The Preaching of St Peter

ንቅድም፡ በአኰቴተ፡ እግዚአብሔር፡ ወበረድኤቱ፡ ለእግዚአብሔር፡ ወበስብከቱ፡ ለብፁዕ፡ ወቅዱስ፡ ጴጥሮስ፡ ኅሩይ፡ ሊቀ፡ ሐዋርያት፡ ወስብከቱ፡ ወዜናሁ፡ ለአሕዛብ፡ እለ፡ ሀለዉ፡ ሀገረ፡ ሮሜ፡ ጸሎቱ፡ ትዕቀበነ፡ ለዓለመ፡ ዓለም፡ አሜን።

ወሶበ፡ ቦአ፡ ጴጥሮስ፡ ውስተ፡ ሀገረ፡ ሮሜ፡ ርእሰ፡ መንበረ፡ ነገሥተ፡ ሮሜ፡ ወቦአ፡ ኀበ፡ ተጥራቤሎን፡ ዘየዐቢ፡ መንበር፡ ዛቲ፡ ፬፡ አናቅጽ፡ ኀበ፡ ይትጋብኡ፡ መኳንንት፡ ወኵሎሙ፡ ዐበይተ፡ መንግሥት፡ ወከልሐ፡ በዐቢይ፡ ቃል፡ ከመዝ፡ እንዘ፡ ይብል። ብፁዓን፡ መሓርያን፡ እስመ፡ ሎሙኒ፡ ይምሕርዎሙ። ብፁዓን፡ ንጹሓነ፡ ልብ፡ እስመ፡ እሙንቱ፡ ይሬኢይዎ፡ ለእግዚአብሔር። ብፁዓን፡ እለ፡ ንጹሓን፡ በሥጋሆሙ፡ እስመ፡ እሉ፡ እሙንቱ፡ ይከውኑ፡ ማኅደሮ፡ ለመንፈስ፡ ቅዱስ። ብፁዓን፡ ገባርያነ፡ ሰላም፡ እስመ፡ እሙንቱ፡ ውሉደ፡ እግዚአብሔር፡ ይሰመዩ። ብፁዓን፡ እለ፡ ይሁብዎሙ፡ ለምስኪናን፡ እስመ፡ እሙንቱ፡ ይሌቅሕዎ፡ ለእግዚአብሔር። ብፁዓን፡ እለ፡ ቦሙ፡ ብእሲተ፡ ወይከውኑ፡ ከመ፡ ዘአልቦሙ፡ ብእሲተ፡ እስመ፡ እሙንቱ፡ ይወርሱ፡ ሕይወተ፡ ዘለዓለም። ወሶበ፡ ሰምዑ፡ ውእተ፡ ቃለ፡ እንዘ፡ የዐውድ፡ እምአርባዕቱ፡ አዕማድ፡ እለ፡ በአርባዕቱ፡ ማእዝንተ፡ መንበር፡ እንዘ፡ ይጸርኅ፡ ከመዝ፡ ወይቤሉ፡ አዕማደ፡ አእባን፡ አሜን። ወእምዝ፡ ነበረ፡ ቃል፡ ውስተ፡ ምስማዐ፡ ጉቡኣን። ወሀሎ፡ ብእሲ፡ ዘቦቱ፡ ሰይጣነ፡ እምሰብዓ፡ ዓመት፡ ወአውደቆ፡ በይእቲ፡ ሰዓት፡ በማእከለ፡ ጉቡኣን። ወወፅአ፡ እምኔሁ፡ እንዘ፡ ይሬእይዎ፡ ኵሎሙ፡ ጉቡኣን፡ በእንተ፡ ሰሚዖቱ፡ ለውእቱ፡ ቃል፡ ዘወፅአ፡ እምእላንቱ፡ አዕማድ። ወበእንተዝ፡ ደንገፁ፡ መኳንንት፡ ወፈርሁ፡ ዐቢየ፡ ፍርሀተ፡ ወአተዉ፡ ማኃድሪሆሙ፡ እንዘ፡ ያነክሩ፡ ወነገሩ፡ እለ፡ ሰምዑ፡ ኵሎ፡ አሐዱ፡ አሐዱ፡ ለለ፡ ብእሲቱ። ወሀሎ፡ አሐዱ፡ እምውስተ፡ መኳንንት፡ መኰንን፡ ዘስሙ፡ ቅውስጦስ፡ ዘቦቱ፡ ብእሲተ፡ ዘስማ፡ አክሮስያ፡ ወይቤላ፡ ብእሲሃ፡ ኦአክሮስያ፡ ኢያእመርኪኑ፡ ዘኮነ፡ ዮም። ወትቤሎ፡ ምንትኑ፡ ወአውሥኣ፡ እንዘ፡ ይብላ፡ ሀሎነ፡ ዮም፡ ጉቡኣኒነ፡ ውስተ፡ ተጥራቤሎን፡ አነ፡ ወጉቡኣን፡ መኳንንት፡ ወኵሉ፡ ሊቃነ፡ መንግሥት። ወበጽሐ፡ ማእከሌነ፡ ብእሲ፡ ዘስሙ፡ ጴጥሮስ፡ ወነገረነ፡ ነገረ፡ ዘኢሰማዕነ፡ ዘከማሁ፡ ኢንሕነ፡ ወኢአበዊነ፡ እስከ፡ ይትናገሩ፡ አዕማደ፡ አእባን፡ ለአውሥኦት። ወሀሎ፡ ውስተ፡ መንበር፡ ብእሲ፡ ዘቦቱ፡ ሰይጣነ፡ እምሰብዓ፡ ዓመት፡ ወወፅአ፡ እምኔሁ፡ ሰይጣን፡ ሶበ፡ ይብሉ፡ አዕማደ፡ አእባን፡ አሜን። ወአውሥአቶ፡ ብእሲቱ፡ እንዘ፡ ትብሎ፡ ኦእግዚእየ፡ ንግረኒ፡ ኵሎ፡ ዘሰማዕከ፡ እምቃሉ፡ ለጴጥሮስ፡ ወአነሂ፡ ከመ፡ እስማዕ። ወአውሥኣ፡ ብእሲሃ፡ ወይቤላ፡ እስመ፡ ይቤ፡ ብፁዓን፡ ንጹሓነ፡ ልብ፡ እስመ፡ እሙንቱ፡ ይሬኢይዎ፡ ለእግዚአብሔር። ብፁዓን፡ መሓርያን፡ እስመ፡ ሎሙኒ፡ ይምሕርዎሙ። ብፁዓን፡ እለ፡ ንጹሓን፡ በሥጋሆሙ፡ እስመ፡ እሙንቱ፡ ይከውኑ፡ ማኅደሮ፡ ለመንፈስ፡ ቅዱስ። ብፁዓን፡ ገባርያነ፡ ሰላም፡ እስመ፡ እሙንቱ፡ ውሉደ፡ እግዚአብሔር፡ ይሰመዩ። ብፁዓን፡ እለ፡ ይሁብዎሙ፡ ለምስኪናን፡ እስመ፡ እሙንቱ፡ ይሌቅሕዎ፡ ለእግዚአብሔር። ወኀብኣ፡ እምኔሃ፡ ከመ፡ ኢይንግራ፡ ዘነገሮ፡ ጴጥሮስ፡ በእንተ፡ ዘቦ፡ ብእሲተ፡ ፈሪሆ፡ ከመ፡ ኢትእበዮ፡ ብእሲቱ። እስመ፡ ለብእሲቱ፡ አብርሃ፡ እግዚአብሔር፡ አዕይንተ፡ ልባ። ወትቤሎ፡ ኵሎ፡ ዘሰማዕከ፡ እምቃለ፡ ጴጥሮስ፡ ወኵሎ፡ ዘሰማዕከ፡ እምኔሁ፡ አልቦኑ፡ ዘኀባእከኒ። ወይቤላ፡ ሀሎ፡ አሐዱ፡ ቃል፡ ዘኢነገርኩኪ፡ ወእመሰ፡ ትፈቅዲ፡ እንግርኪ፡ ዘተረፈ፡ እምቃላቲሁ፡ እንግርኪኑ። ወትቤሎ፡ ኦሆ፡ ኦእግዚእየ፡ ንገረኒ፡ ኵሎ፡ ዘሰማዕከ፡ እምኔሁ። ወአውሥኣ፡ ወይቤላ፡ ሰማዕኩ፡ እንዘ፡ ይብል፡ ብፁዓን፡ እለ፡ ቦሙ፡ ብእሲተ፡ ወይከውኑ፡ ከመ፡ ዘአልቦሙ፡ ብእሲተ፡ እስመ፡ እሙንቱ፡ ይወርሱ፡ ሕይወተ፡ ዘለዓለም። ወአውሥአቶ፡ ብእሲቱ፡ እንዘ፡ ትብሎ፡ ኦእኁየ፡ ምንተ፡ ይሤኒ፡ ዝነገር። አነሂ፡ ፈቀድኩ፡ ከመ፡ እርአይ፡ ገጾ፡ አነ፡ እስእለከ፡ ኦእኁየ፡ ስእለተ፡ ከመ፡ ትትመጠወኒ፡ ስእለትየ። ወይቤላ፡ በሊ፡ ወትቤሎ፡ እስመ፡ ኖኀ፡ ንብረትነ፡ ወንሕነኒ፡ ነበርነ፡ በተፈግዖት፡ ወፍትወተ፡ ሥጋ፡ ዘምሉእ፡ ርስሐት። ወናሁ፡ ንሕነኒ፡ ወለድነ፡ ውሉደ፡ ሠለስተ፡ ተባዕተ፡ ወአሐዱ፡ እምኔሆሙ፡ ሞተ፡ ወናሁ፡ ክልኤቱ፡ ተረፉ፡ ለነ፡ እምኔሆሙ፡ ለነ፡ ቦሙ፡ ነጊፈ፡ ላሕ። ሠመርከኑ፡ ከመ፡ ንፍተው፡ ወንኩን፡ ምስለ፡ እለ፡ ይቤ፡ ጴጥሮስ፡ በእንቲአሆሙ፡ እስመ፡ ይወርሱ፡ ምድረ፡ ሕይወት፡ ዘለዓለም። ወአውሥኣ፡ ብእሲሃ፡ ወይቤላ፡ እሆ፡ ወዓዲ፡ ደገመ፡ ላቲ፡ ቃለ፡ ወይቤላ፡ እመሰ፡ ዘንተ፡ ይኩን፡ ፈቀድኪ፡ ባኢ፡ ምስሌየ፡ ውስተ፡ ምኵራብ፡ ከመ፡ ንትካየድ፡ ኪዳነ፡ ወከመ፡ ንዕቀብ፡ ሥጋነ፡ ንጹሓነ፡ ለእግዚአብሔር፡ እስከ፡ ለሞትነ። ወተባደሩ፡ ኅቡረ፡ ውስተ፡ ምኵራብ፡ ወተካየዱ፡ ኪዳነ፡ በከመ፡ ተባሀሉ። ወእምዝ፡ ወፅኡ፡ እምኵራብ፡ እምድኅረ፡ ተካየዱ፡ ኪዳነ። ወይቤላ፡ ቅውስጦስ፡ ለብእሲቱ፡ እመሰ፡ ኮነ፡ ወዐቀብነ፡ ዛተ፡ አሐተ፡ ቃለ፡ እምቃሉ፡ ይደልወነ፡ ከመ፡ ንዕቀብ፡ ኵሎ፡ ዘነገረነ፡ ጴጥሮስ። ሰማዕኩ፡ ዓዲ፡ እንዘ፡ ይብል። ብፁዓን፡ እለ፡ ይሁቡ፡ ለምስኪናን፡ እስመ፡ እሙንቱ፡ ይሌቅሕዎ፡ ለእግዚአብሔር። ትፈትዊኑ፡ ከመ፡ ነሀብ፡ ኵሎ፡ ጥሪተነ፡ ለምስኪናን፡ ወለእጓለ፡ ማውታ፡ ከመ፡ ንኩን፡ ለቃሔ፡ ለእግዚአብሔር። ወትቤሎ፡ ሠናይ፡ ዝነገርከ፡ ወጸውዐ፡ ዐቀብተ፡ ቤቱ፡ ወኵሎ፡ መገብቶ፡ ወይቤሎሙ፡ ሖሩ፡ አርኅዉ፡ መዛግብትየ፡ ወሀቡ፡ ኵሎ፡ ንዋይየ፡ ለእጓለ፡ ማውታ፡ ወለነዳያን፡ ወኢትኅሥሡ፡ ወኢአሐደሂ፡ እምኔሆሙ፡ ሤጠ፡ ወኢአኅዘ፡ ወኢትጽሐፉ፡ ቦሙ፡ መጽሐፈ፡ ከመ፡ ትትፈደይዎሙ፡ ዳእሙ፡ ይደልወክሙ፡ ከመ፡ ተሀብዎሙ፡ በፈሪሀ፡ እግዚአብሔር። ወእግዚአብሔር፡ አምላከ፡ ጴጥሮስ፡ ስምዐ፡ ይኩን፡ ላዕሌክሙ፡ ከመ፡ ኢታድልዉ፡ ኢለዐቢይ፡ ወኢለንኡስ፡ ወኢትንሥኡ፡ ገጸ፡ እስመ፡ ፈቀድነ፡ ዘንተ፡ ግብረ፡ እስመ፡ ሠናይ፡ ውእቱ። ወሖሩ፡ መገብቱ፡ በውእቱ፡ ጊዜ፡ ወፈትሑ፡ መዛግብቲሆሙ፡ ወወሀቡ፡ ኵሎ፡ እለ፡ ዘውስቴቶሙ፡ ለምስኪናን፡ ወለእጓለ፡ ማውታ፡ ወለኵሎሙ፡ ዕፁባን። ወቅውስጦስኒ፡ ወብእሲቱ፡ ወሀቡ፡ ኵሎ፡ እለ፡ ቦሙ፡ ውስተ፡ አብያቲሆሙ፡ ወርቀ፡ ወብሩረ፡ ወአልባሰኒ፡ ወባዕዳነሂ፡ ወአልቦ፡ ዘአትረፉ፡ ወአግዐዙ፡ ኵሎ፡ ኄራነ፡ እምነ፡ አግብርቲሆሙ። ወኮኑ፡ ውእቶሙኒ፡ ዘአልቦሙ፡ ወኢምንተኒ፡ ዘእንበለ፡ ሲሳየ፡ ዕለት፡ ለዕለት። ወእምዝ፡ ያአኵትዎ፡ ለእግዚአብሔር፡ እንዘ፡ ይእኅዙ፡ ትምህርቶ፡ ለጴጥሮስ። ወኮነ፡ እምድኅረ፡ እማንቱ፡ መዋዕል፡ ፈነወ፡ ንጉሥ፡ ላእካነ፡ ኀበ፡ ቅውስጦስ፡ ከመ፡ ይብጻሕ፡ ኀቤሁ፡ ወከመ፡ ይትማከር፡ ምስሌሁ፡ በእንተ፡ ትካዘ፡ መንግሥቱ፡ ለአእምሮ፡ ሠናይ፡ እንግልጋሁ፡ ወጥበበ፡ ቃሉ። ወሶበ፡ ርእየ፡ ቅውስጦስ፡ ላእካኖ፡ ለንጉሥ፡ ፈርሀ፡ ዐቢየ፡ ፍርሀተ፡ ወቦአ፡ ውስተ፡ ቤቱ፡ ወይቤላ፡ ለብእሲቱ። እፎኑ፡ እገብር፡ ናሁ፡ ንጉሥ፡ ለአከ፡ ኀቤየ፡ ይኤዝዘኒ፡ ከመ፡ እብጻሕ፡ ኀቤሁ፡ ወኢይትከሀለኒ፡ ከመ፡ እብጻሕ፡ ኀቤሁ፡ ዘአልብየ፡ ንዋየ፡ ውስተ፡ እዴየ፡ ከመ፡ አአምኆ፡ ላዕለ፡ ዕበየ፡ ክብሩ፡ ወዐቢይ፡ ግርማሁ፡ ከመ፡ ኢይትመዐዕ፡ ላዕሌየ። ወአውሥአቶ፡ ብእሲቱ፡ እንዘ፡ ትብሎ፡ ኢትፍራህ፡ ኦእግዚእየ፡ እግዚአብሔር፡ አምላከ፡ ጴጥሮስ፡ ዘአመነ፡ ቦቱ፡ ውእቱ፡ ያሤኒ፡ ለከ፡ ወይሁበከ፡ ሞገሰ፡ በቅድሜሁ። ወይቤላ፡ ቅውስጦስ፡ ናሁ፡ ረከብኩ፡ ምክንያተ፡ ከመ፡ እትኀባእ፡ አነ፡ ወአንትሂ፡ ፃኢ፡ ምስለ፡ አግብርቲኪ፡ በዛቲ፡ ሌሊት፡ ወኅትዊ፡ ማኅቶተ፡ ወአንሶስዊ፡ ውስተ፡ ፍኖተ፡ ሀገር፡ ወኅሥሥኒ፡ ኪያየ፡ ወበሊ፡ ዐብደ፡ ምትየ፡ ወኢያአምር፡ ኀበ፡ ሖረ፡ ወብከዪ፡ ወክልሒ፡ ወበሊ፡ ለእመ፡ ረከብኩ፡ ሥጋሁ፡ ከመ፡ እግንዞ፡ ወእቅብሮ፡ ከመ፡ ኢይብልዖ፡ አርዌ፡ ከመ፡ ይስምዑ፡ ላእካን፡ ወይግብኡ፡ ኀበ፡ ንጉሥ፡ ከመ፡ ይንግርዎ፡ ዘንተ፡ ከመ፡ ኢይኅሥሠኒ፡ እስመ፡ እፈርሆ። ወአውሥአቶ፡ ብእሲቱ፡ ወትቤሎ፡ ኢትግበር፡ ከመዝ፡ ኦእግዚእየ፡ ዘንተ፡ ምክንያተ፡ እስመ፡ ኢኮነ፡ ሠናይ፡ ትካዝ፡ ከመ፡ ኢትኩን፡ ዕቅፍተ፡ ለእለ፡ አምኑ፡ በአምላከ፡ ጴጥሮስ፡ እምሰብአ፡ ሀገረ፡ ሮሜ። እስመ፡ አንተ፡ ሶበ፡ ትገብር፡ ከመዝ፡ ይብሉ፡ ሕዝብ፡ እስመ፡ አእመረ፡ ዝንቱ፡ ብእሲ፡ ዘነገሮ፡ ጴጥሮስ፡ ኢኮነ፡ በአማን፡ ወኢይከውኖ፡ ፈቃደ፡ እምኀበ፡ እግዚአብሔር፡ በእንተ፡ እለ፡ ወሀበ፡ ለምስኪናን፡ ወለእጓለ፡ ማውታ። ሶበ፡ ተዘከረ፡ ንዋዮ፡ ዘወፅአ፡ እምኔሁ፡ ወበእንተዝ፡ ዐብደ፡ ይብሉ። ዝንቱ፡ ትካዝ፡ ኢኮነ፡ ሠናየ፡ ትካዘ። ወትቤሎ፡ ኢትኩን፡ ኅጹጸ፡ ሃይማኖትከ፡ እስመ፡ ዛቲ፡ ትካዝ፡ ለአማስኖተ፡ ነፍሳተ፡ ዳእሙ፡ ተንሥእ፡ ወሖር፡ ኀበ፡ ቤተ፡ እኁከ፡ ወሰአል፡ እምኔሁ፡ ከመ፡ ይለቅሕከ፡ ንስቲተ፡ እምወርቁ፡ እስከ፡ ትገብእ፡ እምኀበ፡ ንጉሥ፡ ወታገብእ፡ ሎቱ፡ ወርቆ። ወሶበ፡ ኢገብረ፡ ለከ፡ ንሣእ፡ ዘተርፈ፡ እምአግብርቲከ፡ ዘትፈቅድ፡ እምኔሆሙ፡ ሀቦ፡ ይኩኖ፡ አኅዘ። ወሰሚዖ፡ ቃለ፡ ብእሲቱ፡ ሖረ፡ ቤተ፡ እኁሁ። ወሶበ፡ ርእዮ፡ እኁሁ፡ እምርሑቅ፡ ቦአ፡ ውስተ፡ ቤቱ፡ ወዐጸወ፡ ኆኅቶ። ወሶበ፡ ይቀርብ፡ ቅውስጦስ፡ ጸውዖ፡ ወይቤሎ፡ ኦእኁየ፡ ተንሥእ፡ ወርድአኒ፡ እስመ፡ እኆ፡ ይረድኦ፡ ለእኁሁ፡ ከመ፡ ሀገር፡ ዘቦቱ፡ ጽኑዐ፡ ጸወነ። ወእኁሁ፡ አበዮ፡ አውሥኦቶ፡ ወእምድኅረ፡ ብዙኅ፡ ነገር፡ ተናገሮ፡ እምናሕስ፡ እምላዕለ፡ ቤቱ። ወተርእየ፡ ሎቱ፡ ወይቤሎ፡ ምንተ፡ ትፈቅድ፡ ኦአብድ፡ አማሰንከ፡ ንዋየከ፡ ዘእንበለ፡ ኵሉ፡ ሰብአ፡ ሮሜ፡ እስመ፡ ሰማዕከ፡ ቃለ፡ ብእሲ፡ መስሐቲ፡ ወዘረውከ፡ ኵሎ፡ ንዋየከ፡ ወወሀብከ፡ ለምስኪናን፡ ወለእጓለ፡ ማውታ፡ ወአማሰንከ፡ ነፍሰከ፡ ወአህጐልከ፡ ሞገሰከ፡ ወገባእከ፡ ከመ፡ ታጥፍአኒ፡ ንዋይየ። ርሐቅ፡ እምኔየ፡ ከመ፡ ኢትስማዕ፡ እምኔየ፡ ዘያሐምመከ፡ ልበከ። ንጉሥ፡ ለእመ፡ ለአከ፡ ኀቤከ፡ ከመ፡ ይምትሩ፡ ርእሰከ፡ እምኔከ፡ እመ፡ ኢመሐኩከ። እስመ፡ ረሰይከ፡ ውሉደከ፡ ነዳያነ፡ ዘእንበለ፡ ኵሎሙ፡ እለ፡ ይነብሩ፡ ውስተ፡ ዛቲ፡ ሀገር። ወቅውስጦስሂ፡ ገብአ፡ ኀበ፡ ቤቱ፡ እንዘ፡ የሐዝን፡ ዐቢየ፡ ወይበኪ፡ በአዕይንቲሁ፡ በእንተ፡ እለ፡ ሰምዐ፡ እምነ፡ እኁሁ። ወይቤላ፡ ለብእሲቱ፡ ኢያእመርኪኑ፡ ዘገብረ፡ እኁየ፡ እስመ፡ ኢሰምዐኒ፡ ስእለትየ፡ ወአልቦ፡ ዘወሀበኒ፡ ዳእሙ፡ አሕዘነ፡ ልብየ፡ እምነገሩ፡ ዘነገረኒ፡ ወተዛለፈ፡ ላዕሌየ። ወትቤሎ፡ ብእሲቱ፡ አነ፡ አኀሥሥ፡ እምኔከ፡ ኦእኁየ፡ ኢታሕሥም፡ ልበከ፡ እስመ፡ አምላክ፡ ዘአመነ፡ ቦቱ፡ ወውእቱ፡ አምላክ፡ ከሃሊ፡ ኢይገድፈነ። ወዓዲ፡ ትቤሎ፡ ጽንሐኒ፡ ንስቲተ፡ እስከ፡ እበውእ፡ ውስተ፡ ቤት፡ ለእመ፡ እረክብ፡ አሐደ፡ ዘይከውነከ፡ ሥንቀ፡ ለፍኖትከ። ወሖረት፡ ፍጡነ፡ ወአኅተወት፡ ማኅቶተ፡ ወኀሠሠት፡ ውስተ፡ መስኮት፡ ዘኮነ፡ ውስተ፡ ቤታ፡ ወረከበት፡ ፪አስታረ፡ ዘውእቱ፡ ፪ዲናር፡ ዘኢረከበት፡ ቀዲሙ፡ ከመ፡ ተሀቦሙ፡ ለምስኪናን። ወአውፅአቶሙ፡ ኀበ፡ ብእሲሃ፡ ወትቤሎ፡ ኦእግዚእየ፡ ረከብኩ፡ ዘንተ፡ በውስተ፡ መስኮት፡ ንሥኦሙ፡ ከመ፡ ይኩንከ፡ ሥንቀ፡ ለፍኖትከ። ወሖር፡ በሰላመ፡ እግዚአብሔር፡ አምላከ፡ ጴጥሮስ፡ ዘተወከልነ፡ ቦቱ፡ ውእቱ፡ ይምራሕከ፡ ወያሠኒ፡ ፍኖተከ፡ ወይፈጽም፡ ስእለተከ፡ ወያብጽሕከ፡ ኀበ፡ ንጉሥ፡ ወየሀብከ፡ እምኔሁ፡ ሞገሰ፡ ወትግባእ፡ ኀቤነ፡ ፍጡነ፡ በሰላም፡ ወበዳኅን። ወነሥአ፡ ውእተ፡ ፪፡ አስታረ፡ ናእክ፡ ወኵሎ፡ ንዋየ፡ እለ፡ ይፈቅድ፡ ለፍኖቱ፡ ወነሥአ፡ ፫፡ እምአግብርቲሁ፡ ወሖረ፡ ኀበ፡ ንጉሥ። ወእንዘ፡ ይሐውር፡ ውስተ፡ ፍኖት፡ ወይቴክዝ፡ በልቡ፡ እንዘ፡ ይብል፡ እፎኑ፡ ከመዝ፡ እትራከቦ፡ ለንጉሥ፡ አነ፡ በዝንቱ፡ አልባስ፡ ርሱሕ፡ ወአልብየ፡ ልብሰ፡ ዘእንበለ፡ ዝንቱ፡ አልባስ፡ እለ፡ በፍኖትየ፡ ሶበ፡ እበውእ፡ ኀበ፡ ንጉሥ። ወእንዘ፡ ይቴክዝ፡ በውስተ፡ ፍኖት፡ ዘንተ፡ ትካዘ፡ ርእየ፡ ፪፡ ዕደው፡ እንዘ፡ ይትባአሱ። ወይቤ፡ በልቡ፡ ሰማዕክዎ፡ ለጴጥሮስ፡ ወወሀብኩ፡ ኵሎ፡ ንዋይየ፡ ለነዳያን፡ ወተቀበልክዋ፡ ለቃሉ። ወውእቱ፡ ይቤ፡ ብፁዓን፡ ገባርያነ፡ ሰላም፡ እስመ፡ እሙንቱ፡ ውሉደ፡ እግዚአብሔር፡ ይሰመዩ። ወናሁ፡ አነሂ፡ አሐውር፡ ኀበ፡ እልክቱ፡ ፪፡ ዕደው፡ ወእዕርቆሙ፡ ከመ፡ እኩን፡ አነሂ፡ ውሉደ፡ እግዚአብሔር። ውእቱ፡ ተግሕሠ፡ እምፍኖቱ፡ ዘይሐውር፡ ባቲ፡ ወቀርበ፡ ኀበ፡ እሉ፡ ፪፡ ዕደው፡ እለ፡ ኮኑ፡ ይትባአሱ፡ ወይቤሎሙ፡ በእፎ፡ አንትሙ፡ ትትባአሱ። ወአውሥኦ፡ ፩፡ እምኔሆሙ፡ እንዘ፡ ይብሎ፡ ኦእግዚእየ፡ ፍታሕ፡ ማእከሌነ፡ እስመ፡ እግዚአብሔር፡ ዘለአከከ፡ ኀቤነ፡ ከመ፡ ትዕርቀነ። አእምርኬ፡ ኦእግዚኦ፡ እንዘ፡ ንሐውር፡ ውስተ፡ ፍኖት፡ አነሂ፡ ወዝንቱ፡ ካልእየ፡ ወኮንኩ፡ አነ፡ እቀድም፡ ወኮነ፡ ዝንቱ፡ እምድኅሬየ። ነጸርክዎ፡ ለዝንቱ፡ እብን፡ ቅድሜየ፡ ወአነሂ፡ ሰፋሕኩ፡ እደዊየ፡ ወነሣእኩ፡ ቅድሜሁ፡ ወውእቱ፡ ይኄይል፡ እምኔየ፡ ወይፈቅድ፡ ይንሥአኒ፡ በኀይል፡ ወበዝንቱ፡ ግብር፡ ንሕነ፡ ንትባአስ፡ ወውእቱ፡ ይብል፡ ዚአየ፡ ወአነ፡ እብል፡ ዚአየ፡ ውእቱ። ወአውሥኦሙ፡ ቅውስጦስ፡ እንዘ፡ ይብል፡ እፎኑ፡ ታአምሩ፡ ምንትኑ፡ ዛቲ፡ እብን። ወይቤሉ፡ አልቦ፡ ኢናአምር፡ እስመ፡ ኮነ፡ ኅቡአ፡ እምኔሆሙ፡ አእምሮቱ፡ ወኢያአምሩ፡ ምንተኒ። ወይቤሎሙ፡ ቅውስጦስ፡ ሀሎ፡ ኀቤየ፡ ፪፡ አስታር፡ ሠናያት፡ ንሥእዎሙ፡ ለክሙ፡ ለለ፡ አሐዱ፡ አሐዱ፡ እምኔክሙ፡ አስታር፡ ወሀቡኒ፡ ዛተ፡ እብነ፡ ወትርሐቅ፡ እምኔክሙ፡ ዛቲ፡ ጽልእ፡ ወይኩን፡ ማእከሌክሙ፡ ሰላም። ወውእቶሙኒ፡ ወሀብዎ፡ ውእተ፡ እብነ፡ ወነሥኡ፡ ፪፡ አስታረ፡ እምኔሁ፡ ወተአምኁ፡ በበይናቲሆሙ፡ በከመ፡ አዘዞሙ። ወቅውስጦስኒ፡ ሖረ፡ ምስለ፡ ላእካን፡ ኀበ፡ ንጉሥ፡ ወሶበ፡ ይቀርብ፡ ለኢየሩሳሌም፡ ወአውሥአ፡ ወይቤ፡ ለእለ፡ ይሐውሩ፡ ምስሌሁ፡ ንዕረግ፡ ውስተ፡ ኢየሩሳሌም፡ ከመ፡ ንስግድ፡ ውስተ፡ ምኵራብ። ወይቤልዎ፡ ኦሆ፡ ወዐርጉ፡ ምስሌሁ፡ ወቦኡ፡ ውስተ፡ ምኵራብ፡ ወፈጸሙ፡ ጸሎቶሙ። ወቅውስጦስኒ፡ አተወ፡ ኀበ፡ ብእሲ፡ ነሃቤ፡ ወርቅ፡ ወአርአዮ፡ ውእተ፡ እብነ፡ ወይቤሎ፡ ኦእኁየ፡ ነጽሮ፡ ለዝንቱ፡ እብን፡ እስመ፡ ኢያአምሮ፡ ምንት፡ ውእቱ። ወሶበ፡ ይኔጽሮ፡ ነሃቤ፡ ወርቅ፡ ለውእቱ፡ እብን፡ ሰብሖ፡ ለእግዚአብሔር። ወይቤሎ፡ እምአይቴ፡ ረከብከ፡ አንተ፡ ኦእኁየ፡ ዘንተ፡ እብነ፡ ወነገሮ፡ ኵሎ፡ ዘኮነ፡ በእንተ፡ ውእቱ፡ እብን። ወይቤሎ፡ ነሃቤ፡ ወርቅ፡ ኦእኁየ፡ ፍቁርየ፡ ናሁ፡ ብዙኅ፡ ዓመታት፡ ዴማስ፡ ካህን፡ ዘኢያዕረገ፡ ዕጣነ፡ በእንተ፡ ዝንቱ፡ እብን፡ እስመ፡ ረከበ፡ ፲ወ፩፡ አእባነ፡ ዘእንበለ፡ ዝንቱ፡ አሐዱ፡ እብን፡ ውእቱ፡ ተፍጻሜቶሙ፡ ለ፲ወ፪፡ አእባን፡ ኆልቆሙ፡ ለነገደ፡ እስራኤል። ወአነሂ፡ አሌብወከ፡ ከመ፡ ታብጽሖ፡ ለዝንቱ፡ እብን፡ ኀበ፡ ካህን፡ ወኵሎ፡ ዘትፈቅድ፡ እምንዋይ፡ ይሁበከ። ወቅውስጦስኒ፡ ሖረ፡ ምስለ፡ ውእቱ፡ እብን፡ ኀበ፡ ውእቱ፡ ካህን፡ ወሶበ፡ ይኔጽሮ፡ ሊቀ፡ ካህናት፡ ለውእቱ፡ እብን፡ ወድቀ፡ ዲበ፡ ምድር፡ እንዘ፡ ይሰግድ፡ ወይብል፡ አአኵቶ፡ ለእግዚአብሔር። ወአዘዘ፡ ከመ፡ ይትጋብኡ፡ ኵሉ፡ ሕዝብ፡ ኀቤሁ፡ ወይቤሎሙ፡ ኦአኀው፡ ናሁ፡ አእመርክሙ፡ ኆልቈ፡ ዓመታት፡ ዘኮነ፡ ዘኢተክህለኒ፡ ከመ፡ አዕርግ፡ ዕጣነ፡ ውስተ፡ ምኵራብ፡ በእንተ፡ ዛቲ፡ እብን። እስመ፡ ሶበ፡ ነሥአ፡ ናቡክድናጾር፡ ኵሎ፡ ንዋየ፡ ቤተ፡ እግዚአብሔር፡ ዛቲ፡ እብን፡ ተኀጥአት፡ ወኢተረክበት፡ እስከ፡ ዛቲ፡ ዕለት። ወናሁ፡ ተሣሀለ፡ እግዚአብሔር፡ ላዕሌነ፡ ወለአከ፡ ኀቤነ፡ ዘንተ፡ ብእሴ፡ ወዘንተ፡ እብነ፡ እለ፡ ንኀሥሥ፡ ንሕነ፡ ከመ፡ ትብጻሕ፡ ጸሎትነ፡ እስመ፡ ይደልወነ፡ ከመ፡ ናቅርብ፡ ኵሉ፡ አሐዱ፡ አሐዱ፡ እምንዋዩ፡ መባአ፡ ለእግዚአብሔር፡ በከመ፡ አምጣነ፡ ኀይሉ። ወተንሥኡ፡ ሕዝብ፡ ወሖሩ፡ እምኀቤሁ፡ ወአተዉ፡ ኵሎሙ፡ ሰብእ፡ ወአምጽኡ፡ መጠነ፡ ቦሙ፡ ወአስተጋብኡ፡ ንዋየ፡ ብዙኀ፡ እምወርቅ፡ ወብሩር። ወሶበ፡ አስተጋብኡ፡ መባአ፡ ወወሀቦ፡ ሊቀ፡ ካህናት፡ ለቅውስጦስ፡ ወባረከ፡ ላዕሌሁ፡ ወይቤሎ፡ ዝንቱ፡ ሀብት፡ እምኀበ፡ እግዚአብሔር፡ ለከ፡ በእንተ፡ ዛቲ፡ እብን፡ ወእግዚአብሔር፡ የሀብከ፡ ዐስበከ፡ በከመ፡ ሥምረቱ። ወቅውስጦስኒ፡ ነሥአ፡ ኵሎ፡ በረከተ፡ እለ፡ ወሀብዎ፡ ወይእቲ፡ ኮነቶ፡ መክዕቢተ፡ እምንዋዩ፡ እለ፡ ኮነ፡ ዘወሀቡ፡ ለምስኪናን፡ ወአእኰቶ፡ ለእግዚአብሔር፡ ወጸንዐት፡ ሃይማኖቱ፡ ወሖረ፡ ውስተ፡ ፍኖቱ፡ ምስለ፡ ላእካን፡ ኀበ፡ ንጉሥ። ወተፈጸመ፡ ላዕሌሁ፡ ቃል፡ ዘይቤ፡ ዘይምሕሮሙ፡ ለነዳያን፡ ውእቱ፡ ይሌቅሖ፡ ለእግዚአብሔር። ወእንዘ፡ ይሐውር፡ በፍኖት፡ ሰምዐ፡ ቃለ፡ ዘይጸርኅ፡ እምሰማይ፡ ዘይብል፡ ኦቅውስጦስ፡ ቅውስጦስ፡ ወይቤ፡ ነየ፡ አነ፡ ኦእግዚኦ። ወአውሥኦ፡ ቃል፡ እንዘ፡ ይብል፡ እስመ፡ ሰማዕከ፡ ቃለ፡ ሐዋርያየ፡ ጴጥሮስ፡ ወአመንከ፡ ቃሎ፡ ዘይቤ፡ እስመ፡ ኵሎሙ፡ እለ፡ ይምሕርዎሙ፡ ለነዳያን፡ ይሌቅሕዎ፡ ለእግዚአብሔር። ዝንቱ፡ በረከት፡ እንተ፡ በጽሐት፡ ኀቤከ፡ አኮ፡ ዛቲ፡ ባሕቲታ፡ ዳእሙ፡ በረከት፡ ወሶበ፡ ታዐርፍ፡ ወትወጽእ፡ እምዝንቱ፡ ዓለም፡ ብሉይ፡ ወትበጽሕ፡ ኀበ፡ ዕረፍት፡ ወነጊፈ፡ ላሕ፡ ወሠናይታት፡ ዘዐይን፡ ኢርእየ፡ ወእዝን፡ ኢሰምዐ፡ ወውስተ፡ ልበ፡ ሰብእ፡ ዘኢተኀለየ። ወቅውስጦስኒ፡ ተወሰከ፡ አሚነ፡ ወተፈሥሐት፡ ነፍሱ፡ ወጸንዐት፡ ልቡ፡ ወሖረ፡ ኀበ፡ ንጉሥ፡ ወተቀበልዎ፡ በሠናይ፡ ተቀብሎት፡ ወአሠነየ፡ ማኅደሮ፡ ኀቤሁ፡ ወአዘዞ፡ ከመ፡ ይንበር፡ ኀቤሁ፡ ፫፡ ዐመተ። ወእምዝ፡ ቅውስጦስ፡ እምድኅረ፡ ርሕቀ፡ እማኅደሪሁ፡ ወአተወ፡ እኁሁ፡ ኀበ፡ ብእሲቱ፡ በምክረ፡ ሰይጣን፡ ዘዘርአ፡ ጸላኢ፡ ውስተ፡ ልቡ። ወይቤላ፡ እስመ፡ እኁየ፡ ኢይገብእ፡ ኀቤኪ፡ ለዓለም፡ ወንጉሥሂ፡ ቀሠፎ፡ እስመ፡ ሰምዐ፡ ቃለ፡ ብእሲ፡ መሠርይ፡ ወዘረወ፡ ንዋዮ፡ ላዕለ፡ ነዳያን፡ ወለእጓለ፡ ማውታ፡ ወረሰየ፡ ውሉዶ፡ ነዳያነ፡ ዘእንበለ፡ ኵሉ፡ አዝማዲነ። ወናሁ፡ እፈቅድ፡ ከመ፡ ትኩንኒ፡ ብእሲተ፡ ወአስተጋብእ፡ ኵሎ፡ መገብቶ፡ እለ፡ ኮኑ፡ ለእኁየ፡ ወእኅዞሙ፡ ወአኀሥሥ፡ እምኔሆሙ፡ ከመ፡ ያግብኡ፡ ኵሎ፡ ንዋየ፡ እለ፡ ኮና፡ ታሕተ፡ እደዊሆሙ፡ እስመ፡ አማሰንዎሙ፡ እስመ፡ አንቲሰ፡ ብእሲት፡ ዘኢይትከሀለኪ፡ ከመዝ። ወአውሥአቶ፡ እንዘ፡ ትብል፡ ኦአብድ፡ ወሕርቱም፡ እፎኑ፡ ቦአ፡ ሰይጣን፡ ውስተ፡ ልብከ፡ ከመዝ፡ ኅሊና፡ እኪት፡ ከመ፡ ትዕረግ፡ ላዕለ፡ ምስካበ፡ እኁከ። ወኢይከውነከ፡ መፍትው፡ ከመ፡ ትናዝዞሙ፡ ለደቂቀ፡ እኁከ፡ በርሒቀ፡ አቡሆሙ፡ ወታንግፍ፡ ላሖሙ፡ በንዋይከ፡ እስከ፡ ይገብእ፡ አቡሆሙ፡ ኀቤሆሙ፡ እስመ፡ ውእቱሰ፡ ፈቀደ፡ ከመ፡ ይንሥኣ፡ በኀይል፡ ወሶበ፡ ተአምር፡ ከመ፡ ይትከሀሎ፡ ወከመ፡ ይገብር፡ ፈቃዶ፡ በእኪት፡ ወአውሥአት፡ ሎቱ፡ ቃለ፡ በከመ፡ ፈቃዱ፡ ወዐደመቶ፡ እስከ፡ ሠሉስ፡ ዕለት፡ ወሖረ፡ እምኔሃ፡ ከመዝ፡ ወጸውዐት፡ አመታ፡ ዘኀርየት፡ ወትቤላ፡ ኢያአምረኒ፡ ሰብእ፡ ኀበ፡ አሐውር፡ ወጸውዐት፡ ፪፡ ደቂቃ፡ ወትቤሎሙ፡ ኦደቂቅየ፡ ስምዑኒ፡ ቃልየ፡ ወፃኡ፡ ምስሌየ፡ እስከ፡ አትንያስ፡ ከመ፡ ትትመሀሩ፡ ጥበበ፡ ወተግሣጸ፡ እስከ፡ ይበጽሕ፡ አቡክሙ። ወነሥአት፡ ምስሌሃ፡ ክልኤተ፡ እምአግብርቲሃ፡ ወበጽሐት፡ ጽንፈ፡ ባሕር፡ ወረከበት፡ ሐመረ፡ ዘድልው፡ ለሐዊር፡ ወሖረት። ወእምዝ፡ ርሕቀት፡ እመርስ፡ ምሕዋረ፡ ፴፡ በእመት፡ ወአንቀልቀለ፡ ዐቢይ፡ ነፋስ፡ በውስተ፡ ባሕር፡ ወተሰብረት፡ ሐመር። ወአሐዱ፡ እምደቂቃ፡ ዐርገ፡ ሐመረ፡ በሉሕ፡ እምሉሐተ፡ ሐመር፡ ወበሥምረቱ፡ ለእግዚአብሔር፡ ገደፈቶ፡ ባሕር፡ ኀበ፡ ሀገረ፡ እልስክንድርያ። ወዘይንእስ፡ ወልድ፡ ወእሙ፡ ተሰቅሉ፡ ዓዲ፡ በዕፅ፡ እምዕፀ፡ ሐመር፡ ወአድኀኖሙ፡ እግዚአብሔር፡ እምልጐተ፡ ባሕር፡ ወገደፈቶሙ፡ ባሕር፡ ኀበ፡ ንስቲት፡ ደሴት፡ ውስተ፡ ብሔር፡ እንተ፡ ትሰመይ፡ ቀፍራ። ወጸውዖ፡ እግዚአብሔር፡ ለጴጥሮስ፡ ወአዘዞ፡ ከመ፡ ይሖር፡ ኀበ፡ ሀገረ፡ እልስክንደርያ፡ ይኅሥሥ፡ አግብርተ፡ እግዚአብሔር፡ ኅሩያነ፡ እስመ፡ እሉ፡ እሙንቱ፡ ድልዋን፡ ለምሕረት። ወጴጥሮስኒ፡ ሖረ፡ ኀበ፡ ሀገረ፡ እልስክንድርያ። ወሶበ፡ ይበውእ፡ አቅደመ፡ ዓዲ፡ እንዘ፡ የዐውድ፡ ከመ፡ ኮነ፡ ይዐውድ፡ በሀገረ፡ ሮሜ። ወይቤ፡ ብፁዓን፡ መሓርያን፡ እስመ፡ ሎሙኒ፡ ይምሕርዎሙ። ብፁዓን፡ ገባርያነ፡ ሰላም፡ እስመ፡ እሙንቱ፡ ውሉደ፡ እግዚአብሔር፡ ይሰመዩ። ብፁዓን፡ እለ፡ ይሁብዎሙ፡ ለምስኪናን፡ እስመ፡ እሙንቱ፡ ይሌቅሕዎ፡ ለእግዚአብሔር። ብፁዓን፡ እለ፡ ቦሙ፡ ብእሲተ፡ ወይከውኑ፡ ከመ፡ ዘአልቦሙ፡ ብእሲተ፡ እስመ፡ እሙንቱ፡ ይወርሱ፡ ምድረ፡ ሕይወት፡ ዘለዓለም። ወአልቦ፡ ወኢአሐዱ፡ ዘተመጠወ፡ ቃሎ፡ እምኵሉ፡ ሀገረ፡ እልስክንድርያ፡ ዘእንበለ፡ ዝንቱ፡ አሐዱ፡ ወሬዛ፡ ዘድኅነ፡ እማዕበለ፡ ባሕር፡ ወልዱ፡ ጥቀ፡ ለቅውስጦስ። ወውእቱ፡ መጽአ፡ ኀቤሁ፡ ወወድቀ፡ ማእከለ፡ እደዊሁ፡ ለጴጥሮስ፡ ወአምኀ፡ እገሪሁ። ወይቤሎ፡ ጴጥሮስ፡ ንግረኒ፡ መኑ፡ አንተ፡ እስመ፡ አልቦ፡ አሐዱ፡ ዘሰምዐ፡ ነገርየ፡ እምዝንቱ፡ ሕዝብ፡ ዘእንበሌከ። ወአውሥኦ፡ ውእቱ፡ ወሬዛ፡ እንዘ፡ ይብሎ፡ ኦአባ፡ አነ፡ እምሀገረ፡ ሮሜ፡ ሶበ፡ ሀሎኩ፡ ውስቴታ፡ ወቦአ፡ ብእሲ፡ ዘከማከ፡ ኀበ፡ ሀገረ፡ ሮሜ፡ ወተናገረ፡ ዘከመዝ፡ ነገር። ወአምኑ፡ አቡየ፡ ወእምየ፡ በቃሉ፡ ወዘረዉ፡ ኵሎ፡ ንዋዮሙ፡ ለነዳያን፡ ወለእጓለ፡ ማውታ። ወእምድኅረ፡ ዘረዉ፡ ንዋዮሙ፡ ለአከ፡ ንጉሥ፡ ከመ፡ ይኅሥሥዎ፡ ለአቡየ፡ ወሖረ፡ ኀቤሁ፡ ወኖኀ፡ ንብረቱ። ወሰይጣንኒ፡ ዘርአ፡ ኅሊና፡ እኪት፡ ውስተ፡ ልበ፡ እኁሁ፡ ለአቡየ፡ ወተንሥአ፡ ላዕለ፡ እምየ፡ ወፈቀደ፡ ከመ፡ ትኩኖ፡ ሎቱ፡ ብእሲተ። ወአበየቶ፡ ከመ፡ ኢትግበር፡ ሎቱ፡ ፈቃዶ፡ ወነሥአተነ፡ ኪያየሂ፡ ወእኁየሂ፡ ወትፈቅድ፡ ከመ፡ ታብጽሐነ፡ ኀበ፡ አትንያስ፡ ከመ፡ ንትመሀር፡ ጥበበ፡ ወተግሣጸ፡ እስከ፡ ይገብእ፡ አቡነ፡ ኀቤነ፡ ወከመ፡ ንርሐቅ፡ እምዘ፡ ፈቀደ፡ ጸላኢ፡ ከመ፡ ይግበር፡ ባቲ። ወሶበ፡ ንወፅእ፡ እመርስ፡ እንዘ፡ ኢንርሕቅ፡ ብዙኀ፡ ተንሥአ፡ ላዕሌነ፡ ነፋስ፡ ጽኑዕ፡ በውስተ፡ ባሕር፡ ወተሰብረት፡ ሐመር። ወአነሂ፡ ተጽዕንኩ፡ በፈቃደ፡ እግዚአብሔር፡ ላዕለ፡ ዕፀ፡ ሐመር፡ ወገደፈኒ፡ ማዕበል፡ ውስተ፡ ዛቲ፡ ሀገር፡ ወእምየሂ፡ ወእኁየሂ፡ እስመ፡ ኢያእመርኩ፡ ዘኮኑ። ወይቤሎ፡ ጴጥሮስ፡ ትፈቅድኑ፡ ከመ፡ ትኩን፡ ሊተ፡ ረድአ፡ ወአውሥኦ፡ ወሬዛ፡ ወይቤ፡ ኦሆ። ወሶበ፡ ተደመረ፡ ዝንቱ፡ ወሬዛ፡ ምስለ፡ ጴጥሮስ፡ ወአልቦ፡ ዘአውሥኦ፡ እምኔሆሙ፡ ወኢአሐዱ፡ ነፍስ፡ እምሰብአ፡ ይእቲ፡ ሀገር። ወኮነ፡ መንፈሰ፡ እግዚአብሔር፡ ፈነዎ፡ ኀበ፡ ጴጥሮስ፡ ወአዘዞ፡ ከመ፡ ይፃእ፡ እምሰዶም፡ ለግብጽ። እስመ፡ ይእቲ፡ ሀገር፡ ዘተክዕወ፡ ባቲ፡ ደሞሙ፡ ለቅዱሳን፡ በደኀሪት፡ ዕለት። እስመ፡ ኢተፈጸመ፡ መዋዕል፡ በዘ፡ ይሰማዕ፡ ቃልከ፡ በውስተ፡ ዛቲ፡ ሀገር። ተንሥእ፡ አንተ፡ ወዝንቱ፡ ረድእከ፡ ወብጻሕ፡ ኀበ፡ ቀፍራ፡ እስመ፡ ብየ፡ አግብርተ፡ ዘድልዋን፡ ለተቀንዮ፡ ሊተ፡ ወጴጥሮስኒ፡ አፍጠነ፡ ወሪደ፡ ምስለ፡ ውእቱ፡ ረድእ፡ ወበጽሐ፡ ኀበ፡ ጽንፈ፡ ባሕር፡ ወረከበ፡ ሐመረ፡ ዘድልው፡ ለሐዊር፡ ወዐርገ፡ ውስተ፡ ሐመር፡ ወይፈቅድ፡ ከመ፡ ይብጻሕ፡ ኀበ፡ ሀገረ፡ ቀቅራ። ወሶበ፡ ቀርበ፡ ኀበ፡ መርሰ፡ ሀገር፡ ወነጸረ፡ ጴጥሮስ፡ ብዙኃነ፡ ሰብአ፡ በማዕዶተ፡ ባሕር፡ እለ፡ ይሐውሩ፡ ምሥራቀ፡ ወምዕራበ፡ እንዘ፡ ይኔጽሩ፡ ውስተ፡ ማይ። ወይቤ፡ ጴጥሮስ፡ ለኵሎሙ፡ ለእለ፡ ሀለዉ፡ ምስሌሁ፡ ውስተ፡ ሐመር፡ ኦደቂቅየ፡ ሶበ፡ በጻሕነ፡ ኀበ፡ መርስ፡ ወፈቀድነ፡ ከመ፡ ንረድ፡ ኢታፍጥኑ፡ ወሪደ፡ ከመ፡ እቅድም፡ አነ፡ ወሪደ፡ ወእነጽር፡ ግብሮሙ፡ ለዝንቱ፡ ሕዝብ፡ ከመ፡ ኢይረሲ፡ ጸላኢ፡ ዕቅፍተ፡ ቅድሜነ። ወእምድኅረ፡ አእመርኩ፡ ምንት፡ ግብሮሙ፡ ይረዱ፡ ኵሉ፡ ሰብእ፡ ኀበ፡ ፍኖቱ። ወወረደ፡ ጴጥሮስ፡ እምሐመር፡ ወበጽሐ፡ ኀበ፡ ውእቱ፡ ሰብእ። ወናሁ፡ ብእሲት፡ ትበኪ፡ ወሕዝብ፡ ይተልውዋ፡ ወአውሥአ፡ ጴጥሮስ፡ እንዘ፡ ይብላ፡ ኦብእሲት፡ ለምንት፡ ትበኪይ፡ ወምንተኑ፡ ተኀሥሢ፡ እምዝ፡ እስመ፡ አንቲ፡ ተሐውሪ፡ በማዕዶተ፡ ዛቲ፡ ባሕር። ወአውሥአቶ፡ ብእሲት፡ እንዘ፡ ትብሎ፡ ኦእግዚእየ፡ ወኮነ፡ እንዘ፡ ሀሎኩ፡ ውስተ፡ ሐመር፡ አነ፡ ወክልኤቱ፡ ደቂቅየ፡ ወተሰብረ፡ ሐመር፡ በውስተ፡ ባሕር፡ ወአነሂ፡ ወወልድየሂ፡ ዘይንእስ፡ ገደፈነ፡ ማዕበል፡ ውስተ፡ ዛቲ፡ ሀገር፡ ወዘይልህቅ፡ ወልድየ፡ ኢያእመርኩ፡ ዘኮነ፡ ወኵሎ፡ ዕለተ፡ እበጽሕ፡ ኀበ፡ ዛቲ፡ ባሕር፡ ወእጼውዕ፡ ኀበ፡ እግዚአብሔር፡ እመ፡ ይሰምዐኒ፡ ወያርኢየኒ፡ ሥጋሁ፡ ለወልድየ፡ ከመ፡ አውፅኦ፡ እማያት፡ ከመ፡ እግንዞ፡ ወእቅብሮ። ወአነሂ፡ አእመርኩ፡ እስመ፡ አድከምኩ፡ ልቦሙ፡ ለሰብአ፡ ዛቲ፡ ሀገር፡ እንዘ፡ እበኪ፡ ወአበክዮሙ፡ ዳእሙ፡ አነሂ፡ እሴፈዎ፡ ለእግዚአብሔር፡ ወጸሎቱ፡ ለብፁዕ፡ ጴጥሮስ፡ ይጸግዎሙ፡ ዕሴተ፡ ሠናየ፡ ህየንተ፡ ዘላሐዉ፡ ላዕሌየ እስመ፡ አነ፡ ብእሲት፡ ፈላሲት። ወበእንተዝ፡ አእመረ፡ ጴጥሮስ፡ እስመ፡ ከመ፡ ይእቲ፡ ወለደቶ፡ ለውእቱ፡ ረድእ፡ ወይቤላ፡ ጴጥሮስ፡ ብጽሒ፡ ኀበ፡ ዝንቱ፡ ወሬዛ፡ ከመ፡ ታእምርዮ፡ ከመ፡ ውእቱ፡ ወልድኪ፡ ወትቤሎ፡ ኦሆ፡ ኦእግዚእየ፡ ወጴጥሮስኒ፡ ሖረ፡ ምስሌሃ፡ ኀበ፡ ውእቱ፡ ሐመር፡ ወከልሐ፡ ከመዝ፡ እንዘ፡ ይብል፡ አክልሜጦስ፡ ተንሥእ፡ ወረድ፡ እምሐመር። ወእምዝ፡ ርእይዎ፡ እሙ፡ ወእኁሁ፡ ወአእመርዎ፡ ወበእንተዝ፡ ወድቁ፡ ኀበ፡ እገሪሁ፡ ለጴጥሮስ፡ እንዘ፡ ይፈርሁ። ወጴጥሮስኒ፡ አንሥኦሙ፡ ወይቤሎሙ፡ ተንሥኡ፡ ኦውሉድየ፡ ወአእምሩ፡ ጸጋ፡ ሀብቱ፡ ለእግዚአብሔር፡ ለክሙ፡ ዘኢኀደገ፡ ሥጋክሙ፡ ይማስን፡ በውስተ፡ ባሕር፡ ወአነሂ፡ እኤዝዘክሙ፡ ከመ፡ ትግብኡ፡ ኀበ፡ ሀገርክሙ፡ ሮሜ፡ እስመ፡ አቡክሙ፡ ናሁ፡ በጽሐ፡ ኀበ፡ ንጉሥ፡ ወአሥነየ፡ ተመጥዎቶ፡ ወውእቱ፡ ይገብእ፡ ኀቤክሙ፡ በሰላም፡ ወእኁሁሰ፡ ለአቡክሙ፡ ሞተ፡ ኢትሕዘኑ፡ ወጴጥሮስ፡ ወሀቦሙ፡ ሰላመ፡ ወፈነዎሙ፡ ኀበ፡ ሀገሮሙ፡ ወእምድኅረ፡ መሀሮሙ፡ ጴጥሮስ፡ ምሥጢራተ፡ ሕይወት፡ ወነበረ፡ ጴጥሮስ፡ ውስተ፡ ይእቲ፡ ሀገር፡ እንዘ፡ ይሰብክ፡ ሎሙ፡ አሚነ፡ በእግዚአብሔር፡ ወበዋሕድ፡ ወልዱ፡ ወመንፈስ፡ ቅዱስ፡ ማሕየዊ፡ እስከ፡ ይአምኑ፡ ኵሎሙ፡ እለ፡ ውስተ፡ ይእቲ፡ ሀገር። ወብእሲቱ፡ ለቅውስጦስ፡ አተወት፡ ኀበ፡ ሀገረ፡ ሮሜ፡ ምስለ፡ ደቂቃ፡ በሰላም፡ ወአልቦ፡ አሐዱ፡ ዘአእመረ፡ ምንተኒ፡ ዘኮነ፡ ላዕሌሃ፡ ዳእሙ፡ ይእቲ፡ ነገረት፡ ለአመታ፡ ዘኀረየታ፡ ለእንተ፡ ትትለአካ፡ ኵሎ፡ ዘረከባ፡ ወዘከመ፡ ተሰብረ፡ ሐመር፡ ወዘከመ፡ አስተጋብኦሙ፡ እግዚአብሔር፡ እምድኅረ፡ ቀብፁ፡ እምአስጥሞተ፡ ባሕር፡ በጸሎቱ፡ ለቅዱስ፡ ጴጥሮስ። ወእምድኅረ፡ ዐሡር፡ ወሠሉስ፡ መዋዕል፡ እንዘ፡ ይነብሩ፡ ውስተ፡ ማኅደሮሙ፡ ወይዜከሩ፡ ዕበዮ፡ ለእግዚአብሔር፡ በኵሉ፡ ጊዜ። ወክልኤቱ፡ ደቂቃ፡ ለይእቲ፡ ብእሲት፡ ሰትዩ፡ ማየ፡ እምውስተ፡ ንዋይ፡ ዘኢክዱን፡ ዘቦቱ፡ ሕምዘ፡ ወሞቱ፡ በይእቲ፡ ሰዐት፡ ወእሞሙኒ፡ በከየት፡ ላዕሌሆሙ፡ አንብዐ፡ መሪረ፡ እንዘ፡ ትብል፡ ከመዝ፡ አሌሊተ፡ ኦውሉድየ፡ ከመ፡ ኢተክህለክሙ፡ ትድኀኑ፡ ጽሑፍ፡ ዘተጽሕፈ፡ ላዕሌክሙ፡ እስመ፡ ሞትክሙ፡ በላዕለ፡ ማይ። ወበእንተዝ፡ ሶበ፡ ተሐጕለት፡ ሐመር፡ በቀዳሚ፡ ጊዜ፡ እስመ፡ ኢፈቀደ፡ እግዚአብሔር፡ ከመ፡ ያሕዝነኒ፡ ወያሕጕል፡ ነፍስክሙ፡ በውስተ፡ ባሕር። እስመ፡ አነሂ፡ አመንኩ፡ በነገሩ፡ ለጴጥሮስ፡ ረድእ፡ ቅዱስ፡ ወአስተጋብአ፡ ሊተ፡ ሥጋክሙ፡ ሕያወ። ወናሁ፡ ኦውሉድየ፡ ኀበ፡ ተጋባእክሙ፡ ውስተ፡ ማኅደርክሙ፡ ወሞትክሙ፡ በማይ፡ ዳእሙ፡ አነሂ፡ አአኵቶ፡ ለእግዚአብሔር፡ ላዕለ፡ ኵሉ፡ ዘፈቀደ፡ እስመ፡ ውእቱ፡ ፈጣሪክሙ፡ ወውእቱ፡ ነሥአክሙ። ወይእቲ፡ ተንሥአት፡ ፍጡነ፡ ወነሥአት፡ አብድንቲሆሙ፡ ለውሉዳ፡ ወገነዘቶሙ፡ በእደዊሃ፡ ይእቲ፡ ወአመታ፡ ዘኀረየታ፡ ወአብአቶሙ፡ ውስተ፡ ውሳጤ፡ ቤታ፡ ወአንበረቶሙ፡ ውስተ፡ መዝገብ፡ ዘምሉእ፡ አፈወ፡ ወዐጸወት፡ አንቀጸ፡ ወወፅአት፡ ውስተ፡ ማኅደራ፡ ወነበረት፡ እንዘ፡ ትነብብ፡ ዕበዮ፡ ለእግዚአብሔር፡ ወአዘዘታ፡ ለአመታ፡ ከመ፡ ትዕቀብ፡ ምሥጢረ፡ ዘኮነ፡ በእንተ፡ ዘሞቱ፡ ውሉዳ፡ ከመ፡ ኢያእምራ፡ ሰብእ፡ ወአቡሆሙኒ፡ ሶበ፡ ይበጽሕ፡ ከመ፡ ኢትንግሮ፡ እስመ፡ ውሉዱ፡ ሞቱ፡ ከመ፡ ኢይሕዘን፡ ልቡ፡ እስከ፡ ይፈቅድ፡ እግዚአብሔር፡ ወንርከብ፡ ፍኖተ፡ ለተናግሮቱ፡ ከመ፡ ያእምሮ። ወኮነ፡ እምድኅረ፡ ተፈጸመ፡ ፫፡ ዓመት፡ ወገብአ፡ ቅውስጦስ፡ እምኀበ፡ ንጉሥ፡ ወሰምዑ፡ ኵሎሙ፡ መኳንንት፡ ወዐበይተ፡ ሀገረ፡ ሮሜ፡ እስመ፡ ቅውስጦስ፡ ዐቢይ፡ መኰንን፡ በጽሐ፡ ኀበ፡ ሀገሩ፡ ሕያው። ወውእቶሙኒ፡ ለብሱ፡ ሠናያተ፡ አልባሲሆሙ፡ ወነሥኡ፡ ኵሎሙ፡ እለ፡ ይነብሩ፡ ውስተ፡ ሀገር፡ በእደዊሆሙ፡ አዕፁቃተ፡ እምዕፀው፡ ወወፅኡ፡ አፍአ፡ እምሀገር፡ ከመ፡ ይትቀበልዎ። ወኮነ፡ ለ፪፡ ደቂቁ፡ ፪፡ አፍራስ፡ ጸዓዳ፡ ወሶበ፡ ይሰምዑ፡ ከመ፡ ይአቱ፡ አቡሆሙ፡ እምኀበ፡ ንጉሥ፡ ይለብሱ፡ አልባሲሆሙ፡ ሠናያተ፡ ወይጼዐኑ፡ በአፍራሲሆሙ፡ ወተሳርጊዎሙ፡ በወርቅ፡ ወበብሩር፡ ይትቄበሉ፡ አቡሆሙ፡ ወየሐውሩ፡ ምስሌሁ፡ እስከ፡ ይበውኡ፡ ውስተ፡ ሀገር። ወሶበ፡ በጽሐ፡ ኀበ፡ ማኅደሩ፡ ወኢነጸሮሙ፡ ለውሉዱ፡ ከመ፡ ቀዳሚት፡ ሥርዓት፡ እለ፡ ይወፅኡ፡ ለተቀብሎቱ፡ ወሐተታ፡ ለአክሮስያ፡ ብእሲቱ፡ እንዘ፡ ይብል፡ አይቴ፡ ሀለዉ፡ ደቂቅየ፡ እስመ፡ ነጸርክዎሙ፡ ምስለ፡ ሕዝብ፡ ምንተ፡ ኮኑ፡ ዘኢተቀበሉኒ፡ በከመ፡ ሥርዓቶሙ፡ ቦኑ፡ ዘረከቦሙ። ወአውሥአት፡ ብእሲቱ፡ እንዘ፡ ትብሎ፡ ኢትፍራህ፡ ኦእኁየ፡ እስመ፡ ኢኮነት፡ ተኃጥኦቶሙ፡ ለእኪት፡ አንተ፡ ታአምር፡ እስመ፡ በጊዜ፡ ዘወሀብነ፡ ኵሎ፡ ንዋይነ፡ ለነዳያን፡ ወለእጓላ፡ ማውታ፡ ወአልቦ፡ ዘተረፈ፡ እምንዋይነ፡ ዘይበቍዕ፡ ለተሰርግዎተ፡ ዝዓለም። ወሶበ፡ አእመርኩ፡ ምጽአተከ፡ ወቀሪቦተከ፡ ኀበ፡ ሀገር፡ ፈነውክዎሙ፡ ኀበ፡ ቤተ፡ እኅትየ፡ ከመ፡ ተሀቦሙ፡ ሠናያተ፡ አልባሳ፡ በዘ፡ ይሰረገዉ፡ ቦቱ፡ ወዘይበቍዕ፡ ከመ፡ ያስፍሕዎ፡ ለመንበርከ። ሶበ፡ ይትጋብኡ፡ እለ፡ ይብሉከ፡ ሰላም፡ ዘአቶከ፡ ወሶበ፡ ገብኡ፡ እምቤተ፡ እኅትየ፡ ይመጽኡ፡ ኀቤከ። ወአቅደሙ፡ ነጊረ፡ እሉ፡ ጉቡአን፡ ኀቤሁ፡ በዜናሁ፡ ለንጉሥ፡ ዘከመ፡ እፎ፡ ሀለወ፡ ንጉሥ፡ ወሶበ፡ ጐንደየ፡ ምጽአቶሙ፡ ለደቂቁ፡ ደገመ፡ ቃለ፡ ለብእሲቱ፡ ወይቤላ፡ ናሁ፡ ፫፡ ዓመተ፡ ነበርኩ፡ ዘኢርኢክዎሙ፡ ለውሉድየ፡ ወኖኀ፡ ፍቅርየ፡ በእንቲአሆሙ፡ ወአውሥአቶ፡ እንዘ፡ ትብሎ፡ እስመ፡ ኢተክህሎሙ፡ ይብጽሑ፡ ኀቤከ፡ በእንተ፡ ብዙኅ፡ ሕዝብ፡ ወሶበ፡ ይሐውሩ፡ ይበጽሑ፡ ኀቤከ፡ ወሶበ፡ ይዐርብ፡ ፀሐይ፡ ወበጽሐ፡ ጊዜ፡ ድራር፡ ወኵሎሙ፡ መኳንንት፡ ወዐቢይተ፡ ሀገር፡ አስተዳለዉ፡ ብዙኀ፡ መባልዕተ፡ ለድራር፡ ወወሰዱ፡ ኀበ፡ ማኅደሩ፡ ለቅውስጦስ፡ ከመ፡ ይብልዑ፡ ኅቡረ፡ ኅብስተ፡ ወወፅአት፡ አክሮስያ፡ ብእሲቱ፡ ወከልአቶሙ፡ ወትቤሎሙ፡ ኢያእመርክሙኑ፡ እስመ፡ እግዚእየ፡ ብዙኀ፡ መዋዕለ፡ እንዘ፡ ኢሀሎ ኀቤየ፡ ወአነሂ፡ እፈቅድ፡ ከመ፡ አሀሉ፡ ምስሌሁ፡ በዛቲ፡ ሌሊት፡ ወእነግሮ፡ ኵሎ፡ ዘረከበኒ፡ እምድኅረ፡ ርሕቀ፡ እምኔየ። ወበሳኒታ፡ በሥምረቱ፡ ለእግዚአብሔር፡ ትትጋብኡ፡ ኀቤሁ፡ ወይከውን፡ ኵሎ፡ ዘፈቀድክሙ። ወሶበ፡ አተዉ፡ ኵሉ፡ ሕዝብ፡ ዐፀወት፡ ብእሲቱ፡ ኵሎ፡ አናቅጸ፡ ቤታ፡ ወአቅረበት፡ ኀቤሁ፡ ማእደ፡ ወትቤሎ፡ ተንሥእ፡ ኦእግዚእየ፡ ወብላዕ፡ ዘቀርበ፡ እስመ፡ ኀለፈ፡ ጊዜ፡ ድራር። ወአውሥአ፡ እንዘ፡ ይብላ፡ ሕያው፡ እግዚአብሔር፡ አምላከ፡ ጴጥሮስ፡ ከመ፡ ኢእጥዕም፡ እክለ፡ ወኢምንተኒ፡ እስከ፡ አአምር፡ በእንተ፡ ምንት፡ ግብር፡ ጐንደዩ፡ ፪፡ ደቂቅየ፡ ዘኢተቀበሉኒ። ወአውሥአቶ፡ ብእሲቱ፡ ኄርት፡ እንዘ፡ ትብሎ፡ ተካየድ፡ ምስሌየ፡ ኪዳነ፡ ሶበ፡ ነገርኩከ፡ ነገረ፡ ከመ፡ ትትመጠው፡ እምኔየ፡ ወኢትእበየኒ፡ ቦቱ፡ ወእምድኅረ፡ ዝንቱ፡ አቀርብ፡ ውሉደከ፡ ኀቤከ። ወይቤላ፡ ለእመ፡ ይትከሀለኒ፡ ገቢሮቱ፡ ኢይአብየኪ፡ በሊ፡ ወአውሥአቶ፡ ወትቤሎ፡ ኦእግዚእየ፡ እምከመ፡ ወፃእከ፡ ለነጊድ፡ በጽሐ፡ ኀቤየ፡ ብእሲ፡ ባዕል፡ ወአንበረ፡ ኀቤየ፡ ዕንቈ፡ ባሕርየ፡ ክቡር፡ ዘኢያአምር፡ ሤጦ፡ ወአዘዘኒ፡ ከመ፡ እዕቀባ፡ ወአነሂ፡ ነሣእክዋ፡ እምኔሁ፡ ለይእቲ፡ ባሕርይ፡ ክብርት፡ ወሠናይት፡ በኀቤየ፡ ክብራ፡ እስመ፡ ታበርህ፡ በሌሊት፡ ከመ፡ ሞዐልት፡ ወአፍቀረታ፡ ነፍስየ፡ ወፈተወታ፡ ልብየ፡ ወሐለይኩ፡ በልብየ፡ ሶበ፡ በጽሐ፡ ውእቱ፡ ብእሲ፡ ባዕለ፡ ውእቱ፡ ዕንቍ፡ ክቡር፡ ከመ፡ እክሐዶ፡ ኪያሃ፡ ወናሁ፡ በጽሐ፡ እምነግዱ፡ ወኀሠሠ፡ ዘወሀበኒ፡ ወክሕድክዎ፡ ይእተ፡ ባሕሪየ፡ ወይቤለኒ፡ ኢይትበአስ፡ ምስሌኪ፡ ከመ፡ ኢይሳለቁ፡ ላዕሌየ፡ ሰብአ፡ ዛቲ፡ ሀገር፡ እስመ፡ ተበአስኩ፡ ምስለ፡ ብእሲት፡ አጋዕዚት፡ ክብርት፡ ወብእሲሃ፡ ርሕቀ፡ እምኔሃ፡ ዳእሙ፡ አነ፡ እጸንሕ፡ እስከ፡ ይገብእ፡ ምትኪ፡ እምነግዱ፡ አነ፡ አአምሮ፡ እስመ፡ ውእቱ፡ ብእሲ፡ ይፈርሆ፡ ለእግዚአብሔር። ወሶበ፡ ያአምር፡ ነገሮ፡ ለውእቱ፡ ባሕሪይ፡ ውእቱ፡ ያገብእ፡ ሊተ፡ ወአነሂ፡ አአምር፡ ሶበ፡ አእመረ፡ ውእቱ፡ ብእሲ፡ በጺሖተከ፡ እምነግድከ፡ ውእቱ፡ ይገብእ፡ ወይኀሥሥ፡ ንዋዮ፡ ወአነሂ፡ እስእለከ፡ ሶበ፡ ይበጽሕ፡ ከመ፡ ትርድአኒ፡ ወትበሎ፡ እስመ፡ ኢወሀብከ፡ ወኢምንተኒ። ወቅውስጦስሂ፡ ሶበ፡ ሰምዐ፡ ነገረ፡ ብእሲቱ፡ አውሥኣ፡ እንዘ፡ ይብላ፡ ኦብእሲት፡ ሕርትምት፡ እፎኑ፡ ቦአ፡ ውስተ፡ ልብኪ፡ ዝንቱ፡ ሕሊና፡ እኪት፡ ከመ፡ ትክሐዲዮ፡ ንዋዮ፡ ለዝንቱ፡ ብእሲ፡ ዳእሙ፡ ሶበ፡ ይበጽሕ፡ ይኅሥሥ፡ እምአዘዝኩኪ፡ ከመ፡ ታግብኢ፡ ሎቱ፡ ንዋዮ፡ ሶበ፡ አእመርኩ፡ ኀበ፡ ሀለወ፡ እምሖርኩ፡ ኀቤሁ፡ ከመ፡ ይብጻሕ፡ ወይንሣእ፡ ንዋዮ፡ እምኔኪ፡ እምቅድመ፡ እብላዕ፡ እክለ። ኢያእመርኪኑ፡ እስመ፡ ዝንቱ፡ ዐቢይ፡ ኀጢአት፡ ውእቱ፡ ለእለ፡ ይፈቅዱ፡ ንዋየ፡ ባዕድ። ወሶበ፡ ትሰምዕ፡ ዘንተ፡ ነገረ፡ እምኔሁ፡ ወሶበ፡ አእመረት፡ ጸንዐ፡ አሚኖቱ፡ አኀዘቶ፡ እደዊሁ፡ ወአብአቶ፡ ውስተ፡ ውሳጤሃ፡ ወቀደመት፡ በዊአ፡ ወከሠተት፡ መንጦላዕተ፡ ውስተ፡ መካን፡ ኀበ፡ ሀለዉ፡ ውሉዳ፡ ወትቤሎ፡ ነጽር፡ እለ፡ ሀለዉ፡ ውስተ፡ ዝንቱ፡ መዝገብ፡ ከመ፡ ትርአይ፡ ውሉድከ። ወበይእቲ፡ ሰዓት፡ ሶበ፡ ይሬኢ፡ ውሉዶ፡ ምውታኒሆሙ፡ አቅደመ፡ እንዘ፡ ይከልሕ፡ በብካይ፡ ወአውሥአቶ፡ እንዘ፡ ትብሎ፡ ተዘከር፡ ኦእግዚእየ፡ ዘትቤለኒ፡ ሶበ፡ ይበጽሕ፡ ውእቱ፡ ባዕለ፡ ባሕሪይ፡ ይኅሥሥ፡ ንዋዮ፡ እምኢከላእኩ፡ ትቤለኒ። ወናሁ፡ አንተ፡ ትሬኢ፡ ሥጋሆሙ፡ ከመ፡ ትካት፡ ፍጹመ፡ እደዊሆሙ፡ ወእገሪሆሙ፡ ወኵሉ፡ አእባሎሙ፡ ወአልቦ፡ ዘነተገ፡ እምሥጋሆሙ፡ ዘእንበለ፡ ባሕቲታ፡ መንፈስ፡ እንተ፡ ነበረት፡ ኀበ፡ ውሉድከ፡ ይእቲ፡ ለእግዚአብሔር። ዛቲ፡ ይእቲ፡ ባሕሪይ፡ ወይእቲ፡ ምዕቅብና፡ እለ፡ ገብረ፡ እግዚአብሔር፡ ውስተ፡ ሥጋ፡ እስከ፡ ጊዜ፡ ይነሥኣ፡ ወአልቦ፡ ፩፡ ዘይትከሀሎ፡ ከመ፡ ይክልኦ፡ ለእግዚአብሔር፡ እምዘ፡ ፈቀደ። እግዚአብሔር፡ ወሀበ፡ ወእግዚአብሔር፡ ነሥአ፡ በከመ፡ ፈቀደ፡ እግዚአብሔር፡ ለይኩን፡ ወይኩን፡ ስመ፡ እግዚአብሔር፡ ቡሩከ፡ ወይእዜኒ፡ ወዘልፈኒ፡ ወለዓለመ፡ ዓለም፡ አሜን። ወትቤሎ፡ ተንሥእ፡ ፍጡነ፡ ንስአሎ፡ ለእግዚአብሔር፡ ከመ፡ ያንግፍ፡ ላሐ፡ ልብነ፡ በእንተ፡ እለ፡ ሞቱ፡ ውሉድነ። ወእምዝ፡ ተንሥኡ፡ ፍጡነ፡ ወሰፍሑ፡ እደዊሆሙ፡ በውስተ፡ ውሳጤሆሙ፡ በኅብረት፡ ወበልብ፡ ትሑት፡ ኀበ፡ እግዚአብሔር፡ ሕያው፡ ከሃሊ፡ ወገባሪ፡ ለኵሉ፡ ዘፈቀደ። ወሶበ፡ አንኁ፡ ጸሎቶሙ፡ ሰምዑ፡ ቃለ፡ እንዘ፡ የዐውዶሙ፡ በደመና፡ ብሩህ፡ ከመዝ፡ እንዘ፡ ይብል፡ ቅውስጦስ፡ ቅውስጦስ፡ እስመ፡ አንተ፡ ተመጠውከ፡ ቃሎ፡ ለጴጥሮስ፡ ረድእየ፡ ወኵሉ፡ ዘበጽሐክሙ፡ ሐዘን፡ እስመ፡ ኢተመዓዕክሙ፡ ወኢሐዘንክሙ፡ ላዕለ፡ ሞቶሙ፡ ለውሉድክሙ፡ ወበእንተዝ፡ እጼግዎሙ፡ ለክሙ፡ ሕያዋኒሆሙ። አፍጥኑ፡ ተንሥኡ፡ ወሰአሉ፡ ወትብሉ፡ በስመ፡ እግዚአብሔር፡ አምላከ፡ ጴጥሮስ፡ ዘአተወ፡ ወሰበከ፡ ኀበ፡ ሀገረ፡ ሮሜ፡ ወአመነ፡ ቦቱ፡ ወአእመርነ፡ ክሂሎቶ፡ ለኢየሱስ፡ ክርስቶስ፡ ናዝሬዊ፡ ወበስሙ፡ ንስእል፡ ከመ፡ ይሕየዉ፡ ውሉድነ፡ እክልሜጦስ፡ ወከናሲዎስ፡ ወውእቶሙኒ፡ ደገሙ፡ ስእለተ፡ በከመ፡ አዘዞሙ። ወበይእቲ፡ ሰዓት፡ ተንሥኡ፡ ፪፡ ውሉዶሙ፡ እምዉታን፡ ወውእቶሙኒ፡ እለ፡ ሐይዉ፡ እስመ፡ ተወከሉ፡ በእግዚአብሔር፡ ወውእቶሙ፡ ወፅኡ፡ ውስተ፡ ሀገር፡ ወውስተ፡ ኵሉ፡ በሐውርት፡ ይዑዱ፡ እንዘ፡ ይብሉ፡ ቡሩክ፡ እግዚአብሔር፡ አምላከ፡ ጴጥሮስ፡ ሐዋርያሁ፡ ቅዱስ፡ ለኢየሱስ፡ ክርስቶስ፡ ወልደ፡ እግዚአብሔር፡ ሕያው፡ ዘያሕይዎሙ፡ ለምዉታን፡ ውእቱ፡ ይፌውሶሙ፡ ለኵሉ፡ ድዉያን፡ ዐቃቤ፡ ሥራይ፡ ለነፍሳት፡ ወለሥጋ። ወወፅአ፡ ዝንቱ፡ ዜና፡ ውስተ፡ ኵሉ፡ በሐውርት፡ ወኵሎሙ፡ እለ፡ ሰምዑ፡ ሰብሕዎ፡ ለእግዚአብሔር፡ ዘሎቱ፡ ስብሐት፡ ወክሂሎት፡ ወአኰቴት፡ ወለወልዱ፡ ወለመንፈስ፡ ቅዱስ፡ እስከ፡ ለዓለመ፡ ዓለም፡ አሜን። ወአክልሜጦስኒ፡ ደለዎ፡ ከመ፡ ይኩን፡ ለጵጵስና፡ ወሤሞ፡ ለእኁሁ፡ ዲያቆነ፡ ጸሎቶሙ፡ ወበረከቶሙ፡ ትብጽሐነ፡ ወትዕቀበነ፡ ለዓለመ፡ ዓለም፡ አሜን።

ወሶበ፡ ቦአ፡ ጴጥሮስ፡ ውስተ፡ ሀገረ፡ ሮሜ፡ ርእሰ፡ መንበረ፡ ነገሥት፡ ሮሜ፡

ከመ፡ ይኩን፡ ለጳጳስና፡ ወሤሞ፡ ለእኁሁ፡ ዲያቆን። ጸሎቶሙ፡ . . . . .ommission by