Collegeville, Hill Museum and Manuscript Library, EMML6451

| | በስመ፡ አብ፡ ወወልድ፡ ወመንፈስ፡ ቅዱስ፡ ፩ አምላክ፡ ሥላሴ፡ ዋሕድ፡ ዕሩይ፡ ዘኢይሲ?ቅ፡ ዘሀሎ፡ እምቅድም፡ ታሉት፡ ዘኢይፈደፍድ፡ እምክዋኔሁ፡ እንዘ፡ ኢይትበአድ፡ ወእምግጻዌሁ፡ እንዘ፡ ኢየሐጽጽ፡ ወኢይፈደፍድ፤ በዓናስረ፡ ዓለም፡ ዘኢ/ይ/ትኤለድ፤ ወዘኢይትገመር፤ ዘኢይትፈለጥ፡ ወልድ፡ እምአብ፡ ወመንፈሰ፡ ቅዱስ፡ እምወልድ፤ ዘአምጽአ፡ ዓለመ፡ በቃለ፡ ጽዋዔ፤ እምኀበ፡ ኢሀሎ፡ በአሐቲ፡ | ምክር፡ ወበአሐቲ፡ ፈቃድ፡ ዘሳረራ፡ ለምድር፡ በልቡና፡ ??ትሐየድ፡ ወሰማይኒ፡ ዘአንበራ፡ በአየረ፡ እሳት፡ ዘይነድድ፡ ወለእሳትኒ፡ ዘሰፍሖ፡ በአየር፡ ነፋስ፨ እንበለ፡ ገስስ፡ በእድ፡ ወለነፋስኒ፡ ዘረበቦ፡ ዲበ፡ ሰረገላ፡ ጽልመት፡ እንበለ፡ መሰረት፡ ወድድ፡ ወዓርጊዖ፡ ማየ፡ ዘረሰየ፡ ???ሎ፡ ከመ፡ ???? እንበለ ስዋ????፡ ወዓምድ። ዘረሰዮሙ፡ ለመላእክቲሁ፡ መንፈሰ፡ ወለእለ፡ ይትለአክዎ፡ | | ነደ፡ እሳት፡ ዕቆና፡ ዘነድ፤ ዘይመይጦ፡ ለንጥረ፡ መብረቅ፡ ዘያጸንዖ፡ ለነጐድጓድ፡ ዘይፌትቶ፡ ለዕብነ፡ በረድ፤ እምከርሠ፡ ደመና፡ በበሕጠተታሁ፡ ከመ፡ ይረድ፨ ዘይጌሥጾ፡ ለጸዓዕ፡ ወይዘርዎ፡ ለጊሚ፡ ከመ፡ ሐመድ፡ ጌልጌላሁ። ዘነበልባል፨ ወሰረገላሁ፡ መርዕድ፨ ዘያረምማ፡ ለማዕበለ፡ ባሕር፨ ወያዝኅኖ፡ ለሞገደ፡ ዘኢየኃልቅ፡ ምስፍናሁ፡ ለትውልደ፡ ትውልድ፨ ወኢይትመዋዕ፡ ምኵናኑ፡ ለዘመደ፡ ዘመድ፨ | ጥንተ፡ መዋዕሊሁ፡ ዘኢይትኌለቍ፡ ወስፍሐ፡ ሀልዎቱ፡ ዘኢይትሔለድ፨ ዘለሐኮ፡ ለአዳም፡ በአርአያሁ፡ ከመ፡ ይትገሐድ። ለዘከመዝ፡ እግዚእ፡ እንዘ፡ እገኒ፡ ወእሰግድ። ወእነግር፡ ዜና፡ ገድለ፡ ጻማሁ፡ ለብእሲ፡ ብፁዕ፡ ወቅዱስ፡ ክቡር፡ ወርኡስ፡ ስቡሕ፡ ወውዱስ፡ ለባሴ፡ ንጹሕ፡ ዘኢለከፎ፡ ደነሶ፨ ጸዋሬ፡ ንዴት፡ ዘምስለ፤ ንግሥ፡ ዘኢያንሶሰወ፡ በፍኖተ፡ መብእስ፡ ዘኢተኃይጰ፡ በአሕፃ፡ መስተቃርን፡ ዝውእቱ፡ ዲያብሎስ፡

| | ደብረ፡ ወርቅ፡ ወደብረ፡ ብሩር፡ ደብረ፡ ባሕርይ፨ ወደብረ፡ ሰንፔር፡ ወግረ፡ ቀንአት፡ ወወግረ፡ ስኂን፡ መንክር፡ ደብረ፡ ወርቅ፡ ንብሎ፡ በእንተ፡ ስነ፡ ሃይማኖቱ፡ ርትዕት፡ ወበእንተ፡ ስነ፡ ትእግሥቱ፤ በውስተ፡ ገድል፡ እንዘ፡ ይጽሕቅ፡ ለፈጽሞ፡ ቃለ፡ ወንጌል፡ እስመ፡ ይሰምዖ፡ ለቀርነ፡ መድኃኒት፤ ዘውእቱ፡ ብስራተ፡ እስራኤል፡ ሐዲሳን፤ ዘደምጸ፡ እምልሳነ፤ በግዑ፡ እንዘ፡ ይትነፋሕ፡ በቤተ፡ ክርስቲያን፡ በአፈ፡ ክህን፨ ወድምጸ፡ ቃሉ፡ ከመዝ፡ ይብል፡ | በትእግሥትክሙ፡ ታጠርይዋ፡ ለነፍ/ስ/ክሙ፨ ወካዕበ፡ ይቤ፡ ባኡ፡ እንተ፡ ጸባበ፡ አንቀጽ፡ ወስፍሕተ፡ ፍኖት፡ እንተ፡ ትወስድ፡ ወታበውዕ፡ ውስተ፡ ፍኖተ፡ ሐጕል፨ወፈድፋደ፡ ጸባብ፡ አንቀጽ፡ ወጥቀ፡ መቅአኒት፡ ወጽዕቅት፡ ፍኖታ፡ እንተ፡ ትወስድ፤ ወታበውዕ፡ ውስተ፡ ሕይወት፡ ወሕዳጣን፡ ይበውዕዋ፡ ወውስተ፡ ስፍሕትሰ፡ አንቀጽ፡ ይብል፡ ብዙኃን፡ እለ፡ ይበውእዋ፨ እለ፡ መኑኬ፡ እለ፡ ቦእዋ፡ ለአንቀጸ፡ ሐጕል፡ ወእለ፡ መኑ፡ ካዕበ፡ እለ፡ ይበውዕዋ፡ እምድኅረዝ፡ እስመ፡ | | ኢተአጸዋ፡ እስከ፡ ይእዜ፡ እላንቱ፡ ፍናው፡ ክልኤቲ፡ አሐቲ፡ እንተ፡ ሞት፡ ወአሐቲ፡ እንተ፡ ሕይወት። እለ፡ ይበውዕዋሰ፡ ለአንቀጸ፡ ሐጕል፡ እሉ፡ እሙንቱ፡ እለ፡ ሖሩ፡ በፍኖተዝ፡ ዓለም፡ ስፉሕ፡ ዝውእቱ፡ በሊዕ፡ ወሰትይ፡ ዘእንበለ፡ አቅም፡ እስመ፡ እለ፡ ይበልዑ፡ ወይሰትዩ፡ ዘእንበለ፡ አቅም፡ ይትቃረንዋ፡ ለቃለ፡ ወንጌል፡ ዘይቤ፡ ኢታክብዱ፡ በበሊዕ፡ ወሰትይ። ወይትፈጸም፡ ላዕሌሆሙ፡ ቃለ፡ ነቢይ፡ ዘይቤ፡ አሌ፡ ሎሙ፡ ለእለ፡ ይገይሱ፡ በጽባሕ፡ ቤተ፡ መያሲ፡ | ወይውእሉ፡ ውስተ፡ ስታይ፡ ወያነድዶሙ፡ ወይን። ወካዕበ፡ ያቴክሎሙ፡ ወይን፡ አፍአ፡ እምቤተ፡ ግዕዝ፡ ቃለ፡ መርዓዊ፡ ዘይቤ፡ አሌሎሙ፡ ለእለ፡ ይጸግቡ፡ ይእዜ፡ እስመ፡ እሙንቱ፡ ይርኅቡ፡ እስመ፡ የኃድግዋ፡ ለቃሉ፡ መሰረተ፡ ጽሙና፡ እንተ፡ ትብል፡ ተገብሩ፡ እንከ፡ ለመብልዕ፡ ዘይነብር፡ ለሕይወት። ዘለዓለም። ዘይሁበክሙ፡ ወልደ፡ እጓለ፡ እመሕያው፡ ወእኮ፡ ለመብልዕ፡ ኃላፊ፡ ወይፈልሰ፡ ጸጋ፡ እግዚአብሔር፡ እምስሡአነ፡ ልብ፡ ኀበ፡ እለ፡ ያፈቅርዋ፡

| | ጽሙና፡ በከመ፡ ፈለሰ፡ ብኵርና፡ ኤሳው፡ መፍቀሬ፡ መብልዕ፡ በኀበ፡ ያዕቆብ፡ መፍቀሬ፡ ጽሙና፡ ወእለ፡ ካዕበ፡ እለ፡ ይበውእዋ፡ ለአንቀጸ፡ ሐጕል፡ ምስለ፡ እለ፡ አቅደምነ፡ ነጊረ፡ ምስለ፡ ስሡአን፡ ዘማውያን፡ አላውያን፡ ሰራቅያን፡ መስተቃትላን፡ ሀኃድያን፡ መስተመይናን፡ መስተሳልቃን። ዕቡያን፡ መሰግላን፡ እለ፡ ይትአመኑ፡ በኀሳበ፡ ከዋክብት፡ በቃለ፡ ብእሲ፡ ወበቃለ፡ ብእሲት፡ እለ፡ ይብሉ፡ ነአምር፡ ዘይመጽእ፡ ወንፈልጥ፡ | ዘይከውን፡ እሉኬ፡ ወእለ፡ ይመስልዎ፡ ፍኖተ፡ ሐጕል፡ ፍኖቶሙ፡ ሞት፡ ወደኃሪቶ፡ ወሲኦል፡ ተፍጻሜቶሙ። ዛቲ፡ ይእቲ፡ ትርጓሜሁ፡ ለአንቀጸ፡ ትፍሥሕት፡ እንተ፡ ትወስድ፡ ውስተ፡ ሞት። ኢይምሰልክሙ፡ ፍቁራንየ፡ ሶበ፡ ትሰምዑ፡ አንቀጸ፡ ሐጕል፡ ዘተብኅለ፡ በወንጌል፡ ከመ፡ ሀለወት፡ ውስተ፡ ሰማይት፡ አላ፡ በዝየ፡ ይእቲ፡ በምድር፡ ውስተ፡ ሰማያትሰ፡ አልቦ፡ አንቀጸ፡ ሐጕል፡ እንበለ፡ አንቀጸ፡ ሣህል፡ ኀበ፡ ይነብር፡ va አምላክነ፡ ባሕረ፡ ምሕረት፤ ወነቅዓ፡ በረከት፤ ወዘይትሐጐልሰ፡ ኢየዓርግ፡ ውስተ፡ ሰማይ፡ ሶበ፡ ተሰይመ፡ ሊቀ፡ መላእክት፡ ወድቀ፡ እምሰማይ፡ ሶበ፡ ሐለየ፡ ሕሊናሁ፡ ሐጕል፤ እፎኬ፡ የዓርግ፡ ሰማየ፡ ብእሲ፡ ሕጉል፤ ወእለሰ፡ ቦኡ፡ አንቀጸ፡ ጸባበ፡ እሉ፡ እሙንቱ፡ እለ፡ ፆሩ፡ መስቀሎ፡ ለክርስቶስ፡ ወተለውዎ፡ ወጸዊረ፡ መስቀሉኒ፡ ዛቲ፡ ይእቲ፡ ጾም፡ ምስለ፡ አኰቴት፡ ፍቅር፡ ምስለ፡ ትሕትና፡ ንዴት፤ ወአንብዕ፡ ዘምስለ፡ ትእግሥት፡ አለጕሞ፡ ልሳን፡| እምጽርፈት፤ እምነቢበ፡ ዓመፃ፡ ሐሰት፡ [ዓርቄ፡] እምገቢር፡ ኃላፊት፡ እንተ፡ ትወስድ፡ ውስተ፡ ሞት፨ አ/ን/ጽሖ፡ ሥጋ፡ እምዝሙት፡ አዲው፡ ውስተ፡ ገዳም፡ በዘብድወ፡ ጠሊ፡ ወበሐሜለት፡ ወተዘግሆ፡ ጾማዕት። አንጽሖ፡ ልብ፡ እምሐልዮ፡ ኃጢአት፡ ወተዘክሮ፡ ሞት፡ በኵሉ፡ ጊዜያት፡ ዛቲኬ፡ አንቀጽ፡ ከመ፡ ይባዕ፡ ተሐየለ፡ ተመርሖ፡ በዕለ፡ ቀደምዎ፡ ቅዱሳን፡ ወቦአሂ፡ ዝንቱ፡ ብእሲ፡ መካህ፡ ዘስሙ፡ ላሊበላ፡ ዘተሰምየ፡ ገብረ፡ መስቀል፡ አመ፡ ቅብአተ፡ ንግሡ፡ ዘአመ፡ ሰቀለ፡ አክናፈ፡

| | ሕሊናሁ፡ ከመ፡ አክናፈ፡ ሕሊና፡ ኪሩቤል፡ ከመ፡ ይትመየጥ፡ ቦቶን፡ ኀበ፡ መንበረ፡ መለኮት። ከመ፡ ይኅበር፡ ሰብሖ፡ ምስለ፡ ሱራፌል፤ እስመ፡ ተወክፈ፡ ኵሎ፡ ስቃያተ፨ ዘአቅደምነ፡ ነጊረ፡ ተሰጢሞ፡ ውስተ፡ ባሕረ፡ ትዕግሥት፨ ወጸምኒ፡ ኢይትከሀል፡ እንበለ፡ ትዕግሥት፨ ዕርቃንኒ፡ ወተፅናሰኒ፡ በእንተ፡ እግዚአብሔር፨ ወፈጸመ፡ ኵሉ፡ ቃለ፡ ወንጌል፡ ኢይትከሀል፡ እንበለ፡ ትዕግሥት፤ ወድርዓ፡ እንግድአ፡ ዘመዊዕ፡ ከመ፡ ይማዕ፡ | ኵሎ፡ ምንዳቤ፡ ገድል፨ ዝንቱ፡ ብእሲ፡ ዘሰመይኖ፡ ደብረ፡ ወርቅ፡ ይትዓቀብ፡ ውስተ፡ አስከሬን፡ ተዘጊሆ፡ በቀማጥር፨ ከማሁ፡ ኮኖ፡ መዝገበ፡ ለቃለ፡ ወንጌል፨ አስከሬነ፡ ልቡ፡ ለብፁዕ፡ ወለቅዱስ፡ ላሊበላ፡ ወቃለ፡ ወንጌልሰ፡ አማን፡ ወርቅ፡ ዘአልቦ፡ ተምያን፡ ዘኃደረ፡ ውስተ፡ ልቡ፡ ለዝንቱ፡ ፍጹም፡ ብዙኃ፡ አምጣን፡ በአቅሙ፡ ለክርስቶስ፤ ህየንተ፡ ቀማጥርኒ፤ ኮኖ፡ ትሕትናሁ፨ እስመ፡ በኀብለ፡ ትሕትና፡ ስሁል፡ ክሣደ፡ ልቦሙ፡ | | ለጻድቃን፡ እስመ፡ እንበለ፡ ትሕትና፡ ኢይትከሀል፨ ያስምርዎ፡ ለእግዚአብሔር፤ በከመ፡ ከልሐ፡ ነቢይ፡ ተመጣዌ፡ ፍሕም፡ እምጕጠተ፡ ሱራፌል፨ ከመዝ፡ ይቤ፡ እግዚአብሔር፡ ኀበ፡ መኑ፡ እኔጽር፡ ዘእንበለ፡ ኀበ፡ የዋህ፡ ወትሁት፡ ወጽምው፡ ዘይርዕድ፡ እምቃልየ፤ ወእግዚአ፡ ነቢይኒ፡ ይቤ፡ ተመሐሩ፡ እምኔየ፡ እስመ፡ የዋህ፡ አነ፡ ወትሁት፡ ወትረክቡ፡ ዕረፍተ፡ ለነፍስክሙ፤ ደብረ፡ ብሩርሂ፡ ወደብረ፡ ሰንፔር፡ አስተማሰልኖ፡ በእንተ፡ ቃለ፡ ፍትሕ፡ ዘይወጽእ፨፨፨ እምአፉሁ፡ | ዘሳዕሳእ፡ ዘቅሱም፡ ልሳኑ፡ በጼወ፡ መለኮት፨ ደብረ፡ ባሕርይኒ፡ ንብሎ፡ በእንተ፡ ንጽሐ፡ ሥጋሁ፡ እስመ፡ አጥረየ፡ ንጽሐ፡ ከመ፡ መላእክት፤ ወአጽደለ፡ ባሕርየ፡ ንጽሑ፡ ምስብዒተ፡ እምአሶንያ፤ ወእምኦርያሬስ፡ ወእምዝሮት፨ እስመ፡ ይሰምዖ፡ ለሐዋርያ፡ እንዘ፡ ይብል፡ አንጽሑ፡ ልበክሙ፤ ወአንጽሑ፡ እደዊክሙ፤ ወዓዲ፡ ተዳይቀቶ፡ ቃል፡ እምአፈ፡ ጳውሎስ፤ እንዘ፡ ትብል፡ ከመዝ፡ አልቦ፡ እምውስቴትክሙ፡ ዘይከውን፡ ዘማዌ፡ ወርኩሰ። ወካዕበ፡ ይቤ፡ ወዘሰ፡ አማሰነ፡

| | ቤተ፡ እግዚአብሔር፡ ሎቱ፡ ያማስኖ፡ እግዚአብሔር፤ ወዓዲ፡ ተፍእመ፡ ኅጠተ፡ ቃል፡ እምአስካለ፡ ትንቢቱ፡ ለብፁዕ፡ ዳዊት፡ ዘይቤ፡ መሥዋዕተ፡ ወቍርባነ፡ ኢፈቀድኩ፡ ሥጋከ፡ አንጽሕ፡ ሊተ፤ መሥዋዕተ፡ ዘበእንተ፡ ኃጢአት፡ ኢሰመርኩ፡ ወዘንተ፡ ኵሎ፡ አቂቦ፡ ውስተ፡ ምጕንጳ፡ ንጽሕ፡ ተኃብአ፡ ከመ፡ /ኢ/ይርከቦ፡ ኅምዘ፡ ከይሲ፡ ዘያስዖዝዝ፡ ኀበ፡ ተነዝኃ፡ ሕምዝ፨ በእንተ፡ ዝኬ፡ ጐየ፡ እምሐውዘ፡ /ጣዕመ፡/ ዝንቱ፡ ዓለም፡ ዘያወረዙ፡ አንበሳ፡ ከመ፡ ይሰመይ፡ ጥሪተ፡ ዐቢየ፡ ዘውሉድ፡ | ውስተ፡ መዝገበ፡ ቤቱ፡ ለልዑል። በከመ፡ ይቤ፡ ሰሎሞን፡ ጥሪት፡ ክቡር፡ ብእሲ፡ ንጹሕ። ወግረ፡ ቅንአትሂ፡ ወግረ፡ ስሂን፡ ተብህለ፡ በእንተ፡ አፈዋተ፡ ኂሩቱ፤ ዘመዐዛ፡ ዕፍረት፡ ርሄሁ፡ ውስተ፡ ኵሉ፡ አጽናፈ፡ ዓለም፨ በከመ፡ ይቤ፡ መጽሐፍ፡ እምአጽናፈ፡ ምድር፡ ሰማዕነ፨ ዝክረ፡ ዜናሁ፡ ለጽድቅ፡ ወነዋ፡ ያረውጾሙ፡ ለሕዝብ፡ ወለመኳንን/ት/፡ ወለመሳፍንት፨ ለዐበይት፡ መዓዛ፡ ዕፍረቱ፡ ዘትምዕዝ፡ እስከ፡ ይእዜ፡ ይጥዕም፡ ጸአጥዒሁ፨ በከመ፡ ይቤ፡ | | መጽሓፍ፡ በመዓዛ፡ ዕፍረትከ፡ ንረውጽ፡ ወዕፍረቱሰ፤ ለዝንቱ፤ ብእሲ፡ ብፁዕ፡ አነ፡ ከመ፡ ዕፍረተ፡ ክህነቱ፡ ለአሮን፡ ዘእምአፈዋተ፤ ጽጌሁ፡ ዘከርቤ፡ ወአበሜ፡ ወኢዘአምዓም፡ ወቀናንሞስ፤ ወቅቡአን፡ እምዘይት፡ አላ፡ ዕፍረቱኒ፡ እምአፈዋተ፡ ወንጌል፡ ወኢኮነ፡ እምዕፅ፡ ወማኅፈድ፡ ደብተራሁኒ፡ ኢኮነ፡ ከመ፡ ደብተራ፡ ሙሴ፨ እስመ፡ አርአያሃ፡ ወጽላሎታ፡ ይእቲ፡ ደብተራ፡ ሙሴ፡ ለእንተ፡ ትመጽእ፡ ሐዳስ፡ ደብተራ፤ እንተ፡ ይእቲ፡ ቤተ፡ ክርስቲያን፡ ወፈድፋደሰ፡ ዘተገብረ፡| በእደ፡ ላሊበላ፡ ሕንጻ፡ ማኅፈድ፡ ቤተ፡ መርዓ፡ ዘበግዑ፡ ዘኢተገብረ፡ በኀበ፡ ካልአን፡ በሐውርት፤ ወ/ኢ/በአይቴኑ፡ እስከ፡ ይሬኢ፡ ፀሐየ፤ ወኵሎ፡ ስ፡ ግብረታቲሆን፤ ድኅረሰ፨ ንነግረክሙ፡ ዘከመ፡ እፎ፡ ግብረ፡ ሕንጻሆን፨ ፨ ፨ ፨ ወቀዲሙሰ፡ ንነግረክሙ፡ ግብሮ፡ ለሐናፂሆን፤ እፎ፡ ኮነ፡ /ጥንቱ/፡ ተፍጻሚቱ፡ እምከመ፡ ሰአልናሁ፡ ለመጥበቤ፡ አብዳን፡ ከመ፡ ያርኁ፡ ለነ፤ አናቅጸ፡ ቃል፡ በከመ፡ ይቤ፡ ሐዋርያ፤ እመሰቦ፡ ዘኃጥአ፡ ለጥባብ፡ ለይሰአል፡ ኀበ፡ ወሀቢ፡ እግዚአብሔር፡

| | ዘይሁብ፡ ለኵሉ፡ በስፉሕ፡ ወይሰአል፡ እንዘ፡ ይትአመን፡ ወኢይናፍቅ፡ ወይትወሀብ፡ ሎቱ፨ ወአንተሙኒ፡ ፍቁራንየ፡ ሕዝብ፡ ዘ/ት/ይመካህ፡ ዘ/ት/ይሰመዩ፡ እስራኤል፡ ሐዲሳን፡ እለ፡ ትሴሰዩ፡ እምጥብሕ፡ መንክር፡ ዘኢየዓዚ፡ ገደላሁ፤ ዘኢኮነ፡ እምፍርፋራት፡ ዘኢኮነ፡ ዕፄ፡ በአፍእ፡ እለ፡ በልዕዎ፤ ወእለ፡ ሰትዩ፡ ማየ፡ ሕይወት፡ እምኰኵሐ፡ ምሥጢር፨ ዘኢኮነ፡ እምኰኵሐ፡ ኮሬብ፡ ዘኢያምጽአ፡ ማየ፡ ቅድስት፡ ማዕከለ፡ እግዚአብሔር፨ ወማዕከለ፡ ነቢዩ፡ ሰአሉ፡ ሊተ፡ ከመ፡| የሀበኒ፡ ልሳነ፡ ጥበብ፤ ከመ፡ አእምር፡ ዘእነብብ፨ እስመ፡ አነ፡ ሕፁፀ፡ ልብ፡ እስከ፡ ይእዜ፡ ኢገሰስኩ፡ ዝንተ፡ ነገረ፡ ዜናሁ፡ ለዘእትናገር፡ በእንቲአሁ፤ እስመ፡ ነዋህ፡ ነገሩ፨ ወሊተሰ፡ ክሡት፡ ምሥጢሩ፨ ወባሕቱ፡ እነግረክሙ፡ በሐሳበ፡ ክህልኩ፡ እንዘ፡ እትአመን፡ በኃይለ፡ ጸሎቱ፡ ለዝንቱ፡ ብእሲ፡ ኮከበ፡ ኮከበ፡ ክብር፡ ጽባሐዊ፡ ዘየሐይድ፡ ብርሃኑ፡ እምብርሃነ፡ ካልአን፡ ከዋክብት፤ እንዘ፡ አብ፡ ይረድዕ፡ ለወጢን፡ በለብዎ። ወእንዘ፡ ወልድ፡ ያጸንዕ፡ ወያርግዕ፡ በአስተሰናእዎ፡ | | ወዘመንፈስ፡ ቅዱስ፡ ፍጻሜ፡ ኃይለ፡ ቃል፡ በአስተዳልዎ፡ በለሰመ፡ ዚአሁ፡ አሜን፨ አቀድ፡ መ፡ አእኵቶ/ቶ/፡ ለእግዚአብሔር፡ በእንተ፡ እግዚእነ፡ ኢየ/ሱ/ስ፡ ክርስቶስ፡ ዝውእቱ፡ ወልዱ፡ ወቃሉ፡ ለአብ፡ ዘበሕፅነ፡ አቡሁ፡ ሠረፀ፡ ፍሬ፡ ሕይወት፡ ዓቃቤ፡ ሥራይ፡ ዘወረደ፡ እምሰማያት፨ ከመ፡ ይደይ፡ /ር/ጢነ፡ ዲበ፡ እለ፡ ቈስሉ፡ በንስከተ፡ አርዊ፡ አስዋር፡ ወአልህምት፤ አትርቡዕ፡ አኮ፡ ተፈነዎ፡ ከመ፡ መንፈስ፡ ቅዱስ፡ ኀበ፡ ነቢያቲሁ፡ ዘያጌብሮሙ፡ ከመ፡ ይበልዎ፡ እግዚኦ፡| አጽንን፡ ሰማያቲከ፡ ወረድ፨ አንሥእ፡ ኃይለከ፡ ወነዓ፡ አድኅነነ፤ አምላከ፡ ኃያላን፡ ሚጣነ፡ ግሥሦሙ፡ ለአድባር፡ ወይጠይሱ፤ ምንትኑመ፡ ግሠቶሙ፡ ለአድባር፡ ወጢስቶሙ፤ እምከመሰ፡ ጤሱ፡ ይጠፍዑ፨ አድባርሰ፡ ይሰመዩ፡ ሰይጣናት፡ ወአጋንንቲሁ፡ በእንተ፡ ልዕልና፡ ትዕቢቶሙ፡ እስመ፡ ቀዳሚሁ፡ ኮነ፡ ደብረ፡ ትዕቢት፡ ፀኒሶ፡ በፃዕር፡ ወወለደ፡ ኃጢአተ፡ እማሕፀኑ፡ ዘምሉዕ፡ ሕምዘ፡ ዘይቀትል። ወይእቲ፡ ኃጢአቱ፡ ልሂቃ፡ ፍጡነ፡ ኮነቶ፡ ቀኖተ፡ ለአዳም፡

| | ወለዘርኡ፨ ወበእንተ፡ ዝኵኒ፡ ለሐኰ፡ ሶበ፡ ርእየ፡ ልሕኵቶ፡ እንዘ፡ ይጼዓር፡ በአርዑተ፡ ቅኔሁ፡ ለሰይጣን፤ ወረደ፡ እንዘ፡ ኢየአርቅ፡ እመንበሩ፡ ዘሰማየ፡ ሰማያት፡ ኢያገምሮ፤ ውስተ፡ ማኅፀነ፡ ብእሲት፡ ተገምረ፡ ፱ተ፡ አውራኃ፡ ወ፭ተ፡ ዕለተ፡ እንዘ፡ ኢያርሁ፡ አንቀጸ፡ ድንግልናሃ፨ ተወሊዶ፡ ዘበደብተረ፡ ብርሃን፡ ይሴወር፡ በአጽርቅት፡ ተጠብሊሎ፡ ዘበጽርሐ፡ አርያም፡ ያሰምክ፨ ውስተ፡ ጎል፡ ሰኪቦ፤ ዘኢየበሊ፡ ሥጋ፡ ላህም፡ ወኢይሰቲ፡ ደመ፡ ጠሊ፡ ከመ፡ | ሕፃን፡ ሐሊበ፡ ጠቢዎ፡ ዘበክነፈ፡ ነፋስ፡ ይፀወር፡ በአብራክ፡ ተሐቂፎ፡ ዘብሉይ፡ መዋዕሊሁ፡ በበሕቅ፡ ልሂቆ። ዘይትለአክዎ፡ አእላፈ፡ አእላፋት፨ ከመ፡ /ገብር፡/ ተልኢኮ፤ ዘሕፀባ፡ ለዓለም፡ በማየ፡ አይኅ፡ በዮርዳኖስ፡ ተጠሚቆ፡ ፵፡ መዓልተ፡ ወ፵፡ ሌሊተ፡ በውስተ፡ ገዳም፡ ጸዊሞ፨ እምድኅረዝ፡ ርኂቦ፡ እምኀበ፡ ዲያብሎስ፡ ተመኪሮ፨ ወወንጌለ፡ መንግሥት፡ ምሂሮ፡ ድውያነ፡ ፈውሶ፨ ዕውራነ፡ ከሢቶ፡ መፃጕአነ፡ አርቲዖ፡ ሐንካሳነ፡ አርዊፆ፡ ጽቱማነ፡ | | ፈቲሆ፡ ሕሱራነ፡ አዔርዮ፡ እለ፡ ለምጽ፡ ዓንጺሖ፨ ወበሐማነ፡ ከሢቶ፡ ዘደመና፡ ፀበለ፡ እገሪሁ፤ ምድረ፡ ከይዶ፡ ዘይጼአን፡ ዲበ፡ ኪሩቤል፡ ዲበ፡ አድግ፡ ተጽኢኖ፨ ወኵሎ፡ ትሕትና፡ አርእዮ፨ ወሕማማተ፡ ሥጋ፡ ተወኪፎ፡ በየማነ፡ ገብር፡ ቀዊሞ፡ ከመ፡ ጊጉይ፡ ተአሢሮ፡ በእደ፡ ገብር፡ ተጸፊዖ፨ በበትረ፡ ሕለት፡ ርእሶ፡ ተኮሪዖ፨ ወዲበ፡ መስቀል፡ ተሰቂሎ፡ ዲበ፡ አዕጋር፡ አዕረሁ፡ ተቀኒዎ፨ ሐሞተ፡ ምስለ፡ ከርቤ፡ ቱሱሐ፡ ሰትዮ፡ ወሰሊጦ፡ መዊቶ፡ አጽንኖ፡ ርእሶ፨ | ወገቦሁ፡ ተረጊዞ፡ እምኔሁ፡ ውኅዙ፡ ፪ቱ፡ አፍላገ፡ ገነት፨ ወተገኒዞ፡ በሰንዶናተ፡ ገርዜን፨ ወተቀቢሮ፡ በመቃብር፡ ወተአጺዎ፡ በዕብነ፡ ማኅተሞ፨ ወነቢሮ፡ ውስተ፡ ልበ፡ ምድር፡ ፫ተ፡ መዋዕለ፡ ወ፫ተ፡ ለያልየ፡ ወተንሢኦ፡ እሙታን፡ ወአንሢኦ፡ ሙታነ፨ ዓርገ፡ ሰማያተ፡ ወነበረ፡ በየማነ፡ ዕበዩ፡ ዝውእቱ፡ አብ፡ ወይትዋቀስ፡ በእንቲአነ፨ ወዘንተ፡ ኵሎ፡ ፈጺሞ፡ ኃደገ፡ ለነ፡ ማዕተቦ፡ ሰቲሮ፡ አሕባለ፡ መሣግር፡ ወአንደደ፡ እሳተ፡ አኮ፡ ዘያውዒ፡ አባለ፡ ሥጋ፨

| | አላ፡ እሳተ፡ ፍቅሩ፡ ውእቱ፡ ዘኢይቈርር፡ ላህቡ፡ እምእለ፡ ያፈቅርዎ። በከመ፡ ይቤ፡ አበ፡ ኵሉ፡ ለሊሁ፡ ወሲሳየ፡ ኵሎ፡ ሥጋሁ፡ እሳተ፡ አምፃእኩ፡ ለብሔር፡ ወእፈቅድ፨ ወሶበ፡ ነደት፡ ይእቲ፡ እሳት፡ ወመልአ፡ ነበልባሉ፡ ውስተ፡ ኵሎሙ፡ ቅዱሳኒሁ፡ ወኅሩያኒሁ፨ ወባቲ፡ ነዲዩሙ፡ አርአዩ፡ ፍድፋዴ፡ ፍቅር፡ ዘበግዑ፡ በቃል፡ ወበምግባር፨ በቃሎሙሰ፡ ይቤሉ፡ በከመ፡ ኮነ፡ ውእቱ፡ ንሕነኒ፡ ንኩን፡ ውስተ፡ ዝንቱ፡ ዓለም፨ በምግባሮሙኒ፡ ኵሎ፡ ፍኖተ፡ ወንጌል፡ በዛቲ፡ እሳት፡ ውዕዮሙ፡| ሰማዕት፡ አጥፍኡ፡ እቶነ፡ እሳት፡ ዘአንደዱ፡ አላውያን፨ እስመ፡ ትሄይል፡ እሳተ፡ ፍቅር፡ ዘውስተ፡ ልቦሙ፡ ዘአንደዳ፡ መድኅን፡ በዛቲ፡ ውዕዮሙ፡ ጻድቃን፡ አጥፍኡ፡ እሳተ፡ ውርዙት፡ ዘቍጹር፡ ውስተ፡ ሥጋሆሙ፨ ወአጥረዩ፡ ንጽሐ፡ እስከ፡ ተሰምዩ፡ መላእክተ፡ እንዘ፡ ሀለው፡ በሥጋሆሙ፡ ለብሱ፡ እሳተ፡ ወኮኑ፡ ከመ፡ ኪሩቤል፡ እለ፡ ፮ ክነፊሆሙ፡ እስመ፡ ፈጻምያነ፡ ቃለ፡ ወንጌል፡ ፮ ምስለ፡ ኵሉ፡ ፍድፋዴሁ፨ ወበእንተዝኬ፡ ኮኑ፡ ቢጸ፡ ሱራፌል፡ ወሰባሕያነ፡ ምስሌሆሙ፡ በዛቲ፡ እሳት፡ | | ውዕዮሙ፡ ደናግል፡ ሐደጉ፡ አውስቦ፡ ወአጸው፡ ርእሶሙ፡ ለመንግሥተ፡ ሰማያት፨ በዛቲ፡ እሳት፡ ውዕዮሙ፡ መነኮሳት፡ ተናከርዎ፡ ለዝንቱ፡ ዓለም፡ ወለጣዕሙ፡ ወአይበሱ፡ ሥጋሆሙ፡ በሕርመት፨ ወዔሉ፡ ገዳመ፡ እንዘ፡ ኢይፈርሁ፡ አጋንንተ፡ ወአናብስተ፡ እምዋዕየ፡ እሳት፡ ወእዋዕየ፡ ሌሊት፨ ወመሣግርኒ፡ ዘተሰተረ፡ ከመ፡ ይስሕቦሙ፡ ቦቱ፡ መልዕልተ፡ ለእለ፡ አስገሮሙ፨ ወከመ፡ ይቤ፡ ለሊሁ፡ እግዚእነ፡ እምከመ፡ ተለዓልኩ፡ እምድር፡ እስሕብ፡ ኵሎ፡ ኀቤየ፨ በዝንቱ፡ | ሐብል፡ ተሰጊሮሙ፡ ብዙኃን፡ እለ፡ መጽኡ፡ እምዓዘቅተ፡ ሕርትምና፡ ወእምጽቡረ፡ አምዓም፡ ተባልሁ፨ በዝንቱ፡ ሐብል፡ ተሰጊሮሙ፡ መሣግራነ፡ ዓሣ፡ ሐደጉ፡ መሣግሪሆሙ፨ ወተለውዎ፡ ለዓሥጋሬ፡ ሰብእ፡ ይትመሀሩ፡ እምኔሁ፡ ንዒወ፡ ከመ፡ ይንዓው፡ እሙንቱሂ፡ አናብስተ፡ በተየውሆ፡ ወአናምርተ፡ ለአባግዒሁ፨ ኵሎ፤ ዘቦ፡ እከይ፡ ኀበ፡ ግዕዝ፡ ሠናይ፡ ወዝንቱ፡ ዕፀ፡ ገነት፡ ርጡብ፡ ዘስሙ፡ ላሊበላ፡ በዘትረ፡ ቃሎሙ፡ ተሰቂዮ፡ ጸገየ፡ ምዑዘ፤ ወበሐብለ፡ ሐረጎሙ፡ ተእኂዞ፨

| | ፈረየ፡ ሐዋዘ። በከመ፡ ይትከሠት፡ ይእዜ፡ ፍሬ፡ ምግባሩ፡ ፈድፋደ፡ ሶበ፡ ናሐልፍ፡ ንስቲተ፡ ወፍሬሁሰ፡ አኮ፡ ዘ፩፡ ዘዕፀ፡ ገነት፡ አላ፡ ዘዘዚአሁ፡ ኅበሪሁ፡ ወዘዘዚአሁ፡ አርአያሁ። ዘዘዚአሁ፡ ወዘዚአሁ፡ አምሳሊሁ፡ በከመ፡ ይትዓወቅ፡ ዘገነታተ፡ ፍሬሁ፡ በበመዓዛሁ፡ ወበበአርአያሁ፡ ወበበኅበሪሁ። ፍሬ፡ ወይንኒ፡ ካልዕ፡ አርአያሁ፡ ወጥላሌሁ፡ ወመዓዛሁ፡ ወፄናሁ፡ ፍሬ፡ ሮማንኒ፡ ካልዕ፡ አርአያሁ፡ ወአምሳሊሁ፡ ወመዐዛሁ። ወፍሬ፡ | መልጰጱንሂ፡ ካልዕ፡ አርአያሁ፡ ወአምሳሊሁ። ወፍሬ፡ ዕንጐታትሂ፡ ካልዕ፡ አርአያሆሙ፡ ወአምሳሊሁሙ። ወከማሁኬ፡ ዝንቱኒ፡ ብእሴ፡ አምላክ፡ ላሊበላ፡ እንዘ፡ ንጉሥ፡ ዘተመሰለ፡ ወአሌ፡ እንዘ፡ ወእግዚአ፡ ነባርያን፡ ዘተመሰለ፡ ነባሬ። እንዘ፡ እግዚእ፡ መኰንን፡ ተመሰለ፡ ተኰናኔ። አርአየ፡ ፍሬ፡ ሂሩታቲሁ፡ ፍሬ፡ ጾም፡ ምስለ፡ ፍሬ፡ ትእግሥት። ፍሬ፡ ትሕትና፡ ዘምስለ፡ ፍሬ፡ ንዴት። ፍሬ፡ ጸሎት፡ ዘምስለ፡ ፍሬ፡ የውሀት፡ | | ፍሬ፡ ሰጊድ፤ ዘምስለ፡ ነጸፍጻፈ፤ ሐፍ፤ ተመሰለ፡ ከመ፤ ሰማዕት፤ እስመ፡ ትትኤጸር፡ እምጠባይዕ፡ እንበለ፡ ምክያድ፨ ወእንበለ፡ መጥባሕት፤ ፍሬ፡ ንሕጽሕ፤ ዘምስለ፡ ፍሬ፡ ገይሰ፤ ቤተ፡ ክርስቲያን፤ ቅድስት፨ ፍሬ፡ ተብቅሎ፡ ነገድ፡ ዘምስለ፤ ምጽዋት፡ ፍሬ፤ ጽድቅ፡ ምስለ፡ ምሕረት፤ ፍሬ፡ ስብሐት፡ ዘምስለ፡ ፍሬ፡ ግናይ፡ ወአኰቴት፤ ፍሬ፡ አርምሞ፤ ዘምስለ፤ ኤላሜድ፡ ፍሬ፡ ዓቂበ፤ እጓለ፡ ማውታ፤ ዘምስለ፡ ፍሬ፡ ረድእ፡ እቤራት፡ ፍሬ፡ ዓቂበ፡ ኵሎን፡ መጻሕፍተ፡ አጥረየ፡ ላሊበላ፡ አስተጋብኦ፡ እምቅዱሳን፡ ቀደምት፡ ፍሬ፨ ምግባራቲሆሙ፡| ሠናየ፡ እንተ፡ ውእቱ፤ ፍሬ፡ መንፈስ፡ ቅዱስ፡ በከመ፡ ይቤ፡ ጳውሎስ፡ ልሳነ፡ ዕፍረት፡ ወፍካሬሁስ፡ ለመንፈስ፡ ቅዱስ፡ ዝውእቱ፤ ሃይመኖት፡ ሰላም፡ ትእግሥት፡ የው/ሀ/ት፡ ኢዘምዎ፡ ፍቅር፡ እስመ፤ ፍቅርሰ፤ ርእሰ፡ ኵሎን፡ ውእቱ፡ ትእዛዛት፡ እስመ፡ ፍቅር፡ ኢያስተገብር፡ እኩየ፡ ፍቅር፡ ያስተኢግሥ፡ በኵሉ። ፍቅር፡ ያስተዔግስ፡ በኵሉ፡ ፍቅር፡ ኢያስተፌሥሕ፡ በግፍዕ። ኢያስተማዕዕ። ፍቅር፡ ኢያሄሊ፡ እኩየ። ፍቅር፡ ኢየኃሥሥ፡ ተድላ፡ ለባሕቲቱ፡ ኢያስተኢቢ። ዘንተኬ፡ ኵሎ፡ ዓቂበ፡ በበአግዋሪሁ፡ ዘምዑዝ፡ ጼናሁ፡ ዘጥዑም፡ ፍሬሁ፡ ዘተዘግበ፡ ውስተ፡ ሰማያት፡ ኀበ፡ ኢይረክቦ፡

| | ፃፄ፡ ወኢቍንቍኔ፡ ውስተ፡ መዛግብተ፡ ጽድቆሙ፡ ለቅዱሳን፡ እለ፡ እሙንቱ፡ ብርሃናተ፡ ዓለም። ብፁዕኬ፡ ዘበልዐ፡ እምፍሬሁ፡ ለዝንቱ፡ ብእሲ፡ ጻድቅ፡ ቀሲሞ፡ እምአስካለ፡ ጻማሁ፡ በተመስሎተ፡ ምግባራቲሁ። እስመ፡ ዘይትሜስሎ፡ በምግባር፡ ይሄሉ፡ ኀበ፡ ሀሎ፡ ውእቱ፡ ወኀበ፡ ቦአ፡ ይበውእ። ወኀበ፡ አስመከ፡ ያሰምክ። ወኀበ፡ ተጽሕፈ፡ ስሙ፡ ይጸሐፍ፡ ስሙ። ተምሳሊሁ፡ ዘተሰርገወ፡ ስነ፡ ይሰረግው፡ ተላዊ፡ ፍኖቱ። ወዘተቀጸለ፡ አክሊለ፡ ምዝጋና፡ ይትቂጸል፡| ዘይትሜሰሎ፡ በገድል። ናሁ፡ ውእቱሰ፡ ነሥአ፡ አክሊለ፡ ምዝጋናሁ፡ ዘኢየኃልፍ፡ ወዘኢይጸመሂ፡ ዘተዘግበ፡ በኃሳበ፡ ሕሊናሁ፡ ለዘአሠነዮ፡ ሕይወቶሙ፡ ዘኢተገብረ፡ በሃሳበ፡ ፃማሆሙ፡ ለጠቢባን፡ መስተአግሣን፡ እለ፡ አኒመ፡ በሜላት፡ ወበኅብረ፡ ደረከኖ፡ ወዘአዝማር። ወዓዲ፡ ነሥአ፡ ክብረ፡ እምኀበ፡ እግዚአብሔር፡ ዘየዓቢ፡ እምክብረ፡ ካልአኒሁ፡ እስመ፡ ብዙኅ፡ ጾታ፡ ክብሮሙ፡ ለጻድቃን፡ በከመ፡ አርአየ፡ ጳውሎስ፡ ወነገረ፡ በምሳሌ፡ እንዘ፡ ይብል፡ ካልዕ፡ | | ክብሩ፡ ለፀሐይ፡ ወካልዕ፡ ክብሩ፡ ለወርኅ፡ ወካልዕ፡ ክብሮሙ፡ ለከዋክብት፨ ወኮከብ፡ እምኮከብ፡ ይኄይስ፡ ክብሩ፨ ወከማሁኬ፡ የንሥኦቶሙ፡ ለቅዱሳን፡ በከመ፡ ኮከብኒ፡ ወርኅኒ፡ ከማሁ፡ ቦሙ፡ ኡፃፌ፡ ወዝንቱሰ፡ ምክሀ፡ ኵልነ፡ ላሊበላ፡ ልብስተ፡ ክብሩ፡ ኢኮነ፡ ከመ፡ ካልአን፡ ኢከመ፡ ፀሐይ፡ ወኢክዕበተ። አላ፡ ምስብዒተ፡ እምፀሐይ፡ ይበርህ፡ ስነ፡ አልባሲሁ፡ ዘተአንመ፡ በእደ፡ ኬንያ፡ ሕያው፡ ወአልቦ፡ ዘይትማሰሎ፡ እምነ፡ ኬንት፨ ብፁዕኬ፡ ዘረከበ፡ ምስለ፡ ላሊበላ፡ | ወዘተአጽፈ፡ ልብሰተ፡ ዑፃፌሁ፡ ወኢተመሰሎ፡ በምግባሩ፡ ኢይነሥእ፡ ለክብሩ፡ ወዘሰ፡ ይፈቅድ፡ ይባዕ፡ ኀበ፡ ቦአ፡ ላሊበላ፡ ይልበሳ፡ ለጻማሁ፡ በከመ፡ ይቤ፡ ጳውሎስ፡ ለእመ፡ አረይነ፡ ሕማመ፡ ንዔሪ፡ ክብረ፨ ወለእመ፡ ዓረይነ፡ መዊተ፡ ንዔሪ፡ ሕይወተ፡ ወነጊሠ፡ እስመ፡ እንበለ፡ ጸማ፡ ኢይትከሀል፡ ይበውዕዋ፡ ለመንግሥተ፡ ሰማያት፡ በከመ፡ ይቤ፡ ካዕበ፡ ጳውሎስ፡ በብዙኅ፡ ጻማ፡ ሀለወነ፡ ንባዕ፡ ውስተ፡ መንግሥተ፡ እግዚአብሔር፨ ወዘሰ፡ ይብል፡ እረክብ፡ መክፈልተ፡

| | ውስተ፡ ር[እ]ስቶሙ፡ ቅዱሳን፡ ዘኢለብሰ፡ ጸማሆሙ፡ ለቅዱሳን፡ ወይዘለፎ፡ ቃለ፡ ነቢይ፡ ዘይቤ፡ ወይፈድዮ፡ ለኵሉ፡ በከመ፡ ምግባሩ፤ ወለእለሰ፡ ቦሙ፡ ምግባረ፡ ጽድቅ፡ ሎሙ፡ ክብር፡ ወሎሙ፡ ስብሐት፡ ወሎሙ፡ ዕፀ፡ ሕይወት፡ ወሎሙ፡ መንበር፡ ድልው፤ በየማነ፡ በግዑ፤ በከመ፡ ይቤ፡ በአፈ፡ ላእኩ፡ እጓላ፡ አንበሳ፡ ዘእምነገደ፡ ይሁዳ፡ ወለዘሞአ፡ እሁቦ፡ መንበር፡ ምስሌየ፡ ውስተ፡ መንበርየ፡ በከመ፡ ሞእኩ፡ ወነበርኩ፡ ውስተ፡| መንበሩ፡ ለአቡየ፨ ወይሰምዑ፡ ካዕበ፡ ቃለ፡ አስተብጽዖ፡ እምአፈ፡ ነቢይ፡ ዘሰንቀወ፡ ወእንዘ፡ ይብል። ብፁአን፡ እለ፡ ንጹሐን፡ በፍኖቶሙ፡ እለ፡ የሐውሩ፡ በሕገ፡ እግዚአብሔር፡ ብፁዓን፡ እለ፡ ያኃሱ፡ ስሞ፡ ወበኵሉ፡ ልቦሙ፡ የኃሥሥዎ፨ ዝኬ፡ ውእቱ፡ ፍዳሆሙ፡ ለጻድቃን፡ ለእለ፡ ዓቀቡ፡ ሕጎ፡ ለልዑል፡ እንዘ፡ ይ/ት/ሄሉ፡ በገድል፡ ወለሃባርያነ፡ እኪትሰ፡ ሎሙ፡ ኃሣር፡ ወሎሙ፡ ጽእለተ፡ /ለገብረ፡ በምህርካ፡ ሠላሴ፡/ ምናኔ፡ እምኀበ፡ እግዚአብሔር፡ ወእምኀበ፡ ሰብእ፡ | | ዘገዩ፡ እስጢፋኖስ፡ ወመላእክት፤ ወሎሙ፤ መርገም፡ ሎሙ፡ ረኃብ፤ ወሎሙ፡ ጽምዕ፤ ሎመሙ፡ ደይን፨ ሎሙ፡ እሳት፡ ርሱን፡ ሎሙ፡ ሲኦል፡ ወሎሙ፡ ገሃነም፡ ዝውእቱ፤ ሞት፡ ዳግም፡ በዘይመጽእ፨ ዓለም፡ ወይስምዑ፤ ካዕበ፡ ቃለ፡ መደንግፅ፡ መፍርህ፡ ወረዓድ፡ እምአፈ፡ መድኅን፨ ዘይብል፡ ሑሩ፡ እምኔየ፡ ርጉማን፡ ውስተ፡ እሳት፡ ዘለዓለም፡ ዘድልው፡ ለሰይጣን፡ ወለመላእክቲሁ፨ እስመ፡ ርኅብኩ፡ ኢያብላእክሙኒ፡ ጸማእኩ፡ ኢያስተይክሙኒ፤ ነግዩ፡ ኮንኩ፤ ወኢተወከፍክሙኒ፡ አረቁ፡| ኢያልበስክሙኒ፡ ደወይኩ፤ ወኢሐወጽክሙኒ፡ ተሞቃሕኩ፤ ወኢመጻእክሙኒ፤ ኀቤየ፡ ወኢነበብክሙኒ፤ ዝውእቱ፡ ፩ አፈ፡ ሰይፍ፡ እም ፪ ዘይቤ፤ ዮሐንስ፡ አቡቀለምሲስ፡ ወይወጽእ፡ እምአፉሁ፡ ሰይፍ፡ በሊሕ፡ ዘ፪ አፉሁ፡ ዝውእቱ፤ ዘይበትክ፡ ቃሎሙ፡ ለእልዋን፡ ለእለ፤ አግብኡ፡ ቃለ፡ እንዘ፡ ይብሉ፡ እግዚኦ፤ ማእዜኑ፡ ርኢናከ፡ ርሁበከ፡ ወጽሙዓከ፤ ኢያስተይናከ፡ ማእዜኑ፡ ርኢናከ፡ ነግደ፡ ኮንከ፡ ኢተወከፍናከ፡ ወኢያኅደርናከ፡ ዕሩቀከ፡

| | ወኢያልበስናከ፡ ደውየከ፡ ወኢሐወጽናከ፡ ወተሞቂከ፡ ኢመጻእነ፡ ኀቤከ፡ ወኢነበብናከ፨ ወያወሥኦሙ፡ ዝኩ፡ ቃል፡ ሰይፍ፡ እንዘ፡ ይትበተክ፡ ቃሎሙ፨ ወይብሎሙ፡ አማን፡ እብለክሙ፡ ኵሎ፡ ዘኢገበርክሙ፡ ለ፩፡ እምእሉ፡ ንዑሳን፡ አኃዊየ፡ እለ፡ የአምኑ፡ ብየ፡ ሊተ፡ ኢገበርክሙ፡ ወእምዝ፡ አልቦ፡ ዘያወሥኡ፡ እስመ፡ ይትበተክ፡ ቃሎሙ፡ በሰይፈ፡ ቃሉ፡ ለልዑል፡ ወይትፈጸም፡ አፉሆሙ፡ በከመ፡ ይቤ፡ በነቢይ፡ እስመ፡ ይትፈጸም፡ አፍ፡ ዘይነብብ፡ ዓመፃ፡ ወባሕቱ፡ ያሐውሩ፡| ውስተ፡ ኵነኔ፡ መቅሠፍት፡ ዘለዓለም፡ ተዓሢሮሙ፡ በ፯ አሕባል፡ ቃላ/ተ/፡ ወንጌል፡ ወያንኰረጉሩ፡ ውስተ፡ ግበ፡ ሲኦል፡ ወበህየ፡ ይዘረው፡ አዕፅምቲሆሙ፡ ወምስለ፡ ሲኦል። ካዕበ፡ ይትመጠውዎሙ፡ ገሃነም፡ ወህየ፡ ቤቶሙ፡ እስከ፡ ለዓለም፤ ዝኬ፡ ፍዳሆሙ፡ ለገበርተ፡ ዓመፃ፡ ወካልዑሂ፡ አፈ፡ ሰይፍ፡ ዘይወ/ር/ስ፡ ሕይወተ፤ ዝውእቱ፡ ዘይቤሎሙ፡ ለጻድቃኒሁ፡ ወልደ፡ እግዚአብሔር፤ ንዑ፡ ኀቤየ፡ ቡሩካኒሁ፡ ለአቡየ፡ ትረሱ፡ መንግሥተ፡ ዘአስተዳለውኩ፡ | | ለክሙ፡ እምቅድመ፡ ይትፈጠር፡ ዓለም፨ እስመ፡ ርኅብኩ፡ አብላዕክሙኒ፡ ጸማዕኩ፡ አስተይክሙኒ፡ ነግደ፡ ኮንኩ፡ ተወክፍክሙኒ፡ አረቁ፡ ኣልበስክሙኒ፡ ደወይኩ፡ ሐወጽክሙኒ፡ ተሞቃሕኩ፡ ወመጻእክሙኒ፤ ኀቤየ፡ ወነበብክሙኒ፨ ወእምዝ፡ አሜሃ፡ ያወሥእዎ፨ ጻድቃነ፡ ወይቤልዎ፡ እግዚኦ፡ ማእዜኑ፤ ርኢናከ፡ ርሁበከ፤ አብላዕናከ፡ ጽሙአከ፡ አስተይናከ፡ ወማዕዜኑ፡ ርኢናከ፡ ነግደከ፤ ተወከፍናከ፡ ወአኅደርናከ፡ ርሩቀከ፡ ወድውየከ፡ ወሙቅሐከ፡ ወተልእክናከ፨ ወያወሥኦሙ።| ዝኩ፡ ሰይፈ፤ ቃለ፤ ማሕየዊ፡ ወይቤሎሙ፡ አማን፤ እብለክሙ፤ ኵሎ፡ ዘገበርክሙ፡ ለ፩ እምእሉ፡ ንዑሳን፡ አኃውየ፡ እለ፡ የአምኑ፡ ብየ፡ ሊተ፡ ገበርክሙ፡ ወያሐውሩ፡ እሉሂ፡ ተስሂቦሙ፡ በ፮ አሕባለ፡ ቃላተ፡ ወንጌል፡ ውስተ፡ መንግሥተ፡ ሰማያት፡ ወይበውዑ፡ ኀበ፡ ሀለወ፡ እግዚአብሔር፡ ምስለ፡ መንፈሱ፤ወዝንቱሂ፡ ገብረ፡ መስቀል፡ ፩፡ ውእቱ፡ እምኔሆሙ፡ እምእለ፡ ቦኡ፡ ኢየሩሳሌም፡ ሰማያ/ዊ/ት፡ አግዓዚት፡ ብሔረ፡ ብርሃን፨ ዘኢየኃልፍ፡ እንተ፡ ውስቴታ፡ ቈላፍ፡ ዘኢተገዝረ፡

| | ቍልፈተ፡ ልቡ፡ በመጥባሕተ፤ ሃይማኖት፡ ወአኮ፡ ቍልፈተ፡ ነፍስቱ፡ በመጥባሕተ፤ ሥጋ[ሁ]ዊት፡ ወሀገርሰ፡ ኀበ፡ ቦአ፡ ላሊበላ፡ ኢትፈቀድ፡ ከመ፡ ያብርህ፡ ላቲ፤ ብርሃነ፡ ፀሐይ፡ ወወርኅ፡ ወኢከዋክብት፡ ብርሃን፤ እስመ፡ እግዚአብሔር፤ ያበርህ፤ ላቲ፡ ወብርሃነ፡ በግዑ፤ ውስቴታ፡ ኃደረ፡ ምስለ፡ አብያጺሁ፡ ብርሃናውያን፤ እስመ፡ በርሀ፡ ልቡ፡ በጸዳለ፡ መንፈስ፡ ቅዱስ፡ ወበቃለ፡ መጻሕፍት፡ በከመ፡ ተብህለ፡ /ፌ/መንክር፤ ስምዕከ፡ በእንተዝ፡ ኃሠሠቶ፡ ነፍስየ፨ ነገረ፡ ቃልከ፡ ያበርህ፡ ወያጠብብ፡ | ሕፃናተ፨ ወዓዲ፡ ይቤ፡ ኖን፡ ማኅቶት፡ ለእግርየ፡ ሕግከ፡ ብርሃን፡ ለፍኖትየ፨ ወካዕበ፡ ይቤ፡ ሕጉ፡ ለእግዚአብሔር፡ ንጹሕ፡ ወይመይጣ፡ ለነፍስ፨ ስምዑ፡ ለእግዚአብሔር፡ እሙን፡ ወርቱዕ፡ ወያሥተፌስሕ፡ ልበ፨ ትእዛዙ፡ ለእግዚአብሔር፡ ብሩህ፡ ወያበርህ፡ አዕይንተ፨ ፈሪሃ፡ እግዚአብሔር፡ ንጹሕ፡ ወየሐዩ፡ ለዓለም፨ ፍትሑ፡ ለእግዚአብሔር፡ ጽድቅ፡ ወርትዕ፡ ኅቡረ፨ ወይትፈተው፡ እምወርቅ፡ ወእም፡ ዕንቊ፡ ክቡር፨ ወይጥዕም፡ | | እምዓር፡ ወሦ/ከ/ር፡ ወገብርከሰ፡ የዓቢ፨ በአማንኬ፡ ዓቀበ፡ ሕገ፡ ብሉየ፡ ወሐዲሰ፡ ወጥዒሞ፡ ቃለ፡ እግዚአብሔር፡ ውስተ፡ አፉሁ፡ እመዓር፡ ወሦከር፡ በከመ፡ ተብህለ፡ በነቢይ፡ ጥዑም፡ ለጉርዔየ፡ ነቢበከ፡ እመዓር፡ ወሦከር፡ ጥዕመኒ፡ ለአፉየ፡ ወእምትእዛዝከ፡ ለበውኩ፨ በእንተዝ፡ አፍቀርኩ፡ ትእዛዘከ፡ እምወርቅ፡ ወእምጳዝዮን፡ ወበእንተዝ፡ አርታዕኩ፡ ኀበ፡ ኵሉ፡ ትእዛዝከ፡ ኵሎ፡ ፍኖተ፡ ዓመፃ፨ ጸላዕኩ፨ በአማንኬ፡ ጸልአ፡ ኵሎ፡ ዓመፃ፡ እስመ፡ ፍኖተ፡| ጽልመት፡ ውእቱ፡ ፀሩ፡ ለብርሃን፨ ወዘገብረ፡ ኪያሁ፡ ኢይመጽእ፡ ኀበ፡ ብርሃን፡ በከመ፡ ይቤ፡ ዮሐንስ፡ ወልደ፡ ነጐድጓድ፡ ወዘሰ፡ እኩይ፡ ምግባሩ፡ ኢይመጽእ፡ ኀበ፡ ብርሃን፡ ከመ፡ /ኢ/ይትከሠቶ፡ ምግባሩ፨ ወዘሰ፡ ጽድቅ፡ ምግባሩ፡ ወይገብር፡ ይመጽእ፡ ኀበ፡ ብርሃን፡ ከመ፡ ይስተርኢ። ምግባሮ፡ እስመ፡ በእንተ፡ /እግዚአብሔር፡/ ገብረ፨ በእንተዝ፡ ሖረ፡ በፍኖተ፡ ብርሃን፡ ከመ፡ ይትመሰሎ፡ ለብርሃን፤ ዝውእቱ፡ እግዚእነ፡ ኢየሱስ፡ ክርስቶስ፡ ተስሒቦ፡ በኃብለ፡ ቃሉ፡ ይቤ፡ ተመሰሉ፡ ኪያየ፡ እስመ፡ ያረውጾ፡ ካዕበ፡

| | ቃለ፡ ሐዋርያ፡ ዘይቤ፡ ተመሰሉ፡ ኪያየ፤ በከመ፡ አነ፡ እትሜሰሎ፡ ለክርስቶስ፤ ዮሐንስኒ፡ ዓዲ፡ ይቤ፤ ወዘሰ፡ ይብል፡ ውስተ፡ ብርሃን፡ ሀለውኩ፡ መፍትው፡ ይሑር፡ ዝክቱኒ፡ በእላንቱ፡ አኅባለ፡ ቃል፡ ተስሒቦ፡ ወራግናቶሂ፡ እንዘ፡ ይሄድፍ፡ በመሐድፈ፡ ሃይማኖት፡ ኢይኃይሎ፡ ነፋሰ፡ ዓውሎ፡ ዘኃጢአት። አንሶሰወ፡ ውስተ፡ ባሕረ፡ ዓለም፡ እንዘ፡ ኢይለክፎ፡ ማይ፡ ወአዕጋሪሁኒ፡ ጥቀ፡ ኢያርሐሰ፡ በከመ፡ ይቤ፡ ፩ እምነ፡ ብርሃናተ፡ ዓለም፡ እንዘ፡ ይነግር፡ እንዘ፡ ኵሎሙ፡ በእንተ፡ ርእሱኒ፡| ወበእንተ፡ ካልሁኒ፡ እስመ፡ ቦ፡ እለ፡ ይትኃዘቡነ፡ ከመ፡ በሥጋነ፡ ነሐውር፡ በሥጋነሰ፡ ነሐውር፡ ወአኮ፡ /በ/ሕገ፡ ዚአሁ፡ ዘንታውር፡ አኮ፡ /በ/ሕገ፡ ዚአሁ፡ ዘንዋውር፡ እስመ፡ ንዋየ፡ ሐቅሉ፡ ለፀብእነ፡ ኢኮነ፡ በሕገ፡ ሥጋ፡ አላ፡ በኃይለ፡ መንፈስ፡ ቅዱስ፡ ውእቱ፡ ይነሥት፡ ወዘያንህል፡ ኵሎ፡ አጽዋናተ፡ በኃይለ፡ መንፈሱ፡ አንሂሎ፡ ኵሎ፡ አጽዋናተ፡ ዘኃጢአት፡ መጽሕያት፡ ርቱዓ፡ በዘጼሑ፡ ሎቱ፡ ነቢያ/ት/፡ ወሐዋርያት፤ ወእንዘ፡ ኢይትመየጥ፡ ኢለየማን፡ ወኢለፀጋም፡ በከመ፡ ይቤ፡ ወንጌላዊ፡ ጺሑአ፡ | | ዘሠሉስ፡ ፍኖቶ፡ ለእግዚአብሔር፡ ወአርዩ፡ መጻይሕቶ፡ ኵሎ፡ ማዕምቅ፡ ይምላዕ፡ ወኵሉ፡ ወግር፡ ወደብር፡ ይተሐት። ወይከውን፡ መብዕስ፡ መጽያሕተ፡ ርቱዓ፡ ወየዓሪ፡ ፍኖተ፡ መብዕሰ። ወይርአይ፡ ኵሎ፡ ዘነፍስ፡ አድኅኖቶ፡ ለእግዚአብሔር። ወዘንተ፡ ኵሎ፡ ሰሚዖ፡ እምቃለ፡ መምሕር፡ ንዋየ፡ ሐቅል፡ እስመ፡ ቦቱ፡ ይትዌለጥ፡ ግዕዘ፡ መዊቱ፡ ኀበ፡ ግዕዘ፡ መልእክት፨ ወዝንቱሰ፡ ብእሲ፡ ፀሐተ፡ ጽድቅ፡ ብሩህ፡ ረከበ፡ ዘንተ፡ ኵሎ፡ ኃብታተ፡ እንዘ፡ ሀሎ፡| በሥጋሁ፡ ኮነ፡ ከመ፡ ዘኢለብስ፡ ሥጋ፡ ወከመ፡ ሀገሪተ፡ ምስለ፡ ሱራፌል፡ ወእኅወ፡ ኪሩቤል፡ ወቢራሌ፡ ለቅብዓ፡ መንፈስ፡ እስመ፡ ኵለንቲሁ፡ ኮነ፡ ሕንፃ፡ እሳት። ዝውእቱ፡ ምብያተ፡ ጰራቅሊጦስ፡ እስመ፡ ተሐፅነ፡ በ፪አጥባቲሃ፡ ለመርዓት፡ እሉ፡ እሙንቱ፡ ሐሊበ፡ ወመዓረ፡ ሐጸነቶ፡ መርዓተ፡ ንጉሥ፡ ሰማያዊ፡ እስመ፡ አእመረት፡ ከመ፡ ይከውና፡ ወልደ፡ ወምክሀ፡ ዘይትሜካህ፡ በፍናዊሃ፡ ወበኃሢሠ፡ ሕገጊሃ። በከመ፡ ትቤ፡ እመ፡ ሳሙኤል፡ ወዘሰ፡ ይትሜካህ፡ በአእምሮ፡ ወበለብዎ፡ እእግዚአብሔር፡ ዐገቢረ፡

| | | ፍትሕ፡ ወጽድቅ፡ በማዕከለ፡ ምድር፡ ወላሊበላ፡ አፍቅረ፡ አጥባቲሃ፡ ለዘሐፀነቶ፡ እስመ፡ ይጥዕም፡ አጥዛቲሃ፡ እምወይን፡ ወአፈቃቲሃኒ፡ ይምዕዝ፡ እምእፍረታት፡ በከመ፡ ይቤ፡ ሰሎሞን፡ በማኅልይ፡ በውስተ፡ ማኅልይ፡ አዳም፡ አጥባቲኪ፡ እምወይን፡ ወመዓዛ፡ ዕፍረትኪ፡ እምኵሉ፡ አፈው፡ መዓዘ፡ ዕፍረቲሃ፡ ተስሒቦ፡ አንሶሰወ፡ ውስተ፡ መርኅብ። ወኢፈቀደ፡ ይጻእ፡ እምውስጣቲሃ፡ እስመ፡ ፈድፋደ፡ ሀለወ፡ ምስሌሃ፡ በከመ፡ ይቤ፡ ነቢይ፡| ዕግትዋ፡ ለጽዮን፡ ወሕቀፍዋ፡ ወተናገሩ፡ ውስተ፡ ማኅፈዲሃ፡ ደዩ፡ ልበክሙ፡ ውስተ፡ ኃይላ፡ ወትትከፈልዋ፡ ለክበዲሃ። በአማንኬ፡ ተከፈለ፡ ክበዲሃ፡ ለጽዮን፡ እንተ፡ ይእቲ፡ ቤተ፡ ክርስቲያን። ወክበዲሃ፡ ምስጢራተ፡ መለኮት፡ ውእቱ፡ ወላሊበላ፡ ተካፈለ፡ ምሥጢራተ፡ ቅድሳተ፡ ዘይትቀዳኅ፡ ዐውስቴታ፡ አሰራበ፡ ሕይወት። ከዊኖ፡ ተክለ፡ ውስተ፡ ዐፀድ፡ ከመ፡ ዕፀ፡ ዘይት፡ ሥሙር፡ ዘኢየአብር፡ ፍሐሁ፡ ወኢይጸመሃ፡ ገድሉ፡ ወ/ኢ/ይየብስ፡ ጉንደ፡ ወኢይጸንን፡ አዕጹቂሁ፡ | | ወኢይበኈብኆ፡ ስረዊሁ፡ እስመ፡ ማየ፡ ሕይወት፡ ይሰቅዮ፡ እምነ ፬፡ አፍላገ፡ ሕትወት፡ ወኮነ፡ ሙካፈ፡ ለዘትረ፡ ወንጌል፡ ዝውእቱ፡ ፈልፈለ፡ ሣህል፡ ዘነቅዓ፤ እምአፉሁ፡ ለእግዚእነ፡ ወአምላክነ፡ ወአመድኃኒነ፡ ወፈራቂነ፡ ኢየሱስ፡ ክርስቶስ፡ በዝንቱኬ፡ ጠለ፡ ኮነ፡ ከመ፡ ገነት፡ ርውይት፡ /ወ/ከመ፡ ዓዘቅት፡ ዘኢይነጽፍ፡ ማዩ፤ በከመ፡ ይቤ፡ ኤርምያስ፡ ቡሩክ፡ ብእሲ፡ ዘይትዌከል፡ በእግዚአብሔር፡ ተስፋሁ፡ ወይከውን፡ ከመ፡ ኦም፡ ዘጽፉቅ፡ አዕጹቂሁ፤ ወይከውን፡ ቈጽለ፡ አዕጹቂሁ፡| ወኢይፈርህ፡ ሶበ፡ ይመጽእ፡ ኃሩር፡ ወኢይነትግ፡ ፈሪየ፡ ዕመቀ፡ ልቡ፨ ጥዩቀኬ፡ ተፈጸመ፡ ዝንቱ፡ ቃል፡ በላዕለ፡ ላሊበላ፡ ብፁዕ፡ ቀትረ፡ መንግሥት፡ ዘአልቦ፡ ጽልመት፡ ውስቴቱ፤ እስመ፡ ያበርህ፡ ማኅቶተ፡ መንፈስ፡ ቅዱስ፡ ውስተ፡ ልቡ፡ እስመ፡ ኮነ፡ አምደ፡ ለኵሉ፡ ምግባሩ፡ ተ፡ ሠናይ፤ ዘተብህለ፡ ዘገብሮ፡ የሐዩ፡ እስከ፡ ለዓለም፨ ወኮነ፡ ለቤተ፤ ክርስቲያንሂ፡ ከመ፡ ብንተ፡ ዓይን፡ እንዘ፡ አስተሐይጽ፡ ዘልፈ፡ ግብረ፡ ሠርዓታቲሃ፨ እመቦ፡ ዘቦ፡ ውስቴታ፡ ተፅናነ፡

| | እምሥርዓተ፡ ምሥጢራቲሃ፡ ከመ፡ ያስተሐምም፡ ላቲ፤ እስመ፡ ወልድ፡ ውእቱ፡ ዘወለደቶ፡ እመርዓዊ፡ ሰማያዊ፡ ወሩካቤሃኒ፡ እምሰሚዕ፡ አ፡ ወንጌል። ወበእንተዝ፡ ኮነ፡ ላሊበላ፡ መስተገብረ፡ ለአሥተናስኦታ፡ በከመ፡ ይቤ፡ ነቢይ፤ በመዝሙር፡ ህየንተ፡ አበውኪ፡ ተወልዱ፡ ለኪ፡ ደቂቅ፡ ወአበዊሃሰ፤ ነቢያት፡ እሙንቱ፡ ወደቂቀ፡ አበዊሃኒ፡ ሐዋርያት፡ ወወልደ፡ ሐዋርያቶኒ፡ ላሊበላ፡ በከመ፡ ይሰምዕ፡ ወልድ፡ ትእዛዘ፡ አቡሁ፡ ከማሁ፤ ሰምዓ፡ ት እዛዞሙ፡ ወኢያንተገ፡ እምቃለ፡ ምዕዳኖሙ፡| በከመ፡ እሙንቱ፡ ሐዋርያት፡ ኮንዋ፡ ለቤተ፡ ክርስቲያን፡ ሐፁረ፡ ወጥቅመ፨ ከማሁ፡ ኮነ፡ ላሊበላ፡ እስመ፡ ወልደ፡ ሐዋርያት፡ ውእቱ፡ ወዓቃቤ፡ ትእዛዞሙ፡ ወተላዊ፡ አሰሮሙ፡ እስመ፡ ኢኃደገ፡ ሥርዓቶሙ፡ ወገብረ፡ ሥምረቶሙ፨ በከመ፤ ይቤ፡ መክብብ፡ እስመ፡ ኢየኃድግ፡ ወልድ፡ ግብረ፡ አቡሁ፨ አማንኬ፡ ኢኃደገ፡ አሰሮ፡ ለክስስቶስ፡ ለዘወለደ፤ እምከርሠ፡ ጥምቀት፡ ወግብሮሙኒ፡ ለሐዋርያቲሁ፤ በከመ፡ ሐሙ፡ እሙንቱ፤ ሐሙ፡ በእንተ፡ ፍቅሩ፡ ለእግዚኦሙ፡ እንዘ፡ ይብሉ፡ አልቦ፡ | | ዘያኃድገነ፡ ፍቅሮ፡ ለክርስቶስ፨ ወምንት፡ ወኢሕይወት፡ ወኢእሳት፤ ወኢመጥባኅት፡ ወኢኵናት፤ ወኢረኃብ፤ ወኢጽምዕ፤ ኢፀድፍ፤ ወኢዳግም፡ ልድት፤ ወላሊበላኒ፡ ተለዊ፡ አሰሮሙ፡ ኢፈርሃ፡ ኢሞተ፤ ወኢእሳተ፡ ወኢመጥባሕተ፤ ኢረኃበ፤ ወኢጽምዓ፤ ኢቁረ፤ ወኢእርቃነ፤ ኢድካመ፡ ወኢሀፈ፤ ወበእንተዝ፡ ኮነ፡ ላሊባላ፡ ጽዋዓ፡ ለመርዓ፡ በግዑ፡ ኀበ፡ ተደለወ፤ ማዕደ፡ ሕይወት፡ ወኀበ፡ ተቀድሐ፡ ጽዋዓ፤ መድኃኒት፡ ኀበ፡ ሀለው፡ ነቢያት፡ erased ወሐዋርያት፤| እስመ፡ ለነቢያትኒ፡ መፍቀሬ፤ ትንቢቶሙ፡ ውእቱ፡ ወለሐዋርያትኒ፡ ተላዌ፤ አሰሮሙ፤ ወበእንተዝ፡ ደለዎ፡ ከመ፡ ይርከብ፡ መክፈልተ፡ ወርስተ፡ ውስተ፡ በአቶሙ፡ በከመ፡ እሙንቱኒ፡ አሥመርዎ፡ ለእግዚኦሙ፡ እስመ፡ ኮነ፡ ሙዳየ፡ ለቃሎሙ፡ ወመዝገበ፡ ለበረከቶሙ፡ ወለጸጋ፡ ረድኤቶሙ፨ ሚመጠነ፤ ይደልዎ፡ ውዳሴ፤ ለዘከመዝ፡ ብእሲ፡ ለዘኢያነተገ፡ እምነቢያት፤ ወኢሐጸ፤ እምሐዋርያት፡ ኃይለ፡ ትንቢቶሙ፡ ለነቢያት፡ ኃደረ፨ ውስቴቱ፡ ወመንፈሰ፡ ረድኤቶሙ፡ ለሐዋርያት፡ ኢርሕቀ፤ እምኔሁ፤ አሶተ፡

| | ረድኤቶሙ፡ ለጻድቃን፡ ኢሰሰለ፡ እምኔሁ፡ ወጸጋ፡ መዊዖቶሙ፡ ለሰማዕት፡ ኢበጠለ፡ እምኔሁ፤ ወንጽሖሙ፡ ኒ፡ ለምዕመናን፡ ኢዓርቀት፡ እምሥጋሆሙ፤ ወሀብተ፡ ትጋሆሙኒ፡ ለመላእክት፡ ሀለወት፡ ምስሌሁ፡ ወበረከተ፡ ኵሎሙ፡ ኅሩያን፡ አምላክ፡ አዕረፈት፡ ውስተ፡ ድማሁ፤ እስመ፡ አዔረቶ፡ ጸማ፡ ምግባራቲሁ፡ ፈድፈደት፡ ምስለ፡ እሉ፡ ኵሎሙ፡ ነቢያት፨ ውእቱ፡ እስመ፡ ያአምር፡ እምቅድመ፡ ይኩን፡ ዘሀሎ፡ ይኩን። ሐዋርያኒ፡ ውእቱ፡ | ኮነ፡ ሎሙ፡ እስመ፡ ሰባኬ፡ ውእቱ፡ ኮነ፡ ሎሙ፡ ለእለ፡ ኢየአምሩ፡ ስብከተ፡ መድኃኒት፨ መሀሮሙ፡ አሚነ፡ ሥላሴ፡ ወአብኦሙ፡ ዐቢይ፡ ክርስቲያን፡ ለብዙኃን፡ አረማውያን፡ ወአጥመቆሙ። በስመ፡ አብ፡ ወወልድ፡ ወመንፈስ፡ ቅዱስ፡ በከመ፡ ይቤ፡ መድኃኒነ፡ በወንጌል፡ ሑሩ፡ ወመሐሩ፡ በስምየ፡ እንዘ፡ ታጠምቁ፡ በሉ፡ በስመ፡ አብ፡ ወወልድ፡ ወመንፈስ፡ ቅዱስ፡ ወላሊበላሂ፡ ገብረ፡ ከመዝ፡ ከመ፡ ኢይኩን፡ ንቱገ፡ እምሐዋርያት፡ ወአእመኖሙ፡ ለዕልዋን፨ ወበእንተዝ፡ | | ተሰምየ፡ ሐዋርያ፡ ጻድቅኒ፡ ውእቱ፡ እስመ፡ በበትረ፡ ጽሙና፡ ኩኑን፡ አባለ፡ ሥጋሁ፨ ሰማዕትኒ፡ ውእቱ፡ እስመ፡ ነበረ፡ እንዘ፡ ይትኳነን፡ በተቀስፎ፨ ወእንዘ፡ ይሰደድ፡ እምሀገር፡ ውስተ፡ ሀገር፡ በግፍዕ፡ ዘአልቦ፡ አበሳ፤ ወበእንተዝ፤ ይደልዎ፡ ክፍል፡ ይርከብ፡ ውዳሴ፡ ምስሌሆሙ፡ እስመ፡ በኀበ፡ ኵሉ፡ ተሰምዓ፡ ዜናሁ፡ ወኢየኃልቅ፡ ዝክረ፡ ውዳሴሁ፡ እስከ፡ ይእዜ፨ ወኢየኃልቅ፡ እምይእዜ፡ ወእስከ፡ ለዓለም፨ እምአፈ፡ እድ፡ ወአንስት፡ እምአፈ፡ አዕሩግ፡ ወሕፃናት፡ እምአፈ፡ ደናግል፡| ወመነኮሳት፡ እምአፈ፡ ዕቤራት፡ ወእጓለማውታ፡ ወመበለታት፡ እምአፈ፡ መሳፍንት፡ ወመኳንንት፨ እምአፈ፡ ሊቃናት፡ ወመሐዛት፨ እስመ፡ መንክር፡ ዘተገብረ፡ በእደዊሁ፨ ወዘተከስተ፡ በመዋዕሊሁ፡ መድፍን፡ ኅቡዕ፡ እስመ፡ ኮነ፡ ፍሥሐ፡ ለኵሉ፡ ለንኡስኒ፡ ወለዐቢይኒ፡ ወለልሂቅኒ፡ ወለደቂቅኒ፨ ወለዕቤራትኒ፡ ወለእጓለ፡ ማውታ፡ ለአብዕልትኒ፡ ወለነዳያንኒ፨ ድኅርዎ፡ ዐበይት፡ እስመ፡ ውእቱ፡ አዕበዮሙ፨ ድኅርዎ፡ አዕሩግ፡

| | እስመ፡ ውእቱ፡ ስቀ፡ ርእስናሆሙ፨ ድኅርዎ፡ ሕፃናት፡ እስመ፡ ውእቱ፡ አልኃቆሙ። ድኅርዎ፡ እጓለ፡ ማውታ፡ እስመ፡ ውእቱ፡ ሐፀኖሙ፤ ወናዘዞሙ፡ ወአንገፈ፡ ላሐሆሙ፡ እስከ፡ ረስዑ፡ ደክምናሆሙ፡ ደኃራሁ፡ እቤራት፤ እስመ፡ ከልአ፡ ተጽናሶሙ፡ ወናዘዞሙ፤ እምሐዘኖን፨ በከመ፡ ይቤ፡ ነቢይ፡ ፍትሑ፡ ለነዳይ፡ ወለእጓለ፡ ማውታ፨ ወአድኅኑ፡ ግፉአ፡ ወምስኪነ፡ ወአድኅኑ፡ ባሕታዌ፡ ወጽኑሰ፤ ወአንግፍዎሙ፡ እምእደ፡ ኃጥአን፡ ወላሊበላ፡ ኒ፡ ኢያኅፀፀ፡ እምእላንቱ፡| ቃላት፨ ወዓዲ፡ ካዕበተ፡ ገቢረ፨ ድኅርዎ፡ አብዕልት፡ እስመ፡ ውእቱ፡ አብዓሎሙ፨ ወአልቦ፡ ዘተአገሎሙ፡ ዘእንበለ፡ ዘወሀቦሙ፡ አልቦ፡ ዘነሥአ፡ እምኔሆሙ፨ ደኃርዎ፡ ነዳያን፡ እስመ፡ ውእቱ፡ ኮኖሙ፡ ምስካየ፡ ወረድኦሙ፡ በኵሉ፡ ትካዞሙ፡ ለቢዎ፡ ዘይቤ፡ ብፁዕ፡ ዘይሌቡ፡ ላዕለ፡ ነዳይ፡ ወምስኪን፡ እምዕለት፡ እኪት፡ ያድኅኖ፤ እግዚአብሔር፡ እግዚአብሔር፡ ያዓቅቦ፡ ወየሐይዎ፡ ወያበጽዖ፡ ዲበ፡ ምድር፨ ወኢያ፡ ገብዖ፡ ውስተ፡ እደ፡ ጸላኢሁ፡ እግዚአብሔር፤ ይረድኦ፡ በውስተ፡ አራተ፡ ሕማሙ፡ | | ወይመይጥ፡ ሎቱ፡ ኵሉ፡ ምስካቤሁ፡ እምደዌሁ፨ ደኃርዎ፡ ዕሩቃን፡ እስመ፡ ውእቱ፡ ከደነ፡ ዕርቃኖሙ፨ ደኃርዎ፡ ርኁባን፡ እስመ፡ ውእቱ፡ ሲሳዮሙ፡ በከመ፡ ይቤ፡ ኢሳይያስ፡ ነቢይ፡ አብዕ፡ ነዳየ፡ ውስተ፡ ቤትከ፤ ወአኅድሮ፡ ውስተ፡ ጽላሎ/ተ/፡ ቤተከ፡ ወአጽግብ፡ ርኁበ፡ እምእክልከ፡ ዘንተ፤ እምከመ፡ ገበርከ፡ እግዚአብሔር፤ ይሄሉ፡ ምስሌከ፡ ወጊዜ፡ ጸዋዕከ፡ ነየ፡ ይብለከ፡ ወየኃድር፡ ጽድቁ፡ ቅድመ፡ ገጽከ፡ ወይሠርቅ፡ ብርሃኑ፤ ከመ፡ ብርሃነ፡ መዓልት፨ ወትከውን፡ ከመ፡ ዘገነት፡ ርውይት፡ ወከመ፡ ዓዘቅት፡ እምዓዘቅት፡ | ዘኢይነጽፍ፡ ማያ፨ ደኃርዎ፡ ጽሙዓን፡ እስመ፡ ውእቱ፡ አርወዮሙ፡ እምጽምዖሙ፡ በስቲሁ፡ ሠናይ፡ ወጥዑም፡ በከመ፡ ይቤ፡ ጳውሎስ፡ ለእመ፡ ርኅበ፨ እሁከ፡ አብልዖ፡ ወለእመ፡ ጸምዓ፡ እስትዮ፨ ደኃርዎ፡ ባሕታውያን፡ እስመ፡ ውእቱ፡ ኮኖሙ፡ ረድአ፡ ወመጋቤ፡ በኵሉ፡ ውስተ፡ ኵሉ፡ ዘንተ፡ ኵሎ፡ አስተጋብአ፡ ማኅበረ፡ ቤተ፡ ክርስቲያን፡ እምንዑሳን፡ ወዓቢያን፡ ተሰምየ፡ ውሉዶሙ፨ ወካዕበ፡ በእንተ፡ ዘፆረ፡ ትካዞሙ፡ በበጾታሆሙ፡ ለኵሎሙ፡ ለድኩምኒ፡ በከመ፡ ድካሙ፡

| | ለጽሩዕኒ፤ በከመ፡ ጽንዑ፡ ወበእንተዝ፡ ተሰምየ፡ አቡሆሙ፤ እስመ፡ ርቱዕ፡ ይሰመይ፡ አበ፡ ኵሉ፡ ዓለም፤ ዘከመዝ፡ መናዝዘ፡ ወዘከመዝ፡ መተንብል፨ እስመ፡ ባቍዕ፡ ውእቱ፡ ዘበሰማይኒ፡ ወዘበምድርኒ፨ እፎኬ፡ ንዌድሶ፡ ለዝንቱ፡ ብእሲ፡ ክቡር፡ በኀበ፡ ሰማያውያን፡ ወበኀበ፡ ምድራውያን፨ እፎኬ፡ ንክል፡ አብጽሖ፡ ውዳሴሁ፡ በልሳነ፡ ሥጋ፡ መዋቲ፡ እስመ፡ ውዳሴሁ፡ እምኆፃ፡ ባሕር፡ ወእምከዋክብተ፡ ሰማይ፨ ኦም፡ ዐቢይ፡ ውእቱ፡ ላሊበላ፡ ዘምሉዕ፡ ቈጽሉ፡ ዘብዙኅ፡ አዕፁቂሁ፡ ምዑዝ፡ ጽጌሁ፡ ወጥዑም፡ ፍሬሁ፡ ወንሕነኒ፡| አጽለልነ፡ ውስተ፡ አመ፡ አዕፁቂሁ፡ ወአዕረፍነ፤ እምሐሩረ፡ መርቄ፡ ተከዲነነ፡ በመንጦላዕተ፤ ጸሎቱ፡ ወተምዕዝነ፡ በጽጌሁ፡ ወጸገብነ፡ እምፍሬሁ፡ በግዕ፡ ውእቱ፡ ላሊበላ፡ ዘዕጹፍ፡ ፀምሩ፡ ዘኢተቀርፀ፡ በመጥባሕተ፡ ኃጢአት፡ መኃሥዓ፡ ውእቱ፡ ላሊበላ፡ ዘጸግቡ፡ ሐሊበ፡ እምአርያማዊት፡ ወአመ፡ ሰኵዓ፡ እምጽኦታ፡ ሠናይ፡ ዘጥልልት፡ በየማየ፡ ሕይወት፡ ላህም፡ ውእቱ፡ ላሊበላ፡ ዘጽሙድ፡ ታሕተ፡ አርዑተ፡ ወንጌል፡ ዘኢያጽነነ፡ ትልመ፡ ገራህቶ፡ ለሐረሳዊ፡ ወሐረሳዊሰ፡ መንፈስ፡ | | ቅዱስ፡ ውእቱ፡ ዘያረውጾ፡ ውስተ፡ ወፈረ፡ ዚአሁ፡ እንተ፡ ይእቲ፡ ወፈረ፡ ሕይወት፨ እንተ፡ እምኔሃ፡ ይትአረር፡ መንፈስ፡ እንተ፡ ትዘገብ፡ ውስተ፡ ሙዳየ፡ አድቆሙ፡ ለቅዱሳን፡ ምሥዋዕ፡ ውእቱ፡ ላሊበላ፡ እስመ፡ አጥረየ፡ የዋሄ፡ ለበግዐ፡ ምሥጢር። ወበእንተዝ፡ ተሰምየ፡ መልአከ፡ ምሥዋዕት። በከመ፡ ይቤ፡ ነቢይ፡ መሥዋዕቱ፡ ለእግዚአብሔር፡ መንፈስ፡ የ፡ የዋህ፡ ልበ፡ ትሁተ፡ ወየዋሀ፡ ኢይሜንን፡ እግዚአብሔር፡ ባሕርይ፡ ውእቱ፡ ላሊበላ፡ ዘያጸድል፡ ስኑ፡| በውስተ፡ ጽልመት፡ ገሪፍ፡ ውእቱ፡ ላሊበላ፡ ዘአስተጋብአ፡ ዘመደ፡ ዓሣት፡ እባሕረ፡ ገድሎሙ፡ ለለቅዱሳን፡ ወሪዎ፡ ርእሶ፡ ውስተ፡ ዕመቀ፡ ቀላይ፡ ጻማሆሙ። ወኮነ፡ ሎሙ፡ ዘውገ፡ በሕጉ፡ ርትዕናሁ፡ ገይበ፡ ወርቅ፡ ውእቱ፡ ላሊበላ፡ ዘንጡፍ፡ ሰብኔ፡ ወወርቁኒ፡ እለ፡ አስከሬን፡ ዘይትቀዳሕ፡ ውስቴቱ፡ እምዘትረ፡ ምሥጢር፡ ዘነቅዓ፡ እምገቦ፡ በግዕ፡ መለኮታዊ፡ ዘኢከሠተ፡ አፉሁ፡ በሕማሙ፡ ወኢነበበ፡ በቅድመ፡ ዘይቀርጸ፡ ጽንሐሕ፡ ውእቱ፡ ላሊበላ፡ ዘይትሜአዝዎ፡ ውለደ፡ ቤተ፡ ክርስቲያን፡ ሠርጸ፡ መርዓት፡ ሐዲሳን፡ እለ፡ ንዙኃን፡ በደመ፡

| | ኪዳን፨ ሥርናይ፡ ውእቱ፡ ላሊበላ፡ ዘኢረከቦ፡ ተስናነ፡ ዕፃ፡ ዘሙስና፡ እስመ፡ ዕቁብ፡ ውእቱ፡ ውስተ፡ መከሩ፡ ለአኃዜ፡ ኵሉ፡ ዓለም፤ እፎ፡ ንክል፡ ፈጽሞ፡ ውዳሴሁ፡ ንሕነ፡ መዋትያን፡ እስመ፡ ብዙኅ፡ ውእቱ፡ ኆልቈ፡ ውዳሴሁ፡ እምነ፡ መሬተ፡ ምድር፤ ለእመኒ፡ ኮነ፡ ኵሉ፡ አባልየ፡ ልሳነ፡ ወኵሉ፡ ሕሊናየ፡ አእምሮ፤ ኢይክል፡ አብጽሖ፤ ውዳሴሁ፡ ወነገረ፡ ኂሩታቲሁ፤ ወለእመስቦ፡ ዘይፈቅድ፡ ይንግር፡ ኵሎ፤ ትራፋቲሁ፡ ይደልዎ፡ ከመ፡ ይኅድግ፡ ሕሊና፡ ዘበምድር፨ ወያዕርቅ፡ ልብስ፡ እምልብሰ፡ ሥጋ፡ ወይልበስ፡ ጠባይዓ፡ ዘመላእክት፨ ከመ፡ ይንግር፡ | ዝክረ፡ ውዳሴሁ፡ ፍጹም፡ ወይሬሲ፤ ሎቱ፡ መጠነ፡ ባሕርየ፡ ቀለም፡ ወመጠነ፡ ዕፀወ፤ ገዳም፡ ብርዓ፡ ወመጠነ፡ አቍጺሎሙ፡ ክርታሰ። ወመጠነ፡ ኖኃ፡ ሰማይ። ስፍሐ፡ እንግድዓ፡ ወመጠነ፡ ከዋክብት፡ ሰርጐ፡ ቃል፤ እስመ፡ ዓቢይ፡ ውእቱ፡ ብእሲሁ፡ ወዐቢይ፡ ዝክረ፡ ውዳሴሁ፨ ወበከመ፡ ውእቱ፡ ብርሃነ፡ ፀሐይ፨ ብርሃነ፡ ወርኅ፤ ወከዋክብት፨ ከማሁ፡ ይመውዕ፡ ክብረ፡ ዝንቱ፡ ብእሲ፡ ዘስሙ፡ ላሊበላ፡ አምክ/ብ/ረ፡ ካልአኒሁ፡ ጻድቃን፤ ወበእንተዝ፡ ይነሣእ፡ ሎቱ፡ ብእሲ፡ ዘይፈቅድ፡ | | ይጠንቅቅ፡ ዝክረ፡ ውዳሴሁ፡ አፈ፡ ዘኪሩቤል፡ ወልሳነ፡ ዘሱራፌል፡ እስመ፡ ንጉሥ፡ ውእቱ፡ ላሊበላ፡ ኢበልዓ፡ እማእደ፡ መንግሥቱ፡ ዘከመ፡ ይደልዎ፡ ለንጉሥ፡ ቅሱማት፡ በጣዕመ፤ ዝንቱ፡ ዓለም፡ ዘያፈግዕ፡ ሥጋ፡ እስመ፡ መፍቀሬ፡ ጽሙና፡ ውእቱ፤ ከመ፡ መነኮሳት፡ እለ፡ አያልያነ፡ ገዳም፡ ወከመ፡ እለ፡ ያፈቅሩ፡ ጾማዕት፨ ወከመ፡ እለ፡ ይትአረዙ፡ ስቃያተ፡ እስመ፡ ጻማ፡ ኵሎሙ፡ ተጠግዓት፡ ውስተ፡ ሥጋሁ፤ ወተጋብአት፡ ኀቤሁ፡ እስመ፡ ጸምአት፡ ነፍሱ፡ ኀበ፡ አምላክ፡ ሕያው፡ በከመ፤| ይቤ፡ ነቢይ፤ ከመ፡ ያፈቅር፡ ኃየል፡ ኀበ፡ አንቅዕተ፡ ማያት፡ ከማሁ፡ ተፈቅር፡ ነፍስየ፡ ኀበ። አምላኪየ፡ ሕያው፡ ማዕዜ፡ እበጽሕ፡ ወእሬኢ፡ ገጸ፡ ለአምላኪየ፤ ሲሳየ፡ ኮነኒ፡ አንብዕየ፡ መዓልተ፡ ወሌሊተ፨ አማንኬ፡ ተሴሰየ፡ ኅብስተ፡ ንዴት፡ ምስለ፡ ሐዘን፡ ወገዐር፡ በእንተ፡ መንግሥተ፡ ሰማያት፤ ወሰቲሁኒ፡ ምስለ፡ ብካይ፡ ወአንብዕ፡ በእንተ፡ እግዚአብሔር፨ በከመ፡ ይቤ፡ ዳዊት፡ በመዝሙር፡ ዘ ፻፡ ወ ፬፡ ወስቴየኒ፡ ምስለ፡ አንብዕየ፡ ሰተይኩ፨ እፎኬ፡ ይክል፡ ብእሲ፡ ለባሴ፡ ሥጋ፡ አብጽሐ፤ ውዳሴሁ፡ ወፀበተ፡ ውስተ፡ ዕመቀ፡ ትሕትናሁ፡ ለላሊበላ፡ እንዘ፡ ንጉሥ፡ ውእቱ፡ ዘፆረ፡

| | ፬ ዘከመዝ፡ ትሕትና፡ ወንሕነሰ፡ እንዘ፡ ነዳያን፡ እምንዋየ፡ ዝንቱ፡ ለዓለም፨ ንትኤበይ፡ እንዘ፡ አልብነ፡ ዘንኳንን፡ ወኢምንተኒ፡ አግብርተ፡ ወኢአዕማተ፡ ኢወርቀ፡ ወኢብሩረ፡ ወኢአልባሰ፡ ቀጠንተ፨ ወሶበ፡ ተከድነ፡ ጸጉረ፡ በግዕ፡ ወአገያተ፡ ዘገዚፍ፡ ፍትሉ፤ ይመስል፡ ዘንበጽሕ፡ ውስተ፡ ደመናት፤ ወነዓርግ፡ ውስተ፡ ሰማያት፡ ወይትነፋሕ፡ ልብነ፡ በመንፈስ፡ ትንቢት፡ ወንትሜሰል፡ ከመ፡ ዘኢይመውት፡ ወላሊበላኒ፡ እንዘቦ፡ አግብርት፡ ወአዕማት፡ | ወሥልጣን፡ ላዕለ፡ ኵሉ፡ ሕዝብ፡ ዘአመገቦ፡ እግዚአብሔር፡ እምታሕቴሁ፨ ኢቀነየ፡ አግብርቶ፡ በሕገ፡ አግብርት፡ ወኢዕማቶ፨ በሕገ፡ አዕማት፨ አግብርቲሁኒ፡ ይሬሲ፡ ከመ፡ ውሉዱ፡ ዘወጽኡ፡ እምሐቋሁ፨ በከመ፡ ይቤ፡ ጳውሎስ፡ ብርሃን፡ ቤተ፡ ክርስቲያን፨ አጋዕዝትኒ፡ ግበሩ፡ ዕሩየ፡ ለነበረክሙ፡ እስመ፡ ተአምአሩ፡ ከመ፡ ብክሙ፡ እግዚእ፡ በሰማያት፡ ወአዕማቲሁኒ፡ ከመ፡ እንተ፡ ወለቱ፨ ወአልባሰኒ፡ ቀጠንተ፡ ኢለብሰ፡ ላሊበላ፡ እንዘ፡ ንጉሥ፡ ውእቱ፡ በእንተ፡ | | ዘኢለብሰ፡ ተመክሆ። በከመ፡ ይቤ፡ መድኃኒነ፡ በብስራተ፡ መድኃኒት፡ ወኵሎ፡ ዘገበርክሙ፡ ገቢረክሙ፡ በሉ፡ አግብርት፡ ጽሩዓን፡ ንሕነ፡ ወባሕቱ፡ ዘይደልወነ፡ ለገቢር፡ ግብርነ፡ ወይቤ፡ ካዕበ፡ ኢትክሉ፡ ተቀንዮ፡ ለ፪ አጋእዝት፡ ወእመ፡ እኮ፡ ለ፩ ይትኤዘዝ፡ ፩ይጸልዖ፡ ከማሁኬ፡ ኢትክሉ፡ ተቀንዮ፡ ለእግዚአብሔር፡ ወለአፍውሮ፡ ንዋይ። ወዘንተ፡ ሰማዖ፡ ላሊበላ፡ መነነ፡ ዘበምድር፡ ንዋየ፡ ዘይበሊ፡ ወዘይማስን፡ ወርቀ፡ ዘይዝህል፡ ወአልባሰ፡ ዘይቈነቍን፡ ተሰፊዎ፡ ንዋየ፡| ዘኢያስተርኢ፡ ሣህሎ፡ ሰማያተ፡ ዘኢይደልዎ፤ ከመ፡ ይረስዎ፡ መፍቀርያነ፡ ወርቅ፡ እለ፡ ፈጸሙ፡ ፍትዎሙ፡ ዘበምድር፤ በኵሉ፡ ትዕግሥት፡ ኀበ፡ ኃላፍያት፡ ኢነባሪያት፤ እስመ፡ ምስሌሆሙ፡ ይማስን፡ ትፍግዕቶሙ፨ በከመ፤ ይቤ፡ ዮሐንስ፡ ሐዋርያ፡ ዘረፈቀ፡ ውስተ፡ እንግድዓ፡ እሳት፡ ኢታፍቅርዎ፡ ለዓለም፡ ወኢዘሀሎ፨ ውስተ፤ ዓለም፡ ወፍትወቱ፡ ለሥጋ፡ ወፍትወቱ፡ ለዓይን፡ ወስራህ፡ ለመንበርተ፡ ዝንቱ፡ ኢኮነ፡ እምኀበ፡ እግዚአብሔር፡ አላ፡ እምዓለም፡

| | ውእቱ፨ ወዓለምኒ፡ የኃልፍ፡ ወፍትወቱኒ፡ ወዘሰ፡ ይገብር፡ ፈቃዶ፡ ለእግዚአብሔር፡ ይነብር፡ ለዓለም፤ ወበእንተዝ፡ ላሊበላ፡ ብፁዕ፡ ኢጥዕመ፡ ግሙራ፡ እምትፍግዕቶሙ፡ ለኃጥአን፨ ኢእምአልባሰ፡ ቀጠንት፡ ወኢእማዕድ፡ ጥዕምት፤ እንዘ፡ ይሴፎ፡ በሊዓ፡ እማዕደ፡ ሕይወት፤ እስመ፡ ሰምዓ፤ ቃለ፡ ዘተብህለ፡ እምኀበ፡ እግዚአብሔር፡ በኀበ፡ ነቢይ፡ እለ፡ ይትቀነዩ፡ ሊተ፡ ይብልዑ፡ ወአንትሙሰ፡ ረኀቡ፨ እለ፡ ይትቀነዩ፡ ሊተ፡ ይሰተዩ፤ ወአንትሙሰ፡ ጽምዑ፨ እለ፡ ይትቀነዩ፡ ሊተ፡ ይልበሱ፡ | ወአንትሙሰ፡ ዕረቁ፨ እለ፡ ይትቀነዩ፡ ሊተ፡ ይትፌሥሑ፡ ወአንትሙሰ፡ ሕዝኑ፨ እለ፡ ይትሜክዑ፡ ሊተ፡ በሐሤት፡ ወይትፌሥሑ፨ ወአንትሙሰ፡ ገዓሩ፡ በመንሱት፡ በሕማመ፨ ልብክሙ፡ ወበቅጥቃጤ፡ ሐቋክሙ፡ አውይው፡ ወበእንተዝኬ፡ ላሊበላ፡ ያሜክራ፡ ለነፍሱ፡ ወለሥጋሁ፡ በጾም፡ ወበረኃብ፡ ወበጽምዕ፤ አመ፡ ይርኅቡ፤ በላዕያን፡ ከመ፡ ይጽገብ፤ አመ፡ ይጸምዑ፤ ሰታይያን፡ ከመ፡ ይርወይ፡ አመ፡ ያረምሙ፡ ሰሐቅያን፡ ከመ፡ ይትዋኃዋህ፨ ወአመ፡ ያሐዝኑ፡ ፍጉዓን፡ ከመ፡ | | ይትፌሣሕ፡ ወአመ፡ ያአርቁ፡ እለ፡ ለብሱ፡ ቀጠንተ፡ ከመ፤ ይትዓጸፍ፡ ሜላተ፡ ብርሃን፤ ንጹሐ፡ ዘኢተአንመ፡ በእደ፡ መሬታዊ፨ ወባሕቱ፡ ዝንቱ፡ ኵሉ፡ ኢይትረከብ፡ ዘእንበለ፡ መከራ፡ ወሕማሙሰ፨ ለዝ፡ ዓለም፡ ኢኮነ፡ መጠና፡ ለእንተ፡ ትመጽእ፤ ሕይወተ፡ ዘለዓለም፡ ወበእንተዝ፡ ላሊበላ፡ ቅዱስ፡ ምግባረ፡ ተወክፈ፡ ሕማመ፡ ወምንዳቤ፡ ብዙኃ፡ በእንተ፨ ጽድቅ፨ በከመ፡ ይቤ፡ መምሕረ፡ አሕዛብ፡ ጽደቁ፡ እንከ፤ በአሚን፡ ወንርከብ፡ ሰላመ፨ በኀበ፡ እግዚአብሔር፤ ወእግዚእነ፡ | ኢየሱስ፡ ክርስቶስ፡ ዘበእንቲአሁ፤ ተመራሕነ፡ ውስተ፡ ጸጋሁ፡ እንተ፡ ቆምነ፡ ወይእቲ፡ ምክህነ፨ ወአኮ፡ ባሕቲታ፡ ዓዲ፡ በሕማምነሂ፡ ንትሜካህ፤ እስመ፡ ተአምሩ፡ ከመ፡ እምሕማሙ፡ ይትዓወቅ፡ መከራሁ፡ ወተመኪሮ፤ ይነሥእ፡ ክብረ፡ ጻማሁ፡ ወተስፋሁኒ፡ ኢያስተሐፍሮ፨ እስመ፡ መልአ፡ ውስተ፡ ልብነ፤ ፍቅረ፡ እግዚአብሔር፡ በመንፈስ፡ ቅዱስ፤ ዘወሀበነ፤ በዝንቱ፡ ቃላት፡ ወበፍቅረ፡ መንፈስ፡ ቅዱስ፡ ተወርዚዎ፡ ላሊበላ፡ ዝኅዙኃ፡ ገደል፡ ተወክፈ፡ ምንዳቤ፡

| | ሥጋ፡ ከመ፡ ይኩን፡ ስሉጠ፡ ላዕለ፡ ዕፀ፡ ሕይወት፨ በከመ፤ ይቤ፡ ቴዎሎሰ፤ ወልደ፡ ነጐድጓድ፡ ብፁዓን፡ እለ፡ ያንጽሑ፡ አልባሲሆሙ፡ ከመ፡ ኢይኵን፡ ሥልጣኖሙ፤ ላዕለ፡ ዕፀ፡ ሕይወት፨ አመ፡ ይሰደዱ፡ ወይወጽኡ፡ አፍአ፡ ፭ አክላብ፡ እሙንቱ፡ መሠርያን፡ ዘማውያን፡ ወቀታልያን፤ ወእለ፡ ያጣዕው፡ ወኵሎሙ፤ እለ፡ ያፈቅሩ፡ ግብረ፡ ሐሰት፡ ወእሉ፤ አመ፡ ይወጽዑ፡ አፍአ፡ እምቤተ፨ መርዓ፨ ወውእቱሰ፡ ላሊበላ፡ ይበውዕ፡ ተጸዊዖ፡ በቃለ፡ መርዓዊ፡ ሰማያዊ፡ ዘይብል፤ ንዑ፤| ኀቤየ፡ ቡሩካኑ፡ ለአቡየ፡ ትረሱ፤ መንግሥተ፡ ሰማያት፡ ዘድልው፡ ለክሙ፡ እምቅድመ፡ ይትፈጠር፡ ዓለም፤ ወይወጽእሂ፡ አፍአ፡ በከመ፡ ይቤ፡ ለሊሁ፤ ርድኡ፡ እመቦ፡ ዘሰምዓ፡ ቃልየ፡ ወአቀቦ፡ እሬስዮ፡ አምደ፡ ውስተ፤ መቅደሱ፡ ለአምላኪየ፡ ወኢያወጽኦ፡ አፍአ፤ ወእሁቦ፡ መጽሐፈ፡ ብርሃን፡ ሕቱመ፡ ዘኢያአምሮ፨ ካልዕ፨ ዘእንበለ፡ ዘነሥአ፡ ወእሴሰዮ፡ እመና፡ ኅቡዕ። አማንኬ፡ ይደልዎ፡ ላሊበላ፡ ከመ፡ ይባዕ፡ ውስተ፡ ቤተ፡ መርዓ፤ ከመ፡ ይኵን፡ አምደ፡ ውስተ፡ መቅደሱ፡ ለበግዕ፨ ይደልዎ፡ ከመ፡ ይንሣእ፡ | | መጽሐፈ፡ ብርሃን፡ ኅቱም፡ እንተ፡ ይእቲ፡ ሥጋሁ፡ ለክርስቶሰ፨ ወኡእቲ፡ ኅብዝተ፡ አምልኮ፡ ዘጽሑፍ፡ ላዕሌሁ፤ ስነ፡ ግዕዛን፡ በደመ፡ መላኮት፡ ወይእቲ፡ ሲሳዮሙ፡ ለምዕመናት፡ እለ፡ ዕቱባን፡ በስመ፡ ሥላሴ፡ ወአመ፡ ይሠራዕ፡ ማዕደ፡ ሕይወት፡ በዝንቱ፡ ኅብስት፡ ዘጽሑፍ፡ ላዕሌሃ፡ ስም፡ ሐዲስ፡ ዘኢያአምራ፡ ካልእ፡ ዘእንበለ፡ ዘነሥአ፡ ወአመ፡ ይቀንት፤ ወያረፍቆሙ፡ ወአመ፡ ያንሱሱ፡ ወይመጥዎሙ፡ ለአግብርቲሁ፡ ኂራን፡ ወለጻድቃኒሁ፡ ቡ/ሩ/ካን፡ እለ፡ ጾሩ፡ ክበዳ፡ ላህበ፡ ለዕለት፡ ወለነኒ፡| ወአሥራተ፡ ምሕረት፡ ይንሥአነ፡ ምክሀ፡ ኵልነ፡ ላሊበላ፡ ከመ፡ ንባዕ፡ ምስሌሁ፡ ኀበ፡ ቦአ፡ ለሊሁ፡ ወከመ፡ ንርፈቅ፡ ኀበ፡ ረፈቀ፡ ለሊሁ፤ ከመ፡ ንሴፎ፤ ለፍሥሐሁ፡ ወከመ፡ ንደለው፡ በተድላሁ፤ ወከመ፡ ናንሶሱ፡ ውስተ፡ መርዓ፡ ሐዳስ፡ ዘኢይበውዕ፡ ካልዕ፡ ውስቴታ፡ ዘኢለብሰ፡ ልብሰ፡ ከብካብ፡ መርዓ፡ ወዘኢተሰርገወ፡ በብርሃነ፡ ሥላሴ፡ ወይበለነ፡ ላሊበላ፡ በይእቲ፡ ሰዓት፡ ነየ፡ አነ፡ ወደቂቅየ፡ ዘወሀበኒ፡ እግዚአብሔር፡ ወያቁመነ፡ ምስሌሁ፡ ቅድመ፡ ገጸ፡ በግዑ፡ ኀቢኦ፡ በጽላሎተ፡

| | ሰኞ {???} ክነፊሁ፡ ወከዲኖ፡ በመንጦላዕተ፡ ጸሎቱ፡ ከመ፡ ኢይቅረቡ፡ ኀቤነ፡ መላእክተ፡ እሳት፡ እሁዛነ፡ አስይፍት፡ እለ፡ የአጽዱ፡ ክርደደ፡ አርዮሙ፡ እማ/ዕ/ከለ፡ ሥርናይ፡ ወያአስሮዎሙ፡ በበከላስስቲሆሙ፡ ለአንድዶቶሙ፨ ወእለ፡ ይፈልጥዎሙ፡ ለኃጥአን፡ እማዕ/ከ/ሎሙ፡ ለጻድቃን፡ ወእለ፤ ይሌልይዎሙ፡ ለጸዋጋን፡ እማዕከሎሙ፡ ለየዋሃን፡ ወእለ፡ መላእክተ፡ መዓት፡ ከመ፡ ኢይቅረቡ፡ ኀቤነ፡ ወከዕበ፡ ኢይፍልጡነ፡ እምኔሁ፡ ወይመግበነ፡ ሐቂፎ፡ በየማነ፡ እዴከ፡ አሜን፨ | ንትመየጥኬ፡ ኀበ፡ ጥንተ፡ ገድሉ፡ ለዝንቱ፡ ዕፍረቱ፡ ምዑዝ፡ ከመ፡ ኢይምሰሎ፡ ዝንጋኤ፡ ለልበ፡ አብድ፡ ለዘኢያፈቅር፡ ውዳሴሆሙ፡ ለጻድቃን፡ ፨ ወለረባሐ፡ መንፈስ፡ እስመቦ፡ እምውስተ፡ አሕዛብ፡ እለ፡ ያንጐረጕሩ፡ ሶበ፡ ይሰምዑ፡ ፫ አሐተ፡ ውዳሴሆሙ፡ ለጻድቃን፡ ወጣዕመ፡ ቀስሞሙ፨ ለመጻሕፍት፡ ወጻማ፡ ገድሎሙ፡ ለቅዱሳን፡ ዘኢያስተዔድሞሙ፨ ወለእለሰ፡ ቦሙ፡ ፈሪሃ፡ እግዚአብሔር፡ ወጽሙዓን፡ ለሰሪበ፡ ቃሉ፡ እመኒ፨ ሰምዑ፡ እንዘ፡ ይትነበብ፡ እምነግህ፡ እስከ፡ ሰርክ፡ ነገራተ፡ መንፈስ፡ | | ኢይጸግብዎ፡ ወእገሪሆሙኒ፡ ኢይደክም፡ ወእምእደዊሆሙ፡ ኢያስተጋብኡ፡ እምዘ፡ ሰፍሑ፡ ወአዕይንቲሆሙ፡ ኢይደክማ፡ እምነጽሮ። ወክሳዶሙ፡ እምአንቃዕድዎ፡ ኢይትሄየያ፡ ወኢይትሀከያ፨ ወእምልሳኖሙኒ፡ እምተናግሮ፡ ኢእዕረፈ፡ በውሂዘ፡ ሰብሐት፡ እንዘ፡ ይሰቅያ፡ ወይረውያ፡ ወእዘኒሆሙኒ፡ ኢይጸግባ፡ እምሰሚዖ፨ ወሕሊናሆሙ፡ ኢይትወላወል፡ እስመ፡ መንፈስ፡ ቅዱስ፡ ኃይሎሙ፡ ወያረስን፡ ልቦሙ፡ ወያውዕዮሙ፡ እስመ፡ አቡሆሙ፡ ዘበሰማያት፡ ይሁቦሙ፡ ሠናየ፨| ኀብተ፡ መንፈስ፡ ቅዱስ፡ ለእለ፡ ያፈቅርዎ፡ ወይስዕልዎ፨ ወለእለ፡ አልቦሙ፡ ፈሪሃ፡ እግዚአብሔር፡ ወአሚነ፡ ተስፋሆሙ፡ ለጻድቃን፡ ወተጻውኖ፡ በኃይላ፡ ጸሎቶሙ፡ ለቅዱሳን፨ ለእመ፤ ሰምዑ፡ እንዘ፡ ይትነበብ፡ ጻማሆሙ፡ ለመስተጋድላን፨ ወለእመ፡ ኖኃ፡ ነገሩ፡ ይቤሉ፡ ምንትነ፡ ዝ፡ ዘከመዝ፡ ዝንጋኤ፤ ዘንተኬ፡ ይሄልዩ፡ ወያንጐረጉሩ፡ ላዕለ፡ መንፈስ፡ ቅዱስ። እስመ፡ ኢጥዕሞሙ፡ ቃለ፤ መለኮት፡ ለጽሩአን፡ ኢተቶስሐ፡ ልቦሙ፡ በሃይማኖት፡ ኅጡአን፡ እምእሳተ፡ መንፈስ፡ ቅዱስ፡

| | ወቈሪራነ፡ ልብ፡ ከመ፡ አስሐትያ፡ ዘአሜ፡ ክረምት፡ ወይወጽኡ፡ እምቤተ፡ ክርስቲያን፤ እንዘ፡ ኢይትፌጸም፡ ነገረ፡ እግዚአብሔር፡ ወግብር፨ መንፈሳዊት፡ ወሶቤሃ፡ ይትፌሣሕ፡ ሰይጣን፡ ምስለ፡ አጋንንቲሁ፡ እስመ፡ በሀብለ፡ ሀኬት፡ አሲሮ፡ አውጽኦሙ፡ ወይኤምሆሙ፡ ሐቂፎ፡ ክሣዶሙ፡ ከመ፡ ዘይኤምህ፡ አብ፡ ወልዶ፡ ፍቁሮ፨ ወይተልዎሙ፡ ኀበ፡ ሖሩ፡ እንዘ፡ ይሜግቦሙ፡ አጋንንቲሁ፤ ይምነ፡ ወጽግመ፡ ድኅረ፡ ወፍጽመ፡ ያድኅነነ፡ እግዚአብሔር፡ እመክፈልቶሙ፡ ለእሉ፡ ወያጽሕቅ፡ ልበነ፡ ለሰሚዓ፤ ቃላቲሁ፡| ወለገቢረ፡ ትእዛዛቲሁ፡ ወይረስየነ፤ ድልዋነ፡ ከመ፡ ንኅድር፡ ውስተ፡ ቤቱ። ወከመ፡ ንጸመድ፡ ውስተ፡ ቤተ፡ መቅደሱ፡ በኵሉ፡ መዋዕለ፡ ሕይወትነ፤ ወያርአየነ፡ ዘናሰምሮ፡ ሎቱ፡ በኃይለ፡ ጸሎቱ፤ ለዝንቱ፡ ፀሐየ፡ ጽድቅ፡ ዘስሙ፡ ላሊበላ፡ አሜን፡ ስምዑኬ፡ ኦፍቁራንየ፡ እለ፡ ተኃሥሡ፡ በረከተ፤ ጸጋሁ፡ ለጻድቅ፡ ወእለ፡ ታጸምኡ፡ ለፍቅረ፡ ላሊበላ፡ ከመ፡ ትርወዩ፡ እምነቅዓ፡ ገድሉ፡ ጥዑም፤ ዘይበውዕ፡ ከመ፡ ማይ፡ ውስተ፨ አerased ማዑት፡ ወከመ፡ ቅብዕ፡ ውስተ፡ አዕፅምት፡ እስመ፡ | | ውዳሴሁ፡ ከመ፡ ክረምት፡ ዘኢይነኁግ፨ ክስቱኬ፡ ዕዝነ፡ ልብክሙ፡ ወናሁ፡ ወጠንኩ፡ እንግርክሙ፤ ለእመ፡ ክህለ፡ ልሳንየ፡ ወጸያፍ፡ ወኅጹጽ፡ አእምሮትየ፡ ዜንዎ፡ ኅዳጠ፡ እምብዙኅ፤ መንክራቲሁ፤ ወአኮ፡ ፍጹመ፡ ዘእክል፡ እዜንወክሙ፡ አላ፡ ኅዳጠ፤ መክፈልተ፡ እምጻማሁ፡ ከመ፡ ይትፌሣሕክሙ፤ ልብክሙ፡ በሰሚዖቱ፡ እስመ፡ ዜና፤ ጻድቅ፤ ያስተፌሥሕ፡ ፈድፋደ፡ እምነ፡ ማዕድኒ፤ ስሩዕ፡ ዘያጸግብ፡ እምወይን፡ ኒ፡ ወሜሰ፤ ያጠልል፡ እምነ፡ ዘይትኒ፡ | ወቅብዕኒ፡ ያጽሕድ፨ በከመ፡ ይቤ፡ ዳዊት፡ ወጽሕደ፡ እምቅብዕ፡ ነገሩ፡ ወአንትሙኒ፡ በርቱዕ፡ በተአምኖ፤ ትለብስዎ፡ ከመ፡ ልብስ፡ ወትትሞጥሕዎ፡ ከመ፡ ሞጣኅት፡ እንዘ፡ ታከብርዎ፡ ከመ፡ መላእክት፤ ወከመ፡ ነቢያት፡ ወሐዋርያት። ወከመ፡ ጻድቃን፤ ወሰማዕ/ት/፡ ወከመ፡ ደናግል፡ ወመነኮሳት፤ እስመ፡ ውእቱኒ፡ ኢኃፀ፡ እምኔሆሙ፤ ጸሎቱ፤ ወስእለቱ፤ ወትንብልናሁ፤ ወሀብተ፤ ረድኤቱ፡ ወበረከተ፤ ተስፋሁ፤ የሀሉ፡ ምስሌነ፤ ወምስለ፡ ኵልነ፡ ዝየ፤ እለ፤ ሀለውክሙ፡ እለ፤ መጻእክሙ፤ እምርሑቅ፡ ወእምቅሩብ፤ እንዘ፡ ትትአመኑ፡

| | በጽላሎተ፡ ክነፊሁ፡ ወውእቱኒ፡ ኢይርሐቅ፡ እምኔክሙ፡ አሜን፨ ወሀለወት፡ አሐቲ፡ ሀገር፡ እምአኅጉራተ፡ ኢትዮጵያ፡ እንተ፡ ትሰመይ፡ ሮሃ፡ ሀገረ፡ ሙላዱ፡ ለላሊበላ፡ ወሀለወ፡ በይእቲ፡ ሀገር፡ ፩ ብእሲ፤ እምዘመደ፡ አበይት፤ ወክቡራን፡ ወብዑላን፤ ፈድፋደ፤ ዘወርቅ፤ ወብሩር፤ ወበአፍራስ፡ ወበአልባስ፤ ቀጠንት፡ በአግብርት፡ ወአዕማት፨ ወስሙሰ፡ ለውእቱ፡ ብእሲ፡ ዛን፡ ስዩም፡ ወነሥአ፤ ለወለቱ፡ ወወለደ፡ እምኔሃ፤ ለዝንቱ፡ ቡሩክ፡ ወቅዱስ፡ ዘተሰምየ፡ ላሊበላ፡ በምሥጢር፡ ወትርጓሜሁሰ፡ እንግረክሙ፤ በእንተ፡ ምንት፡ | ተሰምየ፡ ሌሊተ፤ ጸውዓ፡ በዝንቱ፡ ስም፡ ዘውእቱ፡ ላሊበላ፡ ወአመ፡ ወለደቶ፡ እሙ፡ መጽኡ፡ አንህብ/ተ/፤ ብዙኃን፡ ወአገትዎ፡ ከመ፡ ዘየአግቱ፡ መዓረ፨ ወርእያ፡ እሙ፡ እሎንተ፡ አንህብተ፡ ከመ፡ ዘአገትዎ፡ ወኃፀርዎ፡ ለሕፃና፡ ከመ፡ ዘየአውድዎ፡ ሐራሁ፤ ለንጉሥ፤ ወሶበ፤ ርእየት፡ ዘንተ፡ ወረደ፡ ላዕሌሃ፡ መንፈስ፡ ተነብዮ፤ ወትቤ፡ ንህብኒ፡ አእመረ፤ ከመ፡ ዐቢይ፡ ውእቱ፡ ዝንቱ፡ ሕፃን፡ ወበእንተ፡ ዝንተ፡ ሰመየቶ፡ ላሊበላ፡ ንህብ፡ አእመረ፡ ጸጋሁ፡ ብሂል፨ እማንኬ፡ | | አእመረ፡ ጸጋሁ፡ ንህብ፡ እስመ፡ አገትዎ፡ ከመ፡ እንተ፡ መዓር፨ እስመ፡ ንህብ፡ ያፈቅር፡ መዓረ፡ ወበእንተ፡ ዝንቱ፡ ከበብዎ፡ እስመ፡ ሀለዎ፡ ላሊበላ፡ ከመ፡ ያእአምር፡ ጸቃውኦታ፡ ዘምግባረ፡ ሠናይ፡ አስተጋቢኦ፡ ፀገየ፡ ዘዘዚአሁ፡ ኅበሪሁ፡ ወዘዘዚአሁ፡ አርአያሁ፤ ወዘዚአሁ፡ ጼናሁ፤ ወዘዘዚአሁ፡ መዓዛሁ፡ እምነ፤ ገድለ፡ ኵሎሙ፤ ቅዱሳን፨ እምነ፡ ጸዋምያን፡ ጸመ፡ እምነ፡ ንጹሐን፡ ንጽሐ፨ እምነ፡ ቀዋምያን፡ ቁመተ፤ እምነ፡ ሰጋድያን፤ ስግደተ፤ እምነ፡ ትሑታን፡ | ትሕትና፤ ወእምነ፤ የዋሀን፤ የዋሀተ፤ ወእምነ፤ መሐርያን፤ ምሕረተ፤ እምነ፤ ወሀብያን፤ ውሂበ፡ ምጽዋተ፤ እምነ፤ መፍቀርያነ፡ ሰብእ፤ አፍቅሮ፡ ቢጽ፨ ወእምነ፡ ረዋጽያን። ገይሰ፡ ቤተ፡ ክርስቲያን፡ ሩጸተ፡ ወእምነ፡ ሰላማውያን፡ ሰላመ፨ ወእምነ፡ ኵሉ፤ ዘቦ፤ ምግባረ፤ ሠናይ፤ አልቦ፡ ዘኢአስተጋብአ፤ ላሊበላ፡ ዘንተኬ፤ ኵሎ፤ ጽእያተ፤ ዘምግባረ፤ ሠናይ፤ ከመ፡ ያስተጋብእ፤ አእሚሮ፡ ዘይፈትን፡ ልበ፤ ወኵልያተ፡ ፈነዎሙ፡ ለአንህብት፡ /ወ/ከመ፡ ያዕግትዎ፡ በከመ፡ ያዓግቱ፡ መዓረ፤ በዕለተ፤ ተወልደ፡ ዝንቱ፡ ብፁዕ፡ ላሊበላ፡ ወዓዲቦ፡ ካልአኒ፡ አምሳለ፡

| | ዘይትፌጸም፡ ትእምርተ፡ ዝንቱ፡ ንህብ፡ ላዕለ፡ ላሊበላ፡ እስመ፤ ዓቢይ፡ ምሥጢር፡ ተከስተ፡ በእንተ፤ ልደቱ፤ አመ፡ ልህቅናሁ፡ ንህብሰ፡ ይትሜሰል፤ በሠራዊተ፡ ንጉሥ፤ ወእምኀቤሆሙኒ፡ በዘቦቱ፡ ሐሙ፡ ሰብእ፡ በበንዋየ፡ ሐቅል። ሰራዊተ፤ ንጉሥ፤ በዘቦቱ፡ ይጸምኡ፡ እላውያነ፡ ስእለ፡ እለ፡ አጸረርዎ፡ ለንጉሥ፤ እስመ፡ ሀለዎ፡ ላሊበላ፡ ከመ፤ ይኩን፡ ንጉሠ። ወበእንተዝ፡ ዓገትዎ፡ ንህብ፡ በአምሳለ፡ ሠራዊተ፤ ንጉሥ፡ ወሐራሁ፤ እንዘ፡ ኢየአምር፡ ለሊሁ፡ ተአምረ፤ ምኵናነ፡ ዚአሁ፨ ዘእንበለ፡ ይሲምዎ፡| ተዐውቀ፤ ሢመተ፡ ንግሡ፡ ወእንበለ፡ ያምልክዎ፤ ተዓውቀ፡ ምልክናሁ፨ ወዘእንበለ፡ ያመስፍንዎ፡ ተዓውቀ፡ ምስፍናሁ፡ ንህብሰ፡ ኢኮነ፤ ዘሥጋ፡ አላ፤ መላእክት፡ እሙንቱ፡ እለ፡ ተመሰሉ፡ ንህበ፡ እንዘ፤ ይኤምሮ፤ ንግሦ፤ ወጸቃውዓተ፡ ምግባር፡ ዘይትቀዳሕ፡ እምኔሁ፤ እስመ፤ ሀለዎ፡ ላሊበላ፡ ከመ፡ ይልበስ፡ ወይፈጽም፡ ዘንተ፡ ኵሎ፡ ትንቢታተ፡ ዘበምግባር፡ ጽድቅ፨ ወእምዝ፡ ልህቀ፡ እንዘ፡ ያሐጽኖ፡ መንፈሰ፡ ቅዱሰ፨ ወያጸንዖ፡ | | በኃይል፡ ወበጥበብ፡ በምክር፡ ወበግርማ፨ መንክር፡ ወኵለንታሁኒ፡ አዳም፡ ውእቱ፡ ወአልቦ፡ ኀቤሁ፡ ሕሱም፡ እምኔሁ፡ እምርእሱ፡ እስከ፡ እገሪሁ፡ ወቂሀተ፡ መልታህቲሁ፡ ከመ፤ ቅረፍተ፤ ሮማን፤ አዕይንቲሁኒ፡ ከመ፡ ኮከበ፤ ጽባሕ፡ ወአፃብኢሁኒ፡ ዘውግ፡ እማንቱ፡ ወእዕናፊሁኒ፡ ቀዋም፤ ወአውሥኦተ፡ ቃሉ፡ ጥዑም፡ ወሣዕሳዓ፡ አፉሁ፡ ወለለዝ፡ ልሳኑ፨ ወከመዝኬ፡ ልህቀ፡ እንዘ፡ ትተልዎ፡ ጸጋ፡ እግዚአብሔር፨ ወረድኤተ፡ ኢየሱስ፡ ክርስቶስ፡ ወሀብተ፡ መንፈስ፡| ቅዱስ። ወኵሉ፡ ዘርእዮ፡ ያነክሮ፤ እምግርማሁ፡ ወእምስነ፡ አርአያሁ፡ ወይትነበዩ፡ ሎቱ፡ ንግሠ፤ እስመ፤ ንህብ፡ አመረቶሙ፡ ቀዳሚ። በዕለተ፡ ልደቱ፨ ዝኩ፡ ሕፃን፡ መድኃኔ፡ ገጽነ፡ ዘተወልደ፡ እምድንግል፡ እንበለ፡ ዘርአ፡ ብእሲ፤ በከመ፡ ፈነዎ፡ ኮከበ፡ ኀበ፡ ሰብአ፡ ሰገል፡ ዘይዜንዎሙ፡ ልደቶ፡ ወይኤምሮሙ፤ ንግሦ፡ እስመ፡ ተወልደ፡ ንጉሠ፡ ሰማያት፡ ወምድር፡ ከማሁ፤ በምድረ፡ ይሁዳ፨ ወህየንተ፡ ኮከብ፡ ፈነወ፡ ንህበ፡ አመ፤ ልደቱ፡ ዘይኤድም፤ ንግሦ፡ ለላሊበላ፡ አመ፡ ሕፃን፡ ውእቱ፡ እስመ፡ ሀለዎ፡ ይኩን፡

| | ንጉሥ፡ አመ፡ ልህቅናሁ፡ እስመ፤ ይፈቅድ፡ ኢየሱስ፡ ከመ፡ ይክፍሎ፡ መንግሥተ፤ ዘበሰማያትኒ፤ ወዘበምድርኒ፡ ዘሎቱ፤ ልደት፡ ሰበከ፡ ኮከብ፡ ወልደተ፤ ገብሩኒ፡ ላሊበላ፡ ሰበከ፡ ንህብ፤ እስመ፡ ይፈቅድ፡ እግዚኡ፡ ከመ፤ ያርእዮ፡ ምስሌሁ፨ ወበእንተዝ፡ መልአ፤ መንፈስ፡ ቅዱስ፡ እምከርሠ፡ እሙ፨ ከመ፡ ኤርምያስ፡ ወዮሐዮንስ፤ ወከመዝ፤ ተወልደ፡ ላሊበላ፡ እንዘ፡ ምሉዕ፡ መንፈሰ፡ ጥበብ፡ መንፈሰ፡ ሕይወት፡ መንፈስ፡ ቅድስና፡ መንፈሰ፡ ምክር፡ ወመንፈስ፡ ንጽሕና፨ ወከመዝ፡ ተወልደ፡ በፈቃደ፡ አብ፡ ወበሥምረተ፡| ወልድ፡ ወበኃይለ፡ መንፈስ፡ ቅዱስ፡ ወእልክቱሰ፡ ሠራዊተ፡ ንህብ፨ እለ፡ አገትዎ፡ አመ፡ ልደቱ፡ ከልእዎሙ፤ በዊአ፡ ለእለ፡ ሀለው፡ አፍአ፡ እምነ፡ ቤት፡ ዘተወልደ፡ ቦቱ፡ ላሊበላ፡ ወለእለሂ፤ ሀለው፡ ውሳጤ፤ ውእቱ፤ ቤት፡ ከልእዎሙ፡ ወፂአ፡ እንዘ፡ ይቀሥፍዎሙ፡ በምሐሚሆሙ፨ በከመ፡ ይቀስፉ፡ ሐራ፡ ንጉሥ፡ ሶበ፡ ፈቀዱ፡ ይባኡ፤ ኀበ፡ ሀለወ፡ እግዚኦሙ፤ እንዘ፡ ኢያበውሆሙ፡ እግዚኦሙ፤ ወከማሁኬ፡ ከልዕዎሙ፡ ለእለ፡ ኣፍአ፡ በዊአ፡ ኀበ፡ ሀለወ፡ ለሊበላ፡ ወለእለ፡ | | ውሳጡኒ፡ ወፂአ፡ ከልእወሙ፡ ተመሲሎሙ፡ ከመ፡ ሠራዊተ፤ ንጉሠ፡ ወከመ፡ ወእሊያኒሁ፤ ገባርያነ፤ ፈቃደ፡ ወእልክቱኒ፡ ሰብእ፡ ርእዮሙ፤ ዘንተ፡ መንክረ፡ ይቤሉ፡ ዮም፡ ተወልደ፡ ሕፃን፡ ሮስ፡ ዘንህብ፡ ማዕፆሁ፡ ወእምአሜሃ፤ አኃዙ፡ ይትዋነዩ፡ ንጉሦ፡ ወይብሎ፡ ሀለዎ፡ ይኩን፤ ንጉሠ፤ አመ፡ ልህቀ፡ ዝንቱ፡ ውእቱ፡ ቀዳሜ፡ መንክራት፡ ዘኮነ፡ በላዕለ፡ ላሊበላ፡ ዘተቀብአ፡ ኃይለ፡ ውስተ፡ ቈናዝአ፡ ድማሁ፡ ከመ፡ ሶምሶን፡ ቀዳማዊ፡ እስራኤል፡ እስመ፡| ዘረቡዕ፡ ናዝራዊሁ፡ ለእግዚአብሔር፡ ቅዱስ፡ ውእቱ፡ ጸሎቱ፡ ወበረከቱ፡ ወስእለቱ፡ ወሀብተ፡ ረድኤቱ፡ የሀሉ፡ ምስሌነ፡ አግብርቲለ፡ /ምህርካሥላሲኃየአሚካኤል፡/ ወይባርከነ፡ ለኵልነ፡ ሕዝየበ፡ ክርስቲያን፡ ወለኖላዊነ፡ /ምህርካላሴ፡/ ወሊተኒ፡ አነ፡ ኃጥእ፡ /coloured ዓለም፡ አሜን። ለገብረ፡ erased ወእምዝ፡ እነግረክሙ፡ ካልአ፡ ነgere፡ ዘተገብረ፡ በላዕለ፡ ላሊበላ፡ አመ፡ ወሬዛሁ፡ ወዝንቱሰ። ዘእከስት፡ ለክሙ፡ ይእዜነ፡ በቍኤት፡ ለክሙ፡

| | ለነፍሳቲክሙ፡ እስመ፡ ሎቱኒ፡ ኮነቶ፤ በቋዓተ፡ ወአክሊለ፤ ውዳሴ፡ ትጸፍር፡ ለነ፡ ወትሬስየነ፨ ዘውገ፤ ምስሌሁ፡ ወታስተዴልወነ፡ ለበዊአ፡ መንግሥተ፡ ሰማያት፡ ወውእቱ፡ ላሊበላ፡ ዓብየ፡ እንዘ፡ የአውዶ፡ ጸጋ፡ እግዚአብሔር፨ ወኵሉ፡ ዘነጸሮ፡ ይደነግፅ፡ ከመ፡ ዘርእየ፡ ወረከበ፡ አንበሳ፡ በሐቅል፡ እስመ፡ ግርማሁ፡ ኢኮነ፡ ከመ፡ ካልአን፡ ዘበአቅመ፡ አላ፡ እንታክቲ፤ ግርማ፡ እንተ፡ ኃለፈት፡ አንቀጸ፡ ስብሐቲሃ፡ ፵ በደብረ፡ ኮሬብ፡ በቅድመ፡ ነቢይ፡| ቀስብያዊ፤ በከመ፡ ይቤሎ፤ ለሊሁ፡ ዘአስተርአዮ፡ ወቁም፡ እስመ፡ ዝየ፡ ውስተ፡ ደብር፡ ወያኃልፍ፡ እግዚአብሔር፤ ወይመጽእ፡ ኀቤከ፡ ነፋስ፡ ጽኑዕ፡ ዘይፈትሕ፤ አድባር፡ ወይፈትቶ፡ ለኰኵሕ፤ ወኢሀለወ፡ እግዚአብሔር፡ ውስተ፡ ነፋስ፨ ወእምድኅረዝ፡ ይመጽእ፡ ኀቤከ፡ ድልቅልቅ፨ ወኢሀለወ፡ እግዚአብሔር፡ ውስተ፡ ድልቅልቅ፡ ወይመጽእ፡ ኀቤከ፡ እሳት፡ ወሀለወ፡ እግዚአብሔር፡ ውስተ፡ ውእቱ፡ እሳት፨ ወእምድኅረዝ፡ ይመጽእ፡ ኀቤከ፡ ቃል፡ ቀጢን፡ ከመ፡ ዘይትፋጸይ፡ ወህየ፡ ሀለወ፡ እግዚአብሔር፡ | | በእላንቱኬ፡ አርባዕ፡ ረቂቃን፡ ዘጼሐ፡ ፍኖቶ፡ ወበድምጸ፡ ፋጻ፤ ዘአእመረ፡ ሀለልዎቶ። በዘከመዝ፡ ግርማ፡ በዘተርእዮ፡ ለነቢይ፡ በላዕለ፡ ላሊበላ፡ አርአዮ፤ ሰዊጦ፡ ግርማሁ፡ አኮ፡ አፍአ፡ እምሥጋሁ፡ ከመ፡ ግርማ፤ ሙሴ፤ እንተ፡ ትፈቅድ፡ ግላ፡ ከመ፡ ኢይርአዩ፡ ገጸ፡ ሕዝብ፡ አላ፡ እንተ፡ ውስጡ፡ ኅብዝት፨ ወባሕቱ፡ ትትዓወቅ፨ ወግ/ር/ማሁ፡ እንተ፡ ኢያስተርኢ፡ በከመ፡ ፋጻ፡ ኢይትረአይ፡ አላ፡ በምጽአቶ፡ ኢይትዓወቅ፡ ግ/ር/ማሁ፡ እንዘ፡ ሀለወ፡ ተኃቢኦ፡ ውስተ፡ አፈ፡ ፋጻይ፡ ወከማሁ፡ /ተ/ኃብአት፡ | ግርማ፡ ጸጋ፡ እግዚአብሔር፡ እንተ፡ ውስጡ፡ ላሊበላ፡ እንዘ፡ ትትዓወቅ፡ ውስተ፡ ገጹ፤ በዋካሃ፡ ወከመዝ፡ ልሕቀ፡ ወበጽሐ፡ መጠነ፡ አካል፡ እንዘ፡ ይጌርም፡ ለኵሉ፡ ሰብእ፡ ወግርማሁሰ፡ አኮ፡ ሶበ፡ ተአብዮ፡ ልብ፡ ሥጋዊት፨ ወኢበአልዕሎ፡ ቃል፡ ዲበ፡ ካልኡ፡ አላ፡ እመንፈሰ፡ ጸጋ፡ ተመሊኦ፡ ኮነ፡ ግሩመ፡ ወይእቲ፡ ዘትሬእዮ፡ መደንግፅ፡ እመኒ፡ ፈቀደ፡ ወለእመኒ፡ ኢፈቀደ፤ ወበእንተዝ፤ ወጽአ፡ ስሙአተ፡ ነገሩ፡ ወደምጸ፡ ትንቢት፡ መንግሥተ፡ በኵለሄ፡ በእንቲአሁ፨ ወበውእቱ፡ መዋዕል፡ ዘሀሎ፡

| | እኁሁ፡ ዲበ፡ መንበረ፡ መንግሥት፤ ዘስሙ፡ ሐርበይ። ወሶበ፡ ሰምዑ፡ ትንቢተ፤ መንግሥት፤ በእንተ፡ ላሊበላ፡ እኁሁ፡ እንዘ፤ ይመሰሎ፡ ከመ፡ ይንሣእ፡ ወያሐዩ፡ ንግሦ፡ እንበለ፡ ፈቃደ፡ እግዚአብሔር፡ ተሀውከ፡ ወኵሉ፡ ፍቁራኒሁ፤ ተሀውኩ፡ ምስሌሁ፡ ወባሕቱ፡ ነሢአ፡ መንግሥትሰ፡ ኢይትከሀል፡ እንበለ፡ ፈቃደ፡ እግዚአብሔር፡ ኢይትኃደግ፡ እንበለ፡ ይኩን። ወእሁኁሰ፡ ነጋሢ፡ ሐዘነ፤ ይሄሰ፡ በእንተ፡ ቅንዓት፡ መንግሥት፤ ወኵሎሙ፡ ቤተ፡ መንግሥቱ፡ ሠራዊተ፡ እኁሁ፤ ጸልዕዎ፡ እንበይነ፡ ቅንዓተ፤ መንግሥቱ፤| ለእግዚኦሙ፨ በከመ፡ ይጸልዕዎ፡ አኃዊሁ፡ ለዮሴፍ፡ በእንተ፤ ዘነገሮሙ፡ ሕልሞ፡ እንዘ፡ ይብል፡ እሬኢ፤ በሌሊት፤ ከመ፡ ዘሀለውነ፡ ውስተ፡ ገራህት፡ ወናዓጽድ፤ ወመጽኡ፡ ከላስቲሆሙ፡ ወሰገዱ፡ ለከላስስትየ፡ ወአእመሩ፡ አኃዊሁ፡ ሕልመ፡ አቡሆሙ፤ ወይቤልዎ፡ አንተኑ፡ ትነግሥ፡ ላዕሌነ፡ ወትከውነነ፡ ንጉሠ። ወበእንተዝ፡ ሤጥዎ፡ ብሔረ፡ ግብጽ፡ ወባሕቱ፡ ኢይትኃድግ፡ ዝ/ን/ቱኒ፡ ዘእንበለ፡ ይኩን፡ አመ፡ በጽሐ፤ ዕድሜሁ፤ ወአኃዊሁኒ፡ ሰገዱ፤ ምስለ፡ አንስቲያሆሙ፤ ወምስለ፡ ደቂቆሙ፤ ወሪዶሙ፡ ምድረ፡ ግብጽ፤ እስመ፡ በህየ፡ | | ነግሠ፡ ዮሴፍ። ወዘንተኒ፡ ኢያእልሎ፡ ለ/ላ/ሊበላ፡ እንዘ፤ ቦሙ፡ ጽሑፍ፡ በከመ፡ እምትካት፤ ይቤ፡ ነቢይ፡ ኢያእመሩ፡ ወኢለበው፡ ውስተ፡ ጽልመት፡ የሐውሩ፨ ሶበሰ፡ አእመሩ፡ አመ፡ ኢጸረፉ፡ ሎቱ፡ ወኢተሳለቅዎ፡ አላ፡ በከመ፡ ይቤሎ፤ ለዘአቅነየነ፡ እግዚአብሔር፡ ንትቀነይ፡ ወለዘ፡ አኰነነ፡ ንትኳነን፤ ወባሕቱ፡ ተኬነው፤ ሎቱ፡ በዘይቀትልዎ፡ እንዘ፡ ይመስሎሙ፤ ከመ፡ ይቅትልዎ፡ በሥራይ፡ ወአሐተ፡ ዕለተ፡ ሰትየ፡ ላሊበላ፡ ወበዝ፡ ድክም፡ እንዘ፡ ሀለወ፡ እስመ፡ ደክም፡ ውእቱ፡ ዘሰትየ፡ ወያወፅእ፡ | ርስተ፡ ዘውስተ፡ ከርሥ፡ ወሀለወት፡ አሐቲ፡ ብእሲት፡ ለላሊበላ፡ ዘተወልደት፡ ምስሌሁ፡ ፩ አብ፡ ወይእቲሰ፡ እኪት፡ ምግባራ፡ ወለታ፡ ለኤልዛቤል፤ ወካልእታ፡ ለሄሮድያዳ፡ ወዘውጉ፡ ለቃየል፡ ቀታሌ፡ እኁሁ፨ ይእቲኬ፡ አምጽአት፡ ሎቱ፡ ለእኁሃ፡ ገቢራ፡ ሥራየ፡ ሕምዘ፡ ዘይቀትል፡ ቶሲሐ፡ በመርዝ፡ እንዘ፤ ትሄሊ፡ ከመ፡ ፍጡነ፡ ይሙት፤ ከመ፡ ኢይኩን፡ ንጉሠ፨ ወፈነወት፤ ሎቱ፡ ውእተ፡ ሕምዘ፡ መሊአ፤ በጽዋዕ፡ ወላሊበላ፡ ጐጕአ፡ ከመ፡ ይስተይ፡ እንዘ፡ ይመስሎ፡ ከመ፨ ምዝር፡ ባሕቱ፡ እስመ፡

| | ጽዋዕ፡ ውእቱ፡ ወኢያእመረ፤ ከመ፡ ሕምዝ፤ ውእቱ፡ ቶሲሐ፡ ሎቱ፡ ወአዘዘ፡ ለ፩ ዲያቆን፡ ዘይቀውም፡ ቅድሜሁ፡ ወልደ፡ ቤቱ፡ ውእቱ፤ ወይቤሎ፡ ሰሰተይ፡ ቅድመ፡ እንዘ፡ ትባርክ፡ ሊተ፡ ልማዱ፡ ውእቱ፡ ከመዝ፡ ላሊበላ፡ ወቀደመ፡ ያሰትዮ፡ ለዲያቆን፤ እምነ፡ ጽዋዑ፤ ወእምዝ፡ ይሰተይ፡ ውእቱ፤ ወውእቱሰ፡ ሶበ፡ ሰትየ፡ እምውእቱ፡ ጽዋዕ፡ ተሰውወ፡ ውስተ፡ ኵሉ፡ አባሉ፡ እምርእሱ፡ እስከ፡ እገሪሁ፡ ወበጊዜሃ፡ ቄአ፡ ወወድቀ፡ ወሞተ፡ ግብተ፡ እስመ፡ ፈድፋደ፡ ጸዋግ፡ ሕምዙ፨ ወቅያዑኒ፡ ዘቄዓ፡ | ውእቱ፡ ዲያቆን፡ ስትየየ፡ ከልብ፡ ዘሀሎ፡ ህየ፡ ወውእቱኒ፡ ሞተ፡ በጊዜሃ፤ ወሶበ፡ ርእየ፤ ላሊበላ፡ ዘንተ፡ ዕፁበ፡ ግብረ፡ ወአንከረ፡ እፎ፡ ሞተ፡ ወፍጡነ፡ ወውእቱ፡ ዲያቆን፡ ዘሰትየ፡ እምውእቱ፡ ጽዋዕ፡ ዘፈነወት፡ ሎቱ፡ እኅቱ፡ ወውእቱሂ፡ ከልብ፡ ሰትየ፡ ቂያዑ፡ ለውእቱ፡ ዲያቆን፡ ዘንተ፡ ርእዮ፡ ላሊበላ፡ ከመ፡ ሞቱ፡ ፪ ግብተ፡ በጊዜሃ፡ ሰትይዎ፤ ለውእቱ፡ ጽዋዕ፡ ዘቦቱ፡ ሕምዝ፡ ወላሊበላ፡ ሶበ፡ ርእየ፡ ዘንተ፡ ተሰጥመ፡ ውስተ፡ ባሕረ፡ ሐዘን፤ በእንተ፡ ሞቶሙ፡ ለእሉ፡ ፪ | | ወጐድአ፡ እንግድዓሁ፡ ወሆከ፡ ርእሶ፤ ወይቤ፡ እንዘ፡ ይበኪ፡ አሌ፡ ሊተ፡ አኮኑ፡ በእንቲአየ፡ ተገብረ፡ ዝጽዋዕ፡ ሕምዝ፤ ወበእንቲአየ፡ ሞቱ፡ እሉኒ፡ ፪ ዲያቆንኒ፡ ወከልብኒ፡ እስመ፡ ጌጋይ፤ በዝኃኒ፡ እስመ፤ በእንቲአየ፡ ተቀትሉ፡ እሉኒ፡ ወዘንተ፡ ብሂሎ፡ ወበኪዮ፡ ብዙኃ፡ ተጋብአ፡ ላዕሌሁ፡ ፍቅረ፤ እግዚአብሔር፡ ወፍቅረ፡ አኃው፡ ዘሰምዓ፡ እምኃበ፡ መጻሕፍት፨ ወፈድፋደሰ፡ ዘይቤ፡ ጳውሎስ፡ ወዓዲ፡ እንተ፡ ትኄይስ፤ ፍኖት፡ እሜህረክሙ፤ አልቦ፡ ዘይበቍዓክሙ፡ ምንተኒ፡ ገቢረክሙ፡ እንበለ፡ አፍቅሮ፡ ቢጽክሙ፤| እመኒ፡ አእመርኩ፡ ነገረ፡ መላእክት፡ ወነገረ፡ ኵሉ፡ በሐውርት፨ ወዓዲ፡ ሥጋየኒ፡ ለእመ፡ አብላዕኩ፡ ከመ፡ እትመዝገን፤ አልቦ፡ ዘበቋዕኩ፤ ወእመኒ፤ ዘበቋዕኩ፤ ተነበይኩ፡ ወአእመርኩ፤ ኵሎ፡ ዘኅቡዕ፡ ወዘክሡት፡ ወተፋቅሮ፡ አልብየ፡ ከንቶ፡ ኮንኩ፡ ወአልቦ፨ ዘበቋዕኩ፡ እስመ፡ ተፋቅሮ፡ ፍጹም፡ ሕግ፡ ውእቱ፨ ዘንተኬ፡ ርእዮ፡ ላሊበላ፡ ወአእመረ፡ አፍቅሮተ፡ ሰብእ፡ ዘእግዚእ፡ ከመ፡ አፍቅሮ፡ ለሰብእ፨ ነሥአ፡ ውእተ፡ ጽዋዓ፡ ዘቀተሎ፤ ለዲያቆን፡ ወከልብኒ፤ ወሰትየ፡ እስመ፡ ይቤ፡ ለእሙት፡ ከማሆሙ፤ እስመ፡ በእንቲአየ፡ ሞቱ፨ እስመ፡

| | እሙንቱኒ፨ ርእዩኬ፡ ኦፍቁራንየ፡ ዘከመዝ፡ ይዋሄ፡ ወዘከመዝ፤ ንጹሐ፡ ልብ፡ ዘኃደረ፡ ላዕለ፡ ላሊበላ፡ ዘመጠወ፡ ነፍሶ፡ ለሞት፡ በእንተ፡ ሞተ፡ ካልብኒ፡ ኢመሐከ፡ ርእሶ፡ እስመ፡ ላህበ፡ ፍቅረ፤ መንፈስ፡ ቅዱስ፡ ነደት፤ ውስተ፡ ልቡ፡ ወኢቈረት፡ እምሥጋሁ፡ እስመ፡ ኢለከፈቶ፡ ማየ፡ ሙስና፨ ርእዩኬ፡ ኦፍቁራንየ፨ ወለእመሰ፡ ኮነ፡ ዝነገር፡ በላዕለ፡ ካልአን፡ እምአእኰትዎ፡ ለእግዚአብሔር፨ በእንተ፡ ዘኢሰትየ፡ ቀዳሚ፡ ውእተ፡ ጽዋዓ፤ ሕምዝ፡ ዘቀተሎ፡ ለዲያቆን፤ በጊዜ፡ ሰትዮ፡ አኮ፡ ብዙኃ፡ አላ፡ ንስቲተ፡| ሶበ፡ ጥዕማ፡ ቀተለቶ፡ ፍጡነ፨ ወላሊበላሰ፡ ይቤ፡ ርእዮ፡ ለእሙት፡ ከማሁ፡ እስመ፡ ጽዋዐ፡ ሞት፡ ዝየ፡ ተቀተለቶ፡ ለካልብየ፡ እስመ፡ ኃጣውእየ፡ ሊተ፡ አከለነ፨ ተገደፈቶ፡ ለእኁየ፡ ወዘንተ፡ ብሂሎ፡ ነሥአ፡ ውእተ፡ ጽዋዓ፡ ሞት፡ በጥቡዕ፡ ልብ፡ ወፍቅር፡ ፍጽም፨ ኦአኃውየ፤ መኑ፡ ይሬኢ፡ ቀታሌ፡ ወጐየ፡ እምኔሁ፤ ወመኑ፡ ዘይሬኢ፡ ኵናተ፡ ሰሑለ፡ ውስተ፡ እደ፨ ጸላኢሁ፡ ወይፈቅድ፡ ያምሥጥ፡ እምኔሁ፡ ወመኑ፡ ዘይሬኢ፡ ሰይፈ፡ ሰሑለ፡ ወያነብር፡ ዲበ፡ ክሳዱ፡ ወይፈርህ፤ እምብልሑ፨ ወመኑ፡ ዘይሬኢ፡ እሳተ፡ ውእቱ፡ ወይትወረው፨ | | ውስቴቱ፡ ወይጌግፅ፡ እምላህቡ፨ ወመኑ፡ ዘይሬኢ፡ ጸድፈ፡ ዓቢየ፡ ወያንኰረኵር፡ እመልዕልቴሁ፡ እስመ፡ እምታሕቴሁ፡ አልቦ፡ ዘያጌብር፡ ዘንተ፡ ዘከመዝ፡ ገብረ፡ ላሊበላ፡ በእንተ፡ ፍቅረ፡ ቢጹ፡ እስመ፡ ኮነ፡ አስከሬነ፡ ለፍቅረ፡ እግዚአብሔር፡ ወለፍቅረ፡ ካልኡ፨ ወካልአንሰ፡ ለእመ፡ ኮኑ፡ ወለእመ፡ በጽሖሙ፡ ዘከመዝ፡ ነገር፡ እመ፡ ኢለከፍዎ፡ ጥቀ፡ በአጽባዕቶሙ፡ ለውእቱ፡ ጽዋዕ፡ እንዘ፡ ይሬእዩ፡ ዘይቀትል፡ ካልኦሙ፡ ለዘቀደሞሙ፡ ሰትየ፨ ወዓዲ፡ እምአንሥኡ፡ ጸባኢት፡ ላዕለ፡ ውእቱ፡ ዘወሀበቶሙ፡ እምተ፡ ሳናኔውዋ፡ | ወእምተበአስዋ፡ ወእምአብጽሕዋ፡ ለሞት፨ ወይመስለኒሰ፡ ሥጋሃ፡ እምበልዑ፡ ወደማኒ፡ እምሰትዩ፡ ወዘንተኒ፡ እምከመ፡ ገቢሮሙ፡ እስመ፡ ኢኃድአ፡ ልቦሙ፡ እስመ፡ ፈድፋደ፡ መሪር፡ ነገሩ፡ ወላሊበላሰ፡ ኢፈርሃ፡ ሰቲየ፡ ጽዋዓ፡ ሞት፡ እንዘ፡ ይዜክራ፡ ለነፍሱ፡ ሐሞተ፡ ከይሲ፨ ወብሒአ፡ መጺጸ፡ ዘምስለ፡ ከርቤ፡ ቱሱሐ፡ በዲበ፡ መስቀል፡ ዘሰትየ፡ መድኃኒነ፡ በእንተ፡ ቤዛ፡ ብዙኃን፨ በከመ፡ ይቤ፡ ለሊሁ፡ እሜጡ፡ ነፍስየ፡ ቤዛ፡ አባግዕየ፡ አልቦ፡ ዘየዓቢ፡ እምዝ፡ ግብር፡ ከመ፡ ዘቦ፡ ዘይሜጡ፡ ህየንተ፡ ቤዛ፡ አዕርክቲሁ፨ ዘንተኬ፡ ቃለ፡

| | ዘአውጽአ፡ እምአፈ፡ በግዑ፡ ከመ፡ ይፈጽም፡ ፈተወ፡ ላሊበላ፡ ወፈቀደ፡ ከመ፡ ይትመሰሎ፡ ሎቱ፡ ለሊሁ፡ ተመሰለ፡ ኪያየ፨ ኢየሱስ፡ ሰትየ፡ ጽዋዓ፡ ሞት፡ በእንተ፡ ፍቅረ፡ ሰብእ፡ ዘአጸሩ፡ ሎቱ፨ ነገደ፡ ሕዝቡ፡ ዕብራውያን፨ ወላሊበላኒ፡ ሰትየ፡ ጽዋዓ፡ ሞት፡ በእንተ፡ ፍቅረ፡ ካልኡ፡ ዘተአጽረ፡ ሎቱ፡ በእደ፡ እኅቱ፨ ናሁ፡ አርአየ፡ ሎቱ፡ ረድእ፡ ምስለ፡ መምህሩ፡ ወበግዕ፡ ምስለ፡ ኖላዊሁ፡ ወገብር፤ ምስለ፡ እግዚኡ፡ እስመ፡ ይደሉ፤ ከመ፡ ይኩን፡ ገብር፡ ከመ፡ ግበር፡ እግዚኡ፡ ወረድእ፡ ምስለ፡ መምህሩ፡ ወሐዋርያ፡ ከመ፡ ዘፈነዎ፨ ወበእንተዝ፡ ኢፈርሃ፡| ላሊበላ፡ ሞተ፡ ተወልቲዎ፡ በወልታ፡ ፍቅር፡ ሥሙር፡ ወበወልታ፡ መድኃኒት፡ ጽኑዕ፡ ዘኢይሰቍሮ፡ ኵናት፡ ዓላዊ፡ ወዘኢይለክፎ፡ ስረተ፡ ሐጽ፡ ወሞጸፍተ፡ ዕብን፨ ወሊተሰ፡ ይመሰለኒ፡ እመሰማዕትኒ፡ ዘያአቢ፡ ላሊበላ፡ ዘሰትየ፡ ጽዋዓ፡ ሞት፡ በእንተ፡ ፍቅረ፡ ቢጹ፡ እንዘ፡ አልቦ፡ ዘአገበሮ፡ ሰማዕትሰ፡ ሰትዩ፡ ጽዋዓ፡ ሞት፡ ዘይቀትል፨ ሶበ፡ አገበርዎ፡ እላውያን፡ ከመ፡ ይሰተዩ፡ ሕምዘ፡ ሥራይ። ወእመ፡ አኮ፡ ከመ፡ ይክሐድዎ፡ ለአግዚኦሙ፡ ወከመ፡ ይክሀድ፡ ሃይማኖቶሙ፨ ወበእንተዝ፡ ሰትዩ፡ ጽዋዓ፡ ሞት፡ ሰማዕት፡ እምክሀዱ፡ | | ሃይማኖተ፤ እስመ፡ ይቤሎሙ፡ መድኃኒነ፡ ኢትፍርህዎሙ፤ ለእለ፡ ይቀትሉ፡ ሥጋክሙ፡ ወለነፍስክሙኒ፡ ኢይክሉ፡ ቀቲሎታ፨ ወአርእየክሙ፡ ዘትፈርሁ፡ ፍርህዎሰ፤ ለዘ፡ እምድኅረሰ፡ ቀተለ፡ ሥጋ፡ ሥልጣነ፡ ሎቱ፡ ነፍሰኒ፡ ወሥጋኒ፡ ይቀትል፡ ወይሐዩ፡ ውስተ፡ እሳተ፡ ገሃነም፨ ዘንተኬ፡ ፈሪሆሙ፡ ሰማዕት፡ ዘአጥብዑ፡ ለሞት፡ ነፍሶሙ፨ እመኒ፡ በስታየ፡ ሕምዝ፡ ወለእመኒ፡ በእሳት፡ ወለእመኒ፡ በኵናት፤ ወለእመኒ፤ በመጥባሕት፡ እስመ፡ ዘይክህድ፤ ሃይማኖተ፤ ይትዓሰይ፡ እሳተ፡ ወለሊበላሰ፡ ኢክህደ፡ ሃይማኖተ፡ ሰትየ፡| ጽዋዓ፡ ሞት፤ ወኢሂ፡ በእንተ፡ ፍጻሜ፡ ትእዛዝ፤ አላ፡ በእንተ፡ አፈድፍዶ፡ ሂሩት፡ እንዘ፡ ይትሜሰሎ፡ ለጸጋዌ፡ ምሕረት፡ እግዚአብሔር፤ ዘፆረ፤ ኵሎ፡ ሕማማተ፡ ወቅስፈታተ፡ ወሪዶ፡ እምሰማይ፡ ት፤ እንዘ፡ አልቦ፡ ዘአገበሮ፤ ለቢሶ፡ ትስብዕተ፡ ወመዊቶ፡ ጸገወ፡ ሕይወተ፤ ለሙታን፡ እስመ፡ በፈቃዱ፡ ሞተ፡ ጥዕመ፤ በእንተ፡ እሊአሁ፡ ወበእንተ፡ ፍቁራኒሁ፨ ወላሊበላኒ፡ አማን፡ ተመሰሎ፡ ለመድኃኔ፡ ኵሉ፤ ዓለም፤ እስመ፡ በፈቃዱ፡ ሰትየ፡ ጽዋዓ፡ ሞት፤ በእንተ፤ ፍቅረ፡ ካልኡ፨ እስመ፡ ቃል፤ ዘይቤ፡ እስመ፤ ተፋቅሮ፤ ፍጹም፡ ሕግ፡ ውእቱ፡ ዘአፍቀረ፡

| | ቢጸ፡ ኵሎ፡ ሕገ፡ ፈጸመ፡ ገቢረ። ወሰምዓ፡ ቃለ፡ ካዕበ፡ እምብስራተ፡ መድኃኒት፨ አፍቅሮ፡ ለእግዚአብሔር፤ አምላክከ፡ በኵሉ፤ ልብከ፡ ወበኵሉ፡ ኃይልከ፤ ወበኵሉ፡ ነፍስከ፤ ወበኵሉ፡ ህሊናከ፡ ወአፍቅር፡ ቢጽከ፡ ከመ፡ ነፍስከ፤ እስመ፡ በእንተ፡ ኵሉ፡ ፪ትእዛዛት፡ ተሰቅሉ፡ ኦሪት፡ ወነቢታት፡ ወላሊበላሰ፡ ተሰቅለ፤ ቦሙ፡ እስከ፡ ይበጽሕ፡ ለሞት፤ እስመ፡ ሰትየ፤ ውእቱ፡ ጽዋዓ፡ ዘወለደት፡ ሞተ፡ ለሰብእ፡ ወለእንስሳ፤ ወሎቱሰ፡ ሰትዮኒ፤ አኮ፡ ዘቀተለቶ፡ አላ፡ ከሰተት፡ ሎቱ፡ ምሥጢረ፡ ሰማይ፡ ወምድር፡ እስመ፡ | ተመሰለ፡ ውእቱ፡ ለኢየሱስ፡ ክርስቶስ፨ ጽዋዓ፡ ሞቱ፡ ለኢየሱስ፡ ጸገወተ፡ ሕይወተ፡ ለእለ፤ ሀለው፤ ውስተ፡ ሞት፡ ጽልመት፡ ወቦ፡ እለ፡ ሀለው፤ ውስተ፡ ንዴት፡ ወ/አ/ንጽሖሙ፤ ለእለ፡ ሀለው፡ /ውስተ፡/ ርኵስ፨ በአምልኮ፡ ጣዖት፡ አጽገየት፡ ሰብሐቶ[ሙ]፡ ውስተ፤ ኵሉ፡ አጽናፈ፤ ዓለም፤ በባሕር፡ ወበየብስ፤ ወበአላደስ፡ ወአግነት፡ ኵሎ፡ ሕዝበ፤ ለአምልኮቱ፡ ወኃይላትኒ፡ እስገደት፤ ታሕተ፤ እገሪሁ፡ ወረሰየቶሙ፡ ከመ፡ ይበሉ፤ አርኅው፤ ኆኃተ፡ መኳንንት፤ ወይት/ረ/ኃዋ፡ ኆኃት፡ እለ፡ እምፍጥረት፡ ወይባእ፡ ንጉሠ፡ ስብሐት፡ መኑ፡ ውእቱ፡ ዝንቱ፡ ንጉሠ፡ ስብሐት፨ እግዚአብሔር፡ | | ኃያል፡ ወጽኑዕ፡ እግዚአብሔር፡ ኃያል፡ በውስተ፡ ፀብእ፨ ምስለ፡ መኑኬ፡ ተፃብአ፡ ወመኑ፡ ዘሞአ፨ ወማእዜኑ፡ ዕለተ፡ ፀብዕኒ፡ ወዘፀብእሰ፡ እግዚአብሔር፡ ውእቱ፨ ወዘንተ፡ ፀብአሰ፡ ወዘተመውአ፡ ሰይጣን፡ ውእቱ፡ ወዕለተ፡ ፀብዕኒ፡ ዓርብ፡ ይእቲ፨ ወሶበሰ፡ ትሰምዕ፡ እንዘ፡ ይብል፡ ውእቱ፡ ነቢይ፡ እግዚአብሔር፡ ኃያል፡ በውስተ፡ ፀብዕ፨ ወኢይምሰልከ፡ ፀብዕ፡ እግዚአብሔር፡ ዘእምቅድመ፡ ዓለምሰ፡ አልቦ፡ ፀብእ፡ እስመ፡ ምስለ፡ መላእክት፡ አልቦ፡ ዘይክል፡ ተቃውሞቶ፨ ወዛቲሰ፡ ፀብእ፡ ዘዲበ፡ መስቀል፡ | ይእቲ፡ ፀብአቶ፡ ለሰይጣን፡ አመ፡ ሐመ፡ በትስብእተ፡ ሥጋሁ፨ በእንተ፡ አፍቅሮተ፡ ሰብእ፨ ወውእቱ፡ ሥጋ፡ ዘተሞአ፡ በኀበ፡ አዳም፡ ተሰምየ፡ ኃይለ፡ ወጽንዓ፡ ከዊኖ፡ መዋኤ፡ በኀበ፡ ወልድ፡ ዋህድ፡ እግዚአብሔርሃ፡ ተብህለ፨ ገሃደ፡ ከዊኖ፡ ዕሩየ፡ ምስለ፡ መለኮቱ፨ ዛቲኬ፡ ጽዋዓ፡ ሞቱ፡ ለኢየሱስ፨ ዘወለደት፡ ሕይወተ፡ ወአጽገየት፤ ስብሐተ፡ በላዕሉ፨ ወበታሕቱ፡ ወበጽዋዑኒ፡ ለላሊበላ፡ ዘአሀዘበቶ፡ ሞተ፡ አኮ፡ ዘቀተለቶ፤ አላ፡ ወለደት፡ ሎቱ፡ ሕይወተ፡ ወከሠተት፡ ሎቱ፡

| | ምሥጢራተ፡ እስመ፡ አልስሐት፡ ሕምዘ፤ ዘውስቴታ፡ ጽዋዐዓ፡ ሃይማኖት፡ ዘውስተ፡ ልቡ፨ ወተውኅጠት፡ ስቴ፡ ሕምዝ፡ በስቴ፡ ምሥጢር፡ ዘውኅዘ፤ እምገቦሁ፡ ለርጢን፡ ብዙኃን፨ በከመ፡ ተውኅጡ፡ አብትረ፡ ኢያኔስ፡ ወኢያንብሬስ፡ ዘኮኑ፡ አራዊተ፡ በበትሩ፡ ለሙሴ፡ ዘኮነ፡ አርዌ፡ ምድር፨ ወዘከመሰ፡ ወለደት፡ ሎቱ፡ ሕይወተ፤ ወዘከመሂ፡ ከሠተት፡ ሎቱ፡ ምሥጢራተ፡ እነግረክሙ፨ ወሶበ፡ ነሥአ፡ ውእተ፡ ጽዋዓ፡ ሕምዝ፡ ዘገብረት፡ ሎቱ፡ እኅቱ፡ ትቅትሎ፡ ወሰትየ፡ ላሊበላ፡ ለዘአኃዘ፡ ይደክም፨ ወአኮ፡ ዘደክመ፡| ተመዊኦ፡ እምኃይለ፡ ሥራይ፡ አላ፡ ደክመ፨ ሶበ፡ ተሀውከ፡ ዕፄ፡ ዓቢይ፡ ዘነበረ፡ ቀዲሙ፡ እንዘ፡ ያኃሞ፡ ከርሦ፨ ወሶበ፡ ረከበቶ፡ ይእቲ፡ ሕምዝ፡ ለውእቱ፡ ዕፄ፡ ዐቢይ፡ ወተቀሥፈ፡ ባቲ፨ ወሥእነ፤ ተአግሦ፡ ወወፅአ፡ አፍአ፡ እምውስጠ፡ ከርሡ፡ ለላሊበላ፡ ወኆለቈ፡ አጽፋሪሁ፤ ለውእቱ፡ ዕፄ፡ መጠነ፡ ፶ ወሶበ፡ ወፅአ፡ ውእቱ፡ ዕፄ፡ ጥዕየ፡ ሥጋሁ፡ ወኵሉ፡ አባሉ፨ ወሶበ፡ እብለክሙ፡ ደክመ፡ ኢይምሰልክሙ፤ በእንተ፤ ውእቱ፡ ሕምዝ፡ ዘሰትየ፤ እስመ፡ ኢይክህሎሙ፡ ሥራይ፡ ለአግብርተ፡ እግዚአብሔር፨ በከመ፡ ለሊሁ፡ እግዚእነ፡ | | ወዘሂ፡ ዘይቀትል፡ ለእመ፡ ሰትዩ፡ አልቦ፤ ዘይነክዮሙ፡ ወአልቦ፡ ዘይሬስዮሙ፨ ወዘክመሰ፡ በእንተ፡ ውእቱ፡ ዕፄ፡ ሶበ፡ ተሀውከ፡ እንዘ፤ ይወፅእ፡ ተነዲፎ፡ በአሕፃ፡ ዝንቱ፡ ሕምዝ። ላሊበላ፡ እንዘ፡ ሀለወ፤ ጥዑየ፡ በእንተ፡ ዘሐይወ፡ እምደዊሁ፨ ወሶቤሃ፡ ርእዮ፡ እግዚአብሔር፡ ኂሩቶ፡ ብዙኃ፡ ላሊበላ፡ ወአፍቅሮተ፤ ሰብእ፤ ወተ[ሰ]መሰ/ለ/፡ ኪያሁ፨ ወጸሐቆ፡ ለገቢረ፡ ፈቃዱ፡ ወለፈጽሞ፡ ትእዛዙ፨ ወዘከመዝ፡ ሰትየ፡ ጽዋዓ፡ ሕምዝ፡ ቀታሌ፡ በእንተ፨ ፍቅረ፨ ካልኡ፡ ወፈነወ፡ ሎቱ፡ መልአከ፤ ብርሃናዌ፡ እምነ፤ ኃይላቲሁ፡| ከመ፡ የሐውጸ፨ ወከመ፡ ይምስጣ፡ ለነፍሱ፡ ውስተ፡ ሰማያት፡ ከመ፡ ያርእዮ፡ ኅቡአተ፡ ምሥጢር፤ ዘላዕሉ፨ ወሶቤሃ፡ ወረደ፡ ዝኩ፡ መልአክ፡ ብርሃ/ና/ዌ፡ እንዘ፡ ያንበለብል፤ ከመ፡ እሳት፡ ወእንዘ፡ ይትፌሣሕ፡ ፈድፋደ፤ እስመ፡ ከማሁ፡ ልማዶሙ፡ ለመላእክተ፡ ብርሃን፨ ሶበ፡ ይፌንዎ/ሙ/፡ አምላከ፡ ጽድቅ፡ ኀበ፡ ኅሩያኒሁ፡ ወኀበ፡ ገባርያነ፡ ፈቃዱ፡ ለሐውጸቶሙ፡ አው፡ ለአውፅኦቶሙ፤ እምቤተ፡ ሞቅሕ፡ አው፡ ለዜንወቶሙ፡ ነገራተ፡ ምሥጢር፨ አው፡ ለረድኤቶሙ፨ በውስተ፡ ኵሉ፡ ሰሐቀ፡ ሐዘኖሙ፡ ሶበ፡ ይትፌነው፡ ኀበ፡ ቅዱሳን፡

| | ይትፌሥሑ፡ መላእክተ፡ ብርሃን፨ ወውእቱሰ፡ መልአክ፡ በጽሐ፡ ኀበ፡ ላሊበላ፡ በይእቲ፡ ሰዓት፤ እንተ፡ ባቲ፡ ሰትየ፡ ጽዋዓ፡ ሕምዝ፡ ወመሰጣ፡ ለነፍስ፡ ውስተ፡ ሰማይ፡ በዓቢይ፡ ፍሥሐ፨ ወእንዘ፡ ያዓርጐ፡ ውስተ፡ አየር፡ መሀሮ፡ ከመ፡ ይሄሊ፨ ወይብል፡ ብርሃንከ፡ ወጽድቅከ፡ እማንቱ፡ ይምርሀኒ፡ ወይስዳኒ፡ ደብረ፨ መቅደስከ፨ ወውስተ፡ አብያቲከ፡ እግዚኦ፨ እበውዕ፡ ኀበ፡ ምሥዋዒሁ፤ ለእግዚአብሔር፡ ኀበ፡ አምላኪየ፡ ዘአሥተፈሥሐ፤ ለውእርዙትየ፨ እመኒ፡ ዓረጉ፡ ህየኒ፤ አንተ፡ እመኒ፡ ወረድኩ፡ /ውስተ፡/ ቀላይ፡ ህየኒ፡ ሀለውከ፨ ወእመኒ፤ ነሣእእኩ፡ ክንፈ፡ ከመ፡ ንስር፡| ወሰረርኩ፡ እስከ፡ ማሕለቅተ፡ ባሕር፨ ህየኒ፡ እዴከ፡ ትመርሐኒ፡ ወታነብረኒ፡ የማንከ፨ ወዘንተ፡ እስመ፡ እንዘ፡ ይብል፤ ዓርገ፡ ውስተ፡ አየረ፡ ሰማይ፡ ቀዳሚት፤ ተጽኢኖ፡ ዲበ፡ አክናፈ፡ መልአክ፡ ብርሃናዊ፨ ወሶበ፡ በጽሐ፡ ውስተ፡ ምጽናዕ፡ ሰምዓ፡ ድምጸ፡ መፍርሀ፤ ወመርዕደ፤ ወአስተርአይዎ፡ መፍርህሃን፡ ገጽ፡ እለ፡ ይበኵሑ፡ ቀለምጺጸ፡ እሳት፨ ወእንዘ፡ ይጥኅሩ፡ በመዓት፡ ከመ፡ ዘይፈቅዱ፡ ይምስጥዎ፡ ወአኃዘ፡ ላሊበላ። ከመ፡ ይፍራህ፡ እምነ፡ ድምፀ፡ መዓቶሙ፡ ወእምነ፡ ፈሀለ፡ ጥኅረቶሙ፡ ወእምነ፤ አርአያሆሙ፤ መደንግጽ፡ ዘይመሱ፡ | | አባሉ፡ በከመ፡ ይትመሰው፡ ሰምዕ፡ እምቅድመ፡ ገጸ፡ እሳት፡ ዘንተ፡ ርእዮ፡ አንዘ፡ አሐዘ፡ ያነክር፡ በዐቢይ፡ ድንጋፄ፡ ወዝኩኒ፡ መልአክ፡ ዘይመርሖ፡ አርመመ፤ ወኢገሠፆሙ፡ /ለ/እልክቱ፡ መፍርሃነ፡ ገጽ፡ ለእለ፡ አስተርአይዎ፡ ለላሊበላ፡ በግ/ር/ማ፡ መደንግጽ፡ ወሶበ፡ ርእዮ፡ ላሊበላ፡ መዓቶሙ፡ ወለበወ፡ ኵሎ፡ ፍርሐተ፡ ዘይከውን፡ እምኔሆሙ፨ ወሶቤሃ፤ ይቤሎ፤ ዝኩ፡ መልአክ፡ ለላሊበላ፡ ርኢከኑ፡ ኦብእሲ፡ እሎንተ፡ መናፍስተ፤ ወዘከመ፡ እፎ፡ መፍርሃን፡ ወይፈቅዱ፡ ይምስጡከ፤ በመዓት፤ ወይቤሎ፡ ላሊበላ፡| እወ፡ ናሁ፡ እሬኢ፡ ኦእግዚእየ፨ ወይቤሎ፡ ዝኩ፡ መልአክ፡ አእመርከኑ፡ እምቅድመዝ፤ ኦብእሲ፡ ዘከመ፡ ሀሎ፡ ዝየ፡ ዘከመዝ፤ መፍርሃት፡ ወይቤሎ፡ ላሊበላ፡ ለመልአክ፡ ሰሚዓሰ፡ ሰማዕኩ፡ እግዚእየ፡ በውስተ፤ መጻሕፍቲሆሙ፡ ለእለ፡ ዓርጉ፤ ዝየ፨ እንዘ፡ ይብል፡ ሀሎ፡ ዓቢይ፡ ድንጋፄ፡ በውስተ፡ ምጽናዕ፤ እስመ፡ እለ፡ ይነብሩ፡ ህየ፡ መፍርሃን፡ ወመደንግፃን፡ ወሶበ፡ ትወፅእ፡ ነፍሰ፡ ብእሲ፡ ኃጥእ፡ እምሥጋሃ፡ ይዘረው፡ ላቲ፡ ከመ፡ ያደንግጽዋ፡ ወያፍርህዋ፨ ወይእዜሰ፤ ናሁ፡ ርኢኩ፡ በአዕይንትየ፡ ወናሁ፡ አሐዘኒ፡ ፍርሃት፡ ወረዓድ፤ አዝዞሙ፡ እግዚእየ፡ ከመ፡

| | ይርኃቁ፡ እምኔየ፤ ወይቤሎ፡ ዝኩ፡ መልአክ፡ በል፤ ለሊከ፡ ይትነሣእ፡ እግዚአብሔር፡ ወይዘረው፡ ፀሩ፤ ወይቤ፡ ላሊበላኒ፡ በከመ፡ መሀሮ፡ መልአክ፤ ወሶቤሃ፡ በረቀ፤ ወአንበሰበሰ፤ መንፈስ፤ ቅዱስ፡ ዘላዕለ፡ ላሊበላ፡ ወተዘረው፡ እልክቱ፡ መዓትማን፡ መፍርሃን፤ ወመደንግፃን፨ ወሶበ፡ ሰሰሉ፡ ወነፍፁ፡ እለ፡ አስተርአይዎ፡ በግርማ፡ ዓቢይ፨ ወውእተ፡ ጊዜ፡ ይቤሎ፡ ላሊበላ፡ ለውእቱ፡ መልአክ፡ ለምንትኑ፡ ኦእግዚእየ፡ ዘኢመሐርከኒ፡ ዘንተ፡ እምቅድመ፡ ያስተርእዩኒ፡ እልክቱ፡ መደንግፃን፨ ወይቤሎ፡ ውእቱ፡ መልአክ፡| ብርሃናዊ፡ ኢይምሰልከኬ፡ ኦብእሲ፡ ክቡር፡ በከመ፡ ዘኃደጉ፡ ከመ፡ ያስተርእዩከ፡ እልክቱ፡ መናፍሰት፡ መፍርሃን፤ አላ፡ በእንተ፡ በቊዔተ፡ ነፍስከ፤ ኃደጉ፤ ከመ፡ ያስተርእዩከ፡ እስመ፤ ሀለወከ፡ ትግባዕ፤ ውስተ፡ ሥጋከ፡ ወአመ፡ ሀሎከ፡ ውስተ፡ ዓለም፨ ይከውነከ፡ ተዝካረ፡ ዝንቱ፡ ዘርኢከ፤ ወበተዘክሮተ፤ ዝንቱ፤ ድንጋፄ፡ ታፈደፍድ፡ ጽድቀ፡ ወገቢረ፡ ሠናይ፡ በኵሉ፡ መዋዕለ፡ ሕይወትከ፡ ዘሀለውከ፡ ትሕየው፡ በውስተ፡ ዓለም፨ እስመ፡ ብዙኃነ፡ አስሐተ፡ ዝንቱ፡ ዓለምክሙ፤ እንዘ፡ ያስተዔውሮሙ፡ ከመ፡ | | ኢይግበሩ፡ ዘሰምዑ፤ በውስተ፡ መጻሕፍት፡ ወከመ፡ ኢይፍርሁ፡ ዘንተ፡ ድንጋፄ፤ ዘአንተ፡ ርኢከ፡ ዘትረክብ፡ ነፍስ፡ አመ፡ ጸአታ፡ እምሥጋሃ፤ ወዘየዓቢ፡ እምዝ፡ ሲኦል፡ ወገሃነም፡ አመ፡ ትንሣኤ፡ ሙታን፨ አመ፡ ተሐውር፡ ነፍስ፡ ወሥጋ፡ ዘንተኬ። አመ፡ ኢይፈርህ፡ ይ/ወ/ዲ፡ ግላ፡ ውስተ፡ ልቦሙ፨ ወመጻሕፍትሰ፡ አልቦ፡ ዘይዘዜንዎሙ፡ ውስተ፡ ዓለም፡ ኢሠናየ፡ ወኢእኩየ፡ በመጠነ፡ ይትከሀል፡ ለሰሚዕ፨ ወአንተሂ፡ ዑቅ፤ ወለቡ፤ ዘንተ፡ ድንጋፄ፡ ወኢይትአተት፤ ዝክሩ፤ እምውስተ፡ ልብከ፤ እስከ፡ ትፈጽም፡ ዕድሜ፡ | መዋዕሊከ፡ ዘተሐዩ፡ ውስተ፡ ምድር፨ ወእልክቱሰ፡ መናፍስተ፡ ድንጋፄ፡ እለ፡ አስተርአዩከ፤ ኢያደልው፡ ኢለባዕል፤ ወኢለነዳይ፤ ወኢለንጉሥ፤ ወኢለመኰንን፤ ወመንፈስ፡ ቅዱስሂ፡ ዘላዕሌከ፡ ከበተ፡ ርእሰ፤ እምነ፡ እልክቱ፤ እለ፡ አስተርአዩከ፡ ምስለ፡ ድንጋፄ፤ እስከ፡ ትሬኢ፡ ወትሌቡ፤ ፍርሃተ፡ ዓቢየ፨ ወሶበ፤ አእመርከ፤ ወጠየቅከ፤ ፍርሃተ፡ ወድንጋፄ፡ ዘይከውን፡ እምኔሆሙ፡ በረቀ፡ ወአንፈጾሙ፡ ዑቁኬ፡ ኢታተክዝዎ፡ ለመንፈስ፡ ቅዱስ፡ ወኢይትረከብኬ፡ ውስተ፡ ቤቱ፤ ምንትኒ፡ እምዕዳዋዋት፤ ዘእንበለ፡ ዕንቈ፡ ባሕርይ፡ ወወርቅ፡

| | ወብሩር፡ ጽሩይ፡ እለ፡ እሙንቱ፡ ምግባራተ፡ ሠናይ፡ ወዘንተ፡ ብሂሎ፡ ዝኩ፡ መልአክ፡ አዕረጎ፡ ውስተ፡ ሰማይ፡ ከመ፡ ያርእዮ፡ ኅቡአተ፡ ምሥጢር፡ ዘሰማይ፡ ፨ ወሶበ፡ ቀርበ፡ ውስተ፡ ሰማይ፡ ቀዳሚት፡ ተኃዘበ፡ ላሊበላ፡ እንዘ፡ ይመስሎ፡ ከመ፡ ትመጽኦ፡ ፍርሃት፡ ወራዕየ፡ ድንጋፄ፡ በከመ፡ ርዕየ፡ ቀዳሚ፡ በውስተ፡ ምጽናዕ፨ ወአዕመሮ። ዝኩ፨ መልአክ፡ እንዘ፡ ይመርሖ፡ ለላሊበላ፡ ወይቤሎ፡ ምንተኑ፡ ትትሐዘብ፡ ወምንተኑ፡ ይሄል፡ ልብክ፡ ኦብእሲ፡ ዘጸውአቶ፡ ጸጋ፡ እግዚአብሔር፡ ከመ፡ ይርአይ፡ | ኅቡአተ፡ ሰማይ፤ ወይቤሎ፡ ላሊበላ፡ ለውእቱ፡ መልአክ፡ ኦእግዚእየ፡ እትሐዘብ፡ ዘከመ፡ ቀዳሚ፡ ፍርሃት፡ እስመ፡ ራእያተ፡ ድንጋፄ፡ ዘውስተ፨ ምጽንዓተ፡ ግርማኒ፡ ወይመስለኒ፤ ይእዜኒ፡ ዘይመጽእኒ፡ ቀዳሚ፨ ወአውሥኦ፡ ዝኩ፡ መልአከ፡ ጽድቅ፤ ብርሃናዊ፡ በዓቢይ፡ ፍሥሐ፡ ወይቤሎ፡ ለላሊበላ፡ ኢትፍራህ፡ ኦቅዱስ፡ ወብፁዕ፡ ዘረከብከ፡ ብፁአ፡ በኀበ፡ ኵሎሙ፡ ሰማያውያን፡ ወትትበፃዕ፡ ወትትዊደስ፡ በኀበ፡ ምድራውያንሂ፨ አመ፡ ያስተርኢከ፡ ስነ፡ ኂሩትከ፡ ወአመ፡ ይትዐወቅ፤ ምግባረ፡ ጽድቅከ፡ ወአመ፡ ይትከሠት፡ | | መድፍን፡ ኅቡእ፡ ዘሀለወ፡ ይትከሠት፡ በእደዊከ፡ ዘኢያስተርኢ፡ ወኢርእዮ፡ መኑሂ፡ እስከ፡ ይእዜ፨ ወበእንተ፡ ፍርሃትሰ፡ ኢትሄሊ፡ ወኢይምስልከ፡ ዘትሬኢ፡ በውስተ፡ ሰማይ፡ መፍርሃን፡ ወመደን/ግ/ፃን፡ ወድንጻውያን፤ ወሕሱማነ፡ ራዕይ። ወምሉአነ፡ እከይ፡ እስመ፡ እልክቱሰ፡ ወኢያዓርጉ፡ ውስተ፡ ሰማይ፤ እስመ፡ ህየ፡ ንብረቶሙ፡ ውስተ፡ ምጽናዕ፡ አላ፡ እምይእዜሰ፡ ትሬኢ፡ መላእክተ፡ መንፈሳውያን፡ ብርሃናውያን፤ ትጉሃነ፡ እለ፡ ኢይነውሙ፡ እንዘ፡ ይስእሉ፡ ለዘመደ፡ ዚአከ፡ እለ፡ እሙንቱ፡| ሰብእ፡ ወይሴብሑ፡ ወይትፌሥሑ፡ በእንተ፡ ፩ ኃጥእ፡ ዘይኔስሕ፡ እም፺ ወ ፱ቱ፡ ነገደ፡ ጻድቃን፡ እለ፡ ይፈቅድዎ፤ ለንስሐ፡ ወፈድፋደሰ፤ ይትፌሥሑ፤ በእንተ፡ ከማከ፨ ወይእዜሰ፡ ትሬኢ፡ ፍሥሐሆሙ፡ ወሶበ፡ ይቤሎ፡ ዘንተ፡ ተፈሥሐ፡ ላሊበላ፡ ወተመልአ፤ እመኃይለ፡ መንፈስ፤ ቅዱስ፡ እምጽንዓ፡ ሃይማኖት፡ እስመ፡ አስተፍሥሐ፡ ቃለ፡ መልአክ፡ ላሊበላ፡ ለይኩን፡ እግዚኦ፡ በከመ፡ ትቤ፨ ወእምዝ፡ በጽሑ፡ ውስተ፡ ሰማይ፡ ቀዳሚት፡ ወሰምዓ፡ ላሊበላ፡ ድምፀ፤ ዐቢየ፡ ከመ፡

| | ፭ ነጐድጓድ፡ ወደምፁሰ፡ አኮ፡ ዘያፈርሕ፡ አላ፡ ዘያስተፌሥሕ፡ ወሰክረ፡ ላሊበላ፡ እምሰሚዓ፡ ውእቱ፡ ፍሥሐ፡ ወይቤሎ፡ ለውእቱ፡ መልአክ፡ ምንትኑ፡ ዝንቱ፡ ድምጽ፡ ከመ፡ ነጐድጓድ፤ ወድምፁሰ፡ ያስተፌሥሕ፨ ወሰክረኒ፡ ልብየ፡ እምሰሚዓ፡ ፍሥሐሁ፨ ወይቤሎ፡ ውእቱ፡ መልአክ፡ ላሊበላ፡ ድምፀ፡ ስብሐቶሙ፡ ለእሉ፡ መላእክት፡ ዘነገርኩከ፡ ቀዳሚ፡ እስመ፡ ፍሡሐን፡ እሙንቱ፨ ወበእንተ፡ ዝንቱ፡ ያስተፌሥሕ፡ ስብሐቶሙ፡ ሰሚዓ/ከ/፡ ድምጾሙ፡ ተፈሣሕከ፤ እፎኬ፡ ትትፌሣሕ፡ ሶበ፡| ትሬእዮሙ፨ ወእንዘ፡ ዘንተ፡ ይብሎ፡ አስተርአይዎ፡ ግብተ፡ ዑፁፋነ፡ ብርሃን፡ ወምሉአነ፡ ቅዳሴ፨ ወገልበቦ፡ ብርሃኖሙ፡ ወዖደ፡ ከመ፡ እንተ፡ ደመና፡ ወይ/ቤ/ልዎ፡ በፍሥሐ፡ በሐከ፡ ኢሳይያስኒ፡ ካልዕ፡ ዘነጸረ፡ ምሥጢረ፡ ሰማይ፤ ወክብረ፡ ስብሐቶሙ፡ ለሕያዋን፡ ለእለ፡ ኢይነውሙ፨ ወዘንተ፡ ሰማዖ፡ ላሊበላ፡ ተፈሥሐ፡ ወአንፈርአጸት፡ ነፍሱ፡ ወበርሃት፡ ገጹ፡ ከመ፡ ፀሐይ፡ እስመ፡ ከደነቶ፡ ጸዳለ፡ ስኖሙ፡ ለብርሃናውያን፨ ወይቤሎሙ፡ እንዘ፡ ይትፌሣሕ፡ ሰላምክሙ፡ ያዕርፍ፡ ላዕሌየ፤ ኦአጋእዝትየ፡ እስመ፡ ፈድፋደ፡ ሐወዘኒ። | | ቃልክሙ፡ ወይድልወኒኬ፡ አሀሉ፡ ምስሌክሙ፡ ወይኩን፡ ክፍልኒየ፡ ወማኅደርየ። ኀቤክሙ፡ በተንብሌ፡ ዚእክሙ፤ ወበሰእለትክሙ፨ ወአኮ፡ ዘበምግባርየ፡ ዘዕብል፡ ከመ፡ ይኩን፡ ማኅደርየ፡ ምስሌክሙ፡ አላ፡ በኃይለ፡ ጸሎትክሙ፡ ወበትግሀ፡ ቅዳሴክሙ፤ እ/ን/ዘ፡ እትአመን፡ ወእፀወን፡ ወበምግባሩሰ፡ ለሰብእ፡ ኢይትከሀሎ፡ ከመ፡ ይኅድር፡ ምስሌክሙ፡ ምንተኒ፤ አፈድፈደ፡ ኂሩተ፡ ለእመ፡ አጥረየ፡ ይመስለኒ፡ ዘኢይደልዎ፡ ከመ፡ ይረክብ፡ ስብሐተ፡ ወክብረ፡ ዘላዕሌክሙ፤ ወተሰጥውዎ፡ እልክቱ፡ ብርሃናውያን፡ ለላሊበላ፡| ወይቤልዎ፡ በእንተ፡ ማኅደርሰ፡ ዘትቤ፡ ወበእንተ፡ ክብር፡ ወስብሐት፡ ዘለከ፡ የዓቢ፤ ወንሕነሰ፡ ኢንክል፡ ረኪበ፡ ስብሐተ፡ ዘሀለወከ፡ ትረክብ፡ ወብርሃንከኒ፡ የዐቢ፡ እምብርሃንነ፨ ሕድግሰ፡ እምኔነ፡ እምእለ፡ ይትሌአሉነሂ፡ ሀለወከ፡ ትዕበይ፡ በክብር፡ ወበስብሐት፡ በቅድመ፡ እግዚአብሔር፤ ወበቅድመ፡ በግዑ፡ ወበቅድመ፡ መንፈሱ፡ ቅዱስ፨ ወክብሮሙሰ፡ ወስብሐቶሙ፡ ለእለ፡ ይትሌአሉ፡ እምኔነ፡ ትሬኢ፤ ሶበ፡ ትዓርግ፡ እምኔነ፡ ውስተ፡ ሰማይ፡ ካልዕ፡ ወበህየ፡ ትሰምዕ፡ ዘያዐቢ፡ እምዝ፡ ሰማዕከ፡ በዝየ፡

| | ወትትፌሣሕ፡ ዘየዓቢ፡ እምዝ፡ ፍሥሐ፡ ዘተፈሣሕከ፡ በዝየ፨ ወይቤልዎ፡ ብጽአን፡ ለከ፡ ኦብእሲ፡ ክቡር፡ ዘኮንከ፡ ቢጸ፡ ምስለ፡ እሳታውያን፡ ወዘንተ፡ ሰሚዖ፡ ላሊበላ፡ ሶበ፡ ይብልዎ፡ የዐቢ፡ ማኅደርከ፡ እማኅደርነ፡ ወክብርከ፡ እምክብርነ። ወስብሐቲከ፡ እምስብሐቲነ፡ ወከሠተ፡ አፉሁ፡ ላሊበላ፡ ወይቤ፡ ብፁዕ፡ ዘሐረይኮ፡ ወዘተወከፍኮ፡ ውስተ፡ አዕጻዲከ፡ ዘአኅደርኮ፡ ኃብለ፡ ሣህልከ፡ ዘኢይትበተክ፨ ሰብእሰ፡ እመ፡ ኢክህለ፡ ከመ፡ ይርከብ፡ ዘከመዝ፡ | ስብሐተ፡ በምግባረ፡ ጽድቁ፡ ለእመ፡ ኢኮነ፡ በምሕረትከ፨ ወዘንተ፡ ሶበ፡ ይብል፡ ላሊበላ፡ ይቤሉ፡ ኵሎሙ፡ ብርሃናዊያን፡ ኃይላት፡ እለ፡ ውስተ፡ ሰማይ፡ ቀዳሚ፡ እንዘ፡ ያወሥእዎ፡ ለላሊበላ፡ በቃለ፡ ፍሥሐ፡ በከመ፡ ሰማዕከ፡ ከማሁ፡ ውእቱ፡ ክብርከ፡ ወልዕልና፡ ምዕራግከ፡ የዓቢ፡ እምኔነ፡ ወእምእለ፡ ይትሌአሉነ፨ ወእምዝ፡ ቀነጸ፡ ዝኩ፡ መልአከ፡ ጽድቅ፡ ብርሃናዊ፡ ወሰረረ፡ ውስተ፡ አየረ፡ ሰማይ፡ እንዘ፡ ይጸውሮ፡ ለላሊበላ፡ ወይቤሎ፡ ተፈሣሕ፡ ኦብእሴ፡ እግዚአብሔር፡ በአጸደ፡ ትጉሃን፡ | | ወርኢ፡ ዘንተ፡ አየረ፡ ብርሃነ፡ እስመ፡ ይደልወከ፡ ጸጋ፡ ዓቢይ፡ ከመ፡ ትርአይ፡ ዘንተ፡ ረዕየ። እንዘ፡ ዘንተ፡ ይቤሎ፡ ሰምዕ፡ ድምፀ፡ ዓቢየ፡ ከመ፡ ቃለ፡ ማይ፡ ብዙኅ፡ ወሐዋዝ። ወግርማ፡ ራእዮሙሂ፡ የዐቢ፡ እምዘ፡ ሰማዕከ፡ ቀዳሚ፡ ውስተ፡ ሰማይ፡ ወይቤሎ፡ ላሊበላ፡ ለመልአክ፡ ዘምስሌሁ፡ እፎ፡ ይፈደፍድ፡ ዝንቱ፡ ድምፅ፡ ግሩም፡ ወይገርም፡ እምዘ፡ ሰማዕኩ፡ ቀዳሚ፡ ወተሰጥዎ፡ መልአክ፡ ወይቤሎ፡ ኢይቤሉ፡ እልክቱ፡ ቀዋምያን፡ ሀለወከ፡ ትስማዕ፡ ዕሙቀ፡ ቃላቲሁ፡ ለቢዎ፡| ጽሕቀ፡ ከመ፡ ይፈጽም፡ ገቢሮቶ፡ ጺሑስ፡ ፍኖቶ፡ ለእግዚአብሔር፡ ሶበ፡ ዘይቤ፡ ነፍስ፡ ወሥጋ፡ እሙንቱ፡ ዘያንሶሰው፡ ውስቴቶን፡ ጰራቅሊጦስ፡ ዝውእቱ፡ ማህተመ፡ ፍጽምነ፡ ወሰምዓ፡ ግዕዛንነ፡ ዘተኃተምነ። ቦቱ፡ በዕለተ፡ እንተ፡ ባቲ፡ ተወለድነ፡ እማይ። ወበእንተዝ፡ አዕተተ፡ ርስሐተ፡ ዝንቱ፡ ዓለም፡ እምነፍሱ፡ ወሥጋሁ፡ ከመ፡ ይኩን፡ ማ/ኅ/ደረ፡ ለሥሉሰ፡ ቅዱስ፡ በከመ፡ ይቤ፡ እግዚእነ፡ እመቦ፡ ዘያፈቅረኒ፡ ወአነሂ። አፈቅሮ፡ ወአርእዮ፡ ርእስየ። ወንመጽእ፡ አነ፡ ወአቡየ፡ ወነኃድር፡ ኀቤሁ፡ ወንነብር፡ ምስሌሁ።

| | ወጳውሎስኒ፡ ይቤ፡ ቤቱሰ፡ ለእግዚአብሔር፡ አንትሙ፡ ውእቱ። ወካዕበ፡ ይቤ፡ ኢታተክዝዎ፡ ለመንፈስ፡ ቅዱስ፡ ዘየኃድር፡ ውስቲትክሙ፡ ዘቦቱ፡ ተአተብክሙ፡ በዕለተ፡ ተባልሖትክሙ። ወዘንተ፡ ሰማዖ፡ አንጽሐ፡ ምኵራበ፡ ሥጋሁ፡ ወማኅፈደ፡ ነፍሱ፡ ወአልቦ፡ ዘገብረ፡ ወኢምንተኒ፡ እምግብራት፡ በዘይትክዝ፡ መንፈስ፡ ቅዱስ፡ ዘየኃድር፡ ውስቲቱ፡ አላ፡ ባሕርየ፡ ውእቱ፡ ሥጋሁኒ፡ ወባሕርየ፡ ውእቱ፡ ወነፍሱኒ፡ ዘያፈትዎ፡ ለመንፈስ፡ ግዕዛን፡ ከመ፡ ይኅድር፡ ውስቴቱ፡ ወኢይትፈለጥ፡ እምኔሁ፡ እስመ፡ ኢይትገ/ሐ/ሰ፡ መንፈስ፡| ቅዱስ፡ እምብእሲ፡ ንጹሕ፡ እምአመ፡ ተወልደ፡ እምኔሁ፡ ወኀበ፡ ዘቦ፡ መንፈስ፡ እከይ፡ ኢየኃድር፡ ውስቴቱ፡ እስመ፡ ኢይዴመር፡ መንፈስ፡ ቅዱስ፡ ምስለ፡ መንፈሰ፡ ሰይጣን፡ በከመ፡ ኢይዴመር፡ ጽልመት፡ ምስለ፡ ብርሃን። በከመ፡ ይቤ፡ ጳውሎስ፡ መምሕረ፡ አሕዛብ። መኑ፡ ዘደመሮ፡ ለጽልመት፡ ምስለ፡ ብርሃን፡ ወጽድቅኒ፡ ምስለ፡ ኃጢአት። ወመኑ፡ ዘያሐብሮ፡ ለክርስቶስ፡ ምስለ፡ ቤልሖር። ወመኑ፡ ዘያነብር፡ ጣዖተ፡ ውስተ፡ ቤተ፡ እግዚአብሔር፡ መንፈስ፡ እግዚአብሔር፡ ምስለ፡ መንፈስ፡ ነኪር። በመዋዕለ፡ አንጽሐ፡ ርእሶ፡ ይሄውጾ፡ መንፈስ፡ ቅዱስ፡ | | ወይኀድር፡ ውስቴቱ፡ ወይነብር፡ ምስሌሁ፡ እንዘ፡ ይመርሖ፡ ወእንዘ፡ ይሜህሮ፡ ቀትለ፡ ጸብአ፡ ምስለ፡ እድወ፡ ሰይጣን፡ ወውእቱ፡ ወመንፈስ፡ ቅዱስ፡ እንዘ፡ ይከውኖ፡ ሰይፈ፡ ረድኤት፡ ዘቦቱ፡ ይትቀነይ፡ ርእሶ፡ ከይሲ፡ መስዖዝዝ። ወካዕበ፡ በመዋዕል፡ አግመነ፡ ርእሶ፡ ብእሲ፡ የኃድጐ፡ መንፈሰ፡ ቅዱስ፡ ወይወጽዕ፡ እምኔሁ፡ ወያኃንቆ፡ መንፈሰ፡ ጋኔን፡ በከመ፡ ሐነቆ፡ ለሳኦል፡ ሶበ፡ ኃደጐ፡ መንፈሰ፡ እግዚአብሔር። ወይከውን፡ ስጡጠ፡ ውእቱ፡ ብእሲ፡ ዘወፅአ፡ እምኔሁ፡ መንፈስ፡ እግዚአብሔር፡ በከመ፡ ተሰጠ፡ መንጦላዕተ፡ ምኵራብ፡ እንዘ፡ ይወፅዕ፡| ከሮብ፡ መንፈሰ፡ ትንቢት፡ ወመንፈሰ፡ ክህናት፡ ኀበ፡ ከአውያን፡ ደም፡ ኢይፈቅድ፡ ሀለዎ። ወይከውን። ዓዲ፡ መዝበረ፡ ሶበ፡ ወፅአ፡ እምኔሁ፡ መንፈስ፡ እግዚአብሔር፡ አስሚዖ፡ እንዘ፡ ይብል፡ ሚመጠነ፡ ፈቀድኩ፡ አስተጋብእከ፡ ከመ፡ እንተ፡ ዶርሆ፡ ታስተጋብእ፡ እጐሊሃ፡ ታሕተ፡ ክነፊሃ፡ ወአበይከ፡ ናሁ፡ አኃድግ፡ ለከ፡ ቤተከ፡ በድወ። ወሶቤሃ፡ ይከውን፡ ውእቱ፡ ብእሲ፡ ርሑቅ፡ እመንፈሰ፡ ቅዱስ፡ እመንፈሰ፡ ጥበብ፡ ወአእምሮ፡ እመንፈሰ፡ ኃይል፡ ወጽንዕ፡ እመንፈሰ፡ ልቡና፡ ወርትዕ። ወይመጽእ፡ ኀቤሁ፡ መንፈሰ፡ ጋኔን፡ ወየኃድር፡

| | ውስቴቱ፡ እንዘ፡ ያንፈርዕፅ፡ ከመ፡ እንተ፡ ዝዕብ። ዘረከበ፡ በድነ፡ ወይጼውዕ፡ አብያጺሁ፡ በክሳዱ፡ ዐቢይ፡ አዝዕብት፡ ከመ፡ ይትፈሥሑ፡ ምስሌሁ። ቦ፡ እምኔሆሙ፡ ዘይቀውም፡ ውስተ፡ ልበ፡ ብእሲ፡ ሕምዘ፡ ክሂድ። ወቦ፡ እምኔሆሙ፡ ዘይወዲ፡ ውስቴቱ፡ ሕምዘ፡ ዝሙት፡ ወያስተናጕዕ፡ በውስተ፡ ሥጋሁ፡ ኵሎ፡ ሰብአ፡ እክል፡ ያረውጽ፡ ድኅረኒ፡ እሳት፡ ዘማውያን፡ ቦ፡ ዘይወዲ፡ እምኔሆሙ፡ ነገረ፡ ሐሰት፡ ውስተ፡ ልሳኑ፡ ወነገረ፡ ሐሜት፡ ነገረ፡ ጽርፈት፡ ነገረ፡ ላኳ፡ ወጋዕዝ፡ ወነገረ፡ ውዴት። ወነገረ፡ ጽልሁት፡ ወቦ፡ እምኔሆሙ፡ ዘይወዲ፡ ውስተ፡ ሐቋሁ፡ ኃብለ፡| ቅንዓት፡ ውስተ፡ እዴሁ፡ ሰይፈ፡ ከመ፡ ይቅትሎ፡ ለእኅዋሁ፡ በከመ፡ ቀተሎ፡ ቃየል፡ ለአቤል፡ እኁሁ። ቦ፡ እምኔሆሙ፡ ዘይወዲ፡ ውስተ፡ እንግድዓሁ፡ እልታሐ፡ ባእስ፡ ወውስተ፡ ዘባኑ፡ መጥባሕተ፡ ሞት፡ ውስተ፡ እደዊሁ፡ አውቃፈ፡ ሐጉል። ወውስተ፡ ክሳዱ፡ ቃማ፡ ጌጋይ፡ ወውስተ፡ መላትሒሁ፡ ቅብዓ፡ ኃጢአት። ወውስተ፡ ጌራ፡ ድማሁ፡ ጌራ፡ ሕሱም፡ ከመ፡ ፍጹም፡ ስርግወ፡ በዘዚአሆሙ፡ ሰርጐ፡ ወይን፡ ወብሩር፡ ምስሌሁ። እንዘ፡ የዓቅብዎ፡ ከመ፡ ያዕርቅ፡ ርእሶ፡ እምነ፡ ጌራሆሙ፡ ወኢክሳዱ፡ እምነ፡ ቃማሆሙ፡ ወኢእደዊሁ፡ እምነ፡ አውቃፊሆሙ። ወኢእንግድዓሁ፡ እምነ፡ እልታሀሆሙ፡ ወኢዘባነ፡ | | እምነ፡ ሞጣሕቶሙ፨ ወኢሐቋሁ፡ እምነ፡ ግብርናቶሙ። ወኢእገሪሁ፡ እምነ፡ አሣዕኒሆሙ፨ ወለእመ[ኒ]፡ ኮነ፡ ፍጻሜ፡ ጸአቱ፡ እምዝ፡ ዓለም፡ በ፡ ዘከመዝ፡ ልብሰቱ፡ ይትፌሥሑ፨ ኵሎሙ፡ ተጋቢኦሙ፡ ማኅበረ፡ አጋንንት፡ ወያደምፁ፡ መዝሙረ፡ ሐጕል፡ ብእሲሁ፤ እንዘ፡ ይብሉ፡ መኑ፡ ዘያድኅና፡ ለነፍሱ፡ እምእደ፡ ሲኦል፡ እስመ፡ ለእግዚአ፡ እግዚእከሂ፡ ግዕዘንከሂ፨ መነንከ፡ ወተዓወርከ፡ እንዘ፡ ይብለከ፡ በቃሉ፡ ኩን፡ ቅዱሰ፡ ወኮንከ፡ ርኩ/ሰ/፨ እንዘ፡ ይብለከ፡ ኩን፡ ንጹሐ፡ ወኮንከ፡ ርሱሐ። እንዘ፡ ይብለከ፡ ኩን፡ ጻድቀ፡ ወኮንከ፡ ኃጥአ፨ እንዘ፡ ይብለከ፡ ኩን፡ የዋሀ፡ ወከመ፡ ርግብ፡ | ወጠቢብ፡ ከመ፡ አርዌ፡ ምድር፡ ኮንከ፡ አብደ፤ ከመ፡ እንስሳ። ወኮንከ፡ ድሩከ፡ ከማነ፤ እንዘ፡ ይብለከ፡ ተሴሰይ፡ ዘልፈ፡ እማዕድየ፡ ወኢትዓፃእ፡ እምቤትየ፨ ወአንተሰ፡ ፈተወከ፡ ትሴሰይ፡ ሐመረ፡ ጽርዕ፡ ይሴሰዩ፡ አኅርው፤ እስመ፡ ንሕነ፡ መዝመዝነ፡ ቅብዓ፡ ክርስትናከ፤ እምይእዜሰ፡ ምስሌነ፡ ርስትከ፨ ውስተ፡ ግበቦሙ፨ ወሶቤሃ፡ ይወስድዎ፡ ውስተ፡ ግበቦሙ፡ ውስተ፡ ማኅደር፡ ዘድልው፡ ሎሙ፡ እስመ፡ ዓቃቤ፡ ትእዛዞሙ፨ ውእቱ፡ ወመፍቀሬ፡ ሥርዓቶሙ፨ ወሶቤሃ፡ የአምር፡ ውእቱ፡ ብእሲ፡ ዘኢየአምር፡ በሕይወቱ፨ ወይጌሥጻ፡ ለነፍሱ፡ በኀበ፡ ኢይበቍዕ፡ ተግሣጽ፡

| | ወይላሑ፤ በኀበ፡ ዘኢይበቊዕ፡ ላሕ፡ ሶበ፡ አሕመሞ፡ ላህበ፡ ገሃነም፡ ወቊረ፡ ሲኦል፤ እስመ፡ ቦቱ፡ መያጤ፡ ኵነኔሆሙ፡ ለኃጥአን፨ ዝውእቱ፡ ሲኦል፡ ሶበ፡ ይከውን፡ ቈሪር፤ ዘአልቦ፡ አቅም፡ ሶበ፡ አሕመሞሙ፡ በቍረቱ፡ ይትመየጥ፡ ወይከውን፡ ውዑየ፡ መደልው፡ ዘአልቦ፡ መደልዎ፡ ለውእቱ፨ ወከመዝ፡ የሐምምዎሙ፡ በተባርዮ፡ ወይኔሥሑ፡ በኀበ፡ ዘኢይበቊዕ፡ ንስሐ፨ በከመ፡ ይቤ፡ ዳዊት፡ ወእለሰ፡ ይጸልዕዎ፡ ለጽድቅ፡ ይኔስሑ፨ ወንስሐሆሙኒ፡ አልቦ፡ ማኅ/ለ/ቅት፡ ከመ፡ ለንስሐ፡ ዲያብሎስ፡ ወለኵነኔሁ፡ አልቦ፡ ማኅለቅት፡ ወኢተፍጻሜት፤ ከማሁ፡ ለኵነኔ፡ እሊአሁኒ፡ አልቦ፡ | ማኅለቅት፨ ያድኅነነኬ፡ እመሥገርቱ፡ ለዝንቱ፡ ጽጉመ፡ ደም፡ አርዌ፡ ዘያኃሥሥ፡ እስከ፡ ይእዜ፡ ነፍሳተ፡ ከመ፡ የሐጥ፡ እንዘ፡ ይጥኅር፡ ከመ፡ አንበሳ፡ ዘኢያረምም፡ እምአዳም፡ እስከ፡ ዮም፡ ፍሕለ፡ ጥኅረቱ፨ እንዘ፡ ይፈቅድ፡ ከመ፡ ይደቢ፡ አለ፡ ተሰመይነ፡ ናዝራውያነ፨ እስመ፡ ሰማዕነ፡ እንዘ፡ ናወግዞ፡ መየጥነ፡ ገጸነ፡ መንገለ፡ ምሥራቅ፡ በዕለት፡ ለበስናሁ፡ ለመርዓዊ፤ ሰማያዊ፡ ብእሲ፡ ሐዲስ፡ ዝውእቱ፡ ክርስቶስ፡ ወኃደግናሁ፡ ለብእሲ፡ ብሉይ፡ ዝውእቱ፡ ዲያብሎስ፡ እንዘ፡ ንብሎ፡ ርጉም፡ አንተ፡ ወርጉም፡ ሕሊናከ፡ ርጉም፡ ግብርከ፨ ወበእንተዝኬ፡ ይትመዓዕ፡ | | ዘሐሙስ፡ ላዕሌነ፡ ወለእለኒ፡ የሀበነ፡ እግዚእነ፡ ኢየሱስ፡ ክርስቶስ፡ ሰይፈ፡ ረድኤት፡ ላሊበላ፡ ከመ፡ ይውቂ፡ ክሳዶ፤ ለዝንቱ፡ አርዌ፡ ገዳም፡ ርጉም፡ ወይረስየነ፡ ለነኒ፡ ከመ፡ ናውቂ፡ ክሳዶ፡ በከመ፡ አቅውቅየ፡ ውእቱ፡ አሚን፨ /ተመለስ/ ወዝንቱሰ፡ ብእሲ፡ ክቡር፡ ኮከበ፡ ክብር፡ ጽዱል፡ ዘያንሶሱ፡ መልዕልተ፡ አየር፡ አብጢሎ፡ እምሕሊና፡ ዘበምድር፨ አልቦ፡ ዘገብረ፡ ምግባራተ፡ ዘያምዕዖ፡ ለመንፈሰ፡ እግዚአብሔር፡ ወአልቦ፡ አመ፡ አሰሰለ፡ መንፈስ፡ ቅዱስ፡ እምኔሁ፨ እምአመ፡ ተወልደ፡ እምከርሠ፡ ጥምቀት፡ እስመ፡ ኢተበአሰ፡ እምቃለ፡ መጻሕፍት፡ ዘውእቱ፡ ነፍሰ፡ እሳተ፡ | መለኮት፤ ወበእንተዝ፡ ኮነ፡ መበይናተ፡ ለምግባረ፡ ሠናይ፤ እስመ፡ ይጽሕቅ፡ ከመ፡ ይፈጽም፡ ቃላተ፡ ወንጌል፨ ወፈድፋደሰ፡ ይዴጕጽ፡ በቃለ፡ ጳውሎስ፡ ዘይቤ፤ እስመ፡ አኮ፡ በአጽምዖ፡ መጻሕፍት፡ ዘይጸድቁ፡ አላ፡ በገቢሮቱ፡ በዝንቱ፡ ቃል፡ ተጐዲኦ፡ በጽሐ፡ ኀበ፡ ፍጻሜሁ፡ ለፍሬ፡ ወንጌል፨ እስመ፡ ፈርየ፡ ህየንተ፡ ፩ ወ ፷፻ተ፡ በዓቂበ፡ ቃላቲሁ፡ ንጹሕ፡ ወጽሩይ፡ ተጸሚዶ፡ ታሕተ፡ አርዑቱ፡ ሠናይ፡ ወጾሩኒ፡ ቀሊል፨ በከመ፡ ይቤ፡ እግዚእነ፡ ንሥኡ፡ ጹሩ፡ አርዑትየ፤ ሠናይ፡ ወፆርየ፡ ቀሊል፨ ወሐረገ፡ ወይን፡ ከዊኖ፡ ተወጥሐ፡ ዲበ፡ ሰርዌ፡ ኂሩታቲሁ፡ ለወልደ፡

| | እግዚአብሔር። እስመ፡ ዘእንበሌሁ፤ አልቦ፡ ዘኢያአክል፡ ገቢረ፤ ወኢምንተኒ፡ ወአጽቀ፡ ወይን፡ ከዊኖ፡ ነበረ፡ ጐንደ፤ ምግባራቲሁ፡ ለኢየሱስ፡ እስመ፡ /ዘ/ይክል፡ ፈርየ፡ አዕፁቂሁ፡ እመ፡ ኢሀሎ፡ ውስተ፡ ጕንደ፡ ወይኑ፨ በከመ፡ ይቤ፡ ለሊሁ፡ እግዚእነ፡ አነ፡ ውእቱ፡ ዓፀደ፡ ወይን፡ ዘጽድቅ፡ አንትሙ፡ አዕፁቂሁ፡ ወአቡየ፡ ገባሪሁ፤ ወከዊኖ፨ ካዕበ፡ ዕፀ፡ ገነት፡ ርጡብ፡ ዘኢይነትግ፡ ፈርየ፡ ኢበክረምት፡ ወኢበሐጋይ፡ ወሀበ፡ ፍሬሁ፡ በበጊዜሁ፤ እስመ፡ ይሰቀይ፡ ዘልፈ፡ በዘትረ፡ መጻሕፍት፨ በከመ፡ ይቤ፡ ዳዊት፡ ብፁዕ፡ ብእሲ፡ ዘኢሖረ፡ በምክረ፡ ረሲዓን፨ ወዘኢቆመ፡ ውስተ፡ ፍኖተ፡| ኃጥአን፨ ወዘኢነበረ፡ ውስተ፡ መንበረ፡ መስተሰልቃን፨ ዘዳዕሙ፡ ሕገ፡ እግዚአብሔር፡ ሥምረቱ፨ ወዘሕጎ፡ ያነብብ፡ መዓልተ፡ ወሌሊተ፨ ወይከውን፡ ከመ፡ ዕፅ፨ እንተ፡ ትክልት፡ ኀበ፡ ሙሐዘ፡ ማይ፡ እንተ፡ ትሁብ፡ ፍሬሃ፡ በበጊዜሃ፨ ወቈጽላኒ፡ ኢይትነገፍ፡ ብሂል፡ ኢይማስን፨ ሥጋ፡ ነፍስ፡ ጻድቃን፨ በአማንኬ፡ ኢይማስን፡ ሥጋሁ፡ ለላሊባለ፡ እስመ፡ ኢገብረ፡ ኃጢአተ፡ ወኢተረክበ፡ ሐሰተ፡ ውስተ፡ አፉሁ፨ እንዘ፡ ይጼእልዎ፡ ኢጸአለ፡ ወእንዘ፡ የሐምምዎ፡ ኢተቀየመ፡ አላ፡ አግብአ፡ ለዘይኳንን፡ ጽድቀ፨ በከመ፡ ተብህለ፡ በእንተ፡ ሊቁ፡ ተፈጸመ፡ በላዕሊሁ፨ | | እስመ፡ ኢያንቱግ፡ እምኵሉ፡ ምግባረ፡ ሠናይ፡ እምዘ፡ ንጹሐ፡ ኢረስሐ፡ ወእምዘ፡ ተቀደሰ፡ ኢረኵሰ፨ እምዘ፡ ረትዓ፡ ኢተጠውየ፡ እምዘ፡ እሠናይ፡ ኢተሀከየ፡ እምዘ፡ ጠብዓ፡ ድኅሪተ፡ ኢገብአ፡ እስመ፡ ሐረሳዊ፡ ውእቱ፡ በመዋፍርተ፡ ወንጌል፨ ወበእርፈ፡ መስቀል፡ ወበእንተዝ፡ ኢያጽነነ፡ ትልመ፡ ገራውሂሁ፨ በከመ፡ ይቤ፡ እግዚእነ፡ አልቦ፡ ዘይእኀዝ፡ ዕርፈ፡ ወየኃርስ፡ ደኅሪተ፡ ወይከውኖ፡ ድልወ፡ ለመንግሥተ፡ ሰማያት፨ ወርትዕት፡ ይእቲ፡ መንግሥተ፡ ሰማያት፨ ወዘንተ፡ ሰሚዖ፡ ኮነ፡ ሐረሳዌ፡ ዘመንፈስ፨ እስመ፡ ሰሚዖ፡ ሰብእ፡ ቃለ፡ | ሕይወት፡ የሐውር፡ በፍኖተ፡ ሕይወት፨ ወላሊበላኒ፡ አኮ፡ ሰሚዖ፡ ቃለ፡ መንፈስ፡ ዘየኃድግ፡ ዘእንበለ፡ ይግበር፡ /እስመ፡ ይፈርህ፡/ ቃለ፡ ሐዋርያ፡ ዘይቤ፤ እመቦ፡ ዘያጸምዖ፡ ለቃል፡ ዘኢይገብሮ፡ ይመስል፤ ከመ፡ ብእሲ፡ ዘይሬኢ፡ ፍጥረተ፡ ገጸ፡ በመጽሔት፡ ወጠይቆ፡ ርእሶ፡ ረስአ፡ ዘከመ፡ እፎ፡ ውእቱ፨ ወለገቢሮቱኒ፡ ለቃል፡ ወርዘወ፡ በምዕዳነ፡ ሐዋርያ፡ ዘይቤ፡ አትልውዋ፡ ለሠናይት፡ በሃይማኖትክሙ፨ ወእምውስተ፡ ሃይማኖትክሙ፡ ለአእምሮ፡ ወእምውስተ፡ አእምሮ፡ ለኢዘምዎ፡ ወእምውስተ፡ ኢዘምዎ፡ ለትእግሥት፡ ወለአምልኮቱ፡ ወእምውስተ፡ ተአኅዎ፡ ለተፋቅሮ፨ ወዝንቱ፡

| | እምከመ፡ ሀለወክሙ፡ ወበዝኃ፡ ውስቴትክሙ፨ ኢኮንክሙ፡ ጽሩዓ፡ ወኢኮንክሙ፤ እለ፡ እንበለ፡ ፍሬ፡ አላ፡ ያበጽሐክሙ፨ ኀበ፡ አእምሮቱ፡ ለእግዚእነ፡ ኢየሱስ፡ ክርስቶስ፡ ወናሁ፡ ዝንቱ፡ ብእሲ፨ መካህ፡ ዘስሙ፡ ላሊበላ፡ ኢኮነ፡ ጽኑሰ፡ ወኢኮነ፡ እንበለ፡ ፍሬ፤ አላ፡ ባዕል፡ ውእቱ፡ ዘቦ፡ ዘርአ፡ በጽዮን፨ ወአብያተ፡ በኢየሩሳሌም። ወዘኢነ፡ ኢኮነ፡ ሠናየ፡ ሥጋዊት፤ አብያቲሁኒ፡ ኢኮነ፡ ሕንጻ፡ ዘእብን፡ ወዕፅ፡ ወፅቡር፡ አብያተ፡ ብርሃን፡ ውእቱ፡ ወኬንያሃ፡ ወሐናጺሃ፡ ወልደ፡ እግዚአብሔር፨ በከመ፡ ይቤ፡ ጳውሎስ፡ ለእመኒ፡ ተነሠተ፡ ቤተ፡ ማኅደርነ፡| ዘበምድር፡ ብነ፡ ሕንፃ፡ ዘበሰማያት፡ ዘኢገብሮ፡ እደ፡ ሰብእ፡ ዘኪያሁ፡ ንሴፎ፡ ከመ፡ ንልበስ፡ ቤተነ፨ ዘንተኬ፡ ተሰፈወ፡ ብእሴ፡ አምላክ፡ ላሊበላ፡ እንዘ፡ ንጉሥ፡ ውእቱ፡ ተመሰለ፡ ከመ፡ ፩፡ እምሕዝባውያን፡ እንዘ፡ ቀናይ፡ ውእቱ፡ ተመሰለ፡ ቅኑየ፡ በአትሕቶ፡ ርእሰ፨ በከመ፡ ይቤ፡ ሐዋርያ፡ አትሕቱ፡ ርእሰክሙ፡ ታሕተ፡ እዴሁ፡ ለእግዚአብሔር፡ ጽንዕት፡ ከመ፡ ያልዕልክሙ፤ አመ፡ ይሄውጸክሙ፨ ወኵሎ፡ ሕሊናክሙ፡ ግድፉ፡ ላዕሌሁ፡ እስመ፡ ውእቱ፡ ይሄሊ፡ በእንቲአክሙ፨ ወኮነ፡ መዝገበ፡ ጥበብ፤ ከመ፡ ይማዖ፡ ለመናግንተ፡ ሰይጣን፡ እስመ፡ ይቤ፡ ጥበቡ፡ እንከ፡ ወአጥብቡ፡ | | ርእሰክሙ። እስመ፡ ጸላኢክሙ፡ ጋኔን፡ ይጥኅር፡ ከመ፡ አንበሳ፡ ወያኃሥሥ፡ ዘይውኅጥ፡ ወቆመ፡ ዲበ፡ ኰኵሐ፡ ሃይማኖት፤ ዘኢያንቀለቅል፡ መሠረቱ፡ በኃይለ፡ ነፋስ፤ እሉ፡ እሙንቱ፡ ዓላውያን፡ እለ፡ እውከኩ፡ እምድድቅ፡ ወአዕተቱ፡ እምርትዕት፡ ሃይማኖት፡ መንክር፤ በከመ፡ ይቤ፡ አጽንዑ፡ በሃይማኖትክሙ፡ ወወኮነ፡ ልቡ፡ ጽሌ፡ ዘሕግ፨ ዘይሜህር፡ ርትዓ፡ ወምጽዋተ፡ ምሒረ፡ ነዳይ፡ ወሰርየት፡ ለአባስያን። በከመ፡ ይቤ፡ እግዚእነ፡ /በ/ወንጌል፡ ለእመ፡ አበሰ፡ ለከ፡ እሁከ፡ ኅድግ፡ ሎቱ፡ ሰብእ፡ አላ፡ ስብዓ፡ በበ፡ ስብዕ። ወኍላቋሁሰ፡ ለዝንቱ፡ ፬ ፻፡ ወ ፺፡ ወበእንተዝ፡ ጽሕቀ፡ ከመ፡ ይዕርር፡ ፍሬ፡ ሕይወት፡| እምገራህተ፡ ምሕረት፡ ከመ፡ ይትሜካህ፡ በዕለተ፡ ደይን፤ በከመ፡ ይቤ፡ ሐዋርያ፡ ወይትሜካህ፡ ባሕቱ፡ በዕለተ፡ ደይን፡ ዘገብረ፡ ምሕረተ፡ አማንኬ፨ ላሊበላ፡ ኢተግኅሰ፡ ወኢወጽአ፡ እምቃለ፡ መጻሕፍት፤ በከመ፡ ይቤ፡ ጳውሎስ፡ ኢትፃዕ፡ እምቃለ፡ መጻሕፍት፡ ከመ፡ ኢተአብስ፡ በእንተዝ፡ ኮነ፡ አፍአሁ፡ ወውስጡ፡ ስርግወ፡ በቃለ፡ እግዚአብሔር፤ አፍአሁሰ፡ እደዊሁ፡ ወእገሪሁ፡ አዕይንቲሁ፡ ወአዕዛኒሁ፡ ልሳኑ፡ ወአፉሁ፡ ኢርእየ፡ እኵየ፡ ወአስተሐየጸ፡ ራእየ፡ ከንቱ። በከመ፡ ይቤ፡ እግዚእነ፡ በውስተ፡ ኪዳኑ፡ አዑሩ፡ አዕይንቲክሙ፡ እለ፡ በገሀድ፡ ከመ፡

| | ታእምሩ፡ ፈቃደ፡ ለእግዚአብሔር፤ ወኵሎ፡ ምሥጢረ፡ መድኃኒት/ክ/ሙ፨ ወካዕበ፡ ይቤ፡ በውስተ፡ ወንጌሉ፡ ቅዱስ፤ ለእመ፡ አይንከ፡ ዘየማን፡ ምልሐ፡ ይኄይስከ፡ ነቋረከ፡ ትባዕ፡ ውስተ፡ መንግሥተ፡ ሰማያት፤ እምትባእ፡ ምስለ፡ አዕይንቲክሙ፡ ውስተ፡ እሳተ፡ ገሃነም፡ ኀበ፡ እሳቱ፡ ዘኢይጠፍዕ፨ ወዕፄሁ፡ ዘኢይነውም፡ በዕዘኒሁኒ፡ ኢይሰምዕ፡ ነገረ፡ ሐሰት፡ ወቃለ፡ ሕብል፨ ወካዕበ፡ ይቤ፡ እግዚእነ፡ አጽምዑ፡ ዕዘኒክሙ፡ እለ፡ ይሰምዑ፨ ወሙሴኒ፡ ይቤ፡ ወውዴተ፡ ዘሐሰት፡ ኢተሰጠዎ፡ ወበልሳኑኒ፡ ኢይንብብ፡ ንባበ፡ ጽሩዓ፡ እስመ፡| በከመ፡ ያገብዑ፡ ሎቱ፡ በእንቲአሁ፡ ቃለ፡ በዕለተ፡ ደይን፡ ወይትኳነን፡ ባቲ። ወሐዋርያኒ፡ ይቤ፡ እመቦ፡ ዘይትሔረም፡ ወኢያለጉሞ፡ ለልሳኑ፡ ወአስሐቶ፡ ለልቡ፡ ለዘከመዝ፡ ከንቱ፡ ሕርመቱ፨ ወዓዲ፡ ይቤ፡ ኢይስሕት፡ በቃሉ፡ ፍጹም፡ ውእቱ፡ ወይክል፡ ወዲየ፡ ልጓመ፡ ለኵሉ፡ ሥጋሁ፨ ወካዕበ፡ ይቤ፡ ልሳንነ፡ ንስቲት፡ አባል፡ ይእቲ፨ ወድምፃ፡ ዐቢይ፡ ወናሁ፡ ልሳን፡ ተፈጥረት፡ ውስተ፡ ነፍስትነ፡ ወታረምፆ፡ ለሥጋነ፤ ወታወዲ፡ ውስተ፡ ገሃነም፨ ወትሎሉ፡ ክቡተ፡ ፍጥረተነ፡ ወዓዲ፡ ይቤ፡ መሥገርቱ፡ ለብእሲ፡ ንባበ፡ አፉሁ፡ | | ወሰሎሞንኒ፡ አተለወ፡ ቃለ፡ በእንተ፡ ልሳን፨ ወይቤ፡ መሥገርቱ፡ ጽኑዕ፡ ውእቱ፡ ከናፍሪሁ፡ /ለ/ብእሲ፡ ወደግመ፤ ዓዲ፡ ይቤ፡ ሞት፡ ሕይወት፡ ውስተ፡ እደ፡ ልሳን፡ ወላሊበላኒ፡ አልቦ፡ አመ፡ ስሕተ፡ በዝንቱ፡ ኵሉ፡ አልቦ፡ አመ፡ አበሰ፨ ወበእደዊሁኒ፡ ኢገሰሰ፡ ርኩሰ፡ እስመ፡ ይቤ፡ ኢትግስስ፡ ወኢትልክፍ፡ ወኢትጥዓም፡ ዘንተ፡ ሙስና፨ ወበአእጋሪሁኒ፡ ኢኬደ፡ ውስተ፡ እኩይ፡ እስመ፡ ይቤ፡ ኢሳይያስ፡ ኢታንሥእ፡ እደዊከ፡ ወእገሪከ፡ ለገቢረ፡ እኩይ፨ አዕይንቲሁኒ፡ እንቃዕደዋ፡ ዘልፈ፡ ኀበ፡ መንበረ፡ መለኮት፨ በከመ፡ ይቤ፡ ዳዊት፡ | አዕይንትየሰ፡ ዘልፈ፡ ኀበ፡ እግዚአብሔር፨ እስመ፡ ውእቱ፡ ይባልሖን፡ እመሥገርት፡ ለእገርየ፡ ነጽር፡ ላዕሌየ፡ ወተሣሃለኒ፨ ወካዕበ፡ ኀቤከ፡ አንቃዕደቃ፡ አዕይንቲነ፡ ዘትነብር፡ ውስተ፡ ሰማይ፨ ናሁ፡ ከመ፡ አዕይንተ፡ አግብርት፡ ውስተ፡ እደ፡ አጋእስቲሆሙ፨ ወከመ፡ ዓይነ፡ ዓመት፡ ውስተ፡ እደ፡ እግዝእታ፨ ከማሁ፡ አዕይንቲነ፡ ኀበ፡ እግዚአብሔር፡ አምላክነ፨ እስከ፡ አመ፡ ይሣሃለነ፨ ወበዝ፡ ካዕበ፡ ላሊበላ፡ ብፁዕ፡ ንጉሠ፡ ኢትዮጵያ፡ ወምክሀ፡ ኵሉ፡ አድያሚሃ፡ ተመሰሎሙ፡ ለትጉሃነ፡ ሰማይ፡ እስመ፡ ኢወሀበ፡ ለአዕይንቲሁ፡ ንዋመ፡ ወኢድቃሰ፡

| | በአርብ፡ ለቀራንብቲሁ፡ እስከ፡ ረከበ፡ መካኖ፡ ለእግዚአብሔር፡ ወማኅደሮ፡ ለአምላከ፡ ያዕቆብ፤ በከመ፡ ይቤ፡ መዝሙር፡ ኢይ/ሁ/ቦን፡ ንዋመ፡ ለአዕይንትየ፤ ወኢድቃሳ፡ ለቀራንብትየ፡ እስከ፡ እረክብ፡ መካኖ፡ ለእግዚአብሔር፨ ወማኅደሮ፡ ለአምላከ፡ ያዕቆብ። ወኮና፡ አዕይንቲሁ፡ አዘቅተ፡ አንብዕ፡ ዘኢይነጽፍ፡ ነቅዑ፨ በከመ፡ ይቤ፡ ነቢይ፡ ወአንበርኩ፡ አዕይንትየ፡ ቅድሜከ፡ በከመ፡ አዘዝከ፨ ወበከመ፡ ይቤ፡ ካዕበ፡ ጳውሎስ፡ erased ኢያንተጉ፡ አንብዕየ፡ መዓልተ፡ ወሌሊተ፨ ወአውጽኅ፡ በእንተ፡ ምሥዋዕተ፡ አምልኮ፡ ዘሃይማኖትክሙ፨ ወዕዘኒሁኒ፡ ጽልወት፡ ወትረ፡ ለሰሚዓ፡ | ቃለ፡ እግዚአብሔር፡ እመጻሕፍት፨ ወእፅዋት፡ ካዕበ፡ ዕዘኒሁ፡ እምሰሚዓ፡ ቃላት፡ ጽሩዓ፡ ወርኅዋት፡ ለሰሚዓ፡ ስእለተ፡ ነዳይ፡ ወምስኪን፤ ወገዓረ፡ ሕዙናን፡ እስመ፡ ለኵሉ፡ ይቴክዝ፡ ወየሐዝን፡ እስመ፡ መሐሪ፡ ውእቱ፡ ከመ፡ አምላኩ፡ ወልሳኑ፡ ከመ፡ ይድኅንፃ፡ ስብሐት፡ ይእቲ፡ በከመ፡ ተብህለ፡ ትሰነቁ፡ ዘልፈ፡ ልሳንየ፡ ያነብብ፡ ጽድቀከ፤ ወኵሎ፡ አሚረ፡ ሰብሐቲከ፨ አፉሁ፡ ለጻድቅ፡ ይትሜሀር፡ ጥበበ፡ ወልሳኑ፡ ይነብብ፡ ጽድቀ፨ ወሕገ፡ አምላኩ፡ ውስተ፡ ልቡ፡ ወኢይድኅጽ፡ ሰኰናሁ፡ ወኢይትአጸዋ፡ አፉሁ፡ ወከናፍሪሁ፨ ክሡታት፡ እማንቱ፡ ለሰብሖ፡ ወለዘምሮ፡ | | እስመ፡ እንበለዝ፡ አልቦን፡ ካልዕ፡ ተናግሮ፡ ዘኢ/ይ/ከውን፡ ለበቍዔት፨ ወለባረከት፡ ወትረ፡ ክሡታት፨ በከመ፡ ይቤ፡ ዳዊት፡ እባርኮ፡ ለእግዚአብሔር፡ በኵሉ፡ ጊዜ፡ ወዘልፈ፡ ስብሐቲሁ፡ ውስተ፡ አፉየ፨ ወዓዲ፡ ይቤ፡ ትከሥት፡ ከናፍርየ፡ ወአፉየ፡ ያየድዓ፡ ስብሐቲከ፡ ወጽሩይ፡ ውእቱ፡ ልሳነ፡ ላሊበላ፡ ከመ፡ ብሩር፡ ጽሩይ፡ ዘተነጥፈ፡ ምስብዓተ፡ በከመ፡ ይቤ፡ ሰሎሞን፡ ብሩር፡ ብሩር፡ ርሱን፡ ልሳነ፡ ጸድቅ፨ ወእደዊሁ፡ ስፉሐት፡ ለጸሎት፡ ወለውሂበ፡ ምጽዋት፨ በከመ፡ ይቤ፡ አንሥአ፡ እደውየ፡ መሥዋዕተ፡ ሰርክ፨ ሢም፡ እግዚኦ፡ ዓቃቤ፡ ለአፉየ፡ ወማዕፆ፡ ዘአቅም፡ ለከናፍርየ። ወጳውሎስኒ፡ | ይቤ፡ በእንተ፡ አንሥኦ፡ አዕዳው፡ ለጸሎት፡ ይኤዝዝ፨ ወያነሥኡ፡ እደዊሆሙ፡ ወይጸልዩ፡ በኵሉ፡ ገጸ፡ መካን፡ ወይጸልዩ፡ እንበለ፡ ኑፋቂ፡ ወነጐርጓር፨ ወማኅበረ፡ ሐዋርያትኒ፡ ይቤሉ፡ በሲኖዶሶሙ፨ ወሶበ፡ ትሰፍሕ፡ እደዊከ፡ ለጸልዮ፡ ኢተሀሊ፡ ከመ፡ ሶበ፡ ትፌጽም፡ ታስተጋብእ፡ ኀቤከ፡ አስከሬነ፡ ምጽዋትኒ፡ ኮና፡ እደዊሁ፨ በከመ፡ ይቤ፡ መድኅን፡ ምጽዋተ፡ አበድር፡ እመሥዋዕት፨ ወበከመ፡ ይቤ፡ ካዕበ፡ ጴጥሮስ፡ ወምጽዋትሰ፡ ኢይርሐቅ፡ እምኔከ፤ ወይከውንከ፡ ትእምርተ፡ ቤትከ፨ ወኮና፡ ሰረገላ፡ መንፈስ፡ ቅዱስ፡ እስመ፡

| | ይረውጽ፡ ውስተ፡ ፍኖተ፡ ሰላም፨ ወገይሰ፡ ቤተ፡ ከርስቲያን፡ ወለናዝዞ፡ ሙቁሐን፡ ወለሐውፆ፡ ድውያን፤ በከመ፡ ይቤ፡ ጳውሎስ፡ ሩጹ፡ ወተበድሩ፡ እስመ፡ ዘሮጸ፡ ወዘበደረ፡ ይነሥእ፡ አክሊለ፡ ምዝጋናሁ፨ ዘንተ፡ ኵሎ፡ ዓቂቦ፡ ወፈጺሞ፡ ላሊበላ፡ ተሰምየ፡ እሳተ፡ እስመ፡ ተውኀጠ፡ ኵለንታሁ፡ በእሳተ፡ መንፈስ፡ ወተወለጠ፡ ጠባይዑ፨ አኮ፡ በጢሎ፡ እምክዋኒሁ፡ አላ፡ እስመ፡ ተመይጠ፡ ኀበ፡ ግዕዘ፡ መላእክት፡ እስመ፡ በምግባረ፡ ሥጋሁ፡ አውአዮ፡ በእሳተ፡ መንፈስ፡ ቅዱስ፡ ከመ፡ ኢይርከብ፡ ሰይጣን፡ ንዋየ፡ ሐቅል፡ በውስተ፡| ሥጋሁ፡ በዘይፃብዑ፡ እስመ፡ ውስተ፡ ሥጋሁ፡ ይነብር፡ ንዋየ፡ ሐቅሉ፡ ለሰይጣን፤ ዝውእቱ፡ ዝሙት፡ ምርዓት፡ ስስዕት፡ አፍቅሮ፡ መብልዕ፡ ወመስቴ፡ ወአፍቅሮ፡ ፍግዓ፡ ዘበምድር፤ ዝንቱ፡ ኵሉ፡ ወዘይመሰሎ፡ ንዋየ፡ ሐቅል፡ ውእቱ፡ ለሰይጣን፡ ምጕንጳሁኒ፡ ሥጋ፡ ውእቱ፡ እስመ፡ በከመ፡ አሕፃ፡ ይነብር፡ ተኃቢኦ፡ ውስተ፡ ምጕንጳ፡ እስከ፡ ያወጽዕ፡ ብእሲ፡ ሐፅ፡ በጊዜ፡ ፀብእ፨ ከማሁኬ፡ ሰይጣንኒ፡ ይፀብዖ፡ ለብእሲ፡ በእላንቱ፡ አሕፃ፡ እለ፡ ዘከርነ፡ ቀዳሚ፡ እለ፡ ይነብራ፡ ውስተ፡ ሥጋ፨ ዘንተኬ፡ ከመ፡ ያበጥል፡ እምሥጋሁ፡ | | ዘአርብ፡ ወያውዕያ፡ አኅፃት፡ ዘነኪር፡ ለብሰ፡ ላሊበላ፡ እሳተ፨ መንፈሰ፡ በዘያውዕያ፡ አኅፃት፡ ንዋየ፡ ሐቅሉ፡ ለሰይጣን፨ በከመ፡ ይቤ፡ መጽሐፍ፡ ወያውዒ፡ በእሳት፡ ዘኢሰማዕከ፡ በዝየ፡ ድምፀ፡ ሰብሐት፡ ዘየዓቢ፡ እምዝ፡ ዚአነ፨ ወይቤሎ፡ ወነዋ፡ ሰማዕከ፡ በከመ፡ ይቤሉኒ፡ ያስተርእዩኒ፨ በከመ፡ አስተርአዩኒ፡ ቀደማውያን፡ ወድምፀ፡ ሰብሐቶሙኒ፡ ሰማዕኩ፡ መጠነ፡ እክል፡ ወመጠነ፡ አግመረ፡ ምስማዕየ፨ ወይቤሎ፡ ውእቱ፡ ብርሃናዊ፡ ኢታኃደግ፡ ዘእንበለ፡ ትርአዮሙ፤ እስመ፡ በእንተዝ፡ ተፈነውኩ፡ ከመ፡ አዓርገከ፤ ወከመ፡ ትፈሣሕ፡ አንተሂ፡ | በነጽሮቶሙ፡ ለብርሃናውያን፡ ወበራዕያቲሆሙ፡ ለሰማያት፨ ወይቤሎ፡ ላሊበላ፡ እፎኬ፡ የዓቢ፡ ብርሃነ፡ ሰማይ፡ እምብርሃነ፡ ሰማይ፨ ወክብረ፡ መላእክትኒ፡ እምክብረ፡ መላእክት፡ ወስብሐቶሙኒ፡ ካዕበ፨ ወይቤሎ፡ ካዕበ፡ መልአክ፡ ለላሊበላ፡ እስመ፡ ከማሁ፡ ስርዓተ፡ ማዕርጎሙ፡ በከመ፡ ሠርጾመ፡ ፈጣሪሆሙ፤ ወባሕቱ፡ ለቡ፡ ከመ፡ ትርአዮሙ፡ ለእሉ፡ መንፈሳውያን፤ ወናሁ፡ ኮነ፤ ከመ፡ ያስተርእዩከ፡ ወእንዘ፡ ይብል፡ አንበስሰበሰ፡ ብርሃኖሙ፡ ለእሳታውያን፡ ወተሐውሰ፡ ብርሃን፡ ዘእምብርሃን፤ እስመ፡ ሰማይኒ፡ ዘእምብርሃን፨ ወመላእክትኒ፡ እለ፡ ህየ፡ ቦሙ፡ ተፁፌ፡

| | ፮ ብርሃን፡ ዘኢይትነገር፡ ወዘኢይትሄል፡ ወበረቁ፡ በቅድሜሁ፡ እልክቱ፡ ብርሃናውያን፨ ወጸርሑ፡ እንዘ፡ ይብሉ፡ በቃለ፡ ትፍሥሕት፡ ሐዊሳ፡ ሐዊሳ፡ ለዘበጽሐ፡ ኀቤነ፡ እንግዳ፡ ዘነገደ፡ እምነ፡ ቈላት፤ ዘተልዕለ፡ እምነ፡ ሥጋውያን፡ ዘኮነ፡ ቢጸ፡ ለእለ፡ አልቦሙ፡ ስን፡ ወላሊበላሰ፡ አንከረ፡ በተደምሞ፡ ዐቢየ፡ ርእዮ፡ ክብረ፡ ስብሐቲሆሙ፤ ወግርማሆሙ፡ ወስነ፡ ዑፃፌሆሙ፡ ዘያንበለብል፡ ዘአማዕበለ፡ ነበሳባሰ፡ ብርሃኑ፡ ለአልባሲሆሙ፡ በቅድሜሁ፨ ወይቤልዎ፡ እልክቱ፡ ብርሃናዊያን፡ ወ/ለ/ላሊበላ፡ ርእይዎ፡ እንዘ፡| ያነክር፡ በተደሞ፡ ዐቢይ፡ ምንተኑ፡ ታነክር፡ ወምንተ፡ ታስተኤሪ፡ ኢሳይያስ፡ ሐዲስ፡ ዘነጸረ፡ ቀዳሚ፡ አርአያ፡ ስብሐቲሁ፡ ለእግዚአብሔር፨ እንዘ፡ ይነብር፡ ዲበ፡ መንበሩ፡ ዓቢይ፡ ወልዑል፡ ነዋኅ፡ ወምጡቅ፤ ወምሉዕ፡ ቤተ፡ ስብሐቲሁ፡ ወሱራፌል፡ ይቀውሙ፡ ዐውዶ፡ ወለለ፡ ፩ እምኔሆሙ፡ ዘበበ ፮ ክነፊሆሙ፡ ይጸርኁ፡ ወይብሉ፡ ቅዱስ፡ ቅ፡ ቅ፡ እግዚአብሔር፡ ጸባዖት፡ ፍጹም፡ ምሉዕ፡ ሰማያተ፡ ወምድረ፡ ቅድሳተ፡ ስብሐቲከ። ወተለዓለ፡ መርፈቃተ፡ ኆኅት፡ እምቃለ፡ ዘይኬልሑ፨ | | ዘንተ፡ ርእዮ፡ ኢሳይያስ፡ አንከረ፤ ወአንተኒ፡ ኪያነኒ፡ ታነክረነ፡ ርኢየከ፡ ክብረነ፡ ወ/ሰ/ብሐተነ፡ ወብርሃነ፡ ዘውስቴትነ፡ ወኢታንክርኬ፡ በእንቲአነ፡ አላ፡ መፍትው፡ ንሕነ፡ ንዌሰ፡ ክብረከ፨ ወንሕነኒ፡ ናነክር፡ ርእሰከ፡ ወንሰብሖ፡ ለዘከፈለከ፡ ክብረ፡ ዐቢየ፨ እስመ፡ ፈድፋደ፡ አፍቀረከ፡ ወክብር፡ ተውህበ፡ ለከ፡ ዘየዓቢ፡ እምካልአኒከ፡ ወላሊበላሰ፡ እስከ፡ ይእዜ፡ ኢነበቦሙ፡ ወኢያውሥኦሙ፡ ወኢምተኒ፡ ቃለ፡ እስመ፡ ሀለወ፡ በዓቢይ፡ አርምሞ፡ ወበዐቢይ፡ ተደሞ፨ በእንተ፡ ዘርእየ፡ አርአያ፡| ሰብሐቲሆሙ፡ ለእሙንቱ፡ እሳታውያን፨ ወካዕበ፡ አውሥእዎ፡ እልክቱ፡ ትጉሃን፡ ዘካልዕ፡ ሰማይ፡ ወይቤልዎ፡ ተሰጥመ፡ ልብከ፡ ውስተ፡ ሰማይ፤ወለምንት፡ ዘኢታወሥኣነ፡ እንዘ፡ መጠነዝ፡ ዘንትናገረከ፡ ወንሕነሰ፡ ንትፌሣሕ፡ ከመ፡ ዘረከበ፡ ምሕርካ፡ ብዙኃ፨ በእንቲአከ፡ ለምንትኑ፡ ዘኢትነብብ፡ ምስሌነ፡ እንዘ፡ መጠነዝ፡ ፍሥሐ፡ ንትናገከ፡ ወላሊበላሰ፡ እንዘ፡ ሀለወ፡ በዓቢይ፡ ፍሥሐ፡ ውስተ፤ ፍሥሐ፡ ዐቢይ፡ አስተጋቢአ፡ ሕሊናሁ፡ እንዘ፡ ያነክር፡ ዕበዮሙ፡ ለእሙንቱ፡ መላእክት፨ እለ፡ ተሰጥውዎ፡ እስመ፡ ራዕዮሙ፡

| | ዘአርብ፡ ያደምም፡ ወያስተዓፅብ፡ ግርማሆሙ፡ ወሶበ፡ ይቤልዎ፡ ለምንት፡ ዘኢታወሥአነ፡ ተሰጥመኑ፡ ፍሥሐ፡ ውስተ፡ ልብከ፡ ወሶቤሃ፡ አኃዘ፡ ይቤሎሙ፡ ላሊበላ፡ ሊተሰ፡ አኮ፡ ድልወት፡ ሊተ፤ ከመ፡ እትናገር፡ ምስሌክሙ። እስመ፡ አነ፡ መሬታዊ፤ በእንተ፡ ዝንቱ፡ አንከርኩክሙ፤ እምአመ፡ ተወለድኩ፡ እስከ፡ ይእዜ፡ ኢርኢኩክሙ፡ ወቦቱ፡ አነክር፡ ዮም። አመ፡ ነፀርኩክሙ፡ አነክር፤ ዕበየክሙ፡ በከመ፡ ዜነውኒ፡ እለ፡ እምታሕቴክሙ፡ ሀለው፡ መላእክት፡ እለ፡ ውስተ፡ ቀዳሚ፡ ሰማይ፨ ወአውሥእዎ፨ እልክቱ፡ መላእክት፡ ወይቤልዎ፡ ወንሕነሰ፡ ንዜንወከ፡ | ወንሴብሐከ፡ ለከ፡ በእንተ፤ ክብረ፡ እልክቱኒ፡ ካልዓኒነ፡ እስመ፡ ውእቶሙ፡ የዐብዩ፡ እምኔነ፡ እለ፤ሀለው፤ መልዕልቴነ፤ እስመ፡ ውእቶሙ፡ የዓብዩ፡ እምኔነ፡ ወስብሐቲሆሙኒ፡ እምስብሐቲነ፡ ወክብሮሙኒ፡ እምክብርነ፤ ወብርሃኖሙኒ፡ እምብርሃንነ፡ ወለከሰ፡ ክብርከኒ፡ ወስብሐቲከሂ፤ እምክብሮሙ፡ ወስብሐቶሙ፡ ለእለ፡ ይትሌዓሉነ፡ ወላሊበላሰ፡ ያስተዓፅብ፡ ፈድፋደ፡ ወይብል፡ መኑኬ፡ ይክል፡ ረኪበ፡ ዘከመዝ፡ ወባሕቱ፡ ብፁዓን፡ ለእለ፡ ተኃድገ፡ ሎሙ፡ ኃጢአቶሙ፨ ወለእለ፡ | | ኢሐሰበ፡ ሎሙ፡ ኵሎ፡ ጌጋዮሙ፡ ብፁዕ፡ ብእሲ፡ ዘኢኈለቈ፡ ሎቱ፡ እግዚአብሔር፡ ኃጢአቶ፨ ወዘአልቦ፡ ጽልሑት፡ ውስተ፡ ልቡ፡ ይእዜኬ፡ አእመርኩ፡ ዘይቤ፡ ገባሬ፡ መላእክት፡ አበ፡ ኵሉ፡ ሠርጐ፡ ዓለም፨ እግዚእነ፡ ኢየሱስ፡ ክርስቶስ፡ እስመ፡ አኮ፡ በመስፈርት፡ ዘይሁብ፡ እግዚአብሔር፡ መንፈሶ፡ እስመ፡ እንበለ፡ መስፈርት፡ ይነሥኡ፡ ክብረ፨ እማን፡ ውእቱ፡ ዘይቤ፡ ጳውሎስ፡ እንዘ፡ ይነግር፡ ኂሩቶ፡ ለአብ፡ ወልደ፡ ጥቀ፡ ኢመሀከ፡ እምኔነ፡ ምንትኑ፡ እንከ፡ ዘኢይጸግወነ፡ ለእመ፡ ወለደ፡| መጠወ፡ ለሞት፡ በእንተ፡ ቤዛ፡ ሰብእ፤ ምንትኑ፡ ክብረ፡ ፍርቃን፡ ወውዳሴ፡ ይደልዎ፡ እምኃቤክሙ፡ እስመ፡ ተብህለ፡ በእንቲአክሙ፡ ዘይሬሰዮሙ፡ ለመላእክቲሁ፡ መንፈሰ፡ ወለእለ፡ ይትለአክዎ፡ ነደ፡ እሳት፨ ወይደልዎ፡ ካዕበ፡ እምኔነ፡ ስብሐት፡ ወአኰቴት፡ እስመ፡ ተብህለ፡ በእንቲአነኒ፡ ወገብሮ፡ ለእጓለ፡ እመሕያው፡ በአርአያሁ፨ ወበአምሳሊሁ፡ ወንፍሐ፡ ላዕሌሁ፡ ወንፈሰ፡ ሕይወት፨ ወኮነ፡ ሰብእ፡ በመንፈሰ፡ ሕይወት፡ ወዘንተ፡ እንዘ፡ ይብል፡ ላሊበላ፡ መሰጦ፡ ውስተ፡ አየረ፡ ሰማይ፡ ሣልስ፡ ወሰማይሰ፡ ሣልሳይ፡

| | የዐቢ፡ እምሰማይ፡ ሰማይ፡ ዳግማይ፨ በብርሃንኑ፡ ወሚመ፡ በክብር፡ ወመላእክቲሁኒ፡ ለሰማይ፡ ሣልሰ፡ እምነ፡ መላእክት፡ ዘሰማይ፡ ዳግማይ፡ ወዘንተ፡ ርእዮ፡ ላሊበላ፡ ተፈሥሐ፡ ፍሥሐ፡ ወሰከ፡ ፍሥሐሁ፡ እምፍሥሐ፡ ዘተፈሥሐ፡ በቅድመ፡ መላእክት፡ ዘዳግማይ፡ ሰማይ፡ ወበነጽሮ፡ ብርሃኖሙ፨ ወዝኩሰ፡ መልአክ፡ ዘይመርሆ፡ ለላሊበላ፡ ሶበ፡ አብጽሖ፡ ውስተ፡ አየረ፡ ሰማይ፡ ሣልሰ፡ ሰማይ፡ ይቤሎ፡ ነጽርኬ፡ ዘንተ፡ አየረ፡ ሰማይ፡ ሣልስ፡ ሰማይ፡ በለብዎ፡ ምንተ፡ ይሤኒ፡ ዝንቱ፡ አየረ፡ ሰማይ፡ ብርሃነ፡ | ወፈድፋደ፡ ይሤኒ፡ ወይኄይስ፡ እምዘነጸርከ፡ ቀዳሚ፨ ወአንተኒ፡ አፈድፍድ፡ ፍሥሐከ፡ እምዘቀዳሚ፡ በነጽሮቱ፡ ለዝንቱ፡ ብርሃን፡ ዓቢይ፡ ዘኢይደልዎ፡ ለዓይነ፡ ሰብእ፡ ከመ፡ ይጠንቅቅ፡ ጠይቆታ፨ እስመ፡ ጥበብ፡ እንተ፡ ውስተ፡ ሕፅኑ፡ ለአብ፡ ተኃድር፨ ቀዳማይኒ፡ ዘኢፈጸማ፡ ወደኃራይኒ፡ ዘኢረከበ፡ አስራ፡ ወአልቦ፡ ዘተሰየጠ፡ በወርቅ፡ ያፌዝ፨ ይእቲኬ፡ ዘገብረት፡ ዘንተ፡ ትሬኢ፡ ወካልአኒ፡ ዘሀለወከ፡ ትርአይ፤ ዘየዓቢይ፡ እምዝ፤ ትሬኢ፡ ወዘኢይበጽሐኒ፡ ህሊና፡ ሰብእ፡ ወኢዘለሊነ፡ ዘመላእክት፤ አእምሮ፡ | | ባቲ፡ ጥበብ፡ ዘገብረት፡ ግበረ፨ ወዘንተ፡ እምድኅረ፡ ይቤሎ፡ ሰምዓ፡ ላሊበላ፡ ጕሕና፡ ስብሐቲሆሙ፡ ለመላእክት፡ ሰማይ። ሣልስ፡ እንዘ፡ ይደምጽ፡ ከመ፡ ነጐድጓድ፨ ወእንዘ፡ ይሄሊ፡ መምዑ፡ ጥቀ፡ ወይቤሎ፡ ዝኩ፡ መልአክ፡ ብርሃን፡ ላሊበላ፡ አጽምዕኬ፡ ኦብእሲ፡ ዘሰሐበተከ፡ ጥበብ፡ በሀብለ፡ ሣህል፡ ወአብጽሐተከ፡ እስከ፡ ዝየ፨ ከመ፡ ትርአይ፡ ዘንተ፡ ምሥጢረ፡ ወከመ፡ ትስማዕ፡ ነጐድጓድ፡ ስብሐቶሙ፡ ለትጉሃን፡ ዘያሞግድ፡ በበሰማይ፤ ወአንተሂ፡ ተፈሣሕ፡ ፈድፋደ፡ ወሰብሐ፡ ለዘ፡ ኵሎ፡ ይመልክ፡ ወይቤሎ፡ ካዕበ፡ ውእቱ፡ | መልአክ፡ ለላሊበላ፡ መፍትው፡ ለከ፡ ተአኵቶ፡ ፈድፋደ፡ እስመ፡ ፈድፋደ፡ አፍቀረከ፤ ወረሰየከ፡ ትኅበር፡ ሰብሖ፡ ምስለ፡ መላእክት፡ ወተፈሥሐከ፡ ወይእበይ፡ ፍሥሐከ፡ ወተሰጠዎ፡ ላሊበላ፡ ወይቤሎ፡ ለፍሥሐየሰ፡ አልባቲ፡ አቅመ፡ ወኢመሥፈርት፡ እስመ፡ ለሰሚዓ፡ ድምፀ፡ ዝንቱ፡ ስብሐት፡ አልቦ፡ ዘይትኤረያ፡ በጣዕም፨ ወወይንኒ፡ ኢይከውን፡ መጠነ፡ ቀለምጺፀ፡ ፍሥሐ፡ በፍሥሐ፡ በቅድመ፡ ፍሥሐ፡ ዝንቱ፡ ስብሐት፨ ወዘንተ፡ እምድኅረ፡ ይቤ፡ በጽሑ፡ ውስተ፡ ሣልስ፡ ሰማይ፡ ወርእየ፡ ላሊበላ፡ መላእክተ፡ እለ፡ ህየ፡

| | ወፈድፋደ፡ ስብሐቶሙ፡ ለእሉ፡ እምነ፡ ቀዳማውያን፡ ወላሊበላኒ፡ ይትዌስክ፡ ፍሥሐ፡ ለለሰማዩ፡ ሶበ፡ ይሬኢ፡ ክብሮሙ፡ ለትጉሃን፡ ወብርሃኖሙ፡ ዘየኃይድ፡ ዓይነ፡ ዘኢይከውኖ፡ ለሰብእ፡ ይንብብ፡ በእንቲአሁ። እልክቱሰ፡ መላእክት፡ እለ፡ ውስተ፡ ሰማይ፡ ሣልስ፨ ሶበ፡ ርእይዎ፡ አንበሰበሱ፡ በቅድሜሁ፡ በፍሥሐ፨ ወይቤልዎ፡ አንተአ፡ ለከ፡ እምኀቤነ፡ ኦብእሲ፡ ዘተለዓልከ፡ እምነ፡ መሬታውያን፤ ወክብርከ፡ ፈድፋደ፡ እምኔሆሙ፡ ወእምኔነሂ፡ ትትሌዓል፡ ወክብርከሂ፡ የዓቢ፡ እምክብርነ፡ ወላሊበላሰ፡ ሰሚዖ፡ ያነክር፡ በእንተ፡ ክብርኒ፡ ዘይነቡ፡ በእንቲአሁ፡| መላእክት፡ በኀበ፡ በጽሐ፡ ሰማይ፡ ያስተዓፅቡ፤ እፎ፡ ሀለዎ፡ ይረክብ፡ ዘከመዝ፡ ክብር፡ በአይኑ፡ ገድል፡ ወበአይኑ፡ ጻማ፡ ይረክቦ፡ ብእሲ፡ ለዝንቱ፡ ስብሐት፨ ወይቤልዎ፡ እልክቱ፡ መላእክት፡ እለ፡ ውስተ፡ ሰማይ፡ ሣልስ፡ ወይዜንውዎ፡ በእንተ፡ ክብረ፡ ካልአኒሆሙ፡ ወመላእክት፡ እለ፡ ሀለው፡ ውስተ፡ ራብዕ፡ ሰማይ፨ ወዘከመ፡ ሀለዎ፡ ላሊበላ፡ ይትሌዓል፡ እምኔሆሙ፡ ምእመነ፡ እምዕልክቱ፡ ሂ፡ እለ፡ ይትሌዓሉ፡ እምኔሆሙ፡ መላእክት፡ እለ፡ ሀለው፡ ውስተ፡ ራብእ፡ ሰማይ፡ ወላሊበላሰ፡ ሰሚዖ፡ ዘንተ፡ እምእልክቱ፡ መናኅርተ፡ ቅዳሴ፡ | | ወአብሕርተ፡ ስብሐት፡ ተመልአ፡ ፍሥሐ፡ በኃይለ፡ መንፈስ፡ ቅዱስ፡ ወርእዮ፡ ስነ፡ ብርሃኖሙ፡ ዘይፈደፍድ፡ እምነ፡ ብርሃናውያን፡ ቀዳሚ፡ ወአንከረ፡ ወአኃዘ፡ ይበል፡ ባርክዎ፡ ለእግዚአብሔር፡ ኵልክሙ፡ መላእክቲሁ፡ ጽኑዓን፡ ወኃያላን፡ እለ፡ ትገብሩ፡ ቃሎ፡ ወእለ፡ ትሰምዑ፡ ቃለ፡ ነገሮ፨ መፍትው፡ ለክሙ፡ ኦእሳታውያን፡ ወመንፈሳውያን፡ ትበልዎ፡ ለከ፡ ይደሉ፡ ክብር፡ ወሰብሐት፡ ወኃይል፡ ወአኰቴት፨ ወፍርቃን፡ ወውዳሴ፡ ለዘአሠርገወክሙ፡ በዝንቱ፡ ሰርጐ፡ ዓቢይ፡ ዘኢኮነ፡ በቅድመ፡ ብርሃንክሙ፡ ከመ፡ | ቀለምፂጽ፡ እምነ፡ ፀሐይ፨ ወስነ፡ አልባሲክሙ፡ ዘአልቦ፡ ሴጥ፡ ወበእንቲአየሂ፡ ፈድፋደ፡ አእኵትዎ፡ እንዘ፡ መሬታውያን፡ ንሕነ፡ ወሐመድ፡ ዘኢኮነ፡ ድልወትየ፡ ዘከመ፡ ዕነጽሮሙ፡ ለጻድቃን፡ ሰብእ፡ ዘእምነ፡ አንጋድየ፨ እሉ፡ እሙንቱ፡ ዘርአ፡ አዳም፡ ረሰየኒ፡ ከመ፡ እርአይ፡ ክብረክሙ፡ ወስብሐቲክሙ፤ ወዘንተ፡ ሶበ፡ ይብል፡ ላሊበላ፡ ተሰጠውዎ፡ እልክቱ፡ መላእክት፡ መንፈሳውያን፡ ወይቤልዎ፡ በእንቲአነሰ፡ ወበእንተ፡ ክብርነ፡ ኢታስተአፅብ፨ ወበእንተ፡ ክብርነሂ፡ ኢታንክር፡ እስመ፡ ክብር፡ ዘዚአከ፡ የዓቢ፡ እምክብርነ፨ ወዘንተ፡ ይብልዎ፡ መላእክት፡ እለ፡ ውስተ፡

| | ራብዕ፡ ነሥአ፡ ዝኩ፡ መልአክ፡ ወአዕረጎ፡ ውስተ፡ አየረ፡ ሰማይ፡ ኃምስ፨ ወተውህጠ፡ ላሊበላ፡ በብርሃነ፡ አየረ፡ ሰማይ፡ ኃምስ፡ እስመ፡ ብርሃና፡ የዓቢ፡ እምብርሃነ፡ ኵሎን፡ ሰማያት፨ ወበእንተዝ፡ አንፈርአጸ፡ ላሊበላ፡ አቢየ፡ አንፈርአጸ፡ ዘያአቢ፡ እምኵሎን፡ ፍሥሐሁ፡ ወአንፈርአጹ፡ ዘረቦ፡ በ፬ ሰማያት፡ እለ፡ አደውን፡ እንዘ፡ ይፈደፍድ፡ ስብሐቶ፡ ለእግዚአብሔር፤ በእንተ፡ ዘርእየ፡ ክብረ፡ ወስብሐተ፡ ለለሰማዩ፡ ወመላእክትኒ፡ እለ፡ የኃድሩ፡ ውስቴቶን፡ ዘየዓቢ፡ ክብረ፡ ካልዑ፡ እምካልኡ፨ ወአመሰ፡ በጽሐ፡ ውስተ፡ አየረ፡ ሰማይ፡ ኃምስ፨ ተመልኣ፡ ፍሥሐ፡ ዐቢየ፡| እስመ፡ ኵሎን፡ ሰማያት፡ እለ፡ ኃለፈ፡ ዲቤሆን፡ የዓቢ፡ ብርሃን፡ በህየ፡ ወአኃዘ፡ ይብል፡ ወየሐሊ፡ ጥቀ፡ ፍቁር፡ አብያቲከ፡ እግዚአ፡ ኃያላን፨ ተፈሥሐት፡ ነፍስየ፡ በአፍቅሮ፡ አዕፃዲከ፡ እግዚኦ፡ ነፍሰየኒ፡ ወሥጋየኒ፡ በእግዚአብሔር፡ ሕያው፨ ብፁዓን፡ ለእለ፡ ይትረአዩ፡ ውስተ፡ ጸዖተ፡ ስብሐቲሁ፡ ለለጌሠሙ፨ እንዘ፡ የሐልዩ፡ ወያደምፁ፨ ስብሐተ፡ ዘኢያፀግብ፡ ጣዕሙ፡ አማን፡ ውእቱ፡ ዘይቤ፡ ዳዊት፡ ነቢይ፡ በመዝሙር፡ እስመ፡ ይኄይስ፡ አሐቲ፡ ዕለት፡ ውስተ፡ አዕጻዲከ፡ እምአዕላፍ፤ ወበእንተዝ፡ አብደርኩ፡ እትገደፍ፡ ውስተ፡ | | ቤተ፡ ከ፡ በከመ፡ ይቤ፡ ላሊሁ፨ አብደርኩ፡ እትገደፍ፡ ውስተ፡ ቤተ፡ እግዚአብሔር፡ እምእንበር፡ ውስተ፡ ቤተ፡ ኃጥአን፡ እስመ፡ ትኄይስ፡ አሐቲ፡ ዕለት፡ ውስተ፡ አዕጻዲከ፡ እምአእላፍ፨ ወአነሂ፡ ዕብል፡ ከማሁ፡ አሐተ፡ ሰአልክዎ፡ ለእግዚአብሔር፡ ወኪያሃ፡ ኣኃሥሥ፨ ከመ፡ እኅድር፡ ቤቶ፡ ለእግዚአብሔር፡ በኵሉ፡ መዋዕለ፡ ሕይወትየ፡ ወከመ፡ ያርእየኒ፡ ዘያሰምሮ፡ ለእግዚአብሔር፡ ወከመ፡ ዕፀመድ፡ ውስተ፡ ቤተ፡ መቅደሱ፨ ወተሰጥዎ፡ ዝኩ፡ መልአክ፡ ወይቤሎ፡ ላሊበላ፡ እፎ፡ እንከርከ፡ ልብከ፡ እስመ፡ ኃይለከ፡ ወትቤ፡ በመዝሙረ፡ | ዳዊት፨ ጥቀ፡ ፍቁር፡ አብያቲከ፡ እግዚኦ፡ እግዚኦ፡ ኃያላን፡ ተፈሥሐት፡ ነፍስየ፡ በአፍቅሮ፡ አዕጻዲከ፨ ፈድፋደ፡ አስተፍሥሐከ፡ ብርሃነ፡ ዘንተ፡ አየረ፡ ሰማይ፡ ኃምስ፨ ወአውሥአ፡ ላሊበላ፡ ለውእቱ፡ መልአክ፡ ወይቤሎ፡ አማን፡ ተፈሣሕኩ፡ በዝንቱ፡ ብርሃን፡ ዐቢይ፡ ፍሥሐ፡ ዘአልቦ፨ መስፈርት፡ ወይቤሎ፡ ውእቱኒ፡ መልአክ፡ ለላሊበላ፡ መፍትው፡ ትትፈሣሕ፡ እስመ፡ ኮንከ፡ ከመ፡ ይትፈልስ፡ እምክብር፡ ውስተ፡ ክብር፡ ወእምፍሥሐ፡ ውስተ፡ ፍሥሐ፡ ወእምብዕል፡ ውስተ፡ ብዕል፨ እስመ፡ አምዓረገ፡ እምድር፡ ወአደውከ፡ አየረ፡ ሰማየ፡

| | ቀዳሚት፡ ኢረከብከ፡ ሐዘን፡ እንበለ፡ ፍሥሐ፡ አኮ፡ ዘ፩ ኅብሩ፡ አላ፡ እንበለ፡ ይትዌሰክ፡ ፍሥሐ፡ በዲበ፡ ፍሥሐ፨ ወይእዜኒ፡ ሶበ፡ በጻሕከ፡ ውስተ፡ አየረ፡ ሰማይ፡ ኃምስ፨ ተፈሣሕከ፡ ሶበ፡ ርኢከ፡ ብርሃኖሙ፡ እፎኬ፡ ትትፌሣሕ፡ ሶበ፡ ሰማዕከ፡ ድምጸ፡ ስብሐቶሙ፡ ለመላእክት፡ ውስተ፡ ሰማይ፡ ኃምስ፨ ወዘንተ፡ እንዘ፡ ይብሎ፡ አብጽሖ፡ ውእቱ፡ መልአክ፡ ውስተ፡ ሰማይ፡ ኃምስ፨ ወእምዝ፡ አንጐድጐደ፡ ደምፀ፡ ሰብሐቶሙ፡ ለመላእክት፡ እለ፡ ይነብሩ፡ ህየ፨ እንዘ፡ ይብል፡ ወይሄልያ፨ በአጽምዖ፡ ላሊበላሰ፡ ሰክረ፡ እምድምፀ፡ ስብሐቶሙ፡ ዘሰምዓ፡ ወወሰከ፡| እምድምፀ፡ ሰብሐት፡ ዘውስተ፡ ኃምስ፨ ሰማይ፡ ወእንዘ፡ ያነክር፡ ላሊበላ፡ አስተርአይዎ፡ ብርሃናውያን፡ እለ፡ ህየ፡ ወአንበሰበሰ፡ ብርሃኖሙ፡ በቅድሜሁ፡ ከመ፡ እንተ፡ ያንበሰብሰ፡ ደመና፡ በውሰተ፡ ነፋስ፡ ወጸርሑ፡ ኵሎሙ፡ እንዘ፡ ይብሉ፡ ሰላም፡ ለከ፡ ኦብእሲ፡ መካህ፡ ዘሐፀነቶ፡ ጥበብ፡ እንዘ፡ ትሴስዮ፡ እምኑኃ፡ ወታፈደፍድ፡ ክብረ፡ እምክብረ፡ መላእክት፨ ወይእዜኒ፡ ተ/ፈ/ሣሕ፡ ኦብእሲ፡ በዓፀደ፡ ትጉሃን፡ ዘአልቦ፡ በውስቴታ፡ ሕማመ፡ ጠባይዕ፡ ወኢህሊና፡ ሥጋ፡ ወኢአፍቅሮ፡ ድቃስ፡ ወኢፈቲወ፡ ንዋም፨ ተፈሣሕኬ፡ በዝየ፡ በኀበ፡ አልቦ፡ ረኃብ፡ | | ወጽምዕ፡ እስመ፡ ነበበ፡ ስብሐተ፡ ዘመላእክት፡ ሲሳየነ፡ ወስቴነ፤ ኀበ፡ አልቦ፡ ጽልመት፡ እንበለ፡ ብርሃን፡ አንሶሱ፡ በፍሥሐ፡ ውስተዝ፡ መካን፤ እስመ፡ ክፍልከ፡ ዘከመዝ፡ ሥልጣን፡ ዘኵሎ፡ ይእኅዝ፡ ተፈሥሐ፡ ምስሌከ፡ እስከ፡ ተዓርግ፡ ዘየዓቢ፡ እምዝ፡ ወላሊበላሰ፡ ያነክር፡ በፍሥሐ፡ ግርማሆሙ። ወስነ፡ አልባሲሆሙ፡ ወፀዳለ፡ ብርሃኖሙ፤ ወስነ፡ አክሊላቲሆሙ፡ ዘይፀዓዱ፡ እምበረድ፡ ዘይበርህ፡ እመባርቅት፨ ወተመሰጠ፡ ዓዲ፡ በክነፈ፡ ዝኩ፡ መልአክ፡ እምድኅረ፡ ተፈሥሐ፡ ምስለ፡ መላእክት፡ እለ፡ ውስተ፡| ኃምስ፡ ሰማይ፤ ወበጽሐ፡ ውስተ፡ አየረ፡ ሰማይ፡ ሳድስ፡ ወርእየ፡ በህየ፡ ብርሃነ፡ ዘየዓቢ፡ እምብርሃነ፡ አየረ፡ ሰማይ፡ ኃምስ፨ ወተፈሥሐ፡ ፍሥሐ፡ ዘኢይከውኖ፡ ለእጓለ፡ እመሕያው፡ ይረክብ፡ ፍሥሐ፡ ዘከመዝ፨ ወእምዝ፡ ተለዐለ፡ ውስተ፡ ሳድሰ፡ ሰማይ፨ ወሰምዓ፡ ጕሕና፡ ሰብሐት፡ ወርእየ፡ ክብሮሙ፡ ለመላእክት፡ እለ፡ ይነብሩ፡ ህየ፨ ወክብሮሙ፡ ወስብሐቶሙ፡ የዓቢ፡ እምክብረ፡ መላእክት፡ ዘውስተ፡ ሰማይ፡ ኃምስ፡ ወይቤል/ዎ/፡ እልክቱኒ፡ በከመ፡ ይቤልዎ፡ ቀዳማውያን፡ ወአምሕዎ፡ በፍሥሐ፡ በከመ፡ አምኅዎ፡ እለ፡ ኃለፉ፡ ወየደው፡

| | ዘአርብ፡ ወእምዝ፡ መሰጦ፡ ዝኩ፡ መልአክ፡ ለላሊበላ፡ ወአብጽሐ፡ ውስተ፡ አየረ፡ ሰማይ፡ ሳብእ። ወርእየ፡ ላሊበላ፡ ብርሃነ፡ ውስተ፡ አየር፡ ዘኢርእየ፡ በኀበ፡ ኃምስቱ፡ ሰማያት፡ ወበዝኃ፡ አንክሮቱ፡ ለላሊበላ፡ ወይቤ፡ ባርክዎ፡ ሰማያት፡ ለእግዚአብሔር፡ ለዘ፡ ሰቀሎሙ፡ ከመ፡ ቀመር፡ ወከለሎሙ፡ በብርሃን፡ ዘኢይሄለይ፡ ውስተ፡ ልበ፡ ሰብእ፡ erased ወእምሕሊና፡ ሰብእ፡ ወአኃዘ፡ ውእቱኒ፡ ይከልሕ፡ ወይብል፡ በአስተብፅዖ፡ በእንተ፡ እለ፡ ይነብሩ፡ ውስተ፡ ሰማይ፡ ሳብእ፡ ወይቤ፡ ብፁዓን፡ ኵሎሙ፡ እለ፡ ይነብሩ፡ ውስተ፡ ቤትከ፡ ወለዓለመ፡ ዓለም፡ | ይሴብሑከ፨ ብፁዕ፡ ብእሲ፡ ዘእምኀቤከ፡ ረድኤቱ፡ እግዚኦ፨ ወዘይሄሊ፡ በልቡ፡ ዘበላዕሉ፡ ወላሊበላሰ፡ ቅውም፡ በማዕከለ፡ ሞገደ፡ ሰብእ፡ በአየረ፡ ሰማይ፡ ሳብዕ፡ እመሰመ፡ ደምፅ፡ ዘታሕቱሂ፡ ዘይትፌኖ፡ እምኀበ፡ መላእክት፡ እለ፡ ይነብሩ፡ ውስተ፡ ሰማይ፨ በህ/የ/፡ ይሰማዕ፡ ድምፀ፡ ነጐድጓድ፡ ስብሐቶሙ፡ እንዘ፡ የዓርግ፡ ምስለ፡ ጣዕመ፡ መዓዛ፡ ሠናይ፡ ውስተ፡ ማኅደረ፡ ቅድሳቱ፡ ለትስልሥተ፡ አዶናይ፤ ወላዕሉሂ፡ ድምፀ፡ ስብሐት፡ ዝውእቱ፡ እምኃሆሙ፡ ለመላእክት፡ ለእለ፡ ይነብሩ፡ ውስተ፡ ሰማይ፡ ሳብእ፡ | | ይደምፅ፡ በህየ፡ ዘየዓቢ፡ እምእልፍ፡ ድምፀ፡ ነጐድጓድ፨ ወላሊበላ፡ ሰ፡ ያደምም፡ ሰሚዖ፡ ድምፀ፡ ስብሐቶሙ፡ ዘበታሕቱ፡ ሂ፡ እንዘ፡ የዓርግ፡ ዘበላዕሉሂ፡ እንዘ፡ ያንጐደጉድ፡ ወድምፁሂ፡ ወጣዕሙሂ፡ ይሤኒ፡ እምስብሐተ፡ ኵሎሙ፡ ሰማያት፡ ፯ እለ፡ አዕደዎሙ፡ ላሊበላ፡ ወበእንተ፡ ውእቱ፡ ድምፀ፡ ሰብሐት፡ ዘያዓውዶ፡ ከመ፡ እንተ፡ ደመና፡ ምስለ፡ ግዕዘ፡ ጣዕሞ፡ ዐቢይ፡ ወምስለ፡ መዓዛ፡ ሠናይ፡ ወአልቦ፡ ዘይትኤረዮ፡ ለመዓዛሁ። ወላሊበላሰ፡ ተውኅጠ፡ አፍአሁ፡ ወውስጡ፡ በብርሃነ፡ ፍሥሐ፡ ወበስብሐት፡ | ዘላዕሉ፡ ወዘታሕቱ፡ እስመ፡ በህየ፡ ተስምዓ፡ ድምፀ፡ ፍሥሐ፡ ዘየዐቢ፡ እምኵሉ፡ ፍሥሐ፡ ዘረከበቶን፡ እንዘ፡ የዓውድዎን፡ ለ፯ ሰማያት፡ ኵሎን፨ ወዝኵሰ፡ መልአክ፡ ብርሃናዊ፡ ዘይመርሖ፡ ለላሊበላ፡ ሶበ፡ ርእዮ፡ እንዘ፡ ይደመም፡ በአንክሮ፡ ዐቢይ፤ ወይቤሎ፡ ምንተኑ፡ ታነክር፡ ወታስተአፅብ፡ ርኢኩከ፡ ከመዝ፨ አመ፡ ተአድዎን፡ ለ፯ ሰማያት፤ ወይእዜሰ፡ እሬእየከ፡ በዐቢይ፡ አንክሮ፡ እንዘ፡ ታስተኤድም፡ ብርሃኖሙ፡ ለ፯ ሰማያት፡ ሳብዕ፨ ወድምፀ፡ ስብሐትኒ፡ ዘይሰማዕ፡ በዝየ፨ ወተስጠዎ፡ ላሊበላ፡ ለውእቱ፡ መልአክ፡ ወይቤሎ፡ ኦእግዚእየ፡

| | ሀለውኩ፡ አማን፨ በአንክሮ፡ ዐቢይ፡ በእንተ፡ ዝንቱ፡ ብርሃነ፡ አየር፤ ወበእንተ፡ ድምፀ፡ ስብሐት፡ ዘይሰማዕ፡ በውስቴቱ፡ እስመ፡ ኢርኢኩ፡ ዘከመዝ፡ ብርሃን፡ እምአመ፡ አዕረጉ፡ እምድር፡ ውስተ፡ ሰማይ፨ ኢርኢኩ፡ ዘከመዝ፡ በውስተ፡ ኵሎን፡ አየራት። ወኢሰማዕኩ፡ ዓዲ፡ ዘከመዝ፡ ስብሐታት፡ ዘይኄይል፡ ድምፁ፡ ወእምድምፀ፡ አዕላፍ፡ ነጐድጓድ፡ ወበእንተ፡ ዝንቱ፡ አንከርኩ፡ ፈድፋደ፡ እመከራ፡ ዘረ/ከ/በኒ፡ በውስተ፡ ኵሎን፡ አየራት፡ ወበኵሎን፡ ሰማያት፡ ወቀዲሙሰ፡ ሶበ፡ አዕረጉ፡ ውስተ፡ አየረ፡ ሰማይ፡ ቀዳሚት፡ አዲዎን፡ ምጽንዓ፡ ኀበ፡ ይነብሩ፡ መፍርሃን፡ ገጽ፨ ወርኢኩ፡ ብርሃነ፡ በህየ፡ | ምሰሌነ፡ ዘኢረከብኩ፡ ዘከማሁ፡ ብርሃን፡ ወዘከማሁ፡ ፍሥሐ፨ ወሶበ፡ አዕረግነ፡ ውስተ፡ ሰማይ፡ በቀዳሚት፡ ረከብኩ፡ ብርሃን፡ ዘየዓቢ፡ እምብርሃነ፡ አየር፡ ወእምብርሃነ፡ መላእክትኒ፡ ዘውስቴታ፡ ዘይጸድል፡ ምስብዒተ፡ እምፀሐይ፡ ዘንተ፡ ሶበ፡ ርኢኩ፡ ተፈሣሕኩ፡ ዘኢተፈሣሕኩ፡ ዘከማሁ፡ ፍሥሐ። እምአመ፡ ተወለድኩ፡ እስከ፡ አሜሃ። ወመሰለኒ፡ ዘአልቦ፡ ዘይመክሮሙ፡ ወዘአልቦ፡ ዘከማሁ፡ ብርሃን፡ ዘእሬኢ፨ ወይቤሉኒ፡ እልክቱ፡ መላእክት፡ ኢታንክር፡ በእንተ፡ ክብርነ፡ እስመ፡ ይትሌዓሉነ፡ ሀለው፡ ወዘንተ፡ ሰሚዕየ፡ አንከርኩ፡ ወእቤ፡ | | እፎኬ፡ ይመስል፡ ብርሃን፡ ዘይፈደፍድ፡ እምዝ፨ ወሶበ፡ አዕረግነ፡ ካዕበ፡ ውስተ፡ አየረ፡ ሰማይ፤ ቀዳሚት፡ ርኢከ፡ በህየ፡ ብርሃነ፡ ዘየዓቢ፡ እምብርሃን፡ አየረ፡ ሰማይ። ቀዳሚት፡ ወክብረ፡ መላእክትኒ፡ ያዓቢ፡ እምክብረ፡ መላእክት፡ ዘህየ፨ ወተፈሣሕኩ፡ በብርሃኖሙ፡ እምድምፀ፡ ስብሐቶሙ፡ ወበህየኒ፡ መሰለኒ፡ ዘኢ/ይ/ረከብ፡ ዘከማሁኒ፤ ወእምዝ፡ ይቤሉኒ፡ እልክቱኒ፡ መላእክት፡ ዘደግም፡ ሰማይ፨ በከመ፡ ይቤሉኒ፡ ቀዳማውያን፡ ወዜነውኒ፡ በእንተ፡ ክብረ፡ መላእክት፡ ዘውስተ፡ ሣልስ፡ ሰማይ፤ ወበህየኒ፡ ርኢኩ፡ በከመ፡ ይቤሉኒ፡ ክብሮሙኒ፡| ወስብሐቶሙኒ፨ ወእልክቱኒ፡ ሰበኩኒ፡ ሊተ፡ በእንተ፡ ክብሮሙ፡ ለመ/ላ/እክት፡ እለ፡ ውስተ፡ ራብአይ፨ ወእልክቱኒ፡ ካዕበ፡ ነገሩኒ፡ ክብረ፡ ካልአኒሆሙ፡ መላእክት፡ ለእለ፡ የኃድሩ፡ ውስተ፡ ኃምሰ፡ ሰማይ፨ ወረከብኩ፡ በህየ፡ በከመ፡ ዜነውኒ፡ እሙንቱኒ፡ ወእምዝ፡ ዓርግነ፡ ውስተ፡ ሰማይ፡ ሳድሰ፨ ወርኢኩ፡ ብርሃነ፡ ዘያዓቢ፡ እምብርሃነ፡ ኵሎን፡ ሰማያት፡ ፭ቱ፡ ወክብረ፡ መላእክትኒ፡ ርኢኩ፡ ዘውስተ፡ ሰማይ፡ ፯ ዘያዓቢ፡ እምክብረ፡ ካልአኒሆሙ፨ ወእምህየኒ፡ አዕረግነ፡ ሰሚአነ፡ ክብረ፡ ዝንቱ፡ ሰማይ፡ ሳብዕ፡ ወነዋ፡ ንቀውም፡ ውስተ፡ አየራሁ፡ ወተፈሣሕነ፡

| | በሰሚዓ፡ ድምፀ፡ ስብሐት፡ ዘይደምፅ፡ በዝየ፨ ወበእንተ፡ ዝንቱ፡ ፈድፋደ፡ አነክር፡ ወአስተአፅብ፡ በተደምሞ፡ ዐቢይ፡ ወዘንተ፡ ብሂሎ፡ አርመመ፡ ላሊበላ፡ ወተሰጥዎ፡ ዝኩኒ፡ መልአክ፡ ጽድቅ፡ ብርሃናዊ። ወይቤሎ፡ እሙንቱ፡ ትቤ፡ አልቦ፡ ዘረከብከ፡ እምአዕረጉከ፡ እምድር፡ ወአብጻሕኩከ፡ እስከ፡ ዝየ፨ ወከመዝ፡ ብርሃን፡ ዘአየር፡ እስመ፡ ዘይትዌሰክ፡ ብርሃን፡ ዲበ፡ ብርሃን፡ እስከ፡ ዘበጻሕከ፡ ዝየ፨ ወብርሃነ፡ አየርኒ፡ የዓቢ፡ እምብርሃነ፡ ሰማይ፡ ካልዕ፡ ወብርሃነ፡ መላእክት፡ የዓቢ፡ እምብርሃነ፡ ካልአኒሆሙ፡ መላእክት፨ ወዝንቱሰ፡ አየረ፡ ብርሃን፡ ዘትሬኢ፡ ተፍጻሚቶን፡ | ለኵሎን፡ አየራት፨ ወበእንተ፡ ዝንቱ፡ የዓቢ፡ ትወሰክ፡ ብርሃና፡ እምኵሎን፡ አየራት፡ ወለከሂ፨ መፍትው፡ ለከ፡ ትትፌሣሕ፡ ፈድፋደ፡ በዝየ፨ ነጺረከ፡ ዘንተ፡ አየረ፡ ብርሃን፡ እስከ፡ ትትፌሣሕ፡ ዘየዓቢ፡ ፍሥሐ፡ ሶበ፡ ትኔጽር፡ ክብረ፡ መላእክት፡ ዘውስተ፡ ሳብዕ፡ ሰማይ፨ ሶበ፡ ተዓርግ፡ ኀቤሆሙ፡ ወትሬእዮሙ፡ እስመ፡ እምክብረ፡ ኵሎሙ፡ መላእክት። ዘርኢከ፡ የዓቢ፡ ክብሮሙ፡ ወድምፀ፡ ስብሐቶሙ፡ የዓቢ፡ እምድምፀ፡ ስብሐት፡ ዘ/ሰ/ማዕከ፡ እስመ፡ ሰብሐተ፡ ኵሎሙ፡ መላእክት፡ ይትኤለድ፡ በህየ፨ ወእንዘ፡ የዓርግ፡ ውስተ፡ ጽርኃ፡ | | ቅድሳቱ፡ ለልዑል፨ ወዘንተ፡ ብሂሎ፡ አዕረጎ፡ ዝኩ፡ መልአክ፡ መንፈሳዊ፡ ውስተ፡ ሳብዕ፡ ሰማይ፤ እንዘ፡ ይትፌሣሕ፡ በፍሥሐ፡ ዐቢይ፡ ወአዘዘ፡ እንዘ፡ ይብሎ፡ ለላሊበላ፡ ተፈሣሕ፡ ኦብእሲ፡ ክቡር፡ ምሉአ፡ ጸጋ፡ ዘተመገሰ፡ እምኵሉ፡ ሀብት፡ ሰማያዊተ፨ እስመ፡ ናሁ፡ በጻሕከ፡ ውስተ፡ ሰማይ፡ ሳብዕ፡ ዘየዓቢ፡ ክብሩ፡ እምክብረ፡ ኵሎሙ፡ መላእክት፡ ሰማያት፨ እስመ፡ ዝየ፡ ውእቱ፡ ምዕላደ፡ ኵሎሙ፡ መላእክት፡ ስብሐታት፨ ወዘንተ፡ እንዘ፡ ይብሎ፡ ውእቱ፡ መልአክ፡ ለላሊበላ፡ እንዘ፡ ይነግሮ፡ ነገረ፡ ፍሥሐ፡ ርእየ፡ ላሊበላ፡ ባሕረ፡ ብርሃን፡ እንዘ፡| ያመአብል፡ ወይጸአቅ፡ በላዕለ፡ ሰማይ፡ ሳብዕ፨ ወእንዘ፡ ይትጓዳዕ፡ ብርሃን፡ ምስለ፡ ብርሃን፡ አንከረ፡ ላሊበላ፡ ርእዮ፡ ዘንተ፡ ብርሃነ፡ ዘርእየ፡ በኀበ፡ ኵሎሙ፡ ሰማያት፨ ወእንዘ፡ ዘንተ፡ ያስተአፅብ፡ አስተርአይዎ፡ ግብተ፡ ጠባይዓ፡ እሳት፨ እለ፡ የኃድሩ፡ ውስተ፡ ሰማይ፡ ሳብዕ፡ ወብርሃኖሙኒ፤ ወስብሐቲሆሙኒ፡ እምብርሃኖሙ፡ ለመላእክት፡ ወአክሊላቲሆሙ፡ ይበርህ፡ አክሊላተ፡ እልክቱ፨ ወይቤልዎ፡ በሐከ፡ ኦብእሲ፡ አምላክ፡ ዘአብጠልከ፡ እምነ፡ ግዕዘ፡ ሰብእ፡ ወሜጥከ፡ ሕሊናከ፡ ውስተ፡ ሕሊና፡ ሰማያውያን፤ ወኮንከ፡ ልዑለ፡ እምግብረ፡ አብያጺከ፡ ደቂቀ፡ አዳም፡

| | ወበእንተ፡ ዝንቱ፡ ውስተ፡ ዘየዓቢ፡ ማኅደርከ፨ ኅድግሰ፡ እምኔሆሙ፡ ወእምኔነሂ፡ ይትሌዓል፡ ክብርከ፡ በኵሉ፡ ፍናዊከ፡ ወበኵሉ፡ ገጽ፡ እስመ፡ በሉዓሌ፡ ተኃድር፨ ውስተ፡ ውሳጤ፡ መንጦላዕት፡ ኀበ፡ ቦአ፡ ኢየሱስ፡ በኵረ፡ አብ፡ ዘእምቅድመ፡ ዓለም፡ ወበኵረ፡ ድንግል፡ በደኃሪ፡ መዋዕል፡ ዘተወልደ፡ በመንክር፡ ልደት፡ ተመሲሎ፡ ኪያክሙ፡ በእንተ፡ ዝንቱ፡ የዓቢ፡ ማኅደሪክሙ፡ ለጻድቃን፡ እምነ፡ መላእክት፡ እለ፡ እምታሕቴነ፨ ወእምኔነ፡ ወእምነ፡ ይትዓሌዓሉነ፡ ወእምነ፡ ኪሩቤል፡ ወሱራፌል፨ ወእልክቱሂ፡ ጻድቃን፡ ተወልቲዎሙ፡ በይእቲ፡ ሥጋ፡ የዓርጉ፡| መልዕልተ፡ ኪሩቤል፡ ወሱራፌል፡ ኀበ፡ ሀለወ፡ እግዚኦሙ፡ ዘተሰመዩ፡ አቡሆሙ፤ በከመ፡ ይቤ፡ ለሊሁ፡ ዘተወክፈ፡ ምስሌሆሙ፡ ሥጋ፡ ወደመ፡ አጽመ፡ ወጸጉረ፡ ወአስራወ፡ በእንተ፡ ዝንቱ፡ ዕብለክሙ፡ ኦኃውየ፡ እስመ፡ ነሣእኩ፡ ዘዚአክሙ፡ ከመ፡ አሀብክሙ፡ ዘዚአየ፨ ወኀበ፡ ሀለውኩ፡ አነ፡ ህየ፡ ይሄሉ፡ ዘይትለአከኒ፡ ኢሰማዕከኑ፤ እንዘ፡ /ይ/ነግር፡ ዕበየ፡ ልዕልናክሙ፡ ጳውሎስ፡ ዘከመ፡ ትትሌዓሉ፡ እምኔነ፡ ወይብል፡ እስመ፡ አኮ፡ /እ/መላእክት፡ ዘተወክፈ፡ አላ፡ /እም/ዘርአ፡ አብርሃም፡ አልአለ፨ ምንትኑ፡ ልዕልና፡ ዘርአ፡ አብርሃም፡ አኮኑ፡ ዘርኡኒ፡ ለአብርሃም፡ | | ክርስቶስ፡ ወክርስቶስኒ፡ አኮ፡ ነበረ፡ በየማነ፡ አብ፨ መልዕልተ፡ ኵሎሙ፡ መላእክት፡ ወሊቃነ፡ መላእክት፤ አኮኑ፡ አንትሙሂ፡ ትሴፈው፡ ከመ፡ ተሀልው፡ ኀበ፡ ሀለወ፡ ውእቱ፡ በከመ፡ ይቤለክሙ፡ ለሊሁ፡ አነ፡ እሁበክሙ፡ ከመ፡ ትብልዑ፡ ወትሰትዩ፡ ምስሌየ፡ በውስተ፡ ማኅደርየ፡ በመንግሥቱ፡ ለአቡየ፨ ወእመሰኬ፡ አስፈወክሙ፡ ውእቱ፡ ከመ፡ ተሀልው፡ ኀበ፡ ሀለወ፡ አእምሩ፡ በዝንቱ፡ ከመ፡ ትትሌዓሉ፡ እምኔነ፨ ወንሕነሰ፡ ኢንክል፡ አሪጉ፡ መልዕልተ፡ ኪሩቤል፡ ኀበ፡ ሀለወ፡ ሥጋ፡ ዚአክሙ፡ ዘለብሰ፡ ፈጣሬ፡| ውዳሴ፡ ዚአክሙ፡ ወኵልነ፡ መላእክት፨ አንትሙሰ፡ ትክሉ። ዓሪገ፡ መላእክት፡ ኪሩቤል፡ ኀበ፡ ሀለወ፡ ሥጋክሙ፡ ለባሴ፡ ከመ፡ ትርፍቁ፡ ምስሌሁ፡ እስመ፡ ኢይትሄሱ፡ ቃሎ፡ ዘተብህለ፡ እምውሉድ፡ ለኀበ፡ አበ፡ ኵሎሙ፡ እለ፡ የአምኑ፡ ብየ፡ ይኩኑ፡ ብየ፡ ምስሌየ፡ ከመ፡ ፩ንሕነ፡ በከመ፡ አንትሙ፡ ብየ፡ ምስሌየ፡ ወአነሂ፡ ብክሙ፡ ምስሌክሙ፡ እሙንቱሂ፡ ይኩኑ፡ አሐደ፡ ከማነ፡ ከመ፡ ፩ዱ፡ ንሕነ፡ ከመ፡ የአምር፡ ዓለም። ከመ፡ አንተ፡ ፈነውከኒ፡ ወእፈቅድ፡ ወከመ፡ ይርአዩ፡ ስብሐትየ፡ ዘወሀብከኒ፡ ዘሀሎ፡ ምስሌከ፡ እምቅድመ፡ ይትፈጠር፡ ዓለም፨ እስመ፡ አነሂ፡

| | ፯ አፍቀርክዎሙ፡ በከመ፡ አንተ፡ አፍቀርከኒ፨ ዝንቱ፡ ቃል፡ ዘየዓርገክሙ፡ መልዕልተ፡ ኪሩቤል፡ ወሱራፌል፡ ኀበ፡ ሀለወ፡ ለባሴ፡ ሥጋክሙ፡ ወዐቃሜ፡ ኪዳነ፡ ምስሌክሙ፡ ዘተካየድክሙ፡ ለእለ፡ ትፈቅዱ፡ ፈቃዶ፡ ከመ፡ ተሀልው፡ ኀበ፡ ሀለወ፡ ወከመ፡ ትነብሩ፡ ኀበ፡ ነበረ፨ ወሶበሂ፡ ትነሥእ፡ እምአፈ፡ ጳውሎስ፡ እንዘ፡ ይብል፡ እስመ፤ አኮ፡ መላእክተ፡ ተወክፈ፡ ኢይመሰልከ፡ ዘመነነ፡ ርኢ፤ ዘከመ፡ ገብረ፡ ፈጣሪነ፡ በዘከመዝ፡ ሱራሒ፡ ስነ፨ ወበዘከመዝ፡ ጸዳለ፡ ብርሃን፡ ዘኢይትሄለይ፡ ክብሩ፨ ወዘንተሰ፡ ዘይቤ፡ ጳውሎስ፡ አኮ፡ በእንተ፡| መንኖትነ፡ አላ፡ በእንተ፡ እስመ፡ ሀለው፡ እለ፡ ይቤልዋ፡ ለማርያም፡ ወረደት፡ እምኃይላ፡ ት፡ ወኢኮነት፡ እምዘርአ፡ አዳም፨ ዘንተኬ፡ ሕሊናሆሙ፡ ያብጥል፡ እስመ፡ አኮ፡ መላእክተ፡ ተወክፈ፡ አላ፡ ዘርአ፡ አብርሃም፡ ዓልአለ፡ እስመ፡ እምዘርአ፡ አብርሃም፡ ይእቲ፡ ማርያም። ወዘንተ፡ እንዘ፡ ይብልዎ፡ በረቀ፡ ቅድሜሁ፡ አርአያ፡ ስብሐቲሁ፡ ለእግዚአብሔር፡ ዘዲበ፡ ኪሩቤል፡ ወሱራፌል፤ ወነበልባለ፡ ብርሃን፡ ዘለንጳሰ፨ ወአርአያሆሙኒ፡ ለእልክቱ፡ ኪሩባውያን፡ ግሩም፡ ፈድፋደ፡ ወያድነግፅ፡ ቦሙ፡ ሰረገላ፡ መትሕቴሆሙ፡ | | ዘይሰመይ፡ ጌርጌላ፡ ዘይጸውሮሙ፤ ምስለ፡ ኃይል፡ ዓቢይ፡ በኀበ፡ ሖሩ፡ የሐውር፡ ርቱዓ፡ ከመ፡ መ/ን/ኰራኩር፡ ቦሙ፡ ክንፍ፡ ዘእሳት፡ በበ፮ በ፪ ይከድኑ፡ ገጾሙ፡ ወበ፪ ይከድኑ፡ እግሮሙ፡ ወበ፪ ክነፊሆሙ፡ ይሰርሩ፡ ኀበ፡ ዘፈቀደ፡ ዘይጼዓን፡ ዲቤሆሙ፤ እግዚአ፡ ኃያላን፡ ስሙ፡ እንዘ፡ ይጸውሩ፡ ሰረገላ፡ ዘነድ፨ ዘቦ፬ ማዕዘ/ን/፡ ወሎሙኒ፡ ቦሙ፡ ፬ ገጽ፡ ለለ፩ እምኔሆሙ። ወመልዕልቴሆሙኒ፡ ለእሙንቱ፡ ኪሩባውያን፡ ሰማይ፡ ሰፋሕ፡ ዘኅብረ፡ በረድ፨ ወዘይነብር፡ ይመሰል፡ ኅብሩ፡ ከመ፡ ዕንቈ፡ ኢያስጲድ፡ ወሰርዲዎን፡ ወይወጽእ፡ እምውእቱ፡ ሰረገላ፡ ቃል፡ ዓቢይ፡ ከመ፡ | ቃለ፡ ማይ፡ ብዙኅ፨ ወከመ፡ ቃለ፡ ነጐድጓድ፡ ጽኑዕ፡ ወይወጽእ፡ ከመ፡ ንጥረ፡ መብረቅ፡ መፍርህ፡ ወመደንግፅ፡ ወጻአዕ፡ ወግሩም፤ ወዘንተ፡ ርእዮ፡ ላሊበላ፡ ወድቀ፡ በገጹ፡ እስመ፡ ኢይክል፡ ተዓግሦ፡ እምአርአያ፡ ስብሐቲሁ፡ ለእግዚአብሔር፤ ወመጽአ፡ ቃል፡ እመልዕልተ፡ ኪሩቤል፡ ዘይብል፡ ይትነሣእ፡ ላሊበላ፡ ወመጽአ፡ ፩ እምሱራፌል፡ ወአንሥኦ፡ ወይቤሎ፡ ቁም፡ አጽንዕ፡ ልበከ፡ ኦብእሲ፡ ኦዘሰሐበተከ፡ ኃብለ፡ ጥበብ፡ በፍቅራ፡ ወአብጽሐተከ፡ እስከ፡ ነጽሮ፡ ዝንቱ፡ ምሥጢር፡ ከመ፡ ትነጽር፡ ኅቡአቶን፡ ለኵሎን፡ ሰማያት፡ ወክብረ፡ እልክቱኒ፡ መላእክት፡ እለ፡ ሀለው፡

| | በበሰማዩ፡ እንዘ፡ ይትዌሰክ፡ ክብረ፡ ፬፡ እም፩ እስመ፡ በጻሕከ፡ ዝየ፡ ወርኢከ፡ አርአያ፡ ስብሐቲሁ፡ ለእግዚአብሔር፤ ወክብረ፡ እልክቱኒ፡ ኪሩባውያን፨ወእምድኅረ፡ አንብቦ፡ ዝኩ፡ ሱራፌል፡ መጽአ፡ ቃል፡ እመልዕልተ፡ ሰማይ፡ ዘኅብረ፡ በረድ፨ ወይቤሎ፡ ለላሊበላ፡ ናሁ፡ አዕተትኩ፡ ፍርሃተ፡ እምኔከ፡ ወአንብር፡ ልበከ፡ ውስተ፡ ኵሉ፡ ዘእነግረከ፤ ወናሁ፡ ርኢከ፡ ምሥጢራተ፡ ሰማይ፤ ወክብሮሙ፡ ለመላእክት፡ ወድምፀ፡ ስብሐቶሙኒ፨ ወሥመር፡ በቅድሜየ፡ ወኵን፡ ንጹሐ፡ ወትጉሃ፡ ከመ፡ ትንሣእ፡ ሜላተ፡ ብርሃን፡ ንጹሐ፡ ዘየዐቢ፡ ብርሃኑ፡ እምኵሎሙ፡ ብርሃናት፡ | ዘርኢከ፨ አነ፡ ውእቱ፡ እግዚአብሔር፡ ርኁቀ፡ መዓት፡ ወብዙኃ፡ ምሕረት፡ ወጻድቅ። ዘእትናገረከ፤ እመልዕልተ፡ ኪሩቤል፡ ሕያዋን፤ እስመ፡ አኮ፡ በከመ፡ ተናገርክዎ፡ ለሙሴ፡ እምአምሳለ፡ ኪሩቤል፤ እለ፡ ኢይትሐስው፡ ዘተገብረ፡ አምሳሊሆሙ፡ እመልዕልተ፡ ምስሐል፡ በውስተ፡ ደብተራ፡ መርጡል፡ ቀዳሚ፨ ናሁ፡ እትገረከ፡ በከመ፡ ትሬኢ፡ እምዲበ፡ ኪሩቤል፡ ሕያዋን፡ እለ፡ ያንሶሰው፡ በውስተ፡ አርያም፡ ወበውስተ፡ ኵሉ፡ ኀበ፡ ዘይፈቅድ፡ ወክሥት፡ ዕዝነ፡ ልበከ፡ ወለቡ፡ ዘርኢከ፡ ከመ፡ ትግበር፡ ሊተ፡ ቤተ፡ መቅደስ፡ ዲበ፡ ምድር፡ በዘቦቱ፡ ዓኃድር፡ ምስለ፡ ሰብእ፡ | | ወበዘቦቱ፡ ይትቄደሰ፡ እምአፈ፡ ሕዝብየ፡ እለ፡ ኃረይክዎሙ፡ ወእለ፡ ይቄድሱ፡ ስምየ፡ እለ፡ ለብሱኒ፡ በሃይማኖት፡ እለ፡ ይጼውዑኒ፡ ወይብሉኒ፡ አቡነ፡ ዘበሰማያት፡ እስመ፡ አነ፡ ወለድክዎሙ፤ ወአንተሂ፡ ለቡከመ፡ ትግበር፡ በከመ፡ አርአይኩከ፤ በከመ፡ ገብረ፡ ሊተ፡ ደብተራ፡ ሙሴ፡ ምዕመንየ፡ በከመ፡ አርአያ፡ ዘአርአይክዎሙ፡ በደብረ፡ ሲና፡ አርአያሃ፡ ቀዳሚት፡ ከማሁ፡ ገብረ፡ /በ/ከመ፡ ኵሉ፡ አርአይክዎ፤ ወአንተሂ፡ ለቡ፡ ወጠይቅ፡ ዑቅ፡ ከመ፡ ትግበር፡ በከመ፡ አርአይኩከ፡ ወዘአርአኩከሰ፡ አኮ፡ በከመ፡ አርአይክዎ፡ | ለሙሴ፨ ወአኮ፡ በከመ፡ ገብረ፡ ዘትገብር፡ ሊተ፡ መቅደስየ፡ ሙሴሰ፡ ገብረ፡ ሊተ፡ ደብተራ፡ ዘዕፅ፡ ወበአቅ/ር/ንት፡ ወበአዕማዲሁ፤ ዘዕፅ፡ ወሰረዊሁኒ፡ ዘዕፅ፡ ወመክደናቲሁኒ፡ ዘሰቅ፤ እንተ፡ ላዕሉ፨ ወአንተሰ፡ አኮ፡ ዘተኃሥሥ፡ ዕፀ፡ ለአምዱ፡ ወለምዕማዱ፡ ወለምረዊሁ፨ ወዘንተ፡ ብሂሎ፡ አርአዮ፡ አብያተ፡ ዘእምአሐቲ፡ ወኍልቈሙሰ፡ ለእሙንቱ፡ አብያተ፡ ዘአርአዮ፡ ፲ ወግብረቶንሰ፡ ዘዘዚአሁ፡ ኅበሪሁ፡ ወዘዘዚአሁ፡ አርአያሁ፡ ቦእንተ፡ ማባዖን፡ ወእንተ፡ ውሰጦን፡ ርሂብ፡ ወቦ፡ እንተ፡ ሙባኡኒ፡ ርሂብ፡ ወአራተ፡ ቅጽሮንሂ፡

| | ዘዓርብ፡ ነዋህ፡ ጥቀ፡ ወኑኃቶንሂ፡ ለዕሎን፡ አብያተ፡ ክርስቲያናት፤ ቦ፡ እምኔሆን፡ ዘየዓቢ፤ ካልዕ፡ እምካልዑ፡ ወኅበሪሆንሂ፡ ዘዘዚአሁ፡ ቦ፡ እምኔሆን፡ ታቅየሐይሕ፡ ወቦ፡ እምኔሆን፡ ዘኅበሪሁ፡ ከመ፡ ዕብነ፡ ባልቲት፨ ወቦ፤ እምኔሆን፡ ዘጌሰ፡ ኀቤሆን፨ ወቦ፡ እምኔሆን፡ ዘአምድ፡ ግበ፡ ኅበሪሆን፡ ዘየዓቢ፡ ኖኃ፡ ግደማሆን፡ ለ፩ እም፩ የዓቢ፡ ዓዲ፡ ሱራሬሆን፡ ወዘንተ፡ ኵሎ፡ እምድኅረ፡ አርአዮ፡ ለላሊበላ፡ እግዚአ፡ ኃያላን፡ ዘይነብር፡ ውስተ፡ ሰማይ፨ ስፉሕ፡ ዘኅብረ፡ በረድ፡ ዘሀሎ፡ መልዕልተ፡ ርእሶሙ፡ ለ፬ እንስሳ፨ እሉ፡ እሙንቱ፡ ኪሩባውያን፡| ዑቅኬ፡ አእምር፤ ወለቡ፡ ከመ፡ ትግበር፡ ሊተ፡ እሎንተ፡ አብያተ፤ በዘቦቶን፡ እትቄደስ፡ ወእሴባሕ፡ በዲበ፡ ምድር፡ እስመ፡ ሀለው፡ ሕዝብ፡ እለ፡ ኃረይክዎሙ፡ ወእለ፡ የዓርጉ፡ ሊተ፡ በውስቴቶን፡ መሥዋዕተ፡ ወቁርባነ፡ ወዕጣነ፡ ዘመዓዘ፡ ሠናይ፨ ወአንተሂ፡ አእምር፡ ከመ፡ ትግበር፡ ኵሎ፡ በከመ፡ አርአይኩከ፡ ወአኮ፡ ዘ፩ ገጽ፡ ወዘ፩ ኅብሩ፡ ዘአርአይኩከ፡ አላ፡ ዘዘዚአሁ፡ ኅበሪሁ፡ ለአብያተ፡ ክርስቲያናት፡ ዘአርአይኩከ፨ ወአንተሂ፡ ደይ፡ ውስተ፡ ልብከ፡ ዘከመ፡ ርኢከ፡ እስመቦ፡ እምኔሆን፡ ዘየዓቢያ፡ አምአምጣኒሆን፡ በኑኃኒ፡ ወበግድማኒ፡ | | ወሱራሬኒ፡ የዓቢ፡ አሐቲ፡ እምአሐቲ፨ ወዑቅ፡ ወአንተኒ፡ ከመ፡ ትግበር፡ በከመ፡ አርአይኩከ፡ በበአምጣኒሆን፡ እንዘ፡ ይትዌሰክ፡ ኢዲበ፡ ኖሆን፡ ወኢዲበ፡ ግድሞን፨ ወኢዲበ፡ ሱራሬሆን፨ አላ፡ በከመ፡ ርኢከ፡ ግበር፡ እስመ፡ ብዑድ፡ ውእቱ፡ ዘአርአይኩከ፡ እስመ፡ እምአሐቲ፡ ዕብን፡ ርኢከ፡ እንዘ፡ ይወፅእ፡ እሎንተ፡ ፲ አብያተ፡ ክርስቲያናት፡ ወአልቦ፡ አህባል፡ ዘትፈቅድ፡ ጠፈሮን፡ ወኢዕፀ፡ ለመዋጽፍቶን፡ ወኢሰርዌ፨ ለአዕማዲሆን፡ ወለምዕማዶን፨ ወኢዕፀ፡ ፅቡረ፡ ለማእሕዘቲሆን፡ እስመ፡ አሐቲ፡ ዕብን፡ ይፌጽሞ፡ ኵሎ፡ መፍቅደ፡ ቤተ፡| መቅደሶን፡ ወህላዌሆንሰ፡ ላዕለ፡ አብያተ፡ ቤተ፡ መቅደሰ፡ ዘአርአይኩከ፡ ውስተ፡ ልበ፡ ምድር፡ ሀለወ፡ እስከ፡ ይእዜ፡ ወይሄልዋ፡ ካዕበ፡ ውስተ፡ ልበ፡ ምድር፡ እምይእዜ፡ እስከ፡ ይትከሠታ፡ በእደዊከ፨ ወሶበ፡ ርእየ፡ ላሊበላ፡ ኵሎ፡ ዘርእየ፡ ወሶበ፡ ሰምዓ፡ ኵሎ፡ ዘነገሮ፡ ይቤሎ፡ ለእግዚአብሔር፨ አብሐኒከ፡ እግዚኦ፡ ከመ፡ እንብብ፡ ቅድሜከ፡ ለእመ፡ ይደል/ወ/ኒ፡ በከመ፡ ረሰይከኒ፡ ድልወ፡ ከመ፡ እርአይ፡ ምሥጢራተ፡ ሰማያቲከ፡ ወክብረ፡ መላእክቲከ፡ ወክብሮሙኒ፨ ዘኢይትፌኖ፡ ለከ፡ እምኀቤሆሙ፡ እምቀዳሚት፡ ሰማይ፡ እስከ፡ ይእዜ፡ ሳብዕት፡ እንዘ፡

| | ይትዌሰክ፡ ብርሃን፡ በዲበ፡ ብርሃን፡ ለለሰማዩ፨ ወእምኵሉሰ፡ ዘየዓቢ፡ ረሰይከኒ፡ እርአይ፡ ስብሐቲከ፡ በዲበ፡ ኪሩቤል፡ እንዘ፡ ያንበለብል፡ ጸዳለ፡ ስብሐቲከ፨ ወይእዜኒ፡ አብሐኒ፡ እግዚኦ፡ ከመ፡ እንብብ፡ በቅድሜከ፨ ወይቤሎ፡ እግዚአ፡ ኃያላን፡ ዘይነብር፡ በዲበ፡ ሰረገላ፡ ኪሩቤል፡ ንብብ፡ እስመ፡ ረከብከ፨ ሞገሰ፡ በቅድሜየ፨ በከመ፡ ረከበ፡ ሙሴ፡ ገብርየ፡ ዘተናገርክዎ፡ ገጸ፡ በገጽ፡ ከመ፡ ዘይትናገር፡ ብእሲ፡ ምስለ፡ ቢጹ፡ እስመ፡ ኅብረ፡ ገጹ፡ እምነጽሮ፡ እምዘርእየ፡ ወዘንተ፡ ሰሚዖ፡ ላሊበላ፡ ሰገደ፡ ቅድመ፨ ገጹ፡ ለአሐዜ፡ ኵሉ፡ ወአኃዘ፡| ይንብብ፤ ወይቤ፡ እግዚኦ፡ አነኑ፡ እክል፡ ከመ፡ እግበር፡ ዘንተ፡ አፅራሃ፡ መንግሥተከ፡ ዘአርአይከኒ፡ አብያተ፡ ክርስቲያናት፡ እምአሐቲ፡ ኰኵሕ፨ ወግብረቶን፡ ሂ፡ ዘዘዚአሁ፡ ወሠናያት፡ ጥቀ፡ እማንቱ፡ ወይኤድማ፡ ለአዕይንት፡ ወይኄውዛ፡ ለልብ፡ እስመ፡ አዕማዶንሂ፡ ኢኮነ፡ ዘዕፅ፡ ወአቅማሮንሂ፡ ኢኮነ፡ ዘዕፅ፡ ወአሕባለ፡ ወፎርሂ፡ አልቦ፡ ላዕሌሆን፡ ወመሬትሂ፡ አልቦ፡ እፎኬ፡ እክል፡ አነ፡ ጸዓጸዓ፡ ዘከመዝ፡ አብያተ፡ እግበር፨ ወዘከመ፡ እፎ፡ ውእቱ፡ መብህለ፡ ምግባሪሆን፡ በመፍጽሕኑ፡ አው፡ በጕድብ፡ | | ይትገበራ፤ ዘከመ፡ እሎን፤ አብያተ፡ ክርስቲያናት፡ ዘአርአይከኒ፡ እንበለ፡ ዕፅ፡ ወመሬት፨ ወበአይ፡ ኃይል፡ ወሥልጣን፤ ካዕበ፡ ዘእክል፡ ገቢረ፡ ዘከመዝ። ወተሰጠዎ፡ እግዚእ፡ ወነበቦ፡ እመልዕልተ፡ ኪሩቤል፡ ወይቤሎ፡ ገቢረሰ፡ አኮ፡ አንተ፡ ዘትገብር፡ ሊተ፡ በኃይለ፡ ሰብእ፨ አላ፡ አነ፡ ውእቱ፡ ገባሪሆን፡ ወኬንያሆን፡ ሐናፂሆን፡ ወነዳቂሆን፡ መጣኒሆን፡ ወፈጻሚሆን፨ ወባሕቱ፡ በምክንያት፡ ተለአክ፤ ወበእንቲአሆን፡ ትሰመይ፡ ገባሪሆን፨ ወአርአዮ፡ ካዕበ፡ ሐጻውንተ፡ በዘቦቶን፡ ይግበር፤ አርአያሆን፡ ለእማንቱ፡ አብያተ፡| ክርስቲያናት፨ ዘርእየ፡ በውስተ፡ ሰማይ፡ ሳብዕ፨ ወላሊበላሰ፡ ሰሚዖ፡ ኵሎ፡ ዘነበቦ፡ እግዚእ፡ ወርእዮ፡ ኵሎ፡ ዘአርአዮ፡ ይቤ፡ ፈቃድከ፡ ለይኩን፨ እግዚኦ፡ ወአኮ፡ ፈቃደ፡ ዚአየ፨ ወባሕቱ፡ ለይርድአኒ፡ ኃይልከ፤ እስመ፡ ፅቡሰ፡ አነ፡ ወይቤሎ፡ መስተፅዕነ፡ ኪሩቤል፡ /ኢ/ይትበል፡ ፅቡስ፡ አነ፡ ወኢትተክዝ፡ በእንተዝ፡ ወአነሂ፡ አምላክከ፡ ኢይፈቅድ፡ ኃይለ፡ ፈረስ፡ ወኢይሰምር፡ በአቁያጸ፡ ብእሲ፡ ይሰምር፡ እግዚአብሔር፡ በዕለ፡ ይፈርህዎ፨ ወበኵሎሙ፡ እለ፡ ይትዌከሉ፡ በምሕረቱ፨ ወዘንተ፡ ብሂሎ፡ ሰፍሐ፡ የማኖ፡ ወረሰየ፡ መልዕልተ፡ ርእሱ፡ ከመ፡

| | እንተ፡ ተድባብ፡ ወይቤሎ፡ ለላሊበላ፡ ናሁ፡ አንበርኩ፡ እዴየ፡ ዲበ፡ ርእሰከ፡ ወአልበስኩከ፡ ኃይለ፡ ወኩን፡ ጽኑዓ፡ ከመ፡ ዕብነ፡ አድማስ፡ ለነዲቀ፡ ቤትየ፡ ወለገድልከኒ፤ ካዕበ፡ ከመ፡ ኢይምአከ፡ ጸላኢ፡ ኢተዓወቀት፤ ኃይል፡ ዘለበሰከ፡ ኦብእሲ፡ ወይቤሎ፡ ላሊበላ፡ ናሁ፡ አቅነትከ፡ ኒ፡ ወልታ፡ ጽኑዓ፡ ኦእግዚእየ፡ ወእለ፡ መኑ፡ ካዕበ፡ እለ፡ ይትለአኩኒ፡ ውስተ፡ ሕንፃ፡ እሎንቱ፡ አብያተ፡ ክርስቲያናት፨ ወይቤሎ፡ እግዚአብሔር፡ ብዙኃ፡ ሀለው፡ እምነ፡ ሰብእ፡ እለ፡ ይትለአኩከ፡ ወእመልዕ፡ ላዕሌሆሙ፤ ኃይለ፡ መንፈሰየ፡ ወአሐሪ፡ እምኔሆሙ፡ ሊቃነ፡ ጠበብት፡ ከመ፡ | በሰልአል፡ ወኤልያብ፡ ሊቃነ፡ ጠበብት፨ እለ፡ አርድዕዎ፡ ለሙሴ፡ በውስተ፡ ደብተራ፡ ኦሪት፡ እንተ፡ ተገብረት፡ ሊተ፡ በዘአኃድር፡ ምስለ፡ ሰብእ፨ ወለከሰ፡ አኮ፡ ሰብእ፡ ጠበብት፡ ባሕቲቶሙ፡ ዘይረድኡከ፡ ለሕንፃ፡ ውእቱ፡ ማኅፈድ፨ አላ፡ መላእክትኒ፡ ኢይርኅቁ፡ እምኔከ፤ እንዘ፡ ይረድኡከ፡ ወኢያስተርእዩ፡ ባሕቱ፡ ለሰብእ፡ ወለከሰ፡ ኢይትኃብኡከ፨ ወይቤሎ፡ ላሊበላ፡ ለ/ይ/ኩን፡ እግዚኦ፡ በከመ፡ ትቤለኒ። ወይቤሎ፡ ካዕበ፡ ዘይነብር፡ ዲበ፡ ሰረገላ፡ እሳት፡ ዘይነድድ፡ ዘይጼዓን፡ ዘባነ፡ ሰማይ፡ ሰፉሕ፡ ዘኅብረ፡ በረድ፡ ሰማዕ፡ | | እምኔየ፡ ወኢመሰልኩ፡ በእላንቱ፡ አብያተ፡ ክርስቲያናት፡ ዘትጻሙ፡ ቦሙ፡ በከመ፡ አላ፡ መድኃኒተ፡ ብዙኃ፡ ይከውን፤ በውስቴቶን፡ ወብዙኃን፡ ቦን፡ ይድኅኑ፤ ተፀዊኖሙ፡ ወተአሚኖሙ፡ በኃይለ፡ ጸሎትከ፨ ለገባሪሆን፡ እስመ፡ ያስተፌሥሕ፡ ለዘነጸሮሙ፡ ለአብያተ፡ ለክርስቲያናት፡ ዘሀለዎ፡ ን፡ ይትከሠታ፡ በእደዊከ፤ ወብዙኃን፡ ይሰገሩ፡ በመቃጥነ፤ ፍቅርየ፡ በእንቲአሆን፡ የአኩቱኒ፡ ወያፈደፍዱ፡ ስብሐተ፡ እንዘ፡ ይብሉ፡ ሰብሐት፡ ለእግዚአብሔር፡ ለዘከሰተ፡ እሎንተ፡ አብያተ፡ ክርስቲያናት፡ እምአሐቲ፡ ዕብን፤ በእደ፡ | መሬታዊ፡ መንክር፡ እግዚአብሔር፡ በላዕለ፡ ቅዱሳኒሁ፤ አምላከ፡ እስራኤል፡ ውእቱ፡ ይሁብ፡ ኃይለ፡ ወጽንዓ፡ ለሕዝቡ፨ ወይትባረክ፡ እግዚአብሔር፡ ወእምዝ፤ እትአኰት፡ ወእሴባሕ፡ እም፡ እለ፤ ይ[ለ]ኔጽሩ፡ ማኅፈዳተ፡ መቅደስየ፡ ዘሀለዋ፡ ወያሰተርእያ፡ ዲበ፡ ምድር፡ እምአሐቲ፡ ኰኵሕ፨ ወአነሂ፡ አቀውም፡ ምስሌከ፡ ኪዳነ፡ ዮም፡ በዛቲ፡ ዕለት፡ ኵሉ፡ ዘይበጽሕ፡ ውስተ፡ ማኅፈዳት፡ ዘሀለወከ፡ ተሐንጾን፡ ወይትጋነይ፤ በውስቴቶን፡ እንዘ፡ ይትአመን፡ በኃይለ፡ ጸሎትከ፡ ወይዜከር፡ ወይብል፡ መሀረኒ፡ እግዚኦ፡ ወተሣሃለኒ፡ ወኢትሚጥ፡ ገጸከ፡

| | እምኔየ፡ በእንተ፡ እላንቱ፡ ማኅፈዳት፡ ምሥጢራቲከ፡ ዘአርእይከ፡ ዲበ፡ ምድር፡ እንበለ፡ ዕፅ፡ ወመሬት፡ እንበለ፡ አሕባል፡ ወመዋጽሕት፡ ወበእንተዝ፨ ላሊበላ፡ ገብርከ፡ በእደዊሁ፡ ዘከሠትከ፡ ዘንተ፡ መንክረ፡ ወዘ/ተ/ልአከ፡ በኅንፃሆን፡ ወበእንተ፡ ጻማሁ፡ በእንተ፤ ሐፉ፤ ወድካሙ፤ ወበእንተ፡ ሩጸታቲሁ፡ ፍሉኅ። ወበእንተ፡ ምግባሩ፡ ንጹሕ፨ ወዘንተ፡ እንዘ፡ ይብል፡ ሶበ፡ ጸለየ፡ በሩቱዕ፡ ሃማኖት፡ ወበኑኅ፡ ሕሊና፡ ወበጽርየተ፡ ልብ፤ ዘአልቦ፡ ጽልሁት፡ ወዘአልቦ፡ ቂም፡ ወበቀለ፡ ወዘአልቦ፡ ወበተአምኖ፡ ኃጣውዕ፡ ላዕለ፡ እደ፡ ካህን። ወአነ፡| እሰምዖ፡ ጸሎቶ፡ ወእፎ፡ ሰዕለቶ፡ ከመ፡ መዓዘ፡ ሠናይ፡ ዘውስተ፡ እዲሆሙ፡ ለሊቃነ፡ ካህናት፡ ሰማያውያን፨ እለ፡ ይከውኑ፡ ጸሎተ፡ ኵሎሙ፡ መሐይምናን፡ እምዲበ፡ ምድር፡ ውስተ፡ ማዕጠንቶሙ፨ ወሰረይ፡ ሎቱ፡ ኵሎ፡ ኃጢአቶ፡ ለእመ፡ ኮነ፡ ከመ፡ ኳኳ፡ አጻዕድዎ፡ ከመ፡ በረድ፡ ለእመ፡ ኮነ፡ ከመ፡ ለይ፡ አነጽሐ፡ ከመ፡ ፀምር፡ ወእሬስዮ፡ ንጹሐ፡ ከመ፡ ዕለት፡ እንተ፡ ባቲ፡ ተወልደ፡ እምከርሠ፡ ጥምቀት፡ ወእሁበከ፡ ለከ፡ መጽሐፈ፡ ዕዲሁ፡ ከመ፡ ትሰጥጥ፡ በእደዊከ፨ ወአነውኅ፡ መዋዕሊሁ፡ በዲበ፡ ምድር፡ ወእባርክ፡ ሎቱ፡ ቤቶ፡ ወብእሲቶ፡ ወውሉዶ፡ | | ወገራውሂሁ፨ ወኵሎ፡ ጥሪቶ፡ ዘአጥረየ፡ ወዘአፍኣኒ፡ ወዘውስጥኒ፡ ወአ/ስ/ተባዝኅ፡ ሎቱ፡ መራዕየ፡ እንስሳሁ፡ ወአመከአብ፡ ሎቱ፡ ክምረ፡ እክሉ፨ ወአነ፡ እባልሖ፡ እመሥገርት፡ ነዓዊት፡ ወእምነገረ፡ መደንግፅ፡ ወእጼልሎ፡ በገበዋትየ፤ ወእኤዝዞሙ፡ ለመላእክትየ፡ ከመ፡ ይዕቀብዎ፡ በኵሉ፡ ፍናዊሁ፨ ወበእደዊሆሙ፡ ከመ፡ ያንሥእዎ፡ ከመ፡ ኢይትአቀፍ፡ በዕብን፡ እግሩ፡ ወእሁቦ፡ ሥልጣነ፡ ከመ፡ ይኪድ፡ ከይሲ፡ ወአቃርብተ፡ ወኵሎ፡ ኃይላተ፡ ጸላኢ፡ ወኢይመውዖ፡ እመቦ፡ ዘተዋቀሰ፡ በጉህሉት፨ ወኵሉ፡ ዘጌሰ፡ ውስተ፡ መርጡልከ፡ እንዘ፡| ያንሶሱ፡ ውስተ፡ አዕፃዳተ፡ ገነተ፡ ኤዶም፡ ውስተ፡ መራህብተ፡ ኢየሩሳሌም፡ ሰማያዊት፡ ወውስተ፡ አዕጻዳተ፡ መንግሥትየ፡ ጽጐ፡ ሀገራ፡ ዘይመስል፡ ማኅወ፡ ወጸዳለ፡ ብርሃና፡ ይመውዕ፡ እምአዕላፍ፡ ብርሃነ፡ ፀሐይ፡ ወእሁቦ፡ መጽሐፈ፡ ብርሃን፡ ኅቱመ፡ ዘኢየምራ፡ ካልዕ፡ ዘእንበለ፡ ዘነሥአ፨ ወኵሉ፡ ዘያበውዕ፡ መባዓ፡ እመኒ፡ ኅዳጠ፡ ወእመኒ፡ ብዙኃ፡ እትወከፍ፡ እምነ፡ እዴሁ፡ ወእትመጠው፡ ሰፊሕየ፡ የማንየ፨ ኵሎ፡ መባዓ፡ ዘያመጽኡ፡ ውስተ፡ ማኅፈደ፡ መቅደስየ፡ ዘእገብር፡ በእዲከ፡ እመኒ፡ ቅብዓ፡ ዘአብዓ፡ እጠልል፡ ርእሶ፡ በቅብአ፡

| | ሣህልየ፡ ወኢይስሕክ፡ ሥጋሁ፤ ለዓለም፤ ወኢይጠፍእ፡ ማኅቶተ፡ ብርሃን፡ እምቅድመ፡ ገጹ፡ ወይትቂበሉኒ፡ በፍሥሐ፡ አመ፡ ምጽአትየ፡ ምስለ፡ ደናግል፡ ጠባባት፡ እለ፡ ኢይጠፍአ፡ ማኅተዊሆን፡ ወኢይረክቦ፡ ጽልመት፡ ወኢይቀውም፡ አፍአ፡ እምኆኅተ፡ መርዓየ፡ እንዘ፡ ይጐደጒድ፡ አንቀጸ፡ መንግሥትየ፡ ምስለ፡ ደናግል፡ አብዳት፡ እለ፡ ጠፍአ፡ ማኅተዊሆን፤ አላ፡ ይበውዕ፡ ውስተ፡ ውሳጤ፡ መንጦላዕተ፡ ጽርኅ፡ ዘቤተ፡ መርዓ፡ ምስለ፡ ደናግል፡ ንጹሐት፡ እለ፡ ኢይጠፍአ፡ ማኅተዊሆን፡ በነፋስ፡ ኃጢአት፨ ወለእመኒ፡| አብአ፡ አጰርጌ፡ ሠናየ፡ እምእክለ፡ ገራውሂሁ፡ ውስተ፡ ቤተ፡ መቅደስየ፡ ዘአሐንጾን፡ በዕደዊከ፡ እትዊከፎ፡ ከመ፡ መሥዋዕተ፡ ሙሴ፡ ወከመ፡ መሥዋዕቱ፡ ለመ/ል/ከ፡ ጼዴቅ። ወእመኒ፡ አብአ፡ ዘኮነ፡ እምነ፡ አልባስ፡ እትዊከፎ፡ /ከመ፡/ ሰንዱነ፡ ዮሴፍ፡ በዘቦቱ፡ ከደነ፡ ዕርቃነ፡ ሥጋየ፨ አውሪዶ፡ እምዲበ፡ መስቀል፡ ወበዘቦቱ፡ ገነዘኒ፡ አመ፡ ጥዕምኩ፡ ሞተ፨ በፈቃድየ፡ በእንተ፡ ፍቅረ፡ ዚአክሙ፡ ለሰብእ፨ ወለእመኒ፡ አብአ፡ ዘኮነ፡ እምአፍዋተ፡ ዕጣን፡ እትዌከፎ፡ ከመ፡ አፈወ፡ ኒቆዲሞስ፡ በዘቦቱ፡ ቀብአኒ፡ በከመ፡ ሕገ፡ ሰብእ፨ በከመ፡ ይገብሩ፡ ወአጼኑ፡ ሎቱ፡ መዓዛሁ፡ | | ከመ፡ ጼና፡ ዕፍረታ፡ ለብእሲት፨ ዘቀብዓተኒ፡ በቢታንያ፡ ወእኤዝዝ፡ ከመ፡ ይዝክርዋ፡ በትእ/ይ/ንተ፡ ትጉሃን፡ ሰማያውያን፤ በከመ፡ አዘዝኩ፡ በእንተ፡ ይእቲ፡ ብእሲት፡ ከመ፡ ይዝክርዋ፡ ውስተ፡ ኵሉ፡ አጽናፈ፡ ዓለም፨ ኀበ፡ ተሰብከ፡ ወንጌለ፡ መንግሥትየ፨ ወከማሁ፡ እሬሲ፡ በከመ፡ ይትሌዓል፡ ልዕልና፡ ዝክሩ፡ በኀበ፡ ኵሎሙ፡ ሰማያውያን፡ ወምድራውያን፤ ወአጠልል፡ ሎቱ፡ ቍርባኖ፡ ወእዜከር፡ መሥዋዕቶ፨ ወዘንተ፡ ብሂሎ፡ እግዚአ፡ ኃያላን፡ ነዝኃ፡ ዲቤሁ፡ ቅብዓ፡ መንግሥት፤ ወይቤሎ፡ ናሁ፡ ቀባዕኩከ፡ ቅብዓ፡ መንግሥት፡ ከመ፡| ትንግሥ፡ ለሕዝብየ፡ እስከ፡ ትፈጸም፡ ማኅፈዳተ፡ ምሥዋዕየ፡ ወአገርር፡ ኵሎ፡ ፀረ፡ ዓውድከ፨ ወለእመኒቦ፡ ዘተንሥአ፡ ላዕሌከ፡ ኢይክል፡ ይቁም፡ በቅድመ፡ ገጽከ፤ ወአነ፡ እወዲ፡ ፍርሃተ፡ ውስተ፡ ልበ፡ ኵሎሙ፡ እለ፡ የዓልውከ፡ ወዑቅ፡ አንተሂ፡ ከመ፡ ታእትት፡ እምሕዝብ፡ መንግሥተ፡ ኵሎ፡ ዓመፃ፡ ወግፍአ፨ ወሰገደ፡ ላሊበላ፡ ወዲቆ፡ በገጹ፡ በቅድመ፡ እግዚአ፡ ኃያላን፨ ወይቤሎ፡ እግዚእየ፡ ምንትኑ፡ አነ፡ ከመ፡ እኩን፡ ንጉሠ፡ ዲበ፡ ሕዝብከ፡ ዘአልብየ፡ አእምሮ፡ እስመ፡ ኅፁጸ፡ ልብ፡ አነ፡ ወኢይክል፡ አነ፡ ኵንኖሙ፡ በከመ፡

| | ይደሉ፨ ወነበቦ፡ እግዚአብሔር፡ ወይቤሎ፡ ትክልኑ፡ አጽርዖ፡ ቃልየ፡ ዘወጽአ፡ እምአፉየ፡ ወትእዛዝየ፡ ወወድቀ፡ ካዕበ፡ ላሊበላ፡ አኮ፡ ዘዘዓዓቢ፡ ትእዛዘከ፡ አላ፡ ዘአአምር፡ ሕፀተ፡ ልብ፡ ወውህደት፡ አእምሮትየ፡ ነገርኩከ፡ ፅቡስየ፨ ወተሰጥዎ፡ ዘይነብር፡ ዲበ፡ ሰረገላ፡ መፍርህ፤ ወይቤሎ፡ አኮኑ፡ አነ፡ ቀደምኩ፡ አእምሮ፡ ኵሉ፡ ፍናዊከ፡ እምቅድመ፡ እፍጥርከ፡ ወእምቅድመ፡ እልሐኰ፡ በከርሠ፡ እምከ፡ ጠየቁ፡ አስረ፡ ምሕዋሪከ፡ ወአነ፡ ቀጻዕኩ፡ ኵሎ፡ መዳልወ፡ ግዕዝከ፡ ወረሰይኩከ፡ ምዕመንየ፡ ወረከብኩ፡ ልበከ፡ ጽሩየ፡ ወዕሱረ፡ በኃብለ፡ ፈቃድየ፡ | ወውዑይ፡ በእሳተ፡ ፍቅርየ፨ ወበእንተዝ፡ ቀባዕኩከ፡ ቅዱሰ፡ እስመ፡ እዴየ፡ ትረድአከ፤ ወመዝራዕትየ፡ ታጸንዓከ፤ ወኢበቊዕ፡ ጸላኢ፡ በላዕሌከ፨ ወውሉዶ፡ ዓመፃ፡ ኢይደግም፡ አሕምሞተከ፨ ወእመትሮሙ፡ ለፀርከ፡ በቅድመ፡ ገጽከ፤ ወአኃሥሮሙ፡ ለጸላዕትከ፨ ወሣህልየሰ፡ ኢይከልዕ፡ እምኔከ፤ ወእትጋየጾ፡ ለዘይትጋየጸከ፡ ወእፀልዕ፡ ጸላእተከ፡ በ፩ ፍና፡ ለእመ፡ ጸብኡከ፡ ወበሳብዕ፡ ፍና፡ ይትነትዑ፡ እምኔከ፡ ወ፩ እምነ፡ ሐራከ፡ ይሰድዶሙ፡ ለ፼ ወይሜምዑ፡ እምድምፀ፡ ቆጽል፡ ወይትነገፉ፡ እምግርማከ፤ ወአኮ፡ በአድራዕ፡ ወአፍራሰ፡ ወኢበአብዝኆ፡ | | ሰራዊት፨ ወኢበአክብዶ፡ ኵናት፡ ወኢበአጽፍዋት፡ ወልታ፡ አላ፡ በስመ፡ ዚአየ፡ ይረድአከ፡ አነሂ፡ እስመ፡ አእመርኩ፡ ወጠየቁ፡ ስነ፡ ምግባሪከ፡ እስመ፡ አነ፡ እፈትን፡ ልበ፡ ወኵልያተ፡ እምቅድመ፡ ኵሉ፡ ወእምቅድመ፡ ሕሊና፡ ዕፈትን፨ ወዘንተ፡ ብሂሎ፡ አዘዘ፡ ለዝኩ፡ መልአክ፡ ለዘአዕረጎ፡ እምድር፨ እንዘ፡ ይብል፡ ናሁ፡ ረሰይኩከ፡ ወሤምኩከ፡ ከመ፡ ትኩን፡ ዓቃቢሁ፡ በኵሉ፡ መዋዕሊሁ፡ ወይቤሎ፡ ካዕበ፡ ለላሊበላ፡ ወአንተሂ፡ ኢትተክዝ፡ ዕንበይነ፡ መንግሥት፡ እስመ፡ አኮ፡ በእንተ፡ ክብር፡ ኃላፊ፡ ዘእሰይመከ፡ አላ፡ በእንተ፡ አብያተ፡| ክርስቲያናት፡ ዘርኢከ፡ ከመ፡ ትሕንጾን፡ ወበእንተዝ፡ ቀባዕኩከ፡ ቅብዓ፡ መንግሥት፡ ወረሰይኩከ፡ መሢሐ፡ ለሕዝብየ፡ እስከ፡ ትፌጽሞን፡ ለእላንቱ፡ ደብረ፡ መቅደስየ፡ እስመ፡ ለከስ፡ ደለወከ፡ ከመ፡ ታውጾን፡ እምልበ፡ ምድር፡ በሥልጣንየ፡ ዚአየ፨ ወአኮ፡ በጥበበ፡ ሰብእ፨ ወዘንተ፡ ብሂሎ፡ አዘዘ፡ ለመልአክ፡ ብርሃናዊ፡ ከመ፡ ያግብኦ፡ ውስተ፡ ምድር፡ ወይሱጥ፡ ነፍሶ፡ ውስተ፡ ሥጋሁ፨ ወዝንቱሰ፡ ኵሉ፡ ኮነ፡ በ፫ ዕለት፡ ዘርእየሂ፡ ምሥጢራተ፡ ሰማይ፡ ሳብዕ፤ ወክብረ፡ መላእክት፡ እለ፡ ሀለው፡ በበሰማዩ፤ እንዘ፡ ይትዌሰክ፡ ብርሃነ፡ ሰማይ፡

| | ፲ ወብርሃነ፡ መላእክት፡ ወአርአያ፡ ስብሐቲሁ፡ ለእግዚአብሔር፨ በዲበ፡ ኪሩቤል፡ ዘነበቦ፡ እመልዕልቴሆሙ፡ እግዚአ፡ ኃያላን፡ ወአመ፡ ፫ ዕለት፡ ተመይጠ፡ ውስተ፡ ሥጋሁ፡ በእደ፡ መልአክ፡ ብርሃናዊ፡ ዘተአዘዘ፡ እምኀበ፡ እግዚአብሔር፡ ከመ፡ ያግብዖ፡ ውስተ፡ ሥጋሁ፡ እምአመ። መሠጦ፡ በከመ፡ ትንሣኤ፡ እግዚኡ፡ እሙታን፡ በሣልስት፡ ዕለት፤ ወአኮ፡ ዘነበረ፡ ውስተ፡ ከርሠ፡ አንበሪ፡ ከመ፡ ዮናስ፡ ፫ተ፡ መዋዕለ፡ ወ፫ተ፡ ለያልየ፡ በላሕ፡ መሪር፡ ወብካይ፡ ዕፁብ፤ አላ፡ ነበረ፡ ውስተ፡ ዐቢይ፡ ፍሥሐ፡ ዓጸደ፡ ትጉሃን፡ ከመ፡ ኤርምያስ፡ ዘርእየ፡ ምሥጢራተ፡ | ትንቢት፡ በእንተ፡ ርደቱ፡ ለእግዚእነ፡ እምሰማይ፡ ወበእንተ፡ ተመስሎቱ፡ ሰብእ። ወላሊበላሂ፡ በ፫ ዕለት፡ ተመይጠ፡ ዲበ፡ ምድር፡ ርእዮ፤ ወነጺሮ፡ ምሥጢራተ፡ ሰማይ፡ ወተቀብኦ፡ ቅብአ፡ መንግሥት፤ ወአቂሞ፡ ኪዳነ፡ ምስለ፡ እግዚኡ፤ ወለቢዎ፡ ግብረ፡ ሕ/ን/ጻሖን፡ ለአብያተ፡ ክርስቲያናት፡ ዘአርአዮ፡ ከመ፡ ይግበር፤ በከመ፡ ግብረ፨ ወእልክቱሰ፡ እለ፡ ንቡራን፡ ውስተ፡ ሥጋሁ፡ አስተዳለው፡ መጋንዘ፡ ወመዋጥሐ፡ በዘይገንዝዎ፡ ወይቅብርዎ፨ ወባሕቱ፡ ኢተሐበሉ፡ ይ/ግ/ንዝዎ፡ እስመ፡ ኢቈረ፡ ሥጋሁ፤ ከመ፡ ሕገ፡ በድን፡ በ፫ መዋዕል፡ እስመ፡ | | ምውቅ፡ ሥጋሁ፡ በላህበ፡ መንፈስ፡ ቅዱስ፡ ዘኅዱር፡ ውስቴቱ፡ ወላሊበላሰ፡ ነቅሐ፡ እምስካቡ፡ ከመ፡ ዘጽሕወ፡ እምወይን፤ ወአብርሃ፡ ገጹ፡ ከመ፡ ፀሐይ፡ እምነ፡ ራእያት፡ ዘርእየ፡ እምነ፡ ስብሐቲሁ፡ ለእግዚአብሔር፨ እንዘ፡ ይብል፡ አአኵተከ፡ እስመ፡ ተወከፍከኒ፡ ወስላተ፡ ጸላዕትየ፡ ኢረስይከኒ፤ እግዚኦ፡ አምላኪየ፡ ጸራኅከ፡ ኀቤከ፡ ወተሣሃልከኒ፡ ወሰወርከኒ፡ በዕለተ፡ ቀትል፤ መልዕልተ፡ ርእስየ፡ ምንተኑ፡ አአስየከ፡ እግዚአ፤ በእንተ፡ ኵሉ፡ ዘገብርከ፡ ሊተ፡ ወእልክቱሰ፡ እለ፡ ፈቀዱ፡ ይግንዝዎ፤ አስተዳሊዎሙ፡ ኵሎ፡ ምፍቅደ፡ መግነዝ፡ አንከሩ፡| ወተደሙ፡ ወአኃዙ፡ ይበሉ፡ ዮም፡ ርኢነ፡ መንክረ፡ ምውት፡ ዘ፫ መዋዕል፡ ዘተንሥአ፡ በከመ፡ ሰማዕነ፡ መንክራቲሁ፡ ለመድኃኒነ፨ እስመ፡ ይቤ፡ በወንጌል፡ አንሥኦ፡ ለአልዓዛር፡ በረቡዕ፡ ዕለት፡ እምድኅረ፡ ጼዓ፡ በድኑ፤ ወይእዜኒ፡ አንሥኦ፡ ለላሊበላ፡ በቅድሜነ፡ በ፫ ዕለት፡ እምአመ፡ ሞተ። ወአሐዙ፡ ይሴአልዎ፡ ለላሊበላ፡ ወይቤልዎ፡ አይቴኑ፡ ነበርከ፡ በዝንቱ፡ ኵሉ፡ በ፫ቱ፡ መዋዕል፡ ወዘከመ፡ ም/ን/ት፡ ነበርከ፤ ወምንትኑ፡ ምክንያት፡ ተንሥኦትከ፡ ወአርአይዎ፡ መዋጥሐ፡ ወመጋንዘ፡ ዘአስተዳለውነ፡ በዘንቀብረከ፤ ወባሕቱ፡ ነበርነ፡ እንዘ፡ ንጸንሐከ፡ እስከ፡ ይቈርር፡ ሥጋከ፡ ወሶበሰ፡ ቈረ፡ | | እምወደይናከ፡ ወእምገነዝናከ፨ ወውእቱሰ፡ ይብል፡ ይትባረክ፡ እግዚአብሔር፡ ዘአድኃነኒ፡ እምዘ/ኃ/ለይክሙ። ኢኮነ፡ ሕሊናሁ፡ ከመ፡ ሕሊናክሙ፡ ወኢምክሩ፡ ለእግዚአብሔር፡ ከመ፡ ምክርክሙ። በከመ፡ ይቤ፡ በአፈ፡ ነቢዩ፡ ኢኮነ፡ ምክርየ፡ ከመ፡ ምክርክሙ፡ ወሕሊናየ፡ ከመ፡ ሕሊናክሙ፡ በከመ፡ ይርሕቅ፡ ሰማይ፡ እምድር፤ ከማሁ፡ ይርኅቅ፡ ሕሊናየ፡ እምሕሊናክሙ። እንዘ፡ ይቤሎሙ፡ ዘንተ፡ ወራዕየ፡ ተ፡ ዘርእየ፡ ኢነገሮሙ፡ ወኢምንተኒ፨ ዝንቱ፡ ፍሬ፡ ፍቅር፡ ዘተመክአበ፡ በላዕለ፡ ላሊበላ፡ በእንተ፡ ጽዋዓ፡ ዘሰትየ፡ በእንተ፡ ፍቅረ፡ ቢጹ፡ ሶበ፡ ርእየ፡ እንዘ፡ ይመውት፡ ካልኡ፡ በህምዘ፡ ከይሲ፡ ሥራየ፡| ዘተገብረ፡ በእንቲአሁ፨ ይእቲኬ፡ ፍቅር፡ አብጽሐቶ፡ ውስተ፡ ዝንቱ፡ ኵሉ፡ ጸጋ፡ መንፈሳዊ፡ እስከ፡ ርእየ፡ ምሥጢራተ፡ ሰማይ፨ ወርእየ፡ ስብሐቲሁ፡ ለእግዚአብሔር፡ በላዕለ፡ ኪሩቤል፤ እንዘ፡ ያንበለብል፡ ጸዳለ፡ ሱራሄሁ፡ እስመ፡ እሴታ፡ ለፍቅር፡ ዓቢይ፡ ውእቱ፨ እስመ፡ ባቲ፡ ይትፌጸም፡ ኵሉ፡ ምግባራተ፡ ሠናይ፨ በከመ፡ ይቤ፡ ጳውሎስ፡ ዘአፍቀረ፡ ቢጸ፡ ኵሎ፡ ሕገ፡ ፈጸመ፡ ገቢረ፨ ወካልኡኒ፡ ይቤ፡ አፍቅሩ፡ ቢጸክሙ፡ እስመ፡ ተፋቅሮ፡ ይደመስሶን፡ ለኵሎን፡ ኃጣውእ፨ አማንኬ፡ ተፈጸመ፡ ቃለ፡ ሐዋርያ፡ በላዕለ፡ ላሊበላ፡ ፈርየሂ፡ ወተመክዓበ፡ ወለነኒ፡ ይረስየነ፡ ጽሑቃነ፡ ለአፍቅሮ፡ ቢጽነ፡ | | እግዚእነ፡ ወመድኃኒነ፡ ኢየሱስ፡ ክርስቶስ፡ በጸሎቱ፡ ወበስእለቱ፡ ወበኃብተ፡ ረድኤቱ፡ ወበጻማ፡ ገድሉ፡ ወበድካሙ፡ ዘተወክፈ፡ በሥጋሁ፡ ዝንቱ፡ ብእሲ፡ ላሊበላ፡ ዘተሰምየ፡ ገብረ፡ መስቀል፡ አሜን፨ ወእምድኅረዝ፡ ነበረ፡ ላሊበላ፡ እንዘ፡ ይትዌከፍ፡ ኵሎ፡ ጽዕለተ፡ ወኵሎ፡ ምናኔ፡ እምኀበ፡ አዝማዲሁ፨ ወእምኀበ፡ ኵሎሙ፡ ሰብእ፡ እለ፡ አስገሮሙ፡ ሰይጣን፡ ላዕሌሆሙ፡ እንዘ፡ ይሳለቅዎ፤ ወይቤልዎ፡ ይነግሥአ፡ ዝንቱ፤ ወቦ፡ ዘይቤ፡ ዝንቱሰ፡ ለእመ፡ ነግሠ፡ ይሰይጠነ፡ ለማየ፡ ልብኔ፡ ዝውእቱ፡ ዕጣነ፡ ቤተ፡ ክርስቲያን፨ ወዘንተ፡ ኵሎ፡ እምድኅረ፡ ተወክፈ፡ ኃለየ፡| በልቡ፡ እንዘ፡ ይብል፤ ናሁ፡ ኮንክዎሙ፡ ዕቅፍተ፡ ለአብ/ያ/ጽየ፡ ወለአኃው/የ/፨ ወይእዜሰ፡ ኢይነብር፡ ምስሌሆሙ፡ ይኄይስኒ፡ ከመ፡ ዕፃዕ፡ ገዳመ፡ ወእንበር፡ ምስለ፡ አራዊት፨ እስመ፡ ይኄስኒ፡ ነቢር፡ ምስለ፡ አራዊት፡ እምዕንበር፡ ምስለ፡ ሰብእ፡ መሪር፡ ልሳነ፤ እስመ፡ ልሳነ፡ ሰብእ፡ አልቦ፡ ዘይክል፡ አግርሮታ፨ እስመ፡ ኵሉ፡ ፍጥረት፡ ይገርር፡ ለፍጥረተ፡ ሰብእ፡ አራዊትኒ፡ ዘይትሐወስ፡ ወአዕዋፍኒ፡ ዘይሰርር፡ ወልሳነ፡ ሰብእሰ፡ ኢይክል፡ አግርሮታ፡ እኪት፡ ይእቲ፤ ወምልዕተ፡ ሕምዝ፡ ይእቲ፡ ዘይቀትል፨ በከመ፡ ይቤ፡ ጳውሎስ፡ ወመንሱትሰ፡ ኢይርከብክሙ፡ ዘእንበለ፡ እምኀበ፡ ሰብእ፡

| | ይኄይስ፡ ገዳመ፡ ተግሂሦ፡ እምሰብእ፡ ወሐረዮ፡ ነቢረ፡ ምስለ፡ አራዊት፤ ወአራዊትኒ፡ ኢሰሐጥዎ፡ ወእምህየ፡ ተመሰጠ፡ ከመ፡ ይርአይ፡ ኅቡአተ፡ ሰማይ፨ ኤልያስ፡ ነበረ፡ ገዳመ፡ እንዘ፡ ይሴሰ/ይ/፡ በእደ፡ ቋዕ፡ ፍና፡ ሰርክ፡ ሥጋ፡ ወእንተ፡ ጸብሐ፡ ወኅብዝተ፡ ወሎቱኒ፡ ኢሰኃጥዎ፡ አራዊት፡ ዘከመ፡ ሰኃጥዎ፡ ሰብእ፡ እስመ፡ እምገጸ፡ ኤልዛቤል፡ ጐየ፡ ወኢጐየ፡ እምገጸ፡ አራዊት፤ እስመ፡ አራዊት፡ ይገንዩ፡ ሎቱ፡ ዮሐንስኒ፡ ነበረ፡ ገዳመ፡ እምንእሱ፡ እስከ፡ ይሴሰይ፡ ለምለመ፡ ቈጽል፡ ወእንዘ፡ ይሰቲ፡ እምጠለ፡ ገዳም፡ ወኢሰኃጥዎ፡ አራዊት፡ ወአኃወ፡ ኮንዎ፡ ኣናብስት፡ ወቶራት፨ | ወዘንተ፡ ብሂሎ፡ ወጽአ፡ ገዳመ፡ ወነበረ፡ እንዘ፡ ይሴሰይ፡ ንኢዎ፡ አራዊት፡ ወአስጊሮ፡ ጰርድክስያተ፨ ወአልቦቱ፡ ካልአ፡ ሐሊናተ፡ ወላሊበላ፡ ሰ እንበለ፡ ሰብሖ፡ እግዚአብሔር፡ ወዘምሮ፡ መዓልተ፡ ወሌሊተ፡ እንዘ፡ ይጐድዕ፡ እንግድዓሁ፨ ወይበኪ፡ ወትረ፡ በላሕ፡ ወበመሪር፡ ብካይ፡ ዕፁብ፡ በምንዳቤ፡ ብዙኅ፡ እንዘ፡ ይትኳነን፡ በረኃብ፡ ወበጽምዕ፨ በቁር፡ ወበዕርቃን፡ በኃፍ፡ ወበድካም፡ እንዘ፡ ይትዌከፍ፡ ጻማሆሙ፡ ለገደማውያን፨ ወሰብእሰ፡ ይሰምይዎ፡ አራዊት፡ ወእግዚአብሔርሰ፡ ይሰምዮ፡ ከመ፡ ፩ እምነ፡ ኃይላት፨ እስመ፡ ይሬኢ፡ ልበ፡ ወይፈትን፡ ኵለያተ፡ እስመ፡ | | አኮ፡ በከመ፡ ይሬኢ፡ ሰብእ፡ ወይፈትን፡ ኵልያተ። እስመ፡ አኮ፡ በከመ፡ ይሬኢ፡ ሰብእ፡ ኢይሬኢ፡ እግዚአብሔር፡ እግዚአብሔርሰ፡ ገጸ፡ ይሬኢ፡ ወላሊበላኒ፡ ምኑን፡ ውእቱ፡ በኀበ፡ ሰብእ፡ ወትሑት፡ በውስተ፡ ሕዝብ፡ ወባሕቱ፡ ልዑል፡ ወክቡር፡ በኀበ፡ እግዚአብሔር፡ ወከመዝ፡ ነበረ፡ ላሊበላ፡ በውስተ፡ ገዳም፡ እንዘ፡ የዓቅቦ፡ መልአከ፡ እግዚአብሔር፤ በከመ፡ ዓቀቦሙ፡ ለእስራኤል፡ በገዳም፤ እስከ፡ ይበውዑ፡ ውስተ፡ ምድረ፡ ርስቶሙ፡ ዘመሀለ፡ ሎሙ፡ አምላከ፡ አበዊነ፡ ወላሊበላኒ፡ ነበረ፡ እንዘ፡ ይሜግቦ፡ ኃይለ፡ መንፈስ፡ ቅዱስ፡| ወሲሳዮሰ፡ ይሴሰይ፡ ንዒወ፡ በከመ፡ ነገርኩክሙ፡ ቅድመ፡ ወከመዝ፡ እንዘ፡ ሀለወ፡ ላሊበላ፡ በውስተ፡ ገዳም፡ ዘአስተርአዮ፡ መልአከ፡ እግዚአብሔር፨ ዘአዕረጎ፡ ውስተ፡ ሰማይ፨ ወዘተአዘዘ፡ ከመ፡ ይዕቀቦ፡ በኵሉ፡ መዋዕሊሁ፡ ወይቤሎ፡ ሰላም፡ ለከ፡ ኦብእሲ፡ አምላክ፡ ላሊበላ፡ ወይቤሎ፡ ላሊበላ፡ መኑ፡ አንተ፡ ዘትትናገረኒ፡ በቃለ፡ ሰላም፨ ወይቤሎ፡ አነ፡ መልአከ፡ እግዚአብሔር፡ ዘአዕረግኩከ፡ ውስተ፡ ሰማይ፡ ወአርአይኩከ፡ ምሥጢራተ፡ ሰማይ፡ ወዘተአዘዝኩ፡ ከመ፡ ዕእቀብከ፨ ወይቤሎ፡ ላሊበላ፡ ሰላምከ፡ ያዕርፍ፡ ላዕሌየ፡ ኦእግዚእየ። ወይቤሎ፡ መልአክ፡ ውእቱ፡ ለላሊበላ፡

| | በል፡ እግዚእየ፡ እስመ፡ ይሰምዓከ፡ ገብርከ። ወይቤሎ፡ መልአክ፡ ለላሊበላ፡ ጌሠመ፡ ትመጽእ፡ ኃቤከ፡ ወለት፡ በዘከመዝ፡ ጊዜ፡ ወአእምሮ፡ ኵሎ፡ ትዕምርታቲሁ፨ ወአልባሲሃኒ፡ ዘትለብስ፡ ወይእቲኬ፡ ዘትከውነከ፡ ብእሲተ፡ ወኅሪት፡ ይእቲ፡ ከማከ፨ ወትከውነከ፡ ዘከመ፡ ልብከ፡ ወስነ፡ ምግባሪሃኒ፡ ኢያጸንን፡ እምግባረ፡ ዚአከ፨ ወዓመተ፡ እግዚአብሔር፡ ይእቲ፨ ወብዙኃ፡ ምግባረ፡ ሠናይ፡ ትትሜሀር፡ እምኔሃ፨ ወአንተሂ፡ ተናገራ፡ በእንተዝ፡ ግበር፡ ወንግራ፡ ዘከመ፡ ነገርኩከ፡ አነ፨ እስመ፡ እምኃበ፡ እግዚአብሔር፡ ውእቱ፡ ዝነገር፨ ወውእቱ፡ አዘዘኒ፡| ከመ፡ እንግርከ፡ ወይቤሎ፡ ላሊበላ፡ ለውእቱ፡ መልአክ፡ ኦእግዚእየ፡ ሊተእ፡ ሀለወኒ፡ ከመ፡ እንሣእ፡ ብእሲተ፡ ዘከመዝ፡ ስነ፡ ብርሃናት፨ እምድኅረ፡ አርአይከኒ፡ በውስተ፡ ኵሎንሰ፡ ማያት፡ ወድንጋፄ፡ ዝሀሎ፡ ውስተ፡ ምጽናዕ፤ ዘትቤለኒ፡ ለሊከ፡ ተዘከራ፡ ለዛቲ፡ ድንጋፄ። ወይቤሎ፡ ውእቱ፡ መልአክ፡ ለላሊበላ፡ ኃጢአትኑ፡ ይከውነከ፡ ነሢአ፡ ብእሲት፡ ኦብእሴ፡ አምላክ፡ ዘበእንቲአሃሰ፡ አልቦ፡ ዘያኃጽጽከ፡ አስብ፨ እስመ፡ አኮ፡ በእንተ፡ ፍቅረ፡ ዓለም፡ አላ፡ በእንተ፡ ውሉድ፡ ወተቃወሞ፡ ላሊበላ፡ ለመልአከ፡ እግዚአብሔር፡ በእንተ፡ ዝንቱ፡ ነገር፡ እስመ፡ | | ይብል፡ ኢይደልወኒ፡ ከመ፡ እንሣእ፡ ብእሲተ፨ ወይቤሎ፡ ይትከሀለከኑ፡ ከመ፡ ታብጥል፡ ትእዛዘ፡ እግዚአብሔር፨ ወሚመ፡ ከመ፡ ታውጽዖሙ፡ ለውሉድ፡ በባሕቲትከ፡ ለእለ፡ ሀለው፡ ውስተ፡ ሐቋከ፨ ወእምድኅረ፡ ነገሮ፡ ብዙኃ፡ ወይቤ፡ ላሊባለ፡ ፈቃደ፡ እግዚአብሔር፡ ለይኩን፡ ወአኮ፡ ፈቃደ፡ ዚአየ፡ ወተሰወሮ፡ ዝኩ፡ መልአክ፨ ወእምዝ፡ በሳኒታ፡ መጽአት፡ እንታክቲ፡ ብእሲት፡ እንዘ፡ ታስተጋብእ፡ አሕማላተ፡ ገዳም፡ ወረከበ፡ ትእምርታቲሃ፡ በከመ፡ መሀሮ፡ ?? ወተናገራ፡ በከመ፡ ይቤሎ፡ መልአክ፡ እግዚአብሔር። ወይእቲኒ፡ ቅድስት፡ ይእቲ፡ ወአደማ፡ | ላቲ፡ ውእቱ፡ ነገር፡ ዘነገራ፡ እስመ፡ እምኃበ፡ እግዚአብሔር፡ ኮነ፡ ዝነገር፨ ወእምድኅረዝኒ፡ ነበረ፡ ውስተ፡ ገዳም፡ ኀበ፡ ረከበቶ፡ ይእቲ፡ ወለት፡ ታውጽዕ፡ ሎቱ፡ ኅብስተ፡ ወኅምለ፡ ገዳምኒ፡ ብሱለ፡ እምነ፡ ቤተ፡ አቡሃ፨ ወእምድኅረዝ፡ ይቤሎ፡ ላሊበላ፡ ይእቲ፡ ወለት፡ አመ፡ በጽሐት፡ ከመ፡ ትሐውጾ፡ ዘልፈ፡ ወትዋህዮ፡ እም፡ አመ፡ ረከበቶ፡ ኢኃደጉ፡ እንዘ፡ ታመጽዕ፡ ሎቱ፡ ወእምኵለ፡ መባልዕ፡ ዘረከበት፨ ወአሐተ፡ ዕለተ፡ ይቤላ፡ ንግርዮ፡ ለአቡኪ፡ ዘከመ፡ እብለኪ፡ ወነገራ፡ ዘከመ፡ ነገሮ፡ መልአክ፨ ወይእቲኒ፡ አቲዋ፡ ነገረቶ፡

| | ለአቡሃ፡ ወአቡሃኒ፡ ፈራሄ፡ እግዚአብሔር፡ ውእቱ፨ ወያእምር፡ እምቅድመ፡ ይኩን፡ ዘሀለዎ፡ ወአእመረ፡ እምቅድመ፡ ትንግሮ፨ ወይቤላ፡ ሑሪ፡ አምጽዒዮ፡ ወሖረት፡ ወረከበቶ፡ ውስተ፡ ሐቅል፡ ኀበ፡ ኃደገቶ፡ ወአምጽሐቶ፡ ኀበ፡ አቡሃ፨ ወሶበ፡ በጽሐ፡ ኀቤሁ፡ ተአምኁ፡ በበይናቲሆሙ፡ በአምኃ፡ መንፈሳዊት፨ ወእምድኅረ፡ ተአምኁ፡ ይቤሎ፡ አቡሃ፡ ለይእቲ፡ ወለት፡ ለላሊበላ፡ ለምንትኑ፡ ተሐይጣ፡ ለወለትየ፡ ኦወልድየ። ወይቤሎ፡ ላሊበላ፡ አንሰ፡ ኢይሔጥዎክዋ፡ በፈቃደ፡ ርእስየ፤ ወለእመሰ፡ እምኀበ፡ እግዚአብሔርኑ፡ ውእቱ፡ ኢይትኃደግ፡ ዘእንበለ፡| ይኩን፡ ወእመሰ፡ እምኀበ፡ ሰብእኑ፡ ውእቱ፡ የኃልፍ፡ ወይሰአር፡ ወሶበ፡ ይቤሎ፡ ላሊበላ፡ ከመዝ፡ አእመረ፡ ከመ፡ መልአከ፡ እግዚአብሔር፡ አስተርአዮ፡ ሎቱ፡ ወጸውአ፡ ለብእሲቱ፡ አቡሃ፡ ለይእቲ፡ ወለት፤ ወተማከራ፡ ለብእ/ሲ/ቱ፡ ከመ፡ የሀቦ፡ ወለቶ፡ ለላሊበላ፡ ከመ፡ ትኩኖ፡ ብእሲተ፡ ወሠምረት፡ ብእሲቱኒ፡ በዝንቱ፡ ነገር፡ እስመ፡ መአድም፡ ውእቱ፡ ላሊበላ፡ በአርአያሁኒ፤ ወበግርማሁኒ፡ እስመ፡ ጸጋ፡ እግዚአብሔር፡ የዓውዶ፡ ከመ፡ እንተ፡ የዐውደ፡ ፀሐይ፨ ውስተ፡ ጠፈረ፡ ሰማይ፡ ወያበርህ፡ እንዘ፡ ይሄይል፡ ስኑ፡ ወጸዳለ፡ ብርሃኑ። በውስተ፡ አየር፡ ከማሁ፡ የዐውዶ፡ ጸጋ፡ እግዚአብሔር፡ | | ለብፁዕ፡ ወለቅዱስ፡ ላሊበላ፡ ወአቡሃሰ፡ ወእማ፡ ለይእቲ፡ ወለት፡ ወሀብዎ፡ ወለቶሙ፡ ከመ፡ ትኵኖ፡ ብእሲተ፨ ወነሥአ፡ ላሊበላ፡ ለይእቲ፡ ወለት፡ ወረሰያ፡ ብእሲቶ፡ በከመ፡ ሕገ፡ እግዚአብሔር፡ ወተባረኩ፡ ፪ቱ፡ በማዕተበ፡ ጸጋሁ፡ ለኢየሱስ፤ በከመ፡ ተባረኩ፡ ይሰሐቅ፡ ወርብቃ፡ ዘወለድዎ፡ ለአበ፡ ፲ ወ፪ተ፡ አዕፁቀ፡ ዘይት፡ ዘይትጋደሎ፡ በሎዛ፡ ለብእሴ፡ እሳት፤ በህየ፡ ሰመዮ፡ እስራኤል፡ ላሊበላሰ፡ ነበረ፡ ዓዲ፡ እንዘ፡ ያፈደፍድ፡ ፍርሃተ፡ እግዚአብሔር፨ ወገቢረ፡ ፈቃዶ፡ ወእንዘ፡ ይጸመድ፡ ታሕተ፡ አርዑተ፡ ወንጌሉ፡ ለክርስቶስ፡ እምአመ፡ ረከባ፡ ለይእቲ፡ ወለት፡ እስመ፡ | ታፈቅሮ፡ ለእግዚአብሔር። ይእቲ፡ ወለት፡ ወበእንተዝ፡ ትትኤዘዘ፡ ለምታ፡ ከመ፡ ሣራ፡ ትትኤዘዞ፡ ለአብርሃም፤ ወእግዚእየ፡ ትብሎ፡ ወተሐውር፡ በትእዛዙ፡ ወበምዕዳነ፡ ዚአሁ። ወውእቱኒ፡ የሐውር፡ በምዕዳነ፡ ዚአሃ፡ እንዘ፡ ኢይትገኃሥ፡ ለየማን፡ ወለጸጋም፡ እምዕዳነ፡ ዚአሃ። ወይጥዕሞ፡ ቃለ፡ ዚአሃ፡ እመዓር፡ ወሦከር፡ ወከማሁ፡ ሎቱኒ፡ ቃለ፡ ዚአሁ፡ እምአስካለ፡ ወይን፨ ወከመዝ፡ ነበሩ፡ በፍቅረ፡ እግዚአብሔር፤ ፍጹም፡ እስመ፡ እምኀቤሁ፡ ውእቱ፡ ለእግዚአብሔር፤ ኮነ፡ ጽምረቶሙ፤ ወበእንተዝ፡ ኮኑ፡ ፩ ሥጋ፨ በከመ፡ በወንጌል፡ በእንተዝ፡ ይኅድግ፡ ብእሲ፡

| | አባሁ፡ ወእሞ፡ ወትልዋ፡ ለብእሲቱ፡ ወይኩኑ፡ ፪ሆሙ፡ ፩ ሥጋ፡ ወእግዚእነሂ፡ ይቤ፡ በውስተ፡ ወንጌሉ፡ ናሁኬ፡ ፩ዱ፡ ሥጋ፡ እሙንቱ፡ ወኢኮነ፡ ፪ተ፡ ዘእግዚአብሔር፡ አስተጻመረ፡ ሰብእ፡ ኢይፍልጥ፨ ወከመዝ፡ ኮነ፡ ጽምረቶሙ፡ ለላሊበላ፡ ወለመስቀል፡ ክብራ፡ በጽምረት፡ መንፈሳዊ፤ ወአኮ፡ በማዕሌተ፡ አጋንንት፡ በከመ፡ ይገብሩ፡ ሰብአ፡ ዓለም። አላ፡ በከመ፡ ተሠርዓ፡ በሕገ፡ ዘእግዚአብሔር፡ ወበከመ፡ መርዓሁ፡ ለይስሐቅ፡ ምስለ፡ ርብቃ፨ በከመ፡ ይቤ፡ ጳውሎስ፡ ክቡር፡ አውስቦ፡ ወሰብሳቦሙኒ፡ አልቦሙ፡ ስዕበት፡ ወምስካቦሙ፡ ኢኮነ፡ ግማኔ። ወከመዝ፡ ነበሩ፡ ፪ቱ፡ እንዘ፡| ይጸመድዎ፡ ለእግዚአብሔር፡ በፍቅር፡ ወበትሕትና፡ በውስተ፡ ቤተ፡ አቡሃ፡ ለይ/እ/ቲ፡ ወለት፨ ወዝሰ፡ ጸላኢ፡ ሠናያት፡ ዲያብሎስ፡ ሶበ፡ ርእዮሙ፡ በዘከመዝ፡ ግብር፡ ስዕነ፡ ተዓግሦ፨ ወተሀውከ፡ ሀለየ፡ በልቡ፡ ሕሊና፡ ተመይኖ፡ ወቦአ፡ ውስተ፡ ልቦሙ፡ ለሰብእ፡ ለእለ፡ ረከቦሙ፤ እለ፡ ይደልዎሙ፡ ሎቱ፡ ለማኅደሩ፡ ምሩጋነ፡ ወኵስቱራነ፡ ወዕድዋነ፡ ወ/ነ/ፀፈ፡ ውስቴቶሙ፡ ዘርቤታተ፡ ዕኵየ፡ በዘቦቱ፡ ይንገረግር፡ ውስተ፡ ውሳጤ፡ ልቦሙ፡ ወነቢሮ፡ ቀጸቦሙ፡ ከመ፡ ይትነሥኡ፡ ላዕለ፡ ላሊበላ፡ ወነሥኦሙ፡ ከመ፡ ይሑሩ፡ ኀበ፡ ንጉሥ፡ ከመ፡ ያስተዋድይዎ፡ በነገረ፡ ከንቶ፡ በከመ፡ አንሥኦ፡ ለይሁዳ፡ | | ላዕለ፡ መድኃኒነ፡ ከመ፡ ያግብኦ፡ ለሊቃነ፡ ካህናት፡ እሉ፡ እሙንቱ፡ ከለበት፡ ብዙኃን፡ ወአስዋር፡ ስቡሐን፡ ወለእለ፡ እሙንቱ፡ ሰብእ፡ እለ፡ አንሥኦሙ፡ ሰይጣን፡ ላዕለ፡ ላሊበላ፡ መሀሮሙ፡ በከመ፡ መምህር፡ እከየ፤ በከመ፡ ይቤሉ፡ በቅድመ፡ ንጉሥ፡ ናሁ፡ ነሥአ፡ ለላሊበላ፡ ወለተ፡ ዘተሐጽየት፡ ለካልዕ፡ ብእሲ፡ ወረሰያ፡ ብእሲቶ፡ ኢታርምሞ፤ በእንተዝ፡ ነገር፡ ኦንጉሥ። ወናሁ፡ ሲመተ፡ መንግሥትኒ፡ ይጸንሕ፡ በ ቲ/አ/ከ፡ በኵለሄ፤ ወለእመሰ፡ አርመምከ፡ ይሜብል፡ ላዕለ፡ ኵሉ፡ ሰብእ፨ ወዝኩሰ፡ ነጋሢ፡ እሁኁ፡ ለላሊበላ፡ ሶበ፡ ሰምዓ፡| ምክንያተ፡ ነገር፡ አዘዘ፡ ያምጽእዎ፡ እስመ፡ እምቀዲሙ፡ ይቀንዕ፡ እንበይነ፡ መንግሥቱ፡ ላዕለ፡ ላሊበላ፡ እለ፡ ተፈነው፡ እምኀበ፡ ንጉሥ፡ ወረከብዎ፡ ለላሊበላ፡ ወይቤልዎ፡ ነአ፡ ይቤለከ፡ ንጉሥ፨ ወተሥዕሎሙ፡ ላሊበላ፡ ወይቤሎሙ፡ በእንተ፡ ምንት፡ ይጼውዓኒ፡ ንጉሥ፡ ሊተ፡ ላግፉዕ፡ ዘነበርኩ፡ እንዘ፡ እሰደድ፡ እምኔሁ፡ እንዘ፡ አልቦ፡ ዘገበርኩ። ወይእዜኒ፡ አኮ፡ ለሠናይ፡ ዘይጼውዓኒ፡ ወይመስለኒሰ፡ ዘረከቦ፡ ፩አደ፡ ምክንያተ፤ ወበእንተዝ፡ ተንሥአ፡ ልቡ፡ ላዕሌየ፡ ከመ፡ ያሕምመኒ፨ በከመ፡ ተንሥአ፡ ልበ፡ ሳኦል፡ ላዕለ፡ ዳዊት፡ ወኃሠሥ፡ ከመ፡

| | ይቅትሎ፡ እንበይነ፡ ቅንዓት፡ መንግሥቱ፨ ወመኑ፡ ካዕበ፡ ዘነገሮ፡ ከመ፡ ዘሀለውኩ፡ ዝየ፨ አኮኑ፡ ነበርኩ፡ እንዘ፡ አአይል፡ እምገዳም፡ ገዳመ፡ ወእምበዓታት፡ በዓታተ፨ እንዘ፡ እጐይይ፡ እምቅድመ፡ ገጹ፡ ለእኁየ፡ በከመ፡ ጐየ፡ ዳዊት፡ እምገጸ፡ ሳኦል፤ ወዳዊት፤ ኢኮኑ፡ አኃወ፡ ቅሩባነ፡ በሥጋ፡ አላ፡ አንጋደ፡ እማንቱ፡ ሳኦል፡ ወልደ፡ ቂስ፡ ዘእምነ፡ ነገደ፡ ብ/ን/ያም፡ ወዳዊት፤ ወዘእምነገደ፡ ይሁዳ፡ አንሰ፡ እምእኁየ፡ ተሰደድኩ፡ ህየንተ፡ እምተፈሣሕኩ፡ በመንግሥቱ፡ ለእኁየ፡ ረከባኒ፡ ሐዘን፡ ብዙኅ፨ ወህየንተ፡ ዘአ/ፍ/ቀረኒ፡ ፀልአኒ፡ እኁየ፡ ወይእዜኒ፡ አኃውየ፡ ንግሩኒ፡ ለእመ፡| አእመርክሙ፡ በእንተ፡ ምንት፡ ምክንያት፡ ዘይጼውዓኒ፨ ወይቤልዎ፡ ለአከኒ፡ ንጉሥ፡ ነአ፡ እምከመ፡ በጻሕኩ፡ ታእምር፡ ምክንያተ፡ ጽዋዔከ፡ ወዘንተ፡ ብሂሎሙ፡ ወሰድዎ፡ ወበጽሐ፡ ላሊበላ፡ ኀበ፡ ንጉሥ፤ ወይቤሎ፡ ነጋሢ፡ ለምንት፡ ገበርከ፡ ከመ፡ ዘኢይከውን፡ ገቢር፡ በመዋዕለ፡ መንግሥትየ፤ ወለምንት፡ ዘነሣእከ፡ ወለተ፡ ዘተሐጽየት፡ ለካልዕ፡ ብእሲ፨ ወይቤሎ፡ ላሊበላ፡ አብሐኒ፡ ከመ፡ እትናገር፡ ወይቤሎ፡ ነጋሢ፡ አባሕኩከ፡ ተናገር፡ ወይቤሎ፡ ላሊበላ፡ አልቦ፡ እግዚኦ፡ ኢነሣእኩ፡ ዘኢያብጽሐኒ፡ እግዚአብሔር፡ ወአልቦ፡ | | ዘተአገልክዎ፡ ወኢለመኑሂ፨ ወመጽኡ፡ ካልዓን፡ ሰብእ፡ እለ፡ አስተዋደይዎ፡ ኀበ፡ ንጉሥ፡ አኮኑ፡ ስምዕነ፡ ላዕሌሁ፡ ወይቤሉ፡ ነሥአ፡ ወለተ፡ ዘተሐጽየት፡ ለካልዕ፡ ብእሲ፨ ወዘንተ፡ ሶበ፡ ሰምዓ፡ ነጋሢ፡ አዘዘ፡ ከመ፡ ይዝብጥዎ፡ ወላሊበላሰ፡ አሐዘ፡ ከመ፡ ይበል፡ እንዘ፡ ድልው፡ ለተቀስፎ፡ ይቤ፡ ኪያከ፡ ተወከልኩ፡ እግዚኦ፡ ወኢይትኃፈር፡ ለዓለም፨ ወበጽድቅከ፡ አንግፈኒ፡ ወባልሐኒ፨ አጽምእ፡ እዝነከ፡ ወፍጡነ፡ አድነኒ፡ ኵነኒ፡ አምላኪየ፡ ወመድኃንየ፡ ወቤተ፡ ጸወኒንየ፡ ከመ፡ ታድኅነኒ፨| እስመ፡ ኃይልየ፡ ወጸወንየ፡ አንተ፨ ወአውጽአኒ፡ እምዛቲ፡ መሥገርት፡ እንተ፡ ኅብዑ፡ ሊተ፡ እስመ፡ አንተ፡ ረዳኢየ፡ እግዚኦ፡ ውስተ፡ እዴከ፡ አመኃፅን፡ ነፍስየ። ቤዝወኒ፡ እግዚአብሔር፡ አምላከ፡ ጽድቅ፨ ወክድነኒ፡ በጽላሎተ፡ ክነፊከ፡ ወዘንተ፡ እንዘ፡ ይብል፡ አሐዙ፡ ይዝብጥዎ፡ ሐራሁ፡ ለንጉሥ፡ ወንጉሥሠ፡ አዚዞ፡ ከመ፡ ይዝብጥዎ፡ ሐረ፡ ውስተ፡ ቤተ፡ ክርስቲያን፡ ከመ፡ ይትመጠው፡ ቍርባነ፨ ወሶበ፡ ወጠኑ፡ ቀሢፎቶ፡ ለላሊበላ፡ ኢያንተጉ፡ እስከ፡ ይወጽእ፡ ንጉሥ፡ እምቤተ፡ ክር/ስ/ቲያን፡ ተመጢዎ፡ ቍርባነ፨ ወሶበ፡ ወጠኑ፡ እንዘ፡ ይትባረዩ፡ በበ፬ ወእግዚአብሔርሰ፡ ኢተኃዮኀሙ፡

| | ለእለ፡ ይትዌከሉ፡ ቦቱ፡ ፈነወ፡ መልአኮ፡ ከመ፡ ይሰውሮ፡ በክነፊሁ፡ ብርሃናዊ፤ ከመ፡ ኢይርከቦ፡ መቅሠፍቶሙ፡ ለሐራ፡ ንጉሥ፤ ወወረደ፡ መልአከ፡ ጽድቅ፡ ወሰወሮ፡ ለላሊበላ፡ በአክናፊሁ፡ ብሩሃቶ፤ ወመልአክሰ፡ ዓ/ቃ/ቢሁ፡ ውእቱ፡ ዘተውህቦ፡ እምኀበ፡ እግዚአብሔር፡ ከመ፡ ይዕቀቦ፡ በኵሉ፡ መዋዕሊሁ፨ ወንጉሥሰ፡ ሶበ፡ ሰምዓ፡ እምቤተ፡ ክርስቲያን፡ ድምፀ፡ ጥብጣቤ፡ ወይቤሎሙ፡ ለእለ፡ ሀለው፡ ምስሌሁ፡ ምንትኑ፡ ዝንቱ፡ ድምፅ፡ ዘዕሰምዕ፨ አኮነ፡ አንተ፡ አዘዝከ፡ እንዘ፡ ትበውዕ፡ ውስተ፡ ቤተ፡ ክርስቲያን፡ ከመ፡ ይቅሥፍዎ፡ ለላሊበላ፡ ይቤ፡ ኪያሁ፡ ይቅሥፉ፡ እስከ፡ ይእዜ፡ ወደንገፀ፡| ንጉሥ፡ ወመሰሎ፡ ከመ፡ ዘይመውት፨ ወአዘዘ፡ ከመ፡ ይኅድግዎ፡ ወኃደግዎ፡ ሐራ፡ ንጉሥ፡ ወላሊበላሰ፡ ኢረከቦ፡ ወኢምንተኒ። ወአ/ን/ከሩ፡ ኵሎሙ፡ ተዓይን፡ ወንጉሥኒ፡ ተደመ፡ ሶበ፡ ርእዮ፡ ለላሊበላ፡ ከመ፡ ኢለከፎ፡ ወኢምንተኒ፡ እምቅሥፈታት፡ ወተመይጠ፡ ላሊበላ፡ ኀበ፡ ሀለወት፡ ብእሲቱ፡ ወነገገራ፡ ኵሎ፡ ዘከመ፡ ረሰይዎ፤ ወዘከመ፡ አድኃኖ፡ እግዚአብሔር፡ እምቅሥፈታቲሆሙ፡ ሰወሮ፡ በክነፈ፡ መልአክ። ብርሃናዊ፤ ወአእኰትዎ፡ ኅቡረ፡ ለእግዚአብሔር፡ እንዘ፡ ይብሉ፡ ይትባረክ፡ እግዚአብሔር፡ አምላከ፡ እስራኤል፡ ዘተሣሃለነ፤ ወገብረ፡ መድኃኒተ፡ ለሕዝበ፡ | | ዚአሁ፡ ወይትባረክ፡ ስመ፡ ስብሐቲሁ፤ እስመ፡ ኢይገድፎሙ፡ ለእለ፡ ይትዌከሉ፡ ቦቱ፡ ወረዳኢሆሙ፡ ውእቱ፡ ለኵሎሙ፡ እለ፡ ገደፉ፡ ህሊናሆሙ፡ ላዕሌሁ፨ በከመ፡ ይቤ፡ በአፈ፡ ነቢይ፡ እስመ፡ ብየ፡ ተወከለ፡ አድኅኖ፤ ወእከድኖ፡ እስመ፡ አእመረ፡ ስምየ፡ ይጼውዓኒ፡ ወእስጠዎ፡ ሀሎኩ፡ ምስሌሁ፡ አመ፡ ምንዳቤሁ፡ አድኅኖ፡ ወእሴብሖ፨ ለነዋኅ፡ መዋዕል፡ አጸግቦ፡ ወአርእዮ፡ አድኅኖትየ፨ ወይምላዕ፡ ስብሐቲሁ፡ ኵሎ፡ ምድረ፡ ለይኩን፡ ለይኩን። ወዘንተ፡ ብሂሎሙ፡ እንዘ፡ ይትናዘዙ፡ በከመ፡ ይትናዘዝ፡ ፍቁር፡ ምስለ፡ ፍቁሩ፡ ወአርክ፡ ምስለ፡ አርኩ፡ ወተናዘዘ፡ | ውእቱኒ፡ በምዕዳነ፡ ዚአሀ፨ ወይእቲኒ፡ ተናዘዘት፡ በምዕዳነ፡ ዚአሁ፡ እስመ፡ ድኅነ፡ ምታ፡ እምቅሥፈታት፡ እስመ፡ አብጽሐ፡ ውስተ፡ መቅሠፍት፤ በእንቲአ፡ በከመ፡ ተቀሥፈ፡ ክርስቶስ፡ በእንተ፡ ቤተ፡ ክርስቲያን፨ በከመ፡ ይቤ፡ ጳውሎስ፡ ዘአፍቀረ፡ ብእሲቶ፡ ርእሶ፡ አፍቀረ፡ ወዘንተ፡ ሰሚዖ፡ ላሊበላኒ፡ ይልህብ፡ በፍቅረ፡ ዚአሃ፡ ወይእቲኒ፡ በፍቅረ፡ ዚአሁ፡ ንድፍት፡ ይእቲ፡ ለክርስቶስ፤ በከመ፡ ታፈቅሮ፡ ቤተ፡ ክርስቲያን፨ ጸሎቶሙ፡ ወስዕለቶሙ፡ ወሀብተ፡ ረድኤቶሙ፡ ወተወክፎ፡ መሥዋዕቶሙ፡ ወመዓዛ፡ ዕጣኖሙ፡ ዘእሉድ፡ ውስተ፡ ሰያሆሙ፡ ለ፳ ወ ፬ ካህናት፡

| | ፱ ሰማይ፡ ወነጠብጣበ፡ ሀፎሙ፡ ዘበሰጊድ፡ ወጻማ፡ ድካሞሙ፡ ዘበቀዊም፤ ወጻሕቀ፡ ዚአሆሙ፡ ዘበትጋህ፡ ወነጸፍጻፈ፡ አንብዖሙ፤ ዘበፍቅረ፡ እግዚአብሔር፡ ወመፍቀደ፡ ሩጸቶሙ፡ ለገይሰ፡ ቤተ፡ ክርስቲያን፤ ወለናዝዞ፡ ሙቁሐን፡ ወስነ፡ ይዋሄሆሙ፡ ዘይትሜሰል፡ ከመ፡ ይዋሄ፡ በግዕ፤ ወሀብተ፡ ምጽዋቶሙ፡ ዘኅቡዕ፡ ወዘክሱት፤ ወኵሉ፡ ጻሕቀ፡ ተጸምዶቶሙ፡ ዘጾሩ፡ በሥጋሆሙ፡ ላሊበላ፡ ወመስቀል፡ ክብራ፡ የሀሉ፡ ምስለ፡ አግብርቲከ፡ ምህርካሥላሴ፡ ወአቡሁ፡ ሃይለሚካኤል፡ ዘሚካኤል፡ ወምስለ፡ ኵልነ፡ እለ፡ ይትአመኑ፡ በኃይለ፡ ጸሎቶሙ፡ ለእሉ፡ ፪ቱ አዕናቍ፡ ክቡራብ፡ ወጽዱላን፡ እለ፡ ያዋክዩ፡| ዘቀዳሚት፡ በውስተ፡ ጽልመት፡ ይኩኑነ፡ መርሐ፡ በኀበ፡ ኵሉ፡ ዘወፈርነ፡ ወኀበ፡ ኵሉ፡ ዘአተውነ፡ በፍጽምነኒ፡ ወበከዋላነኒ፡ በየማንነኒ፡ ወበጸጋምነ፡ ዘእስከ፡ ነፍስ፡ አግብርቲከ፡ ወአቡሁ፡ ማርያም፡ ዘሚካኤል፡ ለዓለመ፡ ዓለም፡ አሜን፨ ወእምዝ፡ ሀለየ፡ ላሊበላ፡ ኵሎ፡ ምንዳብያቲሁ፡ ዘረከቦ፡ እምኀበ፡ ኵሎሙ፡ አዝማዲሁ፡ ሰብእ፤ ወእምኀበ፡ ኵሎሙ፡ ሕሰብእ፡ ዘተአየነ፡ ኵርጓኔ፡ ንጉሥ፤ ይቤላ፡ ለብእሲቱኒ፡ ንዒ፡ ንጻእ፡ ሐቅለ፡ ከመ፡ ናዕርፍ፡ እምእሉ፡ ሰብእ፡ እለ፡ ይጻረሩነ፡ እስመ፡ ይኄይስ፡ ነቢር፡ ምስለ፡ አራዊት፡ ወእምነቢር፡ ምስለ፡ ሰብእ፡ ዘግዕዙ፡ ግዕዘ፡ እከይ፨ ወዘንተ፡ ብሂሎ፡ | | ነሥአ፡ ለብእሲቱ፡ እስመ፡ ሠምረት፡ በዝ፡ ነገር፨ ወወጽአ፡ ምስሌሃ፡ ውስተ፡ ገዳም፡ ወነበሩ፡ ህየኒ፡ በፍቅር፡ ጽፉቅ፡ እንዘ፡ እግዚአብሔር፡ የዓቅቦሙ፡ ወይሜግቦሙ፨ በኵሉ፡ ወበኵሉ፡ እምዝ፡ ኮነ፡ አሐተ፡ ዕለተ፡ ወጽኡ፡ ውስተ፡ ገዳም፡ ወኃደሩ፡ ውስተ፡ አሐቲ፡ በአት፨ ወኃጥኡ፡ ዘይደረሩ፡ ወይቤላ፡ ላሊበላ፡ ለብእሲቱ፡ ተንሥኢ፡ ንጼሊ፡ ኀበ፡ እግዚአብሔር፡ ከመ፡ የሀበነ፡ ዘንዴረር፨ ወትቤሎ፡ ብእሲቱ፡ ኦሆ፡ ኦእግዚእየ፨ ወጸለዩ፡ እንዘ፡ ይብሉ፡ ሰፊሖሙ፡ እደዊሆሙ፡ ወአንቃዕዲዎሙ፡ አዕይንቲሆሙ፡ ላዕለ፡ ውስተ፡ ሰማይ፨ ግነዩ፡ ለእግዚዕብሔር፡ እስመ፡ ኄር፡ እስመ፡ | ለዓለም፡ ምሕረቱ፨ ዘይሁብ፡ ሲሳየ፡ ለኵሉ፡ ዘሥጋ፡ እስመ፡ ለዓለም፡ ምሕረቱ፡ ወዓዲ፡ ሰአልዎ፡ እንዘ፡ ይብሉ፡ አቡነ፡ ዘበሰማያት፡ ይትቀደስ፡ ስምከ፡ ሲሳየነ፡ ዘለለዕለትነ፡ ኀበነ፡ ዮም፡ ኅድግለነ፡ አበሳነ፡ ወጌጋየነ፡ ከመ፡ ንሕነኒ፡ ንሕድግ፡ ለዘአበሰ፡ ለነ፨ ወኢታብአነ፡ ውስተ፡ መንሱት፡ ወነጽር፡ ውስተ፡ ብሕትውናነ፨ እስመ፡ አንተ፡ ትቤ፡ በአፈ፡ ነቢይከ፡ ግድፍ፡ ሕሊናከ፡ ላዕለ፡ እስዚአብሔር፡ አምላክከ፡ ወውእቱ፡ ይሴስየከ፨ ወበእንተዝ፡ ገደፍነ፡ ሕሊናነ፡ ኀቤከ፡ እግዚአብሔር፨ እስመ፡ አንተ፡ መብልኦሙ፡ ለነዳያን፡ ወመሲስይ፡ ለኵሉ፡ ዘሥጋ፡ እስመ፡ አንተ፡

| | ሲሰይኮሙ፡ ለሕዝብከ፡ እስራኤል፡ መና፡ ዘኢተዘርአ፡ ውስተ፡ ምድር፡ ዘኢበቈለ፡ በዝናም፡ ዘኢያሕጸሮ፡ አየር፨ ወይእዜኒ፡ ትክል፡ አጽንዖተነ፡ በፈቀድከ፡ እመኒ፡ በሲሳይ፡ ወእመኒ፡ ዘእንበለ፡ ሲሳይ፨ እስመ፡ አንተ፡ አጽናዕኮሙ፡ ለብዙኃን፡ እንበለ፡ ሲሳይ፨ ወበሲሳይኒ፡ ለብዙኃን፡ መገብኮሙ፨ ወኢያኅጣዕክዎሙ፡ እምዘ፡ ፈቀዱ፡ ዘእንበለ፡ ሲሳይ፡ ዘጽኑዕ፡ በኃይለ፡ ዚአከ፡ እሉ፡ እሙንቱ፡ ሙሴ፡ ፩ ነበረ፡ ፵ ኢይበልዕ፡ እክለ፡ ወኢይሴቲ፡ ማየ፨ ወኤልያስኒ፡ ፩፵ ማየ፡ እንዘ፡ ኢይሰቲ፡ ወእንዘ፡ ኢይበልዕ፡ እክለ፨ ወፈድፋደሰ፡ ዘየዓቢ፡ እምእሉ፡ ኖኃተ፡ ጾመ፡ | አጽናዕኮ፡ ለአቤሜሌክ፡ ፷ ወ ፯ ዓመተ፡ ዘእንብለ፡ መብልዕ፡ ወመስቲ፡ አመረ፡ በትእዛዘ፡ እ/ግ/ዚእከ፡ ወበትእዛዘ፡ መምሕሩ፨ ከመ፡ ኢይርአይ፡ ሙስናሃ፡ ለኢየሩሳሌም፡ በምክንያተ፡ ድውያን፡ እስመ፡ አዘዘ፡ ኢርምያስ፡ ከመ፡ ያምጽእ፡ በለሰ፡ ለፈውሶ፡ ድውያን፨ ወበህየ፡ ከደንከ፡ በመንጦላዕተ፡ ሣህልከ፨ እንዘ፡ ትሴስዮ፡ ንዋ፡ ሠናየ፡ ፷ ወ፯ ዓመተ፡ ወለነኒ፡ በዘፈቀደከ፡ ትክል፡ አጽንዖተነ፨ ወለከ፡ ስብሐት፡ ለዓለመ፡ ዓለም፡ አሜን፨ ወሶበ፡ ፈጸሙ፡ ጸሎቶሙ፡ አንሶሰወት፡ መስቀል፡ ክብረ፡ ውስተ፡ ውሳጤ፡ በዓት፡ ወረከበት፡ በህየ፡ | | ጴርድክይሲ፡ ዓቢየ። ወነጺሮ፡ ላሊበላ፡ ወባረኮ፡ ለእግዚአብሔር፡ እንዘ፡ ይብል፡ ቡሩክ፡ እግዚኦ፡ ዘበልዑላን፡ ተዓርፍ፡ ወትሑታን፡ ትኔጽር፡ ወትሬኢ፨ ወትካትኒ፡ ለሕዝብከ፡ እስራኤል፡ አውረድከ፡ ሎሙ፡ ዖፈ፡ ድርንቅ፤ በከመ፡ ይቤ፡ ነቢይከ፡ ወከመ፡ ኆፃ፡ ባሕር፡ አዕዋፍ፡ ዘይሰርር፨ ወወድቀ፡ ማዕከለ፡ ተአይኒሆሙ፡ ወአውደ፡ ደባትሪሆሙ፤ በልዑ፡ ወጸግቡ፡ ጥቀ፡ ወወሀቦሙ፡ ለፍትወቶሙ፡ ወኢያኅጥኦሙ፡ እምዘ፡ ፈቀዱ፨ ወለነኒ፡ ኢያኅጣእከነ፡ ለአግብርቲከ፡ እለ፡ ሰዱነ፡ እምሰብእ፡ በእንተ፡ ኃጢአትነ፡ ወውእቱ፡ ዖፍ፡ ተሴስዮሙ፡ ኃደሩ፡ እንዘ፡ | ይአኵትዎ፡ ለእግዚአብሔር፤ ጸሎቶሙ፡ ወበረከቶሙ፡ የሃሉ፡ ምስሌነ፡ ወይባርከነ፡ ወሊተኒ፡ ለኃጥእ፡ ገብርከ፡ ሚካኤል፡ ለዓለመ፡ ዓለም፡ አሜን፨ ወእምዝ፡ ነበሩ፡ ፪ሆሙ፡ ምስለ፡ ይእቲ፡ ወለት፡ ውስተ፡ ይእቲ፡ በአት፡ ኀበ፡ በጽሑ፡ በይእቲ፡ ዕለት፡ እንዘ፡ ይሴሰዩ፡ ዘአቅረበ፡ ሎሙ፡ መንፈሰ፡ ቅዱሰ፡ እምዓቃቂራተ፡ ገዳም። እንዘ፡ ይትሜሰልዋ፡ ለመክብበ፡ ነቢያት፡ ኢሳይያስ፨ ወለካልአኒሁ፡ ነቢያት፡ ዘነበሩ፡ እንዘ፡ ይሴሰዩ፡ እምአኅማላተ፡ ገዳም፡ ጐይዮሙ፡ እምዐመፃ፡ ወግፍዕ፡ ዘይትገበር፡ በኢሩሳሌም፤ ወአልቦሙ፡ ካልዕ፡ ሲሳይ፡ ዘእንበለ፡

| | ስንቀ፡ አኅማል፨ ወእሉኒ፡ አፍሕርተ፡ ነቢያት፡ ላሊበላ፡ ወመስቀል፡ ክብራ፡ ነበሩ፡ እንዘ፡ ይኤይሉ፡ ውስተ፡ አድባር፡ ከመ፡ ዖፍ፡ ወእምዝ፡ ተፈነው፡ እምሐራ፡ ንጉሥ፡ እለ፡ የኃሥሥዎሙ፡ ለላሊበላ፡ ወለመስቀል፡ ክብራ፡ ውስተ፡ ኵሉ፡ አኅጉር፡ ወውስተ፡ ኵሉ፡ ገዳማት፨ ወውስተ፡ ኵሉ፡ መካናት፡ ከመ፡ ይቅትልዎሙ። በእንተ፡ ቅንዓቶሙ፡ እስመ፡ አንሥኦሙ፡ ሰይጣን፡ ላዕለ፡ አግብርተ፡ እግዚአብሔር፡ ከመ፡ ያመክርዎሙ፨ ወእሙንቱኒ፡ አግብርቲሁ፡ ለሥሉስ፡ ቅዱስ፡ ከመ፡ ተመኪሮሙ፡ ይነሥኡ፡ አክሊለ፡| ሰብሐት፡ ዘኢይጸመሂ፡ ዘአሰፈዎሙ፡ እግዚአብሔር፡ ለእለ፡ ያፈቅርዎ፤ እስመ፡ ሎሙ፡ ይእቲ፡ ፈተና፡ ወመከራ፤ በዘይትዓወቅ፡ ፍቅረ፡ እግዚአብሔር፡ ዘላዕሌሆሙ፨ ለእመ፡ ተወክፉ፡ በአኰቴት፡ ይእቲ፡ በኀበ፡ እግዚአብሔር፨ ወእሙንቱኒ፡ ዘንተ፡ ተወኪፎሙ፡ ንዴቶሙ፡ በአከቴት፡ በኀበ፡ ተወክፈ፡ ኢዮብ፡ መከራሁ፡ ለሰይጣን፡ እንዘ፡ የአኵቶ፡ ለእግዚአብሔር፡ በኵሉ፡ ምንዳቤሁ። ዘበጽሐ፡ ይብል፡ እግዚአብሔር፡ ወሀበ፡ ወእግዚአብሔር፡ ነሥአ፨ ወይኩን፡ ቡሩከ፡ ስሙ፡ ለእግዚአብሔር፨ ዕራቅየ፡ ወጻዕኩ፡ እምከርሠ፡ እምየ፡ | | ወእራቅየ፡ እገብዕ፨ ወእሉኒ፡ ከዋክብት፡ ብሩሃን፡ ላሊበላ፡ ወመስቀል፡ ክብራ፡ ተሊዎሙ፡ አሠሮ፡ ለኢዮብ፡ ተወክፉ፡ ተፅናሶሙ፡ በአኰቴት፨ በከመ፡ ይቤ፡ ሐዋርያ፡ አርአያሃሰ፡ አኃዊነ፡ ለትእግሥተ፡ ተፅናስክሙ፨ ብክሙ፡ ነቢያት፡ እለ፡ ተናገሩ፡ በቃሉ፡ ለእግዚአብሔር፡ ሰማዕክሙ፡ ትዕግሥቶ፡ ለኢዮብ፤ ዘከመ፡ ገብረ፡ ወፈጸመ፡ ሎቱ፡ እግዚአብሔር፡ ወርኢክሙሂ፡ ከመ፡ ብዙኅ፡ ምሕረቱ፡ ለእግዚአብሔር፡ ወመስተሣህል፡ ውእቱ፨ ወእሉሰ፡ ዕፀወ፡ ዘይት፡ ወገነት፡ ላሊበላ፡ ወመስቀል፡ ክብራ፡ ፆሩ፡ ፍሬያተ፡ ትዕግሥት፡ ምስለ፡ ኵሉ፡| አቅማኅ፡ ምግባራተ፡ ሠናይ፤ ተወልቲዎሙ፡ በፍቅረ፡ እግዚአብሔር፡ ወእሉሰ፡ ሐራ፡ ንጉሥ፡ እለ፡ ተፈነው፡ ከመ፡ ይኅሥሥዎሙ፡ እንዘ፡ ኢይረክብዎሙ፡ አስተርአዮሙ፡ መልአከ፡ እግዚአብሔር፡ በውስተ፡ ገዳም፡ ለላሊበላ፡ ወለመስቀል፡ ክብራ፡ ወይቤሎሙ፡ ናሁ፡ መጽኡ፡ ወዓልተ፡ ንጉሥ፡ ከመ፡ ይኅሥሡክሙ፡ ተንሥኡ፡ እምዝየ፡ ወንዑ፡ ትልውኒ፡ ኀበ፡ እመርሐክሙ፡ ወውእቱሰ፡ መልአክ፡ ገብርኤል፡ ስሙ፡ ወዘአዕረጎሂ፡ ለላሊበላ፡ ውስተ፡ ሰማይ፡ ወዘሰወሮሂ፡ አመ፡ ፈቀዱ፡ ይቅሥፍዎ፡ ወዘተአዘዘሂ፡ እምኀበ፡ እግዚአብሔር፡ ከመ፡ ይዕቀቦ፡

| | በኵሉ፡ መዋዕሊሁ፡ ለሊሁ፡ ውእቱ፡ ገብርኤል፤ ወውእቱሰ፡ መልአክ፡ ክቡር፡ ብርሃናዊ፡ ዘሰዩም፡ ዲበ፡ አዕላፍ፨ መርሖሙ፡ እንዘ፡ የሐውር፡ ፍጽመ፡ ቅድሜሆሙ። በከመ፡ መርሖ፡ ሚካኤል፡ ለጴጥሮስ፡ ሊቀ፡ ሐዋርያት፨ ወውእቶሙስ፡ ተለውዎ፡ ለገብርኤል፤ በከመ፡ ተለዎ፡ ጴጥሮስ፡ ለሚካኤል፡ ሊቀ፡ መላእክት፡ ተፈቲሖ፡ እሞቅሑ፡ ለሄሮድስ፡ ወአምሢጦ፡ እማዕከለ፡ ፪ቱ፡ ሰገራት፡ እስከ፡ ወጽአ፡ አሐተ፡ ሰኰተ፡ ወካልአ፡ ወጽአ፡ ኆኅተ፡ ሐፂን፡ ወተርኅወት፡ ለሊሃ፡ እምክበደ፡ ግርማሁ፡ ለሚካኤል፡ ሊቀ፡ ኃይላት፨ ከማሁ፡ ተለውዎ፡ ላሊበላ፡ ወወመስቀል፡ ክብራ፡ | ለገብርኤል፡ ዘመርሖሙ፡ ከመ፡ ያድኅኖሙ፡ ወይኅብኦሙ፡ እምሐራ፡ ንጉሥ፡ እለ፡ ወጽኡ፡ ይኅሥሥዎሙ፡ ወአኮ፡ መጠነ፡ አሐቲ፡ ሰኰት፨ ወካልእታ፡ መሪሆ፡ ዘኃደጎሙ፡ አላ፡ ወሰዶሙ፡ ወአብጽሖሙ፡ ብሔረ፡ ምሥራቅ፨ ወይእቲሰ፡ ብሔር፡ ጥንተ፡ ክርስትና፡ ይእቲ፡ ዘምድረ፡ ኢትዮጵያ፡ ወአብጽሖሙ፡ ህየ፡ ገብርኤል፡ ወይቤሎሙ፡ ንበሩ፡ ዝየ፨ እስከ፡ ትፈልጡ፡ አመ፡ በጽሐ፡ ፈቃደ፡ እግዚአብሔር፡ አመ፡ ሀለዎ፡ ላሊበላ፡ ከመ፡ ይሑር፡ ሀገረ፡ ኢየሩሳሌም፡ ወአንቲሰ፡ መስቀል፡ ክብራ፡ ንበሪ፡ ዝየ፡ እስከ፡ ይትመየጥ፡ እኁኪ፡ ነጺሮ፡ ኵሎ፡ መካናተ፡ ምሥጢር፡ | | ዘእግዚእ፡ ኀበ፡ ተጠምቀ፡ ወኀበ፡ ተሰቅለ፡ ወኀበ፡ ተቀብረ፤ ወኀበ፡ ተወለጠሂ፡ ራዕዩ። ወደብረ፡ ዕርገቱኒ፡ እንተ፡ እምኔሃ፡ ዓርገ፡ ኀበ፡ አቡሁ፤ ወነበረ፡ በየማነ፡ ወላዲሁ፨ ወኵሎ፡ መካናተ፡ ዘአንሶሰወ፡ በትሰብእት፡ ወልድ፡ ዋህድ፡ ነጺሮ፡ ላሊበላ፡ እስከ፡ ይገብእ፡ ኀቤኪ፡ ዝየ፡ ንበሪ፡ ወዘንተ፡ ሰሚዓ፡ መስቀል፡ ክብራ፡ አሐዘት፡ ትተክዝ፡ በእንተ፡ ተፈልጦቱ፡ ለምታ። ወሶበ፡ ርእያ፡ ገብርኤል፡ ለመስቀል፡ ክብራ፡ እንዘ፡ ተሐዝን፡ በእንተ፡ ዝንቱ፡ ነገር፨ ይቤላ፡ ለምንት፡ ታበውዒ፡ ሐዘነ፡ ውስተ፡ ልብኪ፡ እስመ፡ አኮ፡ ባሕቲትኪ፡ ዘነኃድገኪ፡ አላ፡ እግዚአብሔር፡| ይሄሉ፡ ምስሌኪ። አላ፡ ተአዘዘ፡ ለኪ፡ እምኀቤሁ፡ መልአክ፡ ዓቢይ፡ ዘይቀውም፡ በየማኑ፡ ለአኃዜ፡ መልአከ፡ ኪዳኑ፡ ውእቱ፡ ዘይሰየም፡ ዲበ፡ ኃይላቲሁ፡ ከመ፡ ይዕቀብኪ፤ ወአነ፡ ተአዘዝኩ፡ ከመ፡ ዕዕቀቦ፡ ለምትኪ። ወዘንተ፡ ብሂሎ፡ ተሰወሮሙ። ለላሊበላ፡ ወለመስቅል፡ ክብራ፡ ነበሩ፡ ህየ፡ በተጸምዶ፡ ዓቢይ፡ በጾም፡ ወበጸሎት፡ በቀዊም፡ ወበሰጊድ፤ መጠነ፡ ነበሩ፡ ውስተ፡ ይእቲ፡ ብሔር፡ ኅቡረ። ወእምድኅረ፡ ኅዳጥ፡ መዋዕል፡ አስተርአዮሙ፡ ገብርኤል፡ ሊቀ፡ መላእክት፤ ወይቤሎሙ፡ ሰላም፡ ለክሙ፡ ኦአግብርተ፡ እግዚአብሔር፡ ሰላምከ፡ ያዕርፍ፡

| | ላዕሌነ። አምሉአ፡ ብርሃን፡ ወፍሥሐ፡ ገጽ፡ አብሳሬ፡ ፍሥሐ፨ ወይቤሎሙ፡ በጽሐ፡ ጊዜሁ፡ ለነጊድ፡ ውስተ፡ ኢሩሳሌም፡ ዘነገርኩክሙ፡ ቅድመ። ወይእዜኒ፡ ተሰአሉ፡ በበይናቲክሙ፡ ወናሁ፡ አነኒ፡ ተአዘዝኩ፡ ከመ፡ እሰዶ፡ ለላሊበላ፡ ሀገረ፡ ኢየሩሳሌም፡ ኀበ፡ ተወልደ፡ እግዚእነ፡ ወኀበ፡ ፈጸመ፡ ኵሎ፡ ግብረ፡ በእንተ፡ አፍቅሮተ፡ ሰብእ። ወይቤሎ፡ ላሊበላ፡ ለገብርኤል፡ አይቴኑ፡ ሀሎ፡ ሚካኤል፡ ዘተአዘዘ፡ ከመ፡ ይዕቀባ፡ ለዛቲ፡ ዓመትከ፡ ኦእግዚእየ፡ እስመ፡ አልባቲ፡ ፩ዱኒ፡ እምሰብእ፡ ዘይናዝዛ፤ እምድኅረ፡ ተሌለየት፡ እምኔየ። ወይቤሎ፡| ነዋ፡ ይቀውም፡ ማዕከሌክሙ፡ ወሶቤሃ፡ ርእይዎ፡ ለሚካኤል፡ ላሊበላ፡ ወመስቀል፡ ክብራ፡ ወአምሕዎ፡ በዓቢይ፡ ፍርሃት። ወዲቆሙ፡ ውስተ፡ ምድር፡ እስመ፡ በግርማ፡ ዓቢይ፡ ርእ/ይ/ዎ፡ ወአንሥኦሙ፡ ሚካኤል፡ ወይቤሎሙ፡ ኢትፍርሁ፡ አፍቁራነ፡ እግዚእ፡ አንሰ፡ ቢጽክሙ፡ ዘተአዘዝኩ፡ ከመ፡ ዕቀብክሙ፡ ለምንት፡ ትሰግዱ፡ ሊተ፡ ወርቱዕሰ፡ ንሰግድ፡ ኵልነ፡ ኀበ፡ እግዚአብሔር፡ ፈጣሪነ፨ ወአዘዞሙ፡ ብዙኃ፡ በፍሥሐ፡ ዓቢይ፡ ወበቃል፡ ጥዑም፨ ወእምዝ፡ ተሌለዩ፡ ላሊበላ፡ ወመስቀል፡ ክብራ፡ ተአሚሆሙ፡ በአምኃ፡ መንፈሳዊት፡ ላሊበላ፡ | | ሖረ፡ ምስለ፡ ገብርኤል፡ ውስተ፡ ፍኖተ፡ ኢየሩሳሌም፡ ወመስቀል፡ ክብራ፡ ተኃድገት፡ ህየ፡ /ምስለ፡/ ሚካኤል፡ ወአልቦሙሰ፡ ኢተበትከ፡ አሕባለ፡ ፍቅሮሙ፡ መል/ክ/አ፡ ገጹኒ፡ ለላሊበላ፡ ስዑል፡ ውስተ፡ ልበ፡ መስቀል፡ ክብራ። ወመልክአ፡ ገጻኒ፡ ስዑል፡ ውስተ፡ ልበ፡ ላሊበላ፡ ወባሕቱ፡ ተረኃቁ፡ እምዓይነ፡ ሥጋ፡ እንዘ፡ ኢይትረኃቁ፡ በዓይነ፡ ሕሊና፡ ዘበሃይማኖት። ወፈነወቶ፡ ለብእሲሃ፡ እንዘ፡ ትብል፡ ኀበ፡ በጻሕከ፡ መካናት፡ ወኀበ፡ አማኅከ፡ አብያተ፡ ክርስቲያናት፨ ዝክራ፡ ለዓመትከ፡ ወኢትርስአ፡ በጊዜ፡ ትዜክራ፡ ለነፍስከ፡ እስመ፡ ኀብለ፡ | ፍቅርነ፡ ኢተበትከ፡ በመጥባሕት፨ ወኰኵሐ፡ ኪዳንነ፡ ኢይትወቀር፡ በመፍጽሕ፨ ወበእንተዝ፡ ረስየኒ፡ ከመ፡ እንተ፡ ነፍስከ፡ ወሥጋከ፡ እስመ፡ ፩ አባል፡ ንሕነ፡ ወኢኮነ፡ ክልኤ፡ ከመ፡ ክርስቶስ፡ ፩ደ፡ ኮነ፡ ምስለ፡ ቤተ፡ ክርስቲያን፨ አንብረኒ፡ ከመ፡ ሕልቀት፡ ውስተ፡ ልብከ፨ ወከመ፡ ማዕተብ፡ በመዝራዕትከ፨ ወሊተሰ፡ ሐዘን፡ ውእቱ፡ ሲሳይየ፨ ወአንብዕ፡ ውእቱ፡ ስቲየ፡ እስከ፡ አመ፡ እሬእየከ፡ ደግመ፨ ወዘንተ፡ ብሂላ፡ አርመመት፡ እንዘ፡ ይውኅዝ፡ አንብዓ፡ ዲበ፡ መልዕልቲሃ፨ ወያንጠበጥብ፡ ውስተ፡ እንግድዓቲሃ፡ ወይሰወጥ፡

| | ዲበ፡ ኅባኔ፡ መልበሳ፡ ወይወርድ፡ ውስተ፡ ምድር፡ ወያርኅስ፡ መሬተ፨ ወይሬሲ፡ ፅቡረ፡ ውኂዘ፡ አንብዓሃ፡ እምብዝኃ፡ ፍቅሩ፡ ለምታ፡ ወውእቱሂ፡ አውሥአ፡ ወይቤላ፡ እመሰ፡ ረሳዕኩኪ፡ ለትርስአኒ፡ የማንየ፨ ወይጥጋዕ፡ ልሳንየ፡ በጕርዔየ፡ ለእመ፡ ኢተዘከርኩኪ፡ ኦእኅትየ፡ ፍቅርትየ፡ ወኀበ፡ በጻሕኩ፡ መካናት። ወአማኅኩ፡ መቅድመ፡ ኵሉ፡ አምሆትየ፡ ይኵንኪ፡ ለኪ፨ ወዘሰዓምኩ፡ በከናፍርየ፡ ይኵንኪ፡ ከመ፡ ዘሰአምኪ፡ ከናፍርኪ፨ እመሂ፡ አንብዓ፡ አዕይንትየ፡ ይኵን፡ ከመ፡ ዘአንብዓ፡ አዕይንትኪ። ወኵሎ፡ ምግባራት፡ ሠናያተ፡ ዘገበርኩ፡| ሐመሳ፡/ሐሙስ? ይኵንኪ፡ ክፍለ፡ ምስሌየ፡ በኵሉ፡ ጊዜ፨ እስመ፡ ፩ አባል፡ ንሕነ፡ በከመ፡ ትቤለኒ፡ ለሊኪ፡ እሙን፡ ውእቱ፡ ወኢኮነ፡ ሐሰተ። ወዘንተ፡ ብሂሎሙ፡ ተፈነው፡ ፪ሆሙ፡ ወላሊበላ፡ ሖረ፡ ምስለ፡ ገብርኤል፡ ውስተ፡ ፍኖተ፡ ኢየሩሳሌም፡ ዘተአዘዘ፡ ለነጊድ። ወመስቀል፡ ክብራ፡ ወሰዳ፡ ሚካኤል፡ ተመሲሎ፡ ከመ፡ ፩ እምነ፡ ወራዙት፡ ወአብጽሐ፡ ኀበ፡ አንስት፡ ኄራት።ወአማኅፀና፡ ኀቤሆን። እንዘ፡ ይብል፡ ዕቀባ፡ ሊተ፡ ኦአኃትየ፡ ፍቁራተ፡ እግዚእ፡ ዛተ፡ ወለተ፡ በእንተ፡ ፍቅረ፡ እግዚአብሔር፨ እስከ፡ እትመየጥ፡ በጺሕየ፡ ኀበ፡ | | ዘፈነወኒ፡ አምላክክን፡ ወእማንቱሂ፤ አውሥአሁ፡ እንዘ፡ ይብላ፡ አይቴኑ፡ ተሐውር፡ ኦእግዚእነ፤ ሠናይ፡ ራዕይ፡ ወጥዑመ፡ ልሳን፡ እስመ፡ እምጊዜ፡ ርኢናከ፤ ተሰውጠ፡ ፍቅርከ፡ ውስተ፡ ልብነ፤ እስመ፡ አመ፡ ኮነ፡ ኢርኢነ፡ ዘከማሁ፡ ዘይጥዕም፡ ራረዩ፨ ወይኤድም፡ ቃሉ፨ እስመ፡ ራዕየ፡ ዚአከሰ፡ ሶበ፡ ንሬኢ፡ ያዜክር፡ ራዕዮ፡ ወላሕዮ፡ ለመርዓዊ፡ ሰማያዊ፤ ዘአልቦ፡ ጥልቀት፡ ውስተ፡ መርዓሁ፨ ወውእቱሰ፡ መልአክ፡ ዘስሙ፡ ሚካኤል፡ ዘአስተርአዮን፡ በአምሳለ፡ ወሬዛ፨ ወይቤሎን፡ ለእማንቱ፡ አንስት፡ ሰአልናሁኬ፡ | ለእግዚአብሔር፡ ከመ፡ ትኵና፡ ድልዋተ፡ ለውእቱ፡ መርዓዊ፡ ሰማያዊ፡ ዘአልቦ፡ ጥልቀት፤ ውስተ፡ ከብካቡ፡ ዘይሴኒ፡ ላህዩ፤ እምውሉደ፡ ሰብእ፨ ወሊተሰ፡ ፈንወኒ፡ ንሥአሃ፡ ለዛቲ፡ እኅትክን፡ ተሀሉ፡ ምስሌክን፤ እስከ፡ እትመየጥ፡ ኃቤክን፡ በጺሕየ፡ ኀበ፡ ዘፈነወኒ፡ አምላክክን፨ ወይቤላሆን፡ ንትወከፋ፡ ንሕነ፡ ለዛቲሰ፡ እኅትነ። አኮ፡ ዘንሬእያ፡ ከመ፡ እኅትነ፨ አላ፡ ከመ፡ እግዚእትነ፡ እስመ፡ በከመ፡ ሞገስከ፡ ሞገሳ፡ ለዛቲ፡ በኀቤነ፨ ወዘንተ፡ ብሂሎ፡ አማኅፀና፡ ሚካኤል፡ ለመስቀል፡ ክብራ፡ ኀበ፡ እማንቱ፡ አንስት፨

| | ወእምዝ፡ ተሰወሮን፡ ወሶበ፡ ወጽአ፡ ሐዘንን፡ ወትካዝ፡ ረከባ፡ ለመስቀል፡ ክብራ፡ በእንተ፡ ተፈልጦቱ፡ ለምታ፡ ወይመጽዕ፡ ሚካኤል፡ ወያስተርእያ፡ ወይናዝዛ፡ እስከ፡ ይረግዕ፡ ልባ፨ ወትትፌሣሕ፡ እምጣዕመ፡ ቃሉ፡ ዘያስተፌሥሕ፡ እምስታየ፡ ወይን፨ ወይጥዕም፡ እመዓር፡ ወሦከር፡ ወዘልፈኒ፡ ኢይትፈለጥ፡ እምኔሃ፨ ወባሕቱ፡ ሶበ፡ ትቴክዝ፡ ይትከሠታ፡ ከመ፡ ይትናዘዘ፡ ልባ፡ በነጽሮቱ፨ ወበጣዕመ፡ ቃሉ፡ ህየንተ፡ ምታ። ወገብርኤልሰ፡ ሊቀ፡ መላእክት፡ ዘመርሖ፡ ለላሊበላ፡ ወወሰዶ፡ ውስተ፡ ፍኖተ፡ ኢየሩሳሌም፡| ከዊኖ፡ ከመ፡ ፩ እምነ፡ ወራዙት፡ ሠናያነ፡ ራዕይ፨ ወምሉአ፡ ሞገስ፡ ወጽሑድ፡ በቅብዓ፡ መለኮት፨ ወኢተፈልጠ፡ እምኔሁ፡ ኢመዓልተ፡ ወኢሌሊተ፨ ወኢተሰወሮ፡ ፍጹመ፡ አሐተ፡ ዕለተ፡ በውስተ፡ ፍኖት። አላ፡ ገሀደ፡ ያንሶሱ፡ ኅቡረ፡ ምስሌሁ፡ እንዘ፡ ይትናገሩ፡ ነገራተ፡ ምሥጢር፨ ዘላዕሉ፡ ወዘታሕቱ፡ ወያስተፌሥሖ፡ በቃል፡ ጥዑም፡ ላሊበላ፡ እስከ፡ ይረሲ፡ ድካመ፡ ጠባይዑ፡ በውስተ፡ ፍኖተ፨ ወሶበ፡ ይነብር፡ ምስሌሁ፨ ወሶበሂ፡ ይበልዕ፡ ይትመሰል፡ ከመ፡ ዘይበልዕ፨ ወሶበ፡ ይሰቲ፡ | | ይመሰል፡ ከመ፡ ዘይሰቲ። ወመብልዑሰ፡ ወመስቴሁ፡ ምድራዊተ፡ ኢጥዕመ፡ ፍጹመ፡ ላሊበላሰ፡ እምአመ፡ ወጠነ፡ ሐዊረ፡ ኢየሩሳሌም፨ አላ፡ ሶበ፡ ይበጽሕ፡ ጊዜ፡ ድራር፡ ይጸልዩ፡ ፪ሆሙ፡ ኅቡረ፡ ሰፊሆሙ፡ እደዊሆሙ፨ ወአንቃዕዲዎሙ፡ ላዕለ፡ ወሶበ፡ ይፌጽሙ፡ ጸልዮ፨ ወያስተጋብዑ፡ እደዊሆሙ፨ ወያትሕቱ፡ አዕይንቲሆሙ፡ ውስተ፡ ምድር፡ ይረክቡ፡ ማዕደ፡ ስሩዓ፡ ወኅብስተ፡ ፀዓዳ፡ ከመ፡ በረድ፡ ወምውቀ፡ ከመ፡ ዘወጽአ፡ እምእቶን፡ በጊዜሃ፡ ወልምላሜሁኒ፡ ሠናይ፡ ጥዑም፨ ወጽዋዑኒ፡ ፀዓዳ፡ ከመ፡ ሐሊብ፡| ወጥላሌሁ፡ ሠናይ፡ ፈድፋደ፡ ወያሥተፌሥሕ፡ ልበ፨ ወይኤድም፡ ለአዕይንት። ወኅብስቱኒ፡ ያጸግብ፡ በነጽሮ፡ ወጽዋዑኒ፡ ያረዊ፡ በርእዮ፡ ወላሊበላሰ፡ ይሴሰይ፡ በከመ፡ ልማድ፡ ጠባይዑ። ወገብርኤልሰ፡ ይትሜሰል፡ ከመ፡ ዘይበልዕ፡ ወይሰቲ፡ ምስሌሁ፡ በእንተ፡ አፍቅሮቱ፡ ወለላሊበላ፡ በሊዖ፡ ወሰትዮ፡ ዘተርፈ፡ ይትመየጥ፡ ወከመዝ፡ ይትወሀቦሙ፡ ዘልፈ፨ ወውስተ፡ ጠፈረ፡ ቤትየሂ፡ ኢይባዕ፡ እስከ፡ በጽሐ፡ ኀበ፡ ሊቀ፡ ጳጳሳት፡ ወእምዝ፡ እንዘ፡ ያንሶሰው፡ አሐተ፡ ዕለተ፡ ይቤሎ፡ ላሊበላ፡ ለገብርኤል፡ ለምንትኑ፡ ኦእግዚእየ፡

| | ዘኢትገብር፡ ሊተ፡ በከመ፡ ገበርከ፡ ሊተ፡ አመ፡ አዕረፍከኒ፡ ውስተ፡ ሰማይ፨ አሜሃሰ፡ ፆርከኒ፡ በአክናፊከ፡ ብሩሃት፡ እስከ፡ አብጻሕከኒ፡ ውስተ፡ ኵሎን፡ ሰማያት፨ ወአርአይከኒ፡ ኵሎ፡ ምሥጢራተ፡ ብርሃናተ፡ መጠነ፡ እክል፡ ወይቤሎ፡ ገብርኤል፡ አኮ፡ ኵሎ፡ ዕለተ፡ ይትዌለጥሑ፡ ቅዱሳን፡ ሰብእ፡ ዲበ፡ አክናፈ፡ መላእክት፡ ወአኮ፡ ኵሎ፡ ዕለተ፡ ይጼዓኑ፡ ደመናተ፨ ወሐዋርያትኒ፡ አኮ፡ ኵሎ፡ ዕለተ፡ ዘይትመሳው፡ በደመናት፡ አላ፡ ሶበ፡ ያንሶሰው፡ በአዕእጋሪሆሙ፨ እስከ፡ ይረክቡ፡ ፃማ፡ ዓቢየ፡ እምድካመ፡ ፍኖት፤ ከመ፡ ይፈድፍድ፡ ዓቢየ፡ አስበ፡ ሩጸቶሙ፡ ወከመ፡ ይርከቡ፡| ምዝጋና፡ በኀበ፡ እግዚእ፡ እስመ፡ ተሳተፍዎ፡ ለፃማሁ፡ በዲበ፡ ምድር፤ እስመ፡ ተብህለ፡ በእንቲአሁ፤ ደክመሂ፡ ወረኃበሂ፡ ወጸምአሂ፡ ከመ፡ ይፈጽም፡ ኵሎ፡ ግብረ፡ ትስብእት፤ በእንተ፡ ፍቅረ፡ ሰብእ፡ ድካመ፡ እንዘ፡ እግዚአ፡ ኃይል፡ ረኃበ፤ እንዘ፡ መሴስይ፡ ለኵሉ፡ ጽምዓ፡ ዘይሁብ፡ ነቅዓ፡ ማየ፡ ሕይወት፡ ዘኢይጸምዕ፡ ዘሰትዮ፡ ለዓለም፨ ወእሙንቱሂ፡ ከመ፡ ይትመሰልዎ፡ ለእግዚኦሙ፨ ደክመሂ፡ ወርኅቡሂ፡ ጸምዑ፡ ወእምድኅረሰ፤ ተወከፉ፡ ኵሎ፡ ምንዳቤያተ፡ ወዘፍኖትሂ፡ ዕፁበ፡ ተውህቦሙ፡ ስልጣነ፡ ከመ፡ ይጼዓኑ፡ ዘባነ፡ ደመናት፡ ወተውህቦሙ፡ | | አክሶስያ፡ ከመ፡ ይትዋክሑ፡ ላዕለ፡ አክናፈ፡ መላእክት፨ ወአንተሂ፡ ተአገሦ፡ ኦብእሴ፡ አምላክ፡ ወአጥብዕ፡ በከመ፡ እሙንቱ፡ አጥብዑ፡ ከመ፡ ትፈጽም፡ ኂሩተከ፡ ዘተፈነውከ፡ በእንቲአሃ። ወፈድፋደሰ፡ ኢሰማዕከኑ፡ ዘረከበት፡ እግዚእትነ፡ ትምክህተ፡ ሰማያት፡ ወምድር፡ አመ፡ መለኮት፡ ፃማ፡ ዓቢይ፡ ወድካመም፡ ብዙኅ፡ ወሐዘን፡ ዕፀብ፡ በአንብዕ፡ መሪር፨ አመ፡ ጐየት፡ እምገጸ፡ ሄሮድስ፡ ሶበ፡ አዘዘ፡ ከመ፡ ይቅትሉ፡ ሕፃናተ፡ ዘ፪ ዓመት፡ ወዘይንዕስ፡ ሂ፡ እምኔሁ፡ እንዘ፡ ይመስሎ፡ ዘይረክቦ፡ ለወልድ፡ በእንተ፡ ዝንቱኬ፡| እንዘ፡ ተሐውር፡ በጐየይ፡ እምኢየሩሳሌም፤ ውስተ፡ ምድረ፡ ግብፅ፡ ምስለ፡ ዮሴፍ፡ አረጋዊ፡ ምስለ፡ ሰሎሜ፡ ረከቦሙ፤ ዓቢይ፡ ምንዳቤ፤ ወሐዘን፡ ገዓር፡ ወአንብዕ፡ ብዙኅ፡ በውስተ፡ ፍኖት፤ አኮ፡ ከማከ። ዘአንሶሰወት፡ በፍሥሐ፨ አላ፡ በላሕ፡ ዕፁብ፡ ወሶበ፡ ትበኪ፡ በእንተ፡ ዮሴፍ፡ አረጋዊ፤ ሶበ፡ ይደክም፡ ወሖረ፡ ቶሙኒ፡ በጕጕዓ፨ ወሶበ፡ ርኅቡ፡ ወጸምዑ፡ ወዮሴፍ፡ ወሰሎሜ፨ ወቦ፡ ሶበ፡ ትደክም፡ ለሊሃኒ፡ ሶበ፡ ትብኪ፡ በእንተ፡ ሕፃና፤ እስመ፡ ዘይመስል፡ ይፌኑ፡ ሄሮድስ፡ እምሐራሁ፡ ከመ፡ ይዴግንዎሙ፨ ወየአሐዝዎሙ፡ ወቦ፡ አመ፡ አብከይዋ፡

| | ፈያትኒ፡ አመ፡ ነሥኡ፡ አልባሲሃ፤ ወልብሰ፡ ወልዳ፡ ወሶበሰ፡ ርኢከ፡ አንተሂ፡ እምበከይከ፡ ብዙኃ፡ ርኢከ፡ ሐዘና፡ ለድንግል፨ ወሶበ፡ ይቤሎ፡ ከመዝ፡ አውሐዘ፡ አንብዖ፡ ዲበ፡ መላትሂሁ፡ እስከ፡ አርሐሰ፡ ምድረ፡ ውሒዘ፡ አንብዑ፨ ወሶበ፡ ርእዮ፡ ገብርኤል፡ ለላሊበላ፡ እንዘ፡ ይበኪ፡ ይቤሎ፡ ሶበሰ፡ ርኢከ፡ አሜሃ፡ እንዘ፡ የአውዳ፡ ሐዘን፡ ወድንጋፄ፡ በዲበ፡ ድንጋፄ፤ በእንተ፡ ሕፃና፨ ወአንተሂ፡ ሶበ፡ ርኢከ፡ እምአፈድፈድከ፡ ብካየ፨ ሕድግሰ፡ ሰብእ፡ ዘደመ፡ ወዘነፍስ፡ አዕባንኒ፡ ይቡሳን፡ እምበከዩ፡ ሶበ፡ ቦሙ፡ ልብ፤ ወአንሰ፡| ርኢክዋ፡ ለላሊበላ፡ አሜሃኒ፡ እስመ፡ ምስሌሃ፡ ሀሎኩ፡ ወአንሶሱ፨ አነ፡ ውእቱ፡ ገብርኤል፡ ዘአስተርአይክዎ፡ ለዮሴፍ፡ በሕልም፡ ከመ፡ ይንሣእ፡ ሕፃነ፡ ወእሞ፤ ይሑር፡ ምድረ፡ ግብጽ፤ ወዘንተ፡ እንዘ፡ ይብል፡ አንበስበሰ፡ ብርሃነ፡ በቅድመ፡ ላሊበላ፡ ወአንበልበለ፡ አክናፊሁ፤ እስመ፡ በአምሳለ፡ ወሬዛ፡ ሠናይ፡ ራዕይ፡ ነበረ፡ እንዘ፡ ይመርሖ፤ ይናዝዞ፡ ወያስተፌሥሖ፡ በቃለ፡ ኑዛዜሁ፨ አሜሃኒ፡ በጊዜ፡ ተወለጠ፡ በከዊነ፡ ወልአክ፤ በአምጣነ፡ ይክል፡ ነጽሮቶ፡ ላሊበላ፡ ወሶቤሃ፡ ጾሮ፡ በክነፊሁ፡ ብሩሀት፡ | | ምዕራፍ፡ ወአብጽሖ፡ ውስተ፡ ዴዴሁ፡ ለሊቀ፡ ጳጳሳት፤ ወአንበሮ፡ ህየ፡ ንስቲተ፤ ቦአ፡ ውእቱ፡ መልአክ፡ ኀበ፡ ሊቀ፡ ጳጳሳት፨ ወዜነዎ፡ ህላዌሁ፤ ወኵሎ፡ ምግባራቲሁ፡ ወፍናዌ፡ ለላሊበላ፡ ወውእቱሂ፡ ዘከመ፡ ተአዘዘ፤ ከመ፡ ይዕቀቦ፡ በኵሉ፡ መዋዕሊሁ፨ ወይቤሎ፡ ሊቀ፡ ጳጳሳት፡ ወአንበሮ፡ ለውእቱ፡ መልአክ፡ እምአይቴኑ፡ /ኦ/እግዚእየ፤ ዘከመዝ፡ ብእሲ፡ ዘኮነ፡ ዘውገ፡ መላእክት፡ እስከ፡ ትወድሶ፡ አንተ፡ እግዚእየ፤ ወተሰጥዎ፡ መልአክ፡ ለውእቱ፡ ብእሲ፡ ሊቀ፡ ጳጳሳት፤ ወይቤሎ፡ ኢትዮጵያዊ፡ ውእቱ፡ ወትሩፍ፡ ብእሲ፡ ፈድፋደ፡ ወቦቱ፡ ሞገስ፡ በኀበ፡ እግዚአብሔር፤ ወበቅድመ፡| መላእክቲሁ፨ ወነገሮ፡ ዘከመ፡ ርእየሂ፡ ምሥጢራተ፡ ሰማይ፡ ወዘከመ፡ ዘቀብዓሂ፡ ቅብዓ፡ መንግሥት፡ እምኀበ፡ እግዚአብሔር። ወዘከመሂ፡ ሀለዎ፡ ከመ፡ ይሕንጽ፡ ኣብያተ፡ ክርስቲያናት፡ እንበለ፡ ዕፅ፡ ወመሬት፡ ዘበእንቲአሆን፡ ተቀብዓ፡ ለንግሥ፨ ወዘንተ፡ ሰሚዖ፡ ሊቀ፡ ጳጳሳት፡ እምነ፡ መልአክ፡ ይሰብሖ፡ ለእግዚአብሔር፡ እንዘ፡ ይብል፤ ቡሩክ፡ አንተ፡ እግዚኦ፡ እምቅድመ፡ ዓለም፡ ወእስከ፡ ለዓለም፨ ወይትባረክ፡ ስመ፡ ስብሐቲከ፡ ዘኢኀደገ፡ ዓለመከ፡ እንበለ፡ ኅሩያኒከ፡ በውስተ፡ ኵሉ፡ አኅጉር፡ ወውስተ፡ ኵሉ፡ ሀገር፡ በከመ፡ ትቤ፡ ለሊከ፡ አማን፡ እብለክሙ፡

| | ምዕራፍ፡ ኢይትፌጸም፡ አህጉረ፡ እስራኤል፡ እንበለ፡ ኅሩያኒየ፡ ዘበእንቲአሆሙ፡ ይሰርቅ፡ ፀሐይ፡ ወዘበእንቲአሆሙ፡ ይወርድ፡ ጠል፨ ዘበእንቲአሆሙ፡ ይትባረዩ፡ መያጤ፡ አዝማን፡ ክረምት፡ ምስለ፡ ኃጋይ፡ ወመጸው፡ ምስለ፡ ጸደይ፡ ዘበኃይለ፡ ጸሎቶሙ፡ ይጸንዕ፡ ሀገር፨ ወበኃይለ፡ ጸሎቶሙ፡ ትሁብ፡ ዕፀወ፡ ገዳምኒ፡ ይፈርዩ፡ በዝናመ፡ ትንብልናሆሙ፤ ወይሁቡ፡ ፍሬ፡ በበጊዜሁ፡ ወበበአስካሊሁ፨ ወይእዜኒ፡ ኢትኅድግ፡ ለዓለምከ፡ እንበለ፡ ኅሩያኒከ፡ ወኢትሕድጋ፡ ለቅድሳቲከ፡ ወለቤተ፡ ክርስቲያኒከ፡ ወለምዕመናኒከ፡ ወላዕካኒከ፡ ወኖሎተ፡ መርዔተከ፨ ወርትዕተ፡ ሃይማኖትከ፡ ኢታሰስል፡| እምልበ፡ እለ፡ የአምኑ፡ ብከ፡ ለከ፡ ይደሉ፡ ሰብሐት፡ በጽዮን፡ ወለከ፡ ይትፌኖ፡ ጸሎት፡ በኢየሩሳሌም፡ ለዓለመ፡ ዓለም፡ አሜን፡ ወዘንተ፡ ብሂሎ፡ ሊቀ፡ ጳጳሳት፡ ወፅአ፡ አፍአ፡ ውስተ፡ ዴዴ፡ ኀበ፡ ሀለወ፡ ላሊበላ፡ ወሶበ፡ ርእዮ፡ ላሊበላ፡ ወድቀ፡ ውስተ፡ ምድር፤ እንዘ፡ ይሰግድ፡ ሎቱ፡ ለሊቀ፡ ጳጳሳት፤ ወሰፍሐ፡ እደዊሁ፡ ሊቀ፡ ጳጳሳት፡ ወአንሥኦ፤ ወሐቀፎ፡ ክሳዶ፡ ወአምኆ፡ በፍሥሐ፡ እንዘ፡ ይብል፡ በብሩህ፡ ገጽ፡ ወበፍቅር፡ ዓቢይ፤ ወበቃል፡ ጥዑም፡ እንዘ፡ ይብል፡ ለምንት፡ ትሰግድ፡ ሊተ፡ ወርቱሰ፡ ንስግድ፡ ለከ፡ ንሕነ፡ እስመ፡ ተሰምዓ፡ ጸሎትከ፤ ወበኀበ፡ ሰማያውያን፡ ወምድራውያን፨ ወዘንተ፡ ብሂሎ፡ | | ሊቀ፡ ጳጳሳት፡ አዘዞሙ፡ ለእለ፡ ሀለው፡ ምስሌሁ፡ ከመ፡ ይስግዱ፡ ወይቤሎሙ፡ ስግግዱ፡ ታሕተ፡ እገሪሁ፡ ለዝንቱ፡ ብእሲ፡ ቅዱስ፡ ወኅሩይ፡ ከመ፡ ትንሥኡ፡ በረከቶ፡ ወመሲሁ፡ ለእግዚአብሔር፡ ውእቱ፨ ዘበላዕሌሁ፡ ቅብዓ፡ መንግሥት፡ መንፈሳዊ፡ ወአኮ፡ ሥጋዊ፨ ወሶበ፡ ይቤ፡ ከመዝ፡ ሊቀ፡ ጳጳሳት፡ አትሐቱ፡ አርእስቲሆሙ፡ ታሕተ፡ መከየዱ፡ እንዘ፡ የኃሥሡ፡ ጸበለ፡ እገሪሁ፡ ወእንዘ፡ ይብሉ፡ ለትኩን፡ ዛቲ፡ ጸበልከ፤ ከመ፡ መሬት፡ ዘረሰያ፡ እግዚእነ፡ ጽቡረ፡ በምራቁ፡ ቅዱስ፤ ወጸገዎ፡ ብርሃነ፡ ለዘዕውሩ፡ ተወልደ፡ ቀቢዖ፡ ኪያሁ፡ በይእቲ፡ ዕለት፡ ጽቡረ፨ ወለነኒ፡ ለይኵነነ፡ ከማሁ፡ ዝንቱ፡ ጸበለ፡| እገሪሁ፤ ወይክሥት፡ አዕይንተ፡ ልበነ፡ ዘጸልመ፡ በኃጢአት። ወላሊበላ፡ ከመ፡ ይከልኦሙ፡ ከመ፡ ኢይግሥሡ፡ እገሪሁ፡ እንዘ፡ ይብል፡ ለምንት፡ ትጻምው፡ በገሢሠ፡ እግርየ፡ ዘኢሮጸ፡ እስከ፡ ይእዜ፡ ውስተ፡ ፍኖተ፡ ሰላም፡ ዘእንበለ፡ ፍኖተ፡ ኃጢአት፨ ወከመዝ፡ ይብል፡ እንዘ፡ ያቴሕት፡ ርእሶ፨ ወእምዝ፡ አዘዞሙ፡ ሊቀ፡ ጳጳሳት፡ ከመ፡ ያምጽኡ፡ ማየ፡ ወአብኦሙ፡ ውስተ፡ ቤቱ፡ ወሐፀቦ፡ እገሪሁ፡ ለላሊበላ፡ ወተቀብዓ፡ ለሊሁ፡ ሊቀ፡ ጳጳሳት፡ በሐጺበ፡ እገሪሁ፡ ላሊበላ፡ ወነዝሖሙ፡ ካዕበ፡ ለኵሎሙ፡ ሰብአ፡ ቤቱ፡ ወለእለሂ፡ ደዌ፡ ረቀዮሙ፡ በውእቱ፡ ማይ፤ ወሐየው፡ እምደዊሆሙ፡ በኃይለ፡

| | ጸሎቱ፡ ለላሊበላ፡ ወእምድኅረዝ፡ ነበሩ፡ ሊቀ፡ ጳጳሳት፡ ወላሊበላ፡ ባሕቲቶሙ፡ እንዘ፡ ይትናገሩ፡ ዕበያተ፡ እግዚአብሔር። ወተስእሎ፡ ሊቀ፡ ጳጳሳት፡ ለላሊበላ፡ ዘከመ፡ እፎ፡ ምክንያት፡ ምጽአቱ፤ ወዘከመ፡ እፎ፡ ጻመወ፡ በፍኖት፡ ወነገሮ፡ ኵሎ። ወዘከመሂ፡ ይበጽሕ፡ ኢየሩሳሌም፡ ወእምድሕረሂ፡ አቅረቡ፡ ሎሙ፡ ማዕደ፡ ወበልዑ፡ ወሰትዩ፡ ወቤቱ፡ እንዘ፡ ይትናገሩ፡ ዕበያተ፡ እግዚእ፡ ወተሰነአሉ፡ በሳኒታ፡ ለሊቀ፡ ጳጳሳት፡ እንዘ፡ ይሰግድ፡ ሎቱ። ወይቤሎ፡ ባርክ፡ ሊተ፡ ፍኖትየ፡ ኦአቡየ፡ በትረ፡ ያሬክ፡ አበ፡ ኵሉ፡ ዓለም፨ ወውእቱሂ፡ ሊቀ፡ ጳጳሳት፡ አውሥኦ፡ በቃለ፡ ቡራቄ፡ እንዘ፡ ይብል፡ ዘባረከ፡| ፍኖቶ፡ ለያዕቆብ፡ ወዘይቤሎ፡ ኢትፍራህ፡ ወሪደ፡ ግብጽ፡ እስመ፡ ሀለውኩ፡ ምስሌከ፨ ውእቱ፡ የሀሉ፡ ምስሌከ፡ ወይባርክ፡ ፍኖትከ፨ ወዘመርሖሙ፡ ለእስራኤል፡ መዓልተ፡ በደመና፡ ወሌሊተ፡ በብርሃነ፡ እሳት፡ ውእቱ፡ ለይምራሕ፡ ወይሰርኅ፡ ወያብርህ፡ ፍኖተከ፡ ወይትወከፍ፡ ንግደተከ። ወዘንተ፡ ብሂሎ፡ ፈነዎ፡ ለሊቀ፡ ጳጳሳት፡ እንዘ፡ ይትክዝ፡ በእንተ፡ ተፈልጦቱ፡ እስመ፡ ማዕድም፡ ውእቱ፡ ላሊበላ፡ በቃሉኒ፡ ወበምግባሩኒ፡ ወራዕዩኒ፡ ፍሡሕ፡ ወግሩም፨ ወሶበ፡ ርሕቀ፡ ንስቲተ፡ እምሊቀ፡ ጳጳሳት፡ ፆሮ፡ ገብርኤል፡ በክነፊሁ፡ ብሩሃት፡ ወወሰዶ፡ ወአብጽሖ፡ ሀገረ፡ | | ኢየሩሳሌም፡ ወአርአዮ፡ ኵሎ፡ መካናተ፡ ኀበ፡ ተሰብአሂ፡ ወኀበ፡ ገብረ፤ ተአምራተ፡ ወመንክራተ፡ በአጽግቦ፡ ፭፻ ብእሲ፡ ወኀበ፡ ተወለጠ፡ ራዕዩ፡ ወኀበ፡ ተሰቅለ፡ ወኀበ፡ ተቀብረ፤ ወመካናሂ፡ እንተ፡ እምኔሃ፡ ዓርገ፡ ውስተ፡ ሰማይ፤ ወኵሎ፡ መካናተ፡ ምሥጢር፡ አርአዮ፡ እንዘ፡ ይብሎ፨ ለቡ፡ እሎንተ፡ መካናተ፡ ዘከመ፤ እፎ፡ ኑባሬ፡ ሥርዓት፡ እስመ፡ በእንተዝ፡ ተፈነውኩ፡ ዝየ፨ ወወሰዶ፡ ካዕበ፡ ኃበ፡ ፈለገ፡ ዮርዳኖስ፡ ዘተጠምቀ፡ ቦቱ፡ እግዚእነ፡ ወርእየ፡ ውእተኒ፡ ማየ፡ ዮርዳኖስ፡ ወተሐጽበ፡ ቦቱ፡ ወሰትየ፡ እምኔሁ፨ ወይቤሎ፡ ገብርኤል፡ ዘንተሰ፡ ኵሎ፡ መካናተ፡ | ምሥጢር፡ ዘእግዚእ፡ አርአይኩከ። ወአኮ፡ በዝ፡ ዘይትፌጸም፡ አላ፡ ለሊሁ፡ እግዚእ፡ ያርእየከ፨ ኵሎ፡ ግብረ፡ ትስብእቶ፡ ዘተወከፈ፡ በዛቲ፡ ሌሊት፡ ይመጽእ፡ ኃቤከ፡ ወይከሥት፡ ለከ። ዘከመ፡ ተወልደ፡ ወዘከመ፡ ተጠምቀ፡ ወዘከመ፡ ኮነ፡ በጊዜሁ፡ ልደቱ፡ ወበጊዜ፡ ጥምቀቱ፡ እምስባሔ፡ መላእክት፨ ወትሬኢ፡ ካዕበ፡ ዘከመ፡ አኃዝዎ፡ ወዘከመ፡ ቀተልዎ፡ ወዘከመ፡ ተስዕልዎ፡ ሊቃነ፡ ካህናት፡ ወረበናተ፡ አይሁድ፨ ወዘከመ፡ ኰርዕዎ፡ ርእሶ፡ በበትረ፡ ሕለት፡ ወዘከመ፡ ጸፍዕዎ፡ መላትሂሁ፨ ወእንዘ፡ ይዘነጕጕዎ፡ ወይብልዎ፡ ተነበይ፡ ለነ፡ ክርስቶስ፡

| | መኑ፡ ዘጸፍኣከ፨ ወዘከመ፡ አልበስዎ፡ አልባሰ፡ ቀይሐ፡ ወዘከመ፡ ወረቁ፡ ውስተ፡ ገጹ፡ ምራቀ፡ ርኩሳን፨ ወዘከመ፡ እዕረቅዎ፡ ዕራቆ፡ ዲበ፡ ዕፀ፡ መስቀል፡ ፈጺሞሙ፡ ላዕሌሁ፡ ኵሎ፡ ዝንጓጓ፡ ወጽርፈተ፨ ዘከመ፡ አሕለዮሙ፡ ሰይጣን፡ ወዘከመ፡ ተካፈሉ፡ አልባሲሁ፡ ፬ ሐራ፡ ወዘከመ፡ ተዓጸው፡ ዲበ፡ ዓራዙ። ወዘከመ፡ ጸልመ፡ ፀሐይ፡ በጊዜ፡ ስቅለቱ፡ ወዘከመ፡ ኮነ፡ ወርኅ፡ ደመ፡ ወዘከመ፡ ወድቁ፡ ከዋክብት፨ ወዘከመ፡ ኮነ፡ ፫ ሰአት፡ እምጊዜ፡ ፮ ሰአት፡ እስከ፡ ፱ ሰአት፡ ወዘከመሂ፡ በከዩሂ፡ ሰማያት፡ ወምድር፡ በእንተ፡ እግዚኦሙ፨ እስመ፡ ርእይዎ፡ ሰቁለ፡ ወቅንወ፡ | በሐፃውተ፡ መስቀል፡ ወዘከመ፡ ውኅዘ፡ ደም፡ ዲበ፡ ምድር፨ ወደመ፡ ርእስ፡ እስከ፡ ያንጸፈጽፍ፡ እምአክሊለ፡ ሦክ፡ ዘአስተቀጸልዎ፨ ወደመ፡ ቅስፈታት፡ እምዘባኑ፡ እስመ፡ ብዙኃ፡ ቀሰፍዎ፨ ወደመ፡ ቅንዋትኒ፡ እደዊሁ፡ ወእገሪሁ፡ እስመ፡ በኃይል፡ ቀነውዎ፡ ወደመ፡ ገቦሁኒ፡ ዘይውኅዝ፨ እስመ፡ በኵናት፡ ረገዝዎ፡ ወዘከመ፡ ወጽአት፡ ነፍሱ፡ እምሥጋሁ፨ ወዘከመ፡ አውረድዎ፡ እምዲበ፡ መስቀል፡ ወከመ፡ ገነዝዎ፡ በሰንዶናት፨ ወዘከመ፡ ቀበርዎ፡ ውስተ፡ መቃብር፡ ወዘከመ፡ አኅዝቀ፡ ወሐተምዎ፡ ለአይሁድ፨ ወዘከመ፡ ወረደ፡ ለሊሁ፡ ውስተ፡ ሲኦል፡ f. 87 በነፍስተ፡ ሥጋሁ፨ ወዘከመ፡ አውጽኦሙ፡ ለአዳም፡ ወለደቂቁ፡ እምኔሃ፨ ወዘከመ፡ ተንሥአ፡ እሙታን፡ አመ፡ ሣልስት፡ ዕለት፡ ወዘከመ፡ ነበረ፡ እምድኅረ፡ ትንሣኤሁ፡ ወዘከመ፡ ዓርገሂ፡ በሠረገላ፡ ብርሃን፨ ዘንተ፡ ኵሎ፡ ያርእየከ፡ በዛቲ፡ ሌሊት፡ መጺኦ፡ እግዚአ፡ ሰማያት፡ ወምድር፡ እስመ፡ በእንተ፡ ፍቅሩ፡ ነገድከ፡ እስከ፡ ዝየ፨ ወውእቱሰ፡ ይመጽእ፡ በእንተ፡ ፍቅርከ፨ ከመ፡ ይፈጸም፡ ተምኔተከ፡ ወንግደትከ፡ ይክሥት፡ ለከ፡ ኵሎ፡ ግብረ፡ ትስብእቱ፡ ከመ፡ ያሥተፌሥሐከ፡ ልበከ፡ በነጽሮ፡ ምሥጢራቲሁ፨ ወዘንተ፡ ኵሎ፡ እምድኅረ፡ ነገሮ፡ ገብርኤል፡ ለላሊበላ፡ ተንሥኡ፡ ከመ፡ ይጸልዩ፡ በጊዜ፡ ተሱአተ፡ ድራር፨ ወሶበ፡ ፈጸሙ፡ ጸሎቶሙ፡| ረከቡ፡ ማዕደ፡ ሥሩዓ፡ ወጽዋዓ፡ ምሉአ፡ ዘነበሩ፡ እንዘ፡ ይሴሰዩ፡ በውስተ፡ ፍኖት፡ እስከ፡ አመ፡ በጽሑ። ኀበ፡ ሊቀ፡ ጳጳሳት፡ ኢበልዑ፡ እክለ፡ ምድር፡ እምአመ፡ ወጠኑ፡ ሐዊረ፡ ፍኖት፡ ኢየሩሳሌም፡ ወሶበ፡ ርእዩ፡ ውእቱ፡ ኅብዝተ፡ ወጽዋዓ፡ በልዑ፡ ነሥዑ፡ በአዕኵቶ፨ ወበልዑ፡ ወሰትዩ፡ ወተረፈ፡ ተመሥጠ፡ ዘልፈ፡ ይትመሰጥ፨ ወእምዝ፡ ኖመ፡ ላሊበላ፡ ንስቲተ፡ ወገብርኤልኒ፡ ይትመሰል፡ በከመ፡ ኵሉ፡ ዘገብረ፡ ላሊበላ፡ ወሶበ፡ ይበልዕሂ፡ ይትሜሰል፡ ከመ፡ ዘይበልዕሂ፡ ወሶበሂ፡ ይሰቲ፡ ይትሜሰል፡ ከመ፡ ዘይሰቲ፨ ወሶበ፡ ይነውምሂ፡ ይትሜሰል፡ ከመ፡ ዘይነውም፨ ወላሊበላሰ፡ ሶበ፡ ኖመ፡ ንስቲተ፡ መጽአ፡ ኀቤሁ፡ እግዚእነ፡ ኢየሱስ፡ ክርስቶስ፡ በራዕየ፡ ሌሊት፡

| | ወአርአዮ፡ ኵሎ፡ ግብረ፡ ትስብእቱ፨ በከመ፡ ነገሮ፡ ገብርኤል፡ ወዘተርፈሂ፡ እምዘ፡ ነገሮ፡ ከሠተ፡ ሎቱ፡ ኵሎ፡ ምሥጢራቲሁ። ወላሊበላሰ፡ ፈጺሞ፡ ኵሎ፡ ራዕያተ፡ ዘርእየ፡ በንዋሙ፡ ነቅሐ፡ ወከልሐ፡ በዓቢይ፡ ቃል፡ እንዘ፡ ይበኪ፨ ወይቤሎ፡ ገብርኤል፡ ምንተ፡ ኮንከ፡ ኦብእሴ፡ አምላክ፡ በእንተ፡ ምንት፡ ዘትበኪ። ወይቤሎ፡ ላሊበላ፡ በከይኩ፡ ኦእግዚእየ፡ እስመ፡ ርኢኩ፡ በዛቲ፡ ሌሊት፡ ኵሎ፡ ራዕያተ፡ ዘነገርከኒ፡ ትማልም፤ ወፈድፋደሰ፡ አኅ[ዘ]ዘነኒ፡ ርኢኩ፡ ቅስፈታቲሁ፨ ወበእንተዝ፡ በከይኩ፡ ነጺርየ፡ ኵሎ፡ ስላቀ፡ ዘገብሩ፡ ላዕለ፡ እግዚእየ፨ ወይቤሎ፡ ገብርኤል፡ ኢተናዘዝከኑ፡ ሶበ፡ ርኢከ፡ ትንሣኤሁ፨ ወይቤሎ፡ ለላሊበላ፡ ተፈሣሕኩ፡ በእንተ፡ ትንሣኤሁሰ፨| ወባሕቱ፡ ሶበ፡ ተዘከርኩ፡ ሕማማቲሁ፡ በከይኩ፨ እስመ፡ ዕፁበ፡ ወክቡደ፡ ቅሥፈታቲሁ፡ ተወክፈ፡ እግዚእነ፡ በእንተ፡ ፍቅረ፡ ዚአነ፡ ለሰብእ፨ ወእንዘ፡ ዘንተ፡ ይትናገር፡ መጽአ፡ እግዚእነ፡ ኢየሱስ፡ ክርስቶስ፡ ተጽኢኖ፡ ዲበ፡ ደመና፡ ብርሃን፡ እንዘ፡ የአውድዎ፡ ኃይላቲሁ፡ ዑጹፋነ፡ እሳት፨ ወበርሃ፡ ውእቱ፡ መካን፡ እስከ፡ ስእነ፡ ላሊበላ፡ ነጽሮ፡ እምነ፡ ጸዳሉ። ወሶበ፡ ርእየ፡ ግርማ፡ መንክረ፡ ወድቀ፡ ዲበ፡ ምድር፡ በገጹ። ወሰፍሐ፡ ዕደዊሁ፡ እግዚእነ፤ ወአንሥኦ፡ ወአእተተ፡ እምኔሁ፡ ፍርሃተ። ወይቤሎ፡ ሰላም፡ ለከ፡ ፍቁርየ፡ ወኅሩይየ፡ ወጽሙድ፡ ታሕተ፡ አርዑተ፡ ወንጌልየ። ናሁ፡ ተወከፍኩ፡ ንግደተከ፡ ወአርአይኩከ፡ ኵሎ፡ ምሥጢራተ፡ ትስብእትየ፨ | | ዘበእንቲአሃ፡ ረከብከ፡ ጸጋ፡ እስመ፡ አነ፡ መጻዕኩ፡ ኀቤከ፡ ውስተዝ፡ መካን፡ ከመ፡ ትትፈሥሕ፡ በነጽሮትየ፡ እስመ፡ በእንቲአየ፡ ነገድከ፨ ወአነሂ፡ አርአይኩከ፡ ትማልም፡ እስከ፡ በከይከ፡ ርእየከ፡ ኵሎ፡ ክበደ፡ ቅስፈታት። ወኵሎ፡ ስላቀ፡ ዘገብሩ፡ ላዕሌየ፡ ነገደ፡ ሕዝበ፡ ዕብራውያን፡ ወተፈሣሕከ፡ ካዕበ፡ በእንተ፡ ትንሣኤየ፨ ወይእዜኒ፡ ተፈሣሕ፡ ኦጽሩየ፡ ልብ፡ ወንጹሐ፡ ሥጋ። እስመ፡ ናሁ፡ ረከብከኒ፡ ዘኃሠሥከኒ፡ ወከመዝ፡ እትራከቦሙ፡ ለኵሎሙ፡ ለእለ፡ ኃሥሡኒ፨ ወይእዜኒ፡ ሰአለኒ፡ ዘትፈቅድ፡ ከመ፡ እግበር፡ ለከ፡ ኵሎ፡ ተምኔተከ፡ ወወድቀ፡ ላሊበላ፡ ዲበ፡ ምድር፡ እንዘ፡ ይሰግድ፡ ለእግዚአብሔር፡ ወተንሢኦ፡| ይቤሎ፡ ምንትኑ፡ እስእለከ፡ አነ፡ እግዚእየ፡ ቦኑ፡ ሕሊና፡ ስእለትየ፡ ውስተ፡ ልብየ። ዘኢተአምር፡ አንተ፡ እምቅድመ፡ ሕሊና፡ ዘ/ተ/አምር፡ ዘሀለዎ፡ ሰብእ፨ ከመ፡ የሐሊ፡ እም/ቅ/ድመ፡ ሕሊና፡ ዘትፈትን፡ ዘሀለዎ፡ ከመ፡ ይግበር፡ ወዘከመ፡ ትሬኢ፡ ሕሊና፡ ልብየ፡ ግበር፡ ሊተ፨ ወዘከመ፡ ተአምር፡ ፈቃደ፡ ስእለትየ፡ ፈጽም፡ ሊተ፡ በኂሩትከ፡ ኦእግዚእየ፨ ወይቤሎ፡ እግዚዕ፡ ኵሉ፡ ናሁ፡ አንሰ፡ ዕብለከ፡ ዘኢይሄሱ፡ ቃልየ፡ ወኢይኤምፅ፡ ኪዳንየ፡ ምስለ፡ ፲ ወ፪ አርዳዕየ፡ ይኩን፡ ማኅደርከ፨ ወምስሌሆሙ፡ ይኩን፡ ክፍለከ፨ በኵሉ፡ ክብር፡ ወዘይትአምንሂ፡ በጸሎትከ፡ ወበክዕወተ፡ ደሞሙ፡ ለጴጥሮስ፡ ወጳውሎስ፡ ይኵኖ፡ አሚኖቱ፡ እስመ፡ ጻመ፡ ውከ፡ ጸመውከ፡ በከመ፡ ጸመው፡ እሙንቱ፡

| | በሐዊረ፡ ፍኖት፡ ወተሰደድከ፤ ካዕበ፡ በግፍዕ፡ እምነ፡ አዝማዲከ፡ እንዘ፡ ትትወከፍ፡ በግፍዕ፡ በአኰቴት፤ ወአነሂ፡ ተወከፍኩ፡ ሰደተከ፡ ከመ፡ ስደተ፡ ጴጥሮስ፡ ወጳውሎስ፤ ወህየንተ፡ ደሞሙኒ፡ ረስይኩ፡ ለከ፡ ኀበ፡ ጻማዕከ፡ ዘከዓው፡ በእንቲአየ፡ ወዘሂ፡ ጌሠ፡ ውስተ፡ መርጡልከ፡ ይኩን፡ ከመ፡ ዘጌሠ፡ ውስተ፡ መቃብርየ፡ ወዘአምኃ፡ ዝኅርከ፡ ኀበ፡ ይትቀበር፡ ሥጋከ፡ ይኩን፡ ከመ፡ ዘአምኃ፡ ዝኅርየ፡ ኀበ፡ ተቀብረ፡ ሥጋየ፨ ወዘይገብር፡ ተዝካረከ፡ በኵሉ፡ አውራኃ፡ ዓመት፡ ፲ ወ ፪ ዓመታተ፡ እምነ፡ ተዝካረ፡ ትንሣኤየ፡ እንበለ፡ ካልአን፡ ተዝካረ፡ ትስብእትየ፡ ወዘሂ፡ ወሀበ፡ እክለ፡ ለርኁባን፡ በእንተ፡ ተዝካርከ፡ እሁቦ፡ አነሂ፡ መና፡ ኅቡእ፡ ወእምኅብስተ፡| ሰማይ፤ ወዘሂ፡ አስተየ፡ ለጽሙዕ፡ በዕለተ፡ ተዝካርከ፡ አነ፡ እሁቦ፡ ማየ፡ ሕይወት፡ ጸዓዳ፡ ዘይውኅዝ፡ ሎሙ፡ ለኅሩያንየ፡ በዕለተ፡ መርዓ፡ ዓቢይ፨ ወዘሂ፡ ከደነ፡ ዕሩቀ፡ እንዘ፡ ይዜከር፡ ስመከ፡ አነ፡ እከድኖ፡ ሜላተ፡ ብርሃን፡ ንጹሕ፡ ዘዕፁብ፡ ዘኢተገብረ፡ በእደ፡ መሬታውዊ፡ ወዘሂ፡ አብአ፡ ዕጣነ፡ በዕለተ፡ ተዝካርከ፡ አነ፡ አበውኦ፡ ውስተ፡ ውሳጤ፡ መንጦላዕት፨ በኢየሩሳሌም፡ ሰማያዊት፡ ከመ፡ ይትመዓዝ፡ መዓዛ፡ ሠናየ። እምውስተ፡ ማዕጠንቶሙ፡ ለ፳ ወ፬ ካህናተ፡ ሰማይ፡ እለ፡ የዓርጉ፡ ዕጣነ፡ መንፈሳዌ፡ ነባቤ፡ ዘአልቦ፡ ዘይትማሰሎ፡ ለመዓዛሁ፨ ወዘሂ፡ አብአ፡ ስርናየ፡ ለቍርባነ፡ ተዝካርከ፤ አነ፡ እሁቦ፡ እምጥብሐ፡ ሥጋየ፡ አመ፡ | | እሁ/ቦ/ሙ፡ ለኅሩያንየ። በዕለተ፡ መርዓየ፡ አመ፡ በእደዊየ፡ እፌትት፡ ሎሙ፡ ለእለ፡ ይደልዎሙ። ወእጽሕፍ፡ ስሞሙ፡ /ለ/ኵሎሙ፡ ለእለ፡ ይትአመኑ፡ በጸሎትከ፨ ኀበ፡ ተጽሕፈ፡ ስምከ፡ ወዘይረውጽ፡ ውስተ፡ መርጡልከ። እንዘ፡ ይትአመን፡ በጸሎትከ፡ እምርሑቅ፤ ወእምቅሩብ፡ ወአሐቲሂ፡ ነሶሳወ፡ እገሪሁ፡ ኢይትገደፍ፡ በኀቤየ፡ ወእሬሲ፡ ሎቱ፡ ሰረገላ፡ ብርሃን፨ ከመ፡ ይጼዓን፡ ዲቤሁ፡ አመ፡ ይወጽእ፡ ነፍሱ፡ እምሥጋሁ፡ ህየንተ፡ ዘጌሠ፡ ኀበ፡ መርጡልከ፨ ወእሬሲ፡ ከመ፡ ይዕቀብዎ፡ መላእክትየ፡ ለመቃብርከ፡ ከመ፡ ይባርክዎሙ፡ ለኵሎሙ፡ ለእለ፡ ይፈቅዱ፡ ይትባረኩ፡ እምነ፡ አጽምከ፨ ወኵሉ፡| ዘሰገደ፡ ውስተ፡ ዝኅርከ፡ ኢይበል፡ ኢሰገድኩ፡ ውስተ፡ መቃብርየ፡ ኀበ፡ ነበረ፡ ሥጋየ፡ ሰሉሰ፡ መዋዕለ፡ ወሰሉሠ፡ ለያልየ፡ አነ፡ ውእቱ፡ ኢየሱስ፡ ሰይፈ፡ ቃል፡ ወጽኑዓ፡ ኪዳን፡ ዘነበብኩ፡ ዘንተ፡ ኵሎ፡ ዘኢይኃድግ፡ ዝንቱ፡ ኵሉ፡ ዘእንበለ፡ ይኩን፨ ወሰገደ፡ ላሊበላ፡ ውስተ፡ ምድር፡ እንዘ፡ ይሴብሖ፡ ለዘዓቀመ፡ ሎቱ፡ ዘከመዝ፡ ኪዳነ፤ ወአውሥአ፡ እግዚእ፡ ኢየሱስ፡ ወይቤሎ፡ ኢትፍራህ፡ ቍልዔየ፡ ኃይል፤ ወጽናዕ፡ ዲበ፡ ኃይለ፡ ጸላኢ፡ ወምላሕ፡ ሰይፈ፡ ትስልስትየ፡ ከመ፡ ትዕጽድ። እስመ፡ አነ፡ ወሀብኩከ፡ ስልጣነ፡ ከመ፡ ትኪድ፡ ርእሶ፨ ለካልኣንሰ፡ ጻድቃን፡ አመ፡ በጽሐ፡ ፍጻሜ፡ በእሳቶሙ፡ እምዝንቱ፡ ዓለም፡ ለእለ፡ ተጸምዱኒ፡

| | በኵሉ፡ ልቦሙ፡ እሁቦሙ፡ ኪዳነ፡ በከመ፡ ይደልዎሙ፨ ወለከሰ፡ በሕይወትከ፡ ወሀብኩከ፡ ኪዳነ፡ እንዘ፡ ኢይበጽሕ፡ ፍጻሜ፡ ጸአትከ፡ እምዝንቱ፡ ዓለም፨ ወኢኮነ፡ ጊዜሁ፡ ለፍልሰት፡ ከ፡ እስመ፡ ሀለወከ፡ ትሕየው፡ ብዙኃ፡ መዋዕለ፡ በዲበ፡ ምድር፡ እምይእዜ፡ እስከ፡ አወፅአከ፡ አመ፡ ፍልሰትከ፡ በጽዋዓ፡ ሠናይ፨ ዘእንበለ፡ ጻዕር፡ ወተአቱ፡ ውስተ፡ ምዕራፊከ፡ ዘለዓለም፨ ወተኃድር፡ ምስለ፡ ጴጥሮስ፡ ወጳውሎስ፡ ሊቃነ፡ አርዳእየ፡ ውስተ፡ መንግሥተ፡ ሰማያት፨ ኀበ፡ አልቦ፡ ሐዘነ፡ ዘፍሥሐ፡ ዘእንበለ፡ ፍሥሐ፡ ኀበ፡ አልቦ፡ ደዌ፡ ወሕማም፡ ዘእንበለ፡ ጥዒና፡ ኀበ፡ አልቦ፡ ረኃብ፡ ኀበ፡ ይትፌተት፡ ኅብዝተ፡ ሕይወት፨ ኀበ፡ ሰዓተ፡ ተድላ፡ ኀበ፡ አልየ፡ ኃሩር፡ ኀበ፡ | ይትቀዳኅ፡ ጽዋዓ፡ መድኃኒት፡ ዘእምአስካለ፡ በረከት፨ ኀበ፡ ተስዕረ፡ ሐላፊ፨ ኀበ፡ ተደለወ፡ ዘኢየኃልፍ፡ ወዘኢየኃልቅ፡ ወዘኢይትወዳዕ፡ ፍግዓ፡ በፍሥሐ፡ መንፈስ፡ ቅዱስ፨ ዘይከውን፡ ማኅደርከ፡ ምስለ፡ ጴጥሮስ፡ ወጳውሎስ፡ ተሐድር፡ በሕይወትከ፡ ምስለ፡ እግዚአብሔር፡ ወሕይወትከ፡ ከመ፡ ሕይወትየ፡ ወፍሥሐየ፡ ወተድላ፡ መንበርከ፡ በየማንየ፤ በከመ፡ ዕቤሎሙ፡ ለሐዋርያት፡ ትነብሩ፡ ዲበ፡ ፲ ወ፪ መናብርት፡ ወትኳንኑ፡ ፲ ወ፪ ነገደ፡ እስራኤል፡ ወለከሂ፡ ዕብለከ፡ ኢየሐጽጽ፡ መንበርከ፡ እመንበሮሙ፡ ወሰብሐቲከ፡ እምስሐቶሙ። ወብርሃንከ፡ እምብርሃኖሙ፡ ወሱራሔ፡ አክሊልከ፡ እምሱራሄ፡ | | አክሊሎሙ፡ ወኪዳንከ፡ ኢይኃጽጽ፡ እም/ኪ/ዳ/ኖሙ/፡ ዘወሀብክዎሙ፡ እስመ፡ ምስሌሆሙ፡ ርስትከ፡ ወምስሌሆሙ፡ መክፈልትከ፨ ወትትፌሣሕ፡ ምስለ፡ ኵሎሙ፡ እለ፡ ይገብሩ፡ ተዝካረከ፡ ፲ ወ ፪ቱ፡ ጊዜያተ፡ ለለ፡ ወርኁ፡ አሐተ፡ ጊዜ፡ በኍልቈ፡ ፲ ወ ፪ቱ፡ አርዳእየ፡ ወምስለ፡ ኵሎሙ፡ እለ፡ ይገይሱ፡ ውስተ፡ መርጡልከ፨ ወይትአምኁ፡ ታቦተ፡ ሥጋከ፡ ትትፌሣሕ፡ በውስተ፡ አዕፃዳተ፡ መንግሥትየ፤ ወኵሎ፡ ዘይጽሕፍ፡ መጽሐፈ፡ ገድልከ። በጽሒቅ፡ ወበአስተሐምሞ፡ ዓቢይ፡ ወበፍቅረ፡ ዚአከ፡ ወተአሚኖ፡ ኪዳነከ፡ ዘወሀብኩከ፡ እጽሕፍ፡ ስሞ፡ ውስተ፡ መጽሐፈ፡ ሕይወት፡ ዘኢይደመሰስ፡ ድብዲቆኖ/ኖ/ሙ፡ ለቅዱሳን፡ እለ፡ ጻመው፡ ብዙኃ፡ | እንዘ፡ ይትሄየሉ፡ ለበዊዓ፡ አንቀጽ፡ ጸባብ፨ ወእለ፡ ፈጸሙ፡ ፍኖተ፡ ወንጌል፡ በሩጸቶሙ፡ ፍሉሕ። ዘኢቈረ፡ በማየ፡ ሙስና። ወምስሌሆሙ፡ እጽሕፍ፡ ስሞ፡ ለዘይጽሕፍ፡ ገድለከ፡ ወኵሎ፡ ጻማ፡ ዘተወከፍከ፨ ወእምቅድመዝ፡ ወዘሀለወከሂ፡ ትትወከፍ፨ እምድኅረዝ፡ ወአኮ፡ ውስተ፡ ክርታስ፡ ዘይሰጥጥ፡ ወይማስን፡ ዘእጽሕፍ፡ ስሞ፡ ለዘይጽሕፍ፡ መጽሐፈከ፡ አነ፡ እጽሕፍ፡ ውስተ፡ መጽሐፎሙ፡ ለቅዱሳንየ፨ ኀበ፡ ተጽሕፈ፡ አስማተ፡ ነቢያት፡ ወሐዋርያት፨ ወአስማተ፡ ጻድቃን፡ ወሰማዕት፨ ወአስማተ፡ ኵሎሙ፡ ማኅበረ፡ በኵር፡ እለ፡ ጽሑፍ፡ አስማቲሆሙ፡ በሰማያት፨ ወኵሉ፡ ዘያሰትት፡ ገድለከ፨ ወኪዳነ፡ ዘወሀብኩከ፡ ዘኢየአምን፡ ኢይኩን፡ መክፈልቱ፡ ምስሌከ፡ ወር/ስ/ቱኒ፡

| | ኢይትረከብ፡ ምስለ፡ ርስትከ፡ ወይኩን፡ ውእቱ፡ ብእሲ፡ ኢይርአይ፡ ኪዳነ፡ ዘአቀምኩ፡ ለከ፡ ከመ፡ ዘይቤለኒ፡ ሊተ፡ ለክርስቶስ፡ ኢኮነ፡ እግዚአብሔር፡ አላ፡ ሰብእ፡ ውእቱ፨ ወኵሉ፡ ዘይትወከፍ፡ ሰሚዖ፡ መጽሐፈከ፡ ይኩን፡ ከመ፡ ዘተወክፈ፡ ወንጌለ፡ መንግሥትየ፤ ወዘአክበረከ፡ ከመ፡ ዘአክበረ፡ ኪያየ። በከመ፡ ዕቤሎሙ፡ ለአርዳዕየ፨ ዘኪያክሙ፡ ስምዓ፡ ኪያየ፡ ሰምዓ፡ ወዘለክሙ፡ ክህደ፡ ኪያየ፡ ክህደ፨ ወአነሂ፡ ዕብለከ፡ ለከ፡ ዘሰም/ዓ/፡ ኪያከ፡ ወዘአምነ፡ ኪዳነከ፡ ዘሰምዓኒ፡ ሊተ፡ ለእግዚእከ፨ አነ፡ ውእቱ፡ ዘሀሎ፡ ወይሄሉ፡ ዘእትናገረከ፨ ወኢኮንኩ፡ ባዕደ፡ አነ፡ ውእቱ፡ አልፋ፡ ወአነ፡ ቀዳማዊ፡ ወአነ፡ ደኃራዊ፡ ወእምቅድሜየኒ፡ አልቦ፡ ባዕደ፡ ወእምድኅሬየኒ፡ አልቦ፡ ካልዕ፡ አምላክ፨ ወዘክህደ፡ ዘከማከ፡| ዘእሁድ፡ ወኪዳነ፡ ዘአቀምኩ፡ ለከ፡ ከመ፡ ዘክህደ፡ ጻማየ፡ ዘተወከፍኩ፡ በዲበ፡ ምድር፡ ድካመ፡ ወሐፈ፡ ረኀበ፡ ወጽምዓ፡ ወዕርቃነ፡ በዲበ፡ መስቀል፡ ወቅንዋተ፡ ሐጻውንት፡ ዘዲበ፡ እገርየ፤ ወእደውየ፡ ወኵሎ፡ ሕማማትየ፡ ወዘክህደሂ፡ ኪዳነከ፡ ዘከመ፡ ወዘክህደ፨ ትንሣኤየ፡ ወዕርገትየ፡ ውስተ፡ ሰማያት፨ ወለከሂ፡ ጻማከሂ፡ ዘተወከፍከ፡ ወኪዳንከሂ፡ ዘአቀምኩ፡ ለከ፡ ጽሕፍት፡ ይእቲ፡ ወል/ክ/ዕት፡ ውስተ፡ ኢየሩሳሌም፡ ሰማያዊት፡ አጋአዚት፨ ወጽሕፈታሰ፡ አኮ፡ በማየ፡ ሕመት፡ አላ፡ በደመ፡ ሕግ፡ ወኪዳን፡ በዘቦቱ፡ ይጸሐፍ፡ አስማተ፡ ኵሎሙ፡ ቅዱሳን፨ ወዘንተ፡ ሶበ፡ ይቤሎ፡ አኃዜ፡ ዓለም፡ ዘይነብር፡ ዲበ፡ ሰረገላ፡ ኪሩቤል፡ ሰገደ፡ ላሊበላ፡ ውስተ፡ ምድር፡ ወአዕኰቶ፡ እንዘ፡ ይብል፡ አአኵተከ፡ | | እግዚኦ፡ እስመ፡ ተወከፍከኒ፡ ትባርከከ፡ ነፍስየ፡ ወኵሉ፡ ሕሊናየ፨ ወኵሉ፡ ልብየ፡ ወኵሉ፡ ኃይልየ፡ መሐሪ፡ ርኁቀ፡ መዓት፡ ወብዙኃ፡ ምሕረት፡ ወጻድቅ፨ ዘኢይቀሥፍ፡ ወትረ፡ ወኢይትመዓዕ፡ ዘልፈ፡ አኮ፡ በከመ፡ ኃጢአትየ፡ ዘገበርከ፡ ሊተ፨ ወኢፈደይከኒ፡ በከመ፡ አበሳየ፡ አንሰ፡ አኮ፤ ዘከመዝ፡ ዕበየ፡ ወዘከመዝ፡ ኪዳነ፡ ወዘከመዝ፡ ክብረ፡ ወሞገሰ፡ ዘተሰፈውኩ፡ ነጠብጣበ፡ ምሕረትከ፡ ይምርሕኒ፡ እምነ፡ ባሕረ፡ ሂሩትከ፨ ከመ፡ ይርከበኒ፡ ከመዝኑ፡ ያማአብል፡ ሞገደ፡ ምሕረትከ፤ ላዕለ፡ ኃጥአን፨ እግዚእየ፡ ወአምላኪየ፡ ዘአውጻእከኒ፡ እምከርሠ፡ ቀላይ፡ ዘይሄይለኒ፡ ለአስጥሞ፨ ወከደንከኒ፡ | በመንጦላዕተ፡ ሣህልከ፨ ወዘኢተሐዘብኩ፡ ጸጋ፡ ረከነትኒ፨ ወኢኃለይኩ፡ በልብየ፡ ጸገውከኒ፡ ክብረ፡ ወስብሐተ፡ ዘእንበለ፡ ሤጥ፨ ወካልአንሰ፡ መንግሥት፡ ተሰጠወ፡ በጾም፡ ወበጸዊም፡ እስከ፡ ነጠብጣበ፡ እገሪሆሙ፤ እስከ፡ ይለክዕ፡ አነዳሆሙ፡ ምስለ፡ አጽሞሙ፨ ወበሰጊድ፡ ካዕበ፡ እስከ፡ ይከውን፡ ሐፎሙ፤ ከመ፡ ነጠብጣበ፡ ደም፡ ዘይወርድ፡ ውስተ፡ ምድር፨ ወቦ፡ እለ፡ ተሳየጥዋ፡ በክዕወተ፡ ደሞሙ፨ ወቦ፡ ተወጊሮሙ፡ በአዕባን፡ ወተወሢሮሙ፡ በሞሰርት፨ ወቦ፡ እለ፡ ውዕዮሙ፡ በእሳት፨ ወቦ፡ እለ፡ ተሰጢሞሙ፡ ውስተ፡ ባሕር፡ ከመ፡ ዓሣ፨ ወቦ፡ እለ፡ ተወቂዮሙ፡ በአስይፍት፨ ወቦ፡ እለ፡ ተረጊዞሙ፡ በኵናት፨ ወቦ፡ እለ፡

| | ተውህበ፡ ሥጋሆሙ፡ ለአራዊት፨ በዘከመዝ፡ ጾታ፡ ሕማም፡ ወመቅሠፍት፡ ምንዳቤ፡ ወመንሱት፨ ወበዘከመዝ፡ ተሣየጥዋ፡ በመንኖ፡ ነፍሶሙ፡ በአብድሮ፡ ፍቅርከ፡ ተመሰሎሙ፡ ኪያከ፡ ተሳቲፎሙ፡ ሕማማቲከ፤ ወአንሰ፡ ወአሐተ፡ ቅሥፈታተ፡ ኢጾርኩ፡ ጥቀ፡ ዘከመ፡ ጾሩ፡ አግብርቲከ፨ ወባሕቱ፡ አርአይከ፡ ምሕረተከ፡ ላዕሌየ፨ ወይቤሎ፡ ኢየሱስ፡ አማን፡ ዕብለከ፡ እሉ፡ ኵሎሙ፡ ዘረከቦሙ፡ ኢየሐጽጽ፡ ዕሤትከ፡ በኀቤየ፨ ወይእዜኒ፡ አጽምዕ፡ በልባዌ፡ ዘእነግረከ፡ ቀዲሙሂ፡ ነገርኩከ፡ ወአርአይኩከ፡ ግብረ፡ ሕንፃሆን፡ ለእላንቱ፡ አብያተ፡ ክርስቲያናት። እለ፡ ሀለወከ፡ ትሕንጾን፡ ዑቅ፡ ይእዜኒ፡ ከመ፡ ትፈጽም፡ | መልእክተከ፡ እስመ፡ ብዑድ፡ ውእቱ፡ ግብረ፡ ሕንፃሆን፨ ለማኅፈዳተ፡ ምስጢርየ፡ ዘሀለወኒ፡ እክሥቶን፡ በእደዊከ፨ እስመ፡ አኮ፡ በጽቡር፡ ዘትገብሮን፡ ወአኮ፡ በአፅ፡ ዘትሰውቆን፡ ወትቀምሮን፤ወአኮ፡ በአሕባል፡ ዘትጠፍሮን፤ ወአኮ፡ በመዋጽፍት፡ ወበሣዕር፡ ዘትከድኖን፨ አላ፡ ፩ ዕብን፡ ይፌጽም፡ ኵሎ፡ መፍቅዶን፡ ሱራሬሆንሂ፡ ፩ ዕብን፡ ወአቅዶንሂ፡ ዕብን። ወምዕማዶንሂ፡ ዕብን። ወምዕማዶንሂ፡ ዕብን፡ ወምክያደ፡ መሣውቆንሂ፡ ዕብን። ወፈሮንሂ፡ ወቀመሮንሂ፡ ውስቲቶንሂ፡ ዕብን፡ ወዝንቱሰ፡ ኵሉ፡ አኮ፡ ብዙኃን፡ አዕባን፡ አላ፡ ፩ ዕብን፡ ኆልቆንሰ፡ ለማኅፈዳት፡ ዘሀለዎን፡ ይትከሰታ፡ በዕደዊከ፡ ፲ እማንቱ፨ ወግብረቶንሰ፡ ዘዘዚአሁ፡ | | ቦእምኔሆን፡ ይሰናሰል፡ ወበእምኔሆን፡ ቅጽሮን፡ ወቦእምኔሆን፡ እንተ፡ ባሕቲቶን፡ ወእለ፡ ይሰናሰል፡ ቅጽሮን፡ ፭ እማንቱ፡ አብያተ፡ ክርስቲያናት፡ እለ፡ በአሐቲ፡ ዓፀድ፡ ይትገበራ። ወቦ፡ እምኔሆን፡ እንተ፡ ፪ አብያተ፡ ክርስቲያናት፡ ዘ፩ ቅጽር፡ ስንሳሌሆን፡ ወቦእምኔሆን፡ ዘዘዚአሁ፡ ግብረተ፡ ዘቦን፡ ወቦ፡ እምኔሁ፡ ዘዘዚአሁ፡ ኅብረ፡ ራዕዮን። ወመዓድማት፡ እማንቱ። አብያተ፡ ክርስቲያናት። ወኢከሰትኩ፡ እስከ፡ ይእዜ፡ በእደ፡ ካልአን፡ ዘከማሆን፡ እስመ፡ አመ፡ ሣረርኩ፡ ምድረ፡ አእመርኩ፡ እምቅድመ፡ እፍጥርከ፡ እምከርሠ፡ እምከ፡ አእመርኩ፡ ኪያከ፡ ከመ፡ በእደዊከ፡ ይትከሠታ፡ ኵሎን፡ እላንቱ፡ አብያተ፡ ክርስቲያናት፡ ፲ እስመ፡ ብዑድ፡ ውእቱ፡ ግብረቶን፡| እምኵሎን፡ ደባትርየ፡ ዘገበርኩ፡ በእደ፡ ኵሎሙ፡ ኅሩያንየ። አሐቲሰ፡ ደብተራ፡ ዘአርአይኩ፡ በዲበ፡ ምድር፡ በእደ፡ ሙሴ፡ ምዕምንየ፡ ዘአጌያት፡ ይእቲ፡ ወዕፅ፡ ወሰዋቂሃ፡ ወመካይዲሃ። ወጠፈራኒ፡ ኢኮነ፡ ከመ፡ ጠፈረ፡ አብያተ፡ ክርስቲያናት፡ ዘይትገበራ፡ በእደዊከ። ወአኮ፡ ዘይትከደን፡ ንዋየ፡ ቅድሳቲሆን፡ ለአብያተ፡ ክርስቲያት፡ በማዕስ፡ ወመጺጺት፡ ወከመ፡ ንዋየ፡ ቅድሳቲሃ፡ ለደብተራ፡ ሙሴ፡ ወደብተራከሰ፡ ኢኮነ፡ ከመ፡ ደብተራ፡ ሙሴ፡ ወኢከመ፡ ደብተራ፡ ሰሎሞን። ወደብተ/ራ/፡ ሰሎሞንሂ፡ ዘዕፅ፡ ይእቲ፡ ወዘዕብን፡ ወጽቡር፡ ወዘአሕባል፡ ወዘእሉ፡ እሙንቱ፡ አብያተ፡ ክርስቲያናት፡ ዘዘዚአከ፡ ዘዕፅኒ፡ ኢኮነ፡ ወዘኢኮነ፡ ካዕበ፡ ዘበአሕባለ፡ ጠፈር፡

| | ይትዓቀድ። አላ፡ ብዑድ፡ ግብረተ፡ ሕንፃሆን፡ እስመ፡ ፫ ሕንፃ፡ ማኅፈድ፡ እፈቅድ፡ አርኢ፡ ዲበ፡ ምድር፡ አሐቲሰ፡ እንተ፡ ሙሴ፡ ዘበአገያት፡ ወዘዕፀወ፡ ዓዳም፡ ወርቅ፡ ወብሩር። ወካልዕታሂ፡ እንተ፡ ሰሎሞን፡ ይእቲ፡ ዘዕብን፡ ወዕፀወ፡ ወፅቡር፡ ወአኅባለ፡ ጠፈር፡ ወርቅ፡ ወብሩር፡ ወሣልስ፡ ደብተራየ፡ እንቲአከ፡ ይእቲ። ዘሀለወኒ፡ እክስት፡ በእደዊከ፡ እንበለ፡ ዕፅ፡ ወመሬት፡ ወዘእንበለ፡ አኅባለ፡ ጠፈር። ወዕብኖንሂ፡ ይትበደር፡ እምወርቅ፡ ወብሩር፡ ወእምዕንቈ፡ ሰነፔር፡ ክቡር። እስመ፡ እምአሐቲ፡ ኰኵሕ፡ ይትገበራ፡ ወበእንተ፡ ኮና፡ ብዑዳተ፡ እም፪ቱ፡ ደብተራ፡ ቀደምት፡ አሐቲ፡ እንተ፡ ሙሴ፡ ወካልዕታ፡ እንተ፡ ሰሎሞን፨ ወሣልስተሰ፡ እንቲአሆን፡ ይእቲ፡| ደባትር፡ ዘይትገበራ፡ በዕደዊከ፡ በእደ፡ ግብረቶን። ውስተ፡ ውእቶን፡ ደባትሪከ፡ ዘተጋነየ፡ ይንሣእ፡ በከመ፡ ሰአለ፡ ወይረክብ፡ በከመ፡ ጸለየ፡ ወጌሠ፡ ኀቤሆሙ፡ ኢይፃሙ። ወዘአብአ፡ ሎን፡ እምኀቤሁ፡ እትወከፎ፡ ከመ፡ ቍርባነ፡ ሥጋየ፡ ወከመ፡ ሞጻሕተ፡ ደምየ። ለእመ፡ አብአ፡ በንጹሕ፡ ሕሊና፡ ወበጽሩይ፡ ልብ፡ ወበአእምሮ፡ ምሕረተ፡ ዚአየ፡ ወበተዘክሮ፡ ኪዳነ፡ ዘአቀምኩ፡ ለከ፡ ወኵሉ፡ ዘተፀምደ፡ ውስተ፡ ውእቶን፡ አብያተ፡ ክርስቲያናት፡ ጸዕተ፡ ነፍሱ፡ እምሥጋሁ፡ እንዘ፡ ይትአመን፡ በኃይለ፡ ጸሎትከ። አነ፡ እሬሲ፡ መክፈልቶ፡ ምስሌከ፡ ወርስቶ፡ ምስለ፡ ርስትከ፡ ወበአቶ፡ ውስተ፡ በአትከ። ወውዳሴሁ፡ ዕሩይ፡ ምስሌከ፡ ወክብሮ፡ ከመ፡ ክብርከ፡ | | ወአክሊሎ፡ ከመ፡ አክሊልከ። ወብርሃኖ፡ ከመ፡ ብርሃንከ፡ ወትርሲቶ፡ ከመ፡ ሰርጐ፡ ትርሲትከ፡ ለእመ፡ አዕረፈ፡ እንዘ፡ ይጐደጉድ፡ ዝኅረከ፡ ወእንዘ፡ ይትአማኅ፡ ታቦተ፡ ሥጋከ። ወእንዘ፡ ይትቀባዕ፡ እምፀበለ፡ እፍረትከ፡ ዕነ፡ ዕቀብዖ፡ እምዕፍረተ፡ ሰማያዊ፡ ዘኢይትመዘመዝ፡ መዓዛሁ፡ በብዙኅ፡ አዝማን። ወባሕቱ፡ ጽናዕ፡ ወኃይል፡ ወጥባዕ፡ ለሕንጻ፡ ማኅፈድየ። እስመ፡ ብዙኃት፡ ነፍሳት፡ እለ፡ ይድኅና፡ በውስቴቶን፡ ተአሚኖን፡ በኃይለ፡ ጸሎትከ። ወተጸዊኖን፡ በትንብልና፡ ዚአከ፡ ወአነሂ፡ ኢያሴሰል፡ ጸጋየ፡ ወምሕረትየ፡ እምኔሆሙ፡ ወኀብተ፡ ረድኤትየ፡ ኢይአተት፡ እምውስተ፡ አብያቲሆን።| ወርስቶን፡ ምስሌከ፡ እመኒ፡ እድ፡ ወአንስት፡ ይኩን። ምስሌከ፡ ማኅደሪሆሙ፡ ለእለ፡ ይትአመኑ፡ በጸሎትከ፡ በኃይለ፡ ትንብልናከ፡ ወዘንተ፡ ሶበ፡ ይቤሎ፡ ኢየሱሰ፡ ላሊበላ፡ ወተሐሥየ፡ ላሊበላ፡ ወተመልአ፡ እምኃይለ፡ መንፈስ፡ ቅዱስ፡ ወአሐዘ፡ እንዘ፡ ይብል፡ አድምዕ፡ ቃልከ፡ እግዚእየ፡ ወጽኑዕ፡ ኪዳንከ። ወኢይትሄሰው፡ ቃልከ፡ ስብሐት፡ ለከ፡ በአፈ፡ ኵሎሙ። ሕዝብከ። ወበእንተ፡ ሕንፃ፡ ቤተ፡ ክርስቲያንከ፡ ቅድስት፡ ለከ፡ እምአፈ፡ ኵሎሙ፡ ትጉሃኒከ፡ በኃይለ፡ ዚአከ፡ ይትገበራ። እስመ፡ ሠምራ፡ ፈቃደ፡ ዚአከ። ሊተሰ፡ ሐመድ፡ ወሕጹጽ፡ እምኵሉ፡ ሰብእ፡ ወለእመሰ፡ አንተ፡

| | ፈቀድከ፡ ከመ፡ ትክስቶን፡ በእደዊየ፡ አልቦ፡ ግብር፡ ዘይጸንዓከ፡ እስመ፡ አንተ፡ ገባሪሁ፡ ለኵሉ፡ ፍጡር። ወይእዜኒ፡ ፈቃድከ፡ ለይኩን፡ ወይርድአነ፡ ኃይልከ። ወይቤሎ፡ ኢየሱስ፡ ቀዲሙ፡ እቤለከ፡ መላእክትየኒ፡ ኢይርኅቁ፡ እምኔከ። ወእሙንቱኒ፡ ይረድኡከ፡ ወይኤምሩከ፡ ወይሜጥኑ፡ ለከ፡ በበአካሎን፡ ለእማንቱ፡ አብያተ፡ ክርስቲያን፡ ወይእዜኒ፡ ኢይሄሱ፡ ቃልየ፡ ዘወፅአ፡ አፉየ፡ እምአፉየ፡ እሙንቱ፡ ይረድኡከ። ወባዕደ፡ እለ፡ ይገብርዋሂ፡ አነ፡ እገብሮ፡ ወባዕደ፡ እለ፡ ይቄድሰዋሂ፡ አነ፡ እቄድስ፡ እስመ፡ በውስቴቶን፡ ይትገበር፡ ስብሐተ፡ ሞትየ፡ ወትንሣኤየ፡ ወስብሐተ፡ | ዕርገትየ፡ ወስብሐተ፡ ዳግም፡ ምጽአትየ። ወተዝካረ፡ ኵሉ፡ በዓላትየ፡ ወባሕቱ፡ ጐጕዕ፡ ከመ፡ ትፈጽም፡ ገቢሮቶን። እስመ፡ በጽሐ፡ ዕድሜሆን፡ ለሕንፀት። ቀዲሙኒ፡ ቀባዕኩከ፡ ቅብዓ፡ መንግሥት፡ ውስተ፡ ሰማይ፡ ሳብዕ። /ወ/ይእዜ፡ እሰሚ፡ ለከ፡ ስመ፡ መንግሥትከ፡ ገብረ፡ መስቀል፡ እስመ፡ በኀበ፡ ይጼዋዕ፡ መስቀል፡ ህየ፡ ይትሉ፡ ረድኤት፡ ወህየ፡ ይበዝኅ፡ መዊዕ፡ ብሂል። እስመ፡ አነ፡ ሞእክዎ፡ ለሰይጣን፡ አመ፡ አንጦልዓ፡ መልክዕየ፡ ይምነ፡ ወጽግግመ፡ ላዕለ፡ ወታሕተ፡ አመ፡ ተሰቀልኩ፡ ዲበ፡ ዕፀ፡ መስቀል፡ ወበእንተዝ፡ ይደልዎሙ፡ ለመንግሥት፡ ከመ፡ ይሰመዩ፡ በዝንቱ፡ ስም፡ ዝውእቱ፡ ገብረ፡ መስቀል፡ ከመ፡ | | ይምዕዎ፡ ለፀሮሙ፡ በውስተ፡ ኵሉ፡ አ፡? ዕ፡ ጽባዕ፡ እስመ፡ ገብረ፡ መዋዒ፡ በኀበ፡ ሖረ፡ ይመውዕ፡ ወበኀበ፡ ጸብዕ፡ ይትሄየል፡ ወይጸንዕ፡ ወለከሂ፡ ሰመይኩከ፡ በዝንቱ፡ ስም፡ ዝንቱ፡ ውእቱ፡ ገብረ፡ መስቀል፤ ወመስቀለሰ፤ ሶበ፡ ትሰምዕ፡ ኢታስተማስል፡ መስቀለ፡ ዘዕፅ፤ አላ፡ ውእቱ፡ መስቀል፡ ዘአመስቀልኩ፡ መልክዕየ፡ በዕለተ፡ ዓርብ፡ እስከ፡ እመውዖ፡ ለሰይጣን፡ ወእስከ፡ እቅንዎ፡ በቅንዋትየ፡ ወአስገርክዎ፡ በላህበ፡ ሥጋየ፡ እስከ፡ ለጽለጽ፡ ላሁ፡ ስናጴ፡ መለኮትየ፡ ወብዙኃን፡ እለ፡ አርአዩ፡ መዊአ፡ በትእምርተ፡ መስቀል፡ ሙሴኒ፡ ከፈለ፡ ባሕረ፡ በትእምርተ፡ መስቀል፡ ወአስጠሞ፡ ካዕበ፡ ለፈርዖን፡ በትእምርተ፡ መስቀል፡ ወካዕበ፡ ትመውዖ፤ አንተኒ፡ | ለሰይጣን፡ ወለኵሉ፡ መናግንቲሁ፡ ወብዙኃን፡ እለ፡ ተሰምዩ፡ ወኢዘኃብረ፡ ስሞሙ፡ ምስለ፡ ምግባሮሙ፡ ወለከሂ፡ ስመከኒ፡ ኅቡር፡ ምስለ፡ ምግባር፡ ከ፡ ወሰ/ላ/ምየ፡ ወኃይለ፡ ረድኤትየ፡ ወፍቅርየ፡ ወትውክልትየ፡ መስቀልየ፡ የሀሉ፡ ምስሌከ፨ ወዘንተ፡ ብሂሎ፡ በረከ፡ ወዓርገ፡ ውስተ፡ ሰማይ፡ ይሬእዮ፡ ላሊበላ፡ በከመ፡ ርእይዎ፡ አርዳኢሁ፡ ምስለ፡ እሙ፡ አመ፡ ዓርገ፡ ጼዊዎ፡ ጼዋ፨ ወላሊበላ፡ ሰገደ፡ ውስተ፡ ምድር፡ ነጺሮ፡ ዕርገቶ፡ ለእግዚእነ፡ ኢየሱሰ፡ ወገብርኤልሂ፡ ሀሎ፡ ምስለ፡ ላሊበላ፡ ይቀውም፡ ምስሌሁ፡ ውስተ፡ ዝኩ፡ መካን፡ ሀበ፡ ነገሮ፡ ለላሊበላ፡ ወኀበ፡ መካን፡ ዘወሀቦ፡ ኪዳነ፨ ወእምድኅረዝ፡ ይቤሎ፡ ገብርኤል፡

| | ለላሊበላ፡ ኦብእሲ፡ ረከብከ፡ ጸጋ፡ ዓቢየ፡ ዘኢረከቡ፡ ዘከመዝ፡ ጸጋ፡ እንበለ፡ ኅዳጣን። ወይእዜኒ፡ ከመ፡ ትፈጽም፡ መልእክተከ፡ ዘተአዘዝከ፨ እስመ፡ ተፈጸመ፡ ለከ፡ ኵሉ፡ ተምኔትከ፡ ዘበእንቲአሆን፡ ነገድከ፡ ወእግዚእከኒ፡ ርኢኮ፨ በውስተ፡ ፪ኤሆን፡ አኅጉር፡ በላዕሉሂ፡ ኢየሩሳሌም፡ ወበታሕቱሂ፡ ኢየሩሳሌም፡ ወይቤሎ፡ ላሊበላ፡ ኀበ፡ ኵሎን፡ መካናት፡ ይትባረክ፡ እግዚአብሔር፡ ዘኢይከልአኒ፡ ጸሎትየ፡ ወኢያርሐቀ፡ ሣህሎ፡ እምኔየ፨ ወኢያስተኃፈረኒ፡ እምተስፋየ፡ ወኢተሐየያ፡ ለንግደትየ። ወባሕቱ፡ ሰደኒ፡ ኀበ፡ ኵሎን፡ መካናት፡ ዘእግዚእ፡ ከመ፡ እትአማኅ፡ ወእትባረክ፡ እምኔሆን፡ ወሶቤሃ፡ አብጽሖ፡ ገብርኤል፡ ለላሊበላ፡ ኀበ፡ ኵሎን፡ መካናተ፡ ምሥጢር፡| ዘእግዚእ፡ ወተአምኅ፡ እንዘ፡ ያነክር፡ መድረከ፡ ኆኅቲሆን፡ ወእንዘ፡ ይልስስ፡ ጸባለ፡ እምነ፡ ቶሰልሮቅናጦናቲሆን፨ ወእምቅድመ፡ ኵሉ፡ አምኃሁ፡ ይብል፡ ውስተ፡ ኵሉ፡ መካን፡ ኀበ፡ በጽሐ፡ ትኤምኃኪ፡ ወለትኪ፡ መስቀል፡ ክብራ፡ ኦታቦተ፡ ኪዳኑ፡ ለእግዚአብሔር፡ ወኃደረ፡ ቅድሳቱ፡ ለ/ል/ዑል፨ ወበዳግም፡ አምኆቱ፡ ይብል፡ እምኀቤከ፡ አነ፡ ገብርከ፡ ወልደ፡ ዓመትኪ፡ እምየ፡ ቤተ፡ ክርስቲያን፨ ወውስተ፡ ዮርዳኖስሂ፡ ኀበ፡ ተጠምቀ፡ በጺሖ፡ ኀበ፡ ተጠምቀ፡ እግዚእነ፨ ይቤ፡ ሕፅበኒ፡ ወአ/ን/ጽሐኒ፡ እምኃጢአትየ፡ ወእምአበሳየኒ፡ አንጽሐኒ፡ ወለዓመትከኒ፨ መስቀል፡ ክብራ፡ ሕጽባኒ፡ እምርስሐት፡ በዝንቱ፡ ማየ፡ ዮርዳኖስ፡ ዘተጠምቀ፡ ቦቱ፡ እንዘ፡ አልቦ፡ ኃጢአት፡ ከመ፡ | | ተሀብ፡ ሥርየተ፡ ለኃጥዋአን፡ ከመ፡ ንንሣእ፡ ኃይለ፡ ወወርዶትከ፡ ወእምዝ፡ አምኃ፡ ላሊበላ፡ ኀበ፡ ኵሎ፡ መካናተ፡ ኢየሩሳሌም፡ እንዘ፡ ይነዝኅ፡ አንብዖ፡ ውስተ፡ ራግዛቲሆን፡ አውኂዞ፡ ከመ፡ እንተ፡ ማይ፤ እንዘ፡ ይብል፡ ለ/ይ/ኩን፡ እግዚኦ፡ ዝንቱ፡ ብጽሐተ፡ አንብዕየ፡ ሊተ፡ ለኃጥእ፡ ከመ፡ አንብዓ፡ ለይእቲ፡ ብእሲት፨ ዘአርሐሰት፡ ለእገሪከ፡ ወእንተ፡ መዝመዘተከ፡ እርገሪከ፡ ወአንተሂ፡ ትቤላ፡ ተኃድገ፡ ለኪ፡ ኃጢአተኪ፡ አሕቀወተኪ፡ ሑሪ፡ እትዊ፡ በሰላም፡ ወሊተሂ፡ ለገብርከ፡ /ምህርካ፡ ሥላሴ፡ ሚካኤል፡/ ረሲ፡ ሰላመ፡ ተመይጦትየ፡ እስመ፡ በፈቃድከ፡ ትቤለኒ፡ ለሊከ፡ ጐጕዕ፡ ከመ፡ ትፈጽም፡ መልእክተከ፡ እስመ፡ በእደዊከ፡ ሀለዎን፡ ከመ፡ ይትከስታ፡ አብያተ፡ ክርስቲያናት፡ | እሁድ? ብዙኃት፡ ዘእምአሐቲ፡ ኰኵሕ፨ ወይእዜኒ፡ ሰርኅ፡ ፍኖትየ፡ በከመ፡ ሰራኅከ፡ ፍኖቶሙ፡ ለብርሃናተ፡ ዓለም፡ ሐዋርያቲከ፨ ወዘንተ፡ ብሂሎ፡ አንሶሰወ፡ ላሊበላ፡ ተመይጦ፡ ውስተ፡ ብሔረ፡ ኢየሩሳሌም፡ ወኢትዮጰያ፡ ኀበ፡ ሀለዋ፡ ዕላ/ን/ቱ፡ አብያተ፡ ክርስቲያናት፨ እለ፡ ተብህለ፡ ሀለዎን፡ እንዘ፡ ይትሐነጻ፡ እንበለ፡ ዕፅ፡ ወመሬት፡ እንበለ፡ ኃብል፡ ወመዋጽሕት፨ ወእምዝ፡ ነሥኦ፡ ገብርኤል፡ ወጾሮ፡ ዲበ፡ አክናፊሁ፡ ብሩሃት፡ ወሰረረ፡ መልዕልተ፡ አየር፡ ወአብጽሖ፡ ወስተ፡ ብሔር፡ ኀበ፡ ሀለወት፡ መስቀል፡ ክብራ፡ ወይእቲሰ፡ ብሔር፡ ጥንተ፡ ክ/ር/ስትና፡ ይእቲ፡ እምነ፡ አኅጉራተ፡ ኢትዮጵያ፡ ወመስቀል፡ ክብራሰ፡ ሀለወት፡ እንዘ፡ ትት/ና/ዘዝ፡

| | ፲፩ ምስለ፡ ሚካኤል፡ እንዘ፡ ይዜንዋ፡ ምጽአቶ፡ ለምታ። ወአብጽሐቶ፡ በይእቲ፡ ዕለት፡ ዘከመ፡ ይበጽሕ፨ ወሶበ፡ በጽሐ፡ ሰዓት፡ ብጽሐቱ፡ ይቤላ፡ ተደለዊ፡ ለተራክቦ፡ ምትኪ፡ ወእንዘ፡ ዘንተ፡ ይቤላ፡ በጽሐ፡ ገብርኤል፡ እንዘ፡ ይጸውሮ፡ ለላሊበላ፡ ወአንበሮ፡ ቅድመ፡ ገጻ፡ ለመስቀል፡ ክብራ፡ በፍሥሐ፡ ወሐቀፈቶ፡ ክሳዶ፡ ወአምኃቶ፡ በፍቅር፡ ዓቢይ፡ ወአንገርገረት፡ በቅድሜሁ፡ ለገብርኤል፡ እንዘ፡ ትሰግድ፡ ወትብል፡ ሰላም፡ ለመልአከ፡ ጽድቅ፡ ሰላም፡ ለመልአከ፡ ብርሃን። ቀዲሙኒ፡ ሰማዕኩ፡ በእንቲአከ፡ ከመ፡ አብሳሬ፡ ፍሥሐ፡ አንተ፡ ዜናዌ፡ ትፍሥሕት። ወከመዝ፡ ብሂለ፡ አምኃቶ፡ እስመ፡ ረከበት፡ ፍሥሐ፡ በነጽሮቶሙ፡ ለ፪ኤሆሙ፡| ሊቃነ፡ መላእክት፡ ወበነጽሮቱ፡ ለምታ። እስመ፡ በህየ፡ ተራከቡ፡ መልአክ፡ ምስለ፡ መልአክ፡ ወሰብእ፡ ምስለ፡ ሰብእ። ወበህየ፡ ኮኑ፡ ፩ መርኤተ፡ ወ፩ ነገድ፡ እመሬታውያን፡ ፪ መስቀል፡ ክብራ፡ ወላሊበላ፡ ወእምእሳታውያን፡ ፪ቱ፡ ሚካኤል፡ ወገብርኤል፡ ወእምዝ፡ ፬ቲሆሙ፡ አኃዙ፡ ይትናገሩ፡ ነገራተ፡ እግዚአብሔር፡ ዘከመ፡ ረሰየ፡ ላሊበላ፡ ነገራ፡ ኵሎ፡ ነገራተ፡ ምሥጢር፡ ዘኢየሩሳሌም፨ እንተ፡ በውስቴቶን፡ ተገብረ፡ መድኃኒት፡ ዘርእየሂ፡ በራዕየ፡ ሌሊት፡ ኵሎ፡ ቅሥፈታቲሁ፡ ለመድኃኒነ፡ ነገራ፨ ወይእቲኒ፡ ነገረቶ፡ ኵሎ፡ ንብረታ፡ ዘከመ፡ ነበረት፡ ወራዕየኒ፡ ዘርእየ፡ ምታ፡ ወይእቲኒ፡ ርእየት፡ ወአልቦ፡ ወኢ፩ኒ፡ | | ዘተሰወራ፡ እምኵሉ፡ ምሥጢራ፡ እስመ፡ በአሐቲ፡ ሌሊት፡ ርእዩ፡ ፪ኤሆሙ፡ ወላሊበላኒ፡ እንዘ፡ ሀለወ፡ በኢየሩሳሌም፡ ወመስቀል፡ ክብራኒ፡ እንዘ፡ ሀለወት፡ በኢትዮጵያ፡ ርእየት፡ ኵሎ፡ ምሥጢራተ፡ ዘርእየ፡ ምታ፡ በኢየሩሳሌም፨ ወከመዝ፡ ተዘያኒዎሙ፡ አኃዙ፡ ይሰብሕዎ፡ ለእግዚአብሔር፡ ወስባሔ፡ መንክር፡ ምስለ፡ እልክቱ፡ ፪ኤሆሙ፡ ሊቃነ፡ መላእክት፡ እንዘ፡ ይብሉ፡ ይባርክዎ፡ ኵሉ፡ ግብረ፡ እግዚእ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም፨ ይባርክዎ፡ ደቂቀ፡ እጓለ፡ እመሕያው፡ ለእግዚአብሔር፤ ይባ/ር/ክዎ፡ መላእክተ፡ እግዚእ፡ ለእግዚአብሔር፨ ወከመዝ፡ ባረክዎ፡ ፬ቲሆሙ፡ ቶሲሖሙ፡ ቡራኬ፡ | መላእክት፡ ወሰብእ፡ እስመ፡ ህየ፡ አማኅበሩ፡ ፪ ነገድ፡ ዘላዕሉ፡ ወዘታሕቱ፡ ወእማንቱሰ፡ አንስትሰ፡ ዘአማኅፀና፡ ሚካኤል፡ መስቀል፡ ክብራ፡ ኃቤሆን፡ ከመ፡ ይዕቀበሃ፡ ወይእቲ፡ ዕለት፡ አስተርአዮን፡ እንዘ፡ ይጸንሐሐ፡ እስከ፡ ይትመየጥ፡ በከመ፡ ይቤሎን፡ ወሶበ፡ ርእያሁ፡ አሐዘ፡ ይትፌሥሕ፡ ወይ/ኔ/ምኃሁ፡ በፍቅር፨ እንዘ፡ ይብላ፡ ዳኅንኑ፡ ንግደትከ፡ ኦወሬዛ፡ ሠናየ፡ ራዕይ፡ ብእሲ፡ አምላክ፡ ወይቤላሆን፡ ሚካኤል፡ ዳኅና፡ ለይረሲ፡ ኪያክን፡ ኦፍቁራንተ፡ እግዚእ፡ አይቴኑ፡ ሀለወት፡ ዘአማኅፀንኩክን፨ ወሶበ፡ ይቤሎን፡ ከመዝ፡ ሖራ፡ ከመ፡ ይጼውዓሃ፡ እምኀበ፡ ሀለወት፡ እስመ፡ ውእቱ፡ ካልዕ፡ መካን፡ ሀለወት፡ ምስለ፡ ምታ፨ ወእማንቱሰ፡ አንስት፡ ኢያመራሁ፡ ለምታ፡ እስመ፡ ኢርእያሁ፡ ቀዲሙ፡ r. 97 ra አላ፡ ሚካኤል፡ ባሕቲቱ፡ አማኅፀኖን፨ ወላሊበላሰ፡ እስመ፡ ሖረ፡ ውእቱ፡ ሀገረ፡ ኢየሩሳሌም፡ ገብርኤል፡ ርእያ፡ ወሶቤሃ፡ ለመስቀል፡ ክብራ፡ ምስለ፡ ላሊበላ፡ ይቤላሃ፡ ምስለ፡ መኑ፡ ሀሎኪ፡ ኦእግዚእትነ፡ በአይቴኑ፡ ተአምርዮ፡ ለዝንቱ፡ ብእሲ፨ ወትቤሎን፡ አአምሮን፡ ኦአኃትየ፡ እስመ፡ እኁየ፡ ውእቱ፡ ወፍቁርየ፡ ወበጽሐ፡ ይእዜ፡ እንዘ፡ የኃሥሠኒ፨ ወይቤላሃ፡ ነዋኬ፡ ውእቱ፡ ብእሲ፡ ዘአማኅፀነኪ፡ ኀቤነ፨ ውእቱ፡ የኃሥሥኪ፡ ወንዒ፡ ከመ፡ ትትራከቢዮ፡ ወሖረት፡ መስቀል፡ ክብራ፡ ምስለ፡ ምታ፡ ኀበ፡ እማንቱ፡ አንስት፡ ወበጽሐት፡ ኀበ፡ ሀሎ፡ ሚካኤል፡ ምስለ፡ መላህቅቶን፡ ለእለ፡ አምጽአሃ፡ ወአወፈያሃ፡ ለሚካኤል፡ ወሚካኤልኒ፡ ባረኮን፡ ለ/እ/ማንቱ፡ አንስት፨ እንዘ፡ ይብል፡ ቡሩካተ፡| ኩና፡ በበረከተ፡ ሥሉስ፡ ቅዱስ፡ ወበበረከተ፡ እግዝእተ፡ ኵልን፡ አንስት፡ ወይቤላ፡ አሜን፡ ወአሜን፨ ወሰገዳ፡ ታሕተ፡ እገሪሁ፡ እንዘ፡ ይብላ፡ ኢትርሰአነ፡ ኦእግዚእነ፡ በጸሎትከ፡ በኀበ፡ ኵሉ፡ ዘሖርከ፡ እስመ፡ ንሬእየከ፡ ጸጋ፡ እግዚአብሔር፡ ዘየአውደከ፡ ወኢታንትግ፡ ሐውጸተነኒ፡ ወኢትዝክር፡ ኃጢአተነ፨ ወዘንተ፡ እንዘ፡ ይቤላሁ፡ ወፅኡ፡ ከመ፡ ይሑሩ፡ ፍኖቶሙ፡ ፬ቲሆሙ፡ መስቀል፡ ክብራ፡ ወላሊበላ፡ ሚካኤል፡ ወገብርኤል፡ እንዘ፡ ይመርህዎሙ። ወሶበ፡ ርሕቁ፡ ንስቲተ፡ እምነ፡ ሀገር፡ ነሥእዎሙ፡ ሚካኤል፡ ወገብርኤል፡ ዲበ፡ አክናፊሆሙ፡ ብሩሃት፡ ወአብጽሕዎሙ፡ ቅሩበ፡ ሀገር፡ ኀበ፡ ሀለወ፡ ነጋሢ፡ እኁሁ፡ ለላሊበላ፡ ዘስሙ፡ ሐርበይ፡ በከመ፡ ነገርኩክሙ፡ ቅድመ፨ | | ወእንዘ፡ ሀለው፡ ላሊበላ፡ ወመስቀል፡ ክብራ፡ ኀበ፡ አብጽሕዎሙ፡ መላእክት፡ ቅሩበ፡ ሀገር፡ እንዘ፡ ሀለወ፡ ነጋሢ። መጽአ፡ እግዚእዚእነ፡ ኢየሱስ፡ ክርስቶስ፡ ኀበ፡ ነጋሢ፡ ወአደንገጸ፡ በንዋሙ፡ በእንተ፡ ዘአኅሰመ፡ ቀዲሙ፡ ላዕለ፡ እኁሁ፡ ለላሊበላ፡ ወገሠጾ፡ ብዙኃ፡ በእንቲአሁ፡ በከመ፡ ገሠጸ፡ ላሊባላ፡ ከመ፡ ኢያኅስም፡ ላዕለ፡ ያዕቆብ፡ አመ፡ ዴገኖ፡ ወከማሁ፡ ለውእቱኒ፡ ነጋሢ፡ ገሠጾ፡ ዘውእቱ፡ እኁሁ፡ ለላሊበላ፡ ወነገሮ፡ ከመ፡ ተፈጸመ፡ መዋዕለ፡ መንግሥቱ፡ ወተ/ው/ህበት፡ ለላሊበላ፡ አኮ፡ በእንተ፡ /ክብረ፡/ ዓለም። አላ፡ በእንተ፡ ሕንፃ፡ ቤተ፡ ክርስቲያናት፡ ዘሀለዎን፡ ይትሐነጻ፡ እንበለ፡ ዕፅ፡ ወመሬት። ወአዘዞ፡ ከመ፡ ይትቀበሎ፡| ንጉሥ፡ ለእኁሁ፡ ወነገሮ፡ ሀገሮሂ፡ ኀበ፡ ሀለወ፡ ላሊበላ፡ ወይቤሎ፡ ሑር፡ ተቀበሎ፡ በክብር፡ ዓቢይ፡ ወፍሥሐ፡ ወማኅሌት፡ መንፈሳዊት፡ እስመ፡ አነ፡ ቀባዕክዎ፡ ቅብዓ፡ ቅዱሰ፡ ቅብዓ፡ መንግሥት፡ መንፈሳዌ፡ በከመ፡ ይደልዎ፡ ለመንግሥት፡ ለእለ፡ ተሐርዩ፡ እምከርሠ፡ እሞሙ። ወተቀብዓ፡ ቅዱስ፡ ባቍዕ፡ ለአእምሮ፡ ፍትሕ፡ ወለመዊአ፡ ዕልዋን። ወይእዜኒ፡ ሑር፡ ተቀበሎ፡ ለእኁከ፡ በከመ፡ እቤለከ፡ በክብር፡ ወበፍሥሐ፡ ወኢያኅዝን፡ ልብከ፡ እንበይነ፡ መንግሥት፡ እስመ፡ ተውህበት፡ ለላሊበላ፡ ወአኮ፡ በእንተ፡ ኃለፊ፡ ዘበምድር፡ ዘወሀብክዎ፡ መንግሥተ። አላ፡ በእንተ፡ ሕንፃ፡ ቤተ፡ ክርስቲያን። ወአንተሂ፡ ኅሥሥ፡ ለከ፡ መንግሥተ፡ ዘበሰማያት፡

| | ዘኢይኃልፍ። መንግሥትሰ፡ ዘበምድር፡ ኃላፊ፡ ውእቱ። ወባሕቱ፡ ተንሥእኬ፡ ተቀበሎ፡ ለእኁከ፡ በዛቲ፡ ዕለት፡ ሶበ፡ ጸብሐ፡ ወንብሮ፡ ዲበ፡ መንበሩ፡ መንግሥትከ፡ እንዘ፡ ትባርክ፡ በረከት፡ ሰማያዊት። ወለሊከ፡ በዕደዊከ፡ ላጽያ፡ ለስእርተ፡ ርእሰከ፡ አመ፡ ዕለተ፡ ታነብሮ፡ ዲበ፡ መንግሥት፡ በከመ፡ ይደሉ፡ መርዓ፡ መንግሥት፨ ወዘንተ፡ ብሂሎ፡ እግዚእነ፡ ኢየሱስ፡ ክርስቶስ፡ በራዕየ፡ ሌሊት፡ ተሰወሮ። ወነቅሐ፡ ነጋሢ፡ እንዘ፡ ይርዕድ። ወያንቀለቅል፡ አእፅምቲሁ፡ እምራዕየ፡ ግርማሁ፡ ለዘአስተርአዮ፡ ወፈርሃ፡ እምቃለ፡ ተግሣጽ፡ ዘገሠጾ። ወተንሢኦ፡ ሰገደ፡ ነጋሢ፡ እንዘ፡ ይብል፡ ኦእግዚኦ፡ ዘአስተርአይከኒ፡ በራዕየ፡ ሌሊት፡ ዘገሠጽከኒ፡ ዘአኅሰምኩ፡| ቀዲሙ፡ ላዕለ፡ እኁየ፡ ግርማከ፡ አርአይኒ፡ ወመሠወኒ፡ ቃለ፡ ተግሣጽከ፡ እፎ፡ እክል፡ ዕቁም፡ ቅድመ፡ ገጽከ፡ በእንተ፡ ኵነኔ፡ ዓቢይ፡ እምዕፁብ፡ አመ፡ ይድኅኑ፡ ጻድቃን፡ አነ፡ ኃጥእ፡ በአይቲ፡ ያስተርኢ፡ ሀለወኒ፡ ወአይኑ፡ መካን፡ ይሴውረኒ፡ እስመ፡ ምድርኒ፡ ወኵሉ፡ ግብር፡ ዘላዕሌሃ፡ ትውዒ፡ ወሰማያትኒ፡ ዘእንበለ፡ ድምጽ፡ ይትረኃዋ፡ ወይሴስላ፡ ወኢያስተርኢ፡ አሰሮን፡ ለሰማያት፡ ወምድር። ወአልቦ፡ ዘያተርፍ፡ እንበለ፡ ባሕቲቱ፡ መብረቀ፡ ስብሐቲከ፡ ይርአይ፡ ኵሎ፡ ዘነፍስ፡ ምግባራቲሁ። ጻድቅኒ፡ ጽድቆ፡ ኃጥእኒ፡ ኃጢአቶ። እስመ፡ ቦቱ፡ ይትከሠት፡ ምግባራተ፡ ኵሉ፡ ወኅቡአቲሆሙ፡ ለኵሉ፡ ደቂቀ፡ እጓለ፡ እመ፡ ሕያው፡ | | ለጻድቃን፡ ይት/ከ/ሠት፡ ኅቡአተ፡ ጽድቁ፡ ወለኃጥእኒ፡ ያስተርኢ፡ ኅቡአተ፡ ኃጢአቱ፡ አይቴኬ፡ ይትኃባእ፡ ዘከማየ፡ ኃጥእ፨ ወአነኒ፡ አይቴኑ፡ እሴወር፡ በይእቲ፡ ዕለት፡ ደይን፡ አመ፡ ይትወሐጡ፡ ሰማያት፡ ወምድር፡ በነደ፡ እሳት፨ እንበይነ፡ ፈቃድከ፡ ለይኩን፡ ወለከ፡ ፈቀድከ፡ ሀብ፡ ምንተ፡ ይበቍዓከ፨ መንግሥት፡ ዘበምድር፡ ያድኅኒኑ፡ እምግርማ፡ ድንጋፄ፡ ዘሰአተ፡ ደይን፡ ወዘንተ፡ ብሂሎ፡ ውእቱ፡ ነጋሢ፡ ጸውዖሙ፡ ለኵሎሙ፡ ሐራሑ፡ ወበጽሑ፡ ኀቤሁ፡ ኵሎሙ፡ ወአልያኒሁ፡ ለነጋሢ፡ ኵሎ፡ ተአይኒሁ፡ ተጋብኡ፡ በትእዛዙ፨ ወነገሮሙ፡ ካዕበ፡ ዘከመ፡ ተውህበት፡ አስተርአዮ፡ እግዚአብሔር፡ ወዘከመ፡ ገሠጾ፡ በእንተ፡ ዘአኅሰመ፡ ቀዲሙ፡ ላዕለ፡ እኁሁ፨| ወነገሮሙ፡ ካዕበ፡ ዘከመ፡ ተውህበት፡ መንግሥቱ፡ ለላሊበላ፡ እኁሁ። ወይቤሎሙ፡ ተንሥኡኬ፡ ንሑር፡ ወንትቀበሎ፡ እስመ፡ ከማሁ፡ አዘዘኒ፡ እግዚአብሔር፡ ከመ፡ እትቀበሎ፡ ወከመ፡ አንብሮ፡ ዲበ፡ መንበረ፡ መንግሥትየ፨ ወከመ፡ ለልየ፡ በእዴየ፡ እቅርጽ፡ ስእርቶ፡ በከመ፡ ይደሉ፡ ለመርዓ፡ መንግሥት፡ ወይቤልዎ፡ ሐራሑ፡ ምንትኒ፡ ዝንቱ፡ ነገር፡ ዘንሰምዕ፡ እምኔከ፡ እስመ፡ ተሰብረ፡ ልብነ፡ በሐዘን፡ እንበይነ፡ መንግሥትከ፨ እስመ፡ በሕይወትከ፡ ተኃድገ። ወይቤሎ፡ ነጋሢ፡ ሊተሰ፡ ፍሥሐ፡ ኮነኒ፡ ኃዲገ፡ መንግሥት፡ ወለእመሰ፡ አእመርኩ፡ ዘከመዝ፡ ድንጋፄ፡ ቀዲሙኒ፡ ነበርኩ፡ ዲበ፡ መንበረ፡ መንግሥት፨ እስመ፡ ግርማሁ፡ አደንገፀኒ፡ ለዘአስተርአየኒ፡

| | ትማልም፡ በራዕየ፡ ሌሊት፡ ወነቂሕየ፡ ስእንኩ፡ ቀዊመ፡ ወተናግሮ፨ እስመ፡ አንቀልቀሉ፡ መልክዕየ፡ ወተቀጥቀው፡ አዕፅምትየ፡ ወተቀጥቀው፡ አዕፅምትየ፡ ወስእንኩ፡ ተናግሮ፡ እስመ፡ ብህመ፡ ልሳንየ፡ ወበእንተዝ፡ ተበትከ፡ ፍቅረ፡ መንግሥት፡ እምስርወ፡ ልብየ፡ እስመ፡ ተዘከርክዎ፡ ለሰዓት፡ ደይን፡ ዘአልባቲ፡ አድልዎ፡ ኢለነገሥት፡ ወኢለማኳንንት፡ ኢለባዕል፡ ወኢለነዳይ፡ ዘእንበለ፡ ባሕቲቱ፡ ምግባሩ፡ ዘያደሉ፡ ሎቱ። ወዘአስተርአየኒ፡ ይቤለኒ፡ መንግሥተ፡ ምድር፡ ኃላፊ፡ ውእቱ፡ ኅሥሥ፡ መንግሥተ፡ ሰማያት፨ ወዘንተ፡ ብሂሎ፡ ወጽአ፡ ተንሢኦ፡ ነጋሢ፡ እንዘ፡ ያንሶሱ፡ በእገሪሁ። ወተለውዎ፡ ኵሎሙ፡ ሐራሁ፡ ወኖሎት፡| አበቅልትሂ፡ እንዘ፡ ያረውጹ፡ ድኅሬሁ፡ ወሐራሁኒ፡ እንዘ፡ ያገብርዎ፡ ከመ፡ ይጸዓን፡ ወውእቱ፡ የዓብዮሙ፡ እንዘ፡ ይብል፡ ኢይጼዓን፡ እአንሰ፡ እረክቦ፡ ለእኁየ፡ ከመ፡ ይ/ት/ኃደግ፡ ሊተ፡ ዘቀዲሙ፡ ኃጢአትየ፡ ዘአኅስምኩ፡ ላዕለ፡ እኁየ፡ ወከመዝ፡ አንሶሰወ፡ በእገሪሁ፡ እስከ፡ ረከቦ፡ ለእኁሁ፨ ወለላሊበላሰ፡ ይቤሎ፡ ገብርኤል፡ ተንሥእ፡ ተራከቦ፨ /ለ/እኁከ፨ ወናሁ፡ መጽአ፡ እንዘ፡ ያንሶሱ፡ በእገሩሁ፡ ወጽንዓ፡ እንዘ፡ ይብል፡ ኢይጸንዓ፡ ዲበ፡ በቅል፡ እስከ፡ እረክቦ፡ ለእግዚእየ፨ ወተንሥአ፡ ላሊበላ፡ ወአንሶሰወ፡ በፍኖት፡ እንተ፡ ባቲ፡ ይመጽእ፡ እኁሁ፡ ንጉሥ፡ ወተናጸሩ፡ ፪ሆሙ፡ ወሰገደ፡ ንጉሥ፡ ቅድመ፡ ሶበ፡ ነጸሮ፡ ለላሊበላኒ፡ | | ተንሢአ፡ ተአምኁ፡ በበይናቲሆሙ፡ በፍቅር፡ ዓቢይ፡ ፍጹም፡ ወተግህሡ፡ ወነበሩ፡ ፪ሆሙ፡ ወለእለ፡ ይቀውሙ፡ ቅድሜሁ፡ አዘዞሙ፡ ንጉሥ፡ ከመ፡ [ይ]ከመ፡ ይሰስሉ፡ ሐራሁ፡ እምቅድሜሁ፨ ወአሐዘ፡ ንጉሥ፡ ይትናገር፡ ምስለ፡ ላሊበላ፡ እኁሁ፡ ከመ፡ ያስተስሪ፡ ሎቱ፡ በእንተ፡ ዘሰደዶ፡ ቀዳሚ፡ ወአ/ተ/ስረየ፡ ሎቱ፡ እኁሁ፨ ወእምድኅረዝ፡ ተናገሩ፡ ካልአ፡ ዘሀሎ፡ ውስተ፡ ልቦሙ፡ ንጉሥኒ፡ ወላሊበላኒ፡ ወነገሮ፡ ንጉሥ፡ ለላሊበላ፡ ከመ፡ አስተርአዮ፡ በራዕየ፡ ሌሊት፨ ወዘከመ፡ አዘዘ፡ ከመ፡ ያንብሮ፡ ዲበ፡ መንበረ፡ መንግሥት፡ ላሊበላኒ፡ ነገሮ፡ ዘከመ፡ ቀብዖ፡ ቅብዓ፡ መንግሥት፡ ወ/ዘ/ከመ፡ ሰመዮ፡ ሎቱ፡ ስመ፡ | መንግሥቱ፨ ወዘንተ፡ ኵሎ፡ እንዘ፡ ይነግሮ፡ ላሊበላ፡ ለእኁሁ፡ በሁፋሬ፡ ይትናገር፡ እንዘ፡ ይብል፡ አኮ፡ ለክብረ፡ ዓለም፡ ዘይቤለኒ፡ ከመ፡ እንበር፡ ዲበ፡ መንበርከ፨ አላ፡ በእንተ፡ ቤተ፡ ክርስቲያናት፡ ዘሀለዎን፡ ይትከሰታ፡ በእደ፡ ገብሩ፡ ኃጥእ፨ ወይቤሎ፡ አነኒ፡ አእምርኩ፡ ዘንተ፡ ኦእኁየ፡ ለይሱቅ፡ መንበረከ፡ በጽድቅ፡ እግዚአ፡ ኃያላን፡ ወቅዱስ፡ እስራኤል፡ ዘከመ፡ ሶጠ፡ መንበሮ፡ ለዳዊት፡ ገብሩ፡ ወለሰሎሞን፨ ወልዱ፨ ወዘንተ፡ ብሂሎ፡ ተንሥአ፡ ነጋሢ፡ ወእኁሁ፡ ወአንሶሰው፡ ኅቡረ፡ ተፅዒኖሙ፡ ፪ሆሙ፡ ዲበ፡ በቅለ፡ ነጋሢ፡ ወበጽሑ፡ ዲበ፡ ታዕካ፡ መንግሥት፨ ወአዘዘ፡ ነጋሢ፡ ከመ፡ ይትጋብኡ፡ ኵሎሙ፡

| | ሰራዊቱ፡ ወሠርዓ፡ ሕገ፡ ለመርዓ፡ መንግሥት፡ ወነሥአ፡ ንጉሥ፡ መላጼ፡ በዕዴሁ፡ ወቀረጾ፡ ስእርቶ፡ ለላሊበላ፡ ወአንበሮ፡ ዲበ፡ መንበረ፡ መንግሥት፡ ወኦደ፡ አዋዲ፡ እንዘ፡ ይብል፡ ነግሠ፡ በፈቃደ፡ እግዚአብሔር፡ ወበፈቃደ፡ እኁሁ፤ ወይእዜኒ፡ ይኤዝዝ፡ እኁሁ፡ ከመ፡ ይትኰነኑ፡ ኵሉ፡ ሕዝብ፡ ለላሊበላ፡ ወኵሎ፡ ዘይደሉ፡ ለንጉሥ፡ ሎቱ፡ የሀቡ፡ ወፍትሐኒ፡ ሎቱ፡ ያብኡ፡ ወሰምዮ፡ እሁኁ፡ ወስመ፡ መንግሥት፡ ገብረ፡ መስቀል፡ በከመ፡ ሰመዮ፡ እግዚአብሔር፡ እምቅድመ፡ ይንበር፡ ዲበ፡ መንበረ፡ መንግሥት፡ ወላሊበላሰ፡ አመ፡ ነበረ፡ ዲበ፡ መንበረ፡ መንግሥት፡ አሐዘ፡ ይጸመድ፡ ለጽሙና፡ ዘየዓቢ፡| ዘሰኑይ፡ እምጽሙና፡ መነኮሳት፨ እስመ፡ ይእቲ፡ ሢመተ፡ ምንኵስና፡ እስመ፡ ተወድየ፡ ውስተ፡ ልቡ፡ መልሕቀ፡ ትሕትና። ወእም፡ አመ፡ ንግሠ፡ ኢበልዓ፡ እማዕደ፡ መንግሥት፡ አላ፡ ቦቱ፡ ፩ ረድእ፡ ዘስሙ፡ ክርስቶስ፡ ኃረዮ፡ ወውእቱ፡ ረድዕ፡ ይሣየጥ፡ ግብረ፡ እዴሁ፡ ወይሁቦ፡ ሲሳዮ፡ ኅብዝተ፡ ይቡስ፡ በጽብሐ፡ አኅማል፡ ፈቲቶ፡ ፫ አፍእምተ፡ ወኢይዌስክ፡ እምዝ፡ ካልአ፡ መባልዕተ፨ ወስቴሁኒ፡ ምሉአ፡ አሐቲ፡ ጽዋዕ፡ ወጽዋዑኒ፡ ንስቲት፡ ይእቲ፡ ወኢታረዊ፨ ወከመዝ፡ ነበረ፡ በኵሉ፡ መዋዕለ፡ ሕይወቱ፡ እምአመ፡ ነግሠ፡ እስከ፡ አመ፡ ፈለሰ፡ አሜን፨ miracles ወእምዝ፡ ኮነ፡ አሐቲ፡ ዕለተ፡ እንዘ፡ ይፈቅድ፡ ላሊበላ፡ ከመ፡ ይዴረር፡ መጽኡ፡ ፫ አኃው፡ ቅሩበ፡ ጽርኅ፡ | | መንግሥት፨ ኀበ፡ ይረፍቅ፡ ውእቱ፡ ወእልክቱሰ፡ ፫ አኃው፡ ሰአልዎ፡ እንዘ፡ ይብሉ፡ ሀበነ፡ እግዚእነ፡ ዘንበልዕ፡ እስመ፡ አልብነ፡ ዘንዴረር፡ ዮም፡ ወዘንተ፡ ሶበ፡ ይቤሎ፡ ፩ ወሀቦ፡ ላሊበላ፡ ፩ አፍእምቶ፡ እምድኅረ፡ ከመ፡ አሐዘ፡ ከመ፡ ይትፈአም፡ ወካልኡኒ፡ ሰአሎ፡ ወከማሁ፡ ወሎቱኒ፡ ወሀቦ፡ ካልአ፡ አፍእምቶ፡ ወሣልሱኒ፡ ሀሎ፡ ከማሁ፡ ወአዘዘ፡ ለረድኡ፡ ከመ፡ የሀቦ፡ ሣልሰ፡ አፍእምቶ፡ ወተፈጸመ፡ ሲሳዩ፡ ለገብረ፡ መስቀል፡ ነሥአ፡ ቅራፉተ፡ ውእቱ፡ ኅብዝት፡ ወፈተተ፡ ወአ/ር/ሐሰ፡ በጸብሐ፡ ስልቆ፡ ኃምል፨ ወወሀቦ፡ ላሊበላ፡ ወኢነሥአ፡ ወዐበየ፡ እንዘ፡ ይብል፡ እመሰ፡ ፫ አፍእምተ፡ ዘኢይሴሰይ፡| ተወክፈ፡ ሊተ፡ በእደ፡ አግብርቲሁ፡ እፎኬ፡ እበልዕ፡ ካልዕ፡ ፍተታተ፨ ወእመሰ፡ በላዕኩ፡ ዘንተ፡ ዘትሁበኒ፡ ይከውነኒ፡ ከመ፡ ዘኢወሀብኩ፡ እስመ፡ በላዕኩ፡ ካልአ፡ ህየንተ፡ ዘወሀብኩ፡ ወዘንተ፡ ነገረ፡ ተናገረ፡ ገብረ፡ መስቀል፡ ምስለ፡ ረድኡ፡ ወቤተ፡ ጽውም፡ ነፍሱሰ፡ ጽግብት፡ እምእክለ፡ መንፈስ፡ ቅዱስ፡ ዝውእቱ፡ ቃለ፡ እግዚአብሔር፡ እስመ፡ ፈጸማ፡ ለቃል፡ ዘተብህለት፡ እምአፈ፡ ሐዋርያት፡ አፍቀሩ፡ ቢጸክሙ፡ እምርእስክሙ፡ ፈድፋደኬ፡ አማን፡ ተፈጸመት፡ ዛቲ፡ ቃል፡ ላዕለ፡ ገብረ፡ መስቀል፡ ለሊሁ፡ ይርህብ፡ ከመ፡ ለባዕዳን፡ ያረዊ፨ በከመ፡ ይቤ፡ እግዚእነ፡ በወንጌል፡ ብፁዓን፡ እለ፡ ይርኅቡ፡ እስመ፡ እሙንቱ፡

| | ይትፌሥሑ፡ ወ/ይ/ጸግቡ፡ ዘንተ፡ ቃለ፡ ይፈጽም፡ ወሀበ፡ ገብረ፡ መስቀል፡ ፫ አፍእምተ፡ ዘይሴሳይ፡ ለሊሁ፡ አኮ፡ ኃጢአ፡ ዘይሁብ፡ እንዘ፡ ንጉሥ፡ ውእቱ፡ አላ፡ ከመ፡ ይትመዘገን፡ በኀበ፡ እግዚአብሔር፡ ወወሀበ፡ ሲሳዮ፡ ወእምዝ፡ አዘዞ፡ ለረድኡ፡ ከመ፡ የሀቦሙ፡ ለእልክቱ፡ ፫ አኃው፡ ካልአ፡ መብልዓ፡ ወመስቴ፨ ወለእመ፡ ዕሩቃንኒ፡ ኒጺሮ፡ ከመ፡ የሀቦሙ፡ አልባሰ፨ ወሶበ፡ ወጽአ፡ ውእቱ፡ ረድዕ፡ አርአይዎ፨ ፫ ዕደው፡ እንዘ፡ የዓርጉ፡ ውስተ፡ ሰማይ፡ እስመ፡ መላእክት፡ እሙንቱ፡ መጽኡ፡ ገብረ፡ መስቀል፡ ከመ፡ ያመክሩ፡ ኂሩቶ፨ ወከመ፡ የሐውጽዎ፡ ወከመ፡ ዝኬ፡ ይኄውጽዎ፡ መላእክት፡ ለኵሉ፡ ሰብእ፡ ለዘያፈቅር፡ ነግደ፨ ተመሲሎሙ፡| በአምሳለ፡ ነዳያን፡ ወእግዚእነኒ፡ ይኄውጾሙ፡ ወይትአነገድ፡ ውስተ፡ ቤቶሙ፡ ለእለ፡ ያፈቅሩ፡ ነግደ፨ በከመ፡ ተአንገደ፡ ውስተ፡ ቤቱ፡ ለአብርሃም፡ ወይባርኮሙ፡ በከመ፡ ባረኮ፡ ሎቱ፡ ወለዘርኡ፤ ወከማሁ፡ ባረኮ፡ ለገብረ፡ መስቀል፡ ዝንቱኬ፡ ውእቱ፡ መንክራቲሁ፡ ገብረ፡ መስቀል፡ ዘፆረ፡ ክበደ፡ ጽሙና፡ ወክበደ፡ ጽምእ፡ እስመ፡ ኢበልአ፡ በመዋዕለ፡ መንግሥቱ፡ ዘእንበለ፡ ፫ አፍእምት፡ ወኢሰትየ፡ እንበለ፡ አሐቲ፡ ጽዋዕ፡ ጸሎቱ፡ ወስእለቱ፤ ወሀብተ፡ ረድኤቱ፡ ወአሶተ፡ ጸጋሁ፡ የሀሉ፡ ምስለ፡ አግብርቱሁ፡ /???/ ወምስለ፡ ኵሎሙ፡ ነጋድያን፡ እለ፡ መጻእክሙ፡ እንዘ፡ ትትአመኑ፡ በኃይለ፡ | | ዘሠሉብ፡ ጸሎቱ፡ ለዝንቱ፡ ብእሲ፡ ጸዋሬ፡ ግብረ፡ ምስኵስና፨ ፨ ፨ ዘበነግሠ፡ ውእቱ፡ ለይኵነነ፡ ትንባሌ፡ በቅድመ፡ እግዚአብሔር፡ አዘኪሮ፡ ኪዳኖ፡ ዘወሀቦ፡ እግዚኡ፡ እንዘ፡ ይብል፡ ኵሉ፡ ዘጌሠ፡ ውስተ፡ መርጡልከ፡ ወተቀብዓ፡ እምፀበለ፡ ዝኅርከ፡ ይኩን፡ መክፈልቱ፡ ምስሌከ፨ ወይሬሲ፡ መክፈልተከኒ፡ ምስሌሁ፡ በከመ፡ ኪዳኑ፡ አሜን፨ ፨ ፨ ወኮነ፡ በ፩ መዋዕል፡ እንዘ፡ ያመጽኡ፡ ለገብረ፡ መስቀል፡ ጸባሕቶ፡ ለነጋሢ፡ ዘከመ፡ ይደልዎ፡ ለነጋሢ፡ ከመ፡ የሀቡ፡ ወያወፍዩ፡ ግብሮሙ፡ ዘይረስዮሙ፡ ነሥኡ፡ ብዙኃ፡ መቃጽወ፡ እለ፡ ምሉአነ፡ መዓር፨ ወጸዊሮሙ፡ በጽሑ፡ ኀበ፡ ሐይቀ፡ ፈለግ፡ ዘይወርድ፡ በኃይል፡ ወካልዕ፡ ሕዝበ፡ ከመ፡ ይዕድው፡| እስመ፡ መዋዕሉኒ፡ መዋዕለ፡ ክረምት፡ ውእቱ፡ ወነበሩ፡ ማዕዶታ፡ ይጸንሑ፡ እስከ፡ የኃልፍ፡ ውኂዘ፡ ክበድ፨ ወሶበ፡ ጐንደዩ፡ ንስቲተ፡ ቦኡ፡ ውስተ፡ ፈለግ፡ እስመ፡ ፈርሁ፡ ትእዛዘ፡ መላሕቅቲሆሙ፤ እስመ፡ አዘዝ/ዎ/ሙ፡ ከመ፡ ፍጡነ፡ ያምጽኡ፡ ግብሮሙ፨ ወሶበ፡ ቦኡ፡ ወአንሶሰው፡ ማዕከለ፡ ማይ፡ ኃየሎሙ፡ ውሂዝ፡ ወገደፉ፡ እልክተ፡ መቃጹተ፡ እለ፡ ምሉአነ፡ መዓር፡ ወአንኰርኰሙ፡ ማይ፡ ማዕከለ፡ አዕባን፡ ለእማንቱ፡ መቃጹት፡ ውዱየ፡ መዓር፡ ወወሰዶሙ፡ እንዘ፡ ያንኰረኵሮሙ፡ ወገደፎሙ፡ ፩ ገጽ፡ ወእሙንቱሰ፡ ሰብእ፡ ወፅኡ፡ እምነ፡ ማይ፡ ወኃይል፡ ዓቢይ፡ ወአተው፡ ውስተ፡ ሀገር፡ ወዜነው፡ ለመላሕቅቲሆሙ፡ ኵሎ፡ ዘረከቦሙ፡ ውስተ፡ ማይ፡ ወዘከመ፡

| | ገፈለ፡ መቃጽዋተ፡ መዓር፡ ውስተ፡ ማይ፨ ሶበ፡ ኃየሎሙ፡ ውኂዝ፡ ወእልክቱኒ፡ መላህቅተ፡ ሕዝብ፡ ሖሩ፡ ወነገርዎ፡ ለገብረ፡ መስቀል፡ ወውእቱሰ፡ ኢተምዕዓ፡ ወኢያኅዘኖ፡ ጥቀ፡ እስመ፡ የዋህ፡ ውእቱ፡ ከመ፡ ርግብ፡ ወጠቢብ፡ ካዕበ፡ ከመ፡ አርዌ፡ ምድር፡ በከመ፡ ይቤ፡ እግዚእነ፨ በወንጌል፡ ኩኑ፡ ጠቢባነ፡ ከመ፡ አርዌ፡ ምድር፡ ወየውሀነ፡ ከመ፡ ርግብ፡ ጠቢብሰ፡ በምግባረ፡ ሠናይ፨ በከመ፡ ይቤ፡ ጳውሎስ፡ ኩኑ፡ ጠቢባነ፡ ለነፍስክሙሂ፡ ወለቢጽክሙ፡ ወየዋህኒ፡ ውእቱ፡ ገብረ፡ መስቀል፡ ንጉሥ፡ በከመ፡ ትቤ፡ ለሊከ፡ አሕዛብ፡ እመቦ፡ ዘይሄሊ፡ ከመ፡ ጠቢብ፡ ዓብድ፡ ለይረሲ፡ ርእሶ፡ ከመ፡ ይኩን፡ ጠቢበ፡ እስመ፡ አዕበደ፡ እግዚአብሔር፡| ለጥበብ፡ ዝዓለም፨ ወሶበ፡ ነገርዎ፡ በእንተ፡ ጥፍዓተ፡ ውእቱ፡ ግምዕያት፡ መዓር፡ ኢተምዓ፡ ወኢተከዘ፡ አላ፡ ይቤ፡ ከመ፡ ዘይትለሐይ፡ እንዘ፡ ያክሞስስ፡ አእድዎሰ፡ እምኢያእድዎ፡ እምነ፡ ማይ፡ ለውእቶሙ፡ መዓር፡ ወባሕቱ፡ ማይ፡ ይጔጕዕ፡ ወጠበጥዎ፡ ዘእንበለ፡ ፈቃድነ፨ ወዘንተ፡ ሶበ፡ ይቤ፡ ንጉሥ፡ እንዘ፡ ያክሞስስ፡ ሰሐቁ፡ ኵሎሙ፡ ሐራሁ፡ እለ፡ ይቀውሙ፡ ዓውደ፤ እስመ፡ በፍሥሐ፡ ተናገሮሙ፡ ንጉሥ፡ ከመ፡ ዘይትለሐይ፡ ወነበራ፡ እማንቱ፡ ግማዕያተ፡ መዓር፡ ብዙኃ፡ መዋዕለ፡ ተደፊኖን፡ በውኂዘ፡ ማይ፨ ወሶበ፡ ኃለፈ፡ ጊዜሁ፡ ለምልአተ፡ ፈለግ፡ ወነተገ፡ ውኂዘ፡ ማይ፡ ወሰሰለ፡ እምልአቱ፨ ወአስተርአየ፡ ምድረ፡ ሐጻ፡ ፈለግ፡ ተረክቡ፡ እሙንቱ፡ ሙዳያተ፡ | | መዓር፡ ድሂናን፡ ወሕያዋን፡ ወኢፈቅዖሙ፡ ዕብን፡ ለአሐዱኒ፡ እምኔሆሙ፡ ወማሕተሞሙኒ፡ ኢተፈትሕዎ፡ ኢተቀልአ፡ ወፆሩ፡ እለ፡ ረከቡ፡ ጸዊዖሙ፤ ካልአነ፡ ሰብአ፡ እለ፡ ይረድእዎሙ፡ ጸዊረ፡ ወነሥኡ፡ ወጾሩ፡ ወአብጽሑ፡ ኀበ፡ ንጉሥ፤ ወይቤልዎ፡ ነዋ፡ ኦእግዚእነ፡ ንጉሥ፡ ዝኩ፡ መዓር፡ ዘተገድፈ፡ ውስተ፡ ማይ፡ ወኢተክዕወ፡ መዓሩ፡ ወኢተሰብረ፡ ግማዕያቲሆሙ፡ እስመ፡ መንጦላዕተ፡ ጸሎትከ፡ ከደኖሙ፡ እንዘ፡ ሀለው፡ ውስተ፡ ማይ፨ መጠነ፡ ዝ፡ መዋዕል፡ ወኢተቀልአሂ፡ ማኅተሙ፡ መክደኖሙ፤ ወይቤ፡ ንጉሥኒ፡ ርእዮ፡ ወነጺሮ፡ ዕፁበ፡ ግብረ፡ ወመንክረ፡ ለዘይሰምዖ፤ ይቤ፡ ሰብሐት፡ ለከ፡ እግዚኦ፤ እስመ፡ አልቦ፡ ነገር፡ ዘይሰአነከ፡ ዕፁብ፡ ቀሊል፡ በኀቤከ፤| ወአልቦ፡ ግብር፡ ዘይጸንዓከ፨ ወይቤሎሙ፤ ካዕበ፡ ንጉሥ፡ ለሐራሁ፡ ርእዩኬ፡ ኦሕዝበ፡ እግዚአብሔር፡ ንሕነሰ፡ ፈቀድነ፡ ንሴሰይ፡ ዘንተ፡ መዓረ፡ እንበለ፡ ይብጻሕ፡ ጊዜሁ፤ ወከልአነ፡ እግዚአብሔር፡ ወዓቀበ፡ በዕደ፡ ማይ፡ ወአመ፡ በጽሐ፡ ጊዜሁ፡ ወሀበነ፡ ወአውጼኦ፡ እማይ፨ አንትሙኒ፡ አእኵትዎ፡ ሰብእ፡ እስመ፡ በእንቲአክሙ፡ ተገብረ፡ /ዝ/መንክር፡ ኢይትኃጐል፡ ሲሳይክሙ፤ ወይቤሉ፡ ስብሐት፡ ለእግዚአብሔር፡ ለአምላከ፡ አማልክት፡ ለንጉሠ፡ ነገሥት፡ ለዘወሀበነ፡ ኪያከ፡ ዘትጸውር፡ ክበደ፡ ኃጣአትነ፡ ወንሕነሰ፡ በወልታ፡ ጸሎትከ፡ ተከሊለነ፡ ንሴፎ፡ ንድኃን፡ ወሰማይኒ፡ ወበምድርኒ። እስመ፡ አንተ፡ ጸዋሬ፡ ንዴት፡ ወጽሙና፡ ከመ፡ መነኮሳት፡ ወዘንተ፡ ሰሚዖ፡ እምአፈ፡

| | ሕዝብ፡ ይቤሎሙ፡ አርምሙ፡ እስመ፡ ፈድፋደ፡ ይጼልዖ፡ ውዳሴ፡ ከንቶ፡ ዘለዓለም፨ እስመ፡ ውዳሴ፡ ከንቶ፡ ያጠፍዕ፡ ነፍሰ፡ ሰብእ፡ ተወክፈ፡ ወልቡ፡ ወሶበ፡ ይዌድሶ፡ ሰብእ፡ ለገብረ፡ መስቀል፡ ንጉሥ፡ ኢተወክፈ፡ በልቡኒ፡ ወበእዘኒሁኒ፡ ከመ፡ ይሰምዕ፡ ኢይፈቱ፤ እስመ፡ ይሰምዖ፡ ለክርስቶስ፡ በቤተ፡ ክርስቲያን፡ እንዘ፡ ይኬልሕ፡ በቃለ፡ ወንጌል፡ ቅዱስ፤ እንዘ፡ ይብል፡ አሌለክሙ፡ ሶበ፡ ሠናይ፡ ይብል፡ ሰብእ፡ ላዕሌክሙ፨ ወይዌድሱክሙ፨ እስመ፡ ረሰይዎሙ፡ ከማሁ፡ ለቀደምትክሙ፡ ርእዩኬ፡ ኦፍቁራንየ፡ መድ/ም/ማቲሁ፡ ለገብረ፡ መስቀል፡ ንጉሥነ፡ ዘከመ፡ ገብረ፡ ሎቱ፡ እግዚአብሔር፡ እስመ፡ ለማይኒ፡ አዘዘ፡ ከመ፡ ትኵኖ፡ ዓመተ፡ ከመ፡ እንተ፡| ትትኤዘዝ፡ አመት፡ ለእግዝዕታ፡ ከማሁ፡ ተአዘዘቶ፡ ማይ፡ ለገብረ፡ መስቀል፡ እስመ፡ ኢፈትሐ፡ ት፡ ማኅተመ፡ ዘግምዔ፡ መዓር፡ ወኢሰቈረት፡ አሐተሂ፡ እምኔሆን፤ አላ፡ ዓቀበት፡ በትእዛዘ፡ እግዚአብሔር፤ እስመ፡ ቀጸበ፡ እግዚአብሔር፡ ኢይትኃጐል፡ ንዋየ፡ መሲሑ፡ ወኅሩዩ፡ ለገብረ፡ መስቀል፡ ውኂዘ፡ ክረምት፡ አዕባንኒ፡ ይበጽሕ፡ ሶበ፡ ያንኰረኵር፡ ዲበ፡ ዕብን፡ ወአዕዋምኒ፡ ኢተበትኩ፡ እምስረዊሆሙ፡ እስመ፡ ኃይለ፡ ማይ፡ ፈለግ፡ ዘክረምት፤ ወውስተ፡ ማየ፡ ኃይል፡ ዘይሁብ፡ ምሕዋር፡ ውእቱ፡ ዓቀቦሙ፡ ከመ፡ ኢይሰቈሩ፡ ወከመ፡ ኢይትፈታሕ፡ ማኅተመ፡ መክደኖሙ። በከመ፡ ዓቀቦ፡ ለዮናስ፡ በውስተ፡ ከርሠ፡ አንበሪ፤ ወከማሁ፡ ዓቀቦሙ፡ ለእማንቱ፡ | | ዘረቡዕ፡ ግማያተ፡ መዓር፡ በኃይለ፡ ጸሎቱ፡ ለላሊበላ፡ ጸሎቱ፡ ወስእለቱ፡ ወበረከቱ፡ ወሀብተ፡ ረድኤቱ፡ የሀሉ፡ ምስለ፡ አግብርቲሁ፡ /ምህርከ፡ ሥላሴ፡ ወአቡኃ፡ ይለሚካኤል፡ ዘሚካኤል፡/ ለይኩን፡ ወይሱቀነ፡ ከመ፡ ኢንተንትን፡ ወይበልሐነ፡ እመሥገርተ፡ ሰይጣን፡ ወይምርሀነ፡ ውስተ፡ ፍኖተ፡ ብርሃን፨ ወይክድነነ፡ በመንጦላ/ዕ/ተ፡ ስእለቱ፡ ከመኢንትኰነን፡ በግርምት፡ ወዕፅብት፡ ሰዓተ፡ ደይን፡ እስመ፡ ኢታድኅን፡ እም፡ ውፍዳ፡ ከመ፡ ንቁም፡ ምስሌሁ፡ በየማነ፡ መድኅን፡ አሜን፨ ወኮነ፡ ካዕበ፡ በ፩ ዕለት፡ እመዋዕል፡ በላዕለ፡ ገብረ፡ መስቀል፡ ተርእየ፡ መንክራት፡ ወነገረ፡ ትሕትና፡ እንዘ፡ ንጉሥ፡ ውእቱ፡ ዘተመሰለ፡ ነዳየ፡ ወኮነ፡ ሎቱ፡ ዘውገ፡ በመንኖ፡ | ወኢበስኢን፡ ብዕል፡ አላ፡ በእንተ፡ መንግሥተ፡ ሰማያት፤ ተነድየ፡ እንዘ፡ ንጉሥ፡ ውእቱ፡ ዘንቡር፡ ዲበ፡ መንበረ፡ መንግሥት፨ ወአሐተ፡ ዕለተ፡ አስተዳለው፡ ማዕደ፡ ዘከመ፡ ይደሉ፡ ለመንግሥት፡ ወዘይበቍዕ፡ ወያአክል፡ ለሠራዊቱ፡ ወወሀቦሙ፡ ስቴ፡ ሜስኒ፡ ለሠራዊቱ፨ መብልዓ፡ ቅሱማተ፡ ጥዑማተ፡ ዘዘዚአሁ፡ ወወሀቦሙ፡ ከመ፡ ይትፌሥሑ፡ ሠራዊቱ፤ ወውእቱሰ፡ ወጽአ፡ እምውሳጤ፡ መንጦላዕት፡ ለቢሶ፡ አጽርቅተ፤ ዘከመ፡ ይለብሱ፡ ነዳያን፡ ወሖረ፡ ኀበ፡ ይረፍቁ፡ ነዳያን፡ ወጺኦ፡ እንተ፡ መፍልስት። እንዘ፡ ዘይሬኢዮ፡ ወቦአ፡ ማዕከለ፡ ነዳያን፡ ወነበረ፡ ምስሌሆሙ፡ ከመ፡ ይትመጠው፡ ኅብስተ፡ ንዴት፡ እማዕደ፡ ሐራሁ፡ እለ፡ ይሁቡ፡ ለነዳያን፡ በትእዛዘ፡ ዚአሁ፡ እስመ፡ ያሜክራ፡

| | ለነፍሱ፡ በኵሉ፡ ፍናዋተ፡ ጽድቅ፡ ወያጌብራ፡ ለሥጋሁ፤ ወእንዘ፡ ሀሎ፡ ገብረ፡ መስቀል፡ ማዕከሌሆሙ፡ ለነዳያን፡ በጽሐ፡ ዘይከፍሎሙ፡ ኅብዝተ፡ ለነዳያን፡ ወበጽሐ፡ ኀበ፡ ገብረ፡ መስቀል፡ ወወሀቦ፡ ሎቱኒ፡ ወሀለፈ፡ ውእቱ፡ ወዓሊ፡ ንጉሥ፤ ወእምድኅረዝ፡ ርእዮ፡ ለገብረ፡ መስቀል፡ በማዕከለ፡ ነዳያን፡ ፩ እምነ፡ መዓንዝራን፡ ወአእመረ፡ ከመ፡ ንጉሥ፡ ውእቱ፨ ወነሥአ፡ እንዚራሁ፡ ወዘበጠ፡ አውታሮ፡ በድኅንጻሑ፤ ወይቤ፡ እንዘ፡ የአነዝር፡ ካልአንሰ፡ ውስተ፡ ተፈግዖ፡ በጥብሐ፡ ላህም፡ ወበስቴ፡ ሜስ፨ ወንጉሥ፡ ምስለ፡ ነዳያን፡ ከመ፡ ጽኑሰ፡ ወሶበ፡ ሰምዓ፡ ገብረ፡ መስቀል፡ ዘንተ፡ ቃለ፡ እምአፈ፡ መዓንዝር፡ ተንሥአ፡ ፍጡነ፡ ወቦአ፡ ውስተ፡ ውሳጤ፡ መንጦላዕት።| እንዘ፡ የሕዝን፡ በእንተ፡ ዘርእዮ፡ ውእቱ፡ መዓንዝር፤ እስመ፡ ይፈቅድ፡ ከመ፡ ይፈጽም፡ ኵሎ፡ ጽድቀ፡ በስውር፡ ወበኅቡዕ፤ በከመ፡ ይቤ፡ እግዚእነ፡ በወንጌል፡ በኅቡዕ፡ ይኩን፡ ጽድቅክሙ፡ ወኢያእምርክሙ፡ ሰብእ፡ ከመ፡ ጸመውክሙ፡ እስመ፡ አቡክሙ፡ ዘይሬእ/የ/ክሙ፡ በኅቡዕ፡ የአስየክሙ፡ ክሡተ፡ ወገብረ፡ መስቀልሰ፡ ውእተ፡ ኅብዝተ፡ ዘተመጠወ፡ እምእደ፡ አግብርቲሁ፡ ውእተ፡ ተሴስዮ፡ ኃደረ፡ ምስለ፡ ረድኡ፨ ከመዝ፡ ገብረ፤ መንክረ፡ ወዕፁበ፡ ግብረ፤ እስመ፡ ኮነ፡ ሱታፌሆሙ፡ ለነዳያን፡ በእንተ፡ መንግሥተ፡ ሰማያት፤ ከመ፡ ይፈጽም፡ ዘተብህለ፡ እምአፈ፡ ኤጲስ፡ ቆጶስ፡ ኵሎ፡ ዓለም፡ ዝውእቱ፡ ኢየሱስ፡ ክርስቶስ፡ ብፁዓን፡ ነዳያን፡ | | መንግሥተ፡ ሰማያት፡ እስመ፡ ሎሙ፡ መንግሥተ፡ ሰማያት፨ ጸሎቱ፡ ወስእለቱ፡ ያዕርግ፡ ውስተ፡ ጽርሐ፡ ቅድሳቱ፡ ለልዑል፡ እንዘ፡ ትምዕዝ፡ ጽንሐሃ፡ ዕጣን፨ እስመ፡ እምአፈ፡ ንጹሕ፡ ተፈነወት፡ ወትበውዕ፡ ውስተ፡ ውሳጤ፡ መቅደሱ፡ ለሊቀ፡ ካህናት፡ ዓቢይ፡ እንዘ፡ አልቦ፡ ዘይከልኦ፡ በአክናፈ፡ ትሕትና፡ ትጼዓን፡ በእንተ፡ ተሐፍሮቱ፡ ምስለ፡ ነዳያን፡ ወንሕነሰ፡ ለእመ፡ ኢበላዕነ፡ ቅሱማተ፡ እስከ፡ ይሰብሕ፡ ሥጋነ፤ ኢንክል፡ ከመ፡ ንቢት፡ አሐተ፡ ዕለተ፨ ለእመ፡ ረከብነኒ፡ ኢነኃድግ፡ ወለእመ፡ /ኢ/ረከብነ፡ ነኃሥሥ፡ ከመ፡ ንርከብ፡ እስመ፡ አልብነ፡ ሙቁሐተ፡ መንፈስ፡ ዘያጌብረነ፡ ለጸዊም፨ ወገብረ፡ መስቀልሰ፡ እንዘ፡ ሀሎ፡ ውስተ፡ መንግሥት፡ ኢበልዓ፡ ወኢሰትየ፡ | ዘሐሙስ፡ ለፍትወተ፡ ሥጋሁ፡ ከመ፡ ይኩን፡ ፍግዓሁ፡ ፍጹም፡ በማዕደ፡ መርዓ፡ ዘኢየኃልቅ፡ በሰማያት፨ ወለነኒ፡ ኢይፍልጠነ፡ በውእቱ፡ ማዕደ፡ መርዓ፡ እግዚእነ፡ ወመድኃኒነ፡ ኢየሱስ፡ ክርስቶስ፡ በኃይለ፡ ጸሎቱ፡ ለገብረ፡ መስቀል፡ መሲሁ፡ ዘተጸምደ፡ ለአርዑተ፡ ጽሙና፡ እንዘ፡ ይነብር፡ ዲበ፡ መንበረ፡ መንግሥቱ፡ አሜን፨ ወዓዲ፡ ኮነ፡ በ፩ እመዋዕል፡ ወሀሎ፡ ውስተ፡ ሀገር፡ እምአህጉራተ፡ መንግሥቱ፡ ፩ ዓላዊ፡ ዘዓለዎ፡ ለገብረ፡ መስቀል፡ ንጉሥ፡ ወሐሳውያን። ወፈነዎ፡ ለወልዱ፡ ገብረ፡ መስቀል፡ ውእቱ፡ ዓላዊ፡ ከመ፡ ዘአጽብዖ፡ ለውእቱ፡ ብእሲ፡ ዘአጽረሮ፡ ለገብረ፡ መስቀል፡ ወሶበ፡ በጽሐ፡ ውእቱ፡ ወልደ፡ ነጋሢ፡ ውስተ፡ ሀገሩ፡ ለዓላዊ፡ ወተአየነ፡ ውስተ፡ ፩ እምነ፡ መካን፡ ተጸዊኖ፡ ውስተ፡ ደብር፡

| | ወለአከ፡ ፩ ብእሲ፡ መኰንነ፨ ምስለ፡ ወአልያኒሁ፡ ኀበ፡ ውእቱ፡ ዓላዊ፡ በቃለ፡ ሰላም፤ እንዘ፡ ይብል፨ አቡየኣ፡ ለአከኒኣ፡ ኀቤከአ፡ እንዘ፡ ይብል፡ ነዓ፡ ኣ፡ ከመአ፡ ንግበርኣ፡ ሰላመኣ፨ ለምንትኣ፡ ተአልወኒኣ፤ ይመስለከአ፡ ዘኢአኰነኒ፡ እግዚአብሔር፡ ኀበ፡ አልቦ፡ ታመስጥ፡ እምዕዴየኣ፨ ወውእቱሰ፡ ብእሲ፡ አግብአ፡ መልእክቶ፡ በተአይሮ፡ ከመ፡ ስናክሬም፡ እንዘ፡ ይብል፡ አልብየኣ፤ ሰላመኣ፤ ምስሌሁ፡ ለአቡከኣ፨ ወምስሌከኒኣ፡ ወእም፡ እፈርህ፡ እምኔክሙኣ፤ ወኢይሰጠው፡ ቃለክሙኣ፤ ወከመሰአ፡ እምሰጥ/ኣ/፡ እምዕዴክሙኣ፡ ኢትስዓልአ፡ መነሂአ፡ ለሊከአ፡ አእምርኣ፡ ከመ፡ ኢትአየነአ፡ ወለእመሰኣ፡ ትፈቅድአ፡ ከመኣ፡ ንትቃተልአ፡ ተደለውኣ። ወአነኒ፡ እመጽእ፡ | ተደሊውየኣ፨ ወሰሚዖ፡ ወልደ፡ ነጋሢ፡ ይቤ፡ ለይኩንኣ፡ አንሰኣ፡ ኢይጸብአከኣ፡ አምላከ፡ አቡየኣ፡ ይሜጥወኒአ፡ ውስተ፡ ዕዴየአ፨ ወበሳኒታ፡ ተደለው፡ ከመ፡ ይትቃተሉ፡ ኀበ፡ ይትረአዩ፨ ወይቤሎ፡ ወልዱ፡ ለውእቱ፡ ዓላዊ፡ ለወልደ፡ ገብረ፡ መስቀል፡ ንጉሠ፡ ክርስቲያን፨ ኅድግ፡ አንተኒ፡ ሐራከ፡ ወንትቃተል፡ ፪ኤነ፡ በባሕቲተነ፨ ወይቤሎ፡ ወልደ፡ ገብረ፡ መስቀል፡ ኢይቤለከኑ፡ ትማልም፡ አንሰ፡ ኢይጸብአከ፡ በኃይልየ፡ አላ፡ በኃይለ፡ አቡየ፡ ወአምላኪየ፡ ወለዛቲኒ፡ ትዕይርተ፡ ይሬስያ፡ ጎልያድ፨ ወአነኒ፡ እመጽእ፡ ኀቤከ፡ በኃይለ፡ አምላኪየ፡ ከመ፡ ዳዊት፡ ምዕመንየ፨ ወዘንተ፡ ብሂሎ፡ ተበሐቶ፡ ለውእቱ፡ ዓላዊ፨ ወይቤሎሙ፡ | | ውእቱ፡ ወልድ፡ ተአያሪ፡ ለወልደ፡ ገብረ፡ መስቀል፡ መቅ/ደ/መሰ፡ አንተ፡ ፃእ፡ ሊተ። ወወጽአ፡ ሎቱ፡ ወደርበዮ፡ ውእቱ፡ ዓላዊ፡ ወኢረከበ፡ ወኢምንተኒ፡ እስመ፡ አደወቶ፡ ኵናት፡ በኃይለ፡ ጸሎቱ፡ ለገብረ፡ መስቀል፡ ንጉሥ፡ ወገብረ፡ መስቀልሰ፡ ይኔጽር፡ ኵሎ፡ ዘይገብር፡ ወልደ፡ አላዊ፡ ምስለ፡ ወልዱ፨ ወንጻሬሁሰ፡ አኮ፡ በዓይነ፡ ሥጋ፡ አላ፡ በዓይነ፡ መንፈስ፡ ርእየ፡ እንዘ፡ ሀሎ፤ በሀገረ፡ ሮሐ። ወወልዱሰ፡ ርሑቀ፡ ሀሎ፡ ኀበ፡ ሀገረ፡ ዓላዊ፡ ወምሕዋሩሰ፡ መጠነ፡ ሰሙን፨ ወሶበ፡ ደርበዮ፡ ወልደ፡ ዓላዊ፡ ለወልዱ፡ ርእየ፡ በመንፈስ፡ እንዘ፡ ሀሎ፡ ርሑቀ፡ ርእዮ፡ ይቤ፡ ዕቀቦ፡ እግዚኦ፡ ከመ፡ ብንተ፡ ዓይን፡ ወበጽላሎተ፡ ክነፊከ፡ ክድኖ። ወሶበ፡ ይቤ፡ ከመዝ፡ ገብረ፡| መስቀል፡ ንጉሥ፡ አደወቶ፡ ኵናት፡ ለወልዱ፨ ዘተፈነወት፡ እምዕደ፡ ዓላዊ፡ ወበዳግመ፡ ደርበየ፡ ወልደ፡ ገብረ፡ መስቀል፡ ለወልደ፡ ዓላዊ፡ ወወግዖ፨ ወቦኣቶ፡ ኲናት፡ ለውእቱ፡ ዓላዊ፡ እንተ፡ ኅንጋዙ፡ ወጽአት፡ እንተ፡ ጕርዔሁ፡ መጠነ፡ ስዝር፡ ወጸመረቶ፡ ምስለ፡ ምድር፤ ወከመዝ፡ ሞተ፡ ውእቱ፡ ዓላዊ፨ ወወልዱሰ፡ ለገብረ፡ መስቀል፡ ድኅነ፡ ተከዲኖ፡ በኃይለ፡ ጸሎቱ፡ ለአቡሁ፨ ወርእየ፡ ካዕበ፡ ገብረ፡ መስቀል፡ እንዘ፡ ይመውት፡ ውእቱ፡ ዕቡይ፡ በእደ፡ ወልዱ፡ ወአዘዞሙ፡ ለሠራዊቱ፤ ከመ፡ ይወውዑ፡ በዓቢይ፡ ቃል፡ በፍሥሐ፡ እስመ፡ ሞአ፡ እግዚአብሔር፡ በእደ፡ አግብርቲሁ፨ ወተመኣ፡ ሰይጣን፡ ምስለ፡ ሠራዊቱ፨ወሶበ፡ ሞተ፡ ውእቱ፡ ወልደ፡ ዓላዊ፡ ተሰብሩ፡ ሠራዊቱ፡

| | ፲፪ ለዓላዊ፡ ወዴገንዎሙ፡ ሠራዊቱ፡ ለገብረ፡ መስቀል፡ ወአኅለቅዎሙ፡ ለዓላውያን፡ ወአኃዝዎ፡ ለአቡሁ፡ ለውእቱ፡ ወልድ፡ ዘሞተ፡ ወአሰርዎ፡ ወአብጽሕዎ፡ ኀበ፡ እግዚኦሙ። ወኵሎ፡ አስተራቲዖ፡ ተመይጠ፡ ኀበ፡ አቡሁ፡ ወወሀቦ፡ ለአቡሁ፡ ውእተ፡ ዓላዊ፡ ዘአምጽኣ፡ አሲሮ። ወአቡሁሰ፡ ውእቱ፡ ከመ፡ እግዚአብሔር፡ ወሶበ፡ ርእዮ፡ ገብረ፡ መስቀል፡ ይቤሎ፡ ለምንት፡ ዓለውከኒ። ወይእዜኒ፡ ሰረይኩ፡ ለከ፡ ዘቀዲሙ፡ ጌጋየከ። ወይእዜኒ፡ ኢትልመድ፡ ዘከመዝ፡ ግብረ፡ ሑር፡ ውእቱ፡ ውስተ፡ አብያቲከ፡ ወውእቱሰ፡ ብእሲ፡ ድሩክ፡ ውእቱ፡ ዕቡይ። ወሶበ፡ ወፅአ፡ እምኀበ፡ ንጉሥ፡ ህየንተ፡ ዘእምወደሰ፡ አኃዘ፡| ይሰላቆ፡ ሎቱ፡ ወለሐራሁ፡ እንዘ፡ ይብል፡ እፎ፡ አብዳን፡ እሉ፡ ሕዝብ፡ ቀዲሙ፡ ዓለውክዎሙ፡ ወእግዚአብሔር፡ ዓግብአኒ፡ ውስተ፡ ዕዴሆሙ። ወይእዜኒ፡ ፈ/ነ/ውኒ፡ ሕያውየ፡ ወአልቦ፡ ዘረሰዩኒ፡ እስመ፡ አዕበዩ፡ እምቀተሉኒ። ወዘንተ፡ ብሂሎ፡ ተጽዕነ፡ ፈረስ፡ ወአኃዘ፡ ይሑር። ወሀለወት፡ አሐቲ፡ ኦም፡ ውስተ፡ ፍኖት፡ ወባቲ፡ ሦክ፡ ወወግዓቶ፡ ለውእቱ፡ ብእሲ፡ ወቦአት፡ ውስተ፡ ፍጽሙ፡ ከመ፡ አሕፃ። ወበጊዜሃ፡ ሞተ፡ ውእቱ፡ ዕቡይ፡ ወዜነውዎ፡ ለንጉሥ፡ ከመ፡ ሞተ፡ ወሰሚዖ፡ ንጉሥ፡ ይቤ፡ እስመ፡ ኢሰሰላ፡ ትዕቢቱ፡ እምልቡ፡ በእንተዝ፡ ሞተ፡ እስመ፡ ዘጸኣለነ፡ ርእዩኬ፡ ኦፍቁራንየ፡ ዘከመዝ፡ መድምም፡ ዘተገብረ፡ በኃይለ፡ ጸሎቱ፡ ለገብረ፡ | | መስቀል፡ ወራዕየሂ፡ ዘርእየ፡ እንዘ፡ ሀሎ፡ ርሑቀ፡ እስመ፡ በከመ፡ ይሬኢ፡ አምላኮሙ፡ ይሬእዩ፡ መላኪያኒሁ፨ እስመ፡ መንፈስ፡ ቅዱስ፡ ዘላዕሌሆሙ፡ ይከሥት፡ ሎሙ፡ ኅቡአተ፨ ጸሎቱ፡ ወስእለቱ፡ ለገብረ፡ መስቀል፡ የሀሉ፡ ምስለ፡ አግብርቲሁ፡ // ለዓለመ፡ ዓለም፡ አሚን፡ ወሰይፈ፡ ረድኤቱ፡ ትግዝሞ፡ ለፀርነ፡ በከመ፡ ገዘመቶ፡ ለውእቱ፡ ዓላዊ፡ አሜን፨ ወአሐተኒ፡ ዕለተ፡ ዘአርአየ፡ መንክራቲሁ፡ ለገብረ፡ መስቀል፡ እፈቅድ፡ እንግርክሙ፡ ወሀለወት፡ አሐቲ፡ ብእሲት፡ በዕለት፡ ወእንዘ፡ ትዴረር፡ ወትበልዕ፡ ሥጋ፡ እንስሳ፡ አኃዘት፡ ትብላዕ፡ ሥጋ፡ ሰብእ፡ | ዘበሐሜት፨ ወሐመየቶ፡ ለላሊበላ፡ በነገረ፡ ካልዕ፡ እንዘ፡ ትጸርፍ፡ ሎቱ፡ ወተፍአመት፡ ሥጋ፡ ወሐነቃ፡ ውእቱ፡ ሥጋ፡ ወኢወረደሂ፡ ታሕተ፡ ሥጋ፡ ወኢወረደሂ፡ ታሕተ፡ ወኢለዕለ፡ ኢወፅአ፨ አላ፡ ነበረ፡ ማዕከለ፡ ጕርኤሃ፡ እንዘ፡ የጠንቃ፡ ዘበሐኒቅ፡ ወፈቀደ፡ ይፃእ፡ ዓይና፡ እምብዝኃ፡ ሐኒቅ፡ ጥዋቂ፡ ህንቀት፡ ወጸርሐት፡ በውስተ፡ ልባ፡ እንዘ፡ ትብል፡ አበስኩ፡ ለከ፡ ኦእግዚእየ፡ ገብረ፡ መስቀል፡ መሲሑ፡ ለእግዚአብሔር፨ ወኢይደግም፡ እምይእዜ፡ ጸውዖተከ፡ ወኢይዜክር፡ ስመከ፡ በእከይ፡ እንበለ፡ በሠናይ፨ ወዘንተ፡ ሶበ፡ ይቤ፡ ወፅአ፡ ውእቱ፡ ምታረ፡ ሥጋ፡ ምስለ፡ ደም፡ ዘ/ጕ/ርኤሃ፡ ወወድቀ፡ ውስተ፡ ምድር፡ ጸሎቱ፡ ወስእለቱ፡ ለገብረ፡ መስቀል፡ የሀሉ፡ ምስለ፡ ገብር፡

| | ወሀብተ፡ ረድኤቱ፡ ይሕንቆ፡ ለዕድውነ፡ አሜን፨ ወካዕበ፡ አሐቲ፡ ዕለተ፡ ኣኃዘ፡ ይጽርፍ፡ ሎቱ፡ ፩ ብእሲ፡ ለላሊበላ፡ እንዘ፡ የሐምዮ፡ ወብእሲቱሰ፡ ለውእቱ፡ ብእሲ፡ ትቤሎ፡ ኢትጽርፍ፡ ላዕለ፡ ገብረ፡ መስቀል፡ መሲሑ፡ ለእግዚአብሔር፡ ወእቱ፡ ወዓዲ፡ ተምዕዓ፡ ለብእሲቱ፡ ወተንሥኣ፡ እምኀበ፡ ይነብር፡ ወዓርገ፡ ውስተ፡ ሰማይ፨ ልቡ፡ ወኖመ፨ ወሶበ፡ ነቅሐ፡ እምንዋሙ፡ ወረከበ፡ ፪ አዕይንቲሁ፡ ዕውራነ፡ ወዜነዋ፡ ለብእሲቱ፡ ከመ፡ ዖሩ፡ አዕይንቲሁ፨ ወብእሲቱሰ፡ ኢይቤለከኑ፡ ኢትጽርፍ፡ ላዕለ፡ ገብረ፡ እግዚአብሔር፡ አርአየከ፡ እግዚአብሔር፡ ሀይሎ፡ ላዕሌከ፤ እስመ፡ ጸረፍከ፡ ላዕለ፡ ገብሩ፡| በዑረተ፡ ልብከ፨ ወእግዚአብሔር፡ አዖሮን፡ ለአዕይንቲከ፡ ከመ፡ ይኩን፡ ዕውረ፡ ውስጥከኒ፡ ወአፍአከኒ፨ ወይእዜኒ፡ ኢትኅዝን፡ በእንተ፡ ዑረተ፡ አዕይንቲከ፡ አላ፡ ኅዘን፡ በእንተ፡ ነፍስከ፡ እስመ፡ ትትኴነን፡ በእሳተ፡ ገሃነም፡ ወለእመ፡ ኢነሳሕከ፨ በከመ፡ ይቤ፡ እግዚእነ፡ በወንጌል፡ ኵሉ፡ ዘነበበ፡ ቃለ፡ ጽርፈት፡ ላዕለ፡ ወልደ፡ እጓለ፡ እመሕያው፡ ይትኃደግ፡ ሎቱ፨ ወዘሰ፡ ጸረፈ፡ መንፈስ፡ ቅዱስ፡ ኢይትኃደግ፡ ሎቱ፡ ኢበዝ፡ ዓለም፡ ወኢበዘ፡ ይመጽእ፡ ዘጸረፈሰ፡ እጓለ፡ እመሕያው፡ ዘይቤ፡ ለእለ፡ ኢተጠምቁ፨ ወዘሰ፡ ጸረፈ፡ ላዕለ፡ መንፈስ፡ ቅዱስ፨ ዲበ፡ እለ፡ ነሥኡ፡ መንፈስ፡ ቅዱሰ፡ እምከርሠ፡ ጥምቀት፨ ወይእዜኒ፡ | | ዲበ፡ ሰብእ፡ ዘጸረፍከ፡ አላ፡ ዲበ፡ መንፈስ፡ ቅዱስ፨ ወከመዝ፡ ገሠጸቶ፡ ይእቲ፡ ብእሲት፡ ለብእሲሃ፡ እስመ፡ መንፈስ፡ ቅዱስ፡ አስተናገራ፨ ወይእዜኒ፡ ኢይፃእ፡ ነገረ፡ ጽርፈት፡ እምአፉነ፡ ላዕለ፡ እኁነ፡ ክርስቲያዊ፡ እስመ፡ ተወልደ፡ እመንፈስ፡ ቅዱስ፡ ወበእንተዝ፡ ንሰመይ፡ ጸራፍያነ፡ ላዕለ፡ መንፈስ፡ ቅዱስ፤ እስመ፡ ጸረፍነ፡ ላዕለ፡ ክርስቲያናዊ፡ ያድኅነነኬ፡ እግዚአብሔር፡ እምዘ፡ ከመዝ፡ ልማድ፡ እስመ፡ ጳውሎስኒ፡ ይሜህረነ፡ ከመ፡ ኢንርግም፡ እስከ፡ ለሰይጣን፡ ዘይሜህር፡ ከመዝ፡ አላ፡ ከመ፡ ኢንልክፎ፡ ጥቀ፡ ለመርገም፡ በልሳን፡ ከመ፡ ኢንድኃጽ፡ ላዕለ፡ እኁነ፨ ንትማኅጸንኬ፡ በኃይለ፡ ጸሎቱ፡ ለገብረ፡ መስቀል፡ ከመ፡| ያዑሮ፡ ለሰይጣን፡ ዘያስሕተነ፡ ወይሜህረነ፡ ከመ፡ ንጽርፍ፡ በከመ፡ አዖሮ፡ ለውእቱ፡ ብእሲ፡ ዘጸረፈ፡ ላዕሌሁ፡ ጸሎቱ፡ ወበረከቱ፡ ወስእለቱ፡ የሀሉ፡ ምስሌ/ሁ/፡ አግብርቲሁ፡ // ለዓለመ፡ ዓለም፡ አሜን፨ ስምዑኬ፡ ኦፍቁራንየ፡ እንግርክሙ፡ ዘከመ፡ ኮነ፡ ግብረ፡ ኅንፃሆን፡ ፀአቶን፡ ለእላንቱ፡ አብያተ፡ ክርስቲያናት፡ እምልበ፡ ምድር፡ በዕደ፡ ላሊበላ፡ ልዑለ፡ ዝክር፤ ወዘከመ፡ እፎ፡ ግብረ፡ ሕንጻሆን፡ ኮነ፡ እንበለ፡ ዕፅ፡ ወመሬት፡ ወዘእንበለ፡ አኅባለ፡ ጠፈር፡ ወመዋጽሕት፨ ሰማዕክሙኑ፡ ዘከመዝ፡ ግብረ፡ በዜና፡ ወሚመ፡ ርኢክሙ፡ በአዕይንቲክሙ፡ ዘከመዝ፡ መንክረ፡ ወዘከመዝ፡

| | መድምመ፨ መድፍን፡ ኅቡዕ፡ ዘተከሥተ፡ በዕደ፡ ላሊበላ፡ እምልብኒ፡ ተመሥጠረ፡ ወእምሕሊናኒ፡ ተሰወረ፡ ዝኩ፡ ገብረ፡ ኵሎ፡ ዓለመ፡ ወበጽዋዔ፡ ቃል፡ አመ፡ በጽሐ፡ ጊዜሁ፡ ለሕንጻ፡ እሎን፡ አብያተ፡ ክርስቲያናት፨ ወአመ፡ ወርዘወ፡ ወኃናፂሆን፡ በሥጋኒ፡ ወበመንፈስነኒ፡ ፈቀደ፡ እግዚአብሔር፡ ከመ፡ ይክሥት፡ መድፍኖ፡ ኅቡአ፡ ዘነበረ፡ እምቀዳሚት፡ ቤቶ፤ እምልበ፡ ምድር፡ ወኃለየ፡ ከመ፡ ያርኢ፡ ምሥጢሮ፡ ለሕዝብ፤ ለእለ፡ ይደልዎሙ፡ ከሢቶ፡ እምልበ፡ ምድር፡ ወጥበብ፡ መንክር፡ ወበምሥጢር፡ ኅቡዕ፤ በከመ፡ አውጽአ፡ ቀዳሚ፡ እምከርሠ፡ ምድር፡ ኵሎ፡ አዝርእተ፡ በበአርአያሁ፡ ወበበአምሳሊሁ፡ ወአርአያሁ፨ ወዕፀውኒ፡ ከማሁ፡ በበአርአያሁ፡ | በበአምሳሊሁ፡ ወእንስሳኒ፡ ብዙኃ፡ በበአርአያሆሙ፤ ወበበአምሳሊሆሙ፤ ወከማሁ፡ ፈቀደ፡ እሎንሂ፡ ቤተ፡ ክርስቲያናት፡ ይወጽኦሙ፡ እምድር፨ አኮ፡ ዘ፩ ኅብረቶን፡ ወኢታሐብር፡ አሐቲ፡ ምስለ፡ ካልዕታ፡ በኵሉ፡ ኅብራ፡ ወበኵሉ፡ ግብራ፨ ወሶበ፡ በጽሐ፡ ጊዜሁ፡ ከመ፡ ይክሥታ፡ ኵሎን፡ አብያተ፡ ክርስቲያናት፡ ፲ ዘእምአሐቲ፨ ዕብን፤ ይቤሎ፡ እግዚአብሔር፡ ለላሊበላ፡ በጽሐ፡ ጊዜሁ፡ ከመ፡ ይትከሠታ፡ ኵሎን፡ አብያተ፡ ክርስቲያናት፡ በዕደ፡ ዚአከ፡ ዘአርአይኩከ፡ ቀዳሚ፨ ወአንተኒ፡ ጽናዕ፡ ወኃይል፡ ከመ፡ ትፈጽም፡ መልእክተከ፤ እስመ፡ ብዙኃን፡ ነፍሳት፡ ይድኅኑ፡ በውስቴቶን፡ አስተፋጥን፡ ኃኒጾቶን፡ ወናሁ፡ አዘዝክዎሙ፡ | | ለመላእክት፡ ከመ፡ ይርድኡከ፨ ወገብረ፡ መስቀል፡ አግበረ፡ ሐፃውንተ፡ ብዙኃ፡ ዘዘዚአሁ፡ ግብረቱ፡ ቦ፡ ለጸሪብኒ፡ ወቦ፡ ሐኒጽ፡ ለመዋጽፍት፡ ወለወቂር፡ ዘንተ፡ ኵሎ፡ ኃፃውንተ፡ ገብረ፡ በዘ፡ ይትፈጸም፡ ሕንጻ፤ መቅደስ፡ ዘእምአሐቲ፡ ኰኵሕ፤ ወእምአሜሃሰ፡ ሀለየ፡ ገብረ፡ መስቀል፡ ሕሊና፡ ዘበምድር፡ ኢለመፍቅደ፡ erased ሲሳዩ፨ ወኢለፍቅደ፡ ብእሲቱ፡ አላ፡ ይሄሊ፡ ኵሎ፡ አሚረ፡ በእንተ፡ እሎን፡ አብያተ፡ ክርስቲያናት፡ ከመ፡ ይፈጽም፡ በከመ፡ ርእየ፡ ውስተ፡ ሰማይ፡ እንዘ፡ ይሄይሎ፡ መንፈስ፡ ቅዱስ፡ በኵሉ፡ ውስተ፡ ኵሉ። ወአግቢሮ፡ ሐፃውንተ፡ በዘይገብር፡ ሕንጻ፡ መቅደስ፡ አዛዞሙ፡ ለኵሎሙ፡ አሕዛብ፡ ከመ፡ ይትጋብኡ፡ ኀቤሁ፨ ወይቤሎሙ፡| ሶበ፡ ተጋብኡ፡ ንግሩ፡ አስበክሙ፡ ዘትነሥኡ፡ ኵልክሙ፡ እለ፡ ትረድኡኒ፡ ውስተ፡ ሕንጻ፡ አብያተ፡ ክርስቲያናት፤ እስመ፡ አዘዘኒ፡ እግዚአብሔር፡ ከመ፡ እግበር፤ ወአንትሙኒ፡ ንግሩ፡ በቃልክሙ፡ ዘከመ፡ ትነሥኡ፡ ዓስበክሙ፡ ዘሂ፡ ይትራድአ፡ ውስተ፡ ግብረ፡ ጸሪብ፤ ወዘሂ፡ ይጻሙ፡ በአውፅኦ፡ መሬት፨ ወኵልክሙ፡ ንግሩ፡ በበቃልክሙ፡ ወዘከመ፡ ትቤሉኒ፡ እኁበክሙ፡ ከመ፡ ኢትበሉኒ፡ አገበረነ፡ እንበለ፡ ፈቃድነ፡ ከመ፡ ኢይኩን፡ ጻማክሙ፡ በከ፨ ሶበ፡ ታንጐረጕሩ፡ ወነገሩ፡ ኵሎሙ፡ በከመ፡ አሕለዮሙ፡ ልቦሙ፡ ወውእቱኒ፡ በከመ፡ ይቤልዎ፡ ወወሀቦሙ፡ ወኢያንተገ፡ ውሂቦ/ቶ/ሙ፡ እምአመ፡ ወጠነ፡ ሐኒጸ፡ ቤተ፡ ክርስቲያናት፡ እስከ፡

| | ፈጸመ፡ ለለ፡ ዕለቱ፡ ይሁቦሙ፡ ዓስቦሙ፡ ለዘይወቅርሂ፡ ወለዘ፡ ይጸርብሂ፡ ወለዘ፡ ያወጽእሂ፡ መሬተ፡ እምጽራበ፡ ቤተ፡ ክርስቲያናት፤ ወእምዝ፡ ብዙኃን፡ እለ፡ ተረክቡ፡ ምሉአነ፡ ጥበብ፡ እለ፡ ወዱዮሙ፡ ላዕሌሆሙ፨ መንፈሰ፡ አእምሮ፡ ከመ፡ በስሌኤል፡ ወኤልያብ። ወተደለወ፡ ገብረ፡ መስቀል፡ ከመ፡ ይግበር፡ በከመ፡ አርአዮ፡ እግዚአብሔር፡ ወአኃዘ፡ ይወጥን፡ ወመላእክት፡ ያንሶስው፡ ምስሌሁ፡ እንዘ፡ ይሜጥኑ፡ ሎቱ፡ ምድረ፡ በበአምጣኖን፡ ለኵሉ፡ በበጾታሁ፡ ለንዑስኒ፡ ወለዓቢይኒ፡ ወውእተኒ፡ ምድር፡ ኀበ፡ ገብረ፡ አብያተ፡ ክርስቲያናት፡ ተሣየጠ፡ በወርቅ፤ እምኀቤሆሙ፡ ለእለ፡ ይኴንንዋ፡ ለይእቲ፡ ምድር፡ እንዘ፡ ያፈደፍድ፡ ኂሩተ፨ ወለእመሰ፡ ፈቀደ፡| ከመ፡ ይንሣእ፡ መኑ፡ እምከልአ፡ ለንጉሥ፨ ወገብረ፡ ቀዳሚ፡ ቤተ፡ ክርስቲያን፡ በከመ፡ አርአዮ፡ እግዚአብሔር፡ በመንክር፡ ግብረት፡ ወበመድምም፡ ኪን፤ ዘኢይትከሀሎ፡ ለሰብእ፡ ከመ፡ ይግበር፡ ዘእንበለ፡ ፈቃደ፡ እግዚአብሔር፡ አሠነያ፡ አፍአሃኒ፡ ወውስጣኒ፡ ወአሰርገወ፡ በመሳክው፡ ሠናያን፡ ወስቅሱቃን፡ እሙንቱ፡ ወስቅስቆሙኒ፡ ኢኮነ፡ ዘዕፅ፡ ወአዕማዲሃኒ፡ ብዩናት፡ እማንቱ፨ ወገብረ፡ እንተ፡ ቅድሜሃኒ፡ ፪ አብያተ፡ ክርስቲያናት፡ ወሙባኦንሰ፡ ፩ አንቀጽ፡ ውሳጣይ፨ ወእንተ፡ ድኅሬሁ፡ ገብረ፡ ፩ ቤተ፡ ክርስቲያን፡ ዓቢየ፡ ወአሠነያ፡ በብዙኅ፡ ሰርጐ፡ በወርቅ፡ ወብሩር፨ አላ፡ ሰርጐታቲሃኒ፡ ዘዕብን፡ ወኍልቈ፡ አዕማዲሃኒ፡ ፸ ወ ፪ በኆልቈ፡ ፸ | | ወ፪ አርድእት፨ እንተ፡ በየማንኒ፡ ገብረ፡ ቤተ፡ ክርስቲያን፨ ወእንተ፡ በጸጋማኒ፡ ገብረ፡ አሐተ፡ ቤተ፡ ክርስቲያን። ወሰመያ፡ ለቀዳሚት፡ ማርያም፡ ወለእንተ፡ ቅድሜሃኒ፡ ፪ አብያተ፡ ክርስቲያናት፡ ለአሐቲ፡ ሰመያ፡ ደብረ፡ ሲና፨ ወለካልዕታ፡ ሰመያ፡ ጎልጎታ፡ ወለእንተ፡ የማናኒ፡ ሰመያ፡ ቤተ፡ መስቀል፡ ወለእንተ፡ ጸጋማኒ፡ ሰመያ፡ ቤተ፡ ደናግል፨ ወከመዝ፡ አስተአኃዘ፡ ፭ ቤተ፡ ክርስቲያናተ፡ ሠናያነ፡ እምአሐቲ፡ ኰኵሕ፨ ወ፪ኒ፡ ቤተ፡ ክርስቲያናት፡ ገብረ፡ ሠናያተ፡ ወግብረቶንሰ፡ ብዑድ፡ ውእቱ፡ ወቅሩባን፡ እማንቱ፨ ወባሕቱ፡ ይፈልጦን፡ ቅጽር፡ ዘሀሎ፡ ማዕከሎን፨ ወለእልክቱሂ፡ ፪ኤሆን፡ ሰመያ፡ ቤተ፡ ገብርኤል፡ ወለካልዕታኒ፡ መጣዕ።| ወከመዝ፡ አስተአኃዘ፡ እሎንተ፡ አብያተ፡ ክርስቲያናት፡ ወደመሮን፡ በቅጽር፡ ወፈለጦን፡ ካዕበ፡ በቅጽር፨ ወገብረ፡ ካዕበ፡ ፪ አብያተ፡ ክርስቲያናት፡ መድምመ፡ ወግብረቶንሰ፡ ኢይኃብር፡ ለ፪ኤሆን። ወባሕቱ፡ እኁዘነ፡ ዘበይኖን፡ ወለእሎንሂ፡ ሰመያ፡ ለአሐቲ፡ ቤተ፡ መርቆ/ር/ዮስ፡ ወለካልዕታኒ፡ ሰመያ፡ ቤተ፡ አማኑኤል፡ ወከመዝ፡ አስተአኃዞን፡ ለ፪ኤሆን፡ አብያተ፡ ክርስቲያናት፡ ወገብረ፡ አሐቲኒ፡ ቤተ፡ ክርስቲያናት፡ እንተ፡ ባሕቲታ፡ ግብረታ፡ ብዑደ፡ ውእቱ፡ በትዕምርተ፡ መስቀል፡ ገብራ፡ በከመ፡ አእመሩ፡ ሎቱ፡ መላእክት፡ ወበከመ፡ አርአይዎ፡ እንዘ፡ ይሜጥኑ፡ ሎቱ፡ መላእክት፡ ምድረ፡ ወሰመያ፡ ላቲኒ፡ ቤተ፡ ጊዮርጊስ፨ ወከመዝ፡ ፈጸሞን፡

| | ለ፲ቱ፡ አብያተ፡ ክርስቲያናት፡ ወግብረቶንሰ፡ ዘዘዚአሆን፡ ወአርአያሆንሂ፡ ዘዘዚአሆን። ወአልቦ፡ ዘገብረ፡ ገብረ፡ መስቀል፡ ወኢምንተኒ፡ ዘእንበለ፡ ዘአርአዮ፡ እግዚአብሔር፡ አላ፡ ገብረ፡ በከመ፡ ርእየ፡ በውስተ፡ ሳብእ፡ ሰማይ፡ ወኢወሰከ፡ ኢዲበ፡ ኑኆን፡ ወኢዲበ፡ ግድሞን፡ ወኢዲበ፡ ቅጽሮን፨ አላ፡ በከመ፡ ይቤሎ፡ እግዚአብሔር፡ ኢወሰከ፡ ዲበ፡ ቆሞን፡ ወኢዲበ፡ ሰሮን፨ ወከመዝ፡ አኃዙ፡ መላእክትኒ፡ ይትራድዕዎ፡ በውስተ፡ ኵሉ፡ ግብር፡ ወኮኑ፡ ፩ መርዔት፡ ሰብእ፡ ወመላእክት፡ በውእቱ፡ መዋዕል፡ እስመ፡ ?ተደመሩ፡ መላእክት፡ ኀበ፡ ኵሎሙ፡ መስተገብራነ፡ ቤተ፡ ክርስቲያን፡ ኀበ፡ ጸረብትኒ፡ ወኀበ፡ ወቀርትኒ፡ ወኀበ፡ ጸወርተ፡ | መሬት፡ መዓልተ፡ ወይትጌበሩ፡ መላእክት፡ ምስለ፡ ሰብእ፡ ውስተ፡ ሕንጻ፡ አብያተ፡ ክርስቲያናት፨ ወሊተሰ፡ ይትጌበሩ፡ መላእክት፡ መዓልተ፡ ሶበ፡ ይገብሩ፡ ፩ እመተ፡ ወበሳኒታ፡ ይትረከብ፡ ከዊኖ፡ ፬ እመተ፡ እስመ፡ መላእክት፡ ይገብሩ፡ በኵሉ፡ ለያልየ። ወእለ፡ ርእዩ፡ ይቤሉ፡ ምንትኑዝ፡ መንክር፡ ንሕነሰ፡ ኃደግነ፡ ፩ እመተ፡ ትማልም፨ ወይእዜሰ፡ ኮነ፡ ፬ እመተ፡ እስመ፡ ኢያእመሩ፡ እሙንቱ፡ ሰብእ፡ ከመ፡ መላእክት፡ ይገብሩ፡ እስመ፡ ኢይሬእይዎሙ፡ ወላሊበላሰ፡ የአምር፡ ?ዘንተ፡ እስመ፡ የአምርዎ፡ መላእክት፡ ኂሩቶ፨ ወበእንተዝ፡ ኢይሴወርዎ፡ እስመ፡ ኮንዎ፡ ኣብያጸ፡ እሳታዊያን፡ ወበእንተዝ፡ ኢይትኀብእዎ፨ ወከመዝ፡ ፈጸመ፡ ሐኒጸቶን፡ ለእላንቱ፡ አብያተ፡ | | ይሁድ፡ ክርስቲያናት፡ ፲፨ ወግብረቶንሰ፡ እም፩ ዕብን፨ ርእዩኬ፡ ፍቁራንየ፡ ዘከመዝ፡ ብእሴ፡ በዕደዊሁ፡ ተከሥታ፡ እሎን፡ ሕንጻ፡ ማኅፈድ፡ ዘኢተገብረ፡ ዘከማሆን፡ በካልዕ፡ በሐውርት፨ በአይ፡ ልሳን፡ ንክል፡ ነጊረ፡ ግብረቶን፡ ለእሎን፡ አብያተ፡ ክርስቲያናት፨ ወግብረ፡ ቅጽሮንሂ፡ ኢንክል፡ ነጊረ፨ ኅድጉሰ፡ ዘእንተ፡ ውስጦን፡ ዘርእየኒ፡ ኢይጸግብ፡ በነጽሮ፡ ወበአንክሮኒ፡ ኢይክል፡ ፈጽሞ፡ እስመ፡ መንክር፡? ተገብረ፡ በላዕለ፡ እደ፡ ላሊበላ፡ ዘኢይትከሀሎ፡ ለሥጋዊ፡ ከመ፡ ኢኋልቍ፡ መንክራቲሁ፨ እመቦ፡ ዘይኋልቆሙ፡ ለከዋክተ፡ ሰማይ፡ ይኋልቆሙ፡| ሕንጻሆን፡ ለአብያተ፡ ክርስቲያናት፡ ዘተገብረ፡ በእደ፡ ላሊበላ፡ ይምጻእ፡ ወይርአይ፡ በአዕይንቲሁ፡ እስመ፡ አኮ፡ ዘይበልያ፡ ሕንጻ፡ ማኅፈዱ፡ ለላሊበላ፡ ከመ፡ ደብተራ፡ ሙሴ፡ ወኢሂ፡ ከመ፡ ምኵራበ፡ ሰሎሞን፡ ዘኢነሥእዎን፡ ለባውያን፡ ማኅፈደ፡ ደብተራሁሰ፡ ለገብረ፡ መስቀል፡ ኢያንቀላቅላ፡ ወኢያማስና፡ እስከ፡ ታሰተርኢ፡ ኢየሩሳሌም፡ ሰማያዊት፡ ዲበ፡ ምድር፡ እንተ፡ ድሉት፡ ለኅሩያን፡ ለእለ፡ ይደልዎሙ፡ ከመ፡ ይኅድሩ፡ ምስለ፡? ጴጥሮስ፡ ወጳውሎስ፡ ምስለ፡ ኢየሱስ፡ ሊቆሙ፡ ፈጸሙ፡ ኀኒጸ፡ መርጡላ፡ ለድንግል፡ በሠለስቱ፡ አእባን፡ እንዘ፡ ይለመልማ፡ ከመ፡ ሰምዕ፡ በትእዛዘ፡ እግዚአብሔር፨ ወላሊበላኒ፡ ፈጸመ፡ ዓሠርተ፡ አብያተ፡ ክርስቲያናት፡ በአሐዱ፡ እብን፡ እንዘ፡ ትረድኦ፡ ጸጋ፡

| | እግዚአብሔር፡ ምስለ፡ ኃይላቲሁ፨ ጴጥሮስ፡ ወጳውሎስ፡ ሐነጹ፡ ነፍሳተ፡ ብዙኃ፡ በ፩ ሃይማኖት፨ ወላሊበላኒ፡ ሐነጸ፡ ብዙኃ፡ አብያተ፡ ክርስቲያናት፡ ዲበ፡ ፬ ኰኵሕ፡ ወግብረቶንሰ፡ በጽቡር፡ ወበአኅባለ፡ ጠፈር፡ ወበመዋጽፍት፡ ዘዕፅ፡ ወአዕማዲሆን፡ ዘዕፅ፨ ወላሊበላኒ፡ ሳረረ፡ ብዙኃተ፡ አብያተ፡ ክርስቲያናት፡ ዘእም፩ ዕብን፡ ዘአልቦ፡ ጽቡረ፡ ለመሐዝቲሆሙ፡ ወአልቦ፡ ጠፈረ፡ ለመአቅዶን፡ ወዘአልቦ፡ ሣረእ፡ ለመክደኖን፡ ወኵሎንሰ፡ ግብረታቲሆን፡ ኢንክል፡ ንንግርክሙ፡ በበገጹ፡ እስመ፡ ብዙኅ፡ ጾታ፡ ግብረቶን፨ ናሁ፡ ?ተስእነኒ፡ ሊተሰ፡ ለላእላኦ፡ ልሳን፡ ከመ፡ እጽሐፍ፡ ለክሙ፡ ኵሎ፡ ኂሩታቲሁ፡ | ለዝንቱ፡ ብእሲ፡ ክቡር፡ ዘገብረ፡ እምኵሎሙ፡ መሬታውያን፡ በጥበብኒ፡ ወበስነ፡ ጽድቅኒ፤ ተብህለ፡ በእንተ፡ ሰሎኖን፡ ጠቢብ፡ እምሰብእ፡ ወእምኵሎሙ፡ ጠቢባነ፡ ግብጽ፡ ወውእቱ፡ ገብረ፡ ምኵራበ፡ በኢየሩሳሌም፨ በአዕባ/ነ/ን፡ ዓበይት፡ ዘስሞን፡ ሳብእ፡ ኑኆን፡ እንዘ፡ ይረድኦ፡ ኪራም፡ ንጉሠ፡ ጢሮስ፡ በዕፀወ፡ ቄድሮና፨ ወበዕፀወ፡ ጴውቄና፡ ወበዕፀወ፡ ቄጳሮስሰ፡ ወፈጸመ፡ ፪ አብያተ፡ ቤተ፡ እግዚአብሔርኒ፡ ወቤተ፡ ርእሱኒ፡ በ፳ ዓመት፨? ወላሊበላ፡ ገብረ፡ ፲ተ፡ ክርስቲያናት፡ በ፩ ዕብን፡ እንዘ፡ ይረድኦ፡ ወልደ፡ እግዚአብሔር፡ እምእሉ፡ ፪ ጠቢባን፡ ተገብራ፡ ፪ ጠቢራባን፡ ምኵራበ፡ ፩ ስሙ፡ ጠቢብ፡ በእብን፡ ወበዕፀው፡ ወበኣኅባል፡ | | ወበጽቡር፡ ወካልኡኒ፨ ጠቢብ፡ ገብረ፡ ማኅፈዳቲሁ፡ ዘእም፡ ፩ ዕብን፡ እንዘ፡ ኢይፈቅድ፡ ወኢምንተኒ፡ ለመፍቅዶን፨ ኢዕፀ፡ ለመሳውቂሆን፡ ወኢአኅባለ፡ ለመአቅዶን፡ ወኢፅቡር፡ ለመአኅዝቲሆን፤ እስመ፡ በ፩ ዕብን፡ ፈጸመ፡ ኵሎ፡ ግብረቶን፡ ግብረ፡ ቅጽሮንሂ፡ እምዕብን፡ ወግብረተ፡ ውስጦንኒ፡ ዘእም፩ ዕብን፡ ወእምጻማ፡ ውሳጦንሰ፡ የዓቢ፡ ጻማ፡ ቅጽራቲሆን፨ ኵሉ፡ ሰብእ፡ እንዘ፡ ኢትዮጵያዊ፡ ውእቱ፡ ዘኢበጽሐ፡ ውስተ፡ ሀገረ፡ ሮሐ፡ ቅድስት፡ እንዘ፡ ይሰምዕ፡ ዜናሆን፡ ለእላንቱ፡ አብያተ፡ ክርስቲያናት፡ እለ፡ ተገብራ፡ ዘእም፩ ዕብን፡ ይትሜሰል፡ ከመ፡ ብእሲ፡ ዘኢያፈቅር፡ ከመ፡ | ይርአይ፡ ገጸ፡ ለኢየሱስ፡ ክርስቶስ፨ ወላሊበላሰ፡ ሶበ፡ ፈጸመ፡ ሕንጻሆን፡ ለአብያተ፡ ክርስቲያናት፡ ዘከመ፡ ኣርአዮ፡ እግዚአብሔር፡ ኢፈቀደ፡ ከመ፡ ይጐንዲ፡ ላዕሌሁ፡ ሢመተ፡ መንግሥት፤ ወኢፈቀደ፡ ከመ፡ ትዕዱ፡ ላዕለ፡ ወሉዱኒ፨ አላ፡ ይቤ፡ ይሚጣ፡ እግዚአብሔር፡ ለዛቲ፡ ሢመተ፡ መንግሥት፡ ወያግብእ፡ ኀበ፡ እስራኤል፡ እስመ፡ ሎሙኒ፡ ይቤሎሙ፡ በእንቲአክሙ፡ ፈጠርክዎሙ፡ ሕዝብ፨ ወካዕበ፡ መሐለ፡ ሎሙ፡ እንዘ፡ ይብል፡ ኢይሜንኖሙ፡ ለሕዝበ፡ ያዕቆብ፡ ?ወኢያስተሐቅሮሙ፡ ለሕዝበ፡ እስራኤል፡ እስመ፡ ኪያሆሙ፡ ኃረይኩ፡ እምኵሉ፡ ኣሕዛብ፨ በከመ፡ ይቤ፡ ነቢይ፡ መሐለ፡

| | እግዚአብሔር፡ ለዳዊት፡ በጽድቅ፡ ወኢይኔስሕ፨ እስመ፡ ይቤሎ፡ እምፍሬ፡ ከርሥከ፡ አነብር፡ ዲበ፡ መንበርከ፨ ወይእዜኒ፡ ለያግብአ፡ ለዛቲ፡ ሢመተ፡ መንግሥት፡ ኀበ፡ እስራኤል፨ ወኢይትኃጣዕ፡ እምእስራኤል፡ ዘይነብር፡ ዲበ፡ መንበረ፡ መንግሥት፡ ኢያጐንድያ፡ እግዚአ፡ ኃያላን፡ ለዛቲ፡ ሢመተ፡ መንሥት፡ ኢዲቤየ፨ ወኢዲበ፡ አዝማድየ። ወአንሰ፡ ፈጸምኩ፡ መልእክትየ፡ ዘበእንቲአሃ፡ ሤመኒ፡ ሢመተ፡ መንግሥት፡ እንዘ፡ ለሊሁ፡ እግዚአብሔር፡ ወይገብር፡ በእደ፡ መላእክቲሁ፨ ከመዝ፡ ይቤ፡ ገብረ፡ መስቀል፡ እስመ፡ ኢያፈቅር፡ ሢመተ፡ ዘበምድር፡ ፈጺሞ፡ መልእክቶ፡ ወመጽወተ፡| ኵሎ፡ ንዋዮ፡ እስከ፡ ኢይተረፈ፡ አሣዕን፡ ዲበ፡ እገሪሁ፡ ወአሶርጊዎ፡ አብያተ፡ ክርስቲያናቲሁ፡ ዘገብረ፡ በውስተ፡ ኵሉ፡ በሐውርት፡ ወእሎንተኒ፡ ፲ተ፡ ማኅፈዳተ፡ ዘእም፩ ዕብን፡ አሰርጊዎ፡ በሰርጐ፡ ዘይደሉ፡ ለቤተ፡ ክርስቲያናት፨ በመስቀልኒ፡ ወበአልባስኒ፡ ዘአሰርጊዎን፡ በሲኢኒ፨ ወፈድፋደሰ፡ ገብረ፡ መድምመ፡ በመካነ፡ ጎልጎታ፡ በድኑ፡ ወካልአንኒ፡ ስእለተ፡ ብዙኃ፡ ገብረ፤ እስመ፡ በእንቲአሆሙ፡ ይተግህ፡ መዓልተ፡ ወሌሊተ፨ ወኢይሄሊ፡ መፍቀደ፡ ሥጋሁ፡ ኢብልዓ፡ ለሲሲቱ፡ ወኢለብሰ፡ ለአራዙ፡ ወኢተከዘ፡ በእንተ፡ ብእሲቱኒ፡ ወበእንተ፡ ውሉዱኒ፡ ዘእንበለ፡ በእንዚአሆን፤ ወሶበ፡ ፈጸሞን፡ | | ጸለየ፡ በውስቴቶን፡ እንዘ፡ ይብል፡ ኵሉ፡ ዘጌሠ፡ ውስተ፡ እላንቱ፡ ጽርሐ፡ ቅድሳቲከ፨ ዘገበርከ፡ በእደ፡ ዚአየ፡ ገብርከ፡ ሀበኒ፡ ዓሥራተ፡ እግዚእየ፡ ወይቤሎ፡ እግዚአብሔር፡ ይኩንከ፡ በከመ፡ ትቤ፡ ለእመ፡ በንጹሕ፡ ጌሠ፡ ውስተ፡ ቤተ፡ ክርስቲያንከ፨ ኦኅሩይየ፡ ከማሁ፡ በከመ፡ ሰዓልከ፨ አንተሰ፡ ፈጸምከ፡ መልእክተከ፡ ወዓቀብከ፡ ሃይማኖተከ፡ እምይእዜሰ፡ ጽኑሕ፡ ለከ፡ አክሊለ፡ ጽድቅ፨ ወርኅው፡ ለከ፡ ኆኅተ፡ መንግሥት፡ ከመ፡ ትባእ፡ በፍሥሐ፨ ወዘንተ፡ እምድኅረ፡ ይቤሎ፡ መድኅኒነ፡ ሐመ፡ ላሊበላ። ንስቲተ፡ ወአዕረፈ፡ አመ፡ ፲፡ ወ ፪፡ ለወርኃ፡ ሐዚራን፨ ወተመጠው፡ ነፍሶ፡ ንጽሕተ፡ መላእክተ፡ ብርሃን፨ | ወፆሮ፡ ገብርኤል፡ በአክናፊሁ፡ ወካልአን፡ መላእክት፡ እንዘ፡ ይዜምሩ፡ በቅድሜሁ፡ ወበጽኅሬሁ፡ አዕረግዎ፡ ውስተ፡ ሰማይ፡ ወአተወ፡ ገብረ፡ መስቀል፡ ውስተ፡ ምዕራፊሁ፡ ዘለዓለም፡ ዓለም፡ ወኃደረ፡ ምስለ፡ ጴጥሮስ፡ ወጳውሎስ፡ እስመ፡ ከመዝ፡ ተውህቦ፡ ኪዳን፡ እምኀበ፡ መድኅን፤ ናሁኬ፡ ለካዕኩ፡ ለክሙ፡ ፍቁራንየ፡ ንስቲተ፡ ዜና፡ እምትሩፋቲሁ፡ ለገብረ፡ መስቀል፡ ከመ፡ ይትፈሣሐክሙ፡ ልብክሙ፡ ወይኵነነ፡ ለኵልነ፡ ለእለ፡ ተጋባዕነ፡ ዝየ፡ ኃይለ፡ ጸሎቱ፡ ጌራ፡ መዊዕ፡ ለርእስነ፡ ወጸደለ፡ ሱራሔ፡ ለገጽነ፡ ወኵህለ፡ መድኃኒት፡ ለአዕይንቲነ፨ ወመዓዛ፡ ሠናይ፡ ለአዕናፊነ፨ ወማኅተመ፡ ጽድቅ፡

| | ለከናፍሪነ፨ ወሞጣኅተ፡ ፍሥሐ፡ ለዘባንነ፤ ወእልታሃ፡ መዊዕ፡ ለእንግድዓነ፨ ወአውቃፈ፡ ምሕረት፡ ለአዕደዊነ፨ ወህልቀተ፡ ፍቅር፡ ለአፃብኢነ፨ ወአሣዕነ፡ አድኅኖ፡ ለአዕጋሪነ፨ ወስቴ፡ ሕይወት፡ ለጽምዕነ፨ ወኅብዝ/ተ/፡ መና፡ ለረሀብነ፤ ወኀበ፡ ቦአ፡ ቤተ፡ መርዓ፡ ምስሌሁ፡ ያብአነ፨ በጽላሎተ፡ ክነፊሁ፡ እንዘ፡ ይክድነነ፨ ወኀበ፡ ረፈቀ፡ ያርፍቀነ፨ አሜን፡ ወአሜን፨ - ለዘጸሐፎ፡ ኪዳነ፡ ቃል፡ ዘማርያም፡ ወለዘአጽሐፎ፡ ዘሚካኤል፡ ወለዘ፡ አንበቦ፡ ወለዘተርጐሞ፡ ወለዘሰምዓ፡ ቃላቲሁ፡ ወለዘይቤ፡ አሜን፨ ኅቡረ፡ ይምሐረነ፡ እግዚአብሔር፡ በመንግሥተ፡ ሰማያት፡ ለዓለመ፡ ዓለም፡ አሜን፨| ስምዑኒ፡ እንግርክሙ፡ ኦእኃዊየ፡ የ፡ ወኢይበል፡ ተሌልዮ፡ አሐዱ፡ ብእሲ፡ እምኔክሙ፤ አነ፡ አጽሐክዎ፡ በእክልየ፡ ወኢማየ፤ ቀዲሕየ፡ ወኢበንዋይየ፡ ውሂብየ፨ አላ፡ ኅቡረ፡ ሲሰዩኒ፡ ሰብአ፡ ሀገር፡ ኅብከተኒ፡ ወማየኒ፡ ወንጥዋይሰ፡ ዘ፳ ወ፬ space በቀዳማይ፡ ሰንበት፡ ኢወሀበኒ፡ ሲሳይየ፡ አላ፡ ውእቱ፡ ተክለ፡ ሥሉስ፡ ይሴሰየኒ፡ እምዘበ፡ ጥሪተ፡ ወእምዘቦ፡ ቀዲሆ፡ ማየ፡ ወብእሲቱኒ፡ ዓመተ፡ ልዑል፡ ወኵሎ፡ ዘአዘዘ፡ ትገብር፡ ሎቱ፡ በእንተ፡ ሰሙዓተ፡ ዝክሩ፡ ለላሊበላ፡ ወእሙንቱሰ፡ ሰክሩ፡ እምፍቅረ፡ ጸሎቱ፡ ወእግዚአብሔር፡ ይጽሐፍ፡ ስሞሙ፡ ኀበ፡ ዓምደ፡ ወርቅ፡ ለዓለመ፡ ዓለም፡ አሜን፡ | | etc