Homily on the Archangel Michael by Timothy of Alexandria (Ḫǝdār)

¹፩፤ አውሎግሶን፡ አውሎግሶን፡ አውልግሶን። ዐቢይ፡ በዓል፡ ለነ፡ ዮም፡ ኦ፡ ፍቁራንየ፡ ለንትጋባእ፡ ወንትፈሣሕ፡ ወይትሐሠይ፡ ልብነ፡ ወናዕርፍ፡ በዛቲ፡ ዕለት፡ ቅድስት።
²፪፤ ወአነ፡ ርኢክዎ፡ ለዐቢይ፡ ወክቡር፡ ወኀያል፡ ወልዑል፡ ወመተንብል፡ ወኄር፡ ብፁዕ፡ ወቅዱስ፡ ሚካኤል፡ ሊቀ፡ መላእክት፡ የሀበኒ፡ ቃለ፡ ጥዑመ፡ ዘመንፈስ፡ ቅዱስ፡ በከመ፡ ይቤ፡ ዳዊት፡ በመዝሙር፡ እስመ፡ ለመላእክቲሁ፡ ይኤዝዞሙ፡ በእንቲ፡ ኣከ፡ ከመ፡ ይዕቀቡከ፡ በኵሉ፡ ፍናዊከ፡ ወበእደዊሆሙ፡ ያነሥኡከ፡ ለእመ፡ ወሀቡከ፡ መሥዋዕተ።
³፫፤ መልአከ፤ እግዚአብሔር፡ የሐጽሮሙ፡ ለእለ፡ ይፈርሁ፡ እምኔሁ፡ ወያወፅኦሙ፡ ቅዱስ፡ ሚካኤል፡ ሊቀ፡ መላእክት።
⁴፬፤ መኑ፡ ውእቱ፡ ዝ፡ መልአክ፡ ዘየሐጽሮሙ፡ ለእለ፡ ይፈርህዎ፡ ለእግዚአብሔር፡ ወያወፅአሙ፡ ለእለ፡ የአምኑ፡ ቦቱ፡ አኮኑ፡ ቅዱስ፡ ሚካኤል፡ ሊቀ፡ መላእክት፡ በዛቲ፡ ዕለት፡ ይስእል፡ ሎሙ፡ ከመ፡ ይምሐሮሙ፡ እግዚአብሔር።
⁵፭፤ ወይጼሊ፡ ኀበ፡ እግዚአብሔር፡ ወይቄድሶሙ፡ ወያነጽሓሙ፡ ወይመርሖሙ፡ ኀበ፡ ፍኖተ፡ ሕይወት፡ ወብርሃን።
⁶፮፤ አኮ፡ በእንተ፡ ጻድቃን፡ ባሕቲቶሙ፡ አላ፡ ለኃጥኣንሂ፡ ይስእል፡ ሎሙ፡ ከመ፡ ይምሐሮሙ፡ እግዚአብሔር።
⁷፯፤ ወለእመ፡ ወሀበ፡ ብእሲ፡ አሐደ፡ ኅብስተ፡ ለነዳይ፡ ኢይነውም፡ በእንቲኣሁ፡ ማር፡ ሚካኤል፡ ሊቀ፡ መላእክት፡ ወለእመ፡ ወሀበ፡ ጽዋዐ፡ ማይ፡ ቈሪር፡ ኢይነውም፡ በእንቲኣሁ። ወለእመ፡ ሰመየ፡ ወልዶ፡ ወወለቶ፡ በስመ፡ ዚኣሁ፡ ለሚካኤል፡ ኢይነውም፡ በእንቲኣሆሙ፡ ቅዱስ፡ ሚካኤል፡ ወለዘይውህብ፡ በስሙ፡ ለነዳይ፡ እስከ፡ ፍተአሐዱ፡ ኅብስት፡ ወጽዋዐ፡ ማይ፡ ኢይነውም፡ በእንቲአሁ፡ ለዓለመ፡ ዓለም።
⁸፰፤ ወለእመ፡ ፈቀድክሙ፡ ታእምሩ፡ ወታዕርፉ፡ (፩) ወትስምዑ፡ ነገሮ፡ ለሚካኤል፡ ስምዐ፡ ኮንኩ፡ አነ፡ አቡክሙ፡ ደማቴዎስ፡ ወዐረጉ፡ ኢየሩሳሌም፡ ከመ፡ እስግድ፡ ለመስቀል፡ ክቡር፡ ወለመቃብረ፡ እግዚእነ፡ ኢየሱስ፡ ክርስቶስ፡ ዘተንሥአ፡ እሙታን።
⁹፱፤ ይእቲኬ፡ ዘታነግፈነ፡ እምላሕነ፡ ቤተ፡ ክርስቲያን፡ ወእንተ፡ አንሶሰወ፡ ውስቴታ፡ እግዚእነ።
¹⁰፲፤ ወቦእኩ፡ ቤተ፡ ማርያም፡ እሙ፡ ለዮሐንስ፡ ረድእ፡ ወንጌላዊ፡ ነጸርኩ፡ ወረከብኩ፡ መጽሐፈ፡ ቅዱሰ፡ ዘጸሐፎ፡ ዮሐንስ፡ ወንጌላዊ፡ ረድእ፡ ወይብል፡ ንባበ፡ መጽሐፉ፡ ዝንቱ፡ ውእቱ፡ ዘይረድአነ፡ ወያጸንዐነ።
¹¹፲፩፤ ወረከብኩ፡ ዘያሥተፌሥሐኒ፡ በከመ፡ ይቤ፡ ዮሐንስ፡ ወንጌላዊ፡ ወሰማዕት፡ ወይቤ፡ ሶበ፡ ቦእኩ፡ አነ፡ አንዘ፡ ሀሎ፡ በገባሁ፡ ጊዜ፡ የእግዚአብሔር፡ የሐውር፡ ወውእቱ፡ አርአየኒ፡ ኵሎ፡ መንክራተ፡ ዘውስተ፡ ታምራትና፡ ብዙኀ፡ ወአዕረገኒ፡ ወወሰደኒ፡ ወይቤለኒ፡ ርኢ፡ ደይነ፡ መደንግፀ፡ ዐቢይ፡ ጥቀ።
¹²፲፪፤ ወዝንቱ፡ ደይን፡ ይርሕብ፡ እምነ፡ ዐዘቅት፡ ታሕቲት፡ ወሰማዕኩ፡ ገዓረ፡ ዐቢየ፡ ከመ፡ ድምፀ፡ ማይ፡ ብዙኅ፡ ወዕቤሎ፡ ለመልአክ፡ ዘየሐውር፡ ምስሌየ፡ ንግረኒ፡ እግዚእየ፡ ምንትኑ፡ ዝ፡ ግብር፡ ዘእሬኢ፡ አነ፡ ዘየዐርግ፡ እምኔሁ፡ ዐቢይ፡ ጢስ፡ ዘየዐርግ፡ እምላዕለ፡ ሠለስቱ፡ ምእት፡ እምልዮን፡ ዘውእቱ፡ ግበ፡ እሳት፡ ዘኢይበጽሕዎ፡ በሠለስቱ፡ ምእት፡ ዕለት።
¹³፲፫፤ ዓዲ፡ ይወፅኡ፡ አናብስተ፡ እሳት፡ ወአክይስተ፡ እሳት፡ እምሕንፉይ፡ ዘውእቱ፡ መሬተ፡ ደይን፡ ወእምሕንሲት፡ ዘውእቱ፡ መካነ፡ ሥቃይ፡ ወእምሕራንኮስ፡ ዘውእቱ፡ በርባሮስ፡ ወህየ፡ ሀለዉ፡ ዘኢይቈርር፡ እሳት፡ ወዘኢይነውሙ፡ ዕፄያት።
¹⁴፲፬፤ ወኢይወፅኡ፡ ምዕረ፡ እምኔሁ፡ ነፍሳተ፡ ኃጥኣን፡ አእላፈ፡ አእላፋት፡ ወትእልፊተ፡ አእላፋት፡ ወኢይትሌዐሉ፡ ላዕለ፡ እምድር፡ ወይወርዱ፡ ውስተ፡ መትሕተ፡ ታሕቲት፡ ዘደይን።
¹⁵፲፭፤ ወይቤለኒ፡ ውእቱ፡ መልአክ፡ ዘየሐውር፡ ምስሌየ፡ ኦ፡ ዮሐንስ፡ ፍቁርየ፡ ወፍቁረ፡ እግዚአብሔር፡ ርኢ፡ ዐቢየ፡ ደይነ፡ ዘያደነግፅ፡ እምኵሉ፡ ደይን።
¹⁶፲፮፤ ወዕቤ፡ አሌ፡ ሎሙ፡ ለኵሎሙ፡ ኃጥአን፡ እለ፡ ይወድይዎሙ፡ ውስቴቱ፡ ለዝንቱ፡ ደይን።
¹⁷፲፯፤ ወዝንቱ፡ የአኪ፡ እምኵሉ፡ ደይን፡ ዘርኢኩ፡ እንከ፡ ወራሕቡ፡ ይኪውን፡ መጠነ፡ ኵላ፡ ምድር፡ ወዕመቃቲሁ፡ ከመ፡ ዝ፡ ወአነ፡ እንግረከ፡ ኢይወፅእ፡ እምኔሁ፡ ኵሉ እኩይ።
¹⁸፲፰፤ ወርኢኩ፡ ላዕለ፡ ኃጥኣን፡ ዘይወርድ፡ መቅሠፍተ፡ መከራ፡ ከመ፡ ክቡድ፡ ወጽኑዕ፡ ውእቱ፡ ላዕለ፡ እለ፡ ይነብሩ፡ ውስቴቱ።
¹⁹፲፱፤ ወያወርዶሙ፡ ድምፀ፡ መዓቱ፡ ለእግዚአብሔር፡ ታሕተ፡ ዕመቃቲሃ፡ ዘሑረታቲሃ፡ መጠነ፡ ሠለስቱ፡ ምእት፡ ዕለት፡ ይከውን፡ እንዘ፡ ይወርድ፡ ሰብእ፡ ወኢይትሌዐል፡ በእመት። ወኵሎሙ፡ ኃጥኣን፡ እሱራን፡ እደዊሆሙ፡ ወእገሪሆሙ፡ ውስቴታ፡ ወመንገዶሙ፡ ለኵሎሙ፡ ኃጥኣን፡ ኀቤሃ።
²⁰፳፤ ወአነ፡ ዮሐንስ፡ ሶበ፡ ርኢኩ፡ ዘይከውን፡ ላዕለ፡ እሉ፡ በከይኩ፡ ዐቢየ፡ ብካየ፡ በእንተ፡ ኵነኔሆሙ፡ ለኃጥኣን።
²¹፳፩፤ ወይቤለኒ፡ ዝኩ፡ መልአክ፡ ኦ፡ ዮሐንስ፡ ፍቁረ፡ እግዚአብሔር፡ ኢትብኪ፡ በእንተ፡ ዝ፡ እስመ፡ ሀለወከ፡ ዮም፡ ትርአይ፡ ፍሥሓ፡ እምነ፡ ቅዱስ፡ ሚካኤል፡ ሊቀ፡ መላእክት፡ ዘላዕለ፡ ሰማይ፡ ንቡር፡ ዕበዩ፡ ወክብሩ።
²²፳፪፤ ወእንዘ፡ ይብለኒ፡ ከመ፡ ዝ፡ መጽአ፡ ቅዱስ፡ ሚካኤል፡ ሊቀ፡ መላእክት፡ እምሰማይ፡ ዘንቡር፡ ዲበ፡ ርእሱ፡ አክሊለ፡ ክብር፡ ወቅድሜሁ፡ ይሴብሑ፡ መላእክት፡ ቅዱሳን፡ ወጸድቃን፡ ወየሐውሩ፡ ምስሌሁ፡ ነቢያት፡ ወሐዋርያት፡ ጳጳሳት፡ ወኤጲስ፡ ቆጶሳት፡ ወኵሎሙ፡ ሰማዕታት፡ ወይለብሱ፡ አልባሰ፡ ክብር፡ ዘኢይትከሀል፡ ለነጽሮ።
²³፳፫፤ ወውስተ፡ እደዊሆሙ፡ አዕጹቀ፡ ዘይት፡ ወበቀልት፡ ወዕፀ፡ መስቀል፡ ይሴብሑ፡ ወያነብቡ፡ ቅድሚሁ፡ እስከ፡ ይወርድ፡ ኀበ፡ ሰብአ፡ ደይን።
²⁴፳፬፤ ወሶበ፡ ወረደ፡ ወቦአ፡ ቅዱስ፡ ሚካኤል፡ ሊቀ፡ መላእክት፡ ውስቴታ፡ ጠፍኡ፡ እሳትወጢስ፡ ዘይመልእ፡ ወአርመሙ፡ ኵሎሙ፡ አራዊት፡ እለ፡ ውስተ፡ ደይን፡ ወዘንተ፡ ርኢኩ፡ በይእቲ፡ ሰዓት።
²⁵፳፭፤ ወሶቤሃ፡ አውረደ፡ ክንፎ፡ ዘየማን፡ ቅዱስ፡ ወክቡር፡ ወልዑል፡ ወግሩም፡ ሊቀ፡ መላእክት፡ ሚካኤል፡ ሚካኤል፡ ውስተ፡ ዕመቀ፡ ደይን፡ ወአውፅአ፡ እምህየ፡ ዘአልቦ፡ ኍልቍ፡ ምሉዓነ፡ እምጽንፈ፡ ክንፉ፡ ዘየማን፡ ወአውፅአሙ፡ ላዕለ፡ ምድር፡ እምደይን፡ ቅዱስ፡ ወከቡር፡ ወስቡሕ፡ ሊቀ፡ መላእክት፡ ሚካኤል።
²⁶፳፮፤ ወመልአ፡ ዐሠርተ፡ ወክልኤተ፡ ገራህተ፡ ዘይእቲ፡ ገነተ፡ ሀገረ፡ ዔዶም።
²⁷፳፯፤ ወካዕበ፡ አውረደ፡ ክንፎ፡ ዘፀጋም፡ ኀያል፡ ቅዱስ፡ ሚካኤል፡ ሊቀ፡ መላእክት፡ ወአውፅአ፡ ዘይበዝኅ፡ እምቀዳሚ።
²⁸፳፰፤ ወሰአልዎ፡ ሱራፌል፡ ወኪሩቤል፡ እሳታውያን፡ ወጸድቃን፡ እለ፡ በአድባር፡ ወበኣታት፡ ወገዳም፡ ዘመጽኡ፡ ምስሌሁ፡ እምሰማይ፡ ለመልአክ፡ ያውርድ፡ ሥልሰ፡ ክንፎ፡ ዘምሉዕ፡ ምሕረተ፡ እግዚአብሔር፡ ላዕሌሁ።
²⁹፳፱፤ ወአውፅአ፡ ሥልሰ፡ ዘአልቦሙ፡ ኍልቍ፡ ወአልቦ፡ ዘይክል፡ ኈልቆቶሙ፡ መኑሂ፡ ዘእንበለ፡ ቅዱስ፡ ወክቡር፡ ወፍቁር፡ ሊቀ፡ መላእክት፡ ሚካኤል፡ ወሰኣሌ፡ ምሕረት፡ ለውሉደ፡ ሰብእ፡ እምኀበ፡ እግዚአብሔር፡ ንጉሠ፡ ነገሥት፡ ወእግዚአ፡ አጋዕዝት፡ ዘይነብር፡ ዲበ፡ ኪሩቤል፡ ወሱራፌል፡ ወዲበ፡ አርባዕቱ፡ እንስሳ፡ ምሉዓነ፡ አዕይንት።
³⁰፴፤ ወአልቦሙ፡ መስፈርት፡ ለእለ፡ ወፅኡ፡ እምውስተ፡ ደይን፡ ግሩም፡ ወእምሲኦል፡ መሪር፡ መካነ፡ ምንዳቤ፡ ውኀዘን፡ ወአኀዝዎሙ፡ መላእክት፡ ለጻድቃን፡ ወኀፀብዎሙ፡ በማየ፡ ሕይወት፡ መንጽሔ፡ ኀጢአት፡ ወሠራዬ፡ አበሳ፡ ወጌጋይ፡ ወቀብዕዎሙ፡ ቅብዐ፡ ቅዱሰ፡ በትፍሥሕት፡ ወበሐሤት፡ ወአምጽእዎሙ፡ ኀበ፡ ቅዱስ፡ ወቡሩክ፡ ወስቡሕ፡ ወግሩም፡ ሚካኤል፡ ሊቀ፡ መላእክት፡ ትጉሃን።
³¹፴፩፤ ወሶቤሃ፡ ነሥኦሙ፡ ወአብጽሖሙ፡ ቅዱስ፡ ሚካኤል፡ ሊቀ፡ መላእክት፡ ሰርዌሆሙ፡ ለኃይላት፡ ሰማያውያን፡ ቅድመ፡ እግዚአብሔር፡ ለኵሎሙ፡ ወሰገዱ፡ ሎቱ፡ ወአእኰትዎ፡ ለዘመሐሮሙ፡ በጸሎቱ፡ ለቅዱስ፡ ሚካኤል፡ ሊቀ፡ መላእክት።
³²፴፪፤ ወነዋ፡ ወፅአ፡ ቃል፡ በይእቲ፡ ዕለት፡ ወበይእቲ፡ ሰዓት፡ እምውስተ፡ መንጦላዕቱ፡ ለአብ፡ ዘይብል፡ በጸሎቱ፡ ወበስእለቱ፡ ለቅዱስ፡ ሚካኤል፡ መልአከ፡ ምክርየ፡ ወበእንተ፡ ቅድስት፡ ድንግል፡ ማርያም፡ እምየ፡ በእንተ፡ ጻድቃንየ፡ ወበእንተ፡ ኵሎሙ፡ ቅዱሳን፡ ሰማዕታት፡ ምስለ፡ እለ፡ ገብሩ፡ ፈቃዶ፡ ለአቡየ፡ እለ፡ ሀለዉ፡ ኃጥኣን፡ በዲበ፡ ምድር፡ ይድኅኑ፡ ወይበውኡ፡ ውስተ፡ ሕይወት፡ ዘለዓለም።
³³፴፫፤ ወሶቤሃ፡ ነሥኦሙ፡ ወአብኦሙ፡ ውስተ፡ ገነት፡ ቅዱስ፡ ሚካኤል፡ ሊቀ፡ መላእክት።
³⁴፴፬፤ ወአነ፡ ዮሐንስ፡ ሶበ፡ ርኢኩ፡ ዘንተ፡ ኵሎ፡ ነገረ፡ እንዘ፡ ይወፅእ፡ እመንጦላዕቱ፡ ለአብ፡ ወወልድ፡ ወመንፈስ፡ ቅዱስ፡ ተፈሣሕኩ፡ በእንተ፡ ምሕረተ፡ እግዚአብሔር፡ አስተብቋዕኩ፡ ወአእኰትክዎ፡ ለአብ፡ ወወልድ፡ ወመንፈስ፡ ቅዱስ፡ በእንተ፡ ምሕረቱ፡ ለቅዱስ፡ ሚካኤል፡ ሊቀ፡ መላእክት።
³⁵፴፭፤ ወይቤለኒ፡ ዝኩ፡ መልአክ፡ አእምርኬ፡ ኦ፡ ዮሐንስ፡ ፍቁረ፡ እግዚአብሔር፡ ከመ፡ ፍሉጥ፡ ዮም፡ ዕለተ፡ በዓሉ፡ ለቅዱስ፡ ሚካኤል፡ ሊቀ፡ መላእክት፡ አመ፡ ዐሡሩ፡ ወሰኑዩ፡ ለወርኀ፡ ሰኔ፡ ቀዳማይ፡ በዓሉ፡ ወአመ፡ ዐሡሩ፡ ወሰኑዩ፡ ለወርኀ፡ ኅዳር፡ ደኃራይ፡ በዓሉ።
³⁶፴፮፤ ወበውእቱ፡ ዕለት፡ ሤሞ፡ እግዚአብሔር፡ ላዕለ፡ ኵሉ፡ ዘሀሎ፡ ውስተ፡ ሰማይ፡ በእንተ፡ ትሕትናሁ፡ ወተአዝዞቱ፡ ወበእንተ፡ ዘሞኦ፡ ለሰይጣን፡ ጸላኤ፡ ሠናያት፡ ዘአስተሐቀሮ፡ ለእግዚኡ።

¹⁰¹፻፩፤ ወእለኒ፡ ታነብቡ፡ ኢታንትጉ፡ ገቢረ፡ ወኢትወስኩ፡ አላኩኑ፡ እስትርኩባነ፡ ከመ፡ ኢትወልጡ፡ እምእሉ፡ አስማት።
¹⁰²፻፪፤ በትዕግሥት፡ ወበህድአት፡ አንብቡ፡ ከመ፡ ኢይትገደፍ፡ እምዝንቱ፡ አሐዱ፡ ቃል፡ እስከ፡ ይትነበብ፡ ገድል፡ ወድርሳን፡ ይቀውሙ፡ ህየ፡ ቅዱሳን፡ መላእክት፡ ወጻድቃን፡ በዕለተ፡ ተዝካሮሙ፡ ወበዓሎሙ።
¹⁰³፻፫፤ ወሶበ፡ ይትነበብ፡ ገድሎሙ፡ ወድርሳኖሙ፡ እመ፡ ይትገደፍ፡ ቃል፡ እምአንባቢ፡ ይበክዩ፡ ቅዱሳን፡ መላእክት፡ ጻድቃን፡ ወሰማዕት፡ ነቢያት፡ ወሐዋርያት፡ ደናግል፡ ወመነኰሳት፡ ፍጹማን፡ በእንተ፡ ዘተገድፈ፡ አሐዱ፡ ቃል።
¹⁰⁴፻፬፤ ኢትኅድጉ፡ ለጌሠም፡ ሶበ፡ ይነውኅ፡ ምንባብ፡ እስመ፡ ኢይሴስሉ፡ ቅዱሳን፡ እስከ፡ ይትፌጸም፡ ገድሎሙ፡ ወድርሳኖሙ፡ በከመ፡ ጽሑፍ፡ ውስተ፡ ገድለ፡ አባ፡ ሲኖዳ፡ ወዐይነ፡ ኤርምያስ፡ ነቢይ፡ አንጠብጠበ፡ አንብፆ፡ ላዕለ፡ አሐዱ፡ ዘይብል፡ ዘንተ፡ አንባቢ፡ ሶበ፡ ይትገደፍ፡ አሐዱ፡ ቃል፡ እምቃላቲሁ፡ ወእምነገሩ።
¹⁰⁵፻፭፤ ወከማሁ፡ ሕዝቅኤልኒ፡ ወሚልክያስ፡ ብዙኀ፡ ቆሙ፡ ሶበ፡ ኖመ፡ አንባቢ።
¹⁰⁶፻፮፤ አንትሙኒ፡ አንባብያን፡ አንብቡ፡ በፍርሀት፡ ወበንቁህ፡ ልብ፡ ወለእመ፡ ኢተአምሩ፡ አንብቦ፡ መጻሕፍት፡ ጸውዑ፡ ዘየ፡ አምር፡ አንብቦ።
¹⁰⁷፻፯፤ ወጸልዩ፡ ላዕሌየ፡ ወላዕለ፡ ዘጸሐፎ፡ ወአጽሐፎ፡ ወዘአንበቦ፡ ወዘተርጐሞ፡ ወዘሰምዐ፡ ቃላቲሁ፡ ለዝንቱ፡ መጽሐፍ፡ ኅቡረ፡ ይምሐረነ፡ እግዚአብሔር።
¹⁰⁸፻፰፤ በጸሎታ፡ ለእግዝእትነ፡ ማርያም፡ ወላዲተ፡ አምላክ፡ ወበጸሎቱ፡ ለቅዱስ፡ ሚካኤል፡ ሊቀ፡ መላእክት፡ ወበስእለቱ፡ ለቅዱስ፡ ገብርኤል፡ ዜናዊ፡ ትፍሥሕት፡ ወሐሤት፡ ወበጸሎቶሙ፡ ለዕሥራ፡ ወአርባዕቱ፡ ካህናተ፡ ሰማይ፡ ወበስእለቶሙ፡ ለአርባዕቱ፡ እንስሳ፡ ወበጸሎቶሙ፡ ለቅዱሳን፡ ወሰማዕት፡ ወኄራን፡ መላእክት፡ መንፈሳውያን፡ ወለነኒ፡ ይምሐረነ፡ ወይሣህለነ፡ ለኵልነ፡ ውሉደ፡ ጥምቀት፤ ወያድኅነነ፡ እመሣግሪሁ፡ ለሰይጣን።
¹⁰⁹፻፱፤ በረከተ፡ ጸሎቱ፡ ወሀብተ፡ ረድኤቱ፡ ለቅዱስ፡ ሚካኤል፡ የሀሉ፡ ምስሌነ፡ ለዓለመ፡ ዓለም፡ አሜን።
¹¹⁰፻፲፤ ኤኮስ፡ አስሌ፡ ኤፓ፡ ኤፓስ፡ ኤነከምካም፡ ኤቦካ፡ ኪሮም፡ ለካፍ፡ ፌኤ፡ ሎኬ፡ ወአርናኬ፡ ጓ፡ አብሶላ፡ አስቤክ፡ አበሳኩ፡ አሜዕ፡ አውጽ፡ ኤቃ፡ ኤጴ፡ ካብዕ፡ ሬው፡ አርሂሊ፡ አዮን፡ ያብሳት፡ ጸ።
¹¹¹፻፲፩<፤>supplied by Carsten Hoffmann ለዘተአመነ፡ በጸሎቱ፡ ወበስእለቱ፡ ለቅዱስ፡ ሚካኤል፡ ሊቀ፡ መላእክት፡ በትንብልናሃ፡ ወበአስተብቍዖታ፡ ለእግዝእትነ፡ ማርያም፡ ወላዲተ፡ አምላክ፡ ያድኅነነ፡ ወልዳ፡ ለዓለመ፡ ዓለም።
¹¹²፻፲፪፤ አካዕ፡ ክስብኤል፡ ቤቃ፡ ጼቃ፡ ሴቃ፡ አልፋ፡ ወዖ፡ ቤጣ፡ የውጣ፡ ዮድ፡ አህያ፡ ሸራህያኤል፡ ሻዳይ፡ ጸባኦት፡ አዶናይ፡ ዐማኑኤል፡ እልመክኑን፡ ወእሎንተ፡ አስማተ፡ ጸሐፈ፡ እግዚእነ፡ ኢየሱስ፡ ክርስቶስ፡ ላዕለ፡ አክናፊሁ፡ ለቅዱስ፡ ሚካኤል፡ ሊቀ፡ መላእክት።
¹¹³ወበእሉ፡ አስማት፡ ወድቀ፡ ዲያብሎስ፡ ምስለ፡ ሠራዊቱ፡ ተዐጺፎ፡ ጽልመተ፡ ሌሊት፡ ከማሁ፡ አውደቆሙ፡ ለፀርየ፡ ወጸላእትየ፡ ለዓለመ፡ ዓለም፡ አሜን።
¹¹⁴፻፲፬፤ ኦ፡ እግዚእየ፡ ኢየሱስ፡ ክርስቶስ፡ ወልደ፡ እግዚአብሔር፡ ሕያው፡ ወወልደ፡ ማርያም፡ ሥግው፡ በዝ፡ ቃል፡ ዕቀብ፡ ነፍስነ፡ ወሥጋነ፡ እምሀጕል፡ እንበይነ፡ ሥጋከ፡ ቅዱስ፡ ወደምከ፡ ጥሉል።
¹¹⁵፻፲፭፤ በእንተ፡ ሚካኤል፡ ወገብርኤል፡ ወበእንተ፡ ሱራፌል፡ ወኪሩቤል፡ በእንተ፡ አፍኒን፡ ወሳቁኤል፡ በእንተ፡ ዑራኤል፡ ወሩፋኤል፡ ወፋኑኤል፡ ወበእንተ፡ ነቢያት፡ ወሐዋርያት፡ ወበእንተ፡ ጻድቃን፡ ወሰማዕታት፡ እለ፡ ተጸውዐ፡ ስሞሙ፡ ወእለ፡ ኢተጽውዓ፡ አስማቲሆሙ፡ ኅቡረ፡ ይምሐረነ፡ እግዚአብሔር።
¹¹⁶፻፲፮፤ እንበይነ፡ ኪዳኑ፡ ለሚካኤል፡ መልአከ፡ ምክርከ፡ ወገብርኤል፡ አብሣሬ፡ ትስብእቱ፡ ለወልድከ፡ ሥረይ፡ ኀጢአትየ፡ ወኀጢአተ፡ ኵሉ፡ ሕዝብከ።
¹¹⁷፻፲፯፤ እስመ፡ አንተ፡ ውእቱ፡ እግዚአ፡ ሕያዋን፡ ወሙታን፡ ለዓለመ፡ ዓለም፡ አሜን፡ ወአሜን፡ ለይኩን፡ ለይኩን።
¹¹⁸፻፲፰፤ በስመ፡ እግዚአብሔር፡ ሥሉስ፡ እምኀበ፡ ኢሀሎ፡ ለዓለም፡ አምጻኢሁ፡ ወለኵሉ፡ ፍጡር፡ ፈጣሪሁ፡ ለሰማይ፡ ዘእንበለ፡ ዐምድ፡ ሰዋቂሁ፡ ወለምድር፡ በላዕለ፡ ዘባና፡ ለባሕር፡ ሣራሪሁ፡ ለፀሓይ፡ ወለወርኅ፡ ዘፈጠሮሙ፡ ከመ፡ ያብርሁ፡ ወለአብያዝ፡ ዘፈጠሮሙ፡ በበ፡ ኑባሬሁ።
¹¹⁹፻፲፱፤ እስመ፡ ውእቱ፡ ይቤ፡ ወኮኑ፡ ወውእቱ፡ አዘዘ፡ ወተፈጥሩ። ወአቀሞሙ፡ ለዓለም፡ ወለዓለመ፡ ዓለም። ትእዛዘ፡ ወሀብሙ፡ ወኢኀለፉ።
¹²⁰፻፳፤ በበ፡ ጊዜሁ፡ ወበበ፡ ዕድሜሁ፡ ከመ፡ ይኩኑ፡ ሊቃነ፡ በመዓልት፡ ወበሌሊት፡ በከመ፡ ሠርዐ፡ ለሊሁ፡ እምኀበ፡ መላእክት፡ ወሰብእ፡ ምሉዕ፡ ስብሐቲሁ፡ ዘኢይነትግ፡ ወዘኢየኀልቅ፡ ብዕለ፡ ቅዳሴሁ።
¹²¹፻፳፩፤ ስብሐቲሁ፡ ዘእምኀቤሁ፡ ወውዳሴሁ፡ እምዚኣሁ፡ ጽልመተ፡ በርባሮስ፡ ዘኢይሴውሮ፡ እምንጻሬሁ፡ ወዕመቀ፡ አብሕርት፡ ዘይገስስ፡ በእዴሁ፡ እንዘ፡ ሀሎ፡ ውስተ፡ አርያም፡ ጽርሑ፡ ዘኢይትነገር፡ በልሳነ፡ ሰብእ፡ ውዳሴሁ፡ ወኢይጤየቅ፡ አምሳሊሁ፡ ዘስዉር፡ እምሰብእ፡ እሳተ፡ መለኮቱ፡ ወእምፍጥረተ፡ ዚአሁ፡ ዘኢይትከሀል፡ ለነጊር፡ ጥንተ፡ ክዋኔሁ፡ ወዘኢይት፡ ዐደው፡ እምልበ፡ ሰብእ፡ ወእምኅሊና፡ መላእክት፡ ዕመቀ፡ ጥበቢሁ።
¹²²፻፳፪፤ ሎቱ፡ ክብር፡ ወስብሐት፡ ወአኰቴት፡ ለሰፋኒት፡ መለኮተ፡ ዚአሁ፡ ለዓለመ፡ ዓለም፡ አሜን።
¹²³፻፳፫፤ ንቀድም፡ በረድኤተ፡ እግዚአብሔር፡ ልዑል፡ ጽሒፈ፡ ተአምራቲሁ፡ ወኀይሉ፡ ለመልክ፡ ክቡር፡ ሚካኤል፡ ሊቀ፡ ሰርዌሆሙ፡ ለመላእክት፡ ትጉሃን፡ እለ፡ ሥዑላን፡ በነድ፡ ውዑይ፡ ትንብልናሁ፡ ወአስተብቍዖቱ፡ ያድኅነነ፡ እምዘመን፡ እኩይ፡ ከመ፡ ኢያስጥመነ፡ ዘባሕረ፡ ኀጢአት፡ ቀላይ፡ ለኵልነ፡ ውሉደ፡ ጥምቀት፡ ለዓለመ፡ ዓለም፡ አሜን።
¹²⁴፻፳፬፣ ይቤ፡ ዐቢይ፡ ውእቱ፡ እግዚአብሔር፡ ስቡሕ፡ ወጥቀ፡ ልዑል፡ ዲበ፡ ኵሉ፡ ፍጥረት፡ ዘኢያገምሮ፡ ኅሊና፡ ለብእ፡ ወኢይክሉ፡ አዕይንት፡ ደፊረ፡ ነጽሮቱ፡ ለፈጣሪ፡ ኵሉ፡ ዘነፍስ፡ በቃለ፡ ጥበብ።
¹²⁵፻፳፭፤ በከመ፡ ይቤ፡ ዳዊት፡ በመዝሙር፡ ዐቢይ፡ እግዚአብሔር፡ ወብዙኅ፡ አኰቴቱ፡ ወካዕበ፡ ይቤ፡ ዐቢይ፡ እግዚአብሔር፡ ወዐቢይ፡ ኀይሉ፡ ወአልቦ፡ ኍልቍ፡ ለጥበቢሁ፡ ወካዕበ፡ ይቤ፡ ዳዊት፡ ጥቀ፡ ዐቢይ፡ ግብርከ፡ እግዚኦ፡ ወኵሎ፡ በጥበብ ገበርከ።
¹²⁶፻፳፮፤ ወካዕበ፡ ይቤ፡ ዘይሬስዮሙ፡ ለመላእክቲሁ፡ መንፈሰ፡ ወለእለ፡ ይትለአክዎ፡ ነደ፡ እሳት።
¹²⁷፻፳፯፤ ዓዲ፡ ይቤ፡ ይትአየን፡ መልአከ፡ እግዚአብሔር፡ ዐውዶሙ፡ ለእለ፡ ይፈርህዎ፡ ወያድኅኖሙ።
¹²⁸፻፳፰፤ ዘገብረ፡ ኵሎ፡ ወዘፈጠረ፡ ኵሎ፡ እግዚአብሔር፡ አምላከ፡ ኀያላን፡ ዘይትዐጸፍ፡ ብርሃነ፡ ከመ፡ ልብስ፡ ዘእምቅድመ፡ ዓለም፡ ንጉሥ።
¹²⁹፻፳፱። ዐቢይ፡ ውእቱ፡ ወመንክር፡ ኪነ፡ ጥበቡ፡ ጥቀ፡ ዘፈጠሮሙ፡ ለመላእክት፡ እምእሳት፡ ወነፋስ፡ አሐዱ፡ ዘኢይትረአይ፡ ወአሐዱ፡ ዘኢይትገሰስ፡ ከመ፡ ይትለአክዎ፡ ወይስቡሑ፡ ለስሙ፡ ቅዱስ፡ ኵሎ፡ ጊዜ፡ ይእዜኒ፡ ወዘልፈኒ፡ ወለዓለመ፡ ዓለም፡ አሜን።