፡ እልክቱ ፡ ደቀ ፡ መላእክተ ፡ አድያም ፡ ወሰራዊትሰ ፡ ድኅሬሆሙ ።
²⁰ ወቀተሉ ፡ ኵሎሙ ፡ ወደገሙ ፡ ቀቲለ ፡ ኵሎሙ ፡ ወእምዝ ፡ ጐዩ ፡ ሶርያ ፡ ወዴገንዎሙ ፡ እስራኤል ፡ ወአምሰጠ ፡ ወልደ ፡ አዴር ፡ በፈረስ ፡ ረዋጺ ።
²¹ ወወፅአ ፡ ንጉሠ ፡ እስራኤል ፡ ወነሥአ ፡ ኵሎ ፡ አፍራሲሆሙ ፡ ወሰረገላቲሆሙ ፡ ወቀተሎሙ ፡ ዐቢየ ፡ ቀትለ ፡ ለሶርያ ።
²² ወመጽአ ፡ ነቢይ ፡ ኀበ ፡ ንጉሠ ፡ እስራኤል ፡ ወይቤሎ ፡ አጽንዕ ፡ ርእሰከ ፡ ወአእምር ፡ ዘከመ ፡ ትገብር ፡ እስመ ፡ ዓመ ፡ ዘይመጽእ ፡ የዐርግ ፡ ላዕሌከ ፡ ወልደ ፡ አዴር ፡ ንጉሠ ፡ ሶርያ ።
²³ ወይቤቤልዎ ፡ ደቁ ፡ ለንጉሠ ፡ ሶርያ ፡ አምላከ ፡ አድባር ፡ ውእቱ ፡ አምላከ ፡ እስራኤል ፡ ወአኮ ፡ አምላከ ፡ ቈላት ፡ ወበበይነ ፡ ዝንቱ ፡ ሞኡነ ፡ ወእመሰ ፡ አፍጠነ ፡ ጸቢኦቶሙ ፡ ንመውኦሙ ።
²⁴ ወዘንተ ፡ ነገረ ፡ ዘንብለከ ፡ ግበር ፤ ፈንዎሙ ፡ ለእሉ ፡ ነገሥት ፡ ይእትዉ ፡ በሓውርቲሆሙ ፡ ወሢም ፡ ህየንቴሆሙ ፡ መላእክተ ፡ ሰራዊት ።
²⁵ ወናመጽእ ፡ ለከ ፡ ካልኣነ ፡ ሰራዊተ ፡ ህየንቴሆሙ ፡ ወሢም ፡ ህየንቴሆሙ ፡ ተክሎሙ ፡ ለእለ ፡ ሞቱ ፡ ሰራዊትከ ፡ ወአፍራስኒ ፡ ህየንተ ፡ አፍራሲከ ፡ ወሰረገላትኒ ፡ ህየንተ ፡ ሰረገላቲከ ፡ ወንጽብኦሙ ፡ ፍጡነ ፡ ወንመውኦሙ ፡ ወሰምዖሙ ፡ ወገብሩ ፡ ከማሁ ።
²⁶ ወእምዝ ፡ በዓመቱ ፡ ኈለቆሙ ፡ ወልደ ፡ አዴር ፡ ለኵሉ ፡ ሶርያ ፡ ወዐርገ ፡ ውስተ ፡ ኤፌቃ ፡ ከመ ፡ ይትቃተሎሙ ፡ ለእስራኤል ።
²⁷ ወደቂቀ ፡ እስራኤልኒ ፡ ተንሥኡ ፡ ወትቀበልዎሙ ፡ ወተዐየኑ ፡ እስራኤል ፡ አንጻሮሙ ፡ ወከኑ ፡ በኀቤሆሙ ፡ ከመ ፡ ፪መራዕየ ፡ አጣሊ ፡ ወሶርያሰ ፡ መልእዋ ፡ ለምድር ።
²⁸ ወመጽአ ፡ ብእሴ ፡ እግዚአብሔር ፡ ወይቤሎ ፡ ለንጉሠ ፡ እስራኤል ፡ እስመ ፡ ይቤሉ ፡ ሶርያ ፡ አምላከ ፡ አድባር ፡ ውእቱ ፡ እግዚአብሔር ፡ አምላከ ፡ እስራኤል ፡ ወኢኮነ ፡ አምላክ ፡ ቈላት ፡ ወኣገብኦሙ ፡ ለዝንቱ ፡ ኀይሎሙ ፡ ዐቢይ ፡ ውስተ ፡ እዴከ ፡ ወታአምር ፡ ከመ ፡ ውእቱ ፡ እግዚአብሔር ።
²⁹ ወተዐየኑ ፡ እሉ ፡ ቅድመ ፡ እልክቱ ፡ ሰቡዐ ፡ መዋዕለ ፡ ወአመ ፡ ፯ዕለት ፡ ተኣኀዙ ፡ ይትቃተሉ ፡ ወቀተልዎሙ ፡ እስራኤል ፡ ለሶርያ ፡ ፲፼ ፡ በአሐቲ ፡ ዕለት ፡ አጋር ።
³⁰ ወጐዩ ፡ እለ ፡ ተርፉ ፡ ውስተ ፡ ሀገረ ፡ አፌቃ ፡ ወበህየ ፡ ወድቀ ፡ አረፍት ፡ ላዕለ ፡ ክልኤ ፡ ፼ወ፸፻ብእሲ ፡ እለ ፡ ተርፉ ፡ ውስተ ፡ ሀገረ ፡ አፍቃ ፡ ወእምሰጠ ፡ ወልደ ፡ እዴር ፡ ወቦአ ፡ ውስተ ፡ ውሳጥያተ ፡ ጽርሑ ።
³¹ ወይቤሎሙ ፡ ለደቁ ፡ ኣአምር ፡ ከመ ፡ ነገሥተ ፡ እስራኤል ፡ ነገሥት ፡ መሓርያን ፡ እሙንቱ ፡ ወንልበስ ፡ ሠቀ ፡ ወንቅንት ፡ ውስተ ፡ ሐቌነ ፡ ወንትቀጸል ፡ አሕባለ ፡ ውስተ ፡ አርእስቲነ ፡ ወንሖር ፡ ኀሰ ፡ ንጉሠ ፡ እስራኤል ፡ ዮጊ ፡ ያሐይወነ ፡ ነፍሰነ ።
³² ወቀነቱ ፡ ሠቀ ፡ ውስተ ፡ ሐቌሆሙ ፡ ወተቀጸሉ ፡ አሕባለ ፡ ውስተ ፡ ርእሶሙ ፡ ወይቤልዎ ፡ ለንጉሠ ፡ እስራኤል ፡ ይቤለከ ፡ ገብርከ ፡ ወልደ ፡ አዴር ፡ አሕይወነአ ፡ ነፍሰነአ ፡ ወይቤ ፡ ሕያውኑአ ፡ ውእቱ ፡ እኁየ ።
³³ ወአስተቀሰሙ ፡ እሙንቱ ፡ ዕደው ፡ ሶበ ፡ ተናገሮሙ ፡ ሠናየ ፡ ወእምዝ ፡ ይቤልዎ ፡ መጽአ ፡ እኁከ ፡ ወልደ ፡ አዴር ፡ ወይቤሎሙ ፡ ባኡ ፡ ወአምጽእዎ ፡ ወወፅአ ፡ ወልደ ፡ አዴር ፡ ወሖረ ፡ ኀቤሁ ፡ ወነሥኦ ፡ ወአጽዐኖ ፡ ኀቤሁ ፡ ውስተ ፡ ሰረገላቲሁ ።
³⁴ ወይቤሎ ፡ ኣገብእ ፡ ለከ ፡ አህጉረ ፡ እለ ፡ ነሥአ ፡ አቡየ ፡ እምነ ፡ አቡከ ፡ ወትጉበር ፡ ለከ ፡ ምኅላፈ ፡ እንተ ፡ ደማስቆ ፡ ከመ ፡ ገብረ ፡ አቡየ ፡ እንተ ፡ ሰማርያ ፡ ወአነኒ ፡ ተማሒልየ ፡ እፌንወከ ፡ ወእምዝ ፡ ተማሐሉ ፡ ወፈነዎ ።
³⁵ ወ፩ብእሲ ፡ እምውስተ ፡ ደቆሙ ፡ ለነቢያት ፡ ይቤሎ ፡ ለካልኡ ፡ ቅትለኒ ፡ በቃለ ፡ እግዚአብሔር ፡ ወአበዮ ፡ ውእቱ ፡ ብእሲ ፡ ቀቲሎቶ ።
³⁶ ወይቤሎ ፡ እስመ ፡ አበይከ ፡ ሰሚዐ ፡ ቃለ ፡ እግዚአብሔር ፡ ሶበ ፡ ሖርከ ፡ እምኀቤየ ፡ ይቀትለከ ፡ ዐንበሳ ፡ ወሖረ ፡ እምኀቤሁ ፡ ወረከቦ ፡ ዐንበሳ ፡ ወቀተሎ ።
³⁷ ወእምዝ ፡ ረከበ ፡ ካልአ ፡ ብእሴ ፡ ወይቤሎ ፡ ቅትለኒ ፡ ወቀተሎ ፡ ውእቱ ፡ ብእሲ ፡ ወእምድኅረ ፡ ቀተሎ ፡ ቀጥቀጦ ።
³⁸ ወሖረ ፡ ፩ነቢይ ፡ ኀበ ፡ ንጉሠ ፡ እስራኤል ፡ ወቆመ ፡ ውስተ ፡ ፍኖት ፡ ወአሰረ ፡ ተሌሳ ፡ ውስተ ፡ አዕይንቲሁ ።
³⁹ ወእንዘ ፡ የኀልፍ ፡ ጸርኀ ፡ ሎቱ ፡ ለንጉሥ ፡ ኀቤሁ ፡ ወይቤሎ ፡ ለንጉሥ ፡ ጸብአ ፡ ገብርከ ፡ ምስለ ፡ ሰራዊት ፡ ጻባኢት ፡ ወመጽአ ፡ ፩ብእሲ ፡ ኀቤየ ፡ ወአምጽአ ፡ ሊተ ፡ ብእሴ ፡ ወይቤለኒ ፡ ዕቀቦ ፡ ለዝንቱ ፡ ብእሲ ፡ ወእመሰ ፡ ተኀጥአከ ፡ ወአምሰጠከ ፡ ነፍስከ ፡ ህየንተ ፡ ነፍሱ ፡ ወእመ ፡ አኮ ፡ መክሊተ ፡ ብሩር ፡ ታደሉ ፡ ሊተ ።
⁴⁰ ወእምዝ ፡ እስከ ፡ እትመየጥ ፡ ለፌ ፡ ወከሐከ ፡ ኀጣእክዎ ፡ ወይቤሎ ፡ ንጉሠ ፡ እስራኤል ፡ ለሊከ ፡ ቀተልኮ ፡ ወናሁ ፡ ትትዐወቅ ፡ ከመ ፡ ፈያት ፡ አንተ ።
⁴¹ ወበጊዜሃ ፡ አሰሰለ ፡ ተቤሳ ፡ እምዲበ ፡ አዕይንቲሁ ፡ ወአእመሮ ፡ ንጉሥ ፡ ከመ ፡ እምውስተ ፡ ነቢያት ፡ ውእቱ ።
⁴² ወይቤሎ ፡ ውእቱ ፡ ነቢይ ፡ ከመዝ ፡ ይቤ ፡ እግዚአብሔር ፡ እስመ ፡ አውፃእከ ፡ ብእሴ ፡ ትሤሮአ ፡ ነፍስከአ ፡ ትኩንአ ፡ ህየንተአ ፡ ነፍሱአ ፡ ወሕዝብከአ ፡ ህየንተኣ ፡ ሕዝቡ ።
⁴³ ወሖረ ፡ ንጉሠ ፡ እስራኤል ፡ ሕዙኑ ፡ ወትኩዙ ።

http://www.sacred-texts.com/bib/poly/kg1021.htm 21↗     ¹ ወእምዝ ፡ እምድኅረ ፡ ዝንቱ ፡ ነገር ፡ ዐጸደ ፡ ወይን ፡ ቦቱ ፡ ናቡቴ ፡ እስራኤላዊ ፡ ኀበ ፡ ምከያደ ፡ እክል ፡ ዘአካአብ ፡ ንጉሠ ፡ ሰማርያ ።
² ወይቤሎ ፡ አካአብ ፡ ለናቡቴ ፡ ሀበኒ ፡ ዘንተ ፡ ዐጸደ ፡ ወይንከ ፡ ይኩነኒ ፡ ዐጸደ ፡ ሐምል ፡ እስመ ፡ ቅሩብ ፡ ውአቱ ፡ ለቤትየ ፡ ወእሁበከ ፡ ዐጸደ ፡ ወይን ፡ ካልአ ፡ ዘይኄይሶ ፡ ወእመሰ ፡ ትፈቅድ ፡ አሁበከ ፡ ወርቀ ፡ ሤጦ ፡ ለዝንቱ ፡ ዐጸደ ፡ ወይንከ ፡ ወይኩነኒ ፡ ዐጸደ ፡ ሐምል ።
³ ወይቤሎ ፡ ናቡቴ ፡ ለአካአብ ፡ ኢያሞጽእ ፡ ሊተ ፡ እግዚአብሔር ፡ በዘአሁበከ ፡ ርስትየ ፡ ዘእበሙያ ።
⁴ ወተከዘ ፡ አካአብ ፡ ወሖረ ፡ ወሰከበ ፡ ውስተ ፡ ምስካቢሁ ፡ ወተከድነ ፡ ገጾ ፡ ወኢበልዐ ፡ እክለ ።
⁵ ወቦአት ፡ ኢያዛቤል ፡ ብእሲቱ ፡ ኀቤሁ ፡ ወትቤሎ ፡ ምንተ ፡ ኮንከ ፡ ዘኢትበልዕ ፡ እክለ ፡ ወምንተ ፡ ያቴክዘከ ።
⁶ ወይቤላ ፡ እስመ ፡ ተናገርክዎ ፡ ለናቡቴ ፡ እስራኤላዊ ፡ ወእቤሎ ፡ ሀበኒ ፡ ዐጸደ ፡ ወይንከ ፡ በሤጡ ፡ በወርቅ ፡ ወእመኒ ፡ ትፈቅድ ፡ እሁበከ ፡ ካልአ ፡ ዐጸደ ፡ ወይን ፡ ህየንቴሁ ፡ ወይቤለኒ ፡ ኢይሁበከ ፡ ርስተ ፡ አበውየ ።
⁷ ወትቤሎ ፡ ኢያዜቤል ፡ ብእሲቱ ፡ አንተኑ ፡ አንከ ፡ ይእዜ ፡ ከመዝ ፡ ትረሲ ፡ ንጉሦሙ ፡ ለእስራኤል ፤ ተንሥእ ፡ ብላዕ ፡ እክለ ፡ ወአጽንዕ ፡ ርእሰከ ፡ ወእሁበከ ፡ አነ ፡ ዐጸደ ፡ ወይኑ ፡ ለናቡቴ ፡ እስራኤላዊ ።
⁸ ወጸሐፈት ፡ መጽሐፈ ፡ በስመ ፡ አካአብ ፡ ወኀተመት ፡ በማኅተሙ ፡ ወፈነወታ ፡ ለይእቲ ፡ መጽሐፍ ፡ ኀበ ፡ ሊቃናተ ፡ ይእቲ ፡ ሀገር ፡ ወኀበ ፡ ዐበይተ ፡ ውእቱ ፡ ብሔር ፡ እለ ፡ ይነብሩ ፡ ምስለ ፡ ናቡቴ ።
⁹ ወከመዝ ፡ ይብል ፡ ቃላ ፡ ለይእቲ ፡ መጽሐፍ ፡ ጹሙአ ፡ ጾመ ፡ ወአንብርዎአ ፡ ለናቡቴአ ፡ ቅድመአ ፡ ሕዝብአ ።
¹⁰ ወአቅሙአ ፡ ሎቱአ ፡ ቅድሜሁአ ፡ ክሌኤቱአ ፡ ዕደውአ ፡ ውሉደ ፡ ዐመፃአ ፡ ወይኩኑአ ፡ ስምዕአ ፡ ላዕሌሁአ ፡ ወይመልዎ ፡ ባረከህ ፡ አ ፡ ለእግዚአብሔርአ ፡ ወለንጉሥኒ ፡ ወአውፅእዎአ ፡ አፍአ ፡ ወውግርዎአ ፡ ወይሙትአ ።
¹¹ ወገብሩ ፡ ሰብአ ፡ ይእቲ ፡ ሀገር ፡ ወዐበይቶሙኒ ፡ ወሊቃናቲሆሙኒ ፡ እለ ፡ ይነብሩ ፡ ውስተ ፡ ይእቲ ፡ ሀገር ፡ በከመ ፡ ለአከት ፡ ሎሙ ፡ ኢያዛቤል ።
¹² ወሰበኩ ፡ ጾመ ፡ ወአንበርዎ ፡ ለናቡቴ ፡ ቅድመ ፡ ሕዝብ ።
¹³ ወቦኡ ፡ ክልኤሆሙ ፡ ዕደው ፡ ደቂቀ ፡ ዐመፃ ፡ ወቆሙ ፡ ቅድሜሁ ፡ ወኮኑ ፡ ስምዐ ፡ ላዕሌሁ ፡ ወይቤልዎ ፡ ባረካሁ ፡ ለእግዚአብሔር ፡ ወለንጉሥኒ ፡ ወአውጽእዎ ፡ አፍአ ፡ እምነ ፡ ሀገር ፡ ወወገርዎ ፡ ወቀተልዎ ።
¹⁴ ወለአኩ ፡ ኀበ ፡ ኢያዛቤል ፡ እንዘ ፡ ይብሉ ፡ ወገርናሁአ ፡ ለናቡቴ ፡ ወቀተልናሁአ ።
¹⁵ ወሶበ ፡ ሰምዐት ፡ ኢያዛቤል ፡ ትቤሎ ፡ ለአካአብ ፡ ተንሥእ ፡ ተዋረሶ ፡ ዐጸደ ፡ ወይኑ ፡ ለናቡቴ ፡ እስራኤላዊ ፡ ዘአበየ ፡ ውሂቦተከ ፡ በሤጡ ፡ እስመ ፡ ሞተ ፡ ናቡቴ ፡ ወኢኮነ ፡ ሕያወ ።
¹⁶ ወሶበ ፡ ሰምዐ ፡ አካአብ ፡ ከመ ፡ ሞተ ፡ ናቡቴ ፡ ሠጠጠ ፡ አልባሲሁ ፡ ወለብሰ ፡ ሠቀ ፡ ወእምድኅረ ፡ ዝንቱ ፡ ተንሥአ ፡ አካአብ ፡ ወወረደ ፡ ውስተ ፡ ዐጸደ ፡ ወይኑ ፡ ለናቡቴ ፡ እስራኤላዊ ፡ ከመ ፡ ይትዋረሶ ።
¹⁷ ወይቤሎ ፡ እግዚአብሔር ፡ ለኤልያስ ፡ ትስብያዊ ፤
¹⁸ ተንሥእ ፡ ረድ ፡ ተቀበሎ ፡ ለአካአብ ፡ ንጉሠ ፡ እስራኤል ፡ ዘሰማርያ ፡ ናሁ ፡ ሀለወ ፡ ውስተ ፡ ዐጸደ ፡ ወይኑ ፡ ለናቡቴ ፡ ወረደ ፡ ህየ ፡ ከመ ፡ ይትዋረሶ ።
¹⁹ ወበሎ ፡ ከመዝ ፡ ይቤ ፡ እግዚአብሔር ፡ በከመ ፡ አንተ ፡ ቀተልኮእ ፡ ወትወርሶአ ፡ በበይነ ፡ ዝንቱአ ፡ ከመዝአ ፡ ይቤአ ፡ እግዚአብሔርአ ፡ በኵሉአ ፡ መካንአ ፡ ኀበአ ፡ ለሐሰአ ፡ ከለባትአ ፡ ወአዝእብትአ ፡ ደሞአ ፡ ለናቡቴአ ፡ በህየአ ፡ ይልሕሱአ ፡ ከለባትአ ፡ ደመከአ ፡ ወዘማትአ ፡ ይትኀፀባአ ፡ በደምከ ።
²⁰ ወይቤሎ ፡ አካአብ ፡ ለኤልያስ ፡ ረከብከኒኑ ፡ ፀርየ ፡ ወይቤሎ ፡ ረከብኩከ ፡ እስመ ፡ እኩየ ፡ ገበርከ ፡ ቅድመ ፡ እግዚአብሔር ፡ ከመ ፡ ታምዕዖ ።
²¹ ከመዝ ፡ ይቤ ፡ እግዚአብሔር ፡ ናሁአ ፡ አነአ ፡ ኣመጽእአ ፡ እኪተአ ፡ ላዕሌከአ ፡ ወኣነድድአ ፡ እሳተአ ፡ እንተአ ፡ ድኅሬከአ ፡ ወእሤርዎአ ፡ ለአካአብአ ፡ እስከ ፡ ዘያስተአዝብአ ፡ ኀበ ፡ አረፍትአ ፡ ወእለአ ፡ ሀለዉአ ፡ እምኔሆሙአ ፡ ውስተአ ፡ እስራኤል ፡ ወእለኒ ፡ ኢሀለዉአ ።
²² ወእሬስዮአ ፡ ለቤተ ፡ አካአብአ ፡ ከመ ፡ ቤተ ፡ ኢዮራብዓምአ ፡ ወልደ ፡ ናባጥ ፡ ወከመ ፡ ቤተ ፡ [በአስ ፡] ወልደ ፡ አኪያ ፡ በእንተ ፡ ኀጢአትከአ ፡ ዘአምዓዕከኒአ ፡ ወአስሐትኮሙአ ፡ ለእስራኤል ።
²³ ወለኢያዛሌልኒ ፡ ይቤላ ፡ እግዚአብሔር ፡ ከለባትአ ፡ ይብልዑአ ፡ ሥጋሃ ፡ በኀበ ፡ አረፍትአ ፡ እስራኤልአ ።
²⁴ ወበድኑ ፡ ለአካብአ ፡ ዘውስተ ፡ ሀገርአ ፡ ከለባትአ ፡ ይብልዕዎአ ፡ ወበድኑአ ፡ ዘውስተ ፡ ሐቅልአ ፡ አዕዋፈ ፡ ሰማይአ ፡ ይብልዕዎአ ።
²⁵ ወባሕቱ ፡ እኩየ ፡ ገብረ ፡ አካአብ ፡ ቅድመ ፡ እግዚአብሔርአ ፡ እስመ ፡ አስሐተቶ ፡ ኢያዛቤል ፡ ብእሲቱ ።
²⁶ ወረኵሰ ፡ ፈድፋደ ፡ እስመ ፡ ተለወ ፡ ወሖረ ፡ በርኵስ ፡ ከመ ፡ ኵሉ ፡ ዘገብሩ ፡ አሞሬዎን ፡ እለ ፡ ሠረዎሙአ ፡ እግዚአብሔርአ ፡ እምቅድመ ፡ ገጾሙ ፡ ለእስራኤል ።
²⁷ ወደንገጸ ፡ አካአብ ፡ እምነ ፡ ውእቱ ፡ ቃል ፡ እምነ ፡ ቅድመ ፡ እግዚአብሔር ፡ ወሠጠጠ ፡ አልባሲሁ ፡ ወሖረ ፡ እንዘ ፡ ይበኪ ፡ በበይነ ፡ ውእቱ ፡ ቃል ፡ እምነ ፡ ቅድመ ፡ እግዚአብሔር ፡ ወለብሰ ፡ ሠቀ ፡ ውስተ ፡ ሥጋሁ ፡ ወጾመ ፡ ወቀነተ ፡ ሠቀ ፡ አመ ፡ ቀተሎ ፡ ለናቡቴ ፡ እስራኤላዊ ።
²⁸ ወኮነ ፡ ቃለ ፡ እግዚአብሔር ፡ በእደ ፡ ኤልያስ ፡ ገብሩ ፡ በእንተ ፡ አካአብ ፡ ወይቤሎ ፡ እግዚአብሔር ፤ ርኢከኑ ፡ ከመ ፡ ደንገጸ ፡ አካአብ ፡ እምቅድሜየ ፤ ኢያምጽእ ፡ እኪተ ፡ በመዋዕሊሁ ፡ ወበመዋዕለ ፡ ወልዱ ፡ ኣምጽእ ፡ እኪተ ።

http://www.sacred-texts.com/bib/poly/kg1022.htm 22↗     ¹ ወነበረ ፡ ውስተ ፡ ሰማርያ ፡ ፫ዓመተ ፡ ወአልቦ ፡ ፀብአ ፡ ማእከለ ፡ ሶርያ ፡ ወማእከለ ፡ እስራኤል ።
² ወእምዝ ፡ አመ ፡ ፫ዓመት ፡ ወረደ ፡ ዮሳፍጥ ፡ ንጉሠ ፡ ይሁዳ ፡ ኀበ ፡ ንጉሠ ፡ እስራኤል ።
³ ወይቤሎሙ ፡ ንጉሠ ፡ እስራኤል ፡ ለደቁ ፡ ታአምሩኑ ፡ ከመ ፡ እንቲአነ ፡ ይእቲ ፡ ሬማት ፡ እንተ ፡ ገለዓድ ፡ ወናርምም ፡ ንሕነሰ ፡ ከመ ፡ ኢንንሣእ ፡ እምእዴሁ ፡ ለንጉሠ ፡ ሶርያ ።
⁴ ወይቤሎ ፡ ንጉሠ ፡ እስራኤል ፡ ለዮሳፍጥ ፡ ተዐርግኑ ፡ ምስሌየ ፡ ውስተ ፡ ሬማት ፡ ዘገለዓድ ፡ ንጽባእ ፡ ወይቤሎ ፡ ዮሳፍጥ ፡ አነኒ ፡ ከማከ ፡ ወአሕዛብየኒ ፡ ከመ ፡ አሕዛብከ ፡ ወአፍራስየኒ ፡ ከመ ፡ አፍራሲከ ።
⁵ ወይቤሎ ፡ ዮሳፍጥ ፡ ንጉሠ ፡ ይሁዳ ፡ ለንጉሠ ፡ እስራኤል ፡ ተሰኣሉ ፡ ለነ ፡ ኀበ ፡ እግዚአብሔር ፡ ዮም ።
⁶ ወአስተጋብኦሙ ፡ ንጉሠ ፡ እስራኤል ፡ ለኵሎሙ ፡ ነቢያት ፡ ፬፻ብእሴ ፡ ወይቤሎሙ ፡ ንጉሥ ፡ እሖርኑ ፡ እጽባእ ፡ ሬማተ ፡ ዘገለዓድ ፡ አው ፡ እኅድግኑ ፡ ወይቤልዎ ፡ ዕርግ ፡ ወያገብኦሙ ፡ እግዚአብሔር ፡ ውስተ ፡ እዴከ ።
⁷ ወይቤሎ ፡ ዮሳፍጥ ፡ ለንጉሠ ፡ እስራኤል ፡ አልቦኑ ፡ ዝየ ፡ ነቢየ ፡ እግዚአብሔር ፡ ወንስአሎ ፡ ቃለ ፡ እግዚአብሔር ።
⁸ ወይቤሎ ፡ ንጉሠ ፡ እስራኤል ፡ ሀለወ ፡ ፩ብእሲ ፡ ዘይሴአልዎ ፡ ቃለ ፡ እግዚአብሔር ፡ ወባሕቱ ፡ ጸላእክዎ ፡ አንሰ ፡ እስመ ፡ ኢይነብብ ፡ ሠናየ ፡ ላዕሌየ ፡ እንበለ ፡ እኪት ፡ ሚክያስ ፡ ወልደ ፡ ኢያሚያስ ፡ ወይቤሎ ፡ ንጉሠ ፡ ይሁዳ ፡ ዮሳፍጥ ፡ ኢትበል ፡ ከመዝ ፡ ንጉሥ ።
⁹ ወጸውዐ ፡ ንጉሠ ፡ እስራኤል ፡ ፩እምውስተ ፡ ኅጽዋኒሁ ፡ ወይቤሎ ፡ ሖር ፡ አፍጥን ፡ ወጸውዖ ፡ ለሚክያስ ፡ ወልደ ፡ ኢያሚያስ ።
¹⁰ ወይነብሩ ፡ ክልኤሆሙ ፡ ውስተ ፡ መናብርቲሆሙ ፡ ንጉሠ ፡ እስራኤል ፡ ወዮሳፍጥ ፡ ንጉሠ ፡ ይሁዳ ፡ ውስተ ፡ አንቀጸ ፡ ሰማርያ ፡ ምስለ ፡ ንዋየ ፡ ሐቅሎሙ ፡ ወኵሎሙ ፡ ነቢያት ፡ ተነበዩ ፡ ቅድመ ፡ ንጉሥ ።
¹¹ ወገብረ ፡ ሎቱ ፡ ሴዴቅያስ ፡ ወልደ ፡ ከሐና ፡ አቅርንተ ፡ ዘኀጺን ፡ ወይቤሎ ፡ ከመዝ ፡ ይቤ ፡ እግዚአብሔር ፡ በዝንቱአ ፡ አቅርንትአ ፡ ትወግኦሙአ ፡ ለሶርያ ፡ እስከ ፡ ታኀልቆሙአ ።
¹² ወኵሎሙ ፡ ነቢያት ፡ ከመዝ ፡ ተነበዩ ፡ ወይቤልዎ ፡ ዕርግ ፡ ውስተ ፡ ሬማት ፡ ዘገለዓድ ፡ ወይረድአከ ፡ እግዚአብሔር ፡ ወያገብኦሙ ፡ ለሶርያ ፡ ውስተ ፡ እዴከ ፡ ወለንጉሦሙ ።
¹³ ወወዓሊ ፡ ዘሖረ ፡ ይጸውዖ ፡ ለሚክያስ ፡ ወይቤሎ ፡ ናሁ ፡ ኵሎሙ ፡ ነቢያት ፡ ተነበዩ ፡ ሠናየ ፡ ለንጉሥ ፡ በ፩አፍ ፡ ወአንተኒ ፡ ኩን ፡ ከመ ፡ አሐዱ ፡ እምኔሆሙ ፡ ወአኅብር ፡ በቃሎሙ ፡ ወንብብ ፡ ሠናየ ።
¹⁴ ወይቤሎ ፡ ምኪያስ ፡ ሕያው ፡ እግዚአብሔር ፡ ከመ ፡ ዘነገረኒ ፡ እግዚአብሔር ፡ እነግርሙ ።
¹⁵ ወበጽሐ ፡ ኀበ ፡ ንጉሥ ፡ ወይቤሎ ፡ ንጉሥ ፡ ሚክያስ ፡ እዕርግኑ ፡ ውስተ ፡ ሬማት ፡ ዘገለዓድ ፡ እጽብኦሙ ፡ አው ፡ ኢይጽብኦሙ ፡ ወይቤሎ ፡ ዕርግ ፡ ወይረድአከ ፡ እግዚአብሔር ።
¹⁶ ወይቤሎ ፡ ንጉሥ ፡ ሚመጠነ ፡ ኣምሕለከ ፡ ከመ ፡ ትንግረኒ ፡ ጽድቀ ፡ በስሙ ፡ ለእግዚአብሔር ።
¹⁷ ወይቤ ፡ ሚክያስ ፡ ከመዝ ፡ ርኢክዎ ፡ ለእስራኤል ፡ ኵሎሙ ፡ ዝርዋን ፡ ውስተ ፡ አድበር ፡ ከመ ፡ መርዔት ፡ እንተ ፡ አልባቲ ፡ ኖላዌ ፡ ወይቤ ፡ እእግዚአብሔር ፡ አምላኮሙ ፡ ለእሉ ፡ ግብኡአ ፡ ኵልክሙአ ፡ ወእትዉ ፡ ውስተ ፡ አብያቲክሙ ፡ በሰላምአ ።
¹⁸ ወይቤ ፡ ንጉሠ ፡ እስራኤል ፡ ለዮሳፍጥ ፡ ንጉሠ ፡ ይሁዳ ፡ ኢይቤለከኑ ፡ ኢይትኔበይ ፡ ላዕሌየ ፡ ሠናያተ ፡ ዝንቱ ፡ ዘእንበለ ፡ እኪት ።
¹⁹ ወይቤሎ ፡ ሚክያስ ፡ አኮ ፡ ከማሁ ፡ አኮኑ ፡ አነ ፡ ውእቱ ፡ ዘሰማዕኩ ፡ ቃለ ፡ እግዚአብሔር ፡ አኮ ፡ ከማሁ ፤ ርኢክዎ ፡ ለአምላከ ፡ እስራኤል ፡ እንዘ ፡ ይነብር ፡ ዲበ ፡ መንበሩ ፡ ወኵሎሙ ፡ መላእክተ ፡ ሰማይ ፡ ይቀውሙ ፡ እምየማኑ ፡ ወእምፀጋሙ ።
²⁰ ወይቤ ፡ እግዚአብሔር ፡ መኑ ፡ ያስሕቶ ፡ ለአካአብ ፡ ንጉሠ ፡ እስራኤል ፡ ከመ ፡ ይሙት ፡ ዐሪጎ ፡ ሬማተ ፡ ዘገለዓድ ፡ ወተባሀሉ ፡ በበይናቲሆሙ ፡ አንተ ፡ ወአንተ ።
²¹ ወእምዝ ፡ ወፅአ ፡ መንፈስ ፡ ወቆመ ፡ ቅድመ ፡ እግዚአብሔር ፡ ወይቤ ፡ አነ ፡ ኣስሕቶ ።
²² ወይቤሎ ፡ እግዚአብሔር ፡ በምንት ፡ ታስሕቶ ፡ ወይቤ ፡ አሐውር ፡ ወእከውኖሙ ፡ መንፈሰ ፡ ሐሰት ፡ ውስተ ፡ አፉሆሙ ፡ ለነቢያቲሁ ፡ ወይቤሎ ፡ ታስሕቶ ፡ ትክል ፡ አስሕቶቶ ፡ ሖር ፡ ወግበር ፡ ወገብረ ፡ ከማሁ ።
²³ ወይእዜኒ ፡ ናሁ ፡ ፈነወ ፡ እግዚአብሔር ፡ መንፈሰ ፡ ሐሰት ፡ ውስተ ፡ አፉሆሙ ፡ ለነቢያቲከ ፡ እሉ ፡ ወእግዚአብሔር ፡ እኪተ ፡ ነበበ ፡ ላዕሌከ ።
²⁴ ወመጽአ ፡ ሴዴቅያስ ፡ ወልደ ፡ ከናአን ፡ ወጸፍዖ ፡ ውስተ ፡ መልታሕቱ ፡ ወይቤሎ ፡ አይኑ ፡ ውእቱ ፡ መንፈሰ ፡ እግዚአብሔር ፡ ዘተናገረከ ።
²⁵ ወይቤሎ ፡ ሚክያስ ፡ ሀለወከ ፡ ታእምር ፡ [አ]መ ፡ ትበውእ ፡ ውስተ ፡ ውሳጢተ ፡ ውሳጢት ፡ ወትትኀበእ ።
²⁶ ወይቤ ፡ ንጉሠ ፡ እስራኤል ፡ ንሥእዎ ፡ ለሚክያስ ፡ ወሰድዎ ፡ ኀበ ፡ አሞን ፡ መልአከ ፡ ሀገረ ፡ ሰማርያ ፡ ወይቤሎ ፡ ለኢዮአስ ፡ ወልደ ፡ ንጉሥ ፤
²⁷ ሞቅሕዎ ፡ ለዝንቱ ፡ ወአርኅብዎ ፡ ወአጽምእዎ ፡ እስከ ፡ አመ ፡ አአቱ ፡ በሰላም ።
²⁸ ወይቤሎ ፡ ሚክያስ ፡ ለእመ ፡ አቶከ ፡ አንተ ፡ ወቦእከ ፡ በሰላም ፡ ኢተናገረኒ ፡ ሊተ ፡ እግዚአብሔር ።
²⁹ ወዐርገ ፡ ንጉሠ ፡ እስራኤል ፡ ወዮሳፍጥ ፡ ንጉሠ ፡ ይሁዳ ፡ ምስሌሁ ፡ ውስተ ፡ ሬማት ፡ ዘገለዓድ ።
³⁰ ወይቤለሙ ፡ [ንጉሠ ፡ እስራኤል ፡ ለዮሳፍጥ ፡] ንጉሠ ፡ ይሁዳ ፡ እትገ[ል]በብ ፡ ወእባእ ፡ እትቃተል ፡ ወአንተ ፡ ልበስ ፡ አልባስየ ፡ ወተገልበበ ፡ ንጉሠ ፡ እስራኤል ፡ ወቦአ ፡ ይትቃተል ።
³¹ ወአዘዞሙ ፡ ንጉሠ ፡ ሶርያ ፡ ለመላእክተ ፡ ሰረገላቲሁ ፡ ፴ወ፪ወይቤሎሙ ፡ ኢትትቃተሉ ፡ ኢምስለ ፡ ንኡሶሙ ፡ ወኢምስለ ፡ ዐቢዮሙ ፡ ዘእንበለ ፡ ንጉሠ ፡ እስራኤል ፡ ለባሕቲቱ ።
³² ሶበ ፡ ርእይዎ ፡ እልክቱ ፡ መላእክተ ፡ ሰረገላቲሁ ፡ ለዮሳፍዊ ፡ ንጉሠ ፡ ይሁዳ ፡ ወይቤሉ ፡ ንጉሠ ፡ እስራኤል ፡ ይመስል ፡ ዝንቱ ፡ ወፀገትዎ ፡ ይቅትልዎ ፡ ወጸርኀ ፡ ዮሳፍጥ ።
³³ ወሶበ ፡ አእመሩ ፡ መላእክተ ፡ ሰረገላቲሁ ፡ ከመ ፡ ኢኮነ ፡ ንጉሠ ፡ እስራኤል ፡ ውእቱ ፡ ኀደግዎ ፡ ወገብኡ ።
³⁴ ወመሰከ ፡ ቀስቶ ፡ ፩እምውስቴቶሙ ፡ በኀይሉ ፡ ወነደፎ ፡ ለንጉሠ ፡ እስራኤል ፡ ማእከለ ፡ ሰንቡዑ ፡ ማእከለ ፡ እንግድዓሁ ፡ ወይቤሎ ፡ ለ፩እምውስተ ፡ ሐራሁ ፡ ተመየጥ ፡ ወንሥአኒ ፡ አውፅአኒ ፡ እምውስተ ፡ ቀትል ፡ እስመ ፡ ተነደፍኩ ።
³⁵ ወተሰብረ ፡ ሰራዊቶሙ ፡ ይእተ ፡ አሚረ ፡ ወለንጉሥሰ ፡ አንበርዎ ፡ ውስተ ፡ ሰረገላሁ ፡ እምነግህ ፡ እስከ ፡ ሰርክ ፡ ወይትከዐው ፡ ደሙ ፡ እምውስተ ፡ ቍስለ ፡ ንድፈቱ ፡ ውስተ ፡ ከርሠ ፡ ሰረገላቲሁ ፡ ወሞተ ፡ ፍና ፡ ሰርክ ፡ በቅድሜሆሙ ፡ ለሶርያ ።
³⁶ ወወፅአ ፡ ዐዋዲ ፡ ዕርበተ ፡ ፀሓይ ፡ ወዖደ ፡ ዐዋዲ ፡ ወይቤ ፡ እተዉአ ፡ ኵልክሙአ ፡ አህጉሪክሙአ ፡ ወእተዉአ ፡ በሓውርቲክሙአ ፡ እስመአ ፡ ሞተአ ፡ ንጉሥአ ።
³⁷ ወሶበ ፡ በጽሑ ፡ ሰማርያ ፡ ቀበርዎ ፡ ለንጉሥ ፡ ውስተ ፡ ሰማርያ ።
³⁸ ወአውፅኡ ፡ ሰረገላቲሁ ፡ አፍአ ፡ እምሀገረ ፡ ሰማርያ ፡ ወለሐሱ ፡ ደሞ ፡ ከለባት ፡ ወአዝእብት ፡ ወዘማትኒ ፡ ተኀፅባ ፡ በውእቱ ፡ ማይ ፡ በከመ ፡ ቃለ ፡ እግዚአብሔር ፡ ዘነበበ ።
³⁹ ወኵሉ ፡ ነገሩ ፡ ለአካአብ ፡ ወኵሉ ፡ ዘገብረ ፡ ወቤተኒ ፡ ዘቀርነ ፡ ነጌ ፡ ዘሐነጸ ፡ ናሁ ፡ ዝንቱ ፡ ውእቱ ፡ ዘጽሑፍ ፡ ውስተ ፡ መጽሐፈ ፡ ነቢያቲሁ ፡ በመዋዕሊሆሙ ፡ ለነገሥቶሙ ፡ ለእስራኤል ።
⁴⁰ ወሰከበ ፡ አካአብ ፡ ምስለ ፡ አበዊሁ ፡ ወነግሠ ፡ አካዝያስ ፡ ወልዱ ፡ ህየንቴሁ ፤
⁴¹ ወዮሳፍጥ ፡ ወልደ ፡ አሳ ፡ ለይሁዳ ፤ አመ ፡ ፬ዓመተ ፡ መንግሥቱ ፡ ለአካአብ ፡ ነግሠ ፡ ዮሳፍጥ ፡ ወልደ ፡ አሳ ፤
⁴² ፴ወ፭ዓመ[ቱ ፡ በ]መንግሥቱ ፤ ፳ወ፭ዓመተ ፡ ነግሠ ፡ በኢየሩሳሌም ፡ ወስማ ፡ ለእሙ ፡ ሐዜባ ፡ ወለተ ፡ ሴሜይ ።
⁴³ ወሖረ ፡ በፍኖተ ፡ አሳ ፡ አቡሁ ፡ ወኢተግሕሠ ፡ እምኔሃ ፡ ወገብረ ፡ ጽድቀ ፡ ቅድመ ፡ አዕይንቲሁ ፡ ለእግዚአብሔር ።
⁴⁴ ወባሕቱ ፡ ኢአሰሰለ ፡ አብያተ ፡ አማልከቲሆመ ፤ ዓዲሆሙ ፡ የዐጥኑ ፡ ሕዝብ ፡ ወይሠውዑ ፡ በውስተ ፡ አድባር ።
⁴⁵ ወተሰናአወ ፡ ዮሳፍጥ ፡ ምስለ ፡ ንጉሠ ፡ እስራኤል ።
⁴⁶ ወኵሉ ፡ ነገሩ ፡ ለዮሳፍጥ ፡ ወኀይሉ ፡ ወኵሉ ፡ ዘገብረ ፡ ናሁ ፡ ዝንቱ ፡ ውእቱ ፡ ዘጽሑፍ ፡ ውስተ ፡ መጽሐፈ ፡ ነቢያት ።
⁵¹ ወዮሳፍጥ ፡ ሰከበ ፡ ምስለ ፡ አበዊሁ ፡ ወተቀብረ ፡ ውስተ ፡ ሀገረ ፡ ዳዊት ፡ ወነግሠ ፡ ኢዮራም ፡ ወልዱ ፡ ህየንቴሁ ።
⁵² ወአካዝያስ ፡ ወልደ ፡ አካአብ ፡ ነግሠ ፡ ለእስራኤል ፡ በሰማርያ ፤ አመ ፡ ፲ወ፰ዓመተ ፡ መንግሥቱ ፡ ለዮሳፍጥ ፡ ንጉሠ ፡ ይሁዳ ፡ ነግሠ ፡ ለእስራል ፡ ክልኤተ ፡ ዓመተ ።
⁵³ ወገብረ ፡ እኩየ ፡ ቅድመ ፡ እግዚአብሔር ፡ ወሖረ ፡ በፍኖተ ፡ አቡሁ ፡ አካአብ ፡ ወበፍኖተ ፡ ኤዛቤል ፡ እሙ ፡ ወበኀጢአተ ፡ ኢዮራብዓም ፡ ወልደ ፡ ናባጥ ፡ ዘአስሐቶሙ ፡ ለእስራኤል ።
⁵⁴ ወተቀንየ ፡ ለበለዓም ፡ ወሰገደ ፡ ሎሙ ፡ ወአምዕዖ ፡ ለእግዚአብሔር ፡ አምላከ ፡ እስራኤል ፡ ከመ ፡ ኵሎሙ ፡ እለ ፡ ገብሩ ፡ እምቅድሜሁ ።
⁵⁵ ወዐለውዎሙ ፡ ሞአብ ፡ ለእስራኤል ፡ እምድኅረ ፡ ሞተ ፡ አካአብ ።